ﺋﺎﻣﯧﺮﯨﻜﯩﺪﺍ ﺗﻪﺗﻘﯩﻘﺎﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﺎﻛﺎ ‏- ﺳﯩﯖﯩﻞ ﺋﯘﻳﻐﯘﺭ ﺋﺎﻟﯩﻤﻼﺭ (2)

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺑﯩﺰ ﺋﯚﺗﻜﻪﻧﺪﻩ ﻗﺎﺯﺍﻗﯩﺴﺘﺎﻧﺪﺍ ﺗﯘﻏﯘﻟﯘﭖ ﺋﯚﺳﻜﻪﻥ، ﺋﻪﻣﻤﺎ ﻫﺎﺯﯨﺮ ﺋﺎﻣﯧﺮﯨﻜﯩﺪﺍ ﻛﻮﻟﻮﻥ ﺗﻪﺗﻘﯩﻘﺎﺗﻰ ﺑﯩﻠﻪﻥ ﺷﯘﻏﯘﻟﻠﯩﻨﯩﯟﺍﺗﻘﺎﻥ ﺋﺎﻛﺎ-ﺳﯩﯖﯩﻞ ﺋﯘﻳﻐﯘﺭ ﺋﺎﻟﯩﻤﻠﯩﺮﻯ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺑﻪﺭﮔﻪﻥ ﻫﻪﻡ ﺑﯘ ﻗﯧﺮﯨﻨﺪﺍﺵ ﺋﺎﻟﯩﻤﻼﺭﻧﯩﯔ ﺑﯩﺮﺳﻰ ﺑﻮﻟﻐﺎﻥ ﺩﻭﻛﺘﻮﺭ ﺷﯚﻫﺮﻩﺕ ﻣﯘﺗﻪﻟﻠﯩﭗ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﯩﺘﯩﻤﯩﺰﻧﻰ ﺋﺎﯕﻼﺗﻘﺎﻥ ﺋﯩﺪﯗﻕ. ﺑﯘ ﻧﯚﯞﻩﺕ ﺩﻭﻛﺘﻮﺭ ﺷﯚﻫﺮﻩﺕ ﻣﯘﺗﻪﻟﻠﯩﭙﻨﯩﯔ ﺳﯩﯖﻠﯩﺴﻰ ﺩﻭﻛﺘﻮﺭ ﻣﺎﻳﺴﻪﻡ ﻣﯘﺗﻪﻟﻠﯩﭗ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﻪﺗﻨﻰ ﺩﯨﻘﻘﯩﺘﯩﯖﻼﺭﻏﺎ ﺳﯘﻧﺪﯗﻕ.

ﺩﻭﻛﺘﯘﺭ ﻣﺎﻳﺴﻪﻡ ﻣﯘﺗﻪﻟﻠﯩﭗ ﻏﻮﻝ ﻫﯜﺟﻪﻳﺮﻩ ﺳﺎﻫﻪﺳﯩﺪﻩ ﻛﯚﺯﮔﻪ ﻛﯚﺭﯛﻧﮕﻪﻥ ﺋﺎﻟﯩﻢ ﺑﻮﻟﯘﭖ، ﺋﯘ ﻫﺎﺯﯨﺮ ﺑﻮﺳﺘﻮﻧﺪﯨﻜﻰ ﺋﺎﻣﯧﺮﯨﻜﺎ ﻣﺎﺳﺴﺎﭼﯘﺳﯧﺘﺲ ﺗﯧﺨﻨﻮﻟﻮﮔﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﻫﯜﺟﻪﻳﺮﻩ ﺑﯩﺌﻮ-ﻣﯧﺪﯨﺘﺴﯩﻨﺎ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﺪﻩ ﺧﯩﺰﻣﻪﺕ ﻗﯩﻠﯩﯟﺍﺗﯩﺪﯗ.

ﻣﺎﻳﺴﻪﻣﻨﯩﯔ ﻫﺎﻳﺎﺕ ﭘﺎﺋﺎﻟﯩﻴﯩﺘﻰ ﺋﯜﺳﺘﯩﺪﻩ ﺋﯩﻜﻜﻰ ﻛﻪﻟﯩﻤﻪ ﺳﯚﺯ

ﺩﻭﻛﺘﯘﺭ ﻣﺎﻳﺴﻪﻡ ﻣﯘﺗﻪﻟﻠﯩﭗ، ﻗﺎﺯﺍﻗﯩﺴﺘﺎﻧﺪﯨﻜﻰ ﺋﯘﻳﻐﯘﺭ ﺭﺍﻳﻮﻧﻰ ﻏﺎﻟﯩﺒﯩﻴﻪﺕ ﻳﯧﺰﯨﺴﯩﺪﺍ ﺩﯗﻧﻴﺎﻏﺎ ﻛﻪﻟﮕﻪﻥ، ﻛﯧﻴﯩﻦ ﺩﺍﺩﯨﺴﯩﻨﯩﯔ ﺧﯩﺰﻣﯩﺘﻰ ﺳﻪﯞﻩﺑﻠﯩﻚ ﺋﺎﻟﻤﺎﺗﺎ ﺷﻪﻫﯩﺮﯨﮕﻪ ﻳﯧﻘﯩﻦ ﻳﯧﺰﺍ- ﺋﺎﯞﺍﺕ ﻳﯧﺰﯨﺴﯩﻐﺎ ﻛﯚﭼﯜﭖ ﻛﻪﻟﮕﻪﻥ ﯞﻩ ﺑﺎﺷﻼﻧﻐﯘﭺ ، ﺋﻮﺗﺘﯘﺭﺍ ﻣﻪﻛﺘﻪﭘﻨﻰ ﺋﺎﯞﺍﺗﺘﺎ ﺗﯜﮔﻪﺗﻜﻪﻥ.

ﺗﻮﻟﯘﻕ ﺋﻮﺗﺘﯘﺭﯨﻨﻰ ﭘﯜﺗﺘﯜﺭﮔﻪﻥ ﻳﯩﻠﻰ، ﺋﺎﻛﯩﺴﯩﻨﯩﯔ ﻗﯩﺰﯨﻘﺘﯘﺭﯗﺷﻰ ﯞﻩ ﺋﺎﺗﺎ ‏-ﺋﺎﻧﯩﺴﯩﻨﯩﯔ ﻗﻮﻟﻠﯩﺸﻰ ﺋﺎﺭﻗﯩﺴﯩﺪﺍ ﺳﺎﺑﯩﻖ ﺳﻮﯞﯦﺖ ﺋﯩﺘﺘﯩﭙﺎﻗﯩﺪﯨﻜﻰ ﺩﺍﯕﻠﯩﻖ ﻳﯧﺰﺍ ﺋﯩﮕﯩﻠﯩﻚ ﺋﯘﻧﯩﯟﯦﺮﺳﯩﺘﯧﺘﻰ ﺗﯩﻤﯩﺮﯨﺌﺎﺳﯧﯟ ﻧﺎﻣﯩﺪﯨﻜﻰ ﻳﯧﺰﺍ ﺋﯩﮕﯩﻠﯩﻚ ﺋﯘﻧﯩﯟﯦﺮﺳﯩﺘﯧﺘﯩﻐﺎ ﺋﻮﻗﯘﺷﻘﺎ ﻛﯩﺮﮔﻪﻥ.

ﺗﻮﻏﺮﺍ ﻗﺎﺭﺍﺭ

ﻣﺎﻳﺴﻪﻡ ﺩﻭﻛﺘﻮﺭﻧﯩﯔ ﺩﺍﺩﯨﺴﻰ ﻣﯘﺯﻩﭘﭙﻪﺭ ﻣﯘﺗﻪﻟﻠﯩﭗ ﺋﺎﻛﺎ ﺋﻮﺯ ﯞﺍﻗﺘﯩﺪﯨﻜﻰ ﺋﯩﺸﻼﺭﻧﻰ ﺋﻪﺳﻠﻪﭖ، ﺷﯘ ﭼﺎﻏﻼﺭﺩﺍ ﺋﯘﻳﻐﯘﺭﭼﻪ ﻣﻪﻛﺘﻪﭖ ﺑﻮﻟﻤﯩﻐﺎﻧﺪﯨﻦ ﻛﯧﻴﯩﻦ ﺋﯘﻻﺭﻧﻰ ﺭﯗﺳﭽﻪ ﺋﻮﻗﯘﺗﻘﺎﻧﻠﯩﻘﯩﻨﻰ، ﺋﻮﻏﻠﻰ ﺷﯚﻫﺮﻩﺗﻨﯩﯔ ﺗﻮﻟﯘﻕ ﺋﻮﺗﺘﯘﺭﯨﻨﻰ ﭘﯜﺗﺘﯜﺭﯛﭖ ﻫﻪﺭﺑﯩﻲ ﻣﻪﺟﺒﯘﺭﯨﻴﻪﺗﻨﻰ ﺗﺎﻣﺎﻣﻠﯩﻐﺎﻧﺪﯨﻦ ﻛﯧﻴﯩﻦ ﻣﻮﺳﻜﯟﺍﻏﺎ ﺗﯩﻤﺮﺍﺳﯧﯟ ﻧﺎﻣﯩﺪﯨﻜﻰ ﻳﯧﺰﺍ ﺋﯩﮕﯩﻠﯩﻚ ﻣﻪﻛﺘﯩﭙﯩﮕﻪ ﺑﯧﺮﯨﭗ ﺋﻮﻗﯘﻏﺎﻧﻠﯩﻘﯩﻨﻰ، ﻛﯩﻴﯩﻦ ﻣﺎﻳﺴﻪﻣﻨﯩﻤﯘ ﺷﯘ ﻣﻪﻛﺘﻪﭘﻜﻪ ﺑﯧﺮﯨﺸﻘﺎ ﺩﻩﯞﻩﺕ ﻗﯩﻠﻐﺎﻧﻠﯩﻘﯩﻨﻰ ﺋﻪﺳﻠﻪﭖ ﺋﯚﺗﯜﭖ: " ﺷﯘ ﺯﺍﻣﺎﻧﻼﺭﺩﺍ ﺑﯩﺰ ﺋﯘﻳﻐﯘﺭﻻﺭﺩﺍ ﻗﯩﺰ ﺑﺎﻟﯩﻨﻰ ﻳﯩﺮﺍﻗﻘﺎ ﺋﻪﯞﻩﺗﯩﺸﻨﻰ ﺗﻮﻏﺮﺍ ﺗﺎﭘﻤﺎﻳﺘﺘﯘﻕ، ﻟﯧﻜﯩﻦ ﻣﻪﻥ ﺑﺎﻻﻡ ﺋﻮﻗﯘﯞﺍﻟﺴﯘﻥ، ﺋﺎﻛﺎ-ﺋﯘﻛﺎ ﺋﯩﻜﻜﯩﺴﻰ ﺑﯩﺮ-ﺑﯩﺮﯨﮕﻪ ﻫﻪﻣﺮﺍﻫ ﺑﻮﻟﺴﯘﻥ ﺩﻩﭖ ﺋﯘﻧﻰ ﺷﯘ ﻣﻪﻛﺘﻪﭘﻜﻪ ﺋﻪﯞﻩﺗﺘﯩﻢ. ﺷﯘ ﯞﺍﻗﯩﺘﺘﺎ ﻣﺎﻳﺴﻪﻣﻨﻰ ﺷﯘ ﻣﻪﻛﺘﻪﭘﻜﻪ ﺋﻪﯞﻩﺗﯩﭗ ﺗﻮﻏﺮﺍ ﻗﯩﻠﻐﺎﻥ ﺋﯩﻜﻪﻧﻤﻪﻥ" ﺩﻩﻳﺪﯗ.

ﻛﯧﻴﯩﻨﻜﻰ ﺋﯩﺸﻼﺭ

ﻣﺎﻳﺴﻪﻡ ﻳﯧﺰﺍ ﺋﯩﮕﯩﻠﯩﻚ ﺋﯘﻧﯩﯟﯦﺮﺳﯩﺘﯧﺘﯩﻨﻰ ﺗﯜﮔﻪﺗﻜﻪﻧﺪﯨﻦ ﻛﯧﻴﯩﻦ ﻗﺎﺯﺍﻗﯩﺴﺘﺎﻧﻐﺎ ﻗﺎﻳﺘﯩﭗ ﻛﻪﻟﮕﻪﻥ ﯞﻩ ﺋﺎﻟﻤﺎﺗﺎﺩﺍ ﺑﯩﺮ ﺑﯩﺌﻮﻟﻮﮔﯩﻴﻪ ﺗﻪﺟﺮﯨﺒﻪ ﺋﯩﻨﺴﺘﯩﺘﯘﺗﯩﺪﺍ ﺧﯩﺰﻣﻪﺕ ﻗﯩﻠﻐﺎﻥ. ﺋﺎﻛﯩﺴﻰ ﺷﯚﻫﺮﻩﺕ ﺩﻭﻛﺘﻮﺭﻟﯘﻕ ﭘﺮﻭﮔﺮﺍﻣﻤﯩﺴﯩﻐﺎ ﻛﯩﺮﮔﻪﻧﺪﯨﻦ ﻛﯧﻴﯩﻦ ، ﻳﻪﻧﻪ ﺋﺎﻛﯩﺴﯩﻨﯩﯔ ﺩﻩﯞﻩﺕ ﻗﯩﻠﯩﺸﻰ ﺋﺎﺭﻗﯩﺴﯩﺪﺍ ﺋﯚﺯﻯ ﺋﯩﻠﮕﯩﺮﻯ ﭘﯜﺗﺘﯜﺭﮔﻪﻥ ﻣﻪﻛﺘﻪﭘﻜﻪ ﺩﻭﻛﺘﻮﺭﻟﯘﻕ ﭘﺮﻭﮔﺮﺍﻣﻤﯩﺴﯩﻐﺎ ﺋﻮﻗﯘﺷﻘﺎ ﻛﯩﺮﮔﻪﻥ.

ﺋﯘ ﺋﺎﻣﯧﺮﯨﻜﯩﻐﺎ ﻛﻪﻟﮕﻪﻧﺪﯨﻦ ﻛﯩﻴﯩﻦ ﯞﯨﺴﻜﻮﻧﺴﯩﻦ ﺷﺘﺎﺗﯩﻨﯩﯔ ﻣﺎﺩﯨﺴﻮﻥ ﺷﻪﻫﯩﺮﯨﺪﯨﻜﻰ ﯞﯨﺴﻜﻮﻧﺴﯩﻦ ﺋﯘﻧﯩﯟﯦﺮﺳﯩﺘﯧﺘﯩﻐﺎ ﺩﻭﻛﺘﯘﺭ ﺋﺎﺷﺘﻰ ﺑﺎﺳﻘﯘﭼﯩﺪﯨﻜﻰ ﺗﻪﺗﻘﯩﻘﺎﺗﯩﻨﻰ ﺩﺍﯞﺍﻣﻼﺷﺘﯘﺭﻏﺎﻥ ﯞﻩ ﺑﯘ ﺟﻪﺭﻳﺎﻧﺪﺍ ﺑﯩﺮ ﻣﻮﺯﺍﻳﻨﻰ ﻧﻪﺗﯩﺠﯩﻠﯩﻚ ﻛﻮﻟﻮﻥ ﻗﯩﻠﯩﭗ ﺗﺎﻣﺎﻣﻠﯩﻐﺎﻥ. ﺋﯘﻧﯩﯔ ﺋﯩﺸﻠﻪﭖ ﭼﯩﻘﻘﺎﻥ ﻫﯜﺟﻪﻳﺮﻩ ﻟﯩﻨﯩﻴﯩﻠﯩﺮﻯ ﺑﺎﺷﻘﺎ ﺗﻪﺗﻘﯩﻘﺎﺗﭽﯩﻼﺭ ﺗﻪﺭﯨﭙﯩﺪﯨﻦ ﺋﯩﺸﻠﯩﺘﯩﻠﮕﻪﻥ ﯞﻩ ﺋﯩﻠﻤﯩﻲ ﮊﯗﺭﻧﺎﻟﻼﺭﺩﺍ ﻣﺎﻗﺎﻟﯩﻠﯩﺮﻯ ﺋﯧﻼﻥ ﻗﯩﻠﯩﻨﻐﺎﻥ. ﺋﯘ ﻫﺎﺯﯨﺮ ﻣﺎﺳﺴﺎﭼﯘﺳﯧﺘﺲ ﺗﯧﺨﻨﻮﻟﻮﮔﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﻫﯜﺟﻪﻳﺮﻩ ﺑﯩﺌﻮ-ﻣﯧﺪﯨﺘﺴﯩﻨﺎ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﺪﻩ ﺧﯩﺰﻣﻪﺕ ﻗﯩﻠﯩﯟﺍﺗﯩﺪﯗ . (ﺟﯜﻣﻪ)