ﺋﯘﻳﻐﯘﺭ ﺋﯧﻠﯩﻨﯩﯔ ﻗﺎﺭ ﻟﻪﻳﻠﯩﺴﻰ ﺋﯧﻐﯩﺮ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﯨﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﭘﻪﺭﯨﺪﻩﻧﯩﯔ ﺑﯘ ﮬﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﮔﻪﺭﭼﻪ ﺋﯘﻳﻐﯘﺭ ﺋﯧﻠﯩﺪﻩ ﭼﯩﻘﯩﺪﯨﻐﺎﻥ ﻣﻪﺗﺒﯘﺋﺎﺗﻼﺭﺩﺍ ﻧﻪﭼﭽﻪ ﻳﯩﻠﻼﺭﺩﯨﻦ ﺑﯘﻳﺎﻥ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﻻﮬﯩﺪﻩ ﺷﯩﭙﺎﻟﯩﻖ ﻗﯩﻤﻤﯩﺘﯩﮕﻪ ﺋﯩﮕﻪ ﺑﻮﻟﻐﺎﻥ ﻗﺎﺭ ﻟﻪﻳﻠﯩﺴﯩﻨﯩﯔ ﺋﺎﺩﻩﻣﻠﻪﺭ ﺗﻪﺭﯨﭙﯩﺪﯨﻦ ﻗﺎﻻﻳﻤﯩﻘﺎﻥ ﺋﯜﺯﯛﻟﯜﺷﻰ ﺳﻪﯞﻩﺑﯩﺪﯨﻦ ﻳﻮﻗﯩﻠﯩﺶ ﮔﯩﺮﺩﺍﺑﯩﻐﺎ ﻗﺎﺭﺍﭖ ﻛﯧﺘﯩﯟﺍﺗﻘﺎﻧﻠﯩﻘﻰ ﺧﻪﯞﻩﺭ ﻗﯩﻠﯩﻨﯩﭗ ﻛﻪﻟﮕﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﮬﺎﺯﯨﺮﻏﯩﭽﻪ ﺑﯘﻧﯩﯖﻐﺎ ﮬﯧﭽﻘﺎﻧﺪﺍﻕ ﺗﻪﺩﺑﯩﺮﻟﯩﻚ ﭼﺎﺭﻩ ﻗﻮﻟﻠﯩﻨﯩﻠﻤﯩﺪﻯ. ﺋﺎﺩﻩﻣﻠﻪﺭﻧﯩﯔ ﻗﺎﺭ ﻟﻪﻳﻠﯩﺴﯩﻨﻰ ﻗﺎﻧﯘﻧﺴﯩﺰ ﺋﯜﺯﯛﺵ ﮬﻪﺭﯨﻜﯩﺘﯩﻨﯩﯔ ﺋﯜﺯﻟﯜﻛﺴﯩﺰ ﺩﺍﯞﺍﻣﻠﯩﺸﯩﺸﯩﻐﺎ ﺋﻪﮔﯩﺸﯩﭗ، ﻗﺎﺭ ﻟﻪﻳﻠﯩﺴﯩﻨﯩﯔ ﻣﻪﯞﺟﯘﺗﻠﯘﻕ ﯞﺍﻗﺘﯩﻤﯘ ﺑﺎﺭﻏﺎﻧﺴﯧﺮﻯ ﻗﯩﺴﻘﯩﺮﺍﭖ ﻣﺎﯕﻤﺎﻗﺘﺎ.

ﺗﻪﯕﺮﯨﺘﺎﻍ ﺧﻪﯞﻩﺭ ﺗﻮﺭﯨﻨﯩﯔ ﺋﯧﻼﻥ ﻗﯩﻠﻐﺎﻥ ﻣﻪﺧﺴﯘﺱ ﺧﻪﯞﯨﺮﯨﮕﻪ ﻗﺎﺭﯨﻐﺎﻧﺪﺍ، ﮬﺎﺯﯨﺮ ﻗﺎﺭ ﻟﻪﻳﻠﻰ ﻣﺎﻛﺎﻧﻰ ﺑﻮﻟﻐﺎﻥ ﺑﺎﻳﯩﻨﻐﯘﻟﯩﻦ ﻣﻮﯕﻐﯘﻝ ﺋﻮﺑﻼﺳﺘﯩﺪﺍ، ﺩﯦﯖﯩﺰ ﻳﯜﺯﯨﺪﯨﻦ 3500 ﻣﯧﺘﯩﺮ ﺋﯩﮕﯩﺰﻟﯩﻜﻜﯩﭽﻪ ﺑﻮﻟﻐﺎﻥ ﺟﺎﻳﻼﺭﺩﺍ ﻗﺎﺭ ﻟﻪﻳﻠﯩﺴﯩﻨﻰ ﻛﯚﺭﮔﯩﻠﻰ ﺑﻮﻟﻤﺎﻳﺪﯨﻜﻪﻥ. ﺑﯘ، ﺋﯚﺳﯜﭖ ﻳﯧﺘﯩﻠﯩﺸﯩﮕﻪ 5 ﻳﯩﻞ ﯞﺍﻗﯩﺖ ﻛﯧﺘﯩﺪﯨﻐﺎﻥ ﻗﺎﺭ ﻟﻪﻳﻠﯩﺴﻰ ﺋﯜﭼﯜﻥ ﺑﯩﺮ ﺷﯘﻡ ﺧﻪﯞﻩﺭ ﮬﯧﺴﺎﺑﻠﯩﻨﯩﺪﯗ.

ﮬﻪﺳﺮﻩﺗﻠﯩﻚ ﺋﻪﻣﻪﻟﯩﻴﻪﺕ

ﺑﯩﺰ ﺋﯩﻠﮕﯩﺮﻯ ﺋﺎﺗﺎ- ﺑﻮﯞﯨﻠﯩﺮﯨﻤﯩﺰﺩﯨﻦ ﺗﺎﺭﺗﯩﭗ ﻳﺎﺷﺎﭖ ﻛﻪﻟﮕﻪﻥ ﺗﻪﯕﺮﯨﺘﺎﻏﻠﯩﺮﯨﻨﯩﯔ ﺑﻮﻳﻠﯩﺮﯨﺪﺍ ﻧﯘﺭﻏﯘﻥ ﻗﺎﺭ ﻟﻪﻳﻠﯩﺴﯩﻨﻰ ﻛﯚﺭﻩﺗﺘﯘﻕ. ﺋﻪﻣﻤﺎ ﮬﺎﺯﯨﺮ ﺑﯘ ﻳﻪﺭﺩﻩ ﺑﯩﺮﻣﯘ ﻗﺎﺭ ﻟﻪﻳﻠﯩﺴﯩﻨﻰ ﺋﯘﭼﺮﺍﺗﻘﯩﻠﻰ ﺑﻮﻟﻤﺎﻳﺪﯗ. ﺑﯘﻧﺪﺍﻕ ﻛﯧﺘﯩﯟﻩﺭﺳﻪ، ﻗﺎﺭ ﻟﻪﻳﻠﯩﺴﻰ ﻧﻪﭼﭽﻪ ﺋﻮﻥ ﻳﯩﻞ ﺋﻪﻣﻪﺱ، ﺑﻪﻟﻜﻰ ﺋﻮﻧﻨﻪﭼﭽﻪ ﻳﯩﻠﻨﯩﯔ ﺋﯩﭽﯩﺪﻩ ﭘﯜﺗﯜﻧﻠﻪﻱ ﺗﯜﮔﻪﭖ ﻛﯧﺘﯩﺸﻰ ﻣﯘﻣﻜﯩﻦ.

ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﺑﺎﻳﯩﻨﻐﯘﻟﯩﻨﺪﯨﻜﻰ ﺧﯘﺗﯘﻧﺴﻮﻣﯘﻝ ﻧﺎﮬﯩﻴﯩﺴﯩﻨﯩﯔ ﺳﺎﺭﺑﯘﻻﻕ ﻛﻪﻧﺖ ﺋﺎﮬﺎﻟﯩﻠﻪﺭ ﻛﻮﻣﯩﺘﯧﺘﯩﻨﯩﯔ ﻣﯘﺩﯨﺮﻯ ﻣﻪﻣﻪﺕ ﺭﯦﻴﯩﻢ، ﻗﺎﺭ ﻟﻪﻳﻠﯩﺴﯩﻨﯩﯔ ﻳﻮﻗﯩﻠﯩﺸﯩﻐﺎ ﮬﻪﺳﺮﻩﺗﻠﯩﻨﯩﭗ ﻣﯘﻧﺪﺍﻕ ﺩﻩﻳﺪﯗ: "ﺑﯩﺰ ﺋﯩﻠﮕﯩﺮﻯ ﺋﺎﺗﺎ- ﺑﻮﯞﯨﻠﯩﺮﯨﻤﯩﺰﺩﯨﻦ ﺗﺎﺭﺗﯩﭗ ﻳﺎﺷﺎﭖ ﻛﻪﻟﮕﻪﻥ ﺗﻪﯕﺮﯨﺘﺎﻏﻠﯩﺮﯨﻨﯩﯔ ﺑﻮﻳﻠﯩﺮﯨﺪﺍ ﻧﯘﺭﻏﯘﻥ ﻗﺎﺭ ﻟﻪﻳﻠﯩﺴﯩﻨﻰ ﻛﯚﺭﻩﺗﺘﯘﻕ. ﺋﻪﻣﻤﺎ ﮬﺎﺯﯨﺮ ﺑﯘ ﻳﻪﺭﺩﻩ ﺑﯩﺮﻣﯘ ﻗﺎﺭ ﻟﻪﻳﻠﯩﺴﯩﻨﻰ ﺋﯘﭼﺮﺍﺗﻘﯩﻠﻰ ﺑﻮﻟﻤﺎﻳﺪﯗ. ﺑﯘﻧﺪﺍﻕ ﻛﯧﺘﯩﯟﻩﺭﺳﻪ، ﻗﺎﺭ ﻟﻪﻳﻠﯩﺴﻰ ﻧﻪﭼﭽﻪ ﺋﻮﻥ ﻳﯩﻞ ﺋﻪﻣﻪﺱ، ﺑﻪﻟﻜﻰ ﺋﻮﻧﻨﻪﭼﭽﻪ ﻳﯩﻠﻨﯩﯔ ﺋﯩﭽﯩﺪﻩ ﭘﯜﺗﯜﻧﻠﻪﻱ ﺗﯜﮔﻪﭖ ﻛﯧﺘﯩﺸﻰ ﻣﯘﻣﻜﯩﻦ"

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﻯ ﻧﻪﭼﭽﻪ ﻳﯩﻠﻨﯩﯔ ﺋﺎﻟﺪﯨﺪﺍ، ﻗﺎﺭ ﻟﻪﻳﻠﯩﺴﯩﮕﻪ ﻗﯩﻠﯩﻨﻐﺎﻥ ﺑﯘﺯﻏﯘﻧﭽﯩﻠﯩﻖ ﺋﻪﮔﻪﺭ ﻣﯘﺷﯘ ﺳﯜﺭﺋﻪﺗﺘﻪ ﻣﯧﯖﯩﯟﻩﺭﺳﻪ، 30 ﻳﯩﻠﻐﺎ ﺑﺎﺭﻣﯩﻐﺎﻥ ﯞﺍﻗﯩﺖ ﺋﯩﭽﯩﺪﻩ، ﺋﯘﻧﯩﯔ ﭘﯜﺗﯜﻥ ﺗﻪﯕﺮﯨﺘﺎﻏﻠﯩﺮﯨﺪﯨﻦ ﻳﻮﻗﺎﭖ ﻛﯧﺘﯩﺪﯨﻐﺎﻧﻠﯩﻘﯩﻨﻰ ﺧﻪﯞﻩﺭ ﻗﯩﻠﻐﺎﻥ. ﺋﻪﻣﻤﺎ ﺧﻪﯞﻩﺭﮔﻪ ﻗﺎﺭﯨﻐﺎﻧﺪﺍ، ﮬﺎﺯﯨﺮ ﺑﯘﺯﻏﯘﻧﭽﯩﻠﯩﻖ ﺋﻪﮬﯟﺍﻟﻰ ﮬﻪﺳﺴﯩﻠﻪﭖ ﺋﯧﺸﯩﯟﺍﺗﻘﺎﻥ ﺑﻮﻟﯘﭖ، ﺑﯘ ﻗﺎﺭ ﻟﻪﻳﻠﯩﺴﯩﻨﯩﯔ ﻳﻮﻗﯩﻠﯩﺸﯩﻨﻰ ﺗﯧﺨﯩﻤﯘ ﺗﯧﺰﻟﻪﺗﻜﻪﻥ.

ﺭﺍﺩﯨﺌﻮﻣﯩﺰﻧﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻥ ﺧﯘﺗﯘﻧﺴﻮﻣﯘﻝ ﻧﺎﮬﯩﻴﯩﺴﯩﻨﯩﯔ ﻣﻪﻟﯘﻡ ﺑﯩﺮ ﻳﯧﺰﯨﺴﯩﺪﯨﻜﻰ ﺋﯘﻳﻐﯘﺭ ﻛﺎﺩﯨﺮ، ﺑﯘ ﻳﻪﺭﺩﯨﻜﻰ ﻗﺎﺭ ﻟﻪﻳﻠﯩﺴﯩﻨﯩﯔ ﮬﻪﻗﯩﻘﻪﺗﻪﻥ ﺋﯧﻐﯩﺮ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﺍﯞﺍﺗﻘﺎﻧﻠﯩﻘﯩﻨﻰ، ﺑﻮﻟﯘﭘﻤﯘ ﺑﯘﻧﻰ ﺋﯜﺯﮔﯜﭼﯩﻠﻪﺭﻧﯩﯔ ﮬﯚﻛﯜﻣﻪﺗﻨﯩﯔ ﺑﻪﻟﮕﯩﻠﯩﻤﯩﻠﯩﺮﯨﮕﯩﻤﯘ ﻗﻪﺗﺌﯩﻲ ﺭﯨﺌﺎﻳﻪ ﻗﯩﻠﻤﺎﻳﯟﺍﺗﻘﺎﻧﻠﯩﻘﯩﻨﻰ ﺋﯧﻴﺘﺘﻰ. ﺋﯘﻧﯩﯔ ﺋﯧﻴﺘﯩﺸﯩﭽﻪ، ﺷﻪﺧﺴﯩﻲ ﺋﻮﺭﯗﻧﻼﺭ ﯞﻩ ﺷﯩﺮﻛﻪﺗﻠﻪﺭ ﮬﯚﻛﯜﻣﻪﺗﺘﯩﻦ ﻗﺎﺭ ﻟﻪﻳﻠﯩﺴﻰ ﺋﯚﺳﯩﺪﯨﻐﺎﻥ ﺗﺎﻏﻠﯩﻖ ﺭﺍﻳﻮﻧﻼﺭﻧﻰ ﻳﯩﻠﻠﯩﻖ ﺳﯧﺘﯩﯟﺍﻟﯩﺪﯨﻜﻪﻥ. ﺋﺎﻧﺪﯨﻦ ﺑﯘ ﻳﻪﺭﮔﻪ ﺋﺎﺩﻩﻣﻠﻪﺭﻧﻰ ﻗﻮﻳﯘﭖ، ﻗﺎﺭ ﻟﻪﻳﻠﯩﺴﯩﻨﻰ ﺋﯜﺯﯛﺵ ﺋﯩﺸﻠﯩﺮﯨﻐﺎ ﺳﺎﻟﯩﺪﯨﻜﻪﻥ.

ﺑﯘ ﺧﺎﺩﯨﻢ ﺑﯩﺰﮔﻪ ﻳﻪﻧﻪ، ﺑﯘ ﻳﻪﺭﺩﯨﻦ ﺗﯧﺮﯨﻠﻐﺎﻥ ﻗﺎﺭ ﻟﻪﻳﻠﯩﺴﯩﻨﯩﯔ ﺋﺎﺳﺎﺳﻠﯩﻘﻰ ﺋﯜﺭﯛﻣﭽﻰ ﺋﺎﺭﻗﯩﻠﯩﻖ ﮔﯘﺋﺎﯕﺪﯗﯓ ﯞﻩ ﺧﯩﺘﺎﻳﻨﯩﯔ ﺑﺎﺷﻘﺎ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﯩﻠﯩﺪﯨﻐﺎﻧﻠﯩﻘﯩﻨﻰ ﺋﯧﻴﺘﺘﻰ. ﭼﯜﻧﻜﻰ ﻗﺎﺭ ﻟﻪﻳﻠﯩﺴﯩﻨﯩﯔ ﺩﻭﺭﯨﮕﻪﺭﻟﯩﻜﺘﯩﻜﻰ ﻗﯩﻤﻤﯩﺘﻰ ﻳﯘﻗﯩﺮﻯ ﺑﻮﻟﯘﭖ، ﺋﯘ، ﺭﯦﻤﺎﺗﯩﺰﯨﻢ، ﺋﺎﻳﺎﻟﻼﺭ ﻛﯧﺴﯩﻠﻰ ﯞﻩ ﭼﯩﺶ ﺋﺎﻏﺮﯨﻘﻰ ﻗﺎﺗﺎﺭﻟﯩﻖ ﻧﯘﺭﻏﯘﻥ ﻛﯧﺴﻪﻟﻠﻪﺭﻧﻰ ﺩﺍﯞﺍﻻﺷﻘﺎ ﺋﯩﺸﻠﯩﺘﯩﻠﯩﺪﯗ.

ﺑﯘﺯﻏﯘﻧﭽﯩﻠﯩﻘﻨﯩﯔ ﺳﻪﯞﻩﺑﻠﯩﺮﻯ

ﺗﻪﯕﺮﯨﺘﺎﻍ ﺧﻪﯞﻩﺭ ﺗﻮﺭﯨﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ ﻳﻪﻧﻪ، ﺑﺎﻳﯩﻨﻐﯘﻟﯩﻦ ﺋﻮﺑﻼﺳﺘﻠﯩﻖ ﺋﻮﺗﻼﻗﻼﺭﻧﻰ ﻧﺎﺯﺍﺭﻩﺕ ﻗﯩﻠﯩﺶ ﭘﻮﻧﻜﯩﺘﯩﻨﯩﯔ ﺑﺎﺷﻠﯩﻘﻰ ﺋﻪﺧﻤﻪﺕ ﻳﯘﻧﯘﺱ، ﻗﺎﺭ ﻟﻪﻳﻠﯩﺴﯩﻨﯩﯔ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﯨﺸﯩﺪﯨﻜﻰ ﺳﻪﯞﻩﺑﻠﻪﺭﻧﻰ 3 ﻧﯘﻗﺘﯩﻐﺎ ﻣﻪﺭﻛﻪﺯﻟﻪﺷﺘﯜﺭﮔﻪﻥ.

ﺑﯩﺮﯨﻨﭽﯩﺴﻰ، ﻗﺎﺭ ﻟﻪﻳﻠﯩﺴﯩﮕﻪ ﺑﻮﻟﻐﺎﻥ ﺋﯧﮭﺘﯩﻴﺎﺟﻨﯩﯔ ﺋﯧﺸﯩﺸﻰ. ﮔﻪﺭﭼﻪ ﺑﻪﻟﮕﯩﻠﯩﻤﯩﻠﻪﺭﺩﻩ ﺋﯘﻳﻐﯘﺭ ﺋﯧﻠﯩﺪﻩ ﺗﯧﺮﯨﺸﻘﺎ ﺑﻮﻟﯩﺪﯨﻐﺎﻥ ﻗﺎﺭ ﻟﻪﻳﻠﯩﺴﯩﻨﯩﯔ ﻣﯩﻘﺪﺍﺭﻯ ﻳﯩﻠﯩﻐﺎ 5 ﺗﻮﻧﻨﺎ ﺩﻩﭖ ﺑﯧﻜﯩﺘﻠﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﮬﺎﺯﯨﺮ ﺑﯘ ﻳﻪﺭﺩﯨﻜﻰ ﮬﻪﺭ ﻗﺎﻳﺴﻰ ﺩﻭﺭﺍ ﻳﺎﺳﺎﺵ ﺯﺍﯞﯗﺗﻠﯩﺮﯨﻨﯩﯔ ﻗﺎﺭ ﻟﻪﻳﻠﯩﺴﯩﮕﻪ ﺑﻮﻟﻐﺎﻥ ﻳﯩﻠﻠﯩﻖ ﺋﯧﮭﺘﯩﻴﺎﺟﻰ 100 ﺗﻮﻧﻨﯩﻐﺎ ﻳﻪﺗﻜﻪﻥ. ﺷﯘ ﺳﻪﯞﻩﭘﺘﯩﻦ ﻗﺎﺭ ﻟﻪﻳﻠﯩﺴﯩﻨﯩﯔ ﺑﺎﮬﺎﺳﻰ ﺷﯩﺪﺩﻩﺕ ﺑﯩﻠﻪﻥ ﺋﯚﺭﻟﻪﭖ، ﮬﻪﺗﺘﺎ ﺑﻪﺯﻯ ﻛﯩﺸﯩﻠﻪﺭ ﭘﺎﻳﺪﯨﻨﻰ ﻛﯚﺯﻟﻪﭖ، ﮬﯧﭽﻨﯩﻤﯩﮕﻪ ﻗﺎﺭﯨﻤﺎﺳﺘﯩﻦ ﺋﯘﻧﻰ ﻗﺎﻻﻳﻤﯩﻘﺎﻥ ﺋﯜﺯﯨﺪﯨﻐﺎﻥ ﺋﻪﮬﯟﺍﻟﻼﺭ ﺷﻪﻛﯩﻠﻠﻪﻧﮕﻪﻥ.

ﺋﯩﻜﻜﯩﻨﭽﯩﺴﻰ، ﺑﺎﺷﻘﯘﺭﯗﺷﺘﯩﻜﻰ ﻳﯧﺘﻪﺭﺳﯩﺰﻟﯩﻚ. 2002 - ﻳﯩﻠﻰ ﮔﻪﺭﭼﻪ ﻣﯘﻧﺎﺳﯩﯟﻩﺗﻠﯩﻚ ﺋﻮﺭﯗﻧﻼﺭ ﻗﺎﺭ ﻟﻪﻳﻠﯩﺴﯩﻨﻰ ﺋﯜﺯﯛﺵ ﯞﻩ ﻳﯚﺗﻜﻪﺵ ﺭﯗﺧﺴﯩﺘﻰ ﺗﯜﺯﯛﻣﻠﯩﺮﯨﻨﻰ ﺑﯧﻜﯩﺘﻜﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﺎﭘﺘﻮﻧﻮﻡ ﺭﺍﻳﻮﻥ ﺑﻮﻳﯩﭽﻪ ﻗﺎﺭ ﻟﻪﻳﻠﯩﺴﯩﻨﻰ ﺑﺎﺷﻘﯘﺭﯗﺵ ﺋﯩﺸﻠﯩﺮﯨﻐﺎ ﻧﯘﺭﻏﯘﻥ ﺋﻮﺭﯗﻧﻼﺭ ﺋﯩﮕﻪ ﺑﻮﻟﯘﭖ، ﺋﺎﺧﯩﺮﯨﻐﺎ ﻛﻪﻟﮕﻪﻧﺪﻩ ﮬﻪﻣﻤﯩﺴﻰ ﺑﺎﺷﻘﯘﺭﯨﺪﯨﻐﺎﻥ ﮬﻪﻣﺪﻩ ﮬﻪﻣﻤﯩﺴﻰ ﺗﻪﯕﻼ ﺑﺎﺷﻘﯘﺭﻣﺎﻳﺪﯨﻐﺎﻥ ﯞﻩﺯﯨﻴﻪﺕ ﺷﻪﻛﯩﻠﻠﻪﻧﮕﻪﻥ. ﻣﻪﺳﯩﻠﻪﻥ، ﺧﻮﺗﯘﻧﺴﯘﻣﺒﯘﻝ ﻧﺎﮬﯩﻴﯩﺴﯩﺪﻩ ﺑﯘ ﻳﯩﻞ 300 ﻣﯩﯔ ﺩﺍﻧﻪ ﻗﺎﺭ ﻟﻪﻳﻠﯩﺴﻰ ﺋﯜﺯﯛﺵ ﺑﻪﻟﮕﯩﻠﻪﻧﮕﻪﻥ ﺑﻮﻟﺴﺎ، ﺋﻪﻣﻪﻟﯩﻴﻪﺗﺘﻪ ﺋﯜﺯﯛﻟﮕﻪﻥ ﻗﺎﺭ ﻟﻪﻳﻠﯩﺴﯩﻨﯩﯔ ﺳﺎﻧﻰ 700-800 ﻣﯩﯔ ﺩﺍﻧﯩﻐﺎ ﻳﻪﺗﻜﻪﻥ.

ﺋﯜﭼﯩﻨﭽﯩﺴﻰ، ﮔﻪﺭﭼﻪ ﮬﯚﻛﯜﻣﻪﺕ "ﺋﻮﺗﻼﻕ ﻗﺎﻧﯘﻧﻰ"، "ﺋﻮﺭﻣﺎﻥ ﻗﺎﻧﯘﻧﻰ" ،"ﻳﺎﯞﺍﻳﻰ ﮬﺎﻳﯟﺍﻥ ﯞﻩ ﺋﯚﺳﯜﻣﻠﯜﻛﻠﻪﺭﻧﻰ ﺑﺎﺷﻘﯘﺭﯗﺵ ﺑﻪﻟﮕﯩﻠﯩﻤﯩﺴﻰ" ﮬﻪﻣﺪﻩ " ﺗﻮﺷﻘﺎﻥ ﺯﻩﺩﯨﻜﻰ، ﻗﺎﺭ ﻟﻪﻳﻠﯩﺴﻰ ﯞﻩ ﻗﯘﺭﺗﺌﻮﺕ ﻗﺎﺗﺎﺭﻟﯩﻖ ﺋﻮﺗﻼﻕ ﻳﺎﯞﺍﻳﻰ ﺋﯚﺳﯜﻣﻠﯜﻛﻠﯩﺮﯨﻨﻰ ﺋﯜﺯﯛﺵ ﺋﯩﺸﻠﯩﺮﯨﻨﻰ ﺑﺎﺷﻘﯘﺭﯗﺵ ﺋﯘﺳﯘﻟﻰ" ﺩﯦﮕﻪﻧﺪﻩﻙ ﺑﯩﺮ ﻗﺎﺗﺎﺭ ﺑﻪﻟﮕﯩﻠﯩﻤﯩﻠﻪﺭﻧﻰ ﭼﯩﻘﺎﺭﻏﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﺎﺯﺍﺭ ﺑﺎﺷﻘﯘﺭﯗﺷﻰ ﺑﯘﻧﯩﯖﻐﺎ ﻳﯧﺘﯩﺸﻪﻟﻤﯩﮕﻪﻥ. ﺷﯘﻧﺪﺍﻗﻼ ﻗﺎﻧﯘﻧﻨﻰ ﺋﯩﺠﺮﺍ ﻗﯩﻠﯩﺪﯨﻐﺎﻥ ﺋﻮﺭﯗﻧﻼﺭﻣﯘ ﺧﯩﺮﺍﺟﻪﺕ، ﺋﺎﺩﻩﻡ ﻛﯜﭼﻰ ﯞﻩ ﺋﻪﺳﻠﯩﮭﻪ ﻳﯧﺘﯩﺸﻤﻪﺳﻠﯩﻚ ﺋﻪﮬﯟﺍﻟﻠﯩﺮﻯ ﺳﻪﯞﻩﺑﯩﺪﯨﻦ، ﺋﯘﻻﺭﻧﯩﯔ ﻗﺎﻧﯘﻧﻨﻰ ﺋﯩﺠﺮﺍ ﻗﯩﻠﯩﺶ ﻛﯜﭼﻰ ﻳﯧﺘﻪﺭﻟﯩﻚ ﺑﻮﻟﻤﯩﻐﺎﻥ.

ﻧﯚﯞﻩﺗﺘﻪ ﺋﯘﻳﻐﯘﺭ ﺋﯧﻠﯩﺪﯨﻜﻰ ﮬﻪﺭ ﻗﺎﻳﺴﻰ ﺋﻮﺗﻼﻕ ﻣﯘﺗﻪﺧﻪﺳﺴﯩﺴﻠﯩﺮﻯ، ﮬﺎﺯﯨﺮ ﭘﯜﺗﯜﻥ ﺗﻪﯕﺮﻯ ﺗﯧﻐﯩﻨﯩﯔ ﺟﻪﻧﯘﺑﯩﻲ ﯞﻩ ﺷﯩﻤﺎﻟﯩﺪﯨﻜﻰ ﺩﯦﯖﯩﺰ ﻳﯜﺯﯨﺪﯨﻦ 3000 ﻣﯧﺘﯩﺮ ﺋﯩﮕﯩﺰﻟﯩﻜﺘﯩﻜﻰ ﺟﺎﻳﻨﯩﯔ ﺗﯚﯞﯨﻨﯩﺪﻩ ﻗﺎﺭ ﻟﻪﻳﻠﯩﺴﯩﻨﻰ ﻛﯚﺭﮔﯩﻠﻰ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺋﯧﻴﺘﯩﭗ، ﻗﺎﺭ ﻟﻪﻳﻠﯩﺴﯩﻨﯩﯔ ﻧﻪﺳﻠﻰ ﻗﯘﺭﯗﭖ ﻛﯧﺘﯩﺸﯩﺪﯨﻦ ﺋﯩﻨﺘﺎﻳﯩﻦ ﺋﻪﻧﺪﯨﺸﻪ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﯛﺷﺘﻰ. ﺷﯘﻧﺪﺍﻗﻼ ﺋﯘﻻﺭ ﻳﻪﻧﻪ، ﺋﻪﮔﻪﺭ ﮬﯚﻛﯜﻣﻪﺕ ﺑﯘﻧﯩﯖﻐﺎ ﺟﯩﺪﺩﯨﻲ ﺗﻪﺩﺑﯩﺮ ﻗﻮﻟﻼﻧﻤﯩﺴﺎ، ﻗﺎﺭ ﻟﻪﻳﻠﯩﺴﯩﻨﯩﯔ ﻧﻪﺳﻠﻰ ﻗﯘﺭﯗﭖ ﻛﯧﺘﯩﺶ ﭘﻪﺭﯨﺰﯨﻨﯩﯔ ﺋﯘﺯﯗﻧﻐﺎ ﻗﺎﻟﻤﺎﻱ ﺭﯨﺌﺎﻟﻠﯩﻘﻘﺎ ﺋﺎﻳﻠﯩﻨﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ. (ﭘﻪﺭﯨﺪﻩ)