ﺧﯩﺘﺎﻳﻨﯩﯔ ﭘﺎﻣﯩﺮ ﯞﻩﻗﻪﺳﻰ ﺗﻮﻏﺮﯨﺴﯩﺪﯨﻜﻰ ﭘﺎﻛﯩﺘﻰ

• ﺋﯩﺨﺘﯩﻴﺎﺭﻯ ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

1 – ﺋﺎﻳﻨﯩﯔ 5 – ﻛﯜﻧﻰ ﺧﯩﺘﺎﻱ ﺗﻪﺭﻩﭖ ﭘﺎﻣﯩﺮ ﺗﺎﻏﻠﯩﻖ ﺭﺍﻳﯘﻧﯩﺪﺍ 18 ﺗﯧﺮﺭﻭﺭﯨﺴﺘﻨﻰ ﺋﯧﺘﯩﭗ ﺋﯚﻟﺘﯜﺭﯛﭖ، 17 ﺗﯧﺮﺭﻭﺭﯨﺴﺘﻨﻰ ﻗﻮﻟﻐﺎ ﭼﯜﺷﯜﺭﮔﻪﻧﻠﯩﻜﻰ ﻫﻪﻗﻘﯩﺪﻩ ﺧﻪﯞﻩﺭ ﺋﯧﻼﻥ ﻗﯩﻠﻐﺎﻧﺪﯨﻦ ﻛﯧﻴﯩﻦ، ﺩ ﺋﯘ ﻕ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﺩ ﺋﯘ ﻕ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯦﺸﯩﺘﻼﺭ ﺋﺎﺭﻗﺎ – ﺋﺎﺭﻗﯩﺪﯨﻦ ﺑﺎﻳﺎﻧﺎﺗﻼﺭ ﺋﯧﻼﻥ ﻗﯩﻠﯩﭗ، ﺧﯩﺘﺎﻳﻨﯩﯔ ﺗﯧﺮﺭﻭﺭﻟﯘﻗﻘﺎ ﺯﻩﺭﺑﻪ ﺑﯧﺮﯨﺶ ﺑﺎﻫﺎﻧﯩﺴﯩﺪﺍ، ﺋﯘﻳﻐﯘﺭﻻﺭ ﺋﯜﺳﺘﯩﺪﯨﻦ ﻗﺎﻧﻠﯩﻖ ﻗﯩﺮﻏﯩﻨﭽﯩﻠﯩﻖ ﻳﯜﺭﮔﯜﺯﯛﺷﻨﯩﯔ ﺑﯩﺮ ﺋﺎﺳﺎﺳﯩﻨﻰ ﻫﺎﺯﯨﺮﻻﯞﺍﺗﻘﺎﻥ ﺑﻮﻟﯘﺷﻰ ﻣﯘﻣﻜﯩﻨﻠﯩﻜﻨﻰ ﺋﻪﺳﻜﻪﺭﺗﻜﻪﻥ ﺋﯩﺪﻯ.

ﺩﻩﺭﯞﻩﻗﻪ، ﺋﯘﺯﯗﻥ ﺋﯚﺗﻤﻪﻱ ﭘﯜﺗﯜﻥ ﺋﯘﻳﻐﯘﺭ ﺩﯨﻴﺎﺭﯨﺪﺍ ﺟﯩﺪﺩﯨﻲ ﻫﺎﻟﻪﺕ ﭘﻪﻳﺪﺍ ﺑﻮﻟﯘﭖ، ﺋﺎﺗﺎﻟﻤﯩﺶ "ﺗﯧﺮﺭﻭﺭﯨﺴﺘﻼﺭ" ﺑﯩﻠﻪﻥ ﺋﺎﻻﻗﯩﺴﻰ ﺑﺎﺭ ﺩﯦﮕﻪﻥ ﮔﯘﻣﺎﻥ ﺑﯩﻠﻪﻥ 1500 ﺩﯨﻦ ﺋﺎﺭﺗﯘﻕ ﺋﺎﺩﻩﻡ ﻗﻮﻟﻐﺎ ﺋﯧﻠﯩﻨﻐﺎﻥ. ﮔﻪﺭﻣﺎﻧﯩﻴﯩﺪﯨﻜﻰ ﺋﯘﻳﻐﯘﺭ ﺯﯨﻴﺎﻟﯩﺴﻰ ﺋﺎﻟﯩﻤﺠﺎﻥ ﺋﻪﭘﻪﻧﺪﻯ، ﺋﻪﮔﻪﺭ ﭘﺎﻣﯩﺮﺩﯨﻜﻰ ﺑﯘ ﯞﻩﻗﻪ ﺭﺍﺳﺖ ﺑﻮﻟﻐﺎﻥ ﺗﻪﻗﺪﯨﺮﺩﻩ، ﺋﯘﻳﻐﯘﺭﻻﺭﻧﯩﯔ ﺑﯘ ﻛﯜﺭﯨﺸﯩﻨﯩﯔ ﻫﻪﻗﻠﯩﻖ ﺑﯩﺮ ﻛﯜﺭﻩﺵ ﺳﺎﻧﯩﻠﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ ﺋﯚﺗﺘﻰ.

ﺧﯩﺘﺎﻳﻨﯩﯔ ﻫﻪﺭﯨﻜﯩﺘﻰ ﺧﻪﻟﻘﺌﺎﺭﺍﻧﯩﯔ ﮔﯘﻣﺎﻧﯩﻨﻰ ﻗﻮﺯﻏﯩﺪﻯ

ﻣﻪﺯﻛﯘﺭ ﯞﻩﻗﻪﮔﻪ ﻗﺎﺭﯨﺘﺎ ﺋﻪﻧﮕﯩﻠﯩﻴﻪ، ﻓﺮﺍﻧﺴﯩﻴﻪ ﯞﻩ ﺋﺎﻣﯧﺮﯨﻜﯩﺪﯨﻜﻰ ﭼﻪﺗﺌﻪﻝ ﻣﯘﺗﻪﺧﻪﺳﺴﯩﺴﻠﯩﺮﯨﻤﯘ ﺋﯚﺯ ﻣﯘﻻﻫﯩﺰﯨﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ، ﭘﺎﻣﯩﺮ ﯞﻩﻗﻪﺳﯩﻨﯩﯔ ﺑﯩﺮ ﺗﻮﻗﯘﻟﻤﺎ ﺑﻮﻟﯘﺷﻰ ﻣﯜﻣﻜﯩﻨﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﻫﻪﻣﺪﻩ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺑﯘ ﻫﻪﻗﺘﻪ ﻫﯩﭻ ﻗﺎﻧﺪﺍﻕ ﺩﻩﻟﯩﻞ – ﺋﯩﺴﭙﺎﺕ ﻛﯚﺭﺳﯩﺘﯩﭗ ﺑﯧﺮﻩﻟﻤﯩﮕﻪﻧﻠﯩﻜﻰ ﺑﯩﻠﻪﻥ ﺋﻪﻳﯩﺒﻠﯩﮕﻪﻥ ﺋﯩﺪﻯ. ﺑﻮﻟﯘﭘﻤﯘ، ﺋﺎﻣﯧﺮﯨﻜﺎ ﺗﯩﻨﭻ ﺋﻮﻛﻴﺎﻥ ﺗﻪﺗﻘﯩﻘﺎﺕ ﺋﯩﻨﺴﺘﯩﺘﯘﺗﯩﻨﯩﯔ ﭘﺮﻭﻓﯧﺴﺴﻮﺭﻯ ﮔﻼﺩﻧﯧﻲ ﺋﻪﭘﻪﻧﺪﻯ 5 – ﻳﺎﻧﯟﺍﺭ ﭘﺎﻣﯩﺮ ﯞﻩﻗﻪﺳﻰ ﻫﻪﻗﻘﯩﺪﻩ ﺧﯩﺘﺎﻳﻨﯩﯔ ﻫﯧﻠﯩﻐﯩﭽﻪ ﺋﻪﻗﯩﻠﮕﻪ ﺋﯘﻳﻐﯘﻥ ﺑﯩﺮ ﭘﺎﻛﯩﺘﻨﻰ ﺋﻮﺗﺘﯘﺭﯨﻐﺎ ﺋﺎﭼﯩﻘﺎﻟﻤﯩﻐﺎﻧﻠﯩﻘﯩﻨﻰ ﺗﯩﻠﻐﺎ ﺋﯧﻠﯩﭗ، ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﯨﺰﯨﻤﻐﺎ ﺑﺎﻏﻼﭖ ﺑﺎﺳﺘﯘﺭﻣﺎﻗﭽﻰ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻧﺪﯨﻦ ﻛﯧﻴﯩﻦ، ﺑﯘ ﯞﻩﻗﻪ ﻫﻪﻗﻘﯩﺪﯨﻜﻰ ﻣﯘﻻﻫﯩﺰﯨﻠﻪﺭ ﺧﻪﻟﻖ`ﺋﺎﺭﺍ ﺟﺎﻣﺎﺋﻪﺗﭽﯩﻠﯩﻜﻨﯩﯔ ﺩﯨﻘﻘﯩﺘﯩﻨﻰ ﭼﯧﻜﯩﺸﻜﻪ ﺑﺎﺷﻠﯩﻐﺎﻥ. ﺑﯘ ﺳﻪﯞﻩﺑﻠﯩﻚ ﺧﯩﺘﺎﻱ ﺗﻪﺭﻩﭘﻨﯩﯔ "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﻫﻪﺭﯨﻜﯩﺘﻰ ﮔﯘﺭﯗﻫﻰ ﭘﻪﻳﺪﺍ ﻗﯩﻠﻐﺎﻥ ﯞﻩﻗﻪ" ﺩﻩﭖ ﺋﯧﻼﻥ ﻗﯩﻠﻐﺎﻥ ﺑﯘ ﺧﻪﯞﯨﺮﯨﻨﯩﯔ ﺭﺍﺳﺘﻠﯩﻘﯩﻨﻰ ﺋﯩﺴﭙﺎﺗﻼﺷﻘﺎ ﺳﻪﻝ ﻗﺎﺭﯨﻤﯩﻐﺎﻧﻠﯩﻘﻰ ﻣﻪﻟﯘﻡ.

ﺧﻪﻟﻘﺌﺎﺭﺍﻧﯩﯔ ﻫﻪﺭ ﺧﯩﻞ ﮔﯘﻣﺎﻧﻰ ﺑﺎﻫﺎﻟﯩﺮﯨﺪﯨﻦ ﺭﺍﻫﻪﺗﺴﯩﺰﻟﻪﯕﻪﻥ ﺧﯩﺘﺎﻱ ﻫﯚﻛﯜﻣﯩﺘﻰ، ﮔﻪﺭﭼﻪ ﺑﯜﮔﯜﻧﮕﻪ ﻗﻪﺩﻩﺭ 5 – ﻳﺎﻧﯟﺍﺭ ﭘﺎﻣﯩﺮ ﯞﻩﻗﻪﺳﯩﻨﯩﯔ ﻫﻪﻗﯩﻘﯩﺘﯩﻨﻰ ﺋﺎﺷﻜﺎﺭﯨﻼﻳﺪﯨﻐﺎﻥ ﺑﯩﺮﻩﺭ ﭘﺎﺭﭼﻪ ﺳﯜﺭﻩﺗﻨﻰ ﻛﯚﺭﺳﯩﺘﻪﻟﻤﯩﮕﻪﻥ ﺑﻮﻟﺴﯩﻤﯘ، ﺋﯚﺯ ﻣﯘﺧﺒﯩﺮﻟﯩﺮﯨﻨﯩﯔ ﺭﻭﻟﯩﻐﺎ ﺗﺎﻳﯩﻨﯩﭗ، ﭼﻪﺗﺌﻪﻝ ﺋﺎﻟﯩﻤﻠﯩﺮﯨﻨﯩﯔ، ﺟﯜﻣﻠﯩﺪﯨﻦ ﭘﺮﻭﻓﯧﺴﺴﻮﺭ ﮔﻼﺩﻧﯧﻲ ﺋﻪﭘﻪﻧﺪﯨﻨﯩﯔ ﻗﺎﺭﺍﺷﻠﯩﺮﯨﻐﺎ ﺭﻩﺩﺩﯨﻴﻪ ﺑﯧﺮﯨﺸﻜﻪ ﺗﯩﺮﯨﺸﻘﺎﻥ. "ﻳﻪﺭ ﺷﺎﺭﻯ ﯞﺍﻗﯩﺖ ﮔﯧﺰﯨﺘﻰ" ﻧﯩﯔ ﻣﯘﺧﺒﯩﺮﻯ ﭼﯧﯖﮕﺎﯓ 26 – ﻳﺎﻧﯟﺍﺭ ﻛﯜﻧﻰ ﻣﻪﺯﻛﯘﺭ ﮔﯧﺰﯨﺘﺘﻪ "ﺷﯩﻨﺠﺎﯕﺪﺍ ﺋﺎﺭﻣﯩﻴﻪ – ﺧﻪﻟﻘﻨﯩﯔ ﻫﻪﻣﻜﺎﺭﻟﯩﺸﯩﭗ، ﺗﯧﺮﺭﻭﺭﭼﻰ ﻛﯜﭼﻠﻪﺭﮔﻪ ﺯﻩﺭﺑﻪ ﺑﯧﺮﯨﺸﯩﻨﯩﯔ ﭘﺎﻛﯩﺘﻰ" ﻧﺎﻣﻠﯩﻖ ﺑﯩﺮ ﻣﺎﻗﺎﻟﻪ ﺋﯧﻼﻥ ﻗﯩﻠﻐﺎﻥ. ﻣﺎﻗﺎﻟﻪ؛ ﺋﻪﻧﮕﯩﻠﯩﻴﻪ، ﻓﺮﺍﻧﺴﯩﻴﻪ ﯞﻩ ﺋﺎﻣﯧﺮﯨﻜﯩﻨﯩﯔ ﭘﺎﻣﯩﺮ ﯞﻩﻗﻪﺳﯩﮕﻪ ﺋﯩﺸﻪﻧﻤﯩﮕﻪﻧﻠﯩﻜﻰ، ﭘﺎﻛﯩﺖ ﺗﻪﻟﻪﭖ ﻗﯩﻠﻐﺎﻧﻠﯩﻘﻰ ﻫﻪﻣﺪﻩ ﺋﯘﻻﺭﻧﯩﯔ ﺩ ﺋﯘ ﻕ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮﻧﯩﯔ ﺗﯩﻠﻰ ﺋﺎﺭﻗﯩﻠﯩﻖ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺋﻪﻳﯩﺒﻠﯩﮕﻪﻧﻠﯩﻜﻰ، ﺋﯚﺯﯨﻨﯩﯔ ﭘﺎﻣﯩﺮ ﯞﻩﻗﻪﺳﯩﻨﯩﯔ ﻫﻪﻗﯩﻘﯩﺘﯩﻨﻰ ﺋﯧﻨﯩﻘﻼﺵ ﺋﯜﭼﯜﻥ ﻧﻪﻕ ﻣﻪﻳﺪﺍﻧﻐﺎ ﺑﯧﺮﯨﭗ، 1 – ﻗﻮﻝ ﻣﺎﺗﯧﺮﯨﻴﺎﻟﻐﺎ ﺋﯧﺮﯨﺸﻤﻪﻛﭽﻰ ﺑﻮﻟﻐﺎﻧﻠﯩﻘﻰ ﺑﯩﻠﻪﻥ ﺑﺎﺷﻼﻧﻐﺎﻥ.

ﺧﯩﺘﺎﻱ ﻣﯘﺧﺒﯩﺮﯨﻨﯩﯔ ﺧﺎﺗﯩﺮﯨﻠﯩﺮﻯ ﯞﻩﻗﻪﻧﯩﯔ ﺭﺍﺳﻠﯩﻘﯩﺪﺍ ﮔﯘﻣﺎﻥ ﻗﻮﺯﻏﺎﻳﺪﯗ

ﻣﯘﺧﭙﯩﺮ ﭼﯧﯖﮕﺎﯓ 9 – ﻳﺎﻧﯟﺍﺭ ﻛﯜﻧﻰ ﻗﻪﺷﻘﻪﺭﮔﻪ ﻳﯧﺘﯩﭗ ﻛﯧﻠﯩﭗ، 10 – ﻳﺎﻧﯟﺍﺭ ﻛﯜﻧﯩﺪﯨﻦ ﺑﺎﺷﻼﭖ ﺋﺎﻗﺘﯘ ﻧﺎﻫﯩﻴﯩﺴﯩﻨﯩﯔ ﻛﻮﺳﺮﺍﭖ ﻳﯧﺰﯨﺴﯩﻐﺎ ﻳﯧﻘﯩﻦ ﺟﺎﻳﺪﯨﻜﻰ ﻣﯘﻫﺎﺳﯩﺮﯨﮕﻪ ﺋﯧﻠﯩﻨﻐﺎﻥ ﻧﻪﻕ ﻣﻪﻳﺪﺍﻧﻐﺎ ﺑﺎﺭﻏﺎﻥ. ﺋﯘﻧﯩﯔ ﺋﯩﮕﯩﻠﯩﮕﻪﻥ ﭘﯜﺗﯜﻥ ﭘﺎﻛﯩﺘﻠﯩﺮﻯ ﺋﺎﺗﺎﻟﻤﯩﺶ "ﺗﯧﺮﺭﻭﺭﭼﯩﻼﺭ ﺋﯘﯞﯨﺴﻰ" ﻧﻰ ﻣﯘﻫﺎﺳﯩﺮﯨﮕﻪ ﺋﺎﻟﻐﺎﻥ ﺋﻪﺳﻜﻪﺭ ﯞﻩ ﺳﺎﻗﭽﯩﻼﺭﻧﯩﯔ ﻣﻪﺯﻛﯘﺭ ﯞﻩﻗﻪ ﻫﻪﻗﻘﯩﺪﯨﻜﻰ ﺋﺎﺳﺎﺳﺴﯩﺰ ﻣﻪﻟﯘﻣﺎﺗﻠﯩﺮﯨﺪﯨﻦ ﺋﯩﺒﺎﺭﻩﺕ ﺑﻮﻟﻐﺎﻥ. ﻣﻪﻟﯘﻣﺎﺗﺘﺎ ﺗﯧﺮﺭﻭﺭﭼﯩﻼﺭﻧﯩﯔ ﺋﻪﺳﻠﯩﺪﻩ ﺋﯜﭺ ﻻﮔﯩﺮﻏﺎ ﻳﻪﺭﻟﻪﺷﻜﻪﻧﻠﯩﻜﻰ، ﺋﯩﻜﻜﻰ ﻻﮔﯩﺮﺩﯨﻜﻰ ﺗﯧﺮﺭﻭﺭﭼﯩﻼﺭﻧﯩﯔ 5 – ﻳﺎﻧﯟﺍﺭ ﻛﯜﻧﯩﺪﯨﻦ ﺑﺎﺷﻼﭖ ﺗﺎﺭﻣﺎﺭ ﻗﯩﻠﯩﻨﻐﺎﻧﻠﯩﻘﻰ، ﺋﺎﺧﯩﺮﻗﻰ ﺑﯩﺮ ﻻﮔﯩﺮﺩﯨﻜﻰ ﺗﯧﺮﺭﻭﺭﭼﯩﻼﺭﻣﯘ ﺗﺎﺭﻣﺎﺭ ﻗﯩﻠﯩﻨﻐﺎﻥ ﺑﻮﻟﺴﯩﻤﯘ، ﺑﯘ ﺩﺍﺋﯩﺮﯨﻨﯩﯔ ﻫﺎﺯﯨﺮﻏﯩﭽﻪ ﻣﯘﻫﺎﺳﯩﺮﻩ ﺋﺎﺳﺘﯩﺪﺍ ﺗﯘﺭﯨﯟﺍﺗﻘﺎﻧﻠﯩﻘﻰ، ﺋﺎﺭﻣﯩﻴﻪ ﺑﯩﻠﻪﻥ ﺧﻪﻟﻖ ﺑﯩﺮﻟﯩﺸﯩﭗ، ﭘﯜﺗﻜﯜﻝ ﻳﻮﻟﻼﺭﻏﺎ ﭼﺎﺯﺍ ﻗﯘﺭﯗﭖ، ﻗﯧﭽﯩﭗ ﻳﯜﺭﮔﻪﻥ ﺗﯧﺮﺭﻭﺭﭼﯩﻼﺭﻧﻰ ﺗﯘﺗﻤﺎﻗﭽﻰ ﺑﻮﻟﻐﺎﻧﻠﯩﻘﻰ ﯞﻩ ﺑﯘ ﺭﺍﻳﻮﻧﻨﯩﯔ ﻳﻪﺭ ﺷﻪﻛﻠﯩﻨﯩﯔ ﺗﻮﻟﯩﻤﯘ ﻣﯘﺭﻩﻛﻜﻪﭘﻠﯩﻜﻰ، ﺷﯘﻧﺪﺍﻕ ﺑﻮﻟﺴﯩﻤﯘ، ﺑﯩﺮﻣﯘ ﺗﯧﺮﺭﻭﺭﭼﯩﻨﯩﯔ ﻗﯧﭽﯩﭗ ﻗﯘﺗﯘﻻﻟﻤﺎﻳﺪﯨﻐﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ. ﻣﺎﻗﺎﻟﯩﺪﺍ ﻳﻪﻧﻪ، ﺋﯘﻳﻐﯘﺭ ﺧﻪﻟﻘﯩﻨﯩﯔ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﯧﺮﺭﻭﺭﯨﺰﯨﻤﻐﺎ ﻗﺎﺭﺷﻰ ﻫﻪﺭﯨﻜﻪﺗﻠﯩﺮﯨﻨﻰ ﻗﻮﻟﻼﻳﺪﯨﻐﺎﻧﻠﯩﻘﻰ ﻫﻪﻗﻘﯩﺪﻩ ﻣﯩﺴﺎﻟﻼﺭ ﺋﯧﻠﯩﻨﻐﺎﻥ.

ﮔﻪﺭﭼﻪ „ﻳﻪﺭ ﺷﺎﺭﻯ ﯞﺍﻗﯩﺖ ﮔﯧﺰﯨﺘﻰ" ﻧﯩﯔ ﻣﯘﺧﺒﯩﺮﻯ ﭼﯧﯖﮕﺎﯓ ﭘﺎﻛﯩﺖ ﻛﯚﺭﺳﯩﺘﯩﭗ، ﭘﺮﻭﻓﯧﺴﺴﻮﺭ ﮔﻼﺩﻧﯧﻲ ﺋﻪﭘﻪﻧﺪﻯ ﺑﺎﺷﭽﯩﻠﯩﻘﯩﺪﯨﻜﻰ ﻏﻪﺭﺏ ﺋﺎﻟﯩﻤﻠﯩﺮﯨﻨﯩﯔ ﯞﻩ ﺩ ﺋﯘ ﻕ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺳﯚﺯﻟﯩﺮﯨﮕﻪ ﺭﻩﺩﺩﯨﻴﻪ ﺑﻪﺭﻣﻪﻛﭽﻰ ﺑﻮﻟﻐﺎﻥ ﺑﻮﻟﺴﯩﻤﯘ، ﺋﯘ ﺗﯘﺗﺎﻣﻐﺎ ﭼﯩﻘﻘﯘﺩﻩﻙ ﭘﺎﻛﯩﺖ ﺗﺎﭘﺎﻟﻤﺎﻱ، ﺋﯚﺯﯨﻤﯘ ﺳﻪﺯﻣﯩﮕﻪﻥ ﻫﺎﻟﺪﺍ 5 – ﻳﺎﻧﯟﺍﺭ ﭘﺎﻣﯩﺮ ﯞﻩﻗﻪﺳﯩﻨﻰ ﻫﻪﻳﯟﻩﺕ ﺑﯩﻠﻪﻥ ﺋﯧﻼﻥ ﻗﯩﻠﻐﺎﻥ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﺭﻩﺩﺩﯨﻴﻪ ﺑﯧﺮﯨﭗ ﻗﻮﻳﻐﺎﻥ. ﻳﻪﻧﻰ، 5 – ﻓﯧﯟﺭﺍﻝ ﭘﺎﻣﯩﺮ ﯞﻩﻗﻪﺳﻰ ﻫﻪﻗﻘﯩﺪﻩ ﺩﻩﻟﯩﻞ – ﺋﯩﺴﭙﺎﺕ ﻛﯚﺭﺳﯩﺘﯩﺶ ﻣﻪﻗﺴﯩﺪﯨﮕﻪ ﻳﯧﺘﻪﻟﻤﯩﮕﻪﻥ.

"ﻳﻪﺭ ﺷﺎﺭﻯ ﯞﺍﻗﯩﺖ ﮔﯧﺰﯨﺘﻰ" ﻧﯩﯔ ﻣﯘﺧﺒﯩﺮﻯ ﭼﯧﯖﮕﺎﯕﻨﯩﯔ ﻣﺎﻗﺎﻟﯩﺴﯩﺪﺍ: ﺋﻪﻧﮕﯩﻠﯩﻴﻪ ﮔﯧﺰﯨﺘﻠﯩﺮﯨﻨﯩﯔ "ﺟﯘﯕﮕﻮ ﻫﯚﻛﯜﻣﯩﺘﻰ ﺗﯧﺮﺭﻭﺭﯨﺰﯨﻤﻐﺎ ﻗﺎﺭﺷﻰ ﺗﯘﺭﯗﺷﺘﯩﻦ ﭘﺎﻳﺪﯨﻠﯩﻨﯩﭗ، ﺋﯘﻳﻐﯘﺭ ﺭﺍﻳﻮﻧﯩﻐﺎ ﺑﻮﻟﻐﺎﻥ ﻫﯚﻛﯜﻣﺮﺍﻧﻠﯩﻘﯩﻨﻰ ﻣﯘﺳﺘﻪﻫﻜﻪﻣﻠﻪﺷﻜﻪ ﺗﯧﺮﯨﺸﻤﺎﻗﺘﺎ، ﺋﯘﻳﻐﯘﺭﻻﺭﻧﻰ ﺧﯩﺘﺎﻳﻼﺷﺘﯘﺭﯗﻟﯘﺷﻨﻰ ﻗﻮﺑﯘﻝ ﻗﯩﻠﯩﺸﻘﺎ ﻣﻪﺟﺒﯘﺭﻟﯩﻤﺎﻗﺘﺎ" ﺩﯦﮕﻪﻥ ﺳﯚﺯﻟﯩﺮﻯ ﻧﻪﻗﯩﻞ ﺋﯧﻠﯩﻨﻐﺎﻧﺪﯨﻦ ﺑﺎﺷﻘﺎ، ﭘﺮﻭﻓﯧﺴﺴﻮﺭ ﮔﻼﺩﻧﯧﻲ ﺋﻪﭘﻪﻧﺪﯨﻨﯩﯔ "ﻗﯩﺮﻏﯩﻨﭽﯩﻠﯩﻘﻘﺎ ﺋﯘﭼﺮﯨﻐﺎﻥ ﺋﯘﻳﻐﯘﺭﻻﺭ ﺑﻪﻟﻜﯩﻢ ﻛﺎﻥ ﺋﯩﺸﭽﯩﻠﯩﺮﻯ ﺑﻮﻟﯘﺷﻰ ﻣﯘﻣﻜﯩﻦ، ﺑﻪﻟﻜﯩﻢ ﻗﻮﺭﺍﻝ – ﻳﺎﺭﺍﻕ ﺋﻪﺗﻜﻪﺳﭽﯩﻠﯩﺮﻯ ﺑﻮﻟﯘﺷﻰ ﻣﯘﻣﻜﯩﻦ" ﺩﯦﮕﻪﻥ ﺳﯚﺯﻟﯩﺮﻯ ﻣﯩﺴﺎﻟﻐﺎ ﺋﯧﻠﯩﻨﯩﭗ، ﺑﯘﻧﻰ ﺭﻩﺕ ﻗﯩﻠﯩﺸﻘﺎ ﺋﯘﺭﯗﻧﯘﻟﻐﺎﻥ ﺑﻮﻟﺴﯩﻤﯘ، ﺋﺎﭘﺘﻮﺭﻧﯩﯔ - ﺗﻮﻏﺮﯨﺴﻰ ﺋﺎﭘﺘﻮﺭﻧﯩﯔ ﺗﯩﻠﻰ ﺋﺎﺭﻗﯩﻠﯩﻖ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻣﻪﻗﺴﯩﺘﻰ ﺑﯘ ﻳﻪﺭﺩﻩ ﻫﺎﺳﯩﻞ ﺑﻮﻟﻤﯩﻐﺎﻥ.

ﺋﺎﭘﺘﻮﺭ ﭼﻪﯕﮕﺎﯓ ﭘﻪﻗﻪﺕ، ﺑﯘ ﺭﺍﻳﻮﻧﺪﺍ ﻛﺎﻥ ﺋﯧﭽﯩﭗ، ﻛﯚﻣﯜﺭ ﺗﻮﺷﯘﺵ ﺋﯜﭼﯜﻥ ﻳﻮﻝ ﺑﻮﻟﯘﺷﻰ ﻛﯧﺮﻩﻛﻠﯩﻜﯩﻨﻰ، ﺋﻪﻣﻤﺎ ﺑﯘ ﺗﺎﻏﻠﯩﻖ ﺭﺍﻳﻮﻧﺪﺍ ﻳﻮﻝ ﻳﻮﻗﻠﯩﻘﯩﻨﻰ، ﻗﻮﺭﺍﻝ – ﻳﺎﺭﺍﻕ ﺋﻪﺗﻜﻪﺳﭽﯩﻠﯩﻜﻰ ﺑﯩﻠﻪﻥ ﺷﯘﻏﯘﻟﻠﯘﻧﯩﺶ ﺋﯜﭼﯜﻧﻤﯘ ﺋﻪﻗﻪﻟﻠﯩﻴﺴﻰ ﺗﯧﻠﯧﻔﯘﻥ ﺋﺎﻻﻗﯩﺴﯩﮕﻪ ﺋﯩﻤﻜﺎﻥ ﺑﻮﻟﯘﺷﻰ ﻛﯧﺮﻩﻛﻠﯩﻜﯩﻨﻰ، ﺋﻪﻣﻤﺎ ﺑﯘ ﻳﻪﺭﺩﻩ ﺗﯧﻠﯧﻔﯘﻥ ﺋﯩﺸﻠﯩﻤﻪﻳﺪﯨﻐﺎﻧﻠﯩﻘﯩﻨﻰ ﭘﺎﻛﯩﺖ ﻗﯩﻠﯩﭗ ﻛﯚﺭﺳﻪﺗﻜﻪﻥ.

ﺩ ﺋﯘ ﻕ ﺭﻩﻫﺒﻪﺭﻟﯩﺮﯨﻨﯩﯔ ﺑﯩﻠﺪﯛﺭﯛﺷﯩﭽﻪ، ﻛﯩﺸﯩﻠﻪﺭ ﻧﻪﺯﯨﺮﯨﺪﻩ ﮔﯘﻣﺎﻧﻐﺎ ﺗﺎﻗﯩﺸﯩﭗ ﻗﺎﻟﻐﺎﻥ 5 – ﻳﺎﻧﯟﺍﺭ ﭘﺎﻣﯩﺮ ﯞﻩﻗﻪﺳﯩﻨﯩﯔ ﺭﺍﺳﺖ – ﻳﺎﻟﻐﺎﻧﻠﯩﻘﻰ ﻫﺎﺯﯨﺮﭼﻪ ﺋﯧﻨﯩﻖ ﺑﻮﻟﻤﯩﺴﯩﻤﯘ، ﻟﯧﻜﯩﻦ ﭘﯜﺗﯜﻥ ﺋﯘﻳﻐﯘﺭ ﺩﯨﻴﺎﺭﻯ ﺗﻪﯞﻩﺳﯩﺪﯨﻦ 1500 ﺩﯨﻦ ﺋﺎﺭﺗﯘﻕ ﺋﺎﺩﻩﻣﻨﯩﯔ ﺑﯚﻫﺘﺎﻥ ﺑﯩﻠﻪﻥ ﻗﻮﻟﻐﺎ ﺋﯧﻠﯩﻨﻐﺎﻧﻠﯩﻘﻰ ﻳﺎﻟﻐﺎﻥ ﺋﻪﻣﻪﺱ ﺋﯩﻜﻪﻥ. (ﺋﻪﻛﺮﻩﻡ)