ﺗﯜﺭﻛﯩﻴﻪ ﭘﺎﺭﻻﻣﯧﻨﺘﻰ ﺋﺎﺩﺍﻟﻪﺕ ﻛﻮﻣﯩﺘﯧﺘﻰ ﺑﺎﺷﻠﯩﻘﻰ ﺋﻪﻫﻤﻪﺕ ﺋﯩﻴﯩﻤﺎﻳﺎ ﺑﯩﻠﻪﻥ ﺳﯚﻫﺒﻪﺕ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺗﯜﺭﻛﯩﻴﻪ ﭘﺎﺭﻻﻣﯧﻨﺘﻰ ﺋﺎﺩﺍﻟﻪﺕ ﻛﻮﻣﯩﺘﯧﺘﯩﻨﯩﯔ ﺑﺎﺷﻠﯩﻘﻰ ﺋﻪﻫﻤﻪﺕ ﺋﯩﻴﯩﻤﺎﻳﺎ ﺋﻪﭘﻪﻧﺪﻯ، ﭘﺎﺭﻻﻣﯧﻨﺖ ﺑﯩﻨﺎﺳﯩﺪﯨﻜﻰ ﺋﯩﺸﺨﺎﻧﯩﺴﯩﺪﺍ ﻣﯘﺧﺒﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﺪﻯ. RFA Photo / Erkin Tarim

ﺗﯜﺭﻛﯩﻴﻪ ﭘﺎﺭﻻﻣﯧﻨﺘﻰ ﺋﺎﺩﺍﻟﻪﺕ ﻛﻮﻣﯩﺘﯧﺘﯩﻨﯩﯔ ﺑﺎﺷﻠﯩﻘﻰ ﺋﻪﻫﻤﻪﺕ ﺋﯩﻴﯩﻤﺎﻳﺎ ﺋﻪﭘﻪﻧﺪﻯ ﺑﯩﻠﻪﻥ ﭘﺎﺭﻻﻣﯧﻨﺖ ﺑﯩﻨﺎﺳﯩﺪﯨﻜﻰ ﺋﯩﺸﺨﺎﻧﯩﺴﯩﺪﺍ ﺑﯩﺰﻧﯩﯔ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﯨﻜﻰ ﺳﻮﺋﺎﻟﯩﻤﯩﺰﻏﺎ ﺟﺎﯞﺍﺏ ﺑﻪﺭﺩﻯ. ﺋﯘ ﺳﯚﺯﯨﺪﻩ ﺋﯘﻳﻐﯘﺭﻻﺭﻏﺎ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺑﯧﺴﯩﻢ ﺳﯩﻴﺎﺳﯩﺘﯩﻨﯩﯔ ﻳﯧﻘﯩﻨﺪﺍ ﺗﯜﮔﻪﻳﺪﯨﻐﺎﻧﻠﯩﻘﯩﻨﻰ، ﺋﯘﻳﻐﯘﺭﻻﺭﻧﯩﯔ ﺋﻪﺭﻛﯩﻨﻠﯩﻜﻜﻪ ﺋﯧﺮﯨﺸﯩﺪﯨﻐﺎﻧﻠﯩﻘﯩﻨﻰ ﺋﯧﻴﺘﺘﻰ. ﺋﯘ ﻳﻪﻧﻪ ﺳﯚﺯﯨﺪﻩ 21 - ﺋﻪﺳﯩﺮﻧﯩﯔ ﺋﯩﻨﺴﺎﻥ ﻫﻪﻗﻠﯩﺮﻯ ﺋﻪﺳﯩﺮﻯ ﺋﯩﻜﻪﻧﻠﯩﻜﯩﻨﻰ، ﺩﯗﻧﻴﺎﺩﯨﻜﻰ ﺑﯘ ﺋﻪﺭﻛﯩﻨﻠﯩﻚ ﯞﻩ ﺩﯦﻤﻮﻛﺮﺍﺗﯩﻴﻪ ﺷﺎﻣﯩﻠﯩﻨﯩﯔ ﺋﺎﻟﺪﯨﻨﻰ ﻫﯩﭻ ﻗﺎﻧﺪﺍﻕ ﺑﯩﺮ ﻛﯜﭼﻨﯩﯔ ﺗﻮﺳﺎﻟﻤﺎﻳﺪﯨﻐﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺋﻪﻫﻤﻪﺕ ﺋﯩﻴﯩﻤﺎﻳﺎ ﺋﻪﭘﻪﻧﺪﻯ ﺳﯚﺯﯨﺪﻩ 21 - ﺋﻪﺳﯩﺮﻧﯩﯔ ﺋﯩﻨﺴﺎﻥ ﻫﻪﻗﻠﯩﺮﻯ ﺋﻪﺳﯩﺮﻯ ﺋﯩﻜﻪﻧﻠﯩﻜﯩﻨﻰ ﺋﯘﻳﻐﯘﺭﻻﺭﻧﯩﯔ ﭼﻮﻗﯘﻡ ﺋﻪﺭﻛﯩﻨﻠﯩﻜﻜﻪ ﺋﯧﺮﯨﺸﻪﻟﻪﻳﺪﯨﻐﺎﻧﻠﯩﻘﯩﻨﻰ ﺋﯧﻴﺘﯩﭗ ﻣﯘﻧﺪﺍﻕ ﺩﯦﺪﻯ: " ﻣﻪﻧﭽﻪ 20 - ﯞﻩ 21 - ﺋﻪﺳﯩﺮ ﺋﯩﻨﺴﺎﻥ ﻫﻪﻗﻠﯩﺮﻯ ﺋﻪﺳﯩﺮﯨﺪﯗﺭ. ﺩﯗﻧﻴﺎﺩﺍ ﺩﯙﻟﻪﺕ ﯞﻩ ﻣﯩﻠﻠﻪﺗﻠﻪﺭﺩﯨﻨﻤﯘ ﻣﯘﻫﯩﻢ ﻧﻪﺭﺳﻪ ﺋﯩﻨﺴﺎﻧﺪﯗﺭ. ﺷﯘﯕﺎ ﭘﯜﺗﯜﻥ ﺩﯗﻧﻴﺎﺩﯨﻜﻰ ﺋﯩﻨﺴﺎﻧﻼﺭ ﻗﺎﻳﺴﻰ ﻣﯩﻠﻠﻪﺕ، ﻗﺎﻳﺴﻰ ﺩﯨﻨﺪﯨﻦ ﺑﻮﻟﺴﺎ ﺑﻮﻟﺴﯘﻥ ﺋﯘﻻﺭ، ﻳﺎﺷﺎﺵ، ﺩﺍﯞﺍﻟﯩﻨﯩﺶ، ﻣﻪﺩﻩﻧﯩﻲ، ﺋﯩﻨﺴﺎﻧﯩﻲ ﯞﻩ ﺋﻪﺭﻛﯩﻦ ﭘﯩﻜﯩﺮ ﺑﺎﻳﺎﻥ ﻗﯩﻠﯩﺶ ﻫﻪﻗﻠﯩﺮﯨﮕﻪ ﺋﯩﮕﻪ ﺑﻮﻟﯘﺷﻰ ﻛﯧﺮﻩﻙ. ﺩﯙﻟﻪﺕ ﻗﯘﺭﻏﺎﻥ ﻣﯩﻠﻠﻪﺗﻠﻪﺭ ﺑﺎﺭ، ﺑﺎﺷﻘﺎ ﺑﯩﺮ ﺩﯙﻟﻪﺗﻨﯩﯔ ﺋﯩﭽﯩﺪﻩ ﻣﻪﯞﺟﯘﺩﯨﻴﯩﺘﯩﻨﻰ ﻗﻮﻏﺪﺍﭖ ﻗﯧﻠﯩﺸﻘﺎ ﺗﯩﺮﯨﺸﯩﯟﺍﺗﻘﺎﻥ ﻣﯩﻠﻠﻪﺗﻠﻪﺭ ﺑﺎﺭ. ﺑﯩﺮ ﺩﯙﻟﻪﺗﻨﯩﯔ ﭼﻮﯓ ﺩﯙﻟﻪﺕ ﺑﻮﻟﯘﺷﻰ، ﺋﯘ ﺩﯙﻟﻪﺗﻨﯩﯔ ﺋﯚﺯ ﺋﯩﭽﯩﺪﯨﻜﻰ ﻫﻪﺭ ﻣﯩﻠﻠﻪﺕ ﺧﻪﻟﻘﯩﻨﻰ ﺗﻪﯓ ﺑﺎﺭﺍﯞﻩﺭ ﺩﯦﻤﻮﻛﺮﺍﺗﯩﻴﻪ ﺋﯩﭽﯩﺪﻩ ﻳﺎﺷﺎﺵ ﻫﻪﻗﻘﻰ ﺑﯧﺮﯨﭗ ﺑﻪﺭﻣﯩﮕﻪﻧﻠﯩﻜﻰ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻜﺘﯘﺭ. ﺧﯩﺘﺎﻱ ﯞﻩ ﺭﯗﺳﯩﻴﯩﮕﻪ ﺋﻮﺧﺸﺎﺵ ﺩﯙﻟﻪﺗﻠﻪﺭﺩﻩ ﻫﻪﻗﻠﯩﺮﻯ ﺗﺎﺭﺗﯩﯟﯦﻠﯩﻨﻐﺎﻥ، ﻫﻪﻗﻠﯩﺮﯨﻨﻰ ﻗﻮﻟﻐﺎ ﻛﻪﻟﺘﯜﺭﯛﺵ ﺋﯜﭼﯜﻥ ﻛﯜﺭﻩﺵ ﻗﯩﻠﯩﯟﺍﺗﻘﺎﻥ ﻛﯚﭖ ﺳﺎﻧﺪﺍ ﻣﯩﻠﻠﻪﺗﻠﻪﺭ ﺑﺎﺭ. ﺋﻪﻣﻤﺎ ﺑﯜﮔﯜﻧﻜﻰ ﻛﯜﻧﺪﻩ ﺩﯗﻧﻴﺎ ﺗﯧﺰﻻ ﺋﯚﺯﮔﯩﺮﯨﯟﺍﺗﯩﺪﯗ. ﺧﯩﺘﺎﻱ ﺋﯚﺯﮔﯩﺮﯨﯟﺍﺗﯩﺪﯗ، ﺭﯗﺳﯩﻴﻪ ﺋﯚﺯﮔﯩﺮﯨﯟﺍﺗﯩﺪﯗ. ﻫﺎﺯﯨﺮﻗﻰ ﺋﯘﻳﻐﯘﺭﻻﺭ ﺑﻪﻟﻜﻰ ﺑﯧﺴﯩﻢ ﺋﺎﺳﺘﯩﺪﺍ ﺯﯗﻟﯘﻡ ﺋﺎﺳﺘﯩﺪﺍ ﻳﺎﺷﺎﺷﻘﺎ ﻣﻪﺟﺒﯘﺭ ﻗﯧﻠﯩﯟﺍﺗﻘﺎﻥ ﺑﻮﻟﺴﯩﻤﯘ، ﺋﯘﻳﻐﯘﺭﻻﺭﻧﯩﯔ ﻛﯧﻴﯩﻨﻜﻰ ﺋﻪﯞﻻﺩﻟﯩﺮﻯ ﭼﻮﻗﯘﻡ ﺑﻪﺧﺖ ﺳﺎﺋﺎﺩﻩﺕ ﺋﯩﭽﯩﺪﻩ ﻳﺎﺷﺎﻳﺪﯗ ﺩﻩﭖ ﺋﻮﻳﻼﻳﻤﻪﻥ. ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻠﯩﻖ ﻗﯧﺮﯨﻨﺪﺍﺷﻠﯩﺮﯨﻤﻨﯩﯔ ﺋﯚﺯ ﺩﺍﯞﺍﻟﯩﺮﻯ ﺋﯜﭼﯜﻥ ﺳﻪﯞﺭﻯ ﺗﺎﻗﻪﺕ ﺑﯩﻠﻪﻥ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺑﯘ ﻣﯘﺟﺎﺩﯨﻠﯩﻠﯩﺮﻯ ﺋﯜﭼﯜﻥ ﺋﯘﻻﺭﻧﻰ ﺗﻪﺑﺮﯨﻜﻠﻪﻳﻤﻪﻥ ﺗﻪﺑﺮﯨﻜﻠﻪﻳﻤﻪﻥ. ﺧﯩﺘﺎﻳﻼﺭﻣﯘ ﺩﯗﻧﻴﺎﻧﯩﯔ ﯞﻩﺯﯨﻴﯩﺘﯩﻨﻰ ﭼﯜﺷﯜﻧﯜﭖ ﻳﯧﺘﯩﭗ ﺋﯘﻳﻐﯘﺭ ﻣﻪﺳﯩﻠﯩﺴﯩﮕﻪ ﺋﯩﻨﺴﺎﻥ ﻫﻪﻗﻠﯩﺮﻯ ﺟﻪﻫﻪﺗﺘﯩﻦ ﻗﺎﺭﺍﭖ، ﻳﯧﻘﯩﻦ ﻛﻪﻟﮕﯜﺳﯩﺪﻩ ﺋﯘﻳﻐﯘﺭﻻﺭﻏﺎ ﺋﯚﺯ ﻫﻪﻕ ﯞﻩ ﻫﯘﻗﯘﻗﻠﯩﺮﯨﻨﻰ ﺑﯧﺮﯨﺪﯗ، ﺋﯘﻳﻐﯘﺭﻻﺭﻣﯘ ﺋﻪﺭﻛﯩﻨﻠﯩﻚ ﺋﯩﭽﯩﺪﻩ ﻳﺎﺷﺎﻳﺪﯗ ﺩﻩﭖ ﺋﻮﻳﻼﻳﻤﻪﻥ."

ﺳﯩﺰ ﺧﯩﺘﺎﻱ ﺋﯚﺯﮔﯩﺮﯨﯟﺍﺗﯩﺪﯗ ﺩﻩﯞﺍﺗﯩﺴﯩﺰ؟ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﺎﻣﻤﯩﯟﻯ ﺗﻪﺷﻜﯩﻼﺗﻠﯩﺮﻯ ﻣﻪﺳﺌﯘﻟﻠﯩﺮﯨﻨﯩﯔ ﺩﯦﻴﯩﺸﯩﭽﻪ ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻏﺎ ﻗﯩﻠﯩﯟﺍﺗﻘﺎﻥ ﺯﯗﻟﯘﻣﻰ ﺑﺎﺭﻏﺎﻧﺴﯧﺮﻯ ﺋﯧﻐﯩﺮﻟﯩﺸﯩﯟﯦﺘﯩﭙﺘﯘ، ﺩﯦﻤﻪﻙ ﺧﯩﺘﺎﻱ ﺋﯚﺯﮔﻪﺭﻣﻪﭘﺘﯘ ﺩﯦﮕﻪﻧﻠﯩﻚ، ﺑﯘﻧﯩﯖﻐﺎ ﻗﺎﻧﺪﺍﻕ ﻗﺎﺭﺍﻳﺴﯩﺰ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺟﺎﯞﺍﺏ ﺑﯧﺮﯨﭗ ﻣﯘﻧﺪﺍﻕ ﺩﯦﺪﻯ: "ﺧﯩﺘﺎﻱ ﺋﯚﺯﮔﻪﺭﻣﻪﻳﯟﺍﺗﯩﺪﯗ ﺩﯦﮕﻪﻥ ﮔﻪﭘﻜﻪ ﻗﻮﺷﯘﻟﻤﺎﻳﻤﻪﻥ. ﺑﯘﺭﯗﻥ ﺧﯩﺘﺎﻱ ﺋﯩﻘﺘﯩﺴﺎﺩﯨﻤﯘ ﻛﻮﻣﻤﯘﻧﯩﺴﺘﯩﻚ ﺋﯩﻘﺘﯩﺴﺎﺩ ﺋﯩﺪﻯ، ﺋﻪﻣﻤﺎ ﺑﯜﮔﯜﻥ ﺧﯩﺘﺎﻳﻼﺭ ﺗﯜﺭﻛﯩﻴﯩﺪﯨﻨﻤﯘ ﺑﻪﻛﺮﻩﻙ ﺋﻪﺭﻛﯩﻦ ﺑﺎﺯﺍﺭ ﺋﯩﻘﺘﯩﺴﺎﺩﻯ ﺳﯩﻴﺎﺳﯩﺘﻰ ﺋﯩﺠﺮﺍ ﻗﯩﻠﯩﯟﺍﺗﯩﺪﯗ. ﺑﯘ ﺟﻪﻫﻪﺗﺘﯩﻦ ﺋﯧﻠﯩﭗ ﺋﯧﻴﺘﻘﺎﻧﺪﺍ ﺧﯩﺘﺎﻱ ﺋﯚﺯﮔﯩﺮﯨﯟﺍﺗﯩﺪﯗ. ﺳﯩﻴﺎﺳﻰ ﺟﻪﻫﻪﺗﺘﯩﻜﻰ ﺋﻪﺭﻛﯩﻨﻠﯩﻚ ﺗﯧﺨﻰ ﺧﯩﺘﺎﻳﻐﺎ ﻳﯧﺘﯩﭗ ﻛﻪﻟﻤﯩﺪﻯ، ﺋﻪﻣﻤﺎ ﻣﻪﻥ ﻗﯩﺴﻘﺎ ﯞﺍﻗﯩﺖ ﺋﯩﭽﯩﺪﻩ ﺧﯩﺘﺎﻳﻐﯩﻤﯘ ﺩﯦﻤﻮﻛﺮﺍﺗﯩﻴﯩﻨﯩﯔ ﻳﯧﺘﯩﭗ ﻛﯧﻠﯩﺪﯨﻐﺎﻧﻠﯩﻘﯩﻐﺎ ﺋﯩﺸﯩﻨﯩﻤﻪﻥ. ﭼﯜﻧﻜﻰ ﺑﯜﮔﯜﻥ ﺩﯗﻧﻴﺎﯞﯨﻠﯩﺸﯩﯟﺍﺗﻘﺎﻥ ﻛﯜﻧﯩﻤﯩﺰﺩﻩ ﺑﯘ ﺋﻪﺭﻛﯩﻨﻠﯩﻚ ﺩﯦﻤﻮﻛﺮﺍﺗﯩﻴﻪ ﺷﺎﻣﯩﻠﯩﻨﻰ ﻫﯧﭽﻜﯩﻢ ﺗﻮﺳﯘﯞﺍﻻﻟﻤﺎﻳﺪﯗ."

ﺑﯜﮔﯜﻥ ﺋﯘﻳﻐﯘﺭﻻﺭﻧﯩﯔ ﻣﯩﻠﻠﻰ ﻣﺎﺋﺎﺭﯨﭙﻰ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﻟﯩﯟﺍﺗﯩﺪﯗ؟ ﭘﯜﺗﯜﻥ ﻣﻪﺩﻩﻧﯩﻲ ﻫﻪﻗﻠﯩﺮﻯ ﻗﻮﻟﻠﯩﺮﯨﺪﯨﻦ ﺗﺎﺭﺗﯩﯟﯦﻠﯩﻨﯩﯟﺍﺗﯩﺪﯗ؟ ﺳﯩﺰ ﺗﯜﺭﻛﯩﻴﻪ ﭘﺎﺭﻻﻣﯧﻨﺘﻰ ﺋﺎﺩﺍﻟﻪﺕ ﻛﻮﻣﯩﺴﻴﻮﻧﻰ ﺑﺎﺷﻠﯩﻘﻰ ﺑﻮﻟﯘﺵ ﺳﯜﭘﯩﺘﯩﯖﯩﺰ ﺑﯩﻠﻪﻥ ﺑﯘﻧﯩﯖﻐﺎ ﻗﺎﻧﺪﺍﻕ ﻗﺎﺭﺍﻳﺴﯩﺰ؟ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺟﺎﯞﺍﺏ ﺑﯧﺮﯨﭗ ﻣﯘﻧﺪﺍﻕ ﺩﯦﺪﻯ: " ﻣﻪﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﻫﺎﺯﯨﺮﻗﻰ ﯞﻩﺯﯨﻴﯩﺘﻰ، ﻛﻮﻧﻜﺮﯨﺖ ﻣﻪﺳﯩﻠﯩﻠﯩﺮﻯ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺋﯩﮕﯩﺴﻰ ﻣﻪﻥ ﺩﯦﺴﻪﻡ ﻳﺎﻟﻐﺎﻥ ﮔﻪﭖ ﻗﯩﻠﻐﺎﻥ ﺑﻮﻟﯘﭖ ﻗﺎﻟﯩﻤﻪﻥ. ﺑﯩﺰ ﺷﯘﻧﻰ ﺑﯩﻠﯩﻤﯩﺰﻛﻰ، ﻛﯩﺸﯩﻠﻪﺭﮔﻪ ﯞﻩ ﻣﯩﻠﻠﻪﺗﻠﻪﺭﮔﻪ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺑﯧﺴﯩﻤﻨﯩﯔ ﺋﻪﻛﺴﻰ ﺗﻪﺳﯩﺮﻯ ﺑﻮﻟﯩﺪﯗ. ﺑﯧﺴﯩﻢ ﻛﯜﭼﻪﻳﮕﻪﻧﺴﯧﺮﻯ ﺋﯘﻧﯩﯖﻐﺎ ﺑﻮﻟﻐﺎﻥ ﻧﺎﺭﺍﺯﯨﻠﯩﻘﻤﯘ ﻛﯜﭼﯩﻴﯩﺪﯗ. ﺷﯘﯕﺎ ﺑﯧﺴﯩﻢ ﺑﯩﺮ ﻣﯩﻠﻠﻪﺗﻨﻰ ﻳﻮﻕ ﻗﯩﻼﻟﻤﺎﻳﺪﯗ ﺋﻪﻛﺴﯩﭽﻪ ﺋﯘ ﻣﯩﻠﻠﻪﺗﻨﻰ ﻛﯜﭼﻠﻪﻧﺪﯛﺭﯨﺪﯗ. ﺑﯩﺮ ﻣﯩﻠﻠﻪﺗﻨﯩﯔ ﺗﯩﻠﯩﻨﻰ ﺩﯨﻨﯩﻨﻰ ﻳﻮﻕ ﻗﯩﻠﯩﺶ ﺳﯩﻴﺎﺳﯩﺘﯩﻨﻰ ﺑﯘﺭﯗﻥ ﺑﻮﻟﻐﺎﺭﯨﻴﻪ ﯞﻩ ﮔﯧﺮﯨﺘﺴﯩﻴﻪﻣﯘ ﺋﯩﺠﺮﺍ ﻗﯩﻠﻐﺎﻥ ﺋﯩﺪﻯ، ﺋﻪﻣﻤﺎ ﻧﻪﺗﯩﺠﯩﮕﻪ ﺋﯧﺮﯨﺸﻪﻟﻤﯩﺪﻯ. 21 - ﺋﻪﺳﯩﺮﺩﻩ ﺑﯩﺮ ﻣﯩﻠﻠﻪﺗﻨﻰ ﺋﺎﺳﺴﯩﻤﯩﻠﻴﺎﺗﺴﯩﻴﻪ ﻗﯩﻠﯩﺶ ﺋﯘﻧﺪﺍﻕ ﺋﺎﺳﺎﻥ ﺋﻪﻣﻪﺱ. ﺋﻪﮔﻪﺭ ﺧﯩﺘﺎﻳﻼﺭ ﺭﺍﺳﺘﯩﻨﻼ ﺳﯩﻠﻪﺭ ﺩﯦﮕﻪﻧﺪﻩﻙ ﺋﺎﺳﺴﯩﻤﯩﻠﻴﺎﺗﺴﯩﻴﻪ ﺳﯩﻴﺎﺳﯩﺘﻰ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺑﻮﻟﺴﺎ، ﺋﯘﻧﻰ ﻗﻮﺑﯘﻝ ﻗﯩﻠﯩﺸﯩﻤﯩﺰ ﻣﯘﻣﻜﯩﻦ ﺋﻪﻣﻪﺱ. ﺑﯘﻧﺪﺍﻕ ﺳﯩﻴﺎﺳﻪﺕ ﭼﻮﯓ ﺩﯙﻟﻪﺗﻠﻪﺭﮔﻪ ﻳﺎﺭﺍﺷﻤﺎﻳﺪﯗ. ﻣﻪﻧﭽﻪ ﺧﯩﺘﺎﻱ ﺩﯙﻟﯩﺘﻰ ﻛﯧﻴﯩﻦ ﻫﺎﺯﯨﺮ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺑﯘ ﺳﯩﻴﺎﺳﯩﺘﯩﺪﯨﻦ ﻧﻮﻣﯘﺱ ﻗﯩﻠﯩﺸﻰ ﻣﯘﻣﻜﯩﻦ. ﭼﯜﻧﻜﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﯨﻜﻰ 20 ﻣﯩﻠﻴﻮﻥ ﺋﯘﻳﻐﯘﺭ ﺗﯜﺭﻛﯩﻨﻰ ﺋﺎﺳﺴﯩﻤﯩﻠﻴﺎﺗﺴﯩﻴﻪ ﻗﯩﻠﯩﺶ ﺋﯘﻧﺪﺍﻕ ﺋﺎﺳﺎﻥ ﺋﯩﺶ ﺋﻪﻣﻪﺱ. ﺷﯘﯕﺎ ﺑﯘ ﻣﯘﺟﺎﺩﯨﻠﻪﯕﻼﺭ ﭼﻮﻗﯘﻡ ﻏﻪﻟﯩﺒﻪ ﻗﯩﻠﯩﺪﯗ، ﺧﯩﺘﺎﻱ ﻫﯚﻛﯜﻣﯩﺘﯩﻤﯘ ﻳﯧﻘﯩﻨﺪﺍ ﺧﯩﺘﺎﻳﺪﯨﻜﻰ ﭘﯜﺗﯜﻥ ﻣﯩﻠﻠﻪﺗﻠﻪﺭﻧﯩﯔ ﻫﻪﻕ ﻫﻮﻗﯘﻗﻠﯩﺮﯨﻨﻰ ﺑﯧﺮﯨﺸﻜﻪ ﻣﻪﺟﺒﯘﺭ ﻗﺎﻟﯩﺪﯗ."

ﺗﯜﺭﻛﯩﻴﻪ ﭘﺎﺭﻻﻣﯧﻨﺘﻰ ﺋﺎﺩﺍﻟﻪﺕ ﻛﻮﻣﯩﺘﯧﺘﻰ ﺑﺎﺷﻠﯩﻘﻰ ﺋﻪﻫﻤﻪﺕ ﺋﯩﻴﯩﻤﺎﻳﺎ ﺋﻪﭘﻪﻧﺪﻯ ﺳﯚﻫﺒﯩﺘﯩﻤﯩﺰﻧﯩﯔ ﺋﺎﺧﯩﺮﯨﺪﺍ 2008 - ﻳﯩﻠﻰ ﻣﻪﻫﻤﯘﺕ ﻗﻪﺷﻘﯩﺮﻯ ﻳﯩﻠﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﻣﯘﻧﺪﺍﻕ ﺩﯦﺪﻯ: " ﻣﻪﻫﻤﯘﺕ ﻗﻪﺷﻘﯩﺮﻯ ﺗﯜﺭﻛﯩﻲ ﻣﯩﻠﻠﻪﺗﻠﯩﺮﯨﻨﯩﯔ ﺩﯗﻧﻴﺎ ﻣﻪﺩﻩﻧﯩﻴﯩﺘﯩﮕﻪ ﺑﯧﻐﯩﺸﻠﯩﻐﺎﻥ ﺋﻪﯓ ﻣﯘﻫﯩﻢ ﺋﻪﺳﯩﺮﯨﺪﯗﺭ. `ﺗﯜﺭﻛﯩﻲ ﺗﯩﻠﻼﺭ ﺩﯨﯟﺍﻧﻰ `ﻣﯘﻛﻪﻣﻤﻪﻝ ﺑﯩﺮ ﺋﻪﺳﻪﺭ ﺑﻮﻟﯘﭖ، ﺗﯜﺭﻙ ﻣﻪﺩﻩﻧﯩﻴﯩﺘﯩﻨﯩﯔ، ﺗﯜﺭﻛﯩﻲ ﺗﯩﻠﻠﯩﺮﯨﻨﯩﯔ ﺑﯩﺮ ﻗﺎﻣﯘﺳﯩﺪﯗﺭ. ﺑﯘ ﺋﻪﺳﻪﺭﻧﯩﯔ ﺑﯩﺮﺩﯨﻦ ﺑﯩﺮ ﻧﯘﺳﺨﯩﺴﯩﻨﯩﯔ ﺋﯩﺴﺘﺎﻧﺒﯘﻟﺪﯨﻜﻰ ﺑﯩﺮ ﻛﯩﺘﺎﺑﭙﯘﺭﯗﺷﺘﯩﻦ ﺋﺎﻟﻰ ﺋﻪﻣﯩﺮﻯ ﺋﻪﭘﻪﻧﺪﻯ ﺗﻪﺭﯨﭙﯩﺪﯨﻦ ﺗﯧﭙﯩﻠﯩﺸﻰ، ﺋﯘﻧﯩﯔ ﺩﯗﻧﻴﺎ ﻣﻪﺩﻩﻧﯩﻴﯩﺘﯩﮕﻪ ﻗﻮﺷﻘﺎﻥ ﺋﻪﯓ ﭼﻮﯓ ﺗﯚﻫﭙﯩﺴﯩﺪﯗﺭ. ﺋﺎﻟﻰ ﺋﻪﻣﯩﺮﻯ ﺋﻪﭘﻪﻧﺪﯨﻨﯩﯔ ﺑﯘ ﻛﯩﺘﺎﺑﻨﻰ ﺋﯧﻠﯩﺶ ﺋﯜﭼﯜﻥ ﭘﯘﻟﻰ ﻳﻮﻕ، ﺑﺎﺷﻘﯩﻼﺭﺩﯨﻦ ﻗﻪﺭﺯ ﺋﯧﻠﯩﭗ ﺳﯧﺘﯩﯟﺍﻟﻐﺎﻥ. ﻣﻪﻧﺪﻩ ﺗﯜﺭﻛﯩﻲ ﺗﯩﻠﻼﺭ ﺩﯨﯟﺍﻧﯩﻨﯩﯔ ﺋﻮﺳﻤﺎﻥ ﺋﯩﻤﭙﯧﺮﯨﻴﯩﺴﻰ ﻣﻪﺯﮔﯩﻠﯩﺪﻩ ﺑﯧﺴﯩﻠﻐﺎﻥ ﺗﯘﻧﺠﻰ ﻧﯘﺳﺨﯩﺴﻰ ﺑﺎﺭ. ﺗﯜﺭﻛﯩﻲ ﺗﯩﻠﻼﺭ ﺩﯨﯟﺍﻧﯩﻨﯩﯔ ﺋﻮﺭﯨﮕﯩﻨﺎﻟﻰ ﻫﺎﺯﯨﺮ ﺋﯩﺴﺘﺎﻧﺒﯘﻟﺪﯨﻜﻰ ﻣﯩﻠﻠﻪﺕ ﻛﯘﺗﯘﭘﺨﺎﻧﯩﺴﯩﺪﺍ ﺳﺎﻗﻼﻧﻤﺎﻗﺘﺎ. ﻣﻪﻥ 2008 - ﻳﯩﻠﻰ ﻣﻪﻫﻤﯘﺕ ﻗﻪﺷﻘﯩﺮﻯ ﻳﯩﻠﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺑﯘ ﻛﯩﺘﺎﺑﻨﻰ ﺗﯧﭙﯩﭗ ﺑﯩﺰﮔﻪ ﺋﯘﻻﺷﺘﯘﺭﻏﺎﻥ ﺋﺎﻟﻰ ﺋﻪﻣﯩﺮﻯ ﺋﻪﭘﻪﻧﺪﯨﻨﯩﯔ ﻳﺎﺗﻘﺎﻥ ﻳﯧﺮﻯ ﺟﻪﻧﻨﻪﺕ ﺑﻮﻟﯘﺷﯩﻨﻰ ﺗﯩﻠﻪﺵ ﺑﯩﻠﻪﻥ ﺑﯩﺮﮔﻪ، ﭘﯜﺗﯜﻥ ﺗﯜﺭﻙ ﺩﯗﻧﻴﺎﺳﯩﺪﺍ ﻣﻪﻫﻤﯘﺕ ﻗﻪﺷﻘﯩﺮﻯ ﻫﻪﻗﻘﯩﺪﻩ ﭘﺎﺋﺎﻟﯩﻴﻪﺗﻠﻪﺭﻧﯩﯔ ﺋﯧﻠﯩﭗ ﺑﯧﺮﯨﻠﯩﺸﯩﻨﻰ، ﻫﻪﺭﻗﺎﻳﺴﻰ ﺩﯙﻟﻪﺗﻠﻪﺭﻧﯩﯔ ﺑﯘﻧﯩﯖﻐﺎ ﺋﺎﻻﻫﯩﺪﻩ ﺋﻪﻫﻤﯩﻴﻪﺕ ﺑﯧﺮﯨﺸﯩﻨﻰ ﺗﯩﻠﻪﻳﻤﻪﻥ." (ﺋﻪﺭﻛﯩﻦ ﺗﺎﺭﯨﻢ)