ﺳﯧﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﯩﯔ - ﻣﯧﻨﯩﯔ ﻏﻪﺭﺑﯩﻲ ﺩﯨﻴﺎﺭﯨﻢ ‏

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

"ﺳﯧﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﯩﯔ - ﻣﯧﻨﯩﯔ ﻏﻪﺭﺑﯩﻲ ﺩﯨﻴﺎﺭﯨﻢ" ﻧﯩﯔ ﻣﯘﻗﺎﯞﯨﺴﻰ. RFA Photo/Erkin Tarim

ﺗﻮﻧﯘﻟﻐﺎﻥ ﺧﯩﺘﺎﻱ ﻳﺎﺯﻏﯘﭼﻰ ﯞﺍﯓ ﻟﯩﺸﯘﯓ ﻳﺎﺯﻏﺎﻥ " ﻧﻰ ﺩﯤ ﺩﯗﯓ ﺗﯘ - ﯞﻭﺩﯤ ﺷﻰ ﻳﯜ " ﻳﻪﻧﻰ "ﺳﯧﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﯩﯔ - ﻣﯧﻨﯩﯔ ﻏﻪﺭﺑﯩﻲ ﺩﯨﻴﺎﺭﯨﻢ" ‏ﻧﺎﻣﻠﯩﻖ ﺋﻪﺳﻪﺭ 2007 ‏- ﻳﯩﻠﻰ 10 - ﺋﺎﻳﺪﺍ ﺗﻪﻳﯟﻩﻧﺪﻩ ﻧﻪﺷﺮﺩﯨﻦ ﭼﯩﻘﺘﻰ. ﻛﯩﺘﺎﺑﻨﻰ ﺗﻪﻳﺒﻪﻱ ﺩﺍﮔﯘﻱ ﻣﻪﺩﻩﻧﯩﻴﻪﺕ ﻧﻪﺷﺮﯨﻴﺎﺗﻰ ﺑﺎﺳﻘﺎﻥ ﺑﻮﻟﯘﭖ، ﻛﯩﺘﺎﺏ 470 ﺑﻪﺗﺘﯩﻦ ﺗﻪﺭﻛﯩﭗ ﺗﺎﭘﻘﺎﻥ.

ﻛﯩﺘﺎﺏ ﻛﯩﺮﯨﺶ ﺳﯚﺯ، ﻣﯘﺧﺘﻪﺭ ﺑﯩﻠﻪﻥ ﺋﯘﭼﺮﯨﺸﯩﺶ، 1999-ﻳﯩﻠﻰ ﺷﯩﻨﺠﺎﯕﺪﺍ ﺋﯧﻠﯩﭗ ﺑﺎﺭﻏﺎﻥ ﺳﺎﻳﺎﻫﯩﺘﯩﻢ، ﻣﻪﺧﭙﯩﻲ ﻫﺎﻟﺪﺍ ﻣﯘﺧﺘﻪﺭ ﺑﯩﻠﻪﻥ ﺋﯧﻠﯩﭗ ﺑﺎﺭﻏﺎﻥ ﺯﯨﻴﺎﺭﻩﺕ، 4- ﻗﯧﺘﯩﻢ ﺷﯩﻨﺠﺎﯕﺪﺍ ﺋﯧﻠﯩﭗ ﺑﺎﺭﻏﺎﻥ ﺳﺎﻳﺎﻫﻪﺕ ﺧﺎﺗﯩﺮﻩﻡ، ﻣﯘﺧﺘﻪﺭ ﻣﯘﻧﺪﺍﻕ ﺩﻩﻳﺪﯗ، ﻣﯘﺧﺘﻪﺭﮔﻪ ﻳﯧﺰﯨﻠﻐﺎﻥ ﺧﻪﺕ، ﺷﯩﻨﺠﺎﯓ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺋﻮﻳﻠﯩﻐﺎﻧﻠﯩﺮﯨﻢ ﺩﯦﮕﻪﻥ ﻣﻪﺯﻣﯘﻧﻼﺭﺩﯨﻦ ﺗﻪﺭﻛﯩﭗ ﺗﺎﭘﻘﺎﻥ. ﻛﯩﺘﺎﺑﻨﯩﯔ ﻣﯘﻗﺎﯞﯨﺴﯩﻐﺎ ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﻣﻪﻟﯘﻡ ﺑﯩﺮ ﺗﺎﻏﻨﯩﯔ ﺳﯜﺭﯨﺘﻰ ﻗﻮﻳﯘﻟﻐﺎﻥ ﺑﻮﻟﯘﭖ، ﻣﯘﻗﺎﯞﯨﻨﯩﯔ ﺗﯚﯞﻩﻥ ﺗﻪﺭﯨﭙﯩﮕﻪ ﺋﯧﺸﻪﻙ ﻫﺎﺭﯞﯨﺴﻰ ﻫﻪﻳﺪﻩﭖ، ﺗﯚﮔﻪ ﻳﯧﺘﯩﻠﻪﭖ ﻛﯧﺘﯩﯟﺍﺗﻘﺎﻥ ﺋﯩﻜﻜﻰ ﺋﯘﻳﻐﯘﺭﻧﯩﯔ ﺭﻩﺳﯩﻤﻰ ﻗﻮﻳﯘﻟﻐﺎﻥ.

ﻛﯩﺘﺎﺑﻨﯩﯔ ﺋﯩﭽﻰ 100 ﭘﺎﺭﭼﯩﺪﯨﻦ ﺋﺎﺭﺗﯘﻕ ﺭﻩﺳﯩﻢ ﺑﯩﻠﻪﻥ ﺑﯧﺰﻩﻟﮕﻪﻥ ﺑﻮﻟﯘﭖ، ﺑﯘ ﺭﻩﺳﯩﻤﻠﻪﺭﺩﻩ ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﺗﺎﻏﯘ ‏- ﺩﻩﺭﻳﺎﻻﺭ، ﻳﺎﻳﻼﻗﻼﺭ، ﺷﻪﻫﻪﺭ ﯞﻩ ﻗﯩﺸﻼﻗﻼﺭ، ﻳﻮﻗﺴﯘﻝ ﺋﯘﻳﻐﯘﺭ ﻣﻪﻫﻪﻟﻠﯩﻠﯩﺮﻯ، ﻛﻮﭼﯩﺪﺍ ﺗﯩﻠﻪﻣﭽﯩﻠﯩﻚ ﻗﯩﻠﯩﯟﺍﺗﻘﺎﻥ ﺋﯘﻳﻐﯘﺭ ﺑﺎﻟﯩﻠﯩﺮﻯ، ﻛﻮﭼﯩﻨﯩﯔ ﺋﻮﺗﺘﯘﺭﯨﺴﯩﺪﺍ ﭼﯧﭽﯩﻨﻰ ﺋﺎﻟﺪﯗﺭﯗﯞﺍﺗﻘﺎﻥ ﺋﯘﻳﻐﯘﺭﻻﺭ ﻛﯚﺭﺳﯩﺘﯩﻠﮕﻪﻥ. ﺭﻩﺳﯩﻤﻠﻪﺭﻧﯩﯔ ﺋﯩﭽﯩﺪﻩ ﺋﯘﻳﻐﯘﺭﻻﺭﻧﯩﯔ ﻗﻮﻝ ﻫﯜﻧﻪﺭﯞﻩﻧﭽﯩﻠﯩﻜﻰ ﻛﯚﺭﺳﯩﺘﯩﻠﮕﻪﻥ ﺭﻩﺳﯩﻤﻠﻪﺭﻣﯘ ﺑﺎﺭ. ﺑﯘ ﺭﻩﺳﯩﻤﻠﻪﺭ ﺋﯩﭽﯩﺪﻩ ﻛﯩﺸﯩﻨﯩﯔ ﻗﺎﺗﺘﯩﻖ ﺩﯨﻘﻘﻪﺕ ‏- ﺋﯧﺘﯩﺒﺎﺭﯨﻨﻰ ﺗﺎﺭﺗﯩﺪﯨﻐﺎﻥ ﺭﻩﺳﯩﻤﯩﺪﯨﻦ ﺑﯩﺮﻯ ﺑﻮﻟﺴﺎ، 260-ﺑﻪﺗﺘﯩﻜﻰ ﺋﯜﺭﯛﻣﭽﻰ ﺩﯙﯓ ﻛﯚﯞﺭﯛﻙ ﺑﺎﺯﯨﺮﻯ ﺋﺎﻟﺪﯨﺪﺍ ﻳﻪﭖ-ﺋﯩﭽﯩﭗ ﺋﯘﻳﻐﯘﺭ ﺳﻪﻧﺌﻪﺗﭽﯩﻠﯩﺮﯨﻨﯩﯔ ﺋﯘﺳﺴﯘﻟﯩﻨﻰ ﻛﯚﺭﯛﯞﺍﺗﻘﺎﻥ ﺧﯩﺘﺎﻳﻼﺭ، ﺋﻪﺗﺮﺍﭘﺘﺎ ﺋﯧﯖﯩﻜﯩﻨﻰ ﺗﯘﺗﯘﭖ ﺧﯩﺘﺎﻳﻼﺭﻧﯩﯔ ﻳﻪﭖ ‏-ﺋﯩﭽﯩﺸﯩﻨﻰ ﻛﯚﺭﯛﯞﺍﺗﻘﺎﻥ ﺋﯘﻳﻐﯘﺭﻻﺭ ﻛﯚﺭﺳﯩﺘﯩﻠﮕﻪﻥ ﺭﻩﺳﯩﻤﺪﯗﺭ. ﺭﻩﺳﯩﻤﻠﻪﺭﻧﯩﯔ ﻳﻪﻧﻪ ﺑﯩﺮ ﺋﺎﻻﻫﯩﺪﯨﻠﯩﻜﻰ ﻳﺎﺧﺸﻰ ﺑﯩﻨﺎﻻﺭﺩﺍ ﺧﯩﺘﺎﻳﻼﺭﻧﯩﯔ ﻳﺎﺷﺎﯞﺍﺗﻘﺎﻧﻠﯩﻘﯩﻨﻰ، ﻛﻮﻧﺎ ﯞﻩﻳﺮﺍﻥ ﺑﻮﻟﯘﭖ ﻛﻪﺗﻜﻪﻥ ﻣﻪﻫﻪﻟﻠﯩﻠﻪﺭﺩﻩ ﺋﯘﻳﻐﯘﺭﻻﺭﻧﯩﯔ ﻳﺎﺷﺎﯞﺍﺗﻘﺎﻧﻠﯩﻘﯩﻨﻰ ﻛﯚﺭﺳﯩﺘﯩﺸﯩﺪﯗﺭ.

ﻛﯩﺘﺎﺑﻨﯩﯔ ﺋﺎﺧﯩﺮﯨﺪﺍ ﺋﺎﭘﺘﻮﺭ ﯞﺍﯓ ﻟﯩﺸﯘﯓ ﺑﯩﻠﻪﻥ ﺋﯘﻧﯩﯔ ﻛﯩﺘﺎﺑﻰ ﺗﻮﻧﯘﺷﺘﯘﺭﯗﻟﻐﺎﻥ ﺑﻮﻟﯘﭖ ﺑﯘﻧﯩﯖﺪﺍ ﺋﯘﻳﻐﯘﺭ ﺩﯨﻴﺎﺭﻯ ﻫﻪﻗﻘﯩﺪﻩ ﻣﯘﻧﺪﺍﻕ ﻣﻪﻟﯘﻣﺎﺗﻼﺭ ﺑﯧﺮﯨﻠﮕﻪﻥ: ﺷﯩﻨﺠﺎﯓ ﺧﯩﺘﺎﻱ ﺯﯦﻤﯩﻨﯩﻨﯩﯔ ﺋﺎﻟﺘﯩﺪﯨﻦ ﺑﯩﺮﯨﻨﻰ ﺗﻪﺷﻜﯩﻞ ﻗﯩﻠﯩﺪﯗ. ﺑﺎﺷﻘﯩﭽﻪ ﻗﯩﻠﯩﭗ ﺋﯧﻴﺘﻘﺎﻧﺪﺍ، ﻓﺮﺍﻧﺴﯩﻴﯩﻨﯩﯔ 3 ﻫﻪﺳﺴﯩﺴﻰ، ﺋﻪﻧﮕﯩﻠﯩﻴﯩﻨﯩﯔ 6 ﻫﻪﺳﺴﯩﺴﻰ، ﺗﻪﻳﯟﻩﻧﻨﯩﯔ 6 ﻫﻪﺳﺴﯩﺴﻰ، ﻛﯘﯞﻩﻳﺘﻨﯩﯔ 10 ﻫﻪﺳﺴﯩﺴﯩﮕﻪ ﺑﺎﺭﺍﯞﻩﺭ ﻛﯧﻠﯩﺪﯗ. ﺷﯩﻨﺠﺎﯓ ﺋﯩﺴﻤﯩﻨﯩﯔ ﻣﻪﻧﯩﺴﻰ ﻧﯧﻤﻪ ﺩﻩﭖ ﺳﻮﺭﯨﻐﺎﻥ ﯞﺍﻗﺘﯩﯖﯩﺰﺩﺍ، ﺑﯘ ﺳﯚﺯﻧﯩﯔ ﻣﻪﻧﯩﺴﻰ ﻳﯧﯖﻰ ﺗﯘﭘﺮﺍﻕ، ﻳﯧﯖﻰ ﺯﯦﻤﯩﻦ ﺩﯦﮕﻪﻧﻠﯩﻚ ﺑﻮﻟﯩﺪﯗ. ﺋﻪﻣﻤﺎ ﺋﯘﻳﻐﯘﺭﻻﺭﺩﯨﻦ ﺳﻮﺭﯨﺴﯩﯖﯩﺰ، ﺷﯩﻨﺠﺎﯓ ﺑﯩﺰﻧﯩﯔ ﺋﺎﻧﺎ ﯞﻩﺗﯩﻨﯩﻤﯩﺰ، ﺋﻪﺟﺪﺍﺩﻟﯩﺮﯨﻤﯩﺰﺩﯨﻦ ﻗﺎﻟﻐﺎﻥ ﺯﯦﻤﯩﻦ، ﺋﯚﺯﯨﻤﯩﺰﻧﯩﯔ ﺯﯦﻤﯩﻨﻰ ﺩﻩﻳﺪﯗ. ﺑﯘ ﺯﯦﻤﯩﻦ ﭘﻪﻗﻪﺗﻼ ﺑﯧﺴﯩﯟﺍﻟﻐﯘﭼﯩﻼﺭ ﺋﯜﭼﯜﻧﻼ ﻳﯧﯖﻰ ﺗﯘﭘﺮﺍﻕ، ﻳﯧﯖﻰ ﺯﯦﻤﯩﻦ.

ﻛﯩﺘﺎﺑﻨﻰ ﺗﻮﻧﯘﺷﺘﯘﺭﻏﺎﻥ ﺑﯚﻟﯜﻣﯩﺪﻩ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﻣﯘﻧﺪﺍﻕ ﺩﻩﭖ ﻳﯧﺰﯨﻠﻐﺎﻥ : ﺑﯜﮔﯜﻧﻜﻰ ﻛﯜﻧﺪﻩ ﺷﯩﻨﺠﺎﯓ ﻣﻪﺳﯩﻠﯩﺴﻰ ﺑﻪﺯﻯ ﺟﻪﻫﻪﺗﻠﻪﺭﺩﯨﻦ ﺗﯩﺒﻪﺕ ﻣﻪﺳﯩﻠﯩﺴﯩﺪﯨﻦ ﺋﯧﺸﯩﭗ ﭼﯜﺷﺘﻰ. ﺋﺎﺗﺎﻟﻤﯩﺶ ﺷﯩﻨﺠﺎﯓ ﻣﻪﺳﯩﻠﯩﺴﯩﻨﯩﯔ ﻧﯧﮕﯩﺰﻯ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﺎﺯﺍﺗﻠﯩﻖ ﻫﻪﺭﯨﻜﯩﺘﯩﺪﻩ. ﺧﯩﺘﺎﻱ ﻫﯚﻛﯜﻣﯩﺘﻰ 11 - ﺳﯧﻨﺘﻪﺑﯩﺮﺩﯨﻦ ﻛﯧﻴﯩﻦ، ﺧﻪﻟﻘﺌﺎﺭﺍ ﺗﯧﺮﺭﻭﺭﭼﯩﻠﯩﻘﻨﻰ ﺑﺎﻫﺎﻧﻪ ﻗﯩﻠﯩﭗ ﺗﯘﺭﯗﭖ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺵ ﺋﺎﺭﻗﯩﻠﯩﻖ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﺟﯩﺪﺩﯨﻲ ﯞﻩﺯﯨﻴﻪﺕ ﻛﻪﻟﺘﯜﺭﯛﭖ ﭼﯩﻘﺎﺭﻣﺎﻗﺘﺎ.

ﻳﻪﻧﻪ ﺑﯘ ﺑﯚﻟﯜﻣﺪﻩ ﻛﯩﺘﺎﺏ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﻩﭖ ﻳﺎﺯﯨﺪﯗ: 1999 - ﻳﯩﻠﻰ ﺑﯘ ﻛﯩﺘﺎﺑﻨﯩﯔ ﺋﺎﭘﺘﻮﺭﻯ ﯞﺍﯓ ﻟﺸﯘﯓ ﺗﻴﻪﻥ ﺯﺍﯓ-ﺗﯩﺒﻪﺗﻨﯩﯔ ﺗﻪﻗﺪﯨﺮﻯ ﻧﺎﻣﻠﯩﻖ ﻛﯩﺘﺎﺑﻨﻰ ﻧﻪﺷﺮ ﻗﯩﻠﺪﯗﺭﻏﺎﻥ ﺋﯩﺪﻯ. ﺷﯩﻨﺠﺎﯓ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺗﻴﻪﻥ ﺯﺍﯓ ﻳﻪﻧﻰ ﺋﻮﭼﯘﻗﭽﯩﻠﯩﻘﻘﺎ ﺩﻩﭘﻨﻪ ﻗﯩﻠﯩﺶ ﻧﺎﻣﻠﯩﻖ ﺋﻪﺳﻪﺭﻧﻰ ﻳﺎﺯﻏﺎﻥ. ﺑﯘ ﺋﻪﺳﻪﺭ ﺋﯘﻧﯩﯔ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﯨﻜﻰ ﺗﯘﻧﺠﻰ ﻛﯚﺯ ﻗﺎﺭﯨﺸﻰ ﺋﯩﺪﻯ. ﺧﯩﺘﺎﻱ ﻫﯚﻛﯜﻣﯩﺘﻰ ﺋﺎﭘﺘﻮﺭﻧﻰ ﺩﯙﻟﻪﺗﻨﯩﯔ ﻣﻪﺧﭙﯩﻴﻪﺗﻠﯩﻜﯩﻨﻰ ﺋﻮﻏﺮﯨﻠﯩﺪﻯ ﺩﻩﭖ ﺋﻪﻳﯩﺒﻠﻪﭖ ﺗﯜﺭﻣﯩﮕﻪ ﺗﺎﺷﻠﯩﻐﺎﻥ. ﺗﯜﺭﻣﯩﺪﻩ ﺋﯘﻳﻐﯘﺭ ﺳﯩﻴﺎﺳﻰ ﺟﯩﻨﺎﻳﻪﺗﭽﻰ ﻣﯘﺧﺘﻪﺭ ﺑﯩﻠﻪﻥ ﺗﻮﻧﯘﺷﻘﺎﻥ ﯞﺍﯓ ﻟﯩﺸﯘﯓ ﺑﯘ ﻛﯩﺘﺎﺑﻨﻰ ﺗﯜﺭﻣﯩﺪﯨﻜﻰ ﺟﻪﺭﻳﺎﻧﯩﺪﺍ ﻳﯧﺰﯨﭗ ﭼﯩﻘﻘﺎﻥ. ﭼﯜﻧﻜﻰ ﺑﯜﮔﯜﻥ ﺧﯩﺘﺎﻳﺪﺍ ﺳﯩﻴﺎﺳﯩﻲ ﺟﯩﻨﺎﻳﻪﺗﭽﯩﻨﻰ ﺳﻮﻻﻳﺪﯨﻐﺎﻥ ﺗﯜﺭﻣﻪ ﺷﯩﻨﺠﺎﯕﺪﺍ. ﺑﯘ ﺋﻪﺳﻪﺭ ﺋﺎﭘﺘﻮﺭﻧﯩﯔ ﺋﯘﻳﻐﯘﺭﻻﺭﻧﯩﯔ ﺋﺎﺭﯨﺴﯩﺪﺍ ﻳﺎﺷﺎﭖ ﺗﯘﺭﯗﭖ ﻳﺎﺯﻏﺎﻥ ﻣﯘﻫﯩﻢ ﺋﻪﺳﻪﺭﻟﯩﺮﯨﺪﯨﻦ ﺑﯩﺮﯨﺪﯗﺭ.

ﻛﯩﺘﺎﺑﻨﯩﯔ ﺋﺎﺧﯩﺮﯨﺪﯨﻜﻰ ﯞﺍﺭﯨﻘﯩﻐﺎ ﻣﺎﯞﺯﯦﺪﯗﯕﻨﯩﯔ ﻗﻪﺷﻘﻪﺭ ﺷﻪﻫﻪﺭﻟﯩﻚ ﻫﯚﻛﯜﻣﻪﺗﻨﯩﯔ ﻫﻮﻳﻠﯩﺴﯩﺪﯨﻜﻰ ﺭﻩﺳﯩﻤﯩﮕﻪ ﻳﻪﺭ ﺑﯧﺮﯨﻠﮕﻪﻥ.

ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯧﺮﻯ ﻏﻪﺭﺏ ﺩﯙﻟﻪﺗﻠﯩﺮﯨﺪﻩ، ﺋﺎﻣﯧﺮﯨﻜﯩﺪﺍ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﻛﯚﭖ ﺋﻪﺳﻪﺭﻟﻪﺭ ﻧﻪﺷﺮ ﻗﯩﻠﯩﻨﻐﺎﻧﯩﺪﻯ. ﺑﯘﻻﺭﺩﯨﻦ ﺑﺎﺷﻘﺎ ﺧﯩﺘﺎﻱ ﺗﯩﻠﯩﺪﯨﻤﯘ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﻛﯚﭖ ﺳﺎﻧﺪﺍ ﻛﯩﺘﺎﺏ ﯞﻩ ﻣﺎﻗﺎﻟﯩﻠﻪﺭ ﻳﯧﺰﯨﻠﻐﺎﻧﺪﯨﻦ ﺑﺎﺷﻘﺎ، ﻫﻪﺗﺘﺎ ﻫﯚﺟﺠﻪﺗﻠﯩﻚ ﻛﯩﻨﻮﻻﺭ ﺋﯩﺸﻠﻪﻧﻤﻪﻛﺘﻪ. ﺗﻮﻧﯘﻟﻐﺎﻥ ﺧﯩﺘﺎﻱ ﻳﺎﺯﻏﯘﭼﻰ ﯞﺍﯓ ﻟﺸﯘﯓ ﻳﺎﺯﻏﺎﻥ "ﺳﯧﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﯩﯔ - ﻣﯧﻨﯩﯔ ﻏﻪﺭﺑﯩﻲ ﺩﯨﻴﺎﺭﯨﻢ" ‏ﻧﺎﻣﻠﯩﻖ ﻛﯩﺘﺎﺑﻨﯩﯔ ﺗﻪﻳﯟﻩﻧﺪﻩ ﺧﯩﺘﺎﻱ ﺗﯩﻠﯩﺪﺍ ﻧﻪﺷﺮ ﻗﯩﻠﯩﻨﯩﺸﯩﻨﯩﯔ ﺋﻪﻫﻤﯩﻴﯩﺘﻰ ﻧﯧﻤﻪ؟ ﺑﯘ ﺧﯩﻞ ﻛﯩﺘﺎﺑﻼﺭﻧﯩﯔ ﻛﯚﭖ ﺳﺎﻧﺪﺍ ﭼﯩﻘﯩﺸﯩﻨﯩﯔ ﺋﯘﻳﻐﯘﺭ ﻣﻪﺳﯩﻠﯩﺴﯩﮕﻪ ﻗﺎﻧﺪﺍﻕ ﺗﻪﺳﯩﺮﻯ ﺑﻮﻻﺭ؟ ﺑﯘ ﻫﻪﻗﺘﻪ ﻛﯚﺯ ﻗﺎﺭﯨﺸﯩﻨﻰ ﺋﯧﻠﯩﺶ ﺋﯜﭼﯜﻥ ﺗﯘﻧﺠﻰ ﻗﯧﺘﯩﻢ ﺷﻴﺎﯕﮕﺎﯕﺪﯨﻜﻰ ﺑﯩﺮ ﮊﯗﺭﻧﺎﻟﺪﺍ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﻣﺎﻗﺎﻟﯩﺴﻰ ﺋﯧﻼﻥ ﻗﯩﻠﯩﻨﻐﺎﻥ ﺗﺎﺭﯨﺨﭽﻰ ﺩﻭﻛﺘﻮﺭ ﺋﻪﺭﻛﯩﻦ ﺋﻪﻛﺮﻩﻡ ﺋﻪﭘﻪﻧﺪﻯ ﺑﯩﻠﻪﻥ ﺗﯧﻠﯧﻔﻮﻥ ﺯﯨﻴﺎﺭﯨﺘﻰ ﺋﯧﻠﯩﭗ ﺑﺎﺭﺩﯗﻕ. (ﺋﻪﺭﻛﯩﻦ ﺗﺎﺭﯨﻢ)