38 - ﻧﯚﯞﻩﺗﻠﯩﻚ ﺋﺎﺳﯩﻴﺎ ﯞﻩ ﺷﯩﻤﺎﻟﯩﻲ ﺋﺎﻓﺮﯨﻘﺎ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺗﯜﺭﻛﯩﻴﻪﺩﻩ ﺋﯚﺗﻜﯜﺯﯛﻟﻤﻪﻛﺘﻪ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

38 - ﻧﯚﯞﻩﺗﻠﯩﻚ ﺋﺎﺳﯩﻴﺎ ﯞﻩ ﺷﯩﻤﺎﻟﯩﻲ ﺋﺎﻓﺮﯨﻘﺎ ﺋﯩﻠﻤﻰ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺗﯜﺭﻛﯩﻴﻪﻧﯩﯔ ﺋﻪﻧﻘﻪﺭﻩ ﺷﻪﻫﯩﺮﯨﺪﻩ ﺭﻩﺳﻤﯩﻲ ﺑﺎﺷﻼﻧﺪﻯ. ﻳﯩﻐﯩﻨﻐﺎ ﺋﺎﻣﯧﺮﯨﻜﺎ، ﮔﯧﺮﻣﺎﻧﯩﻴﻪ،ﺭﯗﺳﯩﻴﻪ، ﺋﻪﻧﮕﯩﻠﯩﻴﻪ ﯞﻩ ﺧﯩﺘﺎﻳﻐﺎ ﺋﻮﺧﺸﺎﺵ 66 ﺩﯙﻟﻪﺕ ﯞﻩ ﺭﺍﻳﻮﻧﺪﯨﻦ ﺟﻪﻣﺌﯩﻲ 1885 ﺋﯩﻠﯩﻢ ﺋﺎﺩﯨﻤﻰ ﻗﺎﺗﻨﺎﺷﻤﺎﻗﺘﺎ. 130 ﻳﯩﻠﺪﯨﻦ ﺑﯧﺮﻯ ﻫﻪﺭ ﻳﯩﻠﻰ ﺩﯗﻧﻴﺎﻧﯩﯔ ﭘﻪﺭﻗﻠﯩﻖ ﺩﯙﻟﻪﺗﻠﯩﺮﯨﺪﻩ ﺋﯧﭽﯩﻠﯩﯟﺍﺗﻘﺎﻥ ﺑﯘ ﻳﯩﻐﯩﻨﺪﺍ ﺗﯩﻞ، ﺋﻪﺩﻩﺑﯩﻴﺎﺕ، ﺗﺎﺭﯨﺦ، ﺳﻪﻧﺌﻪﺕ، ﻣﯘﺯﯨﻜﺎ ﯞﻩ ﺧﻪﻟﻘﺌﺎﺭﺍ ﻣﯘﻧﺎﺳﯩﯟﻩﺗﻠﻪﺭﮔﻪ ﺋﻮﺧﺸﺎﺵ ﺗﯧﻤﯩﻼﺭ ﺗﻪﺗﻘﯩﻖ ﻗﯩﻠﯩﻨﻐﺎﻥ 1800 ﺋﻪﺗﺮﺍﭘﯩﺪﺍ ﻣﺎﻗﺎﻟﻪ ﺳﯘﻧﯘﻟﯩﺪﯗ.

9 - ﺋﺎﻳﻨﯩﯔ 10- ﻛﯜﻧﻰ ﺋﻪﻧﻘﻪﺭﻩ ﺑﯩﻠﻜﻪﻧﺖ ﻣﯧﻬﻤﺎﻧﺨﺎﻧﯩﺴﯩﻨﯩﯔ ﻳﯩﻐﯩﻦ ﺯﺍﻟﯩﺪﺍ ﺋﯚﺗﻜﯜﺯﯛﻟﮕﻪﻥ ﺋﯧﭽﯩﻠﯩﺶ ﻣﯘﺭﺍﺳﯩﻤﯩﺪﺍ، ﺗﯜﺭﻛﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺭﻩﺟﻪﭖ ﺗﺎﻳﯩﭗ ﺋﻪﺭﺩﻭﻏﺎﻥ، ﻣﻪﺩﯨﻨﯩﻴﻪﺕ ﻣﯩﻨﯩﺴﺘﯩﺮﻯ ﺋﻪﺭﺗﯘﻏﺮﯗﻝ ﮔﯜﻧﺎﻱ، ﺩﯙﻟﻪﺕ ﻣﯩﻨﯩﺴﺘﯩﺮﻯ ﻣﻪﻣﻪﺕ ﺋﺎﻳﺪﯨﻦ ﯞﻩ ﺑﯧﺸﯩﺮ ﺋﺎﺗﺎﻻﻱ ﻗﺎﺗﺎﺭﻟﯩﻖ ﻛﯩﺸﯩﻠﻪﺭ ﺳﯚﺯ ﻗﯩﻠﺪﻯ. ﺋﯧﭽﯩﻠﯩﺶ ﻣﯘﺭﺍﺳﯩﻤﯩﺪﺍ 80 ﻳﺎﺷﺘﯩﻦ ﻫﺎﻟﻘﯩﻐﺎﻥ 12 ﺗﯜﺭﻙ ﺋﺎﻟﯩﻤﯩﻐﺎ ﺋﻪﯓ ﻗﯩﻤﻤﻪﺗﻠﯩﻚ ﺑﯩﻠﯩﻢ ﺋﺎﺩﯨﻤﻰ ﻣﯘﻛﺎﭘﺎﺗﻰ ﺑﯧﺮﯨﻠﺪﻯ. ﺑﯘﻻﺭ ﺗﯜﺭﻙ ﻣﻪﺩﯨﻨﯩﻴﻪﺕ ﺗﺎﺭﯨﺨﻰ ﺗﻪﺗﻘﯩﻘﺎﺗﭽﯩﺴﻰ،ﭘﺮﻭﻑ.ﺩﻭﻛﺘﻮﺭ ﺷﯜﻛﺮﻯ ﺋﻪﻟﭽﯩﻦ، ﭘﺮﻭﻑ.ﺩﻭﻛﺘﻮﺭ ﺋﯩﻬﺴﺎﻥ ﺩﻭﻏﺮﺍﻣﺎﺟﻰ، ﻣﺎﺋﺎﺭﯨﭙﭽﻰ ﺳﯘﻻﻳﻤﺎﻥ ﻗﺎﺯﻣﺎﺯ، ﺳﻪﻧﺌﻪﺕ ﺗﺎﺭﯨﺨﭽﯩﺴﻰ ﺋﻮﻛﺘﺎﻱ ﺋﺎﺳﻼﻧﺎﭘﺎ، ﻣﻪﺷﻬﯘﺭ ﺗﺎﺭﯨﺨﭽﻰ ﻫﺎﻟﯩﻞ ﺋﯩﻨﺎﻟﺠﯩﻚ، ﺗﯩﻠﺸﯘﻧﺎﺱ ﭘﺮﻭﻓﯧﺴﻮﺭ ﺯﻩﻳﻨﻪﭖ ﻗﻮﺭﻗﻤﺎﺱ، ﺗﺎﺭﯨﺨﭽﻰ ﻫﻪﻣﺰﻩ ﺋﻪﺭﺋﻮﻏﻠﯘ ﯞﻩ ﻗﻪﺩﯨﻤﻘﻰ ﺗﯜﺭﻙ ﺗﺎﺭﯨﺨﻰ ﺗﻪﺗﻘﯩﻘﺎﺗﭽﯩﺴﻰ ﻛﺎﺯﯨﻢ ﻣﯩﺮﺷﺎﻥ ﻗﺎﺗﺎﺭﻟﯩﻘﻼﺭﺩﯗﺭ.

ﻛﺎﺯﯨﻢ ﻣﯩﺮﺷﺎﻥ ﻫﻪﻗﻘﯩﺪﻩ ﻗﯩﺴﻘﯩﭽﻪ ﻣﻪﻟﯘﻣﺎﺕ

ﺗﯜﺭﻙ ﺗﺎﺭﯨﺨﻰ ﺗﻪﺗﻘﯩﻘﺎﺗﭽﯩﺴﻰ ﻛﺎﺯﯨﻢ ﻣﯩﺮﺷﺎﻥ 1919 - ﻳﯩﻠﻰ7 - ﺋﺎﻳﻨﯩﯔ 4 - ﻛﯜﻧﻰ ﻏﯘﻟﺠﯩﺪﺍ ﺗﯘﻏﯘﻟﻐﺎﻥ. 1937 - ﻳﯩﻠﻰ ﺋﻮﻗﯘﺵ ﺋﯜﭼﯜﻥ ﺗﯜﺭﻛﯩﻴﻪﮔﻪ ﻛﯧﻠﯩﭗ ﺗﯜﺭﻛﯩﻴﻪﺩﻩ ﺋﯩﺴﺘﺎﻧﺒﯘﻝ ﺗﯧﺨﻨﯩﻜﺎ ﺋﯘﻧﯩﯟﯦﺮﺳﻰـﺗﯧﺘﯩﺪﺍ ﺋﻮﻗﯘﻏﺎﻥ. ﻗﺎﺯﯨﻢ ﻣﯩﺮﺷﺎﻫ ﮔﯧﺮﻣﺎﻧﯩﻴﻪﺩﯨﻤﯘ ﺋﻮﻗﯘﻏﺎﻥ ﺑﻮﻟﯘﭖ، ﺋﯘ ﮔﯧﺮﻣﺎﻧﭽﻪ، ﺭﯗﺳﭽﻪ ﯞﻩ ﺋﯩﻨﮕﯩﻠﯩﺰﭼﻪ ﺗﯩﻠﻠﯩﺮﯨﻐﺎ ﭘﯘﺧﺘﺎ ﺑﻮﻟﯘﭖ ﺑﯘﻧﯩﯔ ﺳﯩﺮﺗﯩﺪﺍ ﺋﯘ ﭘﯜﺗﯜﻥ ﺗﯜﺭﻛﯩﻲ ﻣﯩﻠﻠﻪﺗﻠﻪﺭﻧﯩﯔ ﺗﯩﻠﯩﻨﯩﻤﯘ ﻧﺎﻫﺎﻳﯩﺘﻰ ﻳﺎﺧﺸﻰ ﺑﯩﻠﯩﺪﯨﻜﻪﻥ. ﺋﯘ ﺗﯜﺭﻛﯩﻴﻪﺩﻩ ﻣﯩﻼﺩﯨﺪﯨﻦ ﺑﯘﺭﯗﻧﻘﻰ ﺗﯜﺭﻙ ﺗﺎﺭﯨﺨﻰ ﺗﻪﺗﻘﯩﻘﺎﺗﻰ ﺑﯩﻠﻪﻥ ﺗﻮﻧﯘﻟﻐﺎﻥ. ﺋﯘ ﺗﯜﻧﯜﮔﯜﻧﻜﻰ ﺑﯘ ﻣﯘﺭﺍﺳﯩﻤﺪﺍ ﺗﯜﺭﻛﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺭﻩﺟﻪﭖ ﺗﺎﻳﯩﭗ ﺋﻪﺭﺩﻭﻏﺎﻧﻨﯩﯔ ﻗﻮﻟﯩﺪﯨﻦ ﻣﯘﻛﺎﭘﺎﺗﯩﻨﻰ ﺗﺎﭘﺸﯘﺭﯗﭖ ﺋﺎﻟﺪﻯ.

ﺑﯘ ﻳﯩﻐﯩﻨﻐﺎ ﺋﯘﻳﻐﯘﺭ ﺑﯩﻠﯩﻢ ﺋﺎﺩﻩﻣﻠﯩﺮﯨﺪﯨﻦ ﺷﯩﻨﺠﺎﯓ ﺋﯘﻧﯟﯦﺮﺳﯩﺘﯩﺘﻰ ﺋﻮﻗﯘﺗﻘﯘﭼﯩﺴﻰ ﭘﺮﻭﻓﯧﺴﻮﺭ ﺋﺎﺑﺪﯗﻛﯧﺮﯨﻢ ﺭﺍﺧﻤﺎﻥ، ﺋﺎﺗﺎﺗﯜﺭﻙ ﻧﺎﻣﻠﯩﻖ ﻛﯩﺘﺎﭘﻨﯩﯔ ﻳﺎﺯﻏﯘﭼﯩﺴﻰ ﯞﻩ ﺗﺎﺭﯨﺨﭽﻰ ﻳﯜﺳﯜﭘﺠﺎﻥ ﺋﯩﺴﻼﻡ، ﺋﺎﻣﯧﺮﯨﻜﯩﺪﺍ ﺗﯘﺭﯗﺷﻠﯘﻕ ﺗﺎﺭﯨﺨﭽﻰ، ﺩﻭﻛﺘﻮﺭ ﻧﻪﺑﯩﺠﺎﻥ ﺗﯘﺭﺳﯘﻥ ﻗﺎﺗﺎﺭﻟﯩﻘﻼﺭ ﻗﺎﺗﻨﺎﺷﺘﻰ. ﺑﯘﻧﯩﯔ ﺳﯩﺮﺗﯩﺪﺍ ﻳﻪﻧﻪ، ﺷﯩﻨﺠﺎﯓ ﺋﯘﻧﯟﯦﺮﺳﯩﺘﯩﺘﻰ ﺋﻮﺗﺘﯘﺭﺍ ﺋﺎﺳﯩﻴﺎ ﺗﻪﺗﻘﯩﻘﺎﺕ ﻣﻪﺭﻛﯩﺰﻯ ﻣﯘﺩﯨﺮﻯ ﭼﯧﻦ ﺷﯩﻤﯩﯔ، ﻣﻪﺭﻛﯩﺰﻯ ﻣﯩﻠﻠﻪﺗﻠﻪﺭ ﺋﯘﻧﯟﯦﺮﺳﯩﺘﯩﺘﻰ ﭘﺮﻭﻓﯧﺴﺴﻮﺭﻯ ﺧﯘ ﺟﯩﯖﺨﯘﺍ ﻗﺎﺗﺎﺭﻟﯩﻘﻼﺭﻣﯘ ﺑﯘ ﻳﯩﻐﯩﻨﻐﺎ ﻗﺎﺗﻨﺎﺷﻤﺎﻗﺘﺎ.

ﺗﯜﺭﻛﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺋﻪﺭﺩﻭﻏﺎﻥ ﺑﯩﻠﯩﻢ ﺋﺎﺩﻩﻣﻠﯩﺮﯨﮕﻪ ﺋﯩﻨﺘﺎﻳﯩﻦ ﺋﻪﻫﻤﯩﻴﻪﺕ ﺑﯧﺮﯨﺪﯨﻐﺎﻧﻠﯩﻘﯩﻨﻰ ﺋﯩﭙﺎﺩﯨﻠﯩﺪﻯ

ﻳﯩﻐﯩﻨﺪﺍ ﺳﯚﺯ ﻗﯩﻠﻐﺎﻥ ﺗﯜﺭﻛﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺭﻩﺟﻪﭖ ﺗﺎﻳﯩﭗ ﺋﻮﺭﺩﻭﻏﺎﻥ ﻣﯘﻧﺪﺍﻕ ﺩﯦﺪﻯ: "ﻫﯚﺭﻣﻪﺗﻠﯩﻚ ﺧﺎﻧﯩﻤﻼﺭ ﯞﻩ ﺋﻪﭘﻪﻧﺪﯨﻠﻪﺭ، ﺳﯩﻠﻪﺭﻧﻰ ﭼﯩﻦ ﻛﯚﯕﻠﯜﻣﺪﯨﻦ ﻗﺎﺭﺷﻰ ﺋﺎﻟﯩﻤﻪﻥ. ﺩﯗﻧﻴﺎ ﺗﯧﻨﭽﻠﯩﻘﻰ ﯞﻩ ﺧﻪﻟﻘﻨﯩﯔ ﭘﺎﺭﺍﯞﺍﻧﻠﯩﻘﻰ ﺋﯜﭼﯜﻥ ﺧﯩﺰﻣﻪﺕ ﻗﯩﻠﯩﯟﺍﺗﻘﺎﻥ ﺳﯩﻠﻪﺭﮔﻪ ﺋﻮﺧﺸﺎﺵ ﻗﯩﻤﻤﻪﺗﻠﯩﻚ ﺑﯩﻠﯩﻢ ﺋﺎﺩﻩﻣﻠﯩﺮﯨﻨﯩﯔ ﺩﯙﻟﯩﺘﯩﻤﯩﺰﮔﻪ ﻛﻪﻟﮕﻪﻧﻠﯩﻜﯩﯖﻼﺭﺩﯨﻦ ﺋﯩﻨﺘﺎﻳﯩﻦ ﺧﻮﺷﺎﻟﻠﯩﻖ ﻫﯧﺲ ﻗﯩﻠﯩﻤﻪﻥ. ﺑﯩﺮ ﺟﺎﻫﺎﻥ ﺩﯙﻟﯩﺘﻰ ﻗﯘﺭﻏﺎﻥ ﺋﻮﺳﻤﺎﻧﻠﻰ ﺋﯩﻤﭙﯩﺮﯨﻴﯩﺴﯩﻨﯩﯔ ﭘﺎﺩﯨﺸﺎﻫﻰ ﺑﻮﻟﻐﺎﻥ ﺋﻮﺳﻤﺎﻥ ﮔﺎﺯﯨﻨﯩﯔ ﺋﻮﻏﻠﻰ ﺋﻮﺭﺧﺎﻥ ﮔﺎﺯﯨﻐﺎ ﯞﻩﺳﯩﻴﯩﺘﻰ ﻫﻪﻗﯩﻘﻪﺗﻪﻧﻤﯘ ﻗﯩﻤﻤﻪﺗﻠﯩﻚ ﯞﻩ ﻛﯜﺭﯛﺷﭽﺎﻧﻠﯩﻘﻘﺎ ﺋﯩﮕﯩﺪﯗﺭ. ﺋﯘ ﺋﻮﻏﻠﯩﻐﺎ: ﺋﻪﻱ ﺋﻮﻏﻠﯘﻡ، ﺋﺎﻟﯩﻤﻼﺭ، ﺳﻪﻧﺌﻪﺗﻜﺎﺭﻻﺭ، ﺋﻪﺩﯨﭙﻠﻪﺭ ﺩﯙﻟﻪﺗﻨﯩﯔ ﺑﻪﺩﯨﻨﯩﻨﯩﯔ ﻛﯜﭼﯩﺪﯗﺭ. ﺋﯘﻻﺭﻏﺎ ﺋﯩﻠﺘﯩﭙﺎﺕ ﻗﯩﻞ، ﺋﯘﻻﺭﻧﻰ ﻗﻪﺩﯨﺮﻟﻪ. ﺋﺎﻟﻼﻫﻨﯩﯔ ﻫﻪﻗﻘﯩﻨﻰ ﯞﻩ ﻗﯘﻟﻼﺭﻧﯩﯔ ﺯﯗﻟﯘﻣﯩﻨﻰ ﻛﯜﺯﻩﺕ. ﺳﻪﻧﺪﯨﻦ ﻛﯧﻴﯩﻨﻜﯩﻠﻪﺭﮔﯩﻤﯘ ﻣﯘﺷﯘﻧﺪﺍﻕ ﻧﻪﺳﯩﻬﻪﺕ ﻗﯩﻞ. ﺧﻪﻟﻘﯩﯖﻨﻰ ﺩﯛﺷﻤﻪﻧﻠﻪﺭﻧﯩﯔ ﺗﺎﺟﺎﯞﯗﺯﯨﺪﯨﻦ ﯞﻩ ﺯﯗﻟﯘﻣﺪﯨﻦ ﻗﻮﻏﺪﺍ. ﻫﻪﻗﺴﯩﺰ ﻳﻪﺭﮔﻪ ﻫﯧﭽﺒﯩﺮ ﻛﯩﺸﯩﮕﻪ ﺋﺎﺯﺍﺭ ﺑﻪﺭﻣﻪ. ﺧﻪﻟﻘﯩﯖﻨﯩﯔ ﺭﺍﺯﯨﻠﯩﻘﯩﻨﻰ ﺋﺎﻝ.،ﺩﻩﭖ ﻧﻪﺳﯩﻬﻪﺕ ﻗﯩﻠﻐﺎﻥ ﺋﯩﺪﻯ. ﻣﺎﻧﺎ ﺑﯘ ﺳﯚﺯﻟﻪﺭﻧﯩﯔ ﺋﺎﺭﻗﯩﺴﯩﺪﺍ ﺋﯩﻨﺴﺎﻥ ﺳﯚﻳﮕﯜﺳﻰ ﺑﺎﺭ، ﺋﺎﺩﺍﻟﻪﺕ ﺑﺎﺭ، ﺗﯧﻨﭽﻠﯩﻖ ﺑﺎﺭ ﯞﻩ ﺗﻪﯓ ﺋﻮﺭﺗﺎﻗﻠﯩﺸﯩﺶ ﺋﯩﺪﯨﻴﯩﺴﻰ ﺑﺎﺭ. ﺟﻪﻣﺌﯩﻴﻪﺗﻨﻰ ﺋﯩﺪﺍﺭﻩ ﻗﯩﻠﯩﺪﯨﻐﺎﻧﻼﺭﻧﯩﯔ، ﻗﻮﻟﯩﺪﺍ ﻛﯜﭼﻰ ﺑﺎﺭﻻﺭﻧﯩﯔ، ﺩﯙﻟﻪﺗﻠﯩﺮﯨﻨﯩﯔ ﯞﻩ ﺩﯗﻧﻴﺎﻧﯩﯔ ﻛﯧﻠﻪﭼﯩﻜﯩﻨﻰ ﺑﻪﻟﮕﯩﻠﻪﺷﺘﻪ ﺳﯚﺯ ﺋﯩﮕﯩﺴﻰ ﺑﻮﻟﻐﺎﻥ ﻛﯩﺸﯩﻠﻪﺭﻧﯩﯔ ﻳﯘﻗﯩﺮﯨﺪﯨﻜﻰ ﺳﯚﺯﻟﻪﺭﺩﯨﻦ ﺩﻩﺭﺱ ﭼﯩﻘﯩﺮﯨﺸﻰ ﻛﯧﺮﻩﻙ."

ﺭﻩﺟﻪﭖ ﺗﺎﻳﯩﭗ ﺋﻪﺭﺩﻭﻏﺎﻥ ﺑﯩﻠﯩﻢ ﺋﺎﺩﻩﻣﻠﯩﺮﯨﺪﯨﻦ ﻛﯜﺗﯩﺪﯨﻐﺎﻥ ﺋﯜﻣﯩﺪﻯ ﺋﯜﺳﺘﯩﺪﻩ ﺗﻮﺧﺘﯘﻟﯘﭖ ﺳﯚﺯﯨﮕﻪ ﻣﯘﻧﺪﺍﻕ ﺩﺍﯞﺍﻡ ﻗﯩﻠﺪﻯ : " ﺋﯩﻨﺴﺎﻧﻠﯩﻖ ﺋﺎﻟﯩﻤﯩﺪﻩ ﺑﯩﻠﯩﻢ ﺋﺎﺩﻩﻣﻠﯩﺮﯨﻨﯩﯔ، ﺳﻪﻧﺌﻪﺗﻜﺎﺭﻻﺭﻧﯩﯔ، ﺋﻪﺩﯨﺒﻠﻪﺭﻧﯩﯔ ﺑﺎﻱ ﻣﻪﻧﯩﯟﻯ ﺩﯗﻧﻴﺎﻟﯩﺮﯨﺪﯨﻦ ﺑﯩﺰﻟﻪﺭﮔﻪ ﻳﯧﺘﯩﭗ ﻛﻪﻟﮕﻪﻥ ﻣﺎﻧﺎ ﻣﯘﺷﯘﻧﺪﺍﻕ ﻧﯘﺭﻏﯘﻥ ﻫﻪﻗﯩﻘﻪﺗﻠﻪﺭ ﺑﺎﺭ. ﺑﯩﺰ ﺑﯘﻻﺭﺩﯨﻦ ﺋﻪﯓ ﻳﺎﺧﺸﻰ ﺩﻩﺭﯨﺠﯩﺪﻩ ﭘﺎﻳﺪﯨﻠﯩﻨﯩﺸﯩﻤﯩﺰ ﻛﯧﺮﻩﻙ. ﺑﻮﻟﯘﭘﻤﯘ ﺳﯩﻠﻪﺭﮔﻪ ﺋﻮﺧﺸﺎﺵ ﻗﯩﻤﻤﻪﺗﻠﯩﻚ ﺑﯩﻠﯩﻢ ﺋﺎﺩﻩﻣﻠﯩﺮﻯ، ﺳﻪﻧﺌﻪﺗﭽﯩﻠﻪﺭ ﯞﻩ ﺋﻪﺩﯨﭙﻠﻪﺭ! ﺳﯩﻠﻪﺭ ﻣﺎﻧﺎ ﺑﯘ ﻫﻪﻗﯩﻘﻪﺗﻠﻪﺭﻧﻰ ﺩﯙﻟﻪﺗﻨﻰ ﺋﯩﺪﺍﺭﻩ ﻗﯩﻠﯩﯟﺍﺗﻘﺎﻧﻼﺭﻧﯩﯔ، ﺩﯗﻧﻴﺎﻧﻰ ﺋﯩﺪﺍﺭﻩ ﻗﯩﻠﯩﯟﺍﺗﻘﺎﻧﻼﺭﻧﯩﯔ ﺳﻪﻣﯩﮕﻪ ﺳﯧﻠﯩﭗ ﺗﯘﺭﯨﺴﯩﻠﻪﺭ ﯞﻩ ﺷﯘﻧﺪﺍﻕ ﻗﯩﻠﯩﺸﯩﯖﻼﺭ ﻛﯧﺮﻩﻙ. ﺑﯩﺰ ﺳﯩﻴﺎﺳﻪﺗﭽﯩﻠﻪﺭ ﺑﻮﻟﯘﺵ ﺳﯜﭘﯩﺘﯩﻤﯩﺰ ﺑﯩﻠﻪﻥ ﺳﯩﻠﻪﺭﻧﯩﯔ ﺋﺎﻏﺰﯨﯖﻼﺭﺩﯨﻦ ﭼﯩﻘﯩﺪﯨﻐﺎﻥ ﻫﻪﺭ ﺑﯩﺮ ﺋﯧﻐﯩﺰ ﺳﯚﺯﮔﻪ ﺋﯩﻨﺘﺎﻳﯩﻦ ﺋﻪﻫﻤﯩﻴﻪﺕ ﺑﯧﺮﯨﺪﯨﻐﺎﻧﻠﯩﻘﯩﻤﯩﺰﻧﻰ ﺳﻪﻣﯩﯖﻠﻪﺭﮔﻪ ﺳﺎﻟﻤﺎﻗﭽﯩﻤﻪﻥ. ﺷﯘﻧﺪﺍﻕ ﺑﯩﻠﯩﻢ ﺋﺎﺩﻩﻣﻠﯩﺮﻯ ﺑﺎﺭﻛﻰ، ﺩﯗﻧﻴﺎ ﺗﯧﻨﯩﭽﻠﯩﻘﯩﻐﺎ ﺯﯨﻴﺎﻥ ﺳﺎﻟﻤﺎﻗﺘﺎ. ﺋﻪﭘﺴﯘﺳﻜﻰ ﻣﺎﻧﺎ ﻣﯘﺷﯘﻧﺪﺍﻕ ﺋﻪﻫﯟﺍﻟﻼﺭﻣﯘ ﻛﯚﺭﯛﻧﻤﻪﻛﺘﻪ. ﺗﯜﺭﻛﯩﻴﻪ ﺟﯘﻣﻬﯘﺭﯨﻴﯩﺘﻰ ﻗﯘﺭﯗﻟﻐﺎﻧﺪﯨﻦ ﺑﯧﺮﻯ ﭘﻪﻗﻪﺗﻼ ﺋﯚﺯﻯ ﺋﯜﭼﯜﻥ ﺋﻪﻣﻪﺱ، ﺑﻪﻟﻜﻰ ﭘﯜﺗﯜﻥ ﺩﯗﻧﻴﺎﻧﯩﯔ ﺗﯧﻨﭽﻠﯩﻘﯩﻨﻰ ﺋﯚﺯﯨﮕﻪ ﭘﺮﯨﻨﺴﯩﭗ ﻗﯩﻠﻐﺎﻥ ﺑﯩﺮ ﺩﯙﻟﻪﺕ. ﺋﯘﻟﯘﻍ ﺋﺎﺗﺎ ﺗﯜﺭﻛﻨﯩﯔ ﻳﯘﺭﺗﺘﺎ ﺗﯧﻨﭽﻠﯩﻖ ﺩﯗﻧﻴﺎﺩﺍ ﺗﯧﻨﭽﻠﯩﻖ، ﺩﯦﮕﻪﻥ ﺳﯚﺯﻯ ﺑﯩﺰﻧﯩﯔ ﻳﻮﻝ ﻛﯚﺭﺳﻪﺗﻜﯜﭼﯩﻤﯩﺰ."

ﻳﯩﻐﯩﻨﺪﺍ ﺋﻮﻗﯘﻟﯩﺪﯨﻐﺎﻥ ﺋﯘﻳﻐﯘﺭﻻﺭ ﻫﻪﻗﻘﯩﺪﯨﻜﻰ ﻣﺎﻗﺎﻟﯩﻠﻪﺭ

ﺑﯘ ﻳﯩﻐﯩﻦ 9 - ﺋﺎﻳﻨﯩﯔ 10- ﻛﯜﻧﯩﺪﯨﻦ 15 - ﻛﯜﻧﯩﮕﯩﭽﻪ ﺩﺍﯞﺍﻡ ﻗﯩﻠﯩﺪﯗ. ﺑﯘ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﯩﺪﺍ ﺋﯘﻳﻐﯘﺭﻻﺭﻏﺎ ﺋﺎﺋﯩﺖ ﻣﺎﻗﺎﻟﯩﻠﻪﺭﺩﯨﻦ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﻰ ﻫﻪﻗﻘﯩﺪﯨﻜﻰ ﺋﯘﻳﻐﯘﺭ ﻣﻪﻧﺒﻪﻟﯩﺮﻯ ﯞﻩ ﺋﯘﻧﯩﯔ ﺋﻪﻫﻤﯩﻴﯩﺘﻰ، ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ، ﺋﯘﻳﻐﯘﺭ ﺋﯚﺭﭖ - ﺋﺎﺩﻩﺗﻠﯩﺮﯨﺪﻩ ﻣﯩﻠﻠﯩﻲ ﺗﯩﺒﺎﺑﻪﺕ، ﺋﯘﻳﻐﯘﺭ ﻗﻮﻝ ﻳﺎﺯﻣﯩﻠﯩﺮﯨﻨﯩﯔ ﺗﯜﺭﻛﻮﻟﻮﮔﯩﻴﻪ ﺗﻪﺗﻘﯩﻘﺎﺗﯩﺪﯨﻜﻰ ﺋﻮﺭﻧﻰ، ﺧﯩﺘﺎﻱ ﻣﻪﻧﺒﻪﻟﯩﺮﻯ ﺋﺎﺳﺎﺳﯩﺪﺍ ﺷﯩﺠﯘ ﺋﯘﻳﻐﯘﺭﻟﯩﺮﻯ ﺋﯜﺳﺘﯩﺪﻩ ﺑﯩﺮ ﺗﻪﺗﻘﯩﻘﺎﺕ ﻗﺎﺗﺎﺭﻟﯩﻖ ﺑﯩﺮ ﻳﯜﺭﯛﺵ ﻣﺎﻗﺎﻟﯩﻠﻪﺭ ﺋﻮﻗﯘﻟﯩﺪﯗ. (ﺋﻪﺭﻛﯩﻦ ﺗﺎﺭﯨﻢ)