ﺧﯩﺘﺎﻱ ﯞﻩ ﺋﯘﻳﻐﯘﺭ ﺋﯧﻠﯩﺪﻩ ﺋﻮﻗﯘﻏﯘﭼﯩﻼﺭﻧﯩﯔ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺋﻪﻫﯟﺍﻟﻰ ﺑﺎﺭﻏﺎﻧﺴﯧﺮﻯ ﺋﯧﻐﯩﺮﻻﺷﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﻳﯧﻘﯩﻨﺪﺍ ﺧﯩﺘﺎﻳﺪﺍ، ﺑﯧﻴﺠﯩﯔ، ﺷﺎﯕﺨﻪﻱ، ﮔﯘﺋﺎﯕﺠﯘ، ﻧﻪﻧﺠﯩﯔ، ﯞﯗﺧﻪﻥ ﻗﺎﺗﺎﺭﻟﯩﻖ ﺟﺎﻳﻼﺭﺩﯨﻜﻰ 1000 ﻧﻪﭘﻪﺭ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﻯ ﺋﺎﺭﯨﺴﯩﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ ﺑﯩﺮ ﻗﯧﺘﯩﻤﻠﯩﻖ ﺗﻪﻛﺸﯜﺭﯛﺷﺘﯩﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﺋﯘﻻﺭﻧﯩﯔ ﺋﺎﺭﯨﺴﯩﺪﯨﻜﻰ 4 ﺗﯩﻦ ﺑﯩﺮ ﻗﯩﺴﻤﯩﺪﯨﻦ ﺋﺎﺭﺗﯘﻗﻰ ﺋﯚﻟﯜﯞﯦﻠﯩﺶ ﻧﯩﻴﯩﺘﯩﺪﻩ ﺑﻮﻟﻐﺎﻥ.

ﺋﯚﺯﯨﻨﻰ ﺋﯚﻟﺘﯜﺭﯛﯞﺍﻟﯩﺪﯨﻐﺎﻧﻼﺭﻧﯩﯔ ﻧﯩﺴﺒﯩﺘﻰ ﻳﯘﻗﯩﺮﯨﻠﯩﻤﺎﻗﺘﺎ

ﻣﯘﻧﺎﺳﯩﯟﻩﺗﻠﯩﻚ ﻣﻪﻟﯘﻣﺎﺗﻼﺭﺩﺍ ﻛﯚﺭﺳﯩﺘﯩﻠﯩﺸﯩﭽﻪ، ﻫﺎﺯﯨﺮ ﺧﯩﺘﺎﻳﺪﯨﻜﻰ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﻯ ﺋﺎﺭﯨﺴﯩﺪﺍ، ﭘﯩﺴﺨﯩﻚ ﭼﯜﺷﻜﯜﻧﻠﯜﻛﻜﻪ ﺩﯗﭺ ﻛﯧﻠﯩﯟﺍﺗﻘﺎﻥ ﺋﻮﻗﯘﻏﯘﭼﯩﻼﺭﻧﯩﯔ ﻧﯩﺴﺒﯩﺘﻰ 80 ‏- ﻳﯩﻠﻼﺭﻏﺎ ﻗﺎﺭﯨﻐﺎﻧﺪﺍ 30 % ﺋﯚﺭﻟﯩﮕﻪﻥ ﺷﯘﻧﯩﯔ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ، ﺋﻮﻗﯘﻏﯘﭼﯩﻼﺭﻧﯩﯔ ﺋﯚﻟﯜﯞﯦﻠﯩﺶ ﻧﯩﺴﺒﯩﺘﯩﻤﯘ ﺋﯩﻠﮕﯩﺮﯨﻜﻰ ﻳﯩﻠﻼﺭﻏﺎ ﺳﯧﻠﯩﺸﺘﯘﺭﯗﻟﻐﺎﻧﺪﺍ ﺷﯩﺪﺩﻩﺕ ﺑﯩﻠﻪﻥ ﺋﯚﺭﻟﯩﮕﻪﻥ.

ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ ﺧﯩﺘﺎﻳﺪﺍ ﻳﯜﺯ ﺑﯧﺮﯨﯟﺍﺗﻘﺎﻥ ﺋﻮﻗﯘﻏﯘﭼﯩﻼﺭ ﺋﺎﺭﯨﺴﯩﺪﯨﻜﻰ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺋﻪﻫﯟﺍﻟﻰ ﺋﺎﺩﻩﻣﻨﻰ ﭼﯚﭼﯜﺗﻜﯩﺪﻩﻙ ﻫﺎﻟﻪﺗﻜﻪ ﻳﻪﺗﻜﻪﻥ ﺑﻮﻟﯘﭖ، ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻼﺭﻣﯘ ﺑﺎﺭﻏﺎﻧﺴﯧﺮﻯ ﻛﯚﭘﻪﻳﮕﻪﻥ. ﻣﻪﺳﯩﻠﻪﻥ، ﺑﯘﻟﺘﯘﺭ 12 - ﺋﺎﻳﺪﺍ ﺟﯘﯕﺸﻪﻥ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﻮﻗﯘﯞﺍﺗﻘﺎﻥ ﺑﯩﺮ ﻗﯩﺰ ﺋﻮﻗﯘﻏﯘﭼﻰ ﺷﯩﯟﯨﺮﻏﺎﻥ ﺳﻮﻏﯘﻗﺘﺎ ﺋﯚﺯﯨﻨﻰ ﺑﯩﻨﺎﺩﯨﻦ ﻳﻪﺭﮔﻪ ﺋﯧﺘﯩﭗ ﻳﺎﺵ ﻫﺎﻳﺎﺗﯩﺪﯨﻦ ﺋﺎﻳﺮﯨﻠﻐﺎﻥ. ﺑﯘ ﻳﯩﻞ 3 ‏- ﺋﺎﻳﺪﺍ، ﺧﯘﺍﻧﻪﻥ ﻳﯧﺰﺍ ﺋﯩﮕﯩﻠﯩﻚ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﺎﺳﭙﯩﺮﺍﻧﺘﻠﯩﻖ ﺋﻮﻗﯘﯞﺍﺗﻘﺎﻥ ﺑﯩﺮ ﻗﯩﺰ ﺋﻮﻗﯘﻏﯘﭼﯩﻤﯘ ﺑﯩﻨﺎﺩﯨﻦ ﺳﻪﻛﺮﻩﭖ ﺋﯚﻟﯜﯞﺍﻟﻐﺎﻥ ﺷﯘﻧﺪﺍﻗﻼ ﻣﻪﺯﻛﯘﺭ ﻣﻪﻛﺘﻪﭘﺘﻪ، ﺑﯩﺮ ﺋﺎﻳﻨﯩﯔ ﺋﯩﭽﯩﺪﻩ 4 ﻗﯧﺘﯩﻢ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﯞﻩﻗﻪﺳﻰ ﻳﯜﺯ ﺑﻪﺭﮔﻪﻥ. ﺑﯘﻻﺭﺩﯨﻦ ﺑﺎﺷﻘﺎ ﻳﻪﻧﻪ، ﺑﯘ ﻳﯩﻞ 5 ‏- ﺋﺎﻳﻨﯩﯔ 15 - ﻛﯜﻧﻰ ﺑﯧﻴﺠﯩﯖﺪﯨﻜﻰ ﺟﯘﯕﮕﻮ ﺧﻪﻟﻖ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺩﻭﻛﺘﻮﺭﻟﯘﻕ ﺋﻮﻗﯘﯞﺍﺗﻘﺎﻥ ﺑﯩﺮ ﺋﻮﻗﯘﻏﯘﭼﻰ ﺑﯩﻠﻪﻥ ﺑﯧﻴﺠﯩﯔ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺩﻭﻛﺘﻮﺭﻻﺭﻧﻰ ﺗﻪﺭﺑﯩﻴﯩﻠﯩﮕﯜﭼﻰ ﭘﺮﻭﻓﯧﺴﺴﻮﺭ ﯞﯦﻨﻠﯩﻤﯘ ﺋﯚﺯﯨﻨﻰ ﺋﯚﻟﺘﯜﺭﯛﯞﺍﻟﻐﺎﻥ.

ﺑﯘ ﺧﯩﻞ ﺋﻪﻫﯟﺍﻝ ﺋﯘﻳﻐﯘﺭ ﺋﯧﻠﯩﺪﯨﻤﯘ ﻣﻪﯞﺟﯘﺕ

ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺋﻪﻫﯟﺍﻟﻰ ﭘﻪﻗﻪﺕ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﯨﻼ ﺋﻪﻣﻪﺱ، ﺑﻪﻟﻜﻰ ﺋﯘﻳﻐﯘﺭ ﺋﯧﻠﯩﺪﯨﻤﯘ ﺋﻮﺧﺸﺎﺷﻼ ﻣﻪﯞﺟﯘﺕ ﺑﻮﻟﯘﭖ ﺗﯘﺭﻣﺎﻗﺘﺎ. ﻳﯧﻘﯩﻨﺪﺍ ﺭﺍﺩﯨﺌﻮﻣﯩﺰﻧﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻥ، ﻗﯩﺰﻯ ﺋﺎﻟﯩﻲ ﻣﻪﻛﺘﻪﭘﺘﻪ ﺋﻮﻗﯘﯞﺍﺗﻘﺎﻥ ﺋﯜﺭﯛﻣﭽﯩﺪﻩ ﺗﯘﺭﯗﺷﻠﯘﻕ ﺑﯩﺮ ﺋﯘﻳﻐﯘﺭ ﺯﯨﻴﺎﻟﯩﻴﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﻟﯩﻲ ﻣﻪﻛﺘﻪﭘﻠﻪﺭ ﺋﺎﺭﯨﺴﯩﺪﺍ، ﺋﻮﻗﯘﻏﯘﭼﯩﻼﺭﻧﯩﯔ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺋﻪﻫﯟﺍﻟﻰ ﺑﯩﺮ ﻗﻪﺩﻩﺭ ﺋﯧﻐﯩﺮ ﺑﻮﻟﻐﺎﻥ ﻣﻪﻛﺘﻪﭖ ﺷﯩﻨﺠﺎﯓ ﻣﯧﺪﯨﺘﺴﯩﻨﺎ ﺋﯘﻧﯩﯟﯦﺮﺳﯩﺘﯧﺘﻰ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯨﻜﻪﻥ. ﻣﻪﺯﻛﯘﺭ ﻣﻪﻛﺘﻪﭘﺘﻪ، ﺋﻮﻗﯘﻏﯘﭼﯩﻼﺭﻧﻰ ﻗﺎﻳﺘﺎ ﺋﯩﻤﺘﯩﻬﺎﻥ ﺑﯧﺮﯨﺸﻜﻪ ﻣﻪﺟﺒﯘﺭﻻﭖ ﻫﻪﻣﺪﻩ ﺩﺍﯞﺍﻣﻠﯩﻖ ﺋﯩﻤﺘﯩﻬﺎﻧﺪﯨﻦ ﺋﯚﺗﻜﯜﺯﻣﻪﻱ، ﻫﻪﺗﺘﺎ 59 ﻳﺎﻛﻰ 59. 5 ﻧﻮﻣﯘﺭ ﺑﯩﻠﻪﻥ ﻗﺎﻟﺪﯗﺭﯗﭖ ﻗﻮﻳﯩﺪﯨﻐﺎﻥ ﺋﻪﻫﯟﺍﻝ ﻧﺎﻫﺎﻳﯩﺘﻰ ﺋﻮﻣﯘﻣﻼﺷﻘﺎﻥ ﺋﯩﻜﻪﻥ. ﺷﯘﯕﺎ ﭘﯘﻟﻰ ﺑﺎﺭﻻﺭ ﭘﯘﻝ ﺗﯚﻟﻪﭖ ﺋﯩﻤﺘﯩﻬﺎﻧﺪﯨﻦ ﺋﯚﺗﯩﺪﯨﻐﺎﻥ، ﭘﯘﻟﻰ ﻳﻮﻗﻼﺭ ﻧﻪﭼﭽﻪ ﻗﯧﺘﯩﻢ ﺋﯩﻤﺘﯩﻬﺎﻥ ﺑﯧﺮﯨﭙﻤﯘ ﺋﯚﺗﻪﻟﻤﻪﻱ ﺋﺎﺧﯩﺮﻯ ﺋﯜﻣﯩﺪﺳﯩﺰﻟﯩﻨﯩﭗ ﺋﯚﺯﯨﻨﻰ ﺋﯚﻟﺘﯜﺭﯨﯟﺍﻟﯩﺪﯨﻐﺎﻥ ﺋﻪﻫﯟﺍﻝ ﺩﺍﯞﺍﻣﻠﯩﻖ ﻳﯜﺯ ﺑﻪﺭﮔﻪﻥ. ﻣﻪﺳﯩﻠﻪﻥ، ﺑﯘ ﻳﯩﻞ ﺋﻪﺗﯩﻴﺎﺯﺩﺍ، ﻣﻪﺯﻛﯘﺭ ﻣﻪﻛﺘﻪﭘﺘﻪ ﺋﻮﻗﯘﯞﺍﺗﻘﺎﻥ ﺑﯩﺮ ﺋﯘﻳﻐﯘﺭ ﻗﯩﺰ ﺋﻮﻗﯘﻏﯘﭼﻰ ﺑﯘ ﺧﯩﻞ ﺋﯩﻤﺘﯩﻬﺎﻥ ﺑﯧﺴﯩﻤﻰ ﺗﯜﭘﻪﻳﻠﯩﺪﯨﻦ ﺋﯚﺯﯨﻨﻰ ﺑﯩﻨﺎﺩﯨﻦ ﺋﯧﺘﯩﭗ، ﻫﺎﻳﺎﺗﯩﺪﯨﻦ ﺋﺎﻳﺮﯨﻠﻐﺎﻥ.

ﺳﻪﯞﻩﺏ: ﺭﻭﻫﻰ ﺑﯧﺴﯩﻢ ﺑﺎﺭﻏﺎﻧﺴﯧﺮﻯ ﺋﯧﻐﯩﺮﻻﺷﻤﺎﻗﺘﺎ

ﻛﯚﭘﻠﯩﮕﻪﻥ ﺋﺎﻧﺎﻟﯩﺰﭼﯩﻼﺭ، ﺧﯩﺘﺎﻳﺪﯨﻜﻰ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﺋﻪﻫﯟﺍﻟﯩﻨﯩﯔ ﻳﯩﻠﺪﯨﻦ -ﻳﯩﻠﻐﺎ ﺋﯧﻐﯩﺮﻟﯩﺸﯩﯟﺍﺗﻘﺎﻧﻠﯩﻘﯩﻨﻰ ﺋﺎﻧﺎﻟﯩﺰ ﻗﯩﻠﯩﭗ، "ﺑﯘﻧﺪﺍﻕ ﺑﻮﻟﯘﺷﯩﻨﯩﯔ ﺳﻪﯞﻩﺑﻰ، ﺋﻮﻗﯘﻏﯘﭼﯩﻼﺭ ﺩﯗﭺ ﻛﯧﻠﯩﯟﺍﺗﻘﺎﻥ ﺭﻭﻫﻰ ﺟﻪﻫﻪﺗﺘﯩﻜﻰ ﺑﯧﺴﯩﻤﻨﯩﯔ ﻳﯩﻠﺪﯨﻦ ﻳﯩﻠﻐﺎ ﺋﯧﻐﯩﺮﻟﯩﺸﯩﯟﺍﺗﻘﺎﻧﻠﯩﻘﻰ ﻫﻪﻣﺪﻩ ﺋﯘﻻﺭﻧﯩﯔ ﻣﻪﻳﻠﻰ ﻣﻪﻛﺘﻪﭖ ﺗﻪﺭﯨﭙﯩﺪﯨﻦ ﺑﻮﻟﺴﯘﻥ ﻳﺎﻛﻰ ﺋﺎﺗﺎ ‏-ﺋﺎﻧﯩﻼﺭ ﺗﻪﺭﯨﭙﯩﺪﯨﻦ ﺑﻮﻟﺴﯘﻥ ﻫﯧﭽﻘﺎﻧﺪﺍﻕ ﻳﺎﺭﺩﻩﻣﮕﻪ ﺋﯧﺮﯨﺸﻪﻟﻤﯩﮕﻪﻧﻠﯩﻜﯩﺪﯨﻦ " ﺩﻩﭖ ﻛﯚﺭﺳﻪﺗﻤﻪﻛﺘﻪ.

ﺋﯘﻳﻐﯘﺭ ﺋﯧﻠﯩﺪﯨﻜﻰ ﻣﻪﻟﯘﻡ ﺑﯩﺮ ﺋﯘﻧﯩﯟﯦﺮﺳﯩﺘﯧﺘﺘﺎ ﺋﯩﺸﻠﻪﻳﺪﯨﻐﺎﻥ ﺑﯩﺮ ﻣﺎﺋﺎﺭﯨﭙﭽﯩﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻣﻪﻣﻠﯩﻜﻪﺕ ﺑﻮﻳﯩﭽﻪ ﻧﯘﻗﺘﯩﻠﯩﻖ ﻣﻪﻛﺘﻪﭘﻠﻪﺭﻧﯩﯔ ﺑﯩﺮﻯ ﺑﻮﻟﯘﭖ ﻫﯧﺴﺎﺑﻼﻧﻐﺎﻥ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﺪﯨﻤﯘ، ﺋﻮﻗﯘﻏﯘﭼﯩﻼﺭﻧﯩﯔ ﺋﯚﺯﯨﻨﻰ ﺋﯚﻟﺘﯜﺭﯛﯞﯦﻠﯩﺶ ﯞﻩﻗﻪﺳﻰ ﻳﯜﺯ ﺑﯧﺮﯨﭗ ﺗﯘﺭﯨﺪﯨﻜﻪﻥ. ﻣﻪﺳﯩﻠﻪﻥ، ﺑﯘﻟﺘﯘﺭﻻ ﺑﯩﺮ ﺧﯩﺘﺎﻱ ﺋﻮﻗﯘﻏﯘﭼﻰ ﺑﯩﻨﺎﺩﯨﻦ ﺋﯚﺯﯨﻨﻰ ﺗﺎﺷﻼﭖ ﺋﯚﻟﯜﯞﺍﻟﻐﺎﻥ ﺋﯩﻜﻪﻥ.

ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺑﯘ ﻣﺎﺋﺎﺭﯨﭗ ﺳﺎﻫﻪﺳﯩﺪﯨﻜﻰ ﺧﯩﺰﻣﻪﺗﭽﯩﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻫﺎﺯﯨﺮ ﺋﺎﻟﯩﻲ ﻣﻪﻛﺘﻪﭘﻠﻪﺭﺩﻩ، ﺩﻩﺭﺱ ﺑﯧﺴﯩﻤﻨﯩﯔ ﻫﻪﺩﺩﯨﺪﯨﻦ ﺗﺎﺷﻘﯩﺮﻯ ﺋﯧﻐﯩﺮ ﺑﻮﻟﻐﺎﻧﻠﯩﻘﻰ ﺗﯜﭘﻪﻳﻠﯩﺪﯨﻦ، ﺑﻮﻟﯘﭘﻤﯘ ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭﻏﺎ ﺋﯘﻳﻐﯘﺭ ﺋﻮﻗﯘﺗﻘﯘﭼﯩﻼﺭ ﺋﯚﺯ ﺗﯩﻠﯩﺪﺍ ﺋﻪﻣﻪﺱ، ﺑﻪﻟﻜﻰ ﺧﯩﺘﺎﻱ ﺗﯩﻠﯩﺪﺍ ﺩﻩﺭﺱ ﺋﯚﺗﯜﯞﺍﺗﻘﺎﻧﻠﯩﻘﺘﯩﻦ، ﺋﻮﻗﯘﻏﯘﭼﯩﻼﺭ ﺭﻭﻫﻰ ﺟﻪﻫﻪﺗﺘﯩﻦ ﺋﯩﻨﺘﺎﻳﯩﻦ ﻗﺎﺗﺘﯩﻖ ﺑﯧﺴﯩﻤﻐﺎ ﺩﯗﭺ ﻛﻪﻟﮕﻪﻥ ﺑﻮﻟﯘﭖ، ﺑﻪﺭﺩﺍﺷﻠﯩﻖ ﺑﯧﺮﻩﻟﻤﻪﻳﺪﯨﻐﺎﻥ ﺋﻪﻫﯟﺍﻟﻼﺭ ﻳﯜﺯ ﺑﻪﺭﻣﻪﻛﺘﻪ ﺋﯩﻜﻪﻥ. (ﻣﯧﮭﺮﯨﺒﺎﻥ)