ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﻫﻪﻣﺮﺍﻫﻠﯩﺮﯨﻨﯩﯔ ﺟﻪﻧﯘﺑﯩﻲ ﺋﺎﯞﺳﺘﺮﺍﻟﯩﻴﻪ ﺷﯩﺘﺎﺗﯩﺪﯨﻜﻰ ﺯﯨﻴﺎﺭﯨﺘﻰ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭ ﻗﺎﻧﺎﺗﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﻫﻪﻣﺮﺍﻫﻠﯩﺮﻯ ﺟﻪﻧﯘﺑﯩﻲ ﺋﺎﯞﺳﺘﺮﺍﻟﯩﻴﯩﺪﯨﻜﻰ ﺯﯨﻴﺎﺭﯨﺘﻰ ﺟﻪﺭﻳﺎﻧﯩﺪﺍ، ﻫﯚﻛﯜﻣﻪﺕ ﺋﻪﺭﺑﺎﺑﻠﯩﺮﻯ ﯞﻩ ﺟﻪﻧﯘﺑﯩﻲ ﺋﺎﯞﺳﺘﺮﺍﻟﯩﻴﻪ ﭘﺎﺭﻻﻣﯩﻨﯧﺖ ﺋﻪﺯﺍﻟﯩﺮﻯ ﺑﯩﻠﻪﻥ ﺋﯘﭼﺮﯨﺸﯩﭗ، ﺋﯘﻻﺭﻏﺎ ﺋﯘﻳﻐﯘﺭ ﻣﻪﺳﯩﻠﯩﺴﻰ، ﺋﯘﻳﻐﯘﺭﻻﺭﻧﯩﯔ ﻧﯚﯞﻩﺗﺘﯩﻜﻰ ﺋﻪﻫﯟﺍﻟﻰ ﻫﻪﻗﻘﯩﺪﻩ ﺗﻪﭘﺴﯩﻠﯩﻲ ﻣﻪﻟﯘﻣﺎﺕ ﺑﯧﺮﯨﺸﺘﯩﻦ ﺳﯩﺮﺕ، ﺟﻪﻧﯘﺑﯩﻲ ﺋﺎﯞﺳﺘﺮﺍﻟﯩﻴﻪ ﭘﺎﺭﻻﻣﯧﻨﺖ ﺋﻪﺯﺍﻟﯩﺮﯨﺪﯨﻦ، ﺋﯘﻳﻐﯘﺭﻻﺭﻏﺎ ﻗﺎﺭﺍﺗﻘﺎﻥ ﻗﺎﺗﺘﯩﻖ ﻗﻮﻝ ﺳﯩﻴﺎﺳﺘﯩﻨﻰ ﺋﯚﺯﮔﻪﺭﺗﯩﺸﻰ ﺋﯜﭼﯜﻥ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﺑﯧﺴﯩﻢ ﺋﯩﺸﻠﯩﺘﯩﺸﯩﻨﻰ ﺷﯘﻧﯩﯖﺪﻩﻙ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﺑﯩﺮ ﻗﺎﺭﺍﺭ ﻻﻳﯩﻬﯩﺴﻰ ﻗﻮﺑﯘﻝ ﻗﯩﻠﯩﺸﯩﻨﻰ ﺗﻪﻟﻪﭖ ﻗﯩﻠﻐﺎﻥ.

ﻣﻪﺭﻛﯩﺰﻯ ﺋﺎﺩﯦﻼﻳﺪ ﺷﻪﻫﯩﺮﯨﺪﯨﻜﻰ ﺋﺎﯞﺳﺘﺮﺍﻟﯩﻴﻪ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﻪﻣﺌﯩﻴﯩﺘﻰ ﺭﻩﻫﺒﻪﺭﻟﯩﺮﻯ ﯞﻩ ﻣﻪﺯﻛﯘﺭ ﺷﻪﻫﻪﺭﺩﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ ﺗﻪﺭﯨﭙﯩﺪﯨﻦ ﻗﯩﺰﻏﯩﻦ ﻛﯜﺗﯜﯞﯦﻠﯩﻨﻐﺎﻥ ﺭﺍﺑﯩﻴﻪ ﺧﺎﻧﯩﻢ ﯞﻩ ﻫﻪﻣﺮﺍﻫﻠﯩﺮﻯ، ﺋﺎﯞﺳﺘﺮﺍﻟﯩﻴﻪ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﻪﻣﺌﯩﻴﯩﺘﻰ ﺗﻪﺭﯨﭙﯩﺪﯨﻦ ﺋﻮﻳﯘﺷﺘﯘﺭﯗﻟﻐﺎﻥ ﺋﯩﻜﻜﻰ ﭼﻮﯓ ﻳﯩﻐﯩﻠﯩﺸﻘﺎ ﻗﺎﺗﻨﺎﺷﻘﺎﻥ.

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﺧﺎﻧﯩﻢ ﯞﻩ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﯞﻩﻛﯩﻠﻠﻪﺭ ﺋﯚﻣﯩﻜﯩﻨﯩﯔ ﺟﻪﻧﯘﺑﯩﻲ ﺋﺎﯞﺳﺘﺮﺍﻟﯩﻴﯩﺪﯨﻜﻰ ﺯﯨﻴﺎﺭﯨﺘﯩﻨﯩﯔ ﻧﺎﻫﺎﻳﯩﺘﻰ ﻏﻪﻟﯩﺒﯩﻠﯩﻚ ﺋﯚﺗﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﺵ ﻛﺎﺗﯩﺒﻰ ﺩﻭﻟﻘﯘﻥ ﺋﻪﻳﺴﺎ، ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺋﺎﺩﯦﻼﻳﺪ ﺷﻪﻫﯩﺮﯨﺪﻩ 26‏- ﻓﯧﯟﺭﺍﻝ ﻛﯜﻧﻰ ﺋﯧﻠﯩﭗ ﺑﺎﺭﻏﺎﻥ ﺋﯘﭼﺮﯨﺸﯩﺸﻠﯩﺮﻯ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ ﺋﯚﺗﺘﻰ.

27‏- ﻓﯧﯟﺭﺍﻝ ﻛﯜﻧﻰ ﺋﻪﺗﯩﮕﻪﻥ ﺳﯩﺪﻧﯧﻲ ﺷﻪﻫﯩﺮﯨﮕﻪ ﻳﯧﺘﯩﭗ ﻛﻪﻟﮕﻪﻥ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﯞﻩ ﻫﻪﻣﺮﺍﻫﻠﯩﺮﻯ، ﺋﺎﯞﺳﺘﺮﺍﻟﯩﻴﻪ ﺋﯘﻳﻐﯘﺭ ﺟﻪﻣﺌﯩﻴﯩﺘﯩﻨﯩﯔ ﺋﻮﺭﯗﻧﻼﺷﺘﯘﺭﯗﺷﻰ ﺑﯩﻠﻪﻥ، ﺳﯩﺪﻧﯧﻲ ﺷﻪﻫﯩﺮﯨﺪﯨﻜﻰ ﺋﺎﯞﺳﺘﺮﺍﻟﯩﻴﻪ ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ، ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﯞﻩ ﻣﻪﺯﻛﯘﺭ ﺷﻪﻫﻪﺭﺩﯨﻜﻰ ﺗﯜﺭﻙ ﯞﻩ ﻣﯘﺳﯘﻟﻤﺎﻥ ﺟﻪﻣﺌﯩﻴﻪﺗﻠﻪﺭﻧﯩﯔ ﯞﻩﻛﯩﻠﻠﯩﺮﻯ ﺑﯩﻠﻪﻥ ﺋﯘﭼﺮﺍﺷﻘﺎﻥ. (ﺋﯚﻣﻪﺭ ﻗﺎﻧﺎﺕ)