ﻗﺎﺯﺍﻗﯩﺴﺘﺎﻥ ﺋﺎﺳﺎﺳﯩﻲ ﻗﺎﻧﯘﻧﯩﻐﺎ ﺋﯚﺯﮔﻪﺭﺗﯩﺶ ﻛﯩﺮﮔﯜﺯﺩﻯ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﭼﺎﺭﺷﻪﻧﺒﻪ ﻛﯜﻧﻰ، ﻗﺎﺯﺍﻗﯩﺴﺘﺎﻥ ﺩﯙﻟﻪﺕ ﭘﺎﺭﻻﻣﯧﻨﺘﻰ ﻗﺎﺭﺍﺭ ﻣﺎﻗﯘﻟﻼﭖ ﻗﺎﺯﺍﻗﯩﺴﺘﺎﻥ ﺋﺎﺳﺎﺳﯩﻲ ﻗﺎﻧﯘﻧﯩﻐﺎ ﺋﯚﺯﮔﻪﺭﺗﯩﺶ ﻛﯩﺮﮔﯜﺯﮔﻪﻥ. ﺑﯘ ﻗﺎﻧﯘﻥ ﺋﯩﺴﻼﻫﺎﺗﯩﻐﺎ ﻗﺎﺭﯨﺘﺎ، ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﻰ ﺑﯘ ﻗﺎﻧﯘﻥ ﺋﯩﺴﻼﻫﺎﺗﯩﻨﯩﯔ ﻗﺎﺯﺍﻗﯩﺴﺘﺎﻧﻨﻰ " ﺗﻮﻏﺮﺍ ﻳﯜﺯﻟﯩﻨﯩﺸﻜﻪ" ﺋﯧﻠﯩﭗ ﻣﺎﯕﯩﺪﯨﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ.

ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﻰ ﺑﺎﻳﺎﻧﺎﺗﭽﯩﺴﻰ ﺳﯧﺌﺎﻥ ﻣﻜﻜﻮﺭﻣﺎﻛﻚ: "ﻗﺎﺯﺍﻗﯩﺴﺘﺎﻥ ﺑﯩﺰ ﺯﻭﺭ ﺋﯜﻣﯩﺪ ﻛﯜﺗﯜﯞﺍﺗﻘﺎﻥ ﺩﯙﻟﻪﺕ ﺷﯘﻧﺪﺍﻗﻼ ﺑﯩﺰ ﻗﺎﺯﺍﻗﯩﺴﺘﺎﻥ ﺑﯩﻠﻪﻥ ﻳﯧﻘﯩﻨﺪﯨﻦ ﻫﻪﻣﻜﺎﺭﻟﯩﺸﯩﭗ ﺧﯩﺰﻣﻪﺕ ﻗﯩﻠﯩﯟﺍﺗﯩﻤﯩﺰ. ﺋﯘﻻﺭﺩﺍ ﺋﯩﻨﺘﺎﻳﯩﻦ ﻣﻮﻝ ﻳﻮﺷﯘﺭﯗﻥ ﻛﯘﭺ ﺑﺎﺭ. ﺋﯘﻻﺭﻧﯩﯔ ﺩﯦﻤﻮﻛﺮﺍﺗﯩﻚ ﺳﯩﻴﺎﺳﯩﻲ ﺋﯩﺴﻼﻫﺎﺗﻨﻰ ﺯﯙﺭﯛﺭ ﺩﻩﭖ ﺑﯩﻠﮕﻪﻧﻠﯩﻜﻰ ﺋﯩﻨﺘﺎﻳﯩﻦ ﻣﯘﻫﯩﻢ" ﺩﻩﻳﺪﯗ.

ﺋﯚﺯﮔﯩﺮﯨﺸﻠﻪﺭﻧﯩﯔ ﻧﯧﮕﯩﺰﻟﯩﻚ ﺗﻪﺭﻩﭘﻠﯩﺮﻯ

ﺋﯚﺯﮔﯩﺮﯨﺸﻠﻪﺭ ﺗﯚﯞﻩﻧﺪﯨﻜﻰ ﺗﻪﺭﻩﭘﻠﻪﺭﺩﻩ ﻧﯧﮕﯩﺰﻟﯩﻚ ﺋﯩﭙﺎﺩﯨﻠﯩﻨﯩﺪﯨﻐﺎﻥ ﺑﻮﻟﯘﭖ، ﺑﯘﻻﺭ ﺋﺎﺳﺎﺳﻪﻥ: ﺑﯘﻧﺪﯨﻦ ﻛﯩﻴﯩﻦ ﺳﺎﻳﻠﯩﻨﯩﺪﯨﻐﺎﻥ ﭘﺮﯦﺰﯨﺪﯦﻨﺘﻼﺭﻧﯩﯔ ﯞﻩﺯﯨﭙﻪ ﺋﯚﺗﻪﺵ ﻣﯘﺩﺩﯨﺘﻰ 5 ﻳﯩﻞ ﺑﻮﻟﯘﺵ، ﭘﺎﺭﻻﻣﯩﻨﺘﻘﺎ ﭘﺮﯦﺰﯨﺪﯦﻨﺘﻨﯩﯔ ﻫﻮﻗﯘﻕ ﺩﺍﺋﯩﺮﯨﺴﯩﻨﻰ ﭼﻪﻛﻠﻪﭖ ﺗﯘﺭﯗﺵ ﻫﻮﻗﯘﻗﻰ ﺑﯧﺮﯨﺶ، ﻗﺎﺯﺍﻗﯩﺴﺘﺎﻥ ﺩﯙﻟﻪﺕ ﻣﻪﺟﻠﯩﺴﯩﺪﯨﻜﻰ ﯞﻩﻛﯩﻠﻠﻪﺭﻧﯩﯔ ﺳﺎﻧﻰ ﺋﻪﺳﻠﯩﺪﯨﻜﻰ 77 ﺩﯨﻦ 107 ﮔﻪ ﻛﯚﭘﻪﻳﺘﯩﺶ، ﺩﯙﻟﻪﺕ ﻣﻪﺟﻠﯩﺴﯩﺪﻩ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺑﯩﺮﺩﯨﻦ ﯞﻩﻛﯩﻠﻰ ﺑﻮﻟﯘﺵ، ﺭﺍﻳﻮﻥ، ﯞﯨﻼﻳﻪﺕ ﯞﻩ ﻧﺎﻫﯩﻴﯩﻠﯩﻚ ﻫﯚﻛﯜﻣﻪﺗﻠﻪﺭﻧﯩﯔ ﺭﻩﺋﯩﺲ، ﯞﺍﻟﻰ‏، ﻫﺎﻛﯩﻤﻠﯩﺮﯨﻨﻰ ﺷﯘ ﺭﺍﻳﻮﻧﺪﯨﻜﻰ ﺧﻪﻟﻖ ﺳﺎﻳﻼﭖ ﭼﯩﻘﯩﺶ ﻗﺎﺗﺎﺭﻟﯩﻘﻼﺭ.

ﻗﺎﻧﯘﻥ ﺋﯩﺴﻼﻫﺎﺗﻰ ﻗﺎﺯﺍﻗﯩﺴﺘﺎﻧﺪﯨﻜﻰ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺳﯩﻴﺎﺳﯩﻲ ﻫﻮﻗﯘﻗﯩﻨﻰ ﻛﺎﭘﺎﻟﻪﺗﻜﻪ ﺋﯩﮕﻪ ﻗﯩﻠﯩﺪﯗ

ﻣﻪﻟﯘﻡ ﺑﻮﻟﯘﺷﯩﭽﻪ، ﺋﺎﺳﺎﺳﻲ ﻗﺎﻧﯘﻧﺪﯨﻜﻰ ﻳﯘﻗﯩﺮﯨﻘﻰ ﺋﯚﺯﮔﯩﺮﯨﺸﻠﻪﺭ ﻗﺎﺯﺍﻗﯩﺴﺘﺎﻧﺪﯨﻜﻰ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﮔﻪ ﺟﯜﻣﻠﯩﺪﯨﻦ ﻗﺎﺯﺍﻗﯩﺴﺘﺎﻧﺪﯨﻜﻰ 5 - ﭼﻮﯓ ﻣﯩﻠﻠﻪﺕ ﺋﯘﻳﻐﯘﺭﻻﺭﻧﯩﻤﯘ ﻣﯘﻧﺎﺳﯩﭗ ﺳﯩﻴﺎﺳﯩﻲ ﻫﻮﻗﯘﻕ ﺑﯩﻠﻪﻥ ﺗﻪﻣﯩﻨﻠﻪﻳﺪﯨﻜﻪﻥ.

ﺑﯘ ﻫﻪﻗﺘﻪ ﻫﺎﺯﯨﺮ ﻗﺎﺯﺍﻗﯩﺴﺘﺎﻧﺪﺍ ﺋﯩﺴﺘﯩﻘﺎﻣﻪﺕ ﻗﯩﻠﯩﯟﺍﺗﻘﺎﻥ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺋﻮﺗﺘﯘﺭﺍ ﺋﺎﺳﯩﻴﺎﺩﯨﻜﻰ ﯞﻩﻛﯩﻠﻰ، ﻗﻪﻫﺮﯨﻤﺎﻥ ﻏﻮﺟﺎﻣﺒﻪﺭﺩﻯ ﺋﻮﺯ ﭘﯩﻜﯩﺮﻟﯩﺮﯨﻨﻰ ﻣﯘﻧﺪﺍﻕ ﺑﺎﻳﺎﻥ ﻗﯩﻠﺪﻯ.

ﺋﯘﻧﯩﯔ ﺑﯩﻠﺪﯛﺭﯛﺷﯩﭽﻪ، ﺋﺎﺳﺎﺳﯩﻲ ﻗﺎﻧﯘﻧﻐﺎ ﻛﯩﺮﮔﯜﺯﯛﻟﮕﻪﻥ ﺑﯘ ﺑﯩﺮ ﻗﺎﺗﺎﺭ ﺋﯚﺯﮔﯩﺮﯨﺸﻠﻪﺭ ﻗﺎﺯﺍﻗﯩﺴﺘﺎﻧﻨﯩﯔ ﺋﻮﺗﺘﯘﺭﺍ ﺋﺎﺳﯩﻴﺎﺩﯨﻜﻰ ﺋﻪﯓ ﺩﯦﻤﻮﻛﺮﺍﺗﯩﻚ ﺩﯙﻟﻪﺕ ﺑﻮﻟﯘﭖ ﻗﯘﺭﯗﻟﯘﺷﯩﻨﻰ ﻣﯘﺳﺘﻪﻫﻜﻪﻡ ﺋﺎﺳﺎﺱ ﺑﯩﻠﻪﻥ ﺗﻪﻣﯩﻦ ﺋﯧﺘﯩﭙﻼ ﻗﺎﻟﻤﺎﺳﺘﯩﻦ، ﺑﻪﻟﻜﻰ ﻳﻪﻧﻪ، ﺋﯘﻳﻐﯘﺭﻻﺭﻧﯩﯔ ﺩﯦﻤﻮﻛﺮﺍﺗﯩﻚ ﻫﻪﺭﯨﻜﻪﺗﻠﯩﺮﯨﻨﯩﯔ ﻗﺎﺯﺍﻗﯩﺴﺘﺎﻧﺪﺍ ﺋﻪﺭﻛﯩﻦ ﻗﺎﻧﺎﺕ ﻳﯧﻴﯩﺸﯩﻨﯩﻤﯘ ﻗﺎﻧﯘﻧﯩﻲ ﻛﺎﭘﺎﻟﻪﺗﻜﻪ ﺋﯩﮕﻪ ﻗﯩﻠﯩﺪﯨﻜﻪﻥ.

ﻗﺎﺯﺍﻗﯩﺴﺘﺎﻧﺪﯨﻜﻰ ﺋﯚﻛﺘﯩﭽﻰ ﺗﻪﺷﻜﯩﻼﺗﻼﺭ ﻳﻪﻧﯩﻼ ﻧﺎﺭﺍﺯﻯ

ﻫﺎﻟﺒﯘﻛﻰ، ﺳﻪﻳﺸﻪﻧﺒﻪ ﻛﯜﻧﻰ ﻗﺎﺯﺍﻗﯩﺴﺘﺎﻥ ﭘﺮﯦﺰﯨﺪﯦﻨﺘﻰ ﻧﯘﺭﺳﯘﻟﺘﺎﻥ ﻧﻪﺯﻩﺭﺑﺎﻳﯩﻒ ﺋﯚﺯﯨﻨﻰ ﻣﻪﯕﮕﯜﻟﯜﻙ ﭘﺮﯦﺰﯨﺪﯦﻨﺖ ﺩﻩﭖ ﺋﯧﻼﻥ ﻗﯩﻠﻐﺎﻥ ﺋﯩﺪﻯ.

ﺭﻭﻳﺘﯧﺮﺱ ﺋﺎﮔﯧﻨﺘﻠﯩﻘﯩﻨﯩﯔ 23 - ﻣﺎﻱ ﻛﯜﻧﻰ ﻗﺎﺯﺍﻗﯩﺴﺘﺎﻧﺪﯨﻜﻰ ﺋﯚﻛﺘﯩﭽﻰ ﺗﻪﺷﻜﯩﻼﺕ ﺭﻩﻫﺒﻪﺭﻟﯩﺮﯨﻨﯩﯔ ﺳﯚﺯﻟﯩﺮﯨﺪﯨﻦ ﻧﻪﻗﯩﻞ ﻛﻪﻟﺘﯜﺭﯛﺷﯩﭽﻪ، ﺑﻮﻻﺕ ﺋﺎﺑﯩﻠﻮﯞ " ﻫﻪﺗﺘﺎ ﭘﺎﺩﯨﺸﺎﻫﻼﺭﺩﯨﻤﯘ ﺑﯘﻧﭽﻪ ﻫﻮﻗﯘﻕ ﻳﻮﻕ" ﺩﻩﭖ ﻧﯘﺭ ﺳﯘﻟﺘﺎﻥ ﻧﻪﺯﻩﺭﺑﺎﻳﯩﻔﻨﯩﯔ ﺳﯩﻴﺎﺳﯩﺘﯩﻨﻰ ﺋﻪﻳﯩﺒﻠﯩﮕﻪﻥ.

ﻗﺎﺯﺍﻗﯩﺴﺘﺎﻧﺪﯨﻜﻰ ﺋﯚﻛﺘﯩﭽﻰ ﺗﻪﺷﻜﯩﻼﺕ ﺳﻮﺗﺴﯩﻴﺎﻝ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﯩﯔ ﺑﺎﺷﻠﯩﻘﻰ ﺟﺎﺭﻣﺎﺧﺎﻥ ﺗﯘﻳﺎﺑﺎﻱ، "ﺑﯘ ﺋﯚﺯﮔﯩﺮﯨﺸﻠﻪﺭ ﺧﻪﻟﻘﻘﻪ ﭘﻪﻗﻪﺕ 10 ﭘﯩﺮﺳﻪﻧﺖ ﺩﯦﻤﻮﻛﺮﺍﺗﯩﻴﻪ ﺋﯧﻠﯩﭗ ﻛﯧﻠﯩﺪﯗ" ﺩﯦﺪﻯ.

ﻫﺎﺯﯨﺮ ﻗﺎﺯﺍﻗﯩﺴﺘﺎﻧﺪﯨﻜﻰ ﺑﺎﺷﻘﺎ ﺋﯚﻛﺘﯩﭽﯩﻠﻪﺭ ﺋﺎﺳﺎﺳﯩﻲ ﻗﺎﻧﯘﻥ ﺋﯚﺯﮔﻪﺭﺗﯩﺸﯩﮕﻪ ﻗﺎﺭﺷﻰ ﻛﯧﻠﻪﺭ ﻫﻪﭘﺘﻪ ﻧﺎﻣﺎﻳﯩﺶ ﻗﯩﻠﯩﺸﻨﻰ ﭘﯩﻼﻧﻠﯩﻤﺎﻗﺘﺎ ﺋﯩﻜﻪﻥ.

ﺋﻪﻣﻤﺎ، ﻧﻪﺯﻩﺭﺑﺎﻳﯩﻔﻨﻰ ﻗﻮﻟﻠﯩﻐﯘﭼﯩﻼﺭ، ﺋﯚﺗﻜﻪﻥ ﻳﯩﻠﻰ ﺋﯩﻘﺘﯩﺴﺎﺩﻧﯩﯔ ﻳﻪﻧﻪ 10 ﭘﯩﺮﺳﻪﻧﺖ ﺋﯚﺭﻟﯩﮕﻪﻧﻠﯩﻜﯩﻨﻰ ﻣﯩﺴﺎﻝ ﻗﯩﻠﯩﺸﯩﭗ ﻧﻪﺯﻩﺭﺑﺎﻳﯩﻔﻨﯩﯔ ﺋﯘﺯﯗﻥ ﻣﻪﺯﮔﯩﻞ ﻫﻮﻗﯘﻕ ﺗﯘﺗﯘﺷﯩﻨﻰ ﻗﺎﺭﺷﻰ ﺋﺎﻟﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ (ﺟﯜﻣﻪ)