ﺑﯘ ﻗﯧﺘﯩﻢ ﺋﯘﻳﻐﯘﺭ ﺗﻮﺭ ﺑﻪﺗﻠﯩﺮﯨﻨﯩﯔ ﺑﯩﺮﯨﺪﻩ ﺩﺍﯞﺍﻡ ﻗﯩﻠﻐﺎﻥ ﻗﯩﺰﻻﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﯨﻜﻰ ﻣﯘﻧﺎﺯﯨﺮﻩ، ﻣﺎﻧﺎ ﺑﯘ ﻗﺎﺭﺷﯩﻠﯩﻘﻼﺭﺩﯨﻦ ﺑﯩﺮ ﺋﯚﺭﻧﻪﻛﺘﯘﺭ.. ﺑﯘ ﻗﯧﺘﯩﻤﻘﻰ ﻣﯘﻧﺎﺯﯨﺮﯨﺪﻩ ﭼﯜﺷﻜﻪﻥ ﺋﯩﻨﻜﺎﺳﻼﺭﺩﺍ ﺋﻮﻣﯘﻣﻴﯜﺯﻟﯜﻙ ﻫﺎﻟﺪﺍ ﻗﯩﺰ ﻳﯚﺗﻜﻪﺵ ﻣﻪﺳﯩﻠﯩﺴﯩﻨﯩﯔ ﺋﯩﺶ ﺑﯩﻠﻪﻥ ﺗﻪﻣﯩﻨﻠﻪﺵ ﺋﻪﻣﻪﺱ، ﺋﻪﻛﺴﯩﭽﻪ، ﻣﯩﻠﻠﯩﻲ ﻛﯩﻤﻠﯩﻜﻜﻪ ﻗﺎﺭﺷﻰ ﭘﯩﻼﻧﻠﯩﻖ ﻫﯘﺟﯘﻡ ﺋﯩﻜﻪﻧﻠﯩﻜﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

ﻣﯘﻧﺎﺯﯨﺮﻩ ﻣﻪﻟﯘﻡ ﺑﯩﺮ ﺋﯩﻨﻜﺎﺳﭽﯩﻨﯩﯔ ﺳﻮﺋﺎﻟﻰ ﺑﯩﻠﻪﻥ ﺑﺎﺷﻼﻧﻐﺎﻥ. ﺋﯘ ﺳﻮﺋﺎﻟﯩﺪﺍ، ﺋﯚﺯﻯ ﻳﺎﺷﺎﯞﺍﺗﻘﺎﻥ ﻳﯧﺰﯨﺪﺍ 100 ﻧﻪﭘﻪﺭ ﻗﯩﺰﻧﯩﯔ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﯩﻠﯩﺸﻜﻪ ﺗﻪﻳﻴﺎﺭﻟﯩﻨﯩﯟﺍﺗﻘﺎﻧﻠﯩﻘﻰ، ﺋﯘﻻﺭﻧﯩﯔ ﺋﯩﭽﯩﺪﻩ ﺗﯘﺭﻣﯘﺷﻰ ﻧﻮﺭﻣﺎﻝ ﻳﻪﻧﻰ ﻗﯩﺰﻟﯩﺮﯨﻨﯩﯔ ﭘﯘﻝ ﺗﯧﭙﯩﭗ ﻛﯧﻠﯩﺸﯩﮕﻪ ﺋﯧﻬﺘﯩﻴﺎﺟﻰ ﺑﻮﻟﻤﯩﻐﺎﻥ ﺋﺎﺋﯩﻠﯩﻠﻪﺭﻧﯩﯔ ﻗﯩﺰﻟﯩﺮﯨﻤﯘ ﺑﺎﺭﻟﯩﻘﻰ، ﺭﻩﺕ ﻗﯩﻠﻐﯘﭼﯩﻼﺭﻧﯩﯔ، ﻧﻮﭘﯘﺱ ﺋﯚﭼﯜﺭﯛﻟﯜﺵ، ﺗﻮﻱ ﺧﯧﺘﻰ ﺑﯧﺮﯨﻠﻤﻪﺳﻠﯩﻚ، ﺋﺎﺋﯩﻠﻪ - ﺗﺎﯞﺍﺑﺎﺗﻰ ﺧﯩﺰﻣﻪﺗﺘﯩﻦ ﻗﻮﻏﻠﯩﻨﯩﺶ ﻗﺎﺗﺎﺭﻟﯩﻖ ﺟﺎﺯﺍﻻﺵ ﺗﻪﺩﺑﯩﺮﻟﯩﺮﻯ ﺑﯩﻠﻪﻥ ﺗﻪﻫﺪﯨﺘﻜﻪ ﺋﯘﭼﺮﺍﯞﺍﺗﻘﺎﻧﻠﯩﻘﻰ ﻣﻪﻟﯘﻡ ﻗﯩﻠﯩﻨﻐﺎﻥ. ﺑﯘ ﺋﯩﻨﻜﺎﺳﭽﻰ ﻳﻪﻧﻪ ﻗﺎﺭﺷﯩﻠﯩﻖ ﻛﯚﺭﺳﻪﺗﻜﻪﻧﻠﯩﻜﻰ ﺋﯜﭼﯜﻥ ﺟﺎﺯﺍﻻﻧﻐﺎﻥ ﺋﯩﻜﻜﻰ ﻗﻮﺷﻨﯩﺴﯩﻨﻰ ﻣﯩﺴﺎﻝ ﺳﯜﭘﯩﺘﯩﺪﻩ ﺗﯩﻠﻐﺎ ﺋﺎﻟﻐﺎﻥ ﯞﻩ ﻣﯘﻧﺪﺍﻕ ﺳﻮﺋﺎﻝ ﻗﻮﻳﻐﺎﻥ: ﻛﯚﭘﭽﯩﻠﯩﻜﺘﯩﻦ ﺳﻮﺭﺍﻳﺪﯨﻐﯩﻨﯩﻢ، ﺋﯧﺸﯩﻨﭽﺎ ﺋﻪﻣﮕﻪﻙ ﻛﯜﭼﯩﻨﻰ ﺋﯩﭽﻜﯩﺮﯨﺪﯨﻜﻰ ﺯﺍﯞﯗﺗﻼﺭﺩﺍ ﺋﯩﺸﻠﻪﺷﻜﻪ ﺋﻮﺭﯗﻧﻼﺷﺘﯘﺭﯗﺵ ﺋﯩﺨﺘﯩﻴﺎﺭﻯ ﺋﯧﻠﯩﭗ ﺑﯧﺮﯨﻼﻣﺪﯗ، ﻣﻪﺟﺒﯘﺭﯨﻴﻤﯘ؟ ﻣﻪﺟﺒﯘﺭﯨﻲ ﺑﻮﻟﺴﺎ، ﻳﯘﻗﯩﺮﯨﻘﯩﺪﻩﻙ ﺗﻪﻫﺪﯨﺖ ﺳﯧﻠﯩﭗ ﻣﻪﺟﺒﯘﺭﻻﺷﻨﯩﯔ ﻗﺎﻧﯘﻧﯩﻲ ﺋﺎﺳﺎﺳﻰ ﻧﯧﻤﻪ؟

ﻣﻪﺯﻛﯘﺭ ﺳﻮﺋﺎﻟﻐﺎ ﺗﻮﺭ ﺋﻪﺯﺍﻟﯩﺮﻯ ﺑﻪﺱ - ﺑﻪﺳﺘﻪ ﺋﯩﻨﻜﺎﺱ ﻗﺎﻳﺘﯘﺭﻏﺎﻥ. ﺑﻪﺯﯨﻠﻪﺭ ﺑﯘﻧﻰ ﻗﺎﻧﯘﻧﯩﻲ ﺋﺎﺳﺎﺳﻰ ﻳﻮﻕ، ﺋﺎﺳﺎﺳﯩﻲ ﻗﺎﻧﯘﻧﻐﺎ ﺧﯩﻼﭖ، ﻳﻪﺭﻟﯩﻚ ﺋﻪﻣﻪﻟﺪﺍﺭﻻﺭﻧﯩﯔ ﺧﺎﺗﺎ ﺋﯩﺠﺮﺍﺳﻰ ﺩﻩﭖ ﺋﻪﻳﯩﺒﻠﯩﮕﻪﻥ. ﺑﯘ ﺧﯩﻞ ﻗﺎﺭﺍﺷﺘﯩﻜﯩﻠﻪﺭﺩﯨﻦ ﺑﯩﺮﻯ ﻣﯘﻧﺪﺍﻕ ﻳﺎﺯﯨﺪﯗ: ﻣﯩﻠﻠﯩﻲ ﺑﺎﺷﻠﯩﻘﻼﺭ ﻛﯩﭽﯩﻜﻜﯩﻨﻪ ﻫﻮﻗﯘﻕ، ﻣﺎﻝ - ﺩﯗﻧﻴﺎ، ﺷﻪﺧﺴﯩﻲ ﺭﺍﻫﻪﺕ ﺋﯜﭼﯜﻥ ﻣﯩﻠﻠﯩﺘﯩﻨﯩﯔ ﺋﺎﻧﯩﺴﻰ ﺑﻮﻟﻤﯩﺶ ﺳﻪﺑﯩﻲ ﻗﯩﺰﻟﯩﺮﯨﻨﻰ ﺯﻭﺭﻻﭖ ﻣﺎﯕﺪﯗﺭﻣﺎﻗﭽﻰ، ﺑﯘﻧﯩﯔ ﺑﯩﻠﻪﻥ ﺋﯚﺯﻟﯩﺮﯨﻨﯩﯔ ﺧﯩﺰﻣﻪﺕ ﺋﻮﺭﻧﯩﻨﻰ، ﻣﺎﺋﺎﺷﯩﻨﻰ ﺳﺎﻗﻼﭖ ﻗﺎﻟﻤﺎﻗﭽﻰ.
 
ﻳﻪﻧﻪ ﺑﯩﺮ ﺋﯩﻨﻜﺎﺳﭽﻰ ﺑﯘ ﻫﻪﻗﺘﻪ ﻣﯘﻧﺪﺍﻕ ﺩﻩﻳﺪﯗ: ﺑﯘﺭﯗﻥ ﻫﺎﺭﺍﻕ ﺋﯩﭽﻤﯩﺴﻪﯓ، ﺧﻮﺷﺎﻣﻪﺕ ﻗﯩﻠﻤﯩﺴﺎﯓ ﺑﺎﺷﻠﯩﻖ ﺑﻮﻻﻟﻤﺎﻳﺘﯩﯔ، ﺋﻪﻣﺪﯨﻠﯩﻜﺘﻪ ﺋﯩﭽﻜﯩﺮﯨﮕﻪ ﻗﯩﺰ ﻳﯚﺗﻜﻪﭖ ﺑﻪﺭﻣﯩﺴﻪﯓ ﺑﺎﺷﻠﯩﻖ ﺑﻮﻻﻟﻤﺎﻳﺴﻪﻥ.

ﻳﻪﻧﻪ ﺑﯩﺮ ﻗﯩﺴﯩﻢ ﺋﯩﻨﻜﺎﺳﭽﯩﻼﺭ، ﺧﯩﺘﺎﻳﻨﯩﯔ ﺋﺎﺳﺎﺳﯩﻲ ﻗﺎﻧﯘﻥ ﯞﻩ ﺋﻪﻣﮕﻪﻙ ﻗﺎﻧﯘﻧﯩﺪﯨﻦ ﻧﻪﻗﯩﻞ ﻛﻪﻟﺘﯜﺭﯛﭖ، ﺧﻪﻟﻘﻨﻰ ﻗﺎﻧﯘﻧﺪﯨﻦ ﭘﺎﻳﺪﯨﻠﯩﻨﯩﭗ ﺋﯚﺯ ﻫﻮﻗﯘﻗﯩﻨﻰ ﻗﻮﻏﺪﺍﺷﻘﺎ، ﺋﯩﺸﭽﯩﻼﺭ ﺋﻮﻳﯘﺷﻤﯩﺴﻰ ﻗﺎﺗﺎﺭﻟﯩﻖ ﺋﻮﺭﯗﻧﻼﺭﻏﺎ ﺋﻪﺭﺯ ﺳﯘﻧﯘﺷﻘﺎ ﭼﺎﻗﯩﺮﻏﺎﻥ. ﺋﻪﻣﻤﺎ ﻳﻪﻧﻪ ﺑﯩﺮ ﺋﯩﻨﻜﺎﺳﭽﻰ، ﺋﯩﺸﭽﯩﻼﺭ ﺋﻮﻳﯘﺷﻤﯩﺴﯩﻨﯩﯔ ﻣﯘﺳﺘﻪﻗﯩﻞ ﺑﯩﺮ ﺋﻮﺭﮔﺎﻥ ﺋﻪﻣﻪﺳﻠﯩﻜﯩﻨﻰ، ﻫﯚﻛﯜﻣﻪﺗﻜﻪ ﺗﻪﯞﻩ ﺋﻮﺭﮔﺎﻥ ﺋﯩﻜﻪﻧﻠﯩﻜﯩﻨﻰ، ﺷﯘﯕﺎ ﻣﻪﺳﯩﻠﯩﻨﯩﯔ ﺋﻪﺭﺯ ﻗﯩﻠﯩﺶ ﻳﻮﻟﻰ ﺑﯩﻠﻪﻥ ﺗﯜﺯﻩﻟﻤﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻳﻪﻧﻪ ﺑﯩﺮ ﻗﯩﺴﯩﻢ ﺋﯩﻨﻜﺎﺳﭽﯩﻼﺭ، ﻣﻪﺳﯩﻠﯩﻨﯩﯔ ﻛﯧﻠﯩﭗ ﭼﯩﻘﯩﺶ ﺳﻪﯞﻩﺑﯩﻨﻰ ﺧﻪﻟﻘﻨﯩﯔ ﺋﯚﺯ ﻫﻪﻕ ‏ - ﻫﻮﻗﯘﻗﯩﻨﻰ ﻗﻮﻏﺪﺍﺵ ﺋﯧﯖﻰ ﯞﻩ ﺋﯩﺮﺍﺩﯨﺴﯩﺪﯨﻜﻰ ﺋﺎﺟﯩﺰﻟﯩﻘﻘﺎ ﺑﺎﻏﻼﭖ ﭼﯜﺷﻪﻧﺪﯛﺭﮔﻪﻥ. ﺑﯘ ﺧﯩﻞ ﻗﺎﺭﺍﺷﺘﯩﻜﯩﻠﻪﺭﺩﯨﻦ ﺑﯩﺮﻯ ﭘﯩﻜﺮﯨﻨﻰ ﺷﯩﺌﯧﺮ ﺋﺎﺭﻗﯩﻠﯩﻖ ﻣﯘﻧﺪﺍﻕ ﺋﯩﭙﺎﺩﯨﻠﻪﻳﺪﯗ:
 

ﺩﻭﺳﺖ ﺑﻮﻻﻳﻠﻰ ﺩﻩﻳﺪﯗ، ﻣﺎﻗﯘﻝ ﺩﯦﺴﻪﯓ،
ﺋﻪﺭﻛﯩﻠﻪﻳﻤﻪﻥ ﺩﻩﻳﺪﯗ ﻣﺎﻗﯘﻝ ﺩﯦﺴﻪﯓ!
ﻣﯩﻨﯩﻤﻪﻥ ﺩﻩﻳﺪﯗ، ﻣﺎﻗﯘﻝ ﺩﯦﺴﻪﯓ،
ﺩﻩﺳﺴﻪﻳﻤﻪﻥ ﺩﻩﻳﺪﯗ ﻣﺎﻗﯘﻝ ﺩﯦﺴﻪﯓ
ﻗﯧﻨﯩﯖﻨﻰ ﺋﯩﭽﯩﻤﻪﻥ ﺩﻩﻳﺪﯗ ﻣﺎﻗﯘﻝ ﺩﯦﺴﻪﯓ،
ﻳﻪﺭ ﺷﺎﺭﯨﺪﯨﻦ ﻳﻮﻕ ﻗﯩﻠﯩﻤﻪﻥ ﺩﻩﻳﺪﯗ، ﻣﺎﻗﯘﻝ ﺩﯦﺴﻪﯓ!

ﻳﻪﻧﻪ ﺑﻪﺯﯨﻠﻪﺭ ﻣﻪﺳﯩﻠﯩﻨﯩﯔ ﻳﯩﻠﺘﯩﺰﯨﻨﻰ ﻳﻪﺭﻟﯩﻚ ﺋﻪﻣﻪﻟﺪﺍﺭﻻﺭ ﺋﻪﻣﻪﺱ، ﻣﻪﺭﻛﯩﺰﯨﻲ ﻫﯚﻛﯜﻣﻪﺕ ﺩﻩﭖ ﻛﯚﺭﺳﻪﺗﻜﻪﻥ. ﺑﯘ ﺧﯩﻞ ﻗﺎﺭﺍﺷﺘﯩﻜﯩﻠﻪﺭﺩﯨﻦ ﺑﯩﺮﻯ ﭘﯩﻜﺮﯨﻨﻰ ﻣﯘﻧﺪﺍﻕ ﺋﻮﺗﺘﯘﺭﯨﻐﺎ ﻗﻮﻳﯩﺪﯗ: ﺷﯩﻨﺠﺎﯕﺪﺍ ﻳﯜﺭﮔﯜﺯﯛﯞﺍﺗﻘﺎﻥ ﺳﯩﻴﺎﺳﻪﺗﻠﻪﺭ، ﻳﯘﻗﯩﺮﻯ ﺩﻩﺭﯨﺠﻠﯩﻚ ﺋﻪﻣﻪﻟﺪﺍﺭﻻﺭﻧﯩﯔ ﺋﯘﺯﯗﻥ ﻣﻪﺯﮔﯩﻠﻠﯩﻚ ﭘﯩﻼﻧﻠﯩﺮﻯ ﺋﺎﺳﺎﺳﯩﺪﺍ ﺋﻪﻣﻪﻟﯩﻴﻠﯩﺸﯩﯟﺍﺗﯩﺪﯗ، ﺑﯘ ﺋﯩﻨﻜﺎﺳﭽﻰ ﺑﯘ ﭘﯩﻼﻧﻨﻰ ﺑﯩﻠﻤﻪﻛﭽﻰ ﺑﻮﻟﻐﺎﻧﻼﺭﻧﻰ، 10 ‏ - ﻧﯚﯞﻩﺗﻠﯩﻚ ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﯩﻨﯩﯔ ﺩﺍﺋﯩﻤﯩﻲ ﺋﻪﺯﺍﺳﻰ، ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ ﻗﺎﻧﯘﻥ ﻛﻮﻣﯩﺘﯧﺘﯩﻨﯩﯔ ﻣﯘﺋﺎﯞﯨﻦ ﻣﯘﺩﯨﺮﻯ، ﺋﺎﺯﺍﺩﻟﯩﻖ ﺋﺎﺭﻣﯩﻴﻪ ﺋﺎﺭﻗﺎ ﺳﻪﭖ ﺑﯚﻟﯜﻣﯩﻨﯩﯔ ﺑﺎﺵ ﻛﻮﻣﯩﺴﺴﺎﺭﻯ ﺟﯘ ﻛﯘﻧﺮﯦﻨﻨﯩﯔ ﺷﯩﻨﺠﺎﯕﻨﻰ ﺑﺎﺷﻘﯘﺭﯗﺵ ﻫﻪﻗﻘﯩﺪﯨﻜﻰ ﺩﻭﻛﻼﺗﯩﻨﻰ ﺋﻮﻗﯘﭖ ﭼﯩﻘﯩﺸﻘﺎ ﺩﻩﯞﻩﺕ ﻗﯩﻠﯩﺪﯗ.

ﻣﻪﺯﻛﯘﺭ ﺩﻭﻛﻼﺕ ﻣﯘﻫﺎﺟﯩﺮﻩﺗﺘﯩﻜﻰ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﯨﻤﯘ ﻛﯜﭼﻠﯘﻙ ﻏﯘﻝ - ﻏﯘﻻ ﭘﻪﻳﺪﺍ ﻗﯩﻠﻐﺎﻥ ﺋﯩﺪﻯ. ﻣﻪﺯﻛﯘﺭ ﺩﻭﻛﻼﺕ، ﺷﯩﻨﺠﺎﯕﻨﻰ ﺑﺎﺷﻘﯘﺭﯗﺷﻨﯩﯔ ﻳﻮﻟﻰ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﺩﻩﭖ ﺋﺎﺷﻜﺎﺭﺍ ﻛﯚﺭﺳﻪﺗﻜﻪﻥ ﯞﻩ ﻗﯩﺰﻻﺭﻧﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﻪﺵ، ﺑﯘ ﺋﺎﺭﻗﯩﻠﯩﻖ ﻣﻪﺩﻩﻧﯩﻴﻪﺕ ﻣﯘﻫﯩﺘﯩﻨﻰ ﺋﯚﺯﮔﻪﺭﺗﯩﺸﻨﻰ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﭼﺎﺭﯨﻠﯩﺮﯨﺪﯨﻦ ﺑﯩﺮﻯ ﺳﯜﭘﯩﺘﯩﺪﻩ ﺑﺎﻳﺎﻥ ﻗﯩﻠﻐﺎﻥ ﺋﯩﺪﻯ.

ﻣﯘﻧﺎﺯﯨﺮﯨﺪﻩ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﻳﺎﺷﺎﯞﺍﺗﻘﺎﻥ ﺑﯩﺮ ﺗﯩﺠﺎﺭﻩﺗﭽﯩﻤﯘ ﭘﯩﻜﯩﺮ ﻗﺎﺗﻨﺎﺷﺘﯘﺭﻏﺎﻥ، ﺋﯘ ﺋﯚﺯﯨﻨﯩﯔ ﺋﯩﺸﻠﻪﻣﭽﯩﻠﯩﻜﻜﻪ ﻛﯧﻠﯩﭗ ﺧﺎﺭﻟﯩﻨﺸﻘﺎ ﺩﯗﭺ ﻛﻪﻟﮕﻪﻥ ﺋﯘﻳﻐﯘﺭ ﻗﯩﺰﻟﯩﺮﯨﻨﻰ ﻛﯚﭖ ﺋﯘﭼﺮﺍﺗﻘﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﻐﺎﻥ. ﻳﻪﻧﻪ ﺑﯩﺮ ﺋﯩﻨﻜﺎﺳﭽﻰ ﺋﺎﺗﺎ - ﺋﺎﻧﯩﻼﺭﻧﻰ، ﺳﺎﺧﺘﺎ ﺗﻪﺷﯟﯨﻘﺎﺗﻘﺎ ﺋﺎﻟﺪﺍﻧﻤﺎﺳﻠﯩﻘﻘﺎ، ﺋﻮﺯ ﭘﻪﺭﺯﻩﻧﺘﻠﯩﺮﯨﻨﻰ ﻗﻮﻏﺪﺍﺷﻘﺎ ﭼﺎﻗﯩﺮﻏﺎﻥ ﯞﻩ ﺗﺎﺭﯨﺨﯩﻲ ﺩﻩﺭﺳﻠﯩﻜﻠﻪﺭﺩﯨﻦ ﻣﯘﻧﺪﺍﻕ ﻧﻪﻗﯩﻞ ﻛﻪﻟﺘﯜﺭﮔﻪﻥ: ﻣﯩﻠﻠﻪﺕ ﺋﯘﺭﯗﺷﺘﺎ ﻗﯩﺮﯨﻠﻤﺎﻳﺪﯗ، ﺑﻪﻟﻜﻰ ﺳﯜﻛﯜﺕ ﺋﯩﭽﯩﺪﻩ ﻗﯩﺮﯨﻠﯩﺪﯗ.

ﻳﻪﻧﻪ ﺑﯩﺮ ﺋﯩﻨﻜﺎﺳﭽﻰ ﻣﯘﻧﺪﺍﻕ ﻳﺎﺯﯨﺪﯗ: " ﻣﻪﺟﺒﯘﺭﻻﭖ ﺑﯧﺮﯨﻠﮕﻪﻥ ﺗﺎﻣﺎﻗﺘﺎ ﺯﻩﻫﻪﺭ ﺑﻮﻟﯘﺷﻰ ﻣﯜﻣﻜﯩﻦ."

ﻗﯩﺰﻻﺭ ﻣﻪﺳﯩﻠﯩﺴﯩﺪﯨﻜﻰ ﺳﻪﺯﮔﯜﺭﻟﯜﻙ ﺑﻪﺯﯨﺪﻩ ﺷﯩﺪﺩﻩﺗﻠﯩﻚ ﻗﺎﺭﺷﯩﻠﯩﻘﻼﺭ ﺋﺎﺭﻗﯩﻠﯩﻖ ﺋﯩﭙﺎﺩﯨﺴﯩﻨﻰ ﻛﯚﺭﺳﻪﺗﻤﻪﻛﺘﻪ. ﺋﯚﺗﻜﻪﻥ ﻳﯩﻠﻰ 8 ‏ - ﺋﺎﻳﺪﺍ ﭘﻪﻳﺰﯨﯟﺍﺕ ﻧﺎﻫﯩﻴﯩﺴﯩﻨﯩﯔ ﺗﯧﺮﯨﻢ ﻳﯧﺰﯨﺴﯩﺪﯨﻜﻰ ﻧﯘﺭﮔﯘﻝ ﺗﯘﺭﻏﯘﻥ ﺋﯩﺴﯩﻤﻠﯩﻚ ﺑﯩﺮ ﺋﺎﻳﺎﻝ ﺋﯚﺯ ﺳﯩﯖﻠﯩﺴﯩﻨﻰ ﺧﯩﺘﺎﻳﺪﺍ ﺋﯩﺸﻠﻪﺷﻜﻪ ﻣﻪﺟﺒﯘﺭﻟﯩﻐﺎﻥ ﺑﯩﺮ ﻧﻪﭘﻪﺭ ﻣﻪﺳﺌﯘﻝ ﻛﺎﺩﯨﺮﻏﺎ ﭘﯩﭽﺎﻕ ﺗﯩﻘﯩﯟﻩﺗﻜﻪﻥ ﯞﻩ ﺑﯘ ﺳﻪﯞﻩﺑﻠﯩﻚ ﺗﯜﺭﻣﯩﮕﻪ ﺗﺎﺷﻼﻧﻐﺎﻥ ﺋﯩﺪﻯ.

ﻧﯘﺭﮔﯘﻝ ﺗﯘﺭﻏﯘﻥ ﺳﻮﺭﺍﻕ ﺟﻪﺭﻳﺎﻧﯩﺪﺍ ﺋﯚﺯﯨﻨﯩﯔ ﻗﯩﺰ ﻳﯚﺗﻜﻪﺷﻜﻪ ﭼﺎﭘﺎﺭﻣﻪﻧﻠﯩﻚ ﻗﯩﻠﯩﯟﺍﺗﻘﺎﻧﻼﺭﻧﻰ ﺋﯩﺒﺮﻩﺕ ﺋﺎﻟﺪﯗﺭﻣﺎﻗﭽﻰ ﺑﻮﻟﻐﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﻐﺎﻥ.
 ﺋﻮﻟﯩﻤﭙﯩﻚ ﻣﻪﺯﮔﯩﻠﯩﺪﻩ ﺋﯩﻨﺘﯧﺮﻧﯧﺘﺘﻪ ﺋﯧﻼﻥ ﻗﯩﻠﯩﻨﻐﺎﻥ، ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﻰ ﻧﺎﻣﯩﺪﯨﻜﻰ ﺑﺎﻳﺎﻧﺎﺗﺘﯩﻤﯘ، ﻗﯩﺰﻻﺭ ﻣﻪﺳﯩﻠﯩﺴﯩﮕﻪ ﻗﺎﺭﺷﻰ ﻣﻪﻳﺪﺍﻥ ﺋﯩﭙﺎﺩﯨﻠﻪﻧﮕﻪﻥ ﺋﯩﺪﻯ.

ﻫﯚﺭﻣﻪﺗﻠﯩﻚ ﺋﻮﻗﯘﺭﻣﻪﻧﻠﻪﺭ، ﭘﺮﻭﮔﺮﺍﻣﻤﯩﻤﯩﺰﺩﺍ، ﻗﯩﺰﻻﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺋﯘﻳﻐﯘﺭ ﺗﻮﺭ ﺑﻪﺗﻠﯩﺮﯨﺪﯨﻦ ﺑﯩﺮﯨﺪﻩ ﺋﯧﻼﻥ ﻗﯩﻠﯩﻨﻐﺎﻥ ﯞﻩ ﻛﯧﻴﯩﻦ ﺗﻮﺭﺩﯨﻦ ﺋﯚﭼﯜﺭﯛﯞﯦﺘﯩﻠﮕﻪﻥ ﺑﯩﺮ ﻣﯘﻧﺎﺯﯨﺮﻩ ﺧﺎﺗﯩﺮﯨﺴﻰ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺑﻪﺭﺩﯗﻕ.