ﺭﯗﺳﯩﻴﯩﻠﯩﻚ ﺋﯘﻳﻐﯘﺭﺷﯘﻧﺎﺱ ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻔﻨﯩﯔ ﻗﻪﺩﯨﻤﻘﻰ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﻫﻪﻗﻘﯩﺪﻩ ﺋﯧﻴﺘﻘﺎﻧﻠﯩﺮﻯ

• ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺭﯗﺳﯩﻴﯩﻨﯩﯔ ﺋﺎﺗﺎﻗﻠﯩﻖ ﺋﯘﻳﻐﯘﺭﺷﯘﻧﺎﺳﻰ، ﺭﯗﺳﯩﻴﻪ ﭘﻪﻧﻠﻪﺭ ﺋﺎﻛﺎﺩﯦﻤﯩﻴﯩﺴﻰ ﺷﻪﺭﻗﺸﯘﻧﺎﺳﻠﯩﻖ ﺋﯩﻨﯩﺴﺘﯩﺘﯘﺗﻰ ﺷﻪﺭﻕ ﺗﺎﺭﯨﺨﻰ ﺗﻪﺗﻘﯩﻘﺎﺕ ﺑﯚﻟﯜﻣﯩﻨﯩﯔ ﺑﺎﺷﻠﯩﻘﻰ ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻒ ﺋﯚﺯﯨﻨﯩﯔ ﻗﻪﺩﯨﻤﻜﻰ ﺗﯜﺭﻙ ﯞﻩ ﺋﯘﻳﻐﯘﺭ ﻳﯧﺰﯨﻘﻰ ﻳﺎﺩﯨﮕﺎﺭﻟﯩﻘﻠﯩﺮﯨﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﻗﻪﺩﯨﻤﻜﻰ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﻫﻪﻗﻘﯩﺪﯨﻜﻰ ﻳﯧﯖﻰ ﻛﯚﺯ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ. Photo RFA

ﺋﻪﻧﻘﻪﺭﻩﺩﻩ ﺋﯚﺗﻜﯜﺯﯛﻟﮕﻪﻥ 38-ﻗﯧﺘﯩﻤﻠﯩﻖ ﺋﺎﺳﯩﻴﺎ ﯞﻩ ﺷﯩﻤﺎﻟﯩﻲ ﺋﺎﻓﺮﯨﻘﺎ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺟﻪﺭﻳﺎﻧﯩﺪﺍ ﺭﯗﺳﯩﻴﯩﻨﯩﯔ ﺋﺎﺗﺎﻗﻠﯩﻖ ﺋﯘﻳﻐﯘﺭﺷﯘﻧﺎﺳﻰ، ﺭﯗﺳﯩﻴﻪ ﭘﻪﻧﻠﻪﺭ ﺋﺎﻛﺎﺩﯦﻤﯩﻴﯩﺴﻰ ﺷﻪﺭﻗﺸﯘﻧﺎﺳﻠﯩﻖ ﺋﯩﻨﯩﺴﺘﯩﺘﯘﺗﻰ ﺷﻪﺭﻕ ﺗﺎﺭﯨﺨﻰ ﺗﻪﺗﻘﯩﻘﺎﺕ ﺑﯚﻟﯜﻣﯩﻨﯩﯔ ﺑﺎﺷﻠﯩﻘﻰ ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻒ ﺋﯚﺯﯨﻨﯩﯔ ﻗﻪﺩﯨﻤﻜﻰ ﺗﯜﺭﻙ ﯞﻩ ﺋﯘﻳﻐﯘﺭ ﻳﯧﺰﯨﻘﻰ ﻳﺎﺩﯨﮕﺎﺭﻟﯩﻘﻠﯩﺮﯨﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﻗﻪﺩﯨﻤﻜﻰ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﻫﻪﻗﻘﯩﺪﯨﻜﻰ ﻳﯧﯖﻰ ﻛﯚﺯ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﭘﺮﻭﻓﯧﺴﺴﻮﺭ ﯞﺍﺳﯩﻠﯩﻴﯧﻒ ﺋﻪﺭﻛﯩﻦ ﺋﺎﺳﯩﻴﺎ ﺭﺍﺩﯨﺌﻮﺳﯩﻨﯩﯔ ﺋﻪﻧﻘﻪﺭﻩ ﺷﯚﺑﯩﺴﯩﻨﻰ ﻣﻪﺧﺴﯘﺱ ﺯﯨﻴﺎﺭﻩﺕ ﻗﯩﻠﻐﺎﻧﺪﺍ ﺋﯚﺯﯨﻨﯩﯔ ﺗﯘﯞﺍ ﺟﯘﻣﻬﯘﺭﯨﻴﯩﺘﯩﺪﯨﻜﻰ ﻗﻪﺩﯨﻤﻜﻰ ﺋﯘﻳﻐﯘﺭ ﺷﻪﻫﯩﺮﯨﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﻗﯘﺭﯗﻟﯘﺷﯩﻐﺎ ﻗﺎﺗﻨﯩﺸﯩﺶ ﯞﻩ ﻗﻪﺩﯨﻤﻜﻰ ﺋﯘﻳﻐﯘﺭ ﺋﻮﺭﺧﯘﻥ ﺩﻩﯞﺭﯨﻨﻰ ﺗﻪﺗﻘﯩﻖ ﻗﯩﻠﯩﺶ ﺋﻪﻫﯟﺍﻟﻠﯩﺮﻯ ﻫﻪﻗﻘﯩﺪﻩ ﺳﯚﺯﻟﻪﭖ ﺑﻪﺭﺩﻯ.

ﺗﯘﯞﺍﺩﺍ 16 ﻗﻪﺩﯨﻤﯩﻲ ﺋﯘﻳﻐﯘﺭ ﺷﻪﻫﯩﺮﻯ ﺳﺎﻗﻠﯩﻨﯩﭗ ﻗﺎﻟﻐﺎﻥ

ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻔﻨﯩﯔ ﺋﯧﻴﺘﯩﺸﯩﭽﻪ، ﺭﯗﺳﯩﻴﻪ ﻫﯚﻛﯜﻣﯩﺘﻰ ﻣﻪﺑﻠﻪﻍ ﺋﺎﺟﺮﯨﺘﯩﭗ، ﺗﯘﯞﺍ ﺟﯘﻣﻬﯘﺭﯨﻴﯩﺘﯩﺪﯨﻜﻰ ﺗﯧﺮﻩ-ﺧﻮﻝ ﻛﯚﻟﯩﮕﻪ ﺟﺎﻳﻼﺷﻘﺎﻥ ﻗﻪﺩﯨﻤﻜﻰ ﺋﯘﻳﻐﯘﺭ "ﭘﻮﺭ-ﺑﺎﺟﯩﻦ" ﻗﻪﻟﺌﻪﺳﯩﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﻗﯘﺭﯗﻟﯘﺷﯩﻨﻰ ﺑﺎﺷﻠﯩﻐﺎﻥ، ﻣﻪﺯﻛﯘﺭ ﻗﻪﻟﺌﻪﻧﻰ ﺗﻪﻛﺸﯜﺭﯛﺵ ﺋﯜﭼﯜﻥ ﭼﻮﯓ ﻛﯚﻟﻪﻣﻠﯩﻚ ﺑﯩﺮ ﺋﺎﺭﺧﯧﺌﻮﻟﻮﮔﯩﻴﻪ ﺋﻪﺗﺮﯨﺘﻰ ﺗﻪﺷﻜﯩﻠﻠﻪﭖ، ﺋﻮﻣﯘﻣﻴﯜﺯﻟﯜﻙ ﺗﻪﻛﺸﯜﺭﯛﺵ ﺋﯧﻠﯩﭗ ﺑﺎﺭﻏﺎﻥ. ﺑﯘﻧﯩﯖﻐﺎ ﻣﻮﺳﻜﯟﺍ ﯞﻩ ﺗﯘﯞﺍ ﺟﯘﻣﻬﯘﺭﯨﻴﯩﺘﯩﻨﯩﯔ ﺋﺎﻟﯩﻤﻠﯩﺮﻯ، ﺋﻮﻗﯘﺗﻘﯘﭼﻰ - ﺋﻮﻗﯘﻏﯘﭼﯩﻠﯩﺮﻯ ﺋﯩﺸﺘﯩﺮﺍﻙ ﻗﯩﻠﻐﺎﻥ. ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻒ ﻣﯘﻧﺪﺍﻕ ﺩﯦﺪﻯ:" -8ﺋﻪﺳﯩﺮﺩﻩ ﺋﯘﻳﻐﯘﺭﻻﺭ ﺟﻪﻧﯘﺑﯩﻲ ﺳﯩﺒﯩﺮﯨﻴﯩﮕﻪ ﻛﯩﺮﯨﺸﻜﻪ ﺑﺎﺷﻠﯩﺪﻯ. ﺑﯘ ﯞﺍﻗﯩﺘﺘﺎ ﻗﻪﺩﯨﻤﯩﻲ ﺋﯘﻳﻐﯘﺭ ﻗﺎﻏﺎﻧﻠﯩﻘﻰ ﺩﯙﻟﯩﺘﻰ ﻗﯘﺭﯗﻟﺪﻯ. ﺋﯘﻳﻐﯘﺭﻻﺭ ﺋﯘ ﯞﺍﻗﯩﺘﺘﺎ ﺷﯩﻤﺎﻟﻐﺎ ﻗﺎﺭﺍﭖ ﻳﯜﺭﯛﺵ ﻗﯩﻠﯩﭗ، ﻫﺎﺯﯨﺮﻗﻰ ﺗﯘﯞﺍ ﺟﯘﻣﻬﯘﺭﯨﻴﯩﺘﯩﻨﯩﯔ ﺗﯘﭘﺮﺍﻗﻠﯩﺮﯨﻐﺎ ﻛﻪﻟﮕﻪﻥ. ﺷﯘﯕﺎ ﻫﺎﺯﯨﺮ ﺳﯩﺒﯩﺮﯨﻴﯩﻨﯩﯔ ﺟﻪﻧﯘﺑﯩﺪﺍ ﻗﻪﺩﯨﻤﯩﻲ ﺋﯘﻳﻐﯘﺭﻻﺭﻏﺎ ﺋﺎﺋﯩﺖ ﻫﻪﻳﻜﻪﻟﻠﻪﺭﻧﻰ ﯞﻩ ﺑﯘﻧﯩﯖﻐﺎ ﺋﻮﺧﺸﺎﺵ ﻧﯘﺭﻏﯘﻥ ﻧﻪﺭﺳﯩﻠﻪﺭﻧﻰ ﺋﯘﭼﺮﺍﺗﻘﯩﻠﻰ ﺑﻮﻟﯩﺪﯗ. ﻣﻪﺳﯩﻠﻪﻥ، ﻫﺎﺯﯨﺮﻗﻰ ﺗﯘﯞﺍ ﺟﯘﻣﻬﯘﺭﯨﻴﯩﺘﯩﺪﻩ 16 ﺋﯘﻳﻐﯘﺭ ﻗﻪﻟﺌﻪﺳﻰ ﺳﺎﻗﻠﯩﻨﯩﭗ ﻗﺎﻟﻐﺎﻥ. ﺑﯘ ﻗﻪﻟﺌﻪﻟﻪﺭﻧﯩﯔ ﺋﯩﭽﯩﺪﻩ ﺋﻪﯓ ﺩﯨﻘﻘﻪﺕ ﺗﺎﺭﺗﯩﺪﯨﻐﯩﻨﻰ ﭘﻮﺭ - ﺑﺎﺟﯩﻦ ﻗﻪﻟﺌﻪﺳﻰ ﻳﻪﻧﻰ ﭘﺎﺗﻘﺎﻗﻠﯩﻖ ﻗﻪﻟﺌﻪﺩﯗﺭ. ﺑﯘ ﻗﻪﻟﺌﻪ ﺩﯦﯖﯩﺰ ﻳﯜﺯﯨﺪﯨﻦ 2300 ﻣﯧﺘﯩﺮ ﺋﯧﮕﯩﺰﻟﯩﻜﺘﯩﻜﻰ ﺋﯩﭙﺘﯩﺪﺍﺋﯩﻲ ﺋﻮﺭﻣﺎﻧﻠﯩﻖ ﺋﯩﭽﯩﮕﻪ ﺟﺎﻳﻼﺷﻘﺎﻥ ﻛﯚﻟﻨﯩﯔ ﺋﻮﺗﺘﯘﺭﺳﯩﻐﺎ ﺑﯩﻨﺎ ﻗﯩﻠﯩﻨﻐﺎﻥ."

ﺋﯘﻧﯩﯔ ﺋﯧﻴﺘﯩﺸﯩﭽﻪ، ﻗﻪﺩﯨﻤﻜﻰ ﺋﯘﻳﻐﯘﺭ ﻗﻪﻟﺌﻪﺳﻰ ﺗﯘﯞﺍﻧﯩﯔ ﺷﻪﺭﻗﯩﻲ ﺟﻪﻧﯘﺑﯩﺪﯨﻜﻰ ﺗﯧﺮﻩ-ﺧﻮﻝ ﻛﯚﻟﯩﻨﯩﯔ ﺋﻮﺗﺘﯘﺭﯨﺴﯩﻐﺎ ﺟﺎﻳﻼﺷﻘﺎﻥ ﺑﻮﻟﯘﭖ، ﻛﻪﯕﻠﯩﻜﻰ 211 ﻣﯧﺘﯩﺮ، ﺋﯘﺯﯗﻧﻠﯘﻗﻰ 240 ﻣﯧﺘﯩﺮ ﻛﯧﻠﯩﺪﯗ. ﻗﻪﻟﺌﻪ ﺳﯧﭙﯩﻠﻰ ﯞﻩ ﺑﺎﺷﻘﺎ ﺧﺎﺭﺍﺑﯩﻼﺭ ﺑﯩﺮ ﺋﺎﺯ ﻳﺎﺧﺸﻰ ﺳﺎﻗﻠﯩﻨﯩﭗ ﻗﺎﻟﻐﺎﻥ.

ﺋﯘﻳﻐﯘﺭ ﺷﻪﻫﯩﺮﯨﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺷﻜﻪ ﺭﯗﺳﯩﻴﻪ ﻣﻪﺑﻠﻪﻍ ﺳﺎﻟﻐﺎﻥ

ﯞﺍﺳﯩﻠﯩﻴﯧﻒ ﺑﯘ ﻗﻪﻟﺌﻪﻧﯩﯔ 8-ﺋﻪﺳﯩﺮﺩﯨﻦ 9-ﺋﻪﺳﯩﺮﮔﯩﭽﻪ ﻫﯚﻛﯜﻡ ﺳﯜﺭﮔﻪﻥ ﺋﯘﻳﻐﯘﺭ ﻗﺎﻏﺎﻧﻠﯩﻘﯩﻐﺎ ﺗﻪﯞﻩ، ﺋﻮﺭﺧﯘﻥ ﺋﯘﻳﻐﯘﺭ ﻗﺎﻏﺎﻧﻠﯩﻘﯩﻨﯩﯔ ﻗﯘﺭﻏﯘﭼﯩﺴﻰ ﻣﻮﻳﯘﻧﭽﯘﺭ ﺗﻪﺭﯨﭙﯩﺪﯨﻦ ﺗﻪﺧﻤﯩﻨﻪﻥ 746- 759-ﻳﯩﻠﻠﯩﺮﻯ ﺋﻪﺗﺮﺍﭘﯩﺪﺍ ﻗﯘﺭﯗﻟﻐﺎﻧﻠﯩﻘﯩﻨﻰ، ﻗﯩﺮﻏﯩﺰﻻﺭ ﺑﯩﻠﻪﻥ ﺑﻮﻟﻐﺎﻥ ﺋﯘﺭﯗﺵ ﻧﻪﺗﯩﺠﯩﺴﯩﺪﻩ ﻛﯚﻳﺪﯛﺭﯛﯞﯦﺘﯩﻠﮕﻪﻥ ﺑﻮﻟﯘﺷﻰ ﻣﯘﻣﻜﯩﻨﻠﯩﻜﯩﻨﻰ ﭘﻪﺭﻩﺯ ﻗﯩﻠﻐﯩﻠﻰ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ ﻣﯘﻧﺪﺍﻕ ﺩﯦﺪﻯ:"ﺑﯘ ﻳﯩﻠﺪﯨﻦ ﺋﯧﺘﯩﺒﺎﺭﻩﻥ ﺋﯘ ﻳﻪﺭﺩﻩ ﻫﯚﻛﯜﻣﻪﺗﻨﯩﯔ ﻫﯩﻤﺎﻳﯩﺴﻰ ﯞﻩ ﻳﺎﺭﺩﯨﻤﻰ ﺑﯩﻠﻪﻥ ﭼﻮﯓ ﺑﯩﺮ ﺗﻪﺗﻘﯩﻘﺎﺕ ﮔﯘﺭﯗﭘﭙﯩﺴﻰ ﺋﯩﺸﻠﻪﯞﺍﺗﯩﺪﯗ. ﺋﯘﻻﺭﻧﯩﯔ ﻛﯚﭘﯩﻨﭽﯩﺴﻰ ﺋﺎﺭﺧﯧﺌﻮﻟﻮﮔﻼﺭ. ﺑﯘ ﻗﯧﺰﯨﭗ ﺗﻪﻛﺸﯜﺭﯛﺵ ﺋﯩﺸﯩﻨﻰ ﺗﻪﻛﻠﯩﭗ ﻗﯩﻠﻐﺎﻥ ﻛﯩﺸﻰ ﺑﻮﻟﺴﺎ ﺑﯩﺰﻧﯩﯔ ﺩﯙﻟﻪﺕ ﻣﯩﻨﯩﺴﺘﯩﺮﯨﻤﯩﺰ ﺳﯧﺮﮔﯩﻲ ﺷﻮﯞﮔﯘ. ﺋﯘ ﻛﯩﺸﻰ ﺗﯘﯞﺍﻟﯩﻖ ﺑﻮﻟﻐﺎﭼﻘﺎ ﺋﯚﺯﻟﯩﺮﯨﮕﻪ ﺋﺎﺋﯩﺖ ﻧﻪﺭﺳﯩﻠﻪﺭﻧﻰ ﻗﻮﻏﺪﺍﭖ ﻗﯧﻠﯩﺶ ﺋﯜﭼﯜﻥ ﭘﯜﺗﯜﻥ ﺗﻪﺩﺑﯩﺮﻟﻪﺭﻧﻰ ﺋﯧﻠﯩﺸﻘﺎ ﺗﯩﺮﯨﺸﯩﯟﺍﺗﯩﺪﯗ."

ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻒ ﺭﯗﺳﯩﻴﻪ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺗﯜﺯﯛﻟﮕﻪﻥ ﻗﻪﺩﯨﻤﻜﻰ ﺋﯘﻳﻐﯘﺭ ﺷﻪﻫﯩﺮﯨﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﻓﻮﻧﺪﻯ ﺟﻪﻣﺌﯩﻴﯩﺘﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ ﺑﻮﻟﯘﭖ، ﺑﯘ ﻗﯘﺭﯗﻟﯘﺷﻘﺎ ﺑﺎﺷﺘﯩﻦ ﺋﺎﺧﯩﺮﻯ ﺭﻩﻫﺒﻪﺭﻟﯩﻚ ﻗﯩﻠﯩﺸﻘﺎ ﻫﻪﻡ ﺗﻪﺗﻘﯩﻘﺎﺗﻘﺎ ﻗﺎﺗﻨﺎﺷﺘﻰ. ﺋﯘﻧﯩﯔ ﺑﯩﻠﺪﯛﺭﯛﺷﯩﭽﻪ ، ﺑﯘ ﻗﻪﻟﺌﻪﻟﻪﺭﻧﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﺧﯩﺰﻣﯩﺘﯩﮕﻪ ﺭﯗﺳﯩﻴﻪ ﺩﯙﻟﻪﺕ ﺑﺎﺷﻠﯩﻘﻰ ﭘﯘﺗﯩﻨﻤﯘ ﺋﯩﻨﺘﺎﻳﯩﻦ ﺋﻪﻫﻤﯩﻴﻪﺕ ﺑﯧﺮﯨﯟﺍﺗﻘﺎﻥ ﺑﻮﻟﯘﭖ، ﺋﯘ ﺑﯘ ﻫﻪﻗﺘﻪ ﻣﯘﻧﺪﺍﻕ ﺩﯦﺪﻯ: "8- ﺋﺎﻳﺪﺍ ﺑﯩﺰﻧﯩﯔ ﺟﯘﻣﻬﯘﺭ ﺭﻩﺋﯩﺴﯩﻤﯩﺰ ﭘﯘﺗﯩﻦ ﺑﯩﺰﻧﻰ ﺯﯨﻴﺎﺭﻩﺕ ﻗﯩﻠﺪﻯ. ﺋﯘ ﻳﻪﺭﺩﯨﻜﻰ ﺗﻪﺗﻘﯩﻘﺎﺗﭽﯩﻼﺭ ﺑﯩﻠﻪﻥ ﺳﯚﻫﺒﻪﺕ ﺋﯧﻠﯩﭗ ﺑﺎﺭﺩﻯ. ﻣﻮﻧﺎﻛﻮ ﺟﯘﻣﻬﯘﺭﯨﻴﯩﺘﯩﻨﯩﯔ ﺭﻩﺋﯩﺴﯩﻤﯘ ﻛﻪﻟﺪﻯ. ﺋﯘﻧﯩﯔ ﺳﯩﺮﺗﯩﺪﺍ ﺭﯗﺳﯩﻴﯩﺪﯨﻜﻰ ﻣﯩﻨﯩﺴﺘﯩﺮﻻﺭ ﯞﻩ ﭘﺎﺭﻻﻣﯧﻨﺖ ﺋﻪﺯﺍﻟﯩﺮﻯ ﺋﺎﻻﻫﯩﺪﻩ ﻗﯩﺰﯨﻘﯩﭗ ﺑﯘ ﻗﯧﺰﯨﺶ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﻳﻪﺭﮔﻪ ﻛﯧﻠﯩﭗ ﺑﯩﺰﻧﻰ ﺯﯨﻴﺎﺭﻩﺕ ﻗﯩﻠﯩﭗ، ﺑﯘ ﺋﯩﺸﻘﺎ ﺋﺎﻻﻫﯩﺪﻩ ﺋﻪﻫﻤﯩﻴﻪﺕ ﺑﯧﺮﯨﯟﺍﺗﯩﺪﯗ."

ﭘﺮﻭﻓﯧﺴﺴﻮﺭ ﺩﯨﻤﯩﺘﺮﯨﻲ ﯞﺍﺳﯩﻠﯩﻴﯧﻒ ﻣﻮﻳﯘﻧﭽﯘﺭ ﻗﺎﻏﺎﻧﻨﯩﯔ ﻣﻪﺯﻛﯘﺭ ﺷﻪﻫﯩﺮﻯ ﺋﻪﺳﻠﯩﮕﻪ ﻛﻪﻟﺘﯜﺭﯛﻟﮕﻪﻧﺪﯨﻦ ﻛﯧﻴﯩﻦ ﺭﯗﺳﯩﻴﯩﺪﻩ ﺋﯘﻳﻐﯘﺭ ﻣﻪﺩﻩﻧﯩﺘﻴﯩﮕﻪ ﻗﯩﺰﯨﻘﯩﺶ ﺩﻭﻟﻘﯘﻧﻰ ﻗﻮﺯﻏﯩﻠﯩﺪﯨﻐﺎﻧﻠﯩﻘﯩﻨﻰ، ﻫﺎﺯﯨﺮ ﻛﯚﭘﻠﯩﮕﻪﻥ ﺳﯩﻴﺎﺳﯩﻴﻮﻧﻼﺭﻧﯩﯔ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﻰ ﺑﯩﻠﯩﯟﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ.

ﯞﺍﺳﯩﻠﯩﻴﯧﻒ ﻛﯩﻢ ؟

60 ﻳﺎﺷﻠﯩﻖ ﭘﺮﻭﻓﯧﺴﺴﻮﺭ ﺩﻭﻛﺘﻮﺭ ﺩﻣﯩﺘﺮﯨﻲ ﯞﺍﺳﯩﻠﯩﻴﯧﻒ ﻛﯚﭘﻠﯩﮕﻪﻥ ﻛﯩﺘﺎﺑﻼﺭﻧﯩﯔ ﺋﺎﭘﺘﻮﺭﯨﺪﯗﺭ. ﺋﯘ ﻗﻪﺩﯨﻤﻜﻰ ﺋﯘﻳﻐﯘﺭ ﯞﻩ ﺗﯜﺭﻙ ﺗﯩﻠﻰ ﺑﯘﻳﯩﭽﻪ ﺧﻪﻟﻘﺌﺎﺭﺍ ﺗﯜﺭﻛﻮﻟﻮﮔﯩﻴﻪ ﺳﺎﻫﻪﺳﯩﮕﻪ ﺗﻮﻧﯘﻟﻐﺎﻥ ﺋﺎﻟﯩﻢ ﺑﻮﻟﯘﺵ ﺑﯩﻠﻪﻥ ﺑﯩﺮﮔﻪ ﺗﯜﺭﻛﯩﻴﻪ ﺋﺎﺗﺎ ﺗﯜﺭﻙ ﻣﯘﻛﺎﭘﺎﺗﯩﻨﯩﯔ ﺋﯧﺮﯨﺸﻜﯘﭼﯩﺴﻰ ﺑﻮﻟﻐﺎﻥ . ﻫﺎﺯﯨﺮ ﺭﯗﺳﯩﻴﻪ ﺷﻪﺭﻗﺸﯘﻧﺎﺳﻼﺭ ﺟﻪﻣﺌﯩﻴﯩﺘﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﯩﻠﯩﻚ ﯞﻩﺯﯨﭙﯩﺴﯩﻨﻰ ﺋﯚﺗﯩﻤﻪﻛﺘﻪ. ﺋﯘ ﺑﯘ ﻗﯧﺘﯩﻤﻘﻰ 38- ﻗﯧﺘﯩﻤﻠﯩﻖ ﺋﺎﺳﯩﻴﺎ-ﺷﯩﻤﺎﻟﯩﻲ ﺋﺎﻓﺮﯨﻘﺎ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺗﻪﺷﻜﯩﻠﯩﻲ ﻛﻮﻣﯩﺘﯧﺘﯩﻨﯩﯔ ﺭﯗﺳﯩﻴﻪ ﺗﻪﺭﻩﭘﺘﯩﻦ ﺗﻪﻳﯩﻨﻠﻪﻧﮕﻪﻥ ﺭﻩﻫﺒﯩﺮﯨﻲ ﺋﻪﺯﺍﺳﯩﺪﯗﺭ.

ﯞﺍﺳﯩﻠﯩﻴﯧﻒ ﻳﯧﻘﯩﻨﺪﺍ ﻳﻪﻧﻪ ، ﺗﯘﯞﺍ ﯞﻩ ﺧﺎﻛﺎﺳﯩﻴﻪ ﻗﺎﺗﺎﺭﻟﯩﻖ ﺟﺎﻳﻼﺭﺩﯨﻦ 9 ﭘﺎﺭﭼﻪ ﻗﻪﺩﯨﻤﻜﻰ ﺋﯘﻳﻐﯘﺭ ﻗﺎﻏﺎﻧﻠﯩﻘﻰ ﺩﻩﯞﺭﯨﮕﻪ ﺋﺎﺋﯩﺖ ﺗﺎﺵ ﭘﯜﺗﯜﻛﻠﻪﺭﻧﻰ ﺗﺎﭘﻘﺎﻥ ﺑﻮﻟﯘﭖ، ﺋﯘ ﭘﺎﺕ ﻳﯧﻘﯩﻨﺪﺍ ﺑﯘﻻﺭﻧﻰ ﺋﻮﻗﯘﭖ ﭼﯩﻘﯩﭗ، ﺋﯩﻠﯩﻢ ﺳﺎﻫﻪﺳﯩﮕﻪ ﺋﯧﻼﻥ ﻗﯩﻠﻤﺎﻗﭽﻰ ﺋﯩﻜﻪﻥ. (ﺋﯜﻣﯩﺪﯞﺍﺭ)