ﻛﺎﻟﯩﻔﻮﺭﻧﯩﻴﯩﺪﻩ ﺋﯚﺗﻜﯜﺯﯛﻟﮕﻪﻥ ﺋﯘﻳﻐﯘﺭ ﻣﻪﺩﻩﻧﯩﻴﻪﺕ ﻛﯧﭽﯩﻠﯩﻜﻰ ﺟﻪﺭﻳﺎﻧﯩﺪﯨﻜﻰ ﺳﯚﻫﺒﻪﺗﻠﻪﺭ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

27 - ﺋﯚﻛﺘﻪﺑﯩﺮ ﺑﯧﺮﻛﯧﻠﯩﻲ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﯚﺗﻜﯜﺯﯛﻟﮕﻪﻥ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﻰ ﺗﻪﺑﺮﯨﻜﻠﻪﺵ ﭘﺎﺋﺎﻟﯩﻴﯩﺘﻰ. RFA Photo / Jume

27 - ﺋﯚﻛﺘﻪﺑﯩﺮ ﺑﯧﺮﻛﯧﻠﯩﻲ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﯚﺗﻜﯜﺯﯛﻟﮕﻪﻥ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﻰ ﺗﻪﺑﺮﯨﻜﻠﻪﺵ ﭘﺎﺋﺎﻟﯩﻴﯩﺘﻰ ﺷﯘ ﻛﯜﻧﻰ ﻛﻪﭼﻘﯘﺭﯗﻥ ﺳﺎﺋﻪﺕ 6 ﺩﻩ ﺑﺎﺷﻠﯩﻨﯩﭗ ﻛﻪﭺ ﺳﺎﺋﻪﺕ 11 ﻟﻪﺭ ﺋﻪﺗﺮﺍﭘﯩﺪﺍ ﺋﺎﻳﺎﻏﻼﺷﺘﻰ.

ﻣﻪﻟﯘﻡ ﺑﻮﻟﯘﺷﯩﭽﻪ، ﺑﯘ ﭘﺎﺋﺎﻟﯩﻴﻪﺕ ﺑﯧﺮﻛﯧﻠﯩﻲ ﺷﻪﻫﯩﺮﻯ ﺋﻪﺗﺮﺍﭘﯩﺪﺍ ﯞﻩ ﺳﺎﻥ ﻓﺮﺍﻧﺴﯩﺴﻜﻮﺩﺍ ﻣﻪﻟﯘﻡ ﺩﻩﺭﯨﺠﯩﺪﻩ ﻏﯘﻟﻐﯘﻻ ﻗﻮﺯﻏﯩﻐﺎﻥ ﺑﻮﻟﯘﭖ، ﺑﯘ ﭘﺎﺋﺎﻟﯩﻴﻪﺕ ﯞﻩ ﻣﻪﺯﻛﯘﺭ ﭘﺎﺋﺎﻟﯩﻴﻪﺗﺘﻪ ﺗﻮﻧﯘﺷﺘﯘﺭﯗﻟﻐﺎﻥ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﯞﻩ ﺋﯘﻳﻐﯘﺭﻻﺭﻧﯩﯔ ﻛﯩﻤﻠﯩﻜﻰ ﻫﻪﻗﻘﯩﺪﻩ ﺳﺎﻥ ﻓﺮﺍﻧﺴﯩﺴﻜﻮﺩﯨﻜﻰ ﻧﻮﭘﯘﺯﻟﯘﻕ ﮔﯧﺰﯨﺖ ﺳﺎﻥ ﻓﺮﺍﻧﺴﯩﺴﻜﻮ ﻛﻮﺭﻭﻧﯩﻜﻮﻝ ﮔﯧﺰﯨﺘﯩﺪﻩ ﻣﺎﻗﺎﻟﻪ ﺋﯧﻼﻥ ﻗﯩﻠﯩﻨﻐﺎﻥ.

ﺋﯘﻳﻐﯘﺭ ﺳﻪﻧﺌﻪﺗﻜﺎﺭﻻﺭﻧﯩﯔ ﻳﯘﻗﯩﺮﻯ ﺳﻪﻧﺌﻪﺕ ﻣﺎﻫﺎﺭﯨﺘﻰ ﻣﻪﺯﻛﯘﺭ ﭘﺎﺋﺎﻟﯩﻴﻪﺗﻜﻪ ﺗﯧﺨﯩﻤﯘ ﻗﺎﻳﻨﺎﻕ ﺗﯜﺱ ﻗﻮﺷﺘﻰ

ﺑﯧﺮﻛﯧﻠﯩﻲ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﯚﺗﻜﯜﺯﯛﻟﮕﻪﻥ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﻰ ﺗﻪﺑﺮﯨﻜﻠﻪﺵ ﭘﺎﺋﺎﻟﯩﻴﯩﺘﯩﻨﯩﯔ ﺋﯘﺗﯘﻗﻠﯘﻕ ﺑﻮﻟﯘﺷﯩﺪﺍ ﺋﺎﻻﻫﯩﺪﻩ ﺗﯩﻠﻐﺎ ﺋﯧﻠﯩﺸﻘﺎ ﺋﻪﺭﺯﯨﻴﺪﯨﻐﺎﻥ ﺋﯩﺸﻼﺭ ﺋﯩﭽﯩﺪﻩ، ﺩﯗﻧﻴﺎﻧﯩﯔ ﻫﻪﺭﻗﺎﻳﺴﻰ ﺟﺎﻳﻠﯩﺮﯨﺪﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﺳﻪﻧﺌﻪﺗﻜﺎﺭﻻﺭﻧﯩﯔ ﻳﯘﻗﯩﺮﻯ ﺳﻪﯞﯨﻴﻪ ﺑﯩﻠﻪﻥ ﺋﻮﺭﯗﻧﻠﯩﻐﺎﻥ ﻫﻪﺭ ﺗﯜﺭﻟﯜﻙ ﺳﻪﻧﺌﻪﺕ ﻧﻮﻣﯘﺭﻟﯩﺮﻯ ﯞﻩ ﺑﻪﺩﯨﺌﯩﻴﻠﯩﻜﻰ ﺋﯩﻨﺘﺎﻳﯩﻦ ﻳﯘﻗﯩﺮﻯ ﮔﯜﺯﻩﻝ ﺳﻪﻧﺌﻪﺕ ﺋﻪﺳﻪﺭﻟﯩﺮﻯ ﻣﯘﻫﯩﻢ ﺋﻮﺭﯗﻥ ﺗﯘﺗﯩﺪﯨﻐﺎﻥ ﺑﻮﻟﯘﭖ، ﺳﻪﻧﺌﻪﺗﻜﺎﺭﻻﺭ ﺋﯚﺯﯨﻨﯩﯔ ﻳﯘﻗﯩﺮﻯ ﺩﻩﺭﯨﺠﯩﺪﯨﻜﻰ ﺳﻪﻧﺌﻪﺕ ﻣﺎﻫﺎﺭﯨﺘﻰ ﺋﺎﺭﻗﯩﻠﯩﻖ ﻣﻪﺯﻛﯘﺭ ﭘﺎﺋﺎﻟﯩﻴﻪﺗﻜﻪ ﺗﯧﺨﯩﻤﯘ ﻗﺎﻳﻨﺎﻕ ﯞﻩ ﮔﯜﺯﻩﻝ ﺗﯜﺱ ﻗﻮﺷﺘﻰ.

ﻫﺎﺯﯨﺮ ﻓﺮﺍﻧﺴﯩﻴﯩﺪﻩ ﺋﯧﺘﻨﯩﻚ ﻣﯘﺯﯨﻜﺎ ﺋﯩﻠﻤﻰ ﺗﻪﺗﻘﯩﻘﺎﺗﻰ ﺑﯩﻠﻪﻥ ﺷﯘﻏﯘﻟﻠﯩﻨﯩﯟﺍﺗﻘﺎﻥ ﻣﯘﻗﻪﺩﺩﻩﺱ ﻣﯩﺠﯩﺖ ﺋﻮﺭﯗﻧﻠﯩﻐﺎﻥ ﻟﻪﺭﺯﺍﻥ ﺋﯘﻳﻐﯘﺭ ﺋﯘﺳﯘﻟﻰ ﺗﺎﻣﺎﺷﯩﺒﯩﻨﻼﺭﻧﯩﯔ ﺩﯨﻘﻘﯩﺘﯩﻨﻰ ﺋﺎﻻﻫﯩﺪﻩ ﺟﻪﻟﭗ ﻗﯩﻠﺪﻯ.

ﺋﯘﻳﻐﯘﺭ ﺭﻩﺳﺴﺎﻣﻰ ﻣﻪﺭﯞﺍﻳﯩﺖ ﺧﺎﻧﯩﻢ: " ﺋﯘﻳﻐﯘﺭﻻﺭﻧﻰ ﺗﻮﻧﯘﺷﺘﯘﺭﯗﺷﺘﺎ ﻫﻪﺭﻗﺎﻧﺪﺍﻕ ﭘﯘﺭﺳﻪﺗﻨﻰ ﻗﻮﻟﺪﯨﻦ ﺑﯧﺮﯨﭗ ﻗﻮﻳﯘﺷﻘﺎ ﺑﻮﻟﻤﺎﻳﺪﯗ"

ﺑﯘ ﭘﺎﺋﺎﻟﯩﻴﻪﺗﻜﻪ ﮔﯧﺮﻣﺎﻧﯩﻴﯩﺪﯨﻦ ﻛﯧﻠﯩﭗ ﻗﺎﺗﻨﺎﺷﻘﺎﻥ ﺳﻪﻧﺌﻪﺗﻜﺎﺭﻻﺭ ﺋﯩﭽﯩﺪﻩ، ﮔﯧﺮﻣﺎﻧﯩﻴﯩﺪﻩ ﻛﻮﭖ ﻗﯧﺘﯩﻢ ﮔﯜﺯﻩﻝ ﺳﻪﻧﺌﻪﺕ ﻛﯚﺭﮔﻪﺯﻣﯩﺴﻰ ﺋﺎﭼﻘﺎﻥ ﯞﻩ ﺗﻮﻧﯘﻟﻐﺎﻥ ﺋﯘﻳﻐﯘﺭ ﺭﻩﺳﺴﺎﻣﻰ ﻣﻪﺭﯞﺍﻳﯩﺖ ﺧﺎﻧﯩﻤﻤﯘ ﺑﺎﺭ ﺑﻮﻟﯘﭖ، ﺋﯘ ﺋﻪﺳﻪﺭﻟﯩﺮﯨﻨﻰ ﺋﯧﻠﯩﭗ ﻛﯧﻠﯩﭗ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﯩﯔ ﮔﯜﺯﻩﻝ ﺳﻪﻧﺌﻪﺗﺘﯩﻦ ﺋﯩﺒﺎﺭﻩﺕ ﻳﻪﻧﻪ ﺑﯩﺮ ﻳﺎﺭﻗﯩﻦ ﯞﺍﺭﯨﻴﺎﻧﺘﯩﻨﻰ ﭘﺎﺋﺎﻟﯩﻴﻪﺕ ﻗﺎﺗﻨﺎﺷﻘﯘﭼﯩﻠﯩﺮﯨﻐﺎ ﻧﺎﻣﺎﻳﺎﻥ ﻗﯩﻠﺪﻯ.

ﻣﻪﺭﯞﺍﻳﯩﺖ ﺧﺎﻧﯩﻢ ﺋﯚﺯﯨﻨﯩﯔ ﺷﯘﻧﭽﻪ ﻳﯩﺮﺍﻗﺘﯩﻦ ﻛﯧﻠﯩﭗ ﺑﯘ ﭘﺎﺋﺎﻟﯩﻴﻪﺗﻜﻪ ﻗﺎﺗﻨﯩﺸﯩﺸﯩﻨﯩﯔ ﺳﻪﯞﻩﺑﯩﻨﻰ ﭼﯜﺷﻪﻧﺪﯛﺭﯛﭖ، ﺋﯘﻳﻐﯘﺭﻻﺭﻧﻰ ﺗﻮﻧﯘﺷﺘﯘﺭﯗﺵ ﺋﯜﭼﯜﻥ ﻣﻪﻳﻠﻰ ﺑﯩﺮ ﺳﺎﺋﻪﺕ ﯞﻩ ﻣﻪﻳﻠﻰ ﺑﯩﺮ ﻣﯩﻨﯘﺗﻠﯘﻕ ﺑﻮﻟﺴﯘﻥ ﻫﻪﺭﻗﺎﻧﺪﺍﻕ ﭘﯘﺭﺳﻪﺗﻨﻰ ﻗﻮﻟﺪﯨﻦ ﺑﯧﺮﯨﭗ ﻗﻮﻳﯘﺷﻘﺎ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺭﻩﻫﯩﻤﻪ ﺩﻭﻻﻥ: "ﺋﯚﺯﯛﻡ ﭘﻪﺧﯩﺮﻟﯩﻨﯩﺪﯨﻐﺎﻥ ﻣﻪﺩﻩﻧﯩﻴﻪﺗﻨﻰ ﺑﺎﺷﻘﯩﻼﺭﻏﺎ ﺗﻮﻧﯘﺷﺘﯘﺭﯗﺷﻨﻰ ﺋﻮﻳﻠﯩﺪﯨﻢ"

ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ ﻣﻪﻟﯘﻡ ﺳﻪﯞﻩﻧﻠﯩﻜﻠﻪﺭ ﺳﺎﺩﯨﺮ ﺑﻮﻟﻐﺎﻧﻠﯩﻘﯩﻨﻰ ﺋﻪﻣﻤﺎ ﭘﺎﺋﺎﻟﯩﻴﻪﺗﻨﯩﯔ ﺋﻮﻣﯘﻣﯩﻲ ﺟﻪﻫﻪﺗﺘﯩﻦ ﺋﯘﺗﯘﻗﻠﯘﻕ ﺑﻮﻟﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ، ﺑﯧﺮﻛﯧﻠﯩﻲ ﺋﯘﻧﯩﯟﯦﺮﺳﯩﺘﯧﺘﻨﯩﯔ ﺋﻮﻗﯘﻏﯘﭼﯩﺴﻰ ﯞﻩ ﻣﯘﺷﯘ ﭘﺎﺋﺎﻟﯩﻴﻪﺗﻨﻰ ﺑﺎﺵ ﺑﻮﻟﯘﭖ ﺋﻮﺭﯗﻧﻼﺷﺘﯘﺭﻏﯘﭼﯩﻼﺭﻧﯩﯔ ﺑﯩﺮﻯ ﺑﻮﻟﻐﺎﻥ ﺭﻩﻫﯩﻤﻪ ﺩﻭﻻﻥ، ﭘﺎﺋﺎﻟﯩﻴﻪﺗﻨﻰ ﺋﻮﺭﯗﻧﻼﺷﺘﯘﺭﯗﺵ ﺟﻪﺭﻳﺎﻧﯩﺪﺍ ﻳﻮﻟﯘﻗﻘﺎﻥ ﻫﻪﺭﺧﯩﻞ ﻣﻪﺳﯩﻠﯩﻠﻪﺭﮔﻪ ﻗﺎﺭﯨﻤﺎﻱ، ﺋﺎﺧﯩﺮﻏﯩﭽﻪ ﺑﻪﺭﺩﺍﺷﻠﯩﻖ ﺑﯧﺮﯨﭗ ﭘﺎﺋﺎﻟﯩﻴﻪﺗﻨﻰ ﯞﯗﺟﯘﺩﻗﺎ ﭼﯩﻘﯩﺮﯨﺸﻘﺎ ﺳﻪﯞﻩﺏ ﺑﻮﻟﻐﺎﻥ ﺋﺎﻣﯩﻠﻨﯩﯔ ﻧﯧﻤﻪ ﺋﯩﻜﻪﻧﻠﯩﻜﯩﮕﻪ ﺟﺎﯞﺍﺏ ﺑﯧﺮﯨﭗ "ﺋﻪﻗﻪﻟﻠﯩﻴﺴﻰ ﺋﯘﻳﻐﯘﺭﻧﯩﯔ ﻛﯩﻤﻠﯩﻜﯩﻨﻰ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﺋﺎﺭﻗﯩﻠﯩﻖ ﺋﺎﻣﯧﺮﯨﻜﺎ ﺧﻪﻟﻘﯩﮕﻪ ﺗﻮﻧﯘﺗﯘﺵ" ﺩﻩﭖ ﺟﺎﯞﺍﺏ ﺑﻪﺭﺩﻯ.

ﺋﺎﻟﯩﻢ ﺳﯧﻴﯩﺘﻮﻑ: "ﺋﯘﻳﻐﯘﺭ ﺋﯧﻠﯩﻨﻰ ﺷﯩﻨﺠﺎﯓ ﺩﻩﭖ ﺋﺎﺗﺎﺵ ﺑﯩﺮ ﻧﻮﻣﯘﺳﺴﯩﺰﻟﯩﻖ"

ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﯩﻨﯩﯔ ﺑﺎﺵ ﻛﺎﺗﯩﭙﻰ ﺋﺎﻟﯩﻢ ﺳﯧﻴﯩﺘﻮﻓﻤﯘ ﻣﻪﺯﻛﯘﺭ ﭘﺎﺋﺎﻟﯩﻴﻪﺗﻜﻪ ﻗﺎﺗﻨﺎﺷﻘﺎﻥ ﺑﻮﻟﯘﭖ، ﺋﯘ، ﮔﻪﺭﭼﻪ ﺑﯘ ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ ﺑﻪﺯﻯ ﺳﻪﯞﻩﻧﻠﯩﻜﻠﻪﺭ ﺳﺎﺩﯨﺮ ﺑﻮﻟﻐﺎﻥ ﺑﻮﻟﺴﯩﻤﯘ، ﭘﺎﺋﺎﻟﯩﻴﻪﺗﻨﯩﯔ ﺋﻮﻣﯘﻣﻰ ﺟﻪﻫﻪﺗﺘﯩﻦ ﻳﺎﺧﺸﻰ ﻛﻪﻳﭙﯩﻴﺎﺗﺘﺎ ﺋﯧﻠﯩﭗ ﺑﯧﺮﯨﻠﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺋﻪﻣﻤﺎ ﺋﯘ ﻳﻪﻧﻪ، ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ ﺳﺎﺩﯨﺮ ﺑﻮﻟﻐﺎﻥ ﺋﺎﺗﺎﻟﻐﯘ ﺟﻪﻫﻪﺗﺘﯩﻜﻰ ﺧﺎﺗﺎﻟﯩﻘﻼﺭﻏﺎ ﺋﯩﺰﺍﻫﺎﺕ ﺑﯧﺮﯨﭗ، ﺋﯘﻳﻐﯘﺭ ﺋﯧﻠﯩﻨﻰ " ﺷﯩﻨﺠﺎﯓ" ﺩﻩﭖ ﺋﺎﺗﺎﺷﻨﯩﯔ ﺗﺎﺭﯨﺨﻰ ﺟﻪﻫﻪﺗﺘﯩﻦ ﺧﺎﺗﺎ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﯞﻩ ﺑﯘﻧﯩﯔ ﺑﯩﺮ ﻧﻮﻣﯘﺳﺴﯩﺰﻟﯩﻖ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﺪﻯ. ﺋﺎﻟﯩﻢ ﺳﯧﻴﯩﺘﻮﻑ ﻳﻪﻧﻪ، ﺋﻪﮔﻪﺭ ﺑﯘﻧﺪﯨﻦ ﻛﯩﻴﯩﻦ ﺋﯧﻠﯩﭗ ﺑﯧﺮﯨﻠﯩﺪﯨﻐﺎﻥ ﻣﯘﺷﯘ ﺧﯩﻠﺪﯨﻜﻰ ﭘﺎﺋﺎﻟﯩﻴﻪﺗﻠﻪﺭﮔﻪ ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﻰ ﻳﯧﻘﯩﻨﺪﯨﻦ ﻛﯚﺯﯨﺘﯩﺶ ﺋﯧﻠﯩﭗ ﺑﺎﺭﻏﺎﻧﺪﯨﻦ ﺳﯩﺮﺕ، ﻣﻪﻳﻠﻰ ﻗﺎﻳﺴﻰ ﺟﻪﻫﻪﺗﺘﯩﻦ ﺑﻮﻟﺴﯘﻥ ﺋﯚﺯ ﻳﺎﺭﺩﯨﻤﯩﻨﻰ ﺋﺎﻳﯩﻤﺎﻳﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺩﻭﻛﺘﯘﺭ ﻟﯩﻠﯩﻴﺎﻥ: "ﺑﯩﺰ ﺑﯩﺮﻣﯘ ﺑﺎﻳﺮﺍﻕ ﺋﺎﺳﻤﯩﺪﯗﻕ، ﭼﯜﻧﻜﻰ ﺑﯩﺰ ﺑﯩﺮ ﺩﯙﻟﻪﺗﻨﻰ ﺋﻪﻣﻪﺱ، ﺑﻪﻟﻜﻰ ﻣﻪﺩﻩﻧﯩﻴﻪﺗﻨﻰ ﺗﻪﺑﺮﯨﻜﻠﻪﻳﻤﯩﺰ"

ﺋﯘﻧﯩﯖﺪﯨﻦ ﺑﺎﺷﻘﺎ، ﺑﯘ ﭘﺎﺋﺎﻟﯩﻴﻪﺗﻜﻪ ﻗﺎﺗﻨﺎﺷﻘﯘﭼﯩﻼﺭﻧﯩﯔ ﺑﯩﺮﻯ ﺑﻮﻟﻐﺎﻥ، ﻫﺎﺯﯨﺮ ﻛﺎﻟﯩﻔﻮﺭﻧﯩﻴﯩﺪﻩ ﻳﺎﺷﺎﯞﺍﺗﻘﺎﻥ ﺋﺎﺩﯨﻞ ﺋﺎﺗﺎﯞﯗﻟﻼ ﺋﻪﭘﻪﻧﺪﻯ ﺑﯘ ﭘﺎﺋﺎﻟﯩﻴﻪﺗﻨﯩﯔ ﺋﯘﺗﯘﻗﻠﯘﻕ ﺑﻮﻟﻐﺎﻥ ﺗﻪﺭﻩﭘﻠﯩﺮﯨﻨﯩﯔ ﺑﯩﺮﯨﻨﻰ ﻫﯧﭻ ﺑﻮﻟﻤﯩﻐﺎﻧﺪﺍ 27- ﺋﯚﻛﺘﻪﺑﯩﺮ ﺋﯧﻠﯩﭗ ﺑﯧﺮﯨﻠﻐﺎﻥ ﭘﺎﺋﺎﻟﯩﻴﻪﺗﻨﯩﯔ ﺳﺎﻥ ﻓﺮﺍﻧﺴﯩﺴﻜﻮ ﺟﺎﻣﺎﺋﯩﺘﻰ ﺋﺎﺭﯨﺴﯩﺪﺍ ﺩﯨﻘﻘﻪﺗﻜﻪ ﺳﺎﺯﺍﯞﻩﺭ ﺑﻮﻟﻐﺎﻧﻠﯩﻘﯩﻨﻰ ﯞﻩ ﺳﺎﻥ ﻓﺮﺍﻧﺴﯩﺴﻜﻮﺩﺍ ﭼﯩﻘﯩﺪﯨﻐﺎﻥ ﮔﯧﺰﯨﺘﻠﻪﺭﺩﯨﻦ ﺋﻮﺭﯗﻥ ﺋﺎﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ ﻫﻪﻣﺪﻩ ﭘﺎﺋﺎﻟﯩﻴﻪﺗﺘﻪ ﺳﺎﺩﯨﺮ ﺑﻮﻟﻐﺎﻥ ﻣﻪﺳﯩﻠﯩﻠﻪﺭ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ، ﺷﯘ ﺧﯩﻠﺪﯨﻜﻰ ﻣﻪﺳﯩﻠﯩﻠﻪﺭﻧﯩﯔ ﺳﺎﺩﯨﺮ ﺑﻮﻟﯘﺷﯩﻐﺎ ﺳﻪﯞﻩﺏ ﺑﻮﻟﻐﺎﻥ ﻧﻪﺭﺳﯩﻨﯩﯔ ﭘﺎﺋﺎﻟﯩﻴﻪﺕ ﺋﻮﺭﯗﻧﻼﺷﺘﯘﺭﯗﺵ ﺟﻪﺭﻳﺎﻧﯩﻨﯩﯔ ﺑﺎﺷﻘﺎ ﺋﯘﻳﻐﯘﺭ ﺟﺎﻣﺎﺋﯩﺘﯩﮕﻪ ﻣﻪﻟﯘﻡ ﺟﻪﻫﻪﺗﺘﯩﻦ ﻣﻪﺧﭙﯩﻲ ﺗﯘﺗﯘﻟﻐﺎﻧﻠﯩﻘﯩﺪﯨﻦ ﺑﻮﻟﻐﺎﻥ ﺩﻩﭖ ﻛﯚﺭﺳﻪﺗﺘﻰ.

ﺑﯘ ﭘﺎﺋﺎﻟﯩﻴﻪﺗﻨﻰ ﺋﻪﻣﻪﻟﮕﻪ ﺋﺎﺷﯘﺭﯗﺷﺘﺎ ﺋﯩﻘﺘﯩﺴﺎﺩﻯ ﯞﻩ ﺑﺎﺷﻘﺎ ﺟﻪﻫﻪﺗﻠﻪﺭﺩﯨﻦ ﻳﯧﻘﯩﻨﺪﯨﻦ ﻳﺎﺭﺩﻩﻣﺪﻩ ﺑﻮﻟﻐﺎﻥ ﺑﯧﺮﻛﯧﻠﯩﻲ ﺋﯘﻧﯩﯟﯦﺮﺳﯩﺘﯧﺘﻰ ﺧﻪﻟﻘﺌﺎﺭﺍﻟﯩﻖ ﺋﻮﻗﯘﻏﯘﭼﯩﻼﺭ ﺑﺎﺷﻘﺎﺭﻣﯩﺴﯩﻨﯩﯔ ﺑﺎﺷﻠﯩﻘﻰ ﺩﻭﻛﺘﯘﺭ ﻟﯩﻠﯩﻴﺎﻧﻨﯔ ﺑﯩﻠﺪﯛﺭﯛﺷﯩﭽﻪ، ﻣﻪﺯﻛﯘﺭ ﭘﺎﺋﺎﻟﯩﻴﻪﺕ ﺋﯩﻨﺘﺎﻳﯩﻦ ﺋﯘﺗﯘﻗﻠﯘﻕ ﺋﯧﻠﯩﭗ ﺑﯧﺮﯨﻠﻐﺎﻥ ﺑﻮﻟﯘﭖ، ﻛﻪﻟﮕﯜﺳﯩﺪﯨﻤﯘ ﻳﻪﻧﻪ ﻣﯘﺷﯘ ﺧﯩﻠﺪﯨﻜﻰ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﻰ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﻛﯚﭘﻠﻪﭖ ﺋﻮﺭﯗﻧﻼﺷﺘﯘﺭﯨﺪﯨﻜﻪﻥ.

ﺩﻭﻛﺘﯘﺭ ﻟﯩﻠﯩﻴﺎﻥ ﻳﻪﻧﻪ، ﺋﯚﺯﯨﻨﯩﯔ ﺑﯘ ﻳﻪﺭﺩﻩ ﺑﯩﺮ ﺩﯙﻟﻪﺗﻨﻰ ﺋﻪﻣﻪﺱ، ﺑﻪﻟﻜﻰ ﻣﻪﺩﻩﻧﯩﻴﻪﺗﻨﻰ ﺗﻪﺑﺮﯨﻜﻠﻪﻳﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ: "ﺑﯩﺰ ﺑﯘ ﻳﻪﺭﺩﻩ ﺑﯩﺮﻣﯘ ﺑﺎﻳﺮﺍﻕ ﺋﺎﺳﻤﯩﺪﯗﻕ، ﭼﯜﻧﻜﻰ ﺑﯩﺰ ﺑﯘ ﻳﻪﺭﺩﻩ ﺑﯩﺮ ﺩﯙﻟﻪﺗﻨﻰ ﺋﻪﻣﻪﺱ، ﺑﻪﻟﻜﻰ ﻣﻪﺩﻩﻧﯩﻴﻪﺗﻨﻰ ﺗﻪﺑﺮﯨﻜﻠﻪﻳﻤﯩﺰ" ﺩﻩﭖ ﺋﻮﺗﺘﯘﺭﯨﻐﺎ ﻗﻮﻳﺪﻯ. (ﺟﯜﻣﻪ)