ﻗﺎﺭ ﺋﺎﭘﯩﺘﻰ ﺋﯘﻳﻐﯘﺭ ﺧﻪﻟﻘﯩﮕﻪ ﺑﺎﻻﻳﻰ ‏- ﺋﺎﭘﻪﺕ ﺋﯧﻠﯩﭗ ﻛﻪﻟﺪﻯ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

1 ‏- ﺋﺎﻳﻨﯩﯔ ﺋﺎﺧﯩﺮﯨﺪﺍ ﺋﯘﻳﻐﯘﺭ ﺋﯧﻠﯩﻨﯩﯔ ﺟﻪﻧﯘﺑﯩﺪﯨﻜﻰ ﺭﺍﻳﻮﻧﻼﺭﺩﺍ ﻗﺎﺭ ﺋﺎﭘﯩﺘﻰ ﻳﯜﺯ ﺑﯧﺮﯨﭗ، ﺟﻪﻧﯘﺑﯩﻲ ﺋﯘﻳﻐﯘﺭ ﺋﯩﻠﯩﺪﯨﻜﻰ 3 ﯞﯨﻼﻳﻪﺕ ﯞﻩ ﺋﯩﻜﻜﻰ ﺋﻮﺑﻼﺳﺘﺘﺎ 300 ﻣﯩﯔ ﺋﺎﺩﻩﻡ ﻗﺎﺭ ﺋﺎﭘﯩﺘﯩﻨﯩﯔ ﺯﯨﻴﯩﻨﯩﻐﺎ ﺋﯘﭼﺮﯨﻐﺎﻥ. ﺑﯘ ﺧﯩﻞ ﺋﺎﭘﻪﺕ ﻗﻪﺷﻘﻪﺭ ﯞﯨﻼﻳﯩﺘﻰ ﺗﻪﯞﻩﺳﯩﺪﻩ ﺑﯩﺮ ﻗﻪﺩﻩﺭ ﺋﯧﻐﯩﺮ ﺑﻮﻟﻐﺎﻥ ﺑﻮﻟﯘﭖ، 1 ‏- ﺋﺎﻳﻨﯩﯔ 16- ﻛﯜﻧﯩﺪﯨﻦ ﺑﺎﺷﻼﭖ ﻗﺎﺭ ﺋﯘﺩﺍ ﺋﻮﻥ ﻛﯜﻥ ﺗﻮﺧﺘﯩﻤﺎﻱ ﻳﺎﻗﻘﺎﻧﺪﯨﻦ ﻛﯧﻴﯩﻦ 26 ﭼﯧﺴﻼ ﭘﻪﺳﻜﻮﻳﻐﺎ ﭼﯜﺷﻜﻪﻥ.

ﻗﻪﺷﻘﻪﺭ ﺗﻪﯞﻩﺳﯩﺪﻩ 170 ﻣﯩﯔ ﺋﺎﺩﻩﻡ ﺋﺎﭘﻪﺗﻨﯩﯔ ﺑﯧﯟﺍﺳﺘﻪ ﺗﻪﺳﯩﺮﯨﮕﻪ ﺋﯘﭼﯩﺮﺩﻯ

ﻧﻪﺗﯩﺠﯩﺪﻩ، ﻗﺎﺗﻨﺎﺵ ﺋﯜﺯﯛﻟﯜﭖ ﻗﯧﻠﯩﺶ، ﺩﯦﻬﻘﺎﻧﭽﯩﻠﯩﻖ ﺯﯨﺮﺍﺋﻪﺗﻠﯩﺮﻯ ﺋﺎﭘﻪﺗﻜﻪ ﺋﯘﭼﺮﺍﺵ ﯞﻩ ﺋﻮﻟﺘﯘﺭﺍﻕ ﺋﯚﻳﻠﻪﺭ ﺋﯚﺭﯛﻟﯜﭖ ﻛﯧﺘﯩﺶ ﺋﻪﻫﯟﺍﻟﻰ ﻛﯚﺭﯛﻟﮕﻪﻥ. ﻣﻪﻟﯘﻡ ﺑﻮﻟﯘﺷﯩﭽﻪ، ﺑﯘ 10 ﻳﯩﻠﺪﯨﻦ ﺑﯘﻳﺎﻥ ﻗﻪﺷﻘﻪﺭ ﺗﻪﯞﻩﺳﯩﺪﻩ ﻳﯜﺯ ﺑﻪﺭﮔﻪﻥ ﺋﻪﯓ ﺋﯧﻐﯩﺮ ﻗﺎﺭ ﺋﺎﭘﯩﺘﻰ ﺑﻮﻟﯘﭖ، ﻗﻪﺷﻘﻪﺭ ﻫﯚﻛﯜﻣﻪﺕ ﺗﻮﺭﯨﺪﺍ ﺑﯘ ﻫﻪﻗﺘﻪ ﺑﯧﺮﯨﻠﮕﻪﻥ ﺧﻪﯞﻩﺭﺩﻩ ﻛﯚﺭﺳﯩﺘﯩﺸﯩﭽﻪ، ﻗﺎﺭﻧﯩﯔ ﭘﯜﺗﯜﻥ ﻗﻪﺷﻘﻪﺭ ﯞﯨﻼﻳﯩﺘﯩﺪﯨﻜﻰ ﺋﻮﺗﺘﯘﺭﯨﭽﻪ ﻗﯧﻠﯩﻨﻠﯩﻘﻰ 10-15 ﺳﺎﻧﺘﯩﻤﯧﺘﯩﺮﻏﯩﭽﻪ ﺑﻮﻟﻐﺎﻥ ﯞﻩ ﺋﻪﯓ ﺗﯚﯞﻩﻥ ﺗﯧﻤﭙﯧﺮﺍﺗﯘﺭﺍ ﻧﯚﻟﺪﯨﻦ ﺗﯚﯞﻩﻥ 26 ﺳﯩﻠﺴﯩﻴﻪ ﮔﺮﺍﺩﯗﺳﻘﺎ ﭼﯜﺷﻜﻪﻥ.

ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﻫﺎﺯﯨﺮﻏﯩﭽﻪ ﻣﻪﺯﻛﯘﺭ ﻗﺎﺭ ﺋﺎﭘﯩﺘﯩﻨﯩﯔ ﺑﯩﯟﺍﺳﺘﻪ ﺗﻪﺳﯩﺮﯨﮕﻪ ﺋﯘﭼﺮﯨﻐﺎﻥ ﺋﺎﺩﻩﻡ 170 ﻣﯩﯔ ﻧﻪﭘﻪﺭ، ﻗﺎﺭﺩﺍ ﺋﯚﺭﯛﻟﮕﻪﻥ ﺗﯘﺭﺍﻟﻐﯘ ﺋﯚﻱ 792 ﺋﯧﻐﯩﺰ، ﺑﯘﺯﯗﻟﻐﺎﻥ ﺋﯚﻱ 8405 ﺋﯧﻐﯩﺰ ﺑﻮﻟﻐﺎﻥ، ﻗﺎﺭﺩﺍ ﺋﯚﻟﮕﻪﻥ ﭼﺎﺭﯞﺍ 10 ﻣﯩﯔ ﺗﯘﻳﺎﻗﺘﯩﻦ، ﺗﻮﺧﯘ ﻗﺎﺗﺎﺭﻟﯩﻖ ﺋﯚﻱ ﻗﯘﺷﻠﯩﺮﻯ40 ﻣﯩﯖﺪﯨﻦ ﺋﯧﺸﯩﭗ ﺑﯩﯟﺍﺳﺘﻪ ﺋﯩﻘﺘﯩﺴﺎﺩﻯ ﺯﯨﻴﺎﻥ 65 ﻣﯩﻠﻴﻮﻥ ﻳﯜﻩﻧﺪﯨﻦ ﺋﯧﺸﯩﭗ ﻛﻪﺗﻜﻪﻥ.

ﻧﺎﻣﯩﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ ﺑﯩﺮ ﻗﯩﺰ ﻗﻪﺷﻘﻪﺭﺩﻩ ﺋﯘﺩﺍ ﺋﻮﻥ ﻛﯜﻥ ﻗﺎﺭ ﻳﺎﻏﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺑﯘ ﺋﺎﭘﻪﺕ ﻳﻪﻛﻪﻥ، ﻳﯧﯖﯩﺴﺎﺭ، ﻗﺎﻏﯩﻠﯩﻖ، ﺗﺎﺷﻘﻮﺭﻏﺎﻥ ﻗﺎﺗﺎﺭﻟﯩﻖ ﺗﯚﺕ ﻧﺎﻫﯩﻴﯩﺪﻩ ﺑﯩﺮ ﻗﻪﺩﻩﺭ ﺋﯧﻐﯩﺮ ﺑﻮﻟﻐﺎﻥ ﺑﻮﻟﯘﭖ، ﺑﯩﺰ ﺋﯩﮕﯩﻠﯩﮕﻪﻥ ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﻳﯧﯖﯩﺴﺎﺭ ﻧﺎﻫﯩﻴﯩﺴﯩﺪﻩ 3 ﺋﺎﺩﻩﻡ ﺳﻮﻏﯘﻗﺘﯩﻦ ﺗﻮﯕﻼﭖ ﺋﯚﻟﯜﭖ ﻗﺎﻟﻐﺎﻥ.

ﺧﯩﺘﺎﻱ ﺧﺎﺩﯨﻢ : "ﻧﻪﺩﻩ ﻗﺎﺭ ﺋﺎﭘﯩﺘﻰ ﻳﯜﺯ ﺑﻪﺭﺳﯘﻥ"

ﺑﯩﺰ ﺑﯘ ﻫﻪﻗﺘﻪ ﺗﯧﺨﯩﻤﯘ ﭼﻮﯕﻘﯘﺭﻻﭖ ﺋﻪﻫﯟﺍﻝ ﺋﯩﮕﯩﻠﻪﭖ ﺑﯧﻘﯩﺶ ﺋﯜﭼﯜﻥ ﻳﯧﯖﯩﺴﺎﺭ ﻧﺎﻫﯩﻴﯩﺴﯩﮕﻪ ﺗﯧﻠﯧﻔﯘﻥ ﺋﯘﺭﺩﯗﻕ، ﺋﻪﻣﻤﺎ ﻧﺎﻫﯩﻴﯩﻠﯩﻚ ﻫﯚﻛﯜﻣﻪﺗﺘﻪ ﺗﯧﻠﯧﻔﯘﻥ ﺋﺎﻟﯩﺪﯨﻐﺎﻥ ﺋﺎﺩﻩﻡ ﭼﯩﻘﻤﯩﺪﻯ، ﺋﺎﺧﯩﺮﻯ ﻳﯧﯖﯩﺴﺎﺭ ﻧﺎﻫﯩﻴﯩﻠﯩﻚ ﺳﺎﻗﭽﻰ ﺋﯩﺪﺍﺭﯨﺴﯩﮕﻪ ﺗﯧﻠﯧﻔﯘﻥ ﺋﯘﺭﺩﯗﻕ. ﺗﯧﻠﯧﻔﻮﻧﻨﻰ ﻗﻮﺑﯘﻝ ﻗﯩﻠﻐﺎﻥ ﺧﯩﺘﺎﻱ ﺧﺎﺩﯨﻤﻨﯩﯔ ﭘﻮﺯﯨﺘﺴﯩﻴﯩﺴﻰ ﺋﯩﻨﺘﺎﻳﯩﻦ ﻗﻮﭘﺎﻝ ﺑﻮﻟﯘﭖ، ﺋﯘ ﻳﯧﯖﯩﺴﺎﺭﺩﺍ ﺋﺎﭘﻪﺕ ﻳﯜﺯ ﺑﻪﺭﮔﻪﻧﻠﯩﻚ ﺋﻪﻫﯟﺍﻟﻨﻰ ﺭﻩﺕ ﻗﯩﻠﯩﭙﻼ ﻗﺎﻟﻤﺎﻱ، ﺑﺎﺷﻘﺎ ﺳﻮﺋﺎﻟﻠﯩﺮﯨﻤﯩﺰﻏﺎ ﺟﺎﯞﺍﺏ ﺑﯧﺮﯨﺸﻨﻰ ﺧﺎﻟﯩﻤﺎﻱ ﺗﯧﻠﯧﻔﻮﻧﻨﻰ ﻗﻮﻳﯘﯞﻩﺗﺘﻰ.

- ﯞﻩﻱ - ﯞﻩﻱ ﻳﺎﺧﺸﯩﻤﯘ ﺳﯩﺰ؟ - ﻳﯧﯖﯩﺴﺎﺭ ﻧﺎﻫﯩﻴﯩﺴﯩﻤﯘ؟ - ﻧﯧﻤﻪ؟ - ﺑﯘ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻜﻰ ﺋﯩﺪﺍﺭﯨﺴﯩﻤﯘ؟ - ﻧﯧﻤﻪ ﺋﯩﺸﯩﯔ ﺑﺎﺭ؟ - ﺳﯩﻠﻪﺭﻧﯩﯔ ﻧﺎﻫﯩﻴﯩﺪﻩ ﻗﺎﺭ ﺋﺎﭘﺘﻰ ﻳﯜﺯ ﺑﻪﺭﮔﻪﻥ ﺋﻪﻣﻪﺳﻤﯩﺪﻯ. ﺷﯘ ﺋﻪﻫﯟﺍﻟﻨﻰ ﺋﯩﮕﯩﻠﻪﭖ ﺑﺎﻗﺎﻱ ﺩﯦﮕﻪﻥ ﺋﯩﺪﯨﻢ. - ﻧﻪﺩﻩ ﻗﺎﺭ ﺋﺎﭘﯩﺘﻰ ﻳﯜﺯ ﺑﻪﺭﺳﯘﻥ! ﺳﻪﻥ ﻗﻪﻳﻪﺭﺩﯨﻦ ﺗﯧﻠﯧﻔﯘﻥ ﻗﯩﻠﯩﯟﺍﺗﯩﺴﻪﻥ. ﻧﯧﻤﻪ ﺋﯩﺶ ﻗﯩﻠﯩﺪﯨﻐﺎﻥ ﻧﯧﻤﻪ ﺳﻪﻥ؟ ﺳﻪﻥ ﻛﯩﻢ؟ - ﻣﻪﻥ ﺋﻪﺭﻛﯩﻦ ﺋﺎﺳﯩﻴﺎ ﺭﺍﺩﯨﺌﻮﺳﯩﻨﯩﯔ ﻣﯘﺧﺒﯩﺮﻯ. - ﺳﻪﻥ ﻫﺎﺯﯨﺮ ﻗﻪﻳﻪﺭﺩﻩ؟ - ﻣﻪﻥ ﻫﺎﺯﯨﺮ ﺋﺎﻣﯧﺮﯨﻜﯩﺪﺍ. - ﺋﯩﺴﻤﯩﯔ ﻧﯧﻤﻪ؟ - ﺑﯘﻧﯩﯔ ﺳﯩﺰ ﺑﯩﻠﻪﻥ ﻧﯧﻤﻪ ﺋﺎﻻﻗﯩﺴﻰ؟ - ﺗﯧﻠﯧﻔﻮﻧﻨﻰ ﺧﺎﺗﺎ ﺋﯘﺭﯗﭖ ﻗﺎﭘﺴﻪﻥ.

ﺋﯘﻳﻐﯘﺭ ﻳﺎﺵ: " ﺩﯦﻬﻘﺎﻧﻼﺭﻧﯩﯔ ﺋﯩﺴﺴﯩﻨﯩﺶ ﻣﻪﺳﯩﻠﯩﺴﻰ ﻫﻪﻝ ﺑﻮﻟﻤﯩﺪﻯ"

ﻫﺎﻟﺒﯘﻛﻰ، ﺋﺎﭘﻪﺕ ﺭﺍﻳﻮﻧﯩﺪﯨﻜﻰ ﺑﯩﺮ ﺋﯘﻳﻐﯘﺭ ﻳﺎﺷﻨﯩﯔ ﺑﯩﻠﺪﯛﺭﯛﺷﯩﭽﻪ، ﺋﺎﭘﻪﺕ ﺧﯧﻠﻰ ﺋﯧﻐﯩﺮ ﺑﻮﻟﻐﺎﻥ ﺑﻮﻟﯘﭖ، ﻣﻪﺯﻛﯘﺭ ﻳﺎﺵ ﭘﯜﺗﯜﻥ ﻧﺎﻫﯩﻴﻪ ﻧﻮﭘﯘﺳﯩﻨﯩﯔ 20 ﭘﯩﺮﺳﻪﻧﺘﻰ ﻗﺎﺭ ﺋﺎﭘﯩﺘﯩﻨﯩﯔ ﺑﯩﯟﺍﺳﺘﻪ ﺯﯨﻴﯩﻨﯩﻐﺎ ﺋﯘﭼﺮﯨﻐﺎﻥ ﺑﻮﻟﯘﺷﻰ ﻣﯘﻣﻜﯩﻨﻠﯩﻜﯩﻨﻰ ﺗﻪﺧﻤﯩﻦ ﻗﯩﻠﺪﻯ.

ﻗﻪﺷﻘﻪﺭ ﻫﯚﻛﯜﻣﯩﺘﯩﻨﯩﯔ ﺗﻮﺭ ﺑﻪﺗﻠﯩﺮﯨﺪﻩ، ﻫﺎﺯﯨﺮ ﻫﯚﻛﯜﻣﻪﺗﻨﯩﯔ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻐﺎ ﺟﯩﺪﺩﯨﻲ ﻛﯚﯕﯜﻝ ﺑﻮﻟﯘﭖ، 1- ﺋﺎﻳﻨﯩﯔ 30 - ﻛﯜﻧﯩﮕﯩﭽﻪ 11 ﻣﯩﻠﻴﻮﻥ ﻳﯜﻩﻧﺪﯨﻦ ﺋﺎﺭﺗﯘﻕ ﻗﯘﺗﻘﯘﺯﯗﺵ ﻣﻪﺑﻠﯩﻐﻰ ﺋﺎﺟﺮﯨﺘﯩﭗ 440 ﻣﯩﯔ ﺋﺎﺩﻩﻣﮕﻪ ﻗﯘﺗﻘﯘﺯﯗﺵ ﺑﻪﺭﮔﻪﻧﻠﯩﻜﯩﻨﻰ "ﻗﻪﺷﻘﻪﺭ ﯞﯨﻼﻳﯩﺘﯩﻨﯩﯔ ﺋﯜﻧﯜﻣﻠﯜﻙ ﺗﻪﺩﺑﯩﺮﻟﻪﺭﻧﻰ ﻗﻮﻟﻠﯩﻨﯩﭗ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻨﻰ ﻛﻪﯓ ﻗﺎﻧﺎﺕ ﻳﺎﻳﺪﯗﺭﻏﺎﻥ" ﻟﯩﻘﻰ ﺧﻪﯞﻩﺭ ﻗﯩﻠﯩﻨﺪﻯ. ﺋﻪﻣﻤﺎ، ﺋﺎﭘﻪﺕ ﺭﺍﻳﻮﻧﯩﺪﯨﻜﻰ ﺑﯘ ﺋﯘﻳﻐﯘﺭ ﻳﺎﺷﻨﯩﯔ ﺑﯩﻠﺪﯛﺭﯛﺷﯩﭽﻪ، ﻫﯚﻛﯜﻣﻪﺗﻨﯩﯔ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﻯ ﺋﺎﻧﭽﻪ ﻳﯧﺘﻪﺭﻟﯩﻚ ﺑﻮﻟﻤﯩﻐﺎﻥ ﺑﻮﻟﯘﭖ، ﻳﯧﯖﯩﺴﺎﺭ ﻧﺎﻫﯩﻴﯩﺴﯩﺪﻩ ﻳﻪﻧﻪ ﻧﯘﺭﻏﯘﻥ ﺩﯦﻬﻘﺎﻧﻼﺭﻧﯩﯔ ﺋﯩﺴﺴﯩﻨﯩﺶ ﻣﻪﺳﯩﻠﯩﺴﻰ ﻫﻪﻝ ﺑﻮﻟﻤﯩﻐﺎﻥ.

300 ﻣﯩﯖﻐﺎ ﻳﯧﻘﯩﻦ ﺋﯘﻳﻐﯘﺭ ﺧﻪﻟﻘﯩﻨﯩﯔ ﺋﺎﯞﺍﺯﻯ ﺋﺎﻧﭽﻪ ﻛﯚﭖ ﺩﺍﯞﺭﺍﯓ ﭘﻪﻳﺪﺍ ﻗﯩﻼﻟﻤﯩﺪﻯ

ﺑﯘ ﻗﺎﺭ ﺋﺎﭘﯩﺘﻰ ﺋﯘﻳﻐﯘﺭ ﺋﯧﻠﯩﻨﯩﯔ ﻫﻪﻣﻤﻪ ﺟﺎﻳﻠﯩﺮﯨﺪﺍ ﺋﻮﺧﺸﯩﻤﯩﻐﺎﻥ ﺩﻩﺭﯨﺠﯩﺪﻩ ﻳﯜﺯ ﺑﻪﺭﮔﻪﻥ ﺑﻮﻟﯘﭖ، ﺋﻪﻣﻤﺎ ﺑﯘ ﺧﯩﻞ ﺋﺎﭘﻪﺕ ﺟﻪﻧﯘﺑﯩﻲ ﺋﯘﻳﻐﯘﺭ ﺋﯧﻠﯩﺪﻩ ﺗﯧﺨﯩﻤﯘ ﺋﯧﻐﯩﺮ ﺑﻮﻟﻐﺎﻥ ﺑﻮﻟﯘﭖ، ﺷﯩﻨﺠﺎﯓ ﮔﯧﺰﯨﺘﯩﺪﻩ ﻛﯚﺭﺳﯩﺘﯩﺸﯩﭽﻪ، ﺟﻪﻧﯘﺑﯩﻲ ﺋﯘﻳﻐﯘﺭ ﺋﯧﻠﯩﺪﻩ ﻗﺎﺭ ﺋﺎﭘﯩﺘﻰ ﺑﯩﯟﺍﺳﺘﻪ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﺋﯩﻘﺘﯩﺴﺎﺩﻯ ﺯﯨﻴﺎﻥ 87 ﻣﯩﻠﻴﻮﻥ ﻳﯜﻩﻧﺪﯨﻦ ﺋﺎﺭﺗﯘﻕ، ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺋﺎﺩﻩﻡ 300 ﻣﯩﯖﻐﺎ ﻳﯧﻘﯩﻦ ﺑﻮﻟﻐﺎﻥ.

ﻗﺎﺭﺍﻳﺪﯨﻐﺎﻥ ﺑﻮﻟﺴﺎﻕ، ﺧﯩﺘﺎﻳﻨﯩﯔ ﺑﺎﺷﻘﺎ ﺟﺎﻳﻠﯩﺮﯨﺪﯨﻜﻰ ﻗﺎﺭ ﺋﺎﭘﻪﺗﻠﯩﺮﯨﻨﯩﯔ ﺩﺍﯞﺭﯨﯖﻰ ﺧﯩﺘﺎﻱ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﻣﻪﺗﺒﯘﺋﺎﺗﻼﺭﺩﺍ ﺧﯧﻠﻰ ﻛﻮﭖ ﺑﯧﺮﯨﻠﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺟﻪﻧﯘﺑﯩﻲ ﺋﯘﻳﻐﯘﺭ ﺋﯧﻠﯩﺪﻩ ﺋﺎﭘﻪﺗﻜﻪ ﺋﯘﭼﺮﯨﻐﺎﻥ 300ﻣﯩﯖﻐﺎ ﻳﯧﻘﯩﻦ ﺋﯘﻳﻐﯘﺭ ﺧﻪﻟﻘﯩﻨﯩﯔ ﺋﺎﯞﺍﺯﻯ ﻣﻪﻳﻠﻰ ﺧﯩﺘﺎﻱ ﺋﯩﭽﯩﺪﯨﻜﻰ ﺋﺎﺧﺒﺎﺭﺍﺕ ﯞﺍﺳﯩﺘﯩﻠﯩﺮﯨﺪﺍ ﺑﻮﻟﺴﯘﻥ، ﺋﺎﻧﭽﻪ ﻛﯚﭖ ﺩﺍﯞﺭﺍﯓ ﭘﻪﻳﺪﺍ ﻗﯩﻼﻟﻤﯩﺪﻯ.

ﺋﯩﻠﺸﺎﺕ ﺋﻪﭘﻪﻧﺪﻯ: " ﺧﯩﺘﺎﻱ ﺑﯘ ﺭﺍﻳﻮﻧﻐﺎ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﯩﯔ ﺩﯨﻘﻘﻪﺕ ﻧﻪﺯﯨﺮﯨﻨﻰ ﻗﺎﺭﯨﺘﯩﺸﯩﺪﯨﻦ ﺋﻪﻧﺴﯩﺮﻩﻳﺪﯗ"

ﺋﯘﻳﻐﯘﺭ ﺳﯩﻴﺎﺳﯩﻲ ﻛﯚﺯﻩﺗﭽﻰ ﺋﯩﻠﺸﺎﺕ ﺋﻪﭘﻪﻧﺪﻯ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﯩﺪﻩ ﻳﯜﺯ ﺑﻪﺭﮔﻪﻥ ﺋﺎﭘﻪﺕ ﺋﻪﻫﯟﺍﻟﯩﻐﺎ ﻗﺎﺭﯨﺘﺎ ﺋﺎﺧﺒﺎﺭﺍﺕ ﻛﻮﻧﺘﺮﻭﻝ ﻗﯩﻠﯩﺶ ﺳﯩﻴﺎﺳﯩﺘﯩﻨﻰ ﻗﻮﻟﻠﯩﻨﯩﭗ ﺑﯘ ﻫﻪﻗﺘﻪ ﻛﯚﭖ ﺋﯘﭼﯘﺭ ﺑﻪﺭﻣﻪﺳﻠﯩﻜﯩﺪﯨﻜﻰ ﺳﻪﯞﻩﺏ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﻫﺎﺯﯨﺮ ﺋﯘﻳﻐﯘﺭ ﺋﯩﻠﻰ ﺋﻪﻫﯟﺍﻟﯩﻨﯩﯔ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﺘﻪ ﺑﯩﺮ ﻗﯩﺰﯨﻖ ﻧﯘﻗﺘﺎ ﺋﯩﻜﻪﻧﻠﯩﻜﯩﻨﻰ، ﺷﯘ ﻧﯘﻗﺘﯩﺪﯨﻦ ﺋﯧﻠﯩﭗ ﺋﯧﻴﺘﻘﺎﻧﺪﯨﻤﯘ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯘ ﺭﺍﻳﻮﻧﻐﺎ ﻧﯩﺴﺒﻪﺗﻪﻥ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﯩﯔ ﺩﯨﻘﻘﻪﺕ ﻧﻪﺯﯨﺮﯨﻨﻰ ﻳﻪﻧﯩﻤﯘ ﺋﯩﭽﻜﯩﺮﯨﻠﻪﭖ ﺋﺎﻏﺪﯗﺭﯗﺷﯩﺪﯨﻦ ﺋﻪﻧﺴﯩﺮﻩﻳﺪﯨﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ.

ﺋﯘ ﺋﺎﺧﯩﺮﯨﺪﺍ ﻳﻪﻧﻪ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯩﻠﯩﺪﯨﻜﻰ ﻗﺎﺭ ﺋﺎﭘﯩﺘﯩﮕﻪ ﺋﺎﻧﭽﻪ ﺋﯧﺮﻩﻧﺴﯩﺰ ﻣﯘﺋﺎﻣﯩﻠﻪ ﻗﯩﻠﯩﺸﯩﺪﯨﻜﻰ ﺳﻪﯞﻩﺏ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺑﯘﻧﻰ ﺧﯩﺘﺎﻳﻨﯩﯔ ﺋﺎﻳﺮﯨﻤﯩﭽﯩﻠﯩﻖ ﺳﯩﻴﺎﺳﯩﺘﯩﻨﯩﯔ ﺑﯩﺮ ﻗﯩﺴﻤﻰ ﺩﻩﭖ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ، ﮔﻪﺭﭼﻪ ﺧﯩﺘﺎﻱ ﺋﯘﻳﻐﯘﺭ ﺋﯧﻠﯩﻨﻰ ﺋﯚﺯ ﺯﯦﻤﯩﻨﻰ ﺩﻩﭖ ﺋﯧﻼﻥ ﻗﯩﻠﯩﭗ ﻛﯧﻠﯩﯟﺍﺗﻘﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﻣﯘﺷﯘﻧﺪﺍﻕ ﻧﯧﮕﯩﺰﻟﯩﻚ ﻣﻪﻧﭙﻪﺋﻪﺕ ﻣﻪﺳﯩﻠﯩﺴﯩﺪﻩ ﺩﺍﯞﺍﻣﻠﯩﻖ ﺋﯘﻳﻐﯘﺭ ﺋﯩﻠﻰ ﺧﻪﻟﻘﯩﻐﻪ ﺋﺎﻳﺮﯨﻢ ﻣﯘﺋﺎﻣﯩﻠﯩﺪﻩ ﺑﻮﻟﯘﭖ ﻛﻪﻟﮕﻪﻧﻠﯩﻜﯩﻨﻰ ﻗﻮﺷﯘﻣﭽﻪ ﻗﯩﻠﺪﻯ. (ﺟﯜﻣﻪ)