ﺭﯗﺱ ﺋﺎﻟﯩﻤﯩﻨﯩﯔ ﻧﻪﺯﯨﺮﯨﺪﯨﻜﻰ ﺋﯘﻳﻐﯘﺭ ﻳﯧﻘﯩﻨﻘﻰ ﺯﺍﻣﺎﻥ ﺗﺎﺭﯨﺨﻰ

• ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﯘﻳﻐﯘﺭ ﻳﯧﻘﯩﻨﻘﻰ ﺯﺍﻣﺎﻥ ﺗﺎﺭﯨﺨﻰ ﺋﯘﻳﻐﯘﺭ ﺋﻮﻣﯘﻣﯩﻲ ﺗﺎﺭﯨﺨﯩﻨﯩﯔ ﺋﻪﯓ ﻣﯘﻫﯩﻢ ﯞﻩ ﻧﺎﺯﯗﻙ ﻗﯩﺴﯩﻤﻰ ، ﭼﯜﻧﻜﻰ ﺋﯘ ﺑﯜﮔﯜﻧﻜﻰ ﺧﯩﺘﺎﻱ ﺩﯙﻟﻪﺗﭽﯩﻠﯩﻚ ﺳﯩﻴﺎﺳﯩﺘﻰ ﺑﯩﻠﻪﻥ ﺑﯩﯟﺍﺳﯩﺘﻪ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ ﺋﯘﻧﯩﯖﻐﺎ ﻗﺎﻧﺪﺍﻕ ﺑﺎﻫﺎ ﺑﯧﺮﯨﺶ ﻣﻪﺳﯩﻠﯩﺴﻰ ﺩﺍﺋﯩﻢ ﻣﯘﻧﺎﺯﯨﺮﻩ ﻫﻪﻡ ﻛﯚﺯ ﻗﺎﺭﺍﺵ ﺋﯩﺨﺘﯩﻼﭘﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯗ. ﺑﯘ ﻣﻪﺳﯩﻠﯩﺪﻩ ﺧﯩﺘﺎﻱ ﺗﺎﺭﯨﺨﭽﯩﻠﯩﺮﯨﻨﯩﯔ ﻧﯘﻗﺘﯩﺌﯩﻨﻪﺯﻩﺭﻟﯩﺮﻯ ﺑﯩﻠﻪﻥ ﺋﯘﻳﻐﯘﺭ ﺗﺎﺭﯨﺨﭽﯩﻠﯩﺮﻯ ﺟﯜﻣﻠﯩﺪﯨﻦ ﭼﻪﺕ ﺋﻪﻝ ﺗﺎﺭﯨﺨﭽﯩﻠﯩﺮﯨﻨﯩﯔ ﻧﯘﻗﺘﯩﺌﯩﻨﻪﺯﻩﺭﻟﯩﺮﻯ ﻣﻪﻟﯘﻡ ﺩﻩﺭﯨﺠﯩﺪﻩ ﺋﻮﺧﺸﯩﻤﺎﺳﻠﯩﻘﻼﺭﻏﺎ ﺋﯩﮕﻪ .

ﺗﻮﭘﯩﻼﯕﻤﯘ ؟ ﻗﻮﺯﻏﯩﻼﯕﻤﯘ؟

ﺋﯘﻳﻐﯘﺭ ﺧﻪﻟﻘﯩﻨﯩﯔ 19-ﺋﻪﺳﯩﺮﺩﻩ ﻣﻪﻧﭽﯩﯔ ﺧﺎﻧﺪﺍﻧﻠﯩﻘﯩﻨﯩﯔ ﻫﯚﻛﯜﻣﺮﺍﻧﻠﯩﻘﯩﻐﺎ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ ﻛﯜﺭﻩﺷﻠﯩﺮﻯ ﺋﯘﻳﻐﯘﺭ ﺳﯩﻴﺎﺳﯩﻲ ﺗﺎﺭﯨﺨﯩﻨﯩﯔ ﻣﯘﻫﯩﻢ ﺑﯩﺮ ﻗﯩﺴﯩﻤﻰ ﺑﻮﻟﯘﺵ ﺑﯩﻠﻪﻥ ﺑﯩﺮﮔﻪ ﺑﯜﮔﯜﻧﻜﻰ ﺧﯩﺘﺎﻱ ﺩﯙﻟﻪﺗﭽﯩﻠﯩﻚ ﺋﯩﺪﯨﻴﯩﺴﻰ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﻧﺎﺯﯗﻙ ﻣﻪﺳﯩﻠﻪ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ.

ﺧﯩﺘﺎﻱ ﺗﺎﺭﯨﺨﭽﯩﻠﯩﺮﻯ 19-ﺋﻪﺳﯩﺮﺩﻩ ﺋﯘﻳﻐﯘﺭ ﺋﯧﻠﯩﻨﯩﯔ ﻫﻪﺭ ﻗﺎﻳﺴﻰ ﺟﺎﻳﻠﯩﺮﯨﺪﺍ ﻳﯜﺯ ﺑﻪﺭﮔﻪﻥ ﻛﻪﯓ ﻛﯚﻟﻪﻣﻠﯩﻚ ﯞﻩﻗﻪﻟﻪﺭﻧﻰ ﺋﺎﺩﻩﺗﺘﻪ "ﺗﻮﭘﯩﻼﯓ" ﯞﻩ ﻳﺎﻛﻰ " ﺧﻮﺟﯩﻼﺭﻧﯩﯔ ﻗﺎﻻﻳﻤﯩﻘﺎﻧﭽﯩﻠﯩﻘﻰ" ﺷﯘﻧﯩﯖﺪﻩﻙ " ﭼﻪﺕ ﺋﻪﻝ ﺟﺎﻫﺎﻧﮕﯩﺮﻟﯩﺮﯨﻨﯩﯔ ﺗﺎﺟﺎﯞﯗﺯﭼﯩﻠﯩﻖ ﻫﻪﻡ ﯞﻩﺗﻪﻧﻨﻰ ﭘﺎﺭﭼﯩﻼﺵ ﻗﺎﺭﺍ ﻧﯩﻴﯩﺘﯩﻨﯩﯔ ﺋﯩﭙﺎﺩﯨﺴﻰ" ﺩﻩﭖ ﺧﺎﺭﺍﻛﺘﯧﺮ ﺑﯧﺮﯨﺪﯗ.

ﺋﯘﻧﺪﺍﻗﺘﺎ، 19-ﺋﻪﺳﯩﺮﺩﯨﻜﻰ ﻗﻮﺯﻏﯩﻼﯕﻼﺭ ﺭﺍﺳﺘﯩﻨﻼ ﺩﯨﻨﯩﻲ ﺋﻪﺳﻪﺑﯩﻴﻠﯩﻚ ﺗﯜﺳﯩﺪﯨﻜﻰ ﺗﻮﭘﯩﻼﯕﻤﯘ؟

ﺑﯘ ﻣﻪﺳﯩﻠﻪ ﻫﻪﻗﻘﯩﺪﻩ ﺋﯘﻳﻐﯘﺭ ﺋﺎﻟﯩﻤﻠﯩﺮﻯ ﺑﯩﻠﻪﻥ ﺧﯩﺘﺎﻱ ﺋﺎﻟﯩﻤﻠﯩﺮﻯ ﺟﯜﻣﻠﯩﺪﯨﻦ ﺑﯩﺮ ﻗﯩﺴﯩﻢ ﭼﻪﺕ ﺋﻪﻝ ﺋﺎﻟﯩﻤﻠﯩﺮﻯ ﺋﺎﺭﯨﺴﯩﺪﺍ ﺋﻮﺧﺸﯩﻤﯩﻐﺎﻥ ﺑﺎﻫﺎ ﯞﻩ ﻛﯚﺯ ﻗﺎﺭﺍﺵ ﻣﻪﯞﺟﯘﺕ. ﺋﯘﻳﻐﯘﺭ ﺗﺎﺭﯨﺨﭽﯩﻠﯩﺮﻯ ﺑﯘ ﻫﻪﺭﯨﻜﻪﺗﻠﻪﺭﻧﻰ ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ ﻛﯜﺭﯨﺸﻰ ﺩﻩﭖ ﻗﺎﺭﯨﺴﺎ، ﺭﯗﺱ ﺋﺎﻟﯩﻤﻠﯩﺮﻯ ﺑﯘﻧﻰ "ﻣﯩﻠﻠﯩﻲ ﺋﺎﺯﺍﺩﻟﯩﻖ ﻛﯜﺭﯨﺸﻰ" ﺩﻩﭖ ﻗﺎﺭﺍﻳﺪﯗ. ﺋﺎﻣﯧﺮﯨﻜﯩﺪﯨﻜﻰ ﺧﺎﺭﯞﺍﺭﺩ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺗﯜﺭﻛﻮﻟﻮﮔﯩﻴﻪ ﺑﻮﻳﯩﭽﻪ ﺩﻭﻛﺘﻮﺭﻟﯘﻕ ﺋﯘﻧﯟﺍﻧﻰ ﺋﺎﻟﻐﺎﻥ ﻗﺎﻫﺎﺭ ﺑﺎﺭﺍﺕ ﺋﻪﭘﻪﻧﺪﻯ 19-ﺋﻪﺳﯩﺮﺩﯨﻜﻰ ﺋﯘﻳﻐﯘﺭﻻﺭﻧﯩﯔ ﻗﻮﺯﻏﯩﻼﯕﻠﯩﺮﯨﻨﯩﯔ ﻣﯩﻠﻠﯩﻲ ﺋﺎﺯﺍﺩﻟﯩﻖ ﯞﻩ ﻣﯘﺳﺘﻪﻗﯩﻠﻠﯩﻖ ﻛﯜﺭﯨﺸﻰ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﺭﯗﺳﯩﻴﻪ ﺋﺎﻟﯩﻤﻠﯩﺮﻯ ﺑﯘ ﺗﯧﻤﯩﻨﻰ ﻛﯚﭖ ﺗﻪﺗﻘﯩﻖ ﻗﯩﻠﻐﺎﻥ

ﺭﯗﺳﯩﻴﻪ ﯞﻩ ﺳﺎﺑﯩﻖ ﺳﻮﯞﯦﺖ ﺋﯩﺘﺘﯩﭙﺎﻕ ﺋﺎﻟﯩﻤﻠﯩﺮﻯ ﺋﯘﻳﻐﯘﺭ 19-ﺋﻪﺳﯩﺮ ﺳﯩﻴﺎﺳﯩﻲ ﺗﺎﺭﯨﺨﻰ ﻫﻪﻗﻘﯩﺪﻩ ﻛﯚﭖ ﺋﯩﺰﺩﻩﻧﮕﻪﻥ ﺑﻮﻟﯘﭖ، ﺑﯘﻻﺭﻧﯩﯔ ﺋﯩﭽﯩﺪﻩ ﺗﺎﺭﯨﺦ ﭘﻪﻧﻠﯩﺮﻯ ﺩﻭﻛﺘﻮﺭﻟﯩﺮﯨﺪﯨﻦ ﺗﯩﺨﻮﻧﻮﻑ ، ﮔﯘﺭﯨﻴﯧﯟﯨﭻ، ﻛﯘﺯﻧﯧﺘﺴﻮﭖ، ﺑﺎﺳﺨﺎﻧﻮﻑ ، ﺩﯗﻣﺎﻥ، ﺩﯗﺑﺮﻭﯞﺳﻜﺎﻳﺎ ﻗﺎﺗﺎﺭﻟﯩﻖ ﺋﻮﻧﻠﯩﻐﺎﻥ ﺭﯗﺱ ﺋﺎﻟﯩﻤﻠﯩﺮﯨﺪﯨﻦ ﺑﺎﺷﻘﺎ ﻳﻪﻧﻪ ﺩﺍﯞﯗﺕ ﺋﯩﺴﺴﯩﻴﯧﻒ، ﺋﺎﺑﻠﻪﺕ ﺧﻮﺟﺎﻳﻮﻑ، ﻣﻪﻧﺴﯘﺭ ﺭﯗﺯﯨﻴﯧﻒ ، ﻣﺎﻟﯩﻚ ﻛﻪﺑﯩﺮﻭﻑ ﻗﺎﺗﺎﺭﻟﯩﻖ ﺋﯘﻳﻐﯘﺭ ﺗﺎﺭﯨﺨﭽﯩﻠﯩﺮﻯ ﻛﯚﭖ ﺋﻪﻣﮕﻪﻙ ﺳﯩﯖﺪﯛﺭﯛﭖ، ﺑﯩﺮ ﻗﺎﺗﺎﺭ ﺗﻪﺗﻘﯩﻘﺎﺕ ﻛﯩﺘﺎﺑﻠﯩﺮﻯ ﻫﻪﻡ ﻣﺎﻗﺎﻟﯩﻠﯩﺮﯨﻨﻰ ﺋﯧﻼﻥ ﻗﯩﻠﻐﺎﻥ ﺋﯩﺪﻯ.

ﺑﯘ ﺋﺎﻟﯩﻤﻼﺭ ﺋﯚﺯ ﺋﻪﻣﮕﻪﻛﻠﯩﺮﯨﺪﻩ ﺑﯩﺮﺩﻩﻙ ﻫﺎﻟﺪﺍ 19-ﺋﻪﺳﯩﺮﺩﯨﻜﻰ ﻣﻪﻧﭽﯩﯔ ﺋﯩﻤﭙﯧﺮﯨﻴﯩﺴﯩﻨﯩﯔ ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﺳﯩﻴﺎﺳﯩﺘﯩﻨﻰ ﻣﯘﺳﺘﻪﻣﻠﯩﻜﯩﭽﯩﻠﯩﻚ ﺳﯩﻴﺎﺳﻪﺕ، ﺋﯘﻳﻐﯘﺭﻻﺭﻧﯩﯔ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﻣﯩﻠﻠﯩﻲ ﺋﺎﺯﺍﺩﻟﯩﻖ، ﻗﯘﺗﯘﻟﯘﺵ ﻫﻪﺭﯨﻜﻪﺗﻠﯩﺮﻯ ﺩﻩﭖ ﺧﺎﺭﺍﻛﺘﯧﺮﻟﯩﮕﻪﻥ . ﻣﺎﻧﺎ ﻣﯘﺷﯘﻧﺪﺍﻕ ﺋﯩﺪﯨﻴﻪ ﺋﯩﻠﮕﯩﺮﻯ ﺳﯜﺭﯛﻟﮕﻪﻥ ﻫﻪﻣﺪﻩ ﺭﯗﺳﯩﻴﻪ ﺋﯘﻳﻐﯘﺭ ﺗﺎﺭﯨﺨﻰ ﺗﻪﺗﻘﯩﻘﺎﺗﯩﻐﺎ ﻧﻪﺯﻩﺭﯨﻴﻪ ﺟﻪﻫﻪﺗﺘﯩﻦ ﺑﻪﻟﮕﯩﻠﯩﻚ ﺗﻪﺳﯩﺮ ﻛﯚﺭﺳﻪﺗﻜﻪﻥ ﻣﺎﻗﺎﻟﻪ ﺭﯗﺱ ﺋﯘﻳﻐﯘﺭ ﺗﺎﺭﯨﺨﻰ ﺗﻪﺗﻘﯩﻘﺎﺗﭽﯩﺴﻰ ، ﭘﺮﻭﻓﯧﺴﺴﻮﺭ ﺩﻣﯩﺘﺮﯨﻲ ﺗﯩﺨﻮﻧﻮﻓﻨﯩﯔ " 1864-ﻳﯩﻠﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻳﯜﺯ ﺑﻪﺭﮔﻪﻥ ﻗﻮﺯﻏﯩﻼﯕﻼﺭ" ﻧﺎﻣﻠﯩﻖ ﻣﻪﺷﻬﯘﺭ ﻣﺎﻗﺎﻟﯩﺴﻰ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ.

ﺑﯘ ﺋﻪﺳﻪﺭ ﺋﻪﻳﻨﻰ ﯞﺍﻗﯩﺘﺘﺎ ﻳﯘﻗﯩﺮﯨﺪﯨﻜﻰ ﻛﯚﺯ ﻗﺎﺭﺍﺷﻼﺭﻧﯩﯔ ﻛﯜﭼﯩﻴﯩﺸﯩﮕﻪ ﺑﻪﻟﮕﯩﻠﯩﻚ ﺗﻪﺳﯩﺮ ﻛﯚﺭﺳﻪﺗﻜﻪﻧﻠﯩﻜﻰ ﺋﯜﭼﯜﻥ ﺑﺎﺭﻟﯩﻖ ﺋﺎﻟﯩﻤﻼﺭ ﺗﻪﺭﯨﭙﯩﺪﯨﻦ ﺑﯩﺮﺩﻩﻙ ﺋﯧﺘﯩﺮﺍﭖ ﻗﯩﻠﯩﻨﯩﺶ ﻫﻪﻡ ﻣﺎﻗﺎﻟﻪ-ﺋﻪﺳﻪﺭﻟﯩﺮﯨﺪﻩ ﭘﺎﻳﺪﯨﻠﯩﻨﯩﺸﻘﺎ ﺋﯧﺮﯨﺸﯩﻠﮕﻪﻥ ﺋﯩﺪﻯ.

ﺗﯩﺨﻮﻧﻮﻓﻨﯩﯔ ﻛﯚﺯ ﻗﺎﺭﺍﺷﻠﯩﺮﻯ

ﭘﺮﻭﻓﯧﺴﺴﻮﺭ ﺩﻣﯩﺘﺮﯨﻲ ﺗﯩﺨﻮﻧﻮﻑ ﻣﺎﻗﺎﻟﯩﺴﯩﺪﻩ 1759-ﻳﯩﻠﻰ ﻣﻪﻧﭽﯩﯔ ﺳﯘﻻﻟﯩﺴﻰ ﻗﻮﺷﯘﻧﻠﯩﺮﯨﻨﯩﯔ ﻏﻪﺭﺑﯩﻲ ﺋﯚﻟﻜﯩﻠﻪﺭﺩﯨﻜﻰ ﻗﻮﺯﻏﯩﻼﯕﻼﺭﻧﻰ ﺑﺎﺳﺘﯘﺭﻏﺎﻧﺪﯨﻦ ﻛﯧﻴﯩﻦ، ﺋﯘﻳﻐﯘﺭ ﺩﯨﻴﺎﺭﯨﻨﻰ ﺑﯧﺴﯩﯟﺍﻟﻐﺎﻧﻠﯩﻘﯩﻨﻰ ﻛﯚﺭﺳﯩﺘﯩﺶ ﺑﯩﻠﻪﻥ "1759-ﻳﯩﻠﻰ ﻗﻪﺷﻘﻪﺭﯨﻴﻪ ﺑﯩﻠﻪﻥ ﺟﯘﯕﻐﺎﺭﯨﻴﯩﻨﯩﯔ ﺑﯩﭙﺎﻳﺎﻥ ﺯﯦﻤﯩﻨﻠﯩﺮﻯ ﺧﯩﺘﺎﻱ ﺋﯩﻤﭙﯧﺮﯨﻴﯩﺴﯩﮕﻪ ﺗﻪﺭﯨﭙﯩﺪﯨﻦ ﺋﺎﺧﯩﺮﻯ ﻗﻮﺷﯘﯞﯦﻠﯩﻨﺪﻯ. ﺧﯩﺘﺎﻱ ﻗﻮﺷﯘﻧﻰ ﺑﯘ ﻳﯧﯖﻰ ﺭﺍﻳﻮﻧﻼﺭﺩﺍ ﻫﻪﺩﺩﯨﺪﯨﻦ ﺯﯨﻴﺎﺩﻩ ﯞﻩﻫﺸﻠﯩﻜﻠﯩﺮﯨﻨﻰ ﻧﺎﻣﺎﻳﺎﻥ ﻗﯩﻠﺪﻯ. ﺑﯩﺮﺍﻕ، ﺧﯩﺘﺎﻱ ﺑﺎﺳﻘﯘﻧﭽﯩﻠﯩﺮﻯ ﺗﻪﺭﯨﭙﯩﺪﯨﻦ ﺋﯩﺸﻐﺎﻝ ﻗﯩﻠﯩﯟﯦﻠﯩﻨﻐﺎﻥ ﺑﯘ ﺭﺍﻳﻮﻧﻼﺭﺩﯨﻜﻰ ﺋﯘﻻﺭﻧﯩﯔ ﻫﺎﻛﯩﻤﯩﻴﯩﺘﻰ ﺋﯘﺯﯗﻥ ﭘﯘﺕ ﺗﯩﺮﻩﭖ ﺗﯘﺭﺍﻟﻤﯩﺪﻯ.

ﺑﯩﺮﯨﻨﭽﻰ ﻗﯧﺘﯩﻤﻠﯩﻖ ﻗﻮﺯﻏﯩﻼﯕﻨﯩﯔ ﺑﺎﺷﻠﯩﻨﯩﺸﻰ 1816-ﻳﯩﻠﻰ ﻳﯜﺯ ﺑﻪﺭﺩﻯ، ﺑﯘ ﻗﻮﺯﻏﯩﻼﯓ ﻛﯩﭽﯩﻜﺮﻩﻙ ﺑﻮﻟﯘﭖ، ﺧﯩﺘﺎﻱ ﺋﻪﺳﻜﻪﺭﻟﯩﺮﻯ ﺋﯘﻧﻰ ﺑﺎﺳﺘﯘﺭﺍﻟﯩﺪﻯ. ﺑﯘ ﯞﻩﻗﻪﻧﯩﯔ ﺋﻪﻫﻤﯩﻴﯩﺘﻰ ﺷﯘﻛﻰ، ﺧﻪﻟﻖ ﺭﺍﻳﻮﻧﺪﯨﻜﻰ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﺋﺎﺟﯩﺰ ﺋﯩﻜﻪﻧﻠﯩﻜﯩﮕﻪ ﺋﯩﺸﻪﻧﭻ ﻫﺎﺳﯩﻞ ﻗﯩﻠﺪﻯ. ﺋﻮﻥ ﻳﯩﻠﻼﺭ ﺋﯚﺗﻜﻪﻧﺪﯨﻦ ﻛﯧﻴﯩﻦ ﻳﯧﯖﻰ ﻳﻪﻧﻰ ﺑﯘﺭﯗﻧﻘﯩﻐﺎ ﻗﺎﺭﯨﻐﺎﻧﺪﺍ ﻛﯜﭼﻠﯜﻛﺮﻩﻙ ﺩﻭﻟﻘﯘﻥ ﻛﯚﺗﯜﺭﯛﻟﮕﻪﻥ ﺑﻮﻟﯘﭖ، 1825-1827-ﻳﯩﻠﻠﯩﺮﯨﺪﯨﻜﻰ ﻫﻪﺭﯨﻜﻪﺗﻨﯩﯔ ﺑﯧﺸﯩﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻫﯚﻛﯜﻡ ﺳﯜﺭﮔﻪﻥ ﺋﺎﻕ ﺗﺎﻏﻠﯩﻖ ﺧﻮﺟﯩﻼﺭ ﺧﺎﻧﺪﺍﻧﻠﯩﻘﯩﻨﯩﯔ ﺋﻪﯞﻻﺩﻯ ﺟﺎﻫﺎﻧﮕﯩﺮ ﺧﻮﺟﺎ ﺗﯘﺭﺩﻯ. 1830-ﻳﯩﻠﻰ ﻗﻮﻗﻪﻧﺖ ﻗﻮﺷﯘﻧﻠﯩﺮﯨﻨﯩﯔ ﻳﺎﺭﺩﯨﻤﻰ ﺑﯩﻠﻪﻥ ﺋﺎﻕ ﺗﺎﻏﻠﯩﻖ ﺧﻮﺟﯩﻼﺭ ﻗﯩﺴﻘﺎ ﻣﯘﺩﺩﻩﺕ ﻫﺎﻛﯩﻤﯩﻴﻪﺗﻨﻰ ﺋﯩﮕﯩﻠﯩﺪﻯ، 1847- ﯞﻩ 1857-ﻳﯩﻠﻠﯩﺮﻯ ﺋﯩﺸﻐﺎﻟﯩﻴﻪﺗﭽﯩﻠﻪﺭﻧﯩﯔ ﻫﺎﻛﯩﻤﯩﻴﯩﺘﯩﻨﻰ ﺋﺎﻏﺪﯗﺭﯗﭖ ﺗﺎﺷﻼﺷﻘﺎ ﺑﻮﻟﻐﺎﻥ ﻧﻪﺗﯩﺠﯩﺴﯩﺰ ﺋﯘﺭﯗﻧﯘﺷﻼﺭ ﻳﻪﻧﻪ ﻳﯜﺯ ﺑﻪﺭﺩﻯ" ﺩﻩﭖ ﺋﯚﺯ ﺑﺎﻳﺎﻧﻠﯩﺮﯨﻨﻰ ﺑﺎﺷﻼﻳﺪﯗ.

ﺋﯘﻧﯩﯔ ﻗﺎﺭﯨﺸﯩﭽﻪ، 1816-ﻳﯩﻠﯩﺪﯨﻦ ﺗﺎﻛﻰ 1864-ﻳﯩﻠﯩﺪﯨﻜﻰ ﻛﯘﭼﺎﺭ ﻗﻮﺯﻏﯩﻠﯩﯖﯩﻐﯩﭽﻪ ﺑﻮﻟﻐﺎﻥ ﺋﺎﺭﯨﻠﯩﻘﺘﯩﻜﻰ ﻛﯜﺭﻩﺷﻠﻪﺭ ﺗﻮﻟﯘﻕ ﻏﻪﻟﯩﺒﯩﮕﻪ ﺋﯧﺮﯨﺸﻪﻟﻤﯩﮕﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﯘﻻﺭﻧﯩﯔ ﻫﻪﻣﻤﯩﺴﻰ 1864-ﻳﯩﻠﯩﺪﯨﻜﻰ ﻛﯘﭼﺎﺭ، ﺋﯩﻠﻰ، ﺧﻮﺗﻪﻥ، ﻗﻪﺷﻘﻪﺭ ﻗﺎﺗﺎﺭﻟﯩﻖ ﺟﺎﻳﻼﺭﺩﯨﻜﻰ ﺋﻮﻣﯘﻣﯩﻲ ﻳﯜﺯﻟﯜﻙ ﻣﯩﻠﻠﯩﻲ ﺋﺎﺯﺍﺩﻟﯩﻖ ﻛﯜﺭﻩﺵ ﺩﻭﻟﻘﯘﻧﻨﯩﯔ ﻛﯚﺗﯜﺭﯛﻟﯩﺸﯩﮕﻪ ﺋﺎﺳﺎﺱ ﺑﻮﻟﻐﺎﻥ. ﻣﻪﻧﭽﯩﯔ ﻫﯚﻛﯜﻣﺮﺍﻧﻠﯩﻘﯩﺪﺍ ﺋﯧﺰﯨﻠﮕﻪﻥ ﺧﻪﻟﻖ ﺋﯚﺯ ﻛﯜﭼﯩﮕﻪ ﺋﯩﺸﻪﻧﮕﻪﻥ ﺑﻮﻟﯘﭖ، ﺧﻪﻧﺰﯗ ﺧﻪﻟﻘﯩﻨﯩﯔ ﺋﯩﭽﻜﯩﺮﻯ ﺧﯩﺘﺎﻳﺪﺍ ﻣﻪﻧﭽﯩﯔ ﺳﯘﻻﻟﯩﺴﯩﻐﺎ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ ﻛﻪﯓ ﻛﯚﻟﻪﻣﻠﯩﻚ ﺗﻪﻳﭙﯩﯔ ﺗﻴﻪﻧﮕﻮ ﻫﻪﺭﯨﻜﯩﺘﯩﻤﯘ ﻣﻪﻧﭽﯩﯔ ﺳﯘﻻﻟﯩﺴﯩﻨﻰ ﺋﺎﺟﯩﺰﻟﯩﺘﯩﭗ، ﻗﻮﻳﻐﺎﻥ ﺑﻮﻟﯘﭖ، ﺑﯘﻧﯩﯔ ﺗﻪﺳﯩﺮﯨﺪﻩ ﻏﻪﺭﺑﯩﻲ ﺗﻪﺭﻩﭘﻠﻪﺭﺩﯨﻜﻰ ﺗﯘﯕﮕﺎﻧﻼﺭ ﻗﻮﺯﻏﯩﻼﯓ ﻛﯚﺗﯜﺭﮔﻪﻥ ﺑﻮﻟﯘﭖ، ﺑﯘ ﻫﻪﺭﯨﻜﻪﺗﻠﻪﺭﻧﻰ ﻗﻪﺷﻘﻪﺭﯨﻴﻪ ﯞﻩ ﺟﯘﯕﻐﺎﺭﯨﻴﯩﺪﯨﻜﻰ ﺗﯘﯕﮕﺎﻧﻼﺭﻣﯘ ﻗﻮﻟﻠﯩﻐﺎﻥ ﺋﯩﺪﻯ. (ﺋﯜﻣﯩﺪﯞﺍﺭ)