ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺑﻮﺳﺘﻮﻧﺪﺍ ﺋﯩﻜﻜﻰ ﻣﯘﻫﯩﻢ ﻳﯩﻐﯩﻨﻐﺎ ﻗﺎﺗﻨﺎﺷﺘﻰ

• ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، 26 ‏- ﻣﺎﺭﺕ ﻛﯜﻧﻰ ﺋﺎﻣﯧﺮﯨﻜﯩﻨﯩﯔ ﺑﻮﺳﺘﻮﻥ ﺷﻪﻫﯩﺮﯨﺪﻩ. RFA Photo

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، 26 ‏- ﻣﺎﺭﺕ ﻛﯜﻧﻰ ﺋﺎﻣﯧﺮﯨﻜﯩﻨﯩﯔ ﺑﻮﺳﺘﻮﻥ ﺷﻪﻫﯩﺮﯨﺪﻩ ﮔﯜﺍﻧﺘﺎﻧﺎﻣﻮ ﺗﯜﺭﻣﯩﺴﯩﺪﯨﻜﻰ ﺋﯘﻳﻐﯘﺭ ﻣﻪﻫﺒﯘﺳﻠﯩﺮﻯ ﻣﻪﺳﯩﻠﯩﺴﻰ ﺋﯜﺳﺘﯩﺪﻩ ﺋﯧﭽﯩﻠﻐﺎﻥ ﺋﯩﺴﭙﺎﺕ ﺑﯧﺮﯨﺶ ﻳﯩﻐﯩﻨﯩﻐﺎ ﺋﯩﺸﺘﯩﺮﺍﻙ ﻗﯩﻠﺪﻯ.

26 ‏- ﻣﺎﺭﺕ ﻛﯜﻧﻰ ﺋﺎﻣﯧﺮﯨﻜﯩﻨﯩﯔ ﺑﻮﺳﺘﻮﻥ ﺷﻪﻫﯩﺮﯨﺪﻩ، ﺋﺎﻣﯧﺮﯨﻜﯩﻨﯩﯔ ﻣﺎﺳﺎﭼﯘﺳﺴﯧﺘﺲ ﺷﯩﺘﺎﺗﯩﺪﯨﻜﻰ ﭘﺎﺭﻻﻣﯧﺖ ﺋﻪﺯﺍﺳﻰ ﺑﯧﻠﺨﺎﻧﺖ ﺋﻪﭘﻪﻧﺪﻯ ﻳﯧﺘﻪﻛﭽﯩﻠﯩﻜﯩﺪﻩ، ﮔﯜﺍﻧﺘﺎﻧﺎﻣﻮ ﺗﯜﺭﻣﯩﺴﯩﺪﯨﻜﻰ ﺋﯘﻳﻐﯘﺭ ﻣﻪﻫﺒﯘﺳﻠﯩﺮﯨﻨﯩﯔ ﻣﻪﺳﯩﻠﯩﺴﻰ ﯞﻩ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺑﯩﮕﯘﻧﺎﻫ ﺩﻩﭖ ﺋﺎﻗﻠﯩﻨﯩﭗ، ﺧﺎﺗﺎ ﺗﯘﺗﯘﻟﯘﭖ ﻗﺎﻟﻐﺎﻥ 17 ﻧﻪﭘﻪﺭ ﺋﯘﻳﻐﯘﺭﻻﺭﻧﻰ ﭼﻮﻗﯘﻡ ﺋﯜﭼﯩﻨﭽﻰ ﺑﯩﺮ ﺩﯙﻟﻪﺗﻜﻪ ﺳﺎﻕ ‏- ﺳﺎﻻﻣﻪﺕ ﺋﻮﺭﯗﻧﻼﺷﺘﯘﺭﯗﺵ ﻛﯧﺮﻩﻛﻠﯩﻜﻰ ﻫﻪﻗﻘﯩﺪﻩ ﻣﻪﺧﺴﯘﺱ ﺑﯩﺮ ﻳﯩﻐﯩﻦ ﭼﺎﻗﯩﺮﯨﻠﻐﺎﻥ ﺑﻮﻟﯘﭖ، ﻣﻪﺯﻛﯜﺭ ﻳﯩﻐﯩﻨﻐﺎ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻗﺎﺗﻨﺎﺷﺘﻰ.

ﺋﯘﻳﻐﯘﺭ ﻣﯩﻠﻠﻰ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺑﯘ ﻗﯧﺘﯩﻢ ﺑﻮﺳﺘﻮﻧﺪﺍ ﺋﯚﺗﻜﯜﺯﯛﻟﮕﻪﻥ ﻳﯩﻐﯩﻨﻐﺎ ﻗﺎﺗﻨﺎﺷﻘﺎﻧﻠﯩﻘﯩﻨﻰ ﺋﺎﻻﻫﯩﺪﻩ ﺗﯩﻠﻐﺎ ﺋﯧﻠﯩﭗ، ﻳﯩﻐﯩﻦ ﺋﯩﺸﺘﯩﺮﺍﻛﭽﯩﻠﯩﺮﯨﻐﺎ ﺭﺍﺑﯩﻴﻪ ﺧﺎﻧﯩﻤﻨﻰ ﺗﻮﻧﯘﺷﺘﯘﺭﯗﭖ ﺋﯚﺗﻜﻪﻥ ﯞﻩ ﻳﯩﻐﯩﻨﺪﺍ ﺳﯚﺯ ﻗﯩﻠﻐﺎﻥ ﭘﺎﺭﻻﻣﯧﻨﺖ ﺋﻪﺯﺍﺳﻰ ﺑﯧﻠﺨﺎﻧﺖ ﺋﻪﭘﻪﻧﺪﻯ، ﺋﯘﻳﻐﯘﺭ ﻣﻪﻫﺒﯜﺳﻠﯩﺮﯨﻨﻰ ﺗﯧﺰﺭﺍﻕ ﮔﯜﺍﻧﺘﺎﻧﺎﻣﻮ ﺗﯜﺭﻣﯩﺴﯩﺪﯨﻦ ﺋﯧﻠﯩﭗ ﭼﯩﻘﯩﺸﻨﯩﯔ ﺋﯩﻨﺘﺎﻳﯩﻦ ﻣﯘﻫﯩﻢ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ. ﻳﯩﻐﯩﻨﺪﺍ ﻳﻪﻧﻪ، 17 ﻧﻪﭘﻪﺭ ﺋﯘﻳﻐﯘﺭﻧﯩﯔ ﺋﺎﺩﯞﻭﻛﺎﺗﻠﯩﻖ ﯞﻩﺯﯨﭙﯩﺴﯩﻨﻰ ﺋﯚﺗﻪﯞﺍﺗﻘﺎﻥ ﺳﯧﻴﺒﯩﻦ ﯞﺍﻟﻠﯧﺖ ﺋﻪﭘﻪﻧﺪﻯ، ﺋﯘﻳﻐﯘﺭ ﻣﻪﻫﺒﯘﺳﻠﯩﺮﯨﻨﯩﯔ ﻧﯚﯞﻩﺗﺘﯩﻜﻰ ﺗﯜﺭﻣﻪ ﯞﻩﺯﯨﻴﯩﺘﯩﻨﯩﯔ ﻧﺎﻫﺎﻳﯩﺘﻰ ﻧﺎﭼﺎﺭ ﺋﯩﻜﻪﻧﻠﯩﻜﯩﻨﻰ، ﺑﻮﻟﯘﭘﻤﯘ ﺋﯘﻻﺭﻧﯩﯔ ﮔﯜﺍﻧﺘﺎﻧﺎﻣﻮ ﺗﯜﺭﻣﯩﺴﻰ 6 ‏- ﻻﮔﯩﺮﺩﯨﻦ ﻗﯘﺗﯘﻟﯘﭖ ﭼﯩﻘﯩﺸﯩﻨﯩﯔ ﻣﯘﻫﯩﻤﻠﯩﻘﯩﻨﻰ، ﺋﯘﻻﺭﻧﯩﯔ ﭼﻮﻗﯘﻡ ﺑﯩﺮ ﺋﺎﺯﺍﺩﻩ، ﺷﺎﺭﺍﺋﯩﺘﻰ ﻳﺎﺧﺸﯩﺮﺍﻕ ﺑﯩﺮ ﺗﯜﺭﻣﯩﮕﻪ ﻳﯚﺗﻜﯩﻠﯩﺸﯩﻨﻰ، ﺑﻮﻟﯘﭘﻤﯘ ﺋﯘﻳﻐﯘﺭ ﻣﻪﻫﺒﯘﺳﻠﯩﺮﯨﻨﻰ ﺑﯩﺮ ‏- ﺑﯩﺮﻯ ﺑﯩﻠﻪﻥ ﺋﯘﭼﺮﯨﺸﯩﭗ ﺗﯘﺭﯗﺵ ﺋﯩﻤﻜﺎﻧﯩﻐﺎ ﺋﯩﮕﻪ ﻗﯩﻠﯩﺶ ﻛﯧﺮﻩﻛﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ.

ﻳﯩﻐﯩﻦ ﻧﺎﻫﺎﻳﯩﺘﻰ ﻣﯜﯞﻩﭘﭙﻪﻗﯩﻴﻪﺗﻠﯩﻚ ﺋﺎﺧﯩﺮﻻﺷﻘﺎﻥ ﺑﻮﻟﯘﭖ، ﭘﺎﺭﻻﻣﯧﻨﺖ ﺋﻪﺯﺍﺳﻰ ﺑﯧﻠﺨﺎﻧﺖ ﺋﻪﭘﻪﻧﺪﻯ ﻳﯩﻐﯩﻨﺪﯨﻦ ﻛﯧﻴﯩﻦ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺑﯩﻠﻪﻥ ﺋﺎﻳﺮﯨﻢ ﺋﯘﭼﺮﯨﺸﯩﭗ، ﺳﯚﻫﺒﻪﺗﺘﻪ ﺑﻮﻟﻐﺎﻥ ﯞﻩ ﺋﯘﻧﯩﯖﻐﺎ ﺋﯘﻳﻐﯘﺭﻻﺭ ﺩﯗﭺ ﻛﯧﻠﯩﯟﺍﺗﻘﺎﻥ ﻧﯚﯞﻩﺗﺘﯩﻜﻰ ﯞﻩﺯﯨﻴﻪﺗﻨﻰ ﺋﺎﯕﻼﺗﻘﺎﻥ.

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺑﯩﻠﻪﻥ ﺑﯩﺮﮔﻪ ﻫﻪﻣﺮﺍﻫ ﺑﻮﻟﯘﭖ ﻳﯩﻐﯩﻨﻐﺎ ﻗﺎﺗﻨﺎﺷﻘﺎﻥ ﺩ ﺋﯘ ﻕ ﺋﯩﺠﺮﺍﺋﯩﻴﻪ ﻛﻮﻣﺘﯧﺘﯩﻨﯩﯔ ﺭﻩﺋﯩﺴﻰ، ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﯩﻨﯩﯔ ﺑﺎﺵ ﻛﺎﺗﯩﭙﻰ ﺋﺎﻟﯩﻢ ﺳﯧﻴﯩﺘﻮﻑ ﺋﻪﭘﻪﻧﺪﻯ ﺑﯘ ﻫﻪﻗﺘﻪ ﭼﯜﺷﻪﻧﺪﯛﺭﯛﺵ ﺑﯧﺮﯨﭗ ﻣﯘﻧﺪﺍﻕ ﺩﯦﺪﻯ.

ﺋﺎﻟﯩﻢ ﺳﯧﻴﯩﺘﻮﻑ ﺋﻪﭘﻪﻧﺪﯨﻨﯩﯔ ﺑﯩﻠﺪﯛﺭﯛﺷﯩﭽﻪ، ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺋﺎﺩﯞﻭﻛﺎﺕ ﺳﻪﻳﺒﯩﻦ ﺋﻪﭘﻪﻧﺪﻯ ﺑﯩﻠﻪﻥ ﻳﻪﻧﻪ ﺑﯩﺮ ﺋﺎﺩﯞﻭﻛﺎﺗﻨﯩﯔ ﺋﯘﻳﻐﯘﺭ ﻣﻪﻫﺒﯜﺳﻠﯩﺮﯨﻨﻰ ﻗﯘﺗﯘﻟﺪﯗﺭﯗﺵ ﺋﯜﭼﯜﻥ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺧﯩﺰﻣﻪﺗﻠﯩﺮﯨﮕﻪ ﺋﺎﻻﻫﯩﺪﻩ ﺭﻩﻫﻤﻪﺕ ﺋﯧﻴﺘﯩﺶ ﺑﯩﻠﻪﻥ ﺑﯩﺮﮔﻪ، ﺋﯘﻻﺭﻏﺎ ﻳﻪﻧﻪ ﺋﯜﺯﯨﻨﯩﯔ ﺋﯘﻳﻐﯘﺭ ﻣﻪﻫﺒﯜﺳﻠﯩﺮﻯ ﻫﻪﻗﻘﯩﺪﯨﻜﻰ ﺗﻪﻟﻪﭖ ﯞﻩ ﺗﻪﺷﻪﺑﺒﯜﺳﻠﯩﺮﯨﻨﻰ ﺋﯧﻴﺘﻘﺎﻥ.

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﮔﯜﺍﻧﺘﺎﻧﺎﻣﻮ ﺗﯜﺭﻣﯩﺴﯩﺪﯨﻜﻰ ﺋﯘﻳﻐﯘﺭ ﻣﻪﻫﺒﯜﺳﻠﯩﺮﻯ ﻣﻪﺳﯩﻠﯩﺴﻰ ﺗﻮﻏﺮﯨﺴﯩﺪﺍ ﺋﯧﭽﯩﻠﻐﺎﻥ ﻣﻪﺧﺴﯘﺱ ﻳﯩﻐﯩﻨﺪﯨﻦ ﭼﯩﻘﯩﭗ، ﺋﺎﻟﯩﻢ ﺳﯧﻴﯩﺘﻮﻑ ﺋﻪﭘﻪﻧﺪﯨﻨﯩﯔ ﻫﻪﻣﺮﺍﻫﻠﯩﻘﯩﺪﺍ ﻳﻪﻧﻪ ﺑﻮﺳﺘﻮﻧﺪﯨﻜﻰ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﻨﯩﯔ ﺋﻮﺭﯗﻧﻼﺷﺘﯘﺭﯨﺸﯩﺪﺍ ﺋﯧﻠﯩﭗ ﺑﺎﺭﻏﺎﻥ ﺋﯩﻜﻜﯩﻨﭽﻰ ﺑﯩﺮ ﻳﯩﻐﯩﻨﻐﺎ ﻗﺎﺗﻨﺎﺷﻘﺎﻥ.

ﺋﺎﻟﯩﻢ ﺳﯧﻴﯩﺘﻮﻑ ﺋﻪﭘﻪﻧﺪﻯ ﺑﯘ ﻫﻪﻗﺘﯩﻤﯘ ﭼﯜﺷﻪﻧﺪﯛﺭﯛﺵ ﺑﯧﺮﯨﭗ ﻣﯘﻧﺪﺍﻕ ﺩﻩﻳﺪﯗ. (ﺋﻪﻗﯩﺪﻩ)