ﻧﻮﺭﯞﯦﮕﯩﻴﯩﺪﻩ ﺗﯩﺒﻪﺕ ﯞﻩ ﺋﯘﻳﻐﯘﺭ ﻣﻪﺳﯩﻠﯩﺴﻰ ﺑﯘﻳﯩﭽﻪ ﻳﯩﻐﯩﻦ ﺋﯧﭽﯩﻠﺪﻯ

• ﻣﯘﺧﺒﯩﺮﯨﻤﯩﺰ ﺋﺎﻳﮕﯘﻝ ﻳﯜﺳﯜﭘﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

2008 - ﻳﯩﻠﻰ 3 - ﺋﺎﻳﻨﯩﯔ 9 - ﻛﯜﻧﻰ ﻧﻮﺭﯞﯦﮕﯩﻴﯩﻨﯩﯔ ﭘﺎﻳﺘﻪﺧﺘﻰ ﺋﻮﺳﻠﻮ ﺷﻪﻫﯩﺮﯨﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺑﯩﻨﺎﺳﯩﺪﺍ ﺗﯩﺒﻪﺕ ﯞﻩ ﺋﯘﻳﻐﯘﺭ ﻣﻪﺳﯩﻠﯩﺴﻰ ﺑﯘﻳﯩﭽﻪ ﻳﯩﻐﯩﻦ ﺋﯧﭽﯩﻠﺪﻯ. ﺑﯘ ﻗﯧﺘﯩﻤﻘﻰ ﻳﯩﻐﯩﻨﻨﻰ ﻧﻮﺭﯞﯦﮕﯩﻴﻪ ﺗﯩﺒﻪﺕ ﻛﻮﻣﯩﺘﯧﺘﻰ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﺋﻮﺭﮔﺎﻧﻠﯩﺮﻯ ﺑﯩﺮﻟﯩﺸﯩﭗ ﺋﻮﻳﯘﺷﺘﯘﺭﻏﺎﻥ ﺑﻮﻟﯘﭖ، ﻳﯩﻐﯩﻨﻐﺎ ﻫﻪﺭ ﻗﺎﻳﺴﻰ ﺟﺎﻳﻼﺭﺩﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﻯ،ﺗﯩﺒﻪﺗﻠﻪﺭ،ﺋﯘﻳﻐﯘﺭﻻﺭ ﯞﻩ ﻧﻮﺭﯞﯦﮓ ﻣﯧﻬﻤﺎﻧﻼﺭﺩﯨﻦ ﺑﻮﻟﯘﭖ ﺟﻪﻣﺌﯩﻲ 150ﻛﻪ ﻳﯧﻘﯩﻦ ﻛﯩﺸﻰ ﻗﺎﺗﻨﺎﺷﺘﻰ.

ﻧﻮﺭﯞﯦﮕﯩﻴﻪ ﺗﯩﺒﻪﺕ ﻛﻮﻣﯩﺘﯧﺘﯩﻨﯩﯔ ﺳﺎﻫﯩﭙﺨﺎﻧﻠﯩﻘﯩﺪﺍ ﺋﯧﭽﯩﻠﻐﺎﻥ ﻣﻪﺯﻛﯘﺭ ﻳﯩﻐﯩﻨﻐﺎ ﺑﯘ ﻗﯧﺘﯩﻢ ﻳﺎﺯﻏﯘﭼﯩﻼﺭ ﺋﻪﺭﻛﯩﻨﻠﯩﻚ ﻣﯘﻛﺎﭘﺎﺗﯩﻐﺎ ﺋﯧﺮﯨﺸﻜﻪﻥ ﺗﯩﺒﻪﺗﻠﯩﻚ ﺋﺎﻳﺎﻝ ﻳﺎﺯﻏﯘﭼﻰ ﺋﯚﺳﻪﺭﻧﯩﯔ ﺋﯧﺮﻯ "ﻣﯧﻨﯩﯔ ﻏﻪﺭﺑﯩﻲ ﺩﯨﻴﺎﺭﯨﻢ، ﺳﯧﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﯩﯔ" ﻗﺎﺗﺎﺭﻟﯩﻖ ﺋﻪﺳﻪﺭﻟﻪﺭﻧﯩﯔ ﺋﺎﭘﺘﻮﺭﻯ ﯞﺍﯓ ﻟﯩﺸﯘﯓ ﺋﺎﺳﺎﺳﻠﯩﻖ ﻣﯧﻬﻤﺎﻥ ﺳﯘﭘﯩﺘﯩﺪﻩ ﻗﺎﺗﻨﯩﺸﯩﭗ ﺗﯩﺒﻪﺕ ﯞﻩ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺩﻭﻛﻼﺕ ﺑﻪﺭﺩﻯ.

" ﺋﯘﻳﻐﯘﺭﻻﺭﻧﯩﯔ ﻣﯘﺳﺘﻪﻗﯩﻠﻠﯩﻖ ﯞﻩ ﺩﯦﻤﻮﻛﺮﺍﺗﯩﻴﻪ ﺋﺎﺭﺯﯗﺳﯩﻐﺎ ﻫﯚﺭﻣﻪﺕ ﻗﯩﻠﯩﺶ ﻛﯧﺮﻩﻙ "

ﺋﯘﭺ ﺳﺎﺋﻪﺗﻜﻪ ﻳﯧﻘﯩﻦ ﺩﺍﯞﺍﻣﻼﺷﻘﺎﻥ ﺑﯘ ﻗﯧﺘﯩﻤﻘﻰ ﻳﯩﻐﯩﻨﺪﺍ ﯞﺍﯓ ﻟﯩﺸﯘﯓ ﺗﯩﺒﻪﺕ ﯞﻩ ﺋﯘﻳﻐﯘﺭﻻﺭﻧﯩﯔ ﻧﯚﯞﻩﺗﺘﻪ ﺟﯩﺪﺩﯨﻲ ﺩﯗﭺ ﻛﯧﻠﯩﯟﺍﺗﻘﺎﻥ ﺳﯩﻴﺎﺳﯩﻲ،ﺋﯩﻘﺘﯩﺴﺎﺩﯨﻲ ﯞﻩ ﺩﯨﻨﯩﻲ ﻣﻪﺳﯩﻠﯩﻠﯩﺮﻯ ﻫﻪﻗﻘﯩﺪﻩ ﺗﻪﭘﺴﯩﻠﯩﻲ ﺗﻮﺧﺘﯩﻠﯩﭗ،ﭘﺎﻛﯩﺘﻠﯩﻖ ﺭﻩﺳﯩﻤﻠﻪﺭ ﺋﺎﺭﻗﯩﻠﯩﻖ ﻳﯩﻐﯩﻦ ﺋﯩﺸﺘﯩﺮﺍﻛﭽﯩﻠﯩﺮﯨﻐﺎ ﺗﯩﺒﻪﺕ ﯞﻩ ﺋﯘﻳﻐﯘﺭ ﺋﯧﻠﯩﻨﯩﯔ ﻫﺎﺯﯨﺮﻗﻰ ﯞﻩﺯﯨﻴﯩﺘﯩﻨﻰ ﭼﯜﺷﻪﻧﺪﯛﺭﯛﭖ ﺋﯚﺗﺘﻰ.

ﻳﯩﻐﯩﻦ ﺋﺎﺧﯩﺮﯨﺪﺍ ﺋﯘ ﺋﯘﻳﻐﯘﺭ، ﺗﯩﺒﻪﺕ ﯞﻩ ﻧﻮﺭﯞﯦﮕﻼﺭﻧﯩﯔ ﺋﯘﻳﻐﯘﺭ ﺋﯩﻠﻰ، ﺗﯩﺒﻪﺕ ﯞﻩ ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﻫﺎﻛﯩﻤﯩﻴﯩﺘﻰ ﻫﻪﻗﻘﯩﺪﻩ ﺳﻮﺭﯨﻐﺎﻥ ﺳﻮﺋﺎﻟﻠﯩﺮﯨﻐﺎ ﺋﻪﺳﺘﺎﻳﯩﺪﯨﻞ ﺟﺎﯞﺍﺏ ﺑﻪﺭﺩﻯ.

ﯞﺍﯓ ﻟﯩﺸﯘﯓ ﺋﺎﺑﺪﯗﺳﻪﻣﻪﺕ ﺋﻪﭘﻪﻧﺪﯨﻨﯩﯔ ﺋﯘﻳﻐﯘﺭ ﺋﯧﻠﯩﻨﯩﯔ ﻧﯚﯞﻩﺗﺘﯩﻜﻰ ﻛﯩﺸﯩﻠﯩﻚ ﻫﻮﻗﯘﻕ ﯞﻩﺯﯨﻴﯩﺘﯩﻨﯩﯔ ﺗﯩﺒﻪﺗﺘﯩﻨﻤﯘ ﻧﺎﭼﺎﺭ ﺋﯩﻜﻪﻧﻠﯩﻜﻰ، ﺋﯘﻳﻐﯘﺭﻻﺭﻧﯩﯔ ﺩﯦﻤﻮﻛﺮﺍﺗﯩﻴﻪ ﯞﻩ ﻣﯘﺳﺘﻪﻗﯩﻠﻠﯩﻖ ﺋﺎﺭﺯﯗﺳﯩﻐﺎ ﻗﺎﻧﺪﺍﻕ ﻗﺎﺭﺍﻳﺪﯨﻐﺎﻧﻠﯩﻘﻰ ﻫﻪﻗﻘﯩﺪﯨﻜﻰ ﺳﻮﺭﯨﻐﺎﻥ ﺳﻮﺋﺎﻟﯩﻐﺎ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ:"ﺋﯘﻳﻐﯘﺭﻻﺭ ﺩﯗﭺ ﻛﯧﻠﯩﯟﺍﺗﻘﺎﻥ ﻣﯩﻠﻠﯩﻲ ﯞﻩ ﺩﯨﻨﯩﻲ ﻣﻪﺳﯩﻠﻪ ﻫﻪﻗﯩﻘﻪﺗﻪﻥ ﺋﯧﻐﯩﺮ. ﻣﻪﻥ ﺑﯘﻧﻰ ﺋﯘﻳﻐﯘﺭﻻﺭﻧﯩﯔ ﻳﯘﺭﺗﯩﻐﺎ ﺳﻪﭘﻪﺭ ﻗﯩﻠﯩﺶ ﺟﻪﺭﻳﺎﻧﯩﺪﺍ ﺋﯚﺯ ﻛﯚﺯﯛﻡ ﺑﯩﻠﻪﻥ ﻛﯚﺭﺩﯗﻡ ﯞﻩ ﺋﺎﯕﻠﯩﺪﯨﻢ. ﻣﻪﻥ ﺋﯘﻳﻐﯘﺭﻻﺭﻧﯩﯔ ﻣﯘﺳﺘﻪﻗﯩﻠﻠﯩﻖ ﯞﻩ ﺩﯦﻤﻮﻛﺮﺍﺗﯩﻴﻪ ﺋﺎﺭﺯﯗﺳﯩﻐﺎ ﻫﯚﺭﻣﻪﺕ ﻗﯩﻠﯩﺶ ﻛﯧﺮﻩﻙ ﺩﻩﭖ ﻗﺎﺭﺍﻳﻤﻪﻥ. ﭼﯜﻧﻜﻰ ﺋﯘﻳﻐﯘﺭ، ﺗﯩﺒﻪﺕ ﯞﻩ ﺑﺎﺷﻘﺎ ﻫﻪﺭ ﻗﺎﻧﺪﺍﻕ ﺑﯩﺮ ﻣﯩﻠﻠﻪﺗﻨﯩﯔ ﺋﯚﺯ ﺋﺎﺭﺯﯗﺳﻰ ﺑﯘﻳﯩﭽﻪ ﺋﻪﺭﻛﯩﻦ، ﺩﯦﻤﻮﻛﺮﺍﺗﯩﻚ ﯞﻩ ﻫﯚﺭ ﻳﺎﺷﺎﺵ ﻫﻮﻗﯘﻗﻰ ﺑﺎﺭ ﺩﻩﭖ ﻗﺎﺭﺍﻳﻤﻪﻥ. ﺧﯩﺘﺎﻱ ﺩﯦﻤﻮﻛﯩﺮﺍﺗﭽﯩﻠﯩﺮﯨﻨﯩﯔ ﺋﯘﻳﻐﯘﺭﻻﺭﻧﯩﯔ ﻣﯘﺳﺘﻪﻗﯩﻠﻠﯩﻖ ﯞﻩ ﺩﯦﻤﻮﻛﺮﺍﺗﻠﯩﺸﯩﺶ ﺋﺎﺭﺯﯗﺳﯩﻐﺎ ﻗﺎﻧﺪﺍﻕ ﻗﺎﺭﺍﻳﺪﯨﻐﺎﻧﻠﯩﻘﯩﻐﺎ ﻛﻪﻟﺴﻪﻙ، ﺑﻪﺯﯨﻠﯩﺮﯨﻨﯩﯔ ﻗﺎﺭﯨﺸﻰ ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﯩﻨﯩﯖﻜﯩﺪﯨﻦ ﭼﻮﯓ ﭘﻪﺭﻗﻠﯩﻨﯩﭗ ﻛﻪﺗﻤﻪﻳﺪﯗ. ﺋﻪﮔﻪﺭ ﺋﯘﻳﻐﯘﺭ ﻗﺎﺗﺎﺭﻟﯩﻖ ﻣﯩﻠﻠﻪﺗﻠﻪﺭﻧﯩﯔ ﺋﻪﺭﻛﯩﻨﻠﯩﻚ ﺋﺎﺭﺯﯗﺳﯩﻐﺎ ﻫﯚﺭﻣﻪﺕ ﻗﯩﻠﯩﻨﻤﺎﻳﺪﯨﻜﻪﻥ، ﺟﯘﯕﮕﻮﻧﯩﯔ ﺩﯦﻤﻮﻛﺮﺍﺗﻠﯩﺸﯩﺶ ﻣﻪﺳﯩﻠﯩﺴﯩﺪﯨﻦ ﺳﯚﺯ ﺋﺎﭼﻘﯩﻠﻰ ﺑﻮﻟﻤﺎﻳﺪﯗ. ﻟﯧﻜﯩﻦ ﺧﯩﺘﺎﻱ ﻫﯚﻛﯜﻣﯩﺘﻰ ﺩﻩﻝ ﺋﻪﻛﺴﯩﭽﻪ، ﭘﻪﻗﻪﺕ ﺯﻭﺭﺍﯞﺍﻧﻠﯩﻖ ﺋﯘﺳﯘﻟﻰ ﺋﺎﺭﻗﯩﻠﯩﻘﻼ ﺋﯘﻻﺭﻧﯩﯔ ﺋﻪﺭﻛﯩﻨﻠﯩﻚ،ﻛﯩﺸﯩﻠﯩﻚ ﻫﻮﻗﯘﻕ ﺗﻪﻟﻪﭘﻠﯩﺮﯨﻨﻰ ﺑﺎﺳﺘﯘﺭﯨﯟﺍﺗﯩﺪﯗ. ﺋﻪﮔﻪﺭ ﺑﯘﻧﺪﺍﻕ ﺩﺍﯞﺍﻣﻠﯩﺸﯩﯟﻩﺭﺳﻪ ﺋﯘﻳﻐﯘﺭ ﺋﯧﻠﯩﺪﯨﻤﯘ ﺧﯘﺩﺩﻯ ﺑﻮﺳﻨﯩﻴﯩﺪﻩﻙ ﻗﺎﻧﻠﯩﻖ ﺗﻮﻗﯘﻧﯘﺵ ﻳﯘﺯ ﺑﯧﺮﯨﺸﻰ ﻣﯘﻣﻜﯩﻦ، ﺋﻪﻣﻤﺎ ﺑﯘ ﺗﻮﻗﯘﻧﯘﺵ ﺑﻮﺳﻨﯩﻴﯩﮕﻪ ﻗﺎﺭﯨﻐﺎﻧﺪﺍ ﻧﻪﭼﭽﻪ ﻫﻪﺳﺴﻪ ﺋﺎﺭﺗﯘﻕ ﺑﻮﻟﯘﺷﻰ ﻣﯘﻣﻜﯩﻦ.ﭼﯜﻧﻜﻰ ﺋﯘﻳﻐﯘﺭ ﺭﺍﻳﻮﻧﻰ ﺋﯩﻨﺘﺎﻳﯩﻦ ﻛﻪﯓ، ﺋﺎﻫﺎﻟﯩﻤﯘ ﺑﻮﺳﻨﯩﻴﯩﮕﻪ ﻗﺎﺭﯨﻐﺎﻧﺪﺍ ﻧﻪﭼﭽﻪ ﻫﻪﺳﺴﻪ ﻛﯚﭖ، ﺷﯘﯕﺎ ﺑﯘ ﺋﯩﺶ ﺋﺎﺧﯩﺮ ﺑﯧﺮﯨﭗ ﻗﺎﻧﻠﯩﻖ ﺗﻮﻗﯘﻧﯘﺷﻘﺎ ﺋﺎﻳﻠﯩﻨﯩﭗ ﻛﯧﺘﯩﺸﻰ ﻣﯘﻣﻜﯩﻦ."

" ﻗﻮﺵ ﺗﯩﻞ ﻣﺎﺋﺎﺭﯨﭙﻰ ﺋﯘﻳﻐﯘﺭﻻﺭﻧﻰ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﻗﯩﻠﯩﺶ ﺋﯘﭼﯘﻥ ﻳﯜﺭﮔﯜﺯﯨﻠﯩﯟﺍﺗﻘﺎﻥ ﭘﯩﻼﻥ "

ﯞﺍﯓ ﻟﯩﺸﯘﯓ ﺋﯘﻳﻐﯘﺭ ﻣﻪﻛﺘﻪﭘﻠﯩﺮﯨﻨﯩﯔ ﺧﯩﺘﺎﻱ ﻣﻪﻛﺘﻪﭘﻠﯩﺮﯨﮕﻪ ﻗﻮﺷﯘﯞﯦﺘﯩﻠﯩﺸﻰ ﯞﻩ ﺋﯘﻳﻐﯘﺭ ﺗﯩﻞ - ﻳﯧﺰﯨﻘﯩﻨﯩﯔ ﺋﻮﻗﯘ - ﺋﻮﻗﯘﺗﯘﺷﺘﺎ ﺋﯩﺴﺘﯩﻤﺎﻟﺪﯨﻦ ﻗﺎﻟﺪﯗﺭﯗﻟﯘﺷﻰ ﻗﺎﺗﺎﺭﻟﯩﻖ ﻣﻪﺳﯩﻠﯩﻠﻪﺭ ﻫﻪﻗﻘﯩﺪﻩ ﺳﻮﺭﺍﻟﻐﺎﻥ ﺳﻮﺋﺎﻟﻐﺎ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻣﻪﻛﺘﻪﭘﻠﻪﺭﻧﻰ ﻗﻮﺷﯘﯞﯦﺘﯩﺸﻰ،ﺋﯘﻳﻐﯘﺭ ﺗﯩﻞ - ﻳﯧﺰﯨﻘﯩﻨﻰ ﺗﻪﺩﺭﯨﺠﻰ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﺷﻰ،ﺧﯩﺘﺎﻱ ﺗﯩﻠﯩﻨﻰ ﺋﺎﺳﺎﺳﻠﯩﻖ ﻫﯚﻛﯜﻣﺮﺍﻥ ﺗﯩﻠﻐﺎ ﺋﺎﻳﻼﻧﺪﯗﺭﯗﺷﻰ ﺋﯘﻳﻐﯘﺭﻻﺭﻧﻰ ﺋﺎﺳﻤﯩﻠﯩﻴﺎﺗﺴﯩﻴﻪ ﻗﯩﻠﯩﺶ ﺋﯘﭼﯘﻥ ﻳﯜﺭﮔﯜﺯﯨﻠﯩﯟﺍﺗﻘﺎﻥ ﺑﯩﺮ ﭘﯩﻼﻥ ﺑﻮﻟﯘﭖ، ﺑﯘ ﻫﺎﺯﯨﺮ ﺗﯩﻞ ﻣﻪﺳﯩﻠﯩﺴﯩﺪﻩ ﺋﻮﭼﯘﻕ - ﺋﺎﺷﻜﺎﺭﺍ ﻗﺎﺭﺷﯩﻠﯩﻘﻨﯩﯔ ﭘﻪﻳﺪﺍ ﺑﻮﻟﯘﺷﯩﻐﺎ ﺳﻪﯞﻩﺏ ﺑﻮﻟﺪﻯ.

ﺋﯩﺴﻤﯩﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ ﺑﯩﺮ ﺋﻪﭘﻪﻧﺪﻯ ﯞﺍﯓ ﻟﯩﺸﯘﯕﺪﯨﻦ ﻣﯘﻧﺪﺍﻕ ﺳﻮﺭﯨﺪﻯ:ﺳﯩﺰ ﻫﻪﻡ ﺧﯩﺘﺎﻱ ﺩﯦﻤﻮﻛﺮﺍﺗﭽﯩﺴﻰ ﻫﻪﻡ ﺋﯘﻳﻐﯘﺭ ﯞﻩ ﺗﯩﺒﻪﺕ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﻛﯚﭘﻠﯩﮕﻪﻥ ﺋﻪﺳﻪﺭﻟﻪﺭﻧﻰ ﻳﺎﺯﻏﺎﻥ ﻳﺎﺯﻏﯘﭼﻰ،ﻟﯧﻜﯩﻦ ﺳﯩﺰ ﻫﺎﺯﯨﺮ ﺧﻪﻟﻘﺌﺎﺭﺍﻟﯩﻖ ﺑﯩﺮ ﻣﯘﻛﺎﭘﺎﺗﻨﻰ ﺗﺎﭘﺸﯘﺭﯗﭖ ﺋﯧﻠﯩﺶ ﺋﯘﭼﯘﻥ ﻧﻮﺭﯞﯦﮕﯩﻴﯩﮕﻪ ﭘﺎﺳﭙﻮﺭﺕ ﺋﯧﻠﯩﭗ ﻛﯧﻠﻪﻟﯩﺪﯨﯖﯩﺰ، ﻟﯧﻜﯩﻦ ﺋﯘﻳﻐﯘﺭ ﻳﺎﺯﻏﯘﭼﯩﺴﻰ ﻧﯘﺭﻣﻪﻣﻪﺕ ﻳﺎﺳﯩﻦ ﺋﯚﺯﻯ ﻳﺎﺯﻏﺎﻥ ﺑﯩﺮ ﭘﺎﺭﭼﻪ ﺋﻪﺳﯩﺮﻯ ﺋﯘﭼﯘﻥ ﺧﯩﺘﺎﻱ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ 10 ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﺪﻯ. ﺳﯩﺰ ﺑﯘ ﻣﻪﺳﯩﻠﯩﻨﻰ ﻗﺎﻧﺪﺍﻕ ﭼﯜﺷﻪﻧﺪﯛﺭﯨﺴﯩﺰ ؟ ﺩﯦﮕﻪﻥ ﺳﻮﺋﺎﻟﯩﻐﺎ ﺋﯘ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: "ﺑﯘ ﺳﻮﺋﺎﻟﻐﺎ ﺋﻪﺳﻠﻰ ﺟﯘﯕﮕﻮ ﻫﯚﻛﯜﻣﯩﺘﻰ ﺋﯚﺯﻯ ﺟﺎﯞﺍﺏ ﺑﯧﺮﯨﺸﻰ ﻛﯧﺮﻩﻙ. ﺋﻪﻣﺪﻯ ﻣﯧﻨﯩﯔ ﺷﻪﺧﺴﻰ ﺟﺎﯞﺍﺑﯩﻤﻐﺎ ﻛﻪﻟﺴﻪﻡ، ﺑﯘ ﺧﯘﺩﺩﻯ ﺋﺎﻳﺎﻟﯩﻢ ﺗﯩﺒﻪﺕ ﻣﯩﻠﻠﯩﺘﯩﺪﯨﻦ ﺑﻮﻟﻐﺎﻧﻠﯩﻘﻰ ﺋﯜﭼﯜﻧﻼ ﺑﯘ ﻳﻪﺭﮔﻪ ﻣﯘﻛﺎﭘﺎﺗﻨﻰ ﺗﺎﭘﺸﯘﺭﯗﭖ ﺋﯧﻠﯩﺸﻘﺎ ﻛﯩﻠﻪﻟﻤﯩﮕﯩﻨﯩﺪﻩﻛﻼ ﺑﯩﺮ ﺋﯩﺶ ﺑﻮﻟﯘﭖ، ﺳﯩﺰ ﺋﯧﻴﺘﻘﺎﻥ ﻳﺎﺯﻏﯘﭼﻰ ﺩﻩﻝ ﺋﯘﻳﻐﯘﺭ ﻣﯩﻠﻠﯩﺘﯩﺪﯨﻦ ﺑﻮﻟﻐﺎﻧﻠﯩﻘﻰ ﺋﯜﭼﯜﻧﻼ ﻫﯚﻛﯜﻣﻪﺕ ﺗﻪﺭﯨﭙﯩﺪﯨﻦ ﻣﯘﺷﯘ ﺋﺎﺩﺍﻟﻪﺗﺴﯩﺰ ﻣﯘﺋﺎﻣﯩﻠﯩﮕﻪ ﺋﯘﭼﺮﺍﭖ ﺗﯜﺭﻣﯩﮕﻪ ﺗﺎﺷﻼﻧﻐﺎﻥ."

" ﯞﺍﯓ ﻟﯧﭽﯘﻩﻥ ﺋﻮﻟﯩﻤﭙﯩﻚ ﺑﯩﺨﻪﺗﻪﺭﻟﯩﻜﯩﻨﻰ ﺑﺎﻫﺎﻧﻪ ﻗﯩﻠﯩﭗ ﺋﯘﻳﻐﯘﺭ،ﺗﯩﺒﻪﺗﻠﻪﺭﻧﻰ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﻨﻰ ﺗﯧﺨﯩﻤﯘ ﻛﯜﭼﻪﻳﺘﻤﻪﻛﭽﻰ"

ﺋﯘ ﻳﻪﻧﻪ، ﺋﯘﻳﻐﯘﺭ ﺋﯧﻠﯩﺪﻩ ﻳﯜﺭﮔﯜﺯﯛﻟﯜﯞﺍﺗﻘﺎﻥ ﭘﯩﻼﻧﻠﯩﻖ ﺗﯘﻏﯘﺕ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺳﻮﺭﺍﻟﻐﺎﻥ ﺳﻮﺋﺎﻟﻐﺎ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ:ﭘﯩﻼﻧﻠﯩﻖ ﺗﯘﻏﯘﺕ ﺳﯩﻴﺎﺳﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﯩﺪﻩ ﻳﯜﺭﮔﯜﺯﯛﻟﯜﺷﻰ ﻫﻪﻗﯩﻘﻪﺗﻪﻥ ﺋﯧﻐﯩﺮ ﺑﻮﻟﯘﭖ، ﻫﺎﻣﯩﻠﺪﺍﺭ ﺋﺎﻳﺎﻟﻼﺭﻧﯩﯔ ﻗﻮﺭﺳﯩﻘﯩﺪﯨﻜﻰ ﻫﯚﻛﯜﻣﻪﺕ ﺗﻪﺭﯨﭙﯩﺪﯨﻦ ﭘﯩﻼﻧﺴﯩﺰ ﺩﻩﭖ ﻗﺎﺭﺍﻟﻐﺎﻥ ﺑﻮﯞﺍﻗﻼﺭﻧﯩﯔ ﺋﯚﻟﺘﯜﺭﯛﻟﯜﭖ ﭼﯜﺷﯜﺭﯛﺷﻜﻪ ﻣﻪﺟﺒﯘﺭﻟﯩﻨﯩﺶ ﺋﻪﻫﯟﺍﻟﻰ ﺑﻪﻙ ﺋﯧﻐﯩﺮ.ﺋﯘﻳﻐﯘﺭﻻﺭ ﻣﯘﺳﯘﻟﻤﺎﻥ ﻣﯩﻠﻠﻪﺕ ﺑﻮﻟﻐﺎﻧﻠﯩﻐﻰ ﺋﯘﭼﯘﻥ ﻗﻮﺭﺳﺎﻗﺘﯩﻜﻰ ﺑﺎﻟﯩﻨﻰ ﺋﯚﻟﺘﯜﺭﯛﺷﻨﻰ ﺋﯧﻐﯩﺮ ﮔﯘﻧﺎﻫ ﺩﻩﭖ ﻫﯧﺴﺎﺑﻼﻳﺪﯗ. ﺷﯘﯕﺎ ﺋﯘﻳﻐﯘﺭ ﺭﺍﻳﻮﻧﯩﺪﯨﻜﻰ ﻫﯚﻛﯜﻣﻪﺗﻜﻪ ﺑﻮﻟﻐﺎﻥ ﻧﯘﺭﻏﯘﻥ ﻗﺎﺭﺷﯩﻠﯩﻘﻼﺭ ﻣﯘﺷﯘ ﺗﯜﭘﻪﻳﻠﯩﺪﯨﻦ ﻛﯧﻠﯩﭗ ﭼﯩﻘﻘﺎﻥ.

ﺋﯘ ﺋﺎﺧﯩﺮﯨﺪﺍ، ﺧﯩﺘﺎﻳﻨﯩﯔ ﺑﯘ ﻳﯩﻞ ﻳﺎﺯﺩﺍ ﺋﯚﺗﻜﯜﺯﯨﺪﯨﻐﺎﻥ ﺋﻮﻟﯩﻤﭙﯩﻚ ﻳﯩﻐﯩﻨﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﺪﻯ؛ﺋﯘﻳﻐﯘﺭ ﺋﯧﻠﯩﻨﯩﯔ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﯞﺍﯓ ﻟﯧﭽﯘﻩﻥ ﺗﯧﻠﯧﯟﯨﺰﯨﻴﻪ ﺋﯩﺴﺘﺎﻧﺴﯩﺴﯩﻨﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻧﺪﺍ، ﺋﯚﺯﯨﻨﻰ ﺗﯧﺮﺭﻭﺭﭼﯩﻼﺭﻧﯩﯔ ﺋﯚﻟﺘﯜﺭﯛﺵ ﻗﺎﺭﺍ ﺗﯩﺰﯨﻤﻠﯩﻜﯩﺪﯨﻜﻰ ﺑﯩﺮﯨﻨﭽﻰ ﺷﻪﺧﺲ ﺩﻩﭖ ﻛﯚﺭﺳﻪﺗﻜﻪﻥ ﺑﻮﻟﯘﭖ، ﺋﯘ ﺑﯘ ﺋﺎﺭﻗﯩﻠﯩﻖ ﻣﻪﺳﯩﻠﯩﻨﻰ ﺗﯧﺨﯩﻤﯘ ﺟﯩﺪﺩﯨﻲ ﯞﻩ ﻳﻮﻏﯩﻨﯩﺘﯩﭗ ﻛﯚﺭﺳﯩﺘﯩﺶ ﺋﺎﺭﻗﯩﻠﯩﻖ ﺋﻮﻟﯩﻤﭙﯩﻚ ﺑﺎﺷﻠﯩﻨﯩﺸﺘﯩﻦ ﺑﯘﺭﯗﻥ ﺋﻮﻟﯩﻤﭙﯩﻜﻨﯩﯔ ﺑﯩﺨﻪﺗﻪﺭﻟﯩﻜﯩﻨﻰ ﻗﻮﻏﺪﺍﺷﻨﻰ ﺑﺎﻫﺎﻧﻪ ﻗﯩﻠﯩﭗ ﺋﯘﻳﻐﯘﺭ،ﺗﯩﺒﻪﺕ ﻗﺎﺗﺎﺭﻟﯩﻖ ﻣﯩﻠﻠﻪﺗﻠﻪﺭﻧﻰ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﻨﻰ ﺗﯧﺨﯩﻤﯘ ﻛﯜﭼﻪﻳﺘﻤﻪﻛﭽﻰ ﺑﻮﻟﯘﯞﺍﺗﯩﺪﯗ. (ﺋﺎﻳﮕﯜﻝ ﻳﯜﺳﯜﭖ)