ﺕ . ﻛﯘﻣﺎﺭ : ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺷﺘﺎ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ ﭘﺎﻳﺪﯨﻠﯩﻨﯩﯟﺍﺗﯩﺪﯗ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭ ﻗﺎﻧﺎﺗﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﯩﺘﯩﺮﻯ ﺟﯘ ﻳﯘﯕﻜﺎﯕﻨﯩﯔ، ﺩﯛﺷﻪﻧﺒﻪ ﻛﯜﻧﻰ ﺑﯧﻴﺠﯩﯖﺪﺍ ﺋﯚﺗﻜﯜﺯﯛﻟﮕﻪﻥ ﺑﯩﺮ ﻗﯧﺘﯩﻤﻠﯩﻖ ﺑﯩﺨﻪﺗﻪﺭﻟﯩﻚ ﻳﯩﻐﯩﻨﯩﺪﺍ ﻗﯩﻠﻐﺎﻥ ﺳﯚﺯﯨﺪﻩ، ﺗﯧﺮﺭﻭﺭﭼﯩﻠﯩﻘﻨﻰ ﺧﯩﺘﺎﻳﺪﯨﻜﻰ ﺋﻪﯓ ﭼﻮﯓ ﺗﻪﻫﺪﯨﺖ ﺩﻩﭖ ﻛﯚﺭﺳﻪﺗﻜﻪﻧﻠﯩﻜﻰ ﻧﯘﺭﻏﯘﻧﻠﯩﻐﺎﻥ ﺑﯩﺨﻪﺗﻪﺭﻟﯩﻚ ﻣﯘﺗﻪﺧﻪﺳﺴﯩﺴﻠﯩﺮﯨﻨﻰ ﻫﻪﻳﺮﺍﻥ ﻗﺎﻟﺪﯗﺭﻏﺎﻥ.

ﺑﻪﺯﻯ ﻣﯘﺗﻪﺧﻪﺳﺴﯩﺴﻠﻪﺭ، ﺧﯩﺘﺎﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﯨﻨﯩﯔ، ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﺋﯚﻛﺘﯩﭽﯩﻠﻪﺭﻧﻰ ﺑﺎﺳﺘﯘﺭﯗﺵ ﺑﻮﻟﯘﭘﻤﯘ، ﺋﯘﻳﻐﯘﺭ ﻣﯘﺳﯘﻟﻤﺎﻧﻠﯩﺮﯨﻨﯩﯔ ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﺑﺎﺳﺘﯘﺭﯗﺵ ﺋﯜﭼﯜﻥ ﻳﺎﺧﺸﻰ ﭘﯘﺭﺳﻪﺕ ﻳﺎﺭﯨﺘﯩﭗ ﺑﻪﺭﮔﻪﻥ 11‏-ﺳﯧﻨﺘﻪﺑﯩﺮ ﺗﯧﺮﺭﻭﺭﻟﯘﻕ ﯞﻩﻗﻪﺳﯩﻨﯩﯔ 6 ﻳﯩﻠﻠﯩﻘﯩﺪﺍ، ﺗﯧﺮﺭﻭﺭﭼﯩﻠﯩﻘﻨﻰ 2008‏- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻚ ﺗﻪﻧﻬﻪﺭﯨﻜﻪﺕ ﻳﯩﻐﯩﻨﻰ ﺋﯜﭼﯜﻥ ﺋﻪﯓ ﭼﻮﯓ ﺗﻪﻫﺪﯨﺖ ﺩﻩﭖ ﻛﯚﺭﺳﻪﺗﻜﻪﻥ ﺳﯚﺯﻟﯩﺮﯨﻨﻰ، ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﮕﻪ ﺧﯩﺘﺎﻳﻨﯩﯖﻤﯘ ﺋﺎﺗﺎﻟﻤﯩﺶ ﺗﯧﺮﺭﻭﺭﭼﯩﻠﯩﻘﻨﯩﯔ ﻗﯘﺭﺑﺎﻧﻰ ﺋﯩﻜﻪﻧﻠﯩﻜﯩﻨﻰ ﻗﺎﻳﺘﯩﺪﯨﻦ ﺋﻪﺳﻠﯩﺘﯩﺸﻨﻰ ﻣﻪﻗﺴﻪﺕ ﻗﯩﻠﻐﺎﻥ ﺩﻩﭖ ﻗﺎﺭﯨﻤﺎﻗﺘﺎ.

ﻧﯚﯞﻩﺗﺘﻪ،ﺧﯩﺘﺎﻳﺪﺍ ﺗﯧﺮﺭﻭﺭﻟﯘﻕ ﺗﻪﻫﺪﯨﺘﯩﻨﯩﯔ ﻳﻮﻕ ﺩﯨﻴﻪﺭﻟﯩﻚ ﺩﻩﺭﯨﺠﯩﺪﻩ ﺋﺎﺯ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ ﺳﯩﯩﻨﮕﺎﭘﻮﺭﻟﯘﻕ ﺗﯧﺮﺭﻭﺭﭼﯩﻠﯩﻖ ﻣﯘﺗﻪﺧﻪﺳﺴﯩﺴﻰ ﺭﻭﻫﺎﻥ ﮔﯘﻧﺎﺭﺍﺗﻨﺎ، ﺷﻪﺭﻗﯩﻲ ﺷﯩﻤﺎﻟﯩﻲ ﺋﺎﺳﯩﻴﺎﺩﺍ ﻛﻪﯓ ﻛﯚﻟﻪﻣﻠﯩﻚ ﺗﯧﺮﺭﻭﺭﻟﯘﻕ ﻫﯘﺟﯘﻣﻼﺭ ﺋﯧﻠﯩﭗ ﺑﯧﺮﯨﺶ ﺋﯩﻘﺘﯩﺪﺍﺭﯨﻐﺎ ﺋﯩﮕﻪ ﺑﯩﺮ ﻳﺎﻛﻰ ﺋﯩﻜﻜﯩﻼ ﺗﯧﺮﺭﻭﺭﻟﯘﻕ ﺗﻪﺷﻜﯩﻼﺗﻰ ﻣﻪﯞﺟﯘﺕ ﺋﯩﻜﻪﻧﻠﯩﻜﯩﻨﻰ، ﺑﯘ ﺗﻪﺷﻜﯩﻼﺗﻼﺭﻧﯩﯖﻤﯘ، ﺑﯧﻴﺠﯩﯔ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺋﯧﻠﯩﻨﻐﺎﻥ ﻗﺎﺗﺘﯩﻖ ﺑﯩﺨﻪﺗﻪﺭﻟﯩﻚ ﺗﻪﺩﺑﯩﺮﻟﯩﺮﻯ ﺗﯜﭘﻪﻳﻠﯩﺪﯨﻦ، ﺧﯩﺘﺎﻳﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﺶ ﺋﯩﻤﻜﺎﻧﯩﻴﯩﺘﯩﻨﯩﯔ ﻧﺎﻫﺎﻳﯩﺘﻰ ﭼﻪﻛﻠﯩﻚ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﻣﻪﻛﺘﻪ.

ﻟﯧﻜﯩﻦ ﻧﯘﺭﻏﯘﻧﻠﯩﻐﺎﻥ ﺳﯩﻴﺎﺳﯩﻲ ﻣﯘﻻﻫﯩﺰﯨﭽﯩﻠﻪﺭ، ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺋﯘﺯﯗﻥ ﻣﯘﺩﺩﻩﺗﺘﻪ ﺧﯩﺘﺎﻳﻐﺎ ﺗﻪﻫﺪﯨﺖ ﻗﯩﻠﯩﺪﯨﻐﺎﻥ ﺑﯩﺮ ﻫﻪﺭﯨﻜﻪﺗﻜﻪ ﺋﺎﻳﻠﯩﻨﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﻤﻪﻛﺘﻪ.

ﺧﻪﻟﻘﺌﺎﺭﺍ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﺑﻮﻟﺴﺎ، ﺧﯩﺘﺎﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﯨﻨﯩﯔ ﺧﯩﺘﺎﻳﺪﯨﻜﻰ ﺗﯧﺮﺭﻭﺭﭼﯩﻠﯩﻖ ﺗﻪﻫﺪﯨﺘﻰ ﺗﻮﻏﺮﯨﺴﯩﺪﯨﻜﻰ ﺳﯚﺯﻟﯩﺮﯨﻨﻰ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺧﻪﻟﻘﺌﺎﺭﺍ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ، ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺵ ﺋﯜﭼﯜﻥ ﻗﺎﻧﺪﺍﻕ ﭘﺎﻳﺪﯨﻠﯩﻨﯩﯟﺍﺗﻘﺎﻧﻠﯩﻘﯩﻨﯩﯔ ﻳﻪﻧﻪ ﺑﯩﺮ ﻣﯩﺴﺎﻟﻰ ﺩﻩﭖ، ﻗﺎﺭﯨﻤﺎﻗﺘﺎ.

ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﺎﺳﯩﻴﺎ ﺑﯚﻟﯜﻣﯩﻨﯩﯔ ﺩﯨﺮﯦﻜﺘﻮﺭﻯ ﺕ. ﻛﯘﻣﺎﺭ ﺋﻪﭘﻪﻧﺪﻯ، ﺧﯩﺘﺎﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﯨﻨﯩﯔ ﺗﯧﺮﺭﻭﺭﭼﯩﻠﯩﻘﻨﻰ ﺧﯩﺘﺎﻳﺪﯨﻜﻰ ﺋﻪﯓ ﭼﻮﯓ ﺗﻪﻫﺪﯨﺖ ﺩﻩﭖ ﻛﯚﺭﺳﻪﺗﻜﻪﻥ ﺳﯚﺯﻟﯩﺮﯨﻨﻰ ﺭﻩﺕ ﻗﯩﻠﯩﭗ ﻣﯘﻧﺪﺍﻕ ﺩﯦﺪﻯ: " ﺋﺎﻣﯧﺮﯨﻜﺎ ﯞﻩ ﺏ ﺩ ﺕ ﯞﻩ ﺑﺎﺷﻘﺎ ﺩﯙﻟﻪﺗﻠﻪﺭ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﻨﻰ ﻧﯚﯞﻩﺗﺘﯩﻜﻰ ﺋﻪﯓ ﻣﯘﻫﯩﻢ ﺧﻪﻟﻘﺌﺎﺭﺍﻟﯩﻖ ﻣﻪﺳﯩﻠﻪ ﺩﻩﭖ ﻗﺎﺭﯨﻤﺎﻗﺘﺎ. ﺑﯘﻧﻰ ﺑﯩﻠﮕﻪﻥ ﺧﯩﺘﺎﻱ ﻫﯚﻛﯜﻣﯩﺘﻰ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ، ﺳﯩﻴﺎﺳﯩﻲ ﺋﯚﻛﺘﯩﭽﯩﻠﻪﺭﻧﻰ ﺑﺎﺳﺘﯘﺭﯗﺵ ﺋﯜﭼﯜﻥ ﭘﺎﻳﺪﯨﻠﯩﻨﯩﺸﻘﺎ ﺗﯩﺮﯨﺸﻤﺎﻗﺘﺎ. ﺧﯩﺘﺎﻱ ﻫﯚﻛﯜﻣﯩﺘﻰ ﺗﯩﺒﻪﺗﻠﻪﺭ ﺑﻮﻟﯘﭘﻤﯘ، ﺋﯘﻳﻐﯘﺭﻻﺭﻧﯩﯔ ﺳﯩﻴﺎﺳﯩﻲ ﻫﻪﺭﯨﻜﻪﺗﻠﯩﺮﯨﻨﻰ ﺑﺎﺳﺘﯘﺭﯗﺷﺘﺎ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ ﭘﺎﻳﺪﯨﻠﯩﻨﯩﯟﺍﺗﯩﺪﯗ. ﺋﯘﻳﻐﯘﺭﻻﺭﻧﯩﯔ ﻣﯘﺳﯘﻟﻤﺎﻥ ﺑﻮﻟﯘﺷﻰ، ﺋﯘﻻﺭﻧﯩﯔ ﻫﻪﺭﯨﻜﻪﺗﻠﯩﺮﯨﻨﻰ ﺗﯧﺮﺭﻭﺭﻟﯘﻕ ﻫﻪﺭﯨﻜﯩﺘﻰ ﺩﻩﭖ ﻛﯚﺭﺳﯩﺘﯩﺶ ﺋﯜﭼﯜﻥ، ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﭘﯘﺭﺳﻪﺕ ﻳﺎﺭﯨﺘﯩﭗ ﺑﯧﺮﯨﯟﺍﺗﯩﺪﯗ. ﺑﯜﮔﯜﻥ،ﺧﯩﺘﺎﻱ ﻫﯚﻛﯜﻣﯩﺘﻰ، ﺋﯘﻳﻐﯘﺭﻻﺭﻧﯩﯔ ﻫﻪﺗﺘﺎ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﯨﻜﻰ ﻫﻪﺭﻗﺎﻧﺪﺍﻕ ﻧﺎﺭﺍﺯﯨﻠﯩﻘﯩﻨﯩﻤﯘ ﺗﯧﺮﺭﻭﺭﻟﯘﻕ ﻫﻪﺭﯨﻜﯩﺘﻰ ﻛﺎﺗﯧﮕﻮﺭﯨﻴﯩﺴﻰ ﺋﯩﭽﯩﮕﻪ ﺋﯧﻠﯩﭗ ﺑﺎﺳﺘﯘﺭﻣﺎﻗﺘﺎ ﯞﻩ ﺋﯘﻳﻐﯘﺭﻻﺭﻧﯩﯔ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﻳﺎﻗﻤﺎﻳﺪﯨﻐﺎﻥ ﻫﻪﺭﻗﺎﻧﺪﺍﻕ ﭘﺎﺋﺎﻟﯩﻴﯩﺘﯩﻨﻰ ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﮕﻪ ﺗﯧﺮﺭﻭﺭﭼﯩﻠﯩﻖ ﭘﺎﺋﺎﻟﯩﻴﯩﺘﻰ ﺩﻩﭖ ﻛﯚﺭﺳﯩﺘﯩﺸﻜﻪ ﺗﯩﺮﯨﺸﻤﺎﻗﺘﺎ."

ﺕ . ﻛﯘﻣﺎﺭ ﺋﻪﭘﻪﻧﺪﻯ ﺧﯩﺘﺎﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﺴﺘﯩﺮﻯ ﺟﯘ ﻳﯘﯕﻜﺎﯕﻨﯩﯔ ﺧﯩﺘﺎﻳﺪﯨﻜﻰ ﺗﯧﺮﺭﻭﺭﭼﯩﻠﯩﻖ ﺗﻮﻏﺮﯨﺴﯩﺪﯨﻜﻰ ﺳﯚﺯﻟﯩﺮﯨﻨﯩﯔ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ 2008‏- ﻳﯩﻠﻠﯩﻖ ﺋﻮﻟﯩﻤﭙﯩﻚ ﺗﻪﻧﻬﻪﺭﯨﻜﻪﺕ ﻳﯩﻐﯩﻨﻰ ﻫﺎﺭﭘﯩﺴﯩﺪﺍ، ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ ﺑﻮﻟﯘﭘﻤﯘ، ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺵ ﺋﯜﭼﯜﻥ ﺗﯧﺨﯩﻤﯘ ﻛﯚﭖ ﭘﺎﻳﺪﯨﻠﯩﻨﯩﺶ ﻧﯩﻴﯩﺘﯩﻨﯩﯔ ﺑﺎﺭﻟﯩﻘﯩﻨﻰ ﻛﯚﺭﺳﯩﺘﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ ﻳﻪﻧﻪ ﻣﯘﻧﺪﺍﻕ ﺩﯦﺪﻯ : " ﺧﯩﺘﺎﻱ ﻫﯚﻛﯜﻣﯩﺘﻰ ﺋﻮﻟﯩﻤﭙﯩﻚ ﻳﯩﻐﯩﻨﻰ ﻫﺎﺭﭘﯩﺴﯩﺪﺍ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ، ﺑﻮﻟﯘﭘﻤﯘ ﺋﯘﻳﻐﯘﺭﻻﺭﻧﻰ ﺗﯧﺨﯩﻤﯘ ﻛﯚﭖ ﺑﺎﺳﺘﯘﺭﯗﺵ ﺋﯜﭼﯜﻥ ﭘﺎﻳﺪﯨﻠﯩﻨﯩﺸﻘﺎ ﺗﯩﺮﯨﺸﻤﺎﻗﺘﺎ. ﭼﯜﻧﻜﻰ ﺋﯘﻳﻐﯘﺭﻻﺭ ﻣﯘﺳﯘﻟﻤﺎﻥ. ﻣﯘﻧﺪﺍﻗﭽﻪ ﻗﯩﻠﯩﭗ ﺋﯧﻴﺘﻘﺎﻧﺪﺍ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﯚﺯ ﺳﯩﻴﺎﺳﯩﻲ ﻣﻪﻗﺴﻪﺗﻠﯩﺮﯨﻨﻰ ﺋﻪﻣﻪﻟﮕﻪ ﺋﺎﺷﯘﺭﯗﺵ ﺋﯜﭼﯜﻥ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺋﯘﺭﯗﺷﻨﻰ ﺳﯜﻳﺌﯩﺴﯩﺘﯩﻤﺎﻝ ﻗﯩﻠﯩﯟﺍﺗﯩﺪﯗ."

ﺗﯧﺮﺭﻭﺭﭼﯩﻠﯩﻘﻘﺎ ﺳﻪﻣﯩﻤﯩﻲ ﻗﺎﺭﺷﻰ ﺗﯘﺭﯗﺵ ﺑﯩﻠﻪﻥ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺋﯘﺭﯗﺷﺘﯩﻦ ﺋﯚﺯ ﺳﯩﻴﺎﺳﯩﻲ ﻣﻪﻗﺴﻪﺗﻠﯩﺮﻯ ﺋﯜﭼﯜﻥ ﭘﺎﻳﺪﯨﻠﯩﻨﯩﺸﻨﯩﯔ ﺋﯩﻜﻜﻰ ﺋﺎﻳﺮﯨﻢ ﻣﻪﺳﯩﻠﻪ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﺎﺳﯩﻴﺎ ﺑﯚﻟﯜﻣﯩﻨﯩﯔ ﺩﯨﺮﯦﻜﺘﻮﺭﻯ ﺕ.ﻛﯘﻣﺎﺭ ﺋﻪﭘﻪﻧﺪﻯ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﯩﻜﻜﯩﻨﭽﻰ ﻳﻮﻟﻨﻰ ﺗﺎﻟﻠﯩﯟﺍﻟﻐﺎﻥ ﺑﻮﻟﯘﭖ، ﺑﯘ ﻳﻮﻟﺪﯨﻜﻰ ﻫﻪﺭﯨﻜﻪﺗﻠﯩﺮﯨﻨﻰ ﺋﯚﺯﻟﯜﻛﺴﯩﺰ ﺩﺍﯞﺍﻣﻼﺷﺘﯘﺭﯗﯞﺍﺗﯩﺪﯗ، ﺩﯦﺪﻯ. (ﺋﯚﻣﻪﺭ ﻗﺎﻧﺎﺕ)