14 - ﻣﺎﺭﺕ ﻟﺨﺎﺳﺎ ﺗﻮﻗﯘﻧﯘﺷﻰ ﯞﻩ ﺋﯘﻳﻐﯘﺭﻻﺭﻧﯩﯔ ﺋﯩﻨﻜﺎﺳﻠﯩﺮﻯ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

3 - ﺋﺎﻳﻨﯩﯔ 14 - ﻛﯜﻧﻰ ﻟﺨﺎﺳﺎ ﺷﻪﻫﯩﺮﯨﻨﯩﯔ ﻛﻮﭼﯩﻠﯩﺮﯨﺪﺍ ﻛﻪﯓ ﻛﯚﻟﻪﻣﺪﻩ ﻧﺎﻣﺎﻳﯩﺶ ﯞﻩ ﺗﻮﻗﯘﻧﯘﺵ ﻳﯜﺯ ﺑﻪﺭﮔﻪﻥ ﺑﻮﻟﯘﭖ، ﺳﯜﺭﻩﺗﺘﻪ، ﺋﯩﺲ - ﺗﯜﺗﻪﻙ ﺋﯩﭽﯩﺪﻩ ﻛﯚﻳﯜﯞﺍﺗﻘﺎﻥ ﻣﺎﺷﯩﻨﺎ. AFP Photo

ﺑﯘ ﻳﯩﻞ 10 ‏ - ﻣﺎﺭﺕ ﻛﯜﻧﻰ ﺗﯩﺒﻪﺗﻨﯩﯔ ﻻﺳﺎ ﺷﻪﻫﯩﺮﯨﺪﻩ ﺑﺎﺷﻼﻧﻐﺎﻥ ﺗﯧﻨﭽﻠﯩﻖ ﺷﻪﻛﻠﯩﺪﯨﻜﻰ ﻧﺎﻣﺎﻳﯩﺶ 14 ‏ - ﻣﺎﺭﺕ ﻛﯜﻧﯩﮕﻪ ﻛﻪﻟﮕﻪﻧﺪﻩ ﺗﻮﻗﯘﻧﯘﺷﻘﺎ ﺋﺎﻳﻠﯩﻨﯩﺶ ﺑﯩﻠﻪﻥ ﺗﯩﺒﻪﺕ ﻣﯩﻠﻠﯩﻲ ﻫﻪﺭﯨﻜﻪﺕ ﺗﺎﺭﯨﺨﯩﺪﺍ ﻳﯧﯖﻰ ﺑﯩﺮ ﺑﻪﺕ ﺋﯧﭽﯩﻠﺪﻯ. ﺑﯘ ﺑﻪﺕ 14 ‏ - ﻣﺎﺭﺕ ﯞﻩﻗﻪﺳﻰ ﺩﻩﭖ ﺋﺎﺗﺎﻟﺪﻯ. ﯞﻩﻗﻪﺩﻩ ﺋﺎﺭﺯﯗ - ﺗﻪﻟﻪﭘﻠﯩﺮﻯ ﻗﻮﭘﺎﻟﻠﯩﻖ ﺑﯩﻠﻪﻥ ﺭﻩﺕ ﻗﯩﻠﯩﻨﻐﺎﻥ ﻧﺎﻣﺎﻳﯩﺸﭽﯩﻼﺭ، ﺧﯩﺘﺎﻱ ﺳﺎﻗﭽﻰ ﻫﻪﻡ ﭘﯘﻗﺮﺍﻟﯩﺮﯨﻐﺎ ﻫﯘﺟﯘﻡ ﻗﯩﻠﻐﺎﻥ؛ ﺩﯗﻛﺎﻧﻼﺭﻧﻰ ﺋﯘﺭﯗﭖ - ﭼﺎﻗﻘﺎﻥ؛ ﺋﺎﭘﺘﻮﻣﻮﺑﯩﻠﻼﺭﻏﺎ ﺋﻮﺕ ﻗﻮﻳﻐﺎﻥ؛ ﺧﯩﺘﺎﻱ ﺳﺎﻗﭽﯩﻠﯩﺮﻯ ﻧﺎﻣﺎﻳﯩﺸﭽﯩﻼﺭﻧﻰ ﺋﻮﻗﻘﺎ ﺗﯘﺗﻘﺎﻥ، ﯞﻩﻗﻪ ﺟﯩﺪﺩﯨﻴﻠﯩﻜﻰ ﺑﯩﻠﻪﻥ ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﻨﯩﯔ ﻛﯜﭼﻠﯜﻙ ﺩﯨﻘﻘﻪﺕ ‏ - ﺋﯧﺘﯩﺒﺎﺭﯨﻨﻰ ﺗﺎﺭﺗﺘﻰ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ 14 ‏ - ﻣﺎﺭﺕ ﻻﺳﺎ ﯞﻩﻗﻪﺳﻰ ﻫﻪﻗﻘﯩﺪﻩ ﺑﺎﻳﺎﻧﺎﺕ ﺋﯧﻼﻥ ﻗﯩﻠﺪﻯ

ﺗﯩﺒﻪﺕ ﯞﻩ ﺋﯘﻳﻐﯘﺭﺩﯨﻦ ﺋﯩﺒﺎﺭﻩﺕ ﺧﻪﻟﻘﻠﯩﺮﻯ ﺗﻪﻗﺪﯨﺮﺩﺍﺵ ﺑﻮﻟﻐﺎﻥ ﺑﯘ ﺋﯩﻜﻜﻰ ﻣﯩﻠﻠﻪﺗﻨﯩﯔ، ﻣﯘﻫﺎﺟﯩﺮﻩﺗﺘﯩﻜﻰ ﺳﯩﻴﺎﺳﯩﻲ ﭘﺎﺋﺎﻟﯩﻴﻪﺗﭽﯩﻠﯩﺮﻯ ﻳﯩﻠﻼﺭﺩﯨﻦ ﺑﯧﺮﻯ ﺳﻪﭘﺪﺍﺵ ﺑﻮﻟﯘﭖ ﻫﻪﺭﯨﻜﻪﺕ ﻗﯩﻠﻤﺎﻗﺘﺎ. ﻣﯘﻫﺎﺟﯩﺮﻩﺗﺘﯩﻜﻰ ﺗﯩﺒﻪﺕ ﺋﯘﻳﻐﯘﺭ ﻫﻪﻣﻜﺎﺭﻟﯩﻘﻰ، 1960 ‏ - ﻳﯩﻠﻼﺭﺩﯨﻦ ﺑﺎﺷﻼﻧﻐﺎﻥ، 1980 ‏ - ﻳﯩﻠﻼﺭﻧﯩﯔ ﺋﻮﺗﺘﯘﺭﯨﻐﺎ ﻛﻪﻟﮕﻪﻧﺪﻩ ﺭﻩﺳﻤﯩﻲ ﺗﻪﺷﻜﯩﻠﯩﻲ ﻣﯘﻧﺎﺳﯩﯟﻩﺕ ﺷﻪﻛﯩﻠﻠﻪﻧﮕﻪﻥ. ﻳﻪﻧﻰ 1984 ‏ - ﻳﯩﻠﻰ ﺷﻪﺭﻗﻰ ﺗﯜﺭﻛﯩﺴﺘﺎﻥ، ﺗﯩﺒﻪﺕ، ﺋﯩﭽﻜﻰ ﻣﻮﯕﻐﯘﻟﯩﺴﺘﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﻰ ﻗﯘﺭﯗﻟﻐﺎﻥ، 1997 ‏ - ﻳﯩﻠﻰ ﻏﯘﻟﺠﺎ ﯞﻩﻗﻪﺳﻰ ﻳﯜﺯ ﺑﻪﺭﮔﻪﻧﺪﻩ ﭼﻪﺗﺌﻪﻟﺪﯨﻜﻰ ﺧﯩﺘﺎﻳﻐﺎ ﻗﺎﺭﺷﻰ ﻧﺎﻣﺎﻳﯩﺸﻼﺭﺩﺍ ﺗﯩﺒﻪﺗﻠﯩﻜﻠﻪﺭﻣﯘ ﺋﺎﻟﺪﯨﻨﻘﻰ ﺳﻪﭘﺘﯩﻦ ﺋﻮﺭﯗﻥ ﺋﺎﻟﻐﺎﻥ.

ﺑﯘ ﺋﯩﻜﻜﻰ ﻣﯩﻠﻠﻪﺕ ﺋﺎﺭﯨﺴﯩﺪﯨﻜﻰ ﺩﻭﺳﺘﻠﯘﻕ ﺑﯘ ﻗﯧﺘﯩﻤﻘﻰ ﻻﺳﺎ ﯞﻩﻗﻪﺳﯩﺪﯨﻤﯘ ﺋﯩﭙﺎﺩﯨﻠﻪﻧﺪﻯ. ﺑﯜﮔﯜﻥ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، 14 ‏ - ﻣﺎﺭﺕ ﻻﺳﺎ ﯞﻩﻗﻪﺳﻰ ﻫﻪﻗﻘﯩﺪﻩ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺷﻪﺭﻗﻰ ﺗﯜﺭﻛﯩﺴﺘﺎﻥ ﺧﻪﻟﻘﯩﻨﯩﯔ ﺗﯩﺒﻪﺗﻠﯩﻜﻠﻪﺭﻧﯩﯔ ﻫﻪﻗﻘﺎﻧﯩﻲ ﻛﯜﺭﯨﺸﯩﻨﻰ ﭼﯩﻦ ﻳﯜﺭﯨﻜﯩﺪﯨﻦ ﻗﻮﻟﻼﻳﺪﯨﻐﺎﻧﻠﯩﻘﯩﻨﻰ، ﯞﻩ ﯞﻩﻗﻪﻧﯩﯔ ﭼﯩﻘﯩﺸﯩﻐﺎ ﺳﻪﯞﻩﺑﻜﺎﺭ ﺑﻮﻟﻐﺎﻥ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﻗﺎﺗﺘﯩﻖ ﺋﻪﻳﯩﺒﻠﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺑﺎﻳﺎﻧﺎﺗﯩﺪﺍ ﻳﻪﻧﻪ، ﺑﺎﺭﻟﯩﻖ ﺷﻪﺭﻗﻰ ﺗﯜﺭﻛﯩﺴﺘﺎﻥ ﺗﻪﺷﻜﯩﻼﺗﻠﯩﺮﯨﻨﻰ، ﺋﯚﺯ ﺟﺎﻳﻠﯩﺮﯨﺪﯨﻜﻰ ﺗﯩﺒﻪﺕ ﺗﻪﺷﻜﯩﻼﺗﻠﯩﺮﻯ ﺑﯩﻠﻪﻥ ﺗﯧﺰﺩﯨﻦ ﺋﺎﻻﻗﯩﻠﯩﺸﯩﭗ، ﺧﯩﺘﺎﻳﻐﺎ ﻗﺎﺭﺷﻰ ﺑﯩﺮﻟﯩﻜﺘﻪ ﻫﻪﺭﯨﻜﻪﺕ ﻗﯩﻠﯩﺸﻘﺎ ﭼﺎﻗﯩﺮﺩﻯ.

15 ‏ - ﻣﺎﺭﺕ ﻛﯜﻧﻰ ﺷﻪﺭﻗﻰ ﺗﯜﺭﻛﯩﺴﺘﺎﻥ ﺋﯘﭼﯘﺭ ﻣﻪﺭﻛﯩﺰﻯ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺗﯩﺒﻪﺗﻠﯩﻜﻠﻪﺭﻧﯩﯔ ﻫﻪﻗﻘﺎﻧﯩﻲ ﺗﻪﻟﯩﭙﯩﻨﻰ ﻗﻮﭘﺎﻟﻠﯩﻖ ﺑﯩﻠﻪﻥ ﺭﻩﺕ ﻗﯩﻠﻐﺎﻥ ﻫﻪﻡ ﻧﺎﻣﺎﻳﯩﺸﭽﯩﻼﺭﻏﺎ ﺋﻮﻕ ﭼﯩﻘﺎﺭﻏﺎﻥ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﻗﺎﺗﺘﯩﻖ ﺋﻪﻳﯩﺒﻠﯩﺪﻯ. ﺑﯘ ﺗﻪﺷﻜﯩﻼﺕ ﺑﺎﻳﺎﻧﺎﺗﯩﺪﺍ ﻳﻪﻧﻪ، ﺗﯩﺒﻪﺕ ﻳﺎﺷﻠﯩﺮﯨﻨﯩﯔ ﺟﺎﺳﺎﺭﯨﺘﻰ ﯞﻩ ﭘﯩﺪﺍﻛﺎﺭﻟﯩﻘﯩﻐﺎ ﺋﺎﭘﯩﺮﯨﻦ ﺋﻮﻗﯘﺩﻯ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ 14 ‏ - ﻣﺎﺭﺕ ﺗﯩﺒﻪﺕ ﯞﻩﻗﻪﺳﯩﻨﻰ ﺯﻭﺭﺍﯞﺍﻧﻠﯩﻖ ﯞﻩﻗﻪﺳﻰ ﺩﻩﭖ ﺑﯩﻠﺪﯛﺭﺩﻯ

ﻟﺨﺎﺳﺎ ﺷﻪﻫﯩﺮﻯ ﺧﯩﺘﺎﻱ ﺳﺎﻗﭽﻰ ﯞﻩ ﺋﺎﺭﻣﯩﻴﯩﺴﻰ ﺗﻪﺭﯨﭙﯩﺪﯨﻦ ﻗﺎﻣﺎﻝ ﻗﯩﻠﯩﻨﻐﺎﻥ. AFP Photo

ﺷﻪﻧﺒﻪ ﻛﯜﻧﯩﺪﯨﻦ ﺑﺎﺷﻼﭖ ﺩﺍﯞﺍﻣﻠﯩﺸﯩﯟﺍﺗﻘﺎﻥ ﺋﺎﻣﯧﺮﯨﻜﯩﺪﯨﻜﻰ ﺗﯩﺒﻪﺗﻠﯩﻜﻠﻪﺭ ﻧﺎﻣﺎﻳﯩﺸﯩﺪﺍ ﺋﯘﻳﻐﯘﺭﻻﺭﻣﯘ ﺋﺎﻛﺘﯩﭗ ﺋﯩﺸﺘﯩﺮﺍﭖ ﻗﯩﻠﻤﺎﻗﺘﺎ، ﻧﺎﻣﺎﻳﯩﺸﻼﺭﺩﺍ، ﺗﯩﺒﻪﺕ ﺑﺎﻳﺮﯨﻘﻰ ﺑﯩﻠﻪﻥ ﺑﯩﻠﻠﻪ ﺋﺎﻱ ﻳﯘﻟﺘﯘﺯﻟﯘﻕ ﻛﯚﻛﺒﺎﻳﺮﺍﻗﻤﯘ ﺑﯩﺮﻟﯩﻜﺘﻪ ﻟﻪﭘﯩﻠﺪﯨﻤﻪﻛﺘﻪ. ﺗﯜﻧﯜﮔﯜﻥ ﯞﺍﺷﯩﻨﮕﺘﻮﻧﺪﯨﻜﻰ ﻧﺎﻣﺎﻳﯩﺸﺘﺎ، ﺳﺎﻗﭽﯩﻼﺭ ﺑﻪﻟﮕﯩﻠﻪﭖ ﺑﻪﺭﮔﻪﻥ ﭘﺎﺳﯩﻠﺪﯨﻦ ﺋﺎﺗﻼﭖ ﺋﯚﺗﯜﭖ ﺧﯩﺘﺎﻱ ﺋﻪﻟﭽﯩﺨﺎﻧﺎ ﺑﯩﻨﺎﺳﯩﻐﺎ ﺑﯚﺳﯜﭖ ﻛﯩﺮﯨﺸﻜﻪ ﺋﯩﻨﺘﯩﻠﮕﻪﻥ ﯞﻩ ﺗﯩﺒﻪﺕ ﺗﻪﺷﻜﯩﻼﺕ ﺭﻩﻫﺒﯩﺮﻯ ﺗﻪﺭﯨﭙﯩﺪﯨﻦ ﺗﻮﺳﯘﭖ ﻗﯧﻠﯩﻨﻐﺎﻥ 5 ﻧﻪﭘﻪﺭ ﻧﺎﻣﺎﻳﯩﺸﭽﯩﺪﯨﻦ ﺋﯩﻜﻜﻰ ﻧﻪﭘﯩﺮﻯ ﺋﯘﻳﻐﯘﺭ ﺑﻮﻟﯘﭖ، ﺋﻪﻧﻪ ﺷﯘﻻﺭﺩﯨﻦ ﺑﯩﺮﻯ ﺋﯚﺯ ﺗﻪﺳﯩﺮﺍﺗﯩﻨﻰ ﺗﻪﺳﯩﺮﻟﯩﻚ ﻗﯩﻠﯩﭗ ﺳﯚﺯﻟﻪﭖ ﺑﻪﺭﺩﻯ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺋﺎﻟﺪﯨﻨﻘﻰ ﻛﯜﻧﻰ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، 14 ‏ - ﻣﺎﺭﺕ ﺗﯩﺒﻪﺕ ﯞﻩﻗﻪﺳﯩﻨﻰ ﺋﯘﺭﯗﭖ - ﭼﯧﻘﯩﺶ ﯞﻩ ﺑﯘﻻﺵ ﺧﺎﺭﺍﻛﺘﯧﺮﻟﯩﻚ ﺯﻭﺭﺍﯞﺍﻧﻠﯩﻖ ﯞﻩﻗﻪﺳﻰ ﺩﻩﭖ ﺑﯩﻠﺪﯛﺭﺩﻯ ﻫﻪﻡ ﯞﻩﻗﻪﮔﻪ ﻗﺎﺗﻨﺎﺷﻘﯘﭼﯩﻼﺭﻧﻰ ﺗﻮﭘﯩﻼﯕﭽﯩﻼﺭ ﺩﻩﭖ ﺋﻪﻳﯩﺒﻠﯩﺪﻯ.

ﻫﺎﺯﯨﺮ ﮔﯧﺮﻣﺎﻧﯩﻴﯩﺪﻩ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﺪﯨﻦ ﻛﯜﺭﻩﺵ ﺋﺎﺗﺎﺧﺎﻥ، ﺗﯩﺒﻪﺗﻠﯩﻜﻠﻪﺭﻧﯩﯔ ﻗﺎﺭﺷﯩﻠﯩﻖ ﻫﻪﺭﯨﻜﯩﺘﯩﻨﻰ، ﺋﯩﻨﺴﺎﻧﯩﻲ ﻫﻮﻗﯘﻗﯩﻨﻰ ﻗﻮﻟﻐﺎ ﻛﻪﻟﺘﯜﺭﯛﺵ ﺋﯜﭼﯜﻥ ﺋﯧﻠﯩﭗ ﺑﺎﺭﻏﺎﻥ ﻫﻪﻗﻘﺎﻧﯩﻲ ﻫﻪﺭﯨﻜﻪﺕ ﺩﻩﭖ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺑﯩﺮ ﻗﺎﻧﭽﻪ ﺩﯗﻛﺎﻧﻨﻰ ﺋﯘﺭﯗﭖ ‏ - ﭼﯧﻘﯩﺸﻨﻰ ﺑﯘﻻﯕﭽﯩﻠﯩﻖ ﺩﯦﻴﯩﺸﻜﻪ ﺗﻮﻏﺮﺍ ﻛﻪﻟﺴﻪ، ﺑﯩﺮ ﻣﯩﻠﻠﻪﺕ ﺗﯘﭘﺮﯨﻘﯩﻨﯩﯔ ﻳﻪﺭ ﺋﺎﺳﺘﻰ - ﺋﯜﺳﺘﻰ ﺑﺎﻳﻠﯩﻘﯩﻨﻰ ﺭﯗﺧﺴﻪﺗﺴﯩﺰ ﺋﻪﻛﯩﺘﯩﯟﺍﺗﻘﺎﻥ ﺧﯩﺘﺎﻱ ﺩﯙﻟﯩﺘﯩﻨﻰ ﻧﯧﻤﻪ ﺩﯦﻴﯩﺶ ﻛﯧﺮﻩﻙ ﺩﻩﭖ ﺳﻮﺋﺎﻝ ﻗﻮﻳﻐﺎﻥ ﺋﺎﺗﺎﺧﺎﻥ، ﺳﻮﺋﺎﻟﯩﻨﻰ ﻣﯘﻧﺪﺍﻕ ﺟﺎﯞﺍﺑﻼﻧﺪﯗﺭﺩﻯ.

ﻧﺎﻣﺮﺍﺗﻠﯩﻖ، ﺋﯩﺸﺴﯩﺰﻟﯩﻖ، ﻫﻪﻕ - ﻫﻮﻗﯘﻗﺴﯩﺰﻟﯩﻖ ﺋﯩﭽﯩﺪﯨﻜﻰ ﻫﺎﻳﺎﺗﻨﯩﯔ، ﺋﻮﺕ ﺋﯩﭽﯩﺪﯨﻜﻰ ﻫﺎﻳﺎﺗﻘﺎ ﺋﻮﺧﺸﺎﺵ ﺋﺎﺯﺍﭘﻠﯩﻖ ﺋﯩﻜﻪﻧﻠﯩﻜﯩﻨﻰ ﺋﻪﺳﻜﻪﺭﺗﻜﻪﻥ ﺋﺎﺗﺎﺧﺎﻥ، ﺗﯩﺒﻪﺕ ﻧﺎﻣﺎﻳﯩﺸﭽﯩﻠﯩﺮﯨﻨﯩﯔ ﺋﻮﺕ ﻗﻮﻳﯘﺵ ﻫﻪﺭﯨﻜﯩﺘﯩﻨﻰ ﺋﻪﻳﯩﺒﻠﻪﺷﻜﻪ ﺗﻮﻏﺮﺍ ﻛﻪﻟﺴﻪ، ﺑﯘﻧﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﯘﭼﻰ ﺧﯩﺘﺎﻱ ﺗﻪﺭﻩﭘﻨﻰ ﺋﻪﻳﯩﺒﻠﻪﺷﻨﯩﯔ ﺗﻮﻏﺮﺍ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

" ﺧﯩﺘﺎﻱ ﻫﯚﻛﯜﻣﯩﺘﻰ ﺧﯩﺘﺎﻱ ﺧﻪﻟﻘﯩﻨﯩﯔ ﻫﺎﻳﺎﺗﻰ ﺑﯩﺨﻪﺗﻪﺭﻟﯩﻜﯩﻨﯩﻤﯘ ﺗﻪﻫﺪﯨﺘﻜﻪ ﻗﻮﻳﯘﯞﺍﺗﯩﺪﯗ"

ﺗﯩﺒﻪﺗﻠﯩﻜﻠﻪﺭ ﺑﯘ ﻗﯧﺘﯩﻢ ﻛﯚﺭﺳﻪﺗﻜﻪﻥ ﺟﺎﺳﺎﺭﻩﺕ ﯞﻩ ﭘﯩﺪﺍﻛﺎﺭﻟﯩﻘﯩﻨﻰ ﺋﯘﻳﻐﯘﺭﻻﺭﻧﯩﯖﻤﯘ 1990 ‏ - ﻳﯩﻠﻰ ﺑﺎﺭﯨﻦ ﺋﯩﻨﻘﯩﻼﺑﯩﺪﺍ ﯞﻩ 1997 ‏ - ﻳﯩﻠﻰ ﻏﯘﻟﺠﺎ ﯞﻩﻗﻪﺳﯩﺪﻩ ﺗﻮﻟﯘﻕ ﻛﯚﺭﺳﻪﺗﻜﻪﻧﻠﯩﻜﯩﻨﻰ ﺋﻪﺳﻠﻪﭖ ﺋﯚﺗﻜﻪﻥ ﺋﺎﺗﺎﺧﺎﻥ، ﺧﯩﺘﺎﻳﻨﯩﯔ ﺋﯩﻨﺴﺎﻥ ﺋﯩﺮﺍﺩﯨﺴﯩﻨﻰ ﻗﻮﺭﺍﻟﻐﺎ ﺗﺎﻳﯩﻨﯩﭗ ﺑﻮﻳﺴﯘﻧﺪﯗﺭﻣﺎﻗﭽﻰ ﺑﻮﻟﯘﺷﯩﻨﯩﯔ ﺧﺎﺗﺎ ﺑﯩﺮ ﺗﺎﻟﻼﺵ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺋﺎﺗﺎﺧﺎﻥ ﺳﯚﺯﯨﻨﯩﯔ ﺋﺎﺧﯩﺮﯨﺪﺍ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻧﯚﯞﻩﺗﺘﻪ ﻗﺎﺗﺘﯩﻖ ﺑﺎﺳﺘﯘﺭﯗﺵ ﻫﻪﺭﯨﻜﻪﺗﻠﯩﺮﻯ ﺋﺎﺭﻗﯩﻠﯩﻖ ﺋﯚﺯ ﺧﻪﻟﻘﯩﻨﯩﯔ ﻳﻪﻧﻰ ﺧﯩﺘﺎﻱ ﺧﻪﻟﻘﯩﻨﯩﯔ ﻫﺎﻳﺎﺗﻰ ﺑﯩﺨﻪﺗﻪﺭﻟﯩﻜﯩﻨﻰ ﺗﻪﻫﺪﯨﺖ ﺋﺎﺳﺘﯩﻐﺎ ﻗﻮﻳﯘﯞﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ ﯞﻩ ﺑﯘﻧﯩﯔ ﭘﺎﻛﯩﺘﻰ ﺳﯜﭘﯩﺘﯩﺪﻩ، 14 ‏ - ﻣﺎﺭﺕ ﻛﯜﻧﻰ ﺋﻮﺕ ﻗﻮﻳﯘﭖ ﻛﯚﻳﺪﯗﺭﯨﯟﯦﺘﯩﻠﮕﻪﻥ ﺧﯩﺘﺎﻱ ﭘﯘﻗﺮﺍﻟﯩﺮﯨﻨﻰ ﻛﯚﺭﺳﻪﺗﺘﻰ ﯞﻩ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﻮﺯ ﺧﻪﻟﻘﯩﻨﯩﯔ ﻫﺎﻳﺎﺗﻰ ﺑﯩﺨﻪﺗﻪﺭﻟﯩﻜﯩﻨﻰ ﺋﻮﻳﻼﭖ ﺑﻮﻟﺴﯩﻤﯘ ﺯﻭﺭﺍﯞﺍﻧﻠﯩﻘﺘﯩﻦ ﯞﺍﺯ ﻛﯧﭽﯩﺸﻰ ﻛﯧﺮﻩﻛﻠﯩﻜﯩﻨﻰ ﺗﻪﻛﯩﺘﻠﯩﺪﻯ. (ﺷﯚﻫﺮﻩﺕ ﻫﻮﺷﯘﺭ)