ﺋﺎﻟﺘﺎﻱ ﺭﺍﻳﻮﻧﯩﺪﺍ ﻗﺎﺭ ﺋﺎﭘﯩﺘﻰ ﺩﺍﯞﺍﻡ ﻗﯩﻠﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﺋﻪﯓ ﻳﯧﯖﻰ ﻣﻪﻟﯘﻣﺎﺗﻼﺭﻏﺎ ﺋﺎﺳﺎﺳﻼﻧﻐﺎﻧﺪﺍ، ﺩﺍﯞﺍﻣﻠﯩﺸﯩﯟﺍﺗﻘﺎﻥ ﻗﺎﺭﻟﯩﻖ ﻫﺎﯞﺍﺭﺍﻳﻰ ﺋﯚﺯﮔﯩﺮﯨﺸﻰ ﺗﯜﭘﻪﻳﻠﻰ، ﺋﯘﻳﻐﯘﺭ ﺋﯧﻠﯩﻨﯩﯔ ﺷﯩﻤﺎﻟﯩﻨﻰ ﺋﺎﺳﺎﺱ ﻗﯩﻠﯩﭗ ﻳﯜﺯ ﺑﻪﺭﮔﻪﻥ ﻗﺎﺭ ﺋﺎﭘﯩﺘﻰ ﻳﻪﻧﯩﻤﯘ ﺋﯧﻐﯩﺮﻻﺷﻤﺎﻗﺘﺎ.

ﻳﯧﯖﻰ ﻳﯩﻞ ﻫﺎﺭﭘﯩﺴﯩﺪﯨﻦ ﺑﺎﺷﻼﭖ ﻳﺎﻗﻘﺎﻥ ﻗﺎﺗﺘﯩﻖ ﻗﺎﺭ ﺋﺎﻟﺘﺎﻱ ﺗﺎﺭﺑﺎﻏﺎﺗﺎﻱ، ﺋﯩﻠﻰ ﺭﺍﻳﻮﻧﯩﺪﯨﻜﻰ ﺑﻪﺯﻯ ﻧﺎﻫﯩﻴﻪ ﻫﻪﻡ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ 60ﺳﺎﻧﺘﯩﻐﺎ ﻳﯧﺘﯩﭗ، ﻫﺎﯞﺍ ﺗﯧﻤﭙﯧﺮﺍﺗﯘﺭﯨﺴﻰ ﺯﻭﺭ ﺩﻩﺭﯨﺠﯩﺪﻩ ﺗﯚﯞﻩﻧﻠﻪﭖ ﺋﯧﻐﯩﺮ ﺋﺎﭘﻪﺕ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﺋﯩﺪﻯ.

ﻧﯚﯞﻩﺗﺘﻪ ﺑﯘ ﻛﻪﯓ ﺩﺍﺋﯩﺮﯨﺪﯨﻜﻰ ﻗﺎﺭ ﺋﺎﭘﯩﺘﯩﺪﻩ 620 ﻣﯩﯖﺪﯨﻦ ﺋﺎﺭﺗﯘﻕ ﺋﺎﻣﻤﯩﻨﯩﯔ ﺋﺎﭘﻪﺗﻜﻪ ﺋﯘﭼﺮﯨﻐﺎﻧﻠﯩﻘﻰ ﺧﻪﯞﻩﺭ ﻗﯩﻠﯩﻨﻤﺎﻗﺘﺎ.

ﺋﺎﺩﻩﻣﻠﻪﺭ ﯞﻩ ﻣﺎﻟﻼﺭ ﺯﯨﻴﺎﻧﻐﺎ ﺋﯘﭼﺮﯨﻐﺎﻥ

ﺑﯩﺰ ﺋﺎﻟﺘﺎﻱ ﯞﯨﻼﻳﻪﺗﻠﯩﻚ ﭘﺎﺭﺗﻜﻮﻡ ﺋﯩﺸﺨﺎﻧﯩﺴﯩﺪﯨﻦ ﺋﺎﭘﻪﺕ ﺋﻪﻫﯟﺍﻟﻰ ﻫﻪﻣﺪﻩ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﻯ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺋﯧﻠﯩﺸﻘﺎ ﺗﯩﺮﯨﺸﺘﯘﻕ. ﺋﻪﻣﻤﺎ ﺗﯧﻠﯧﻔﻮﻧﯩﻤﯩﺰﻧﻰ ﺑﯩﺮ ﻧﯚﯞﻩﺗﭽﻰ ﺋﯧﻠﯩﭗ، ﺑﺎﺷﻠﯩﻘﻼﺭ ﻫﻪﻣﻤﯩﺴﻰ ﺋﺎﭘﻪﺕ ﺑﻮﻟﻐﺎﻥ ﺟﺎﻳﻼﺭﻏﺎ ﻛﻪﺗﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ ﻫﻪﻣﺪﻩ ﺋﯘ ﺋﺎﻟﺘﺎﻳﺪﺍ ﻗﺎﺭﻧﯩﯔ ﺗﻮﺧﺘﯩﻤﺎﻱ ﻳﯧﻐﯩﯟﺍﺗﻘﺎﻧﻠﯩﻘﯩﻨﻰ، ﺗﺎﻏﻠﯩﻖ ﺭﺍﻳﻮﻧﻼﺭﺩﺍ ﺋﺎﭘﻪﺗﻨﯩﯔ ﺋﯧﻐﯩﺮ ﺋﯩﻜﻪﻧﻠﯩﻜﯩﻨﻰ، ﻫﺎﺯﯨﺮﻏﺎ ﻗﻪﺩﻩﺭ ﺯﺍﺩﻯ ﻗﺎﻧﭽﯩﻠﯩﻚ ﺯﯨﻴﺎﻥ ﻛﯧﻠﯩﭗ ﭼﯩﻘﻘﺎﻧﻠﯩﻘﯩﻨﻰ ﺗﯧﺨﻰ ﻣﯚﻟﭽﻪﺭﻟﯩﮕﯩﻠﻰ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﺎﭘﻪﺗﻜﻪ ﺩﺍﺋﯩﺮ ﺋﯧﻼﻥ ﻗﯩﻠﯩﻨﯩﯟﺍﺗﻘﺎﻥ ﺋﺎﺧﺒﺎﺭﺍﺗﻼﺭﺩﺍ، ﻫﺎﺯﯨﺮﻏﯩﭽﻪ ﻗﺎﺭ ﺋﺎﭘﯩﺘﯩﺪﻩ ﺋﯚﻟﯜﻡ ﻳﯧﺘﯩﻢ ﺋﻪﻫﯟﺍﻟﻠﯩﺮﯨﻨﯩﯔ ﻛﯧﻠﯩﭗ ﭼﯩﻘﻘﺎﻧﻠﯩﻘﻰ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺑﻮﻟﻤﯩﺴﯩﻤﯘ، ﺋﻪﻣﻤﺎ ﺋﺎﻟﺘﺎﻱ ﯞﯨﻼﻳﯩﺘﯩﻨﯩﯔ ﻛﯚﻛﺘﻮﻗﺎﻱ، ﭼﯩﯖﮕﯩﻞ ﻧﺎﻫﯩﻴﯩﻠﯩﺮﻯ، ﺋﺎﻟﺘﺎﻱ ﺷﻪﻫﯩﺮﻯ، ﻗﺎﺑﺎ، ﺑﯘﺭﭼﯩﻦ ﻧﺎﻫﯩﻴﯩﺴﯩﺪﻩ ﻫﺎﺯﯨﺮﻏﯩﭽﻪ 5672 ﺋﺎﺩﻩﻣﺪﻩ ﺋﻮﺧﺸﯩﻤﯩﻐﺎﻥ ﺩﻩﺭﯨﺠﯩﺪﻩ ﺋﯜﺷﺸﯜﭖ ﻗﯧﻠﯩﺶ ﻫﺎﺩﯨﺴﯩﺴﻰ ﻛﯚﺭﯛﻟﮕﻪﻥ. ﺷﯘﻧﺪﺍﻗﻼ ﻧﻪﭼﭽﻪ ﻳﯜﺯ ﻣﯩﯔ ﺗﯘﻳﺎﻕ ﭼﺎﺭﯞﺍ ﻣﺎﻝ ﺯﯨﻴﺎﻧﻐﺎ ﺋﯘﭼﺮﯨﻐﺎﻥ. ﺑﯩﯟﺍﺳﺘﻪ ﻛﯧﻠﯩﭗ ﭼﯩﻘﻘﺎﻥ ﺋﯩﻘﺘﯩﺴﺎﺩﯨﻲ ﺯﯨﻴﺎﻥ 80ﻣﯩﻠﻴﻮﻥ ﻳﯘﺋﻪﻧﮕﻪ ﻳﻪﺗﻜﻪﻥ.

ﺑﯩﺰ ﻗﺎﺭ ﺋﺎﭘﯩﺘﯩﻨﯩﯔ ﺗﻪﺳﯩﺮﯨﮕﻪ ﻫﻪﻣﻤﯩﺪﯨﻦ ﺋﯧﻐﯩﺮ ﺋﯘﭼﺮﯨﻐﺎﻥ ﺋﺎﻟﺘﺎﻳﻨﯩﯔ ﻛﯚﻛﺘﻮﻗﺎﻱ ﻧﺎﻫﯩﻴﯩﻠﯩﻚ ﺩﻭﺧﺘﯘﺭﺧﺎﻧﯩﺴﯩﻐﺎ ﺗﯧﻠﯧﻔﻮﻥ ﻗﯩﻠﯩﭗ، ﺋﯜﺷﺸﯜﭖ ﻗﺎﻟﻐﺎﻥ ﭼﺎﺭﯞﯨﭽﯩﻼﺭﻧﯩﯔ ﺩﺍﯞﺍﻻﺷﻘﺎ ﺋﯧﺮﯨﺸﻪﻟﯩﮕﻪﻥ ‏- ﺋﯧﺮﯨﺸﻪﻟﻤﯩﮕﻪﻧﻠﯩﻜﯩﻨﻰ ﺳﻮﺭﯨﺪﯗﻕ.

ﺗﺎﺷﻘﻰ ﻛﯧﺴﻪﻟﻠﻪﺭ ﺑﯚﻟﯜﻣﯩﻨﯩﯔ ﺑﯩﺮ ﺩﻭﺧﺘﯘﺭﻯ، ﺋﺎﻣﯧﺮﯨﻜﯩﺪﯨﻦ ﺗﯧﻠﯧﻔﻮﻥ ﺋﯘﺭﯨﯟﺍﺗﻘﺎﻧﻠﯩﻘﯩﻤﯩﺰﻧﻰ ﺑﯩﻠﮕﻪﻧﺪﯨﻦ ﻛﯧﻴﯩﻦ، ﺳﻮﺋﺎﻟﻠﯩﺮﯨﻤﯩﺰﻏﺎ ﺋﺎﻟﺪﯨﺮﺍﭖ ﺟﺎﯞﺍﺏ ﺑﻪﺭﺩﻯ. ﺋﯘ " ﺋﯜﺷﺸﯜﭖ ﻗﯧﻠﯩﺶ ﺋﻪﻫﯟﺍﻟﻠﯩﺮﻯ ﺑﺎﺭ، ﺩﻭﺧﺘﯘﺭﺧﺎﻧﯩﻤﯩﺰﺩﺍ ﺩﺍﯞﺍﻻﯞﺍﺗﯩﻤﯩﺰ، ﺳﻮﻏﺎﻕ ﻫﺎﯞﺍﺩﺍ ﺋﯘﻧﯩﯖﺪﯨﻦ ﺑﺎﺷﻘﯩﻤﯘ ﻛﯧﺴﻪﻟﻠﻪﺭ ﻛﯧﻠﯩﯟﺍﺗﯩﺪﯗ، ﻫﻪﻣﻤﯩﻨﻰ ﻫﻪﻗﺴﯩﺰ ﺩﺍﯞﺍﻻﯞﺍﺗﯩﻤﯩﺰ. ﺑﺎﺷﻘﺎ ﭼﺎﺗﺎﻕ ﻳﻮﻕ، ﺳﯩﻠﻪﺭ ﻛﯚﯕﯜﻝ ﺑﯚﻟﻤﯩﺴﻪﯕﻼﺭﻣﯘ ﺑﻮﻟﯩﺪﯗ" ﺩﻩﭖ ﺗﯧﻠﯧﻔﻮﻧﻨﻰ ﻗﻮﻳﯘﯞﻩﺗﺘﻰ.

ﺑﻪﺯﻯ ﻳﻮﻟﻼﺭ ﻫﺎﺯﯨﺮﻛﻐﯩﭽﻪ ﺋﯧﭽﯩﻠﻤﯩﻐﺎﻥ

ﺑﯩﺮ ﻗﺎﻧﭽﻪ ﻛﯜﻥ ﺋﯩﻠﮕﯩﺮﻯ ﻗﺎﺗﻨﺎﺵ ﺋﯜﺯﯛﻟﯜﭖ ﻗﺎﻟﻐﺎﻥ، ﺋﺎﻟﺘﺎﻱ ﯞﯨﻼﻳﯩﺘﯩﻨﯩﯔ ﺩﯙﻟﻪﺕ ﺗﺎﺵ ﻳﻮﻟﻰ 216 ‏- ﻟﯩﻨﯩﻴﯩﺴﻰ، ﯞﻩ ﺋﯚﻟﻜﻪ ﻳﻮﻟﻰ 217 ‏- ﻟﯩﻨﯩﻴﯩﺴﯩﺪﻩ ﻗﺎﺗﻨﺎﺵ ﺋﺎﺳﺘﺎ- ﺋﺎﺳﺘﺎ ﺋﻪﺳﻠﯩﮕﻪ ﻛﯧﻠﯩﺸﻜﻪ ﺑﺎﺷﻠﯩﻐﺎﻥ ﺑﻮﻟﺴﯩﻤﯘ، ﺑﻪﺯﻯ ﻳﻮﻝ ﺑﯚﻟﻪﻛﻠﯩﺮﯨﺪﻩ ﺗﺎﻏﺪﯨﻦ ﻛﯚﭼﻜﻪﻥ ﻗﺎﺭﻻﺭ ﺩﺍﯞﺍﻣﻠﯩﻖ ﻫﺎﻟﺪﺍ ﺑﻪﺯﻯ ﻳﻮﻟﻼﺭﻧﻰ ﺋﯧﺘﯩﭗ ﻗﻮﻳﻤﺎﻗﺘﺎ ﺋﯩﻜﻪﻥ.

ﺗﻪﯕﺮﯨﺘﺎﻍ ﺗﻮﺭ ﺑﯧﺘﯩﺪﻩ -12 ﻳﺎﻧﯟﺍﺭ ﺑﯧﺮﯨﻠﮕﻪﻥ ﺋﯘﭼﯘﺭﻏﺎ ﻗﺎﺭﯨﻐﺎﻧﺪﺍ، ﺑﯩﺮ ﻧﻪﭼﭽﻪ ﻛﯜﻧﺪﯨﻦ ﺑﯘﻳﺎﻥ ﺋﯩﻠﻰ ﺭﺍﻳﻮﻧﯩﺪﯨﻤﯘ ﻗﺎﺗﺘﯩﻖ ﻗﺎﺭ ﻳﺎﻗﻘﺎﻥ ﺑﻮﻟﯘﭖ، 11 - ﻳﺎﻧﯟﺍﺭ ﻛﯜﻧﻰ ﺋﯩﻠﯩﻨﯩﯔ ﺗﻪﻟﻜﻪ ﺋﯧﻐﯩﺰﻯ، ﺋﺎﻟﻤﺎﻟﯩﻖ ﺟﯩﻠﻐﯩﺴﯩﺪﺍ ﻗﺎﺭ ﻛﯚﭼﯜﺵ ﻫﺎﺩﯨﺴﯩﺴﻰ ﻳﯜﺯ ﺑﯧﺮﯨﭗ ﺋﺎﺳﺎﺳﻠﯩﻖ ﻗﺎﺗﻨﺎﺵ ﻟﯩﻨﯩﻴﯩﻠﯩﺮﯨﺪﯨﻦ 312 ‏- ﺩﯙﻟﻪﺕ ﺗﺎﺵ ﻳﻮﻟﻰ ﺗﻮﺳﯘﻟﯘﭖ، ﻳﻮﻟﯘﭼﯩﻼﺭ ﻗﺎﭘﺴﯩﻠﯩﭗ ﻗﺎﻟﻐﺎﻥ.

ﻫﯚﻛﯜﻣﻪﺕ ﺗﻮﺭﺑﻪﺗﻠﯩﺮﯨﺪﻩ ﻗﺎﺭ ﺋﺎﭘﯩﺘﯩﮕﻪ ﺩﺍﺋﯩﺮ ﺑﯧﺮﯨﻠﮕﻪﻥ ﺧﻪﯞﻩﺭﻟﻪﺭﺩﻩ، ﺋﺎﺳﺎﺳﻪﻥ ﻫﯚﻛﯜﻣﻪﺗﻨﯩﯔ ﺋﺎﭘﻪﺕ ﺭﺍﻳﻮﻧﯩﻐﺎ ﻳﺎﺭﺩﻩﻣﻨﻰ ﻛﯜﭼﻪﻳﺘﯩﯟﺍﺗﻘﺎﻧﻠﯩﻘﻰ ﻣﻪﺯﻣﯘﻥ ﻗﯩﻠﯩﻨﻐﺎﻥ. ﺋﻪﻣﻤﺎ ﺑﯩﺰ ﺋﺎﭘﻪﺕ ﺑﯩﺮ ﻗﻪﺩﻩﺭ ﺋﯧﻐﯩﺮ ﺑﻮﻟﻐﺎﻥ، ﺋﺎﻟﺘﺎﻳﻨﯩﯔ ﻛﯚﻛﺘﻮﻗﺎﻱ ﻧﺎﻫﯩﻴﯩﺴﯩﮕﻪ ﺗﯧﻠﯧﻔﻮﻥ ﻗﯩﻠﻐﯩﻨﯩﻤﯩﺰﺩﺍ ﺑﯩﺮ ﻗﺎﺯﺍﻕ ﭼﺎﺭﯞﯨﭽﻰ، ﺑﯘ ﺟﺎﻳﺪﺍ ﺑﻪﺯﻯ ﺩﯦﻬﻘﺎﻥ، ﭼﺎﺭﯞﯨﭽﯩﻼﺭﻧﯩﯔ ﺋﯚﻳﻠﯩﺮﯨﻨﯩﯔ ﺋﯚﺭﯛﻟﯜﭖ ﭼﯜﺷﻜﻪﻧﻠﯩﻜﯩﻨﻰ ﻫﺎﯞﺍ ﺑﻪﻙ ﺳﻮﻏﺎﻕ ﺑﻮﻟﻐﺎﭼﻘﺎ ﺋﺎﻣﻤﯩﻨﯩﯔ ﺟﯩﺪﺩﯨﻲ ﻳﺎﺭﺩﻩﻣﮕﻪ ﻣﯘﻫﺘﺎﺝ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺋﻪﻣﻤﺎ ﻫﯚﻛﯜﻣﻪﺗﻨﯩﯔ ﻳﺎﺭﺩﯨﻤﯩﻨﯩﯔ ﺗﯧﺨﻰ ﻛﻪﻟﻤﯩﮕﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺗﻪﯕﺮﻯ ﺗﯧﻐﯩﻨﯩﯔ ﺷﯩﻤﺎﻟﯩﺪﺍ ﻗﺎﺭ ﺋﺎﭘﯩﺘﻰ ﻳﯜﺯ ﺑﻪﺭﮔﻪﻥ ﺟﺎﻳﻼﺭﺩﺍ ﺋﻪﯓ ﺗﯚﯞﻩﻥ ﻫﺎﯞﺍ ﺗﯧﻤﭙﯧﺮﺍﺗﯘﺭﯨﺴﻰ ﻧﯚﻟﺪﯨﻦ ﺗﯚﯞﻩﻥ 43 ﺳﯧﻠﺴﯩﻴﻪ ﮔﺮﺍﺩﯗﺳﻘﺎ ﭼﯜﺷﻜﻪﻥ، ﺋﺎﻟﺘﺎﻱ ﻣﯧﺘﺮﻭﻟﻮﮔﯩﻴﻪ ﺋﯩﺪﺍﺭﯨﺴﯩﺪﯨﻦ ﺋﯩﮕﯩﻠﯩﺸﯩﻤﯩﺰﭼﻪ، ﺋﺎﻟﺘﺎﻱ، ﺋﯩﻠﻰ ﻗﺎﺗﺎﺭﻟﯩﻖ ﺟﺎﻳﻼﺭﺩﺍ ﻛﯧﻴﯩﻨﻜﻰ ﺑﯩﺮ ﻧﻪﭼﭽﻪ ﻛﯜﻧﺪﻩ ﻗﺎﺭﻟﯩﻖ ﻫﺎﯞﺍﺭﺍﻳﻰ ﻳﻪﻧﻪ ﺩﺍﯞﺍﻣﻠﯩﺸﯩﺪﯨﻜﻪﻥ. (ﮔﯜﻟﭽﯧﮭﺮﻩ)