ﺧﯩﺘﺎﻱ ﻣﯘﻗﯩﻤﻠﯩﻖ ﻣﯘﺗﻪﺧﻪﺳﺴﯩﺴﻰ ﺋﯘﻳﻐﯘﺭ ﺋﯧﻠﯩﺪﻩ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﻰ ﻣﻪﺭﻛﯩﺰﻯ ﻛﻮﻣﯩﺘﯧﺘﯩﻨﯩﯔ ﺳﯩﻴﺎﺳﯩﻲ ﺑﻴﯘﺭﻭ ﺩﺍﺋﯩﻤﯩﻲ ﻛﻮﻣﯩﺘﯧﺖ ﺋﻪﺯﺍﺳﻰ ﺟﯘ ﻳﯜﯕﻜﺎﯓ ﺑﯘ ﻳﯩﻞ 24 ‏- ﻳﺎﻧﯟﺍﺭﺩﯨﻦ 27 ‏- ﻳﺎﻧﯟﺍﺭﻏﺎ ﻗﻪﺩﻩﺭ، ﺋﯘﻳﻐﯘﺭ ﺋﯧﻠﯩﺪﻩ ﺗﻪﻛﺸﯜﺭﯛﭖ ﺗﻪﺗﻘﯩﻖ ﻗﯩﻠﯩﺶ ﭘﺎﺋﺎﻟﯩﻴﯩﺘﻰ ﺋﯧﻠﯩﭗ ﺑﺎﺭﻏﺎﻥ. ﺟﯘ ﻳﯜﯕﻜﺎﯓ، ﺳﯩﻴﺎﺳﯩﻲ ﺑﻴﯘﺭﻭﻧﯩﯔ ﺳﯩﻴﺎﺳﯩﻲ-ﻗﺎﻧﯘﻥ ﻛﻮﻣﯩﺘﯧﺘﯩﻨﯩﯔ ﺑﺎﺷﻠﯩﻘﻰ، ﺋﯘ ﻳﻪﻧﻪ، 2002 ‏-ﻳﯩﻠﯩﺪﯨﻦ 2007 ‏- ﻳﯩﻠﯩﻐﺎ ﻗﻪﺩﻩﺭ، ﺧﯩﺘﺎﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﻯ ﺑﻮﻟﯘﭖ ﯞﻩﺯﯨﭙﻪ ﺋﯚﺗﯩﮕﻪﻥ؛ ﺋﯘ، ﺧﯩﺘﺎﻳﺪﺍ ﻣﯘﻗﯩﻤﻠﯩﻖ ﺧﯩﺰﻣﯩﺘﯩﺪﻩ ﻣﯘﺗﻪﺧﻪﺳﺴﯩﺲ ﺩﻩﭖ ﻗﺎﺭﯨﻠﯩﯟﺍﺗﻘﺎﻥ ﺑﯩﺮ ﺷﻪﺧﺲ. ﺷﯘﯕﺎ ﺋﯘﻧﯩﯔ ﺑﯘ ﻗﯧﺘﯩﻤﻘﻰ ﺋﯘﻳﻐﯘﺭ ﺋﯧﻠﯩﺪﻩ ﺋﯧﻠﯩﭗ ﺑﺎﺭﻏﺎﻥ ﺗﻪﻛﺸﯜﺭﯛﭖ ﺗﻪﺗﻘﯩﻖ ﻗﯩﻠﯩﺶ ﭘﺎﺋﺎﻟﯩﻴﯩﺘﻰ ﻛﯚﺯﻩﺗﻜﯜﭼﯩﻠﻪﺭﻧﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﻤﺎﻗﺘﺎ.

"ﺋﯘﻳﻐﯘﺭ ﺭﺍﻳﻮﻧﯩﻨﯩﯔ ﻣﯘﻗﯩﻤﻠﯩﻘﻰ ﺋﯜﭼﯜﻥ، ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﻰ ﺋﯩﻠﮕﯩﺮﻯ ﺳﯜﺭﯛﺵ ﻛﯧﺮﻩﻙ"

ﺟﯘ ﻳﯜﯕﻜﺎﯓ ﺗﻪﻛﺸﯜﺭﯛﺵ ﻧﻪﺗﯩﺠﯩﺴﯩﺪﯨﻦ ﻛﯧﻴﯩﻦ ﻗﯩﻠﻐﺎﻥ ﺳﯚﺯﯨﺪﻩ، ﺷﯩﻨﺠﺎﯕﻨﯩﯔ ﺗﻪﺭﻩﻗﻘﯩﻴﺎﺗﻰ ﯞﻩ ﻣﯘﻗﯩﻤﻠﯩﻘﻰ ﺟﯘﯕﮕﻮﻧﯩﯔ ﺗﻪﺭﻩﻗﻘﯩﻴﺎﺗﻰ ﯞﻩ ﻣﯘﻗﯩﻤﻠﯩﻘﯩﻐﺎ ﺋﺎﻻﻗﯩﺪﺍﺭ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺋﻪﻫﻤﯩﻴﻪﺗﻜﻪ ﺋﯩﮕﻪ ﭼﻮﯓ ﻣﻪﺳﯩﻠﻪ ﺩﻩﭖ ﺗﻪﻛﯩﺘﻠﯩﮕﻪﻥ. ﺋﯘ ﻳﻪﻧﻪ، ﺋﯘﻳﻐﯘﺭ ﺭﺍﻳﻮﻧﯩﺪﺍ ﻣﯘﻗﯩﻤﻠﯩﻘﻨﻰ ﺋﻪﺑﻪﺩﯨﻴﻠﻪﺷﺘﯜﺭﯛﺵ ﺋﯜﭼﯜﻥ، ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﻰ ﺋﯩﻠﮕﯩﺮﻯ ﺳﯜﺭﯛﺵ ﻛﯧﺮﻩﻛﻠﯩﻜﻰ ﭘﯩﻜﺮﯨﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺳﯚﺯﯨﻨﯩﯔ ﺧﯘﻻﺳﯩﺴﯩﺪﺍ، ﺩﯙﻟﻪﺕ ﺋﯩﭽﻰ-ﺳﯩﺮﺗﯩﺪﯨﻜﻰ 3 ﺧﯩﻞ ﻛﯜﭼﻠﻪﺭﮔﻪ ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺸﻨﻰ ﺋﯩﺰﭼﯩﻞ ﭼﯩﯔ ﺗﯘﺗﯘﺷﻨﻰ ﺗﻪﻛﯩﺘﻠﯩﮕﻪﻥ. ﺟﯘﻧﯩﯔ ﺳﯚﺯﯨﺪﯨﻜﻰ ﻳﯘﻗﯩﺮﯨﻘﻰ 3 ﻧﯘﻗﺘﯩﺪﯨﻦ ﻳﯧﯖﻰ ﺑﻮﻟﻐﯩﻨﻰ، ﺋﯩﻘﺘﯩﺴﺎﺩﻧﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯗﺵ ﺋﺎﺭﻗﯩﻠﯩﻖ، ﻣﯘﻗﯩﻤﻠﯩﻘﻘﺎ ﻛﯧﭙﯩﻠﻠﯩﻚ ﻗﯩﻠﯩﺶ ﭘﯩﻜﺮﻯ ﺑﻮﻟﯘﭖ، ﺑﯘ، ﺋﯘﻳﻐﯘﺭ ﺭﺍﻳﻮﻧﯩﺪﺍ ﺋﺎﻟﺪﯨﻨﻘﻰ ﻫﻪﭘﺘﻪ ﺋﯚﺗﻜﯜﺯﯛﻟﮕﻪﻥ 11 ‏- ﻧﯚﯞﻩﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﯩﺪﯨﻤﯘ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ. ﻣﻪﺯﻛﯘﺭ ﻗﯘﺭﯗﻟﺘﺎﻳﺪﺍ ﺗﯘﺭﭘﺎﻥ ﯞﻩﻛﯩﻠﻰ ﺑﺎﺷﻘﺎ 11 ﻛﯩﺸﻰ ﺑﯩﻠﻪﻥ ﺑﯩﺮﻟﯩﻜﺘﻪ ﺗﻪﻛﻠﯩﭗ ﺳﯘﻧﯘﭖ، ﺋﯘﻳﻐﯘﺭ ﺭﺍﻳﻮﻧﯩﺪﺍ، ﻳﯧﺰﺍ-ﺑﺎﺯﺍﺭ ﺋﺎﻫﺎﻟﯩﺴﯩﻨﯩﯔ ﺋﯩﻘﺘﯩﺴﺎﺩﯨﻲ ﻛﯩﺮﯨﻤﯩﻨﻰ ﺋﯚﺳﺘﯜﺭﯛﺷﻨﻰ ﺭﺍﻳﻮﻧﺪﺍ ﻣﯘﻗﯩﻤﻠﯩﻘﻨﻰ ﺳﺎﻗﻼﺷﻨﯩﯔ ﺋﯜﻧﯜﻣﻠﯜﻙ ﭼﺎﺭﯨﺴﻰ ﺩﻩﭖ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.

ﻛﯚﺯﻩﺗﻜﯜﭼﯩﻠﻪﺭﻧﯩﯔ ﻗﺎﺭﯨﺸﯩﭽﻪ، ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﯞﻩﺗﻪﻥ ﺋﯩﭽﯩﺪﻩ ﺋﯜﺯﻟﯜﻛﺴﯩﺰ ﺩﺍﯞﺍﻣﻠﯩﺸﯩﺸﻰ، ﺧﻪﻟﻘﺌﺎﺭﺍ ﺟﺎﻣﺎﺋﻪﺕ ﭘﯩﻜﺮﯨﺪﻩ ﺋﯘﻳﻐﯘﺭ ﻣﻪﺳﯩﻠﯩﺴﯩﻨﯩﯔ ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯧﺮﻯ ﺋﯩﺰﭼﯩﻞ ﻛﯜﻧﺘﻪﺭﺗﯩﭗ ﺋﯩﮕﯩﻠﯩﺸﻰ ﯞﻩ ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﺳﻪﯞﻩﺑﯩﺪﯨﻦ، ﺩﯗﻧﻴﺎ ﺟﺎﻣﺎﺋﻪﺕ ﭘﯩﻜﺮﯨﻨﯩﯔ ﺩﯨﻘﻘﻪﺕ ﻣﻪﺭﻛﯩﺰﯨﮕﻪ ﺋﺎﻳﻠﯩﻨﯩﺸﻰ، ﺧﯩﺘﺎﻱ ﻣﻪﺭﻛﯩﺰﻯ ﻫﯚﻛﯜﻣﯩﺘﯩﻨﻰ، ﺋﯘﻳﻐﯘﺭ ﻣﻪﺳﯩﻠﯩﺴﯩﻨﻰ ﻫﻪﻝ ﻗﯩﻠﯩﺸﻨﯩﯔ ﭼﺎﺭﯨﺴﻰ ﺋﯜﺳﺘﯩﺪﻩ ﻗﺎﻳﺘﺎ ﺋﯩﺰﺩﯨﻨﯩﺸﻜﻪ ﻣﻪﺟﺒﯘﺭ ﻗﯩﻠﻐﺎﻥ. ﺋﯘﻳﻐﯘﺭ ﺭﺍﻳﻮﻧﯩﺪﺍ ﺋﯚﺗﻜﯜﺯﯛﻟﮕﻪﻥ 11 ‏- ﻧﯚﯞﻩﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﯩﺪﺍ، ﺋﯘﻳﻐﯘﺭ ﯞﻩﻛﯩﻠﻠﯩﺮﯨﻨﯩﯔ ﺳﺎﻧﯩﻨﻰ ﻳﯩﻠﻼﺭﺩﯨﻜﯩﮕﻪ ﻧﯩﺴﺒﻪﺗﻪﻥ ﺋﺎﻻﻫﯩﺪﻩ ﻛﯚﭘﻪﻳﺘﯩﺸﻰ، ﻣﺎﻧﺎ ﺑﯘ ﺋﯩﺰﺩﯨﻨﯩﺸﻨﯩﯔ ﺑﯩﺮ ﺑﯩﺸﺎﺭﯨﺘﻰ. ﺋﻪﻣﻤﺎ ﻳﻪﻧﻪ ﺑﻪﺯﻯ ﻣﯘﻻﻫﯩﺰﯨﭽﯩﻠﻪﺭﻧﯩﯔ ﻗﺎﺭﯨﺸﯩﭽﻪ، ﺟﯘ ﻳﯜﯕﻜﺎﯕﻨﯩﯔ ﺋﯩﻘﺘﯩﺴﺎﺩﻧﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯗﺵ ﺋﺎﺭﻗﯩﻠﯩﻖ ﻣﯘﻗﯩﻤﻠﯩﻘﻨﻰ ﺋﻪﺑﻪﺩﯨﻴﻠﻪﺷﺘﯜﺭﯛﺵ ﭘﯩﻜﺮﻯ ﻳﯧﯖﻰ ﭘﯩﻜﯩﺮ ﺋﻪﻣﻪﺱ، ﺑﯘ ﭘﻪﻗﻪﺕ، ﺧﯘ ﺟﯩﻨﺘﺎﯞ 17 ‏- ﻗﯘﺭﯗﻟﺘﺎﻳﺪﺍ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﻰ ﻫﻪﻡ ﺗﯧﺰ ﻫﻪﻡ ﻳﺎﺧﺸﻰ ﺭﺍﯞﺍﺟﻼﻧﺪﯗﺭﯗﺵ ﺩﯦﮕﻪﻥ ﭼﺎﻗﯩﺮﯨﻘﻨﯩﯔ ﺗﻪﻛﺮﺍﺭﻟﯩﻨﯩﺸﻰ.

" ﻳﯧﯖﻰ ﭼﺎﻗﯩﺮﯨﻖ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﻣﯩﻠﻠﯩﻲ ﺳﯩﻴﺎﺳﻪﺕ ﺋﻪﻧﺌﻪﻧﯩﺴﯩﺪﯗﺭ "

ﺋﯘﻳﻐﯘﺭ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﯩﯔ ﺑﯩﻠﺪﯛﺭﯛﺷﯩﭽﻪ، ﻫﻪﺭ ﺑﯩﺮ ﺩﻩﯞﺭ ﺋﺎﻟﻤﺎﺷﻘﺎﻧﺪﺍ، ﻫﺎﻛﯩﻤﯩﻴﻪﺕ ﺑﯧﺸﯩﺪﯨﻜﻰ ﺳﯩﻴﺎﺳﯩﻲ ﮔﯘﺭﯗﻫﻼﺭ ﺋﺎﻟﻤﺎﺷﻘﺎﻧﺪﺍ، ﺋﯘﻳﻐﯘﺭ ﻣﻪﺳﯩﻠﯩﺴﯩﻨﻰ ﻫﻪﻝ ﻗﯩﻠﯩﺸﻨﯩﯔ ﻳﯧﯖﻰ ﭼﺎﻗﯩﺮﯨﻘﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺵ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﻣﯩﻠﻠﯩﻲ ﺳﯩﻴﺎﺳﻪﺕ ﺋﻪﻧﺌﻪﻧﯩﺴﯩﺪﯗﺭ؛ ﺑﯘ ﭼﺎﻗﯩﺮﯨﻘﻼﺭ، ﭘﻪﻗﻪﺕ ﻣﻪﺳﯩﻠﯩﻨﯩﯔ ﺋﺎﺳﺎﺳﯩﻲ ﻗﯩﺴﻤﯩﻨﻰ ﻫﻪﻝ ﻗﯩﻠﯩﺸﻘﺎ ﻳﯜﺯﻟﻪﻧﮕﻪﻥ ﺋﻪﻣﻪﺱ. ﻣﻪﺳﯩﻠﻪﻥ، ﺋﯘﻳﻐﯘﺭ ﯞﻩ ﺧﯩﺘﺎﻳﺪﯨﻦ ﺋﯩﺒﺎﺭﻩﺕ ﺋﯩﻜﻜﻰ ﻣﯩﻠﻠﻪﺗﻨﯩﯔ ﻫﺎﻛﯩﻤﯩﻴﻪﺕ ﻗﺎﺗﻠﯩﻤﯩﺪﺍ، ﺳﻮﺩﺍ-ﺳﺎﻧﺎﺋﻪﺕ ﺳﺎﻫﻪﺳﯩﺪﻩ ﺋﯩﮕﯩﻠﯩﮕﻪﻥ ﻧﯩﺴﺒﯩﺘﯩﺪﯨﻜﻰ ﺗﻪﯕﺴﯩﺰﻟﯩﻚ ﻫﯧﭽﻘﺎﭼﺎﻥ ﻫﻪﻝ ﻗﯩﻠﯩﻨﯩﺪﯨﻐﺎﻥ ﻣﻪﺳﯩﻠﯩﻠﻪﺭ ﻗﺎﺗﺎﺭﯨﺪﺍ ﺗﯩﻠﻐﺎ ﺋﯧﻠﯩﻨﯩﭗ ﺑﺎﻗﻘﺎﻥ ﺋﻪﻣﻪﺱ.

ﺟﯘ ﻳﯜﯕﻜﺎﯕﻨﯩﯔ ﺋﯩﻘﺘﯩﺴﺎﺩﻧﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯗﭖ ﻣﯘﻗﯩﻤﻠﯩﻘﻨﻰ ﺋﻪﺑﻪﺩﯨﻴﻠﻪﺷﺘﯜﺭﯛﺵ ﺗﻪﺷﻪﺑﺒﯘﺳﯩﻨﻰ ﺋﯘﻳﻐﯘﺭ ﭘﺎﺋﺎﻟﯩﻴﻪﺗﭽﯩﻠﯩﺮﻯ ﺋﯘﻳﻐﯘﺭ ﻣﻪﺳﯩﻠﯩﺴﯩﻨﻰ ﻫﻪﻝ ﻗﯩﻠﯩﺶ ﺋﯜﭼﯜﻥ ﺗﯩﺮﯨﺸﻘﺎﻧﻠﯩﻖ ﺋﻪﻣﻪﺱ، ﻣﻪﺳﯩﻠﯩﻨﻰ ﻳﯧﭙﯩﺶ ﯞﻩ ﻳﻮﺷﯘﺭﯗﺵ ﺋﯜﭼﯜﻥ ﻛﯚﺭﺳﯩﺘﯩﻠﮕﻪﻥ ﺗﯩﺮﯨﺸﭽﺎﻧﻠﯩﻖ ﺩﻩﭖ ﻗﺎﺭﺍﺷﻤﺎﻗﺘﺎ.

ﺷﯩﯟﯨﺘﺴﺎﺭﯨﻴﯩﺪﻩ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﭘﺎﺋﺎﻟﯩﻴﻪﺗﭽﻰ ﺟﺎﻻﻟﯩﺪﯨﻦ ﺋﻪﭘﻪﻧﺪﯨﻤﯘ ﺑﯘ ﻫﻪﻗﺘﻪ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺷﯩﻨﺨﯘﺍ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﺗﻮﺭﻯ ﺟﯘ ﻳﯜﯕﻜﺎﯕﻨﯩﯔ ﺳﯚﺯﯨﻨﻰ ﺧﯩﺘﺎﻳﭽﻪ ﯞﻩ ﺋﯧﻨﮕﯩﻠﯩﺰﭼﻪ ﺳﺎﻧﻠﯩﺮﯨﺪﺍ ﺋﯩﻜﻜﻰ ﺧﯩﻞ ﺧﻪﯞﻩﺭ ﻗﯩﻠﻐﺎﻥ. ﺧﯩﺘﺎﻳﭽﻪ ﺳﺎﻧﯩﺪﺍ، ﻫﻪﺭ ﻣﯩﻠﻠﻪﺕ ﺧﻪﻟﻘﯩﻨﯩﯔ ﺗﯘﺭﻣﯘﺷﯩﻨﻰ ﻳﺎﺧﺸﯩﻼﺵ ﺩﯦﮕﻪﻥ ﺳﯚﺯ، ﺋﯧﻨﮕﯩﻠﯩﺰﭼﻪ ﺳﺎﻧﯩﺪﺍ، ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﺘﺎ ﻣﯩﻠﻠﻪﺕ ﺋﺎﻳﺮﯨﻤﭽﯩﻠﯩﻘﻰ ﻗﯩﻠﻤﺎﺳﻠﯩﻖ ﺩﻩﭖ ﺑﯧﺮﯨﻠﮕﻪﻥ. ﺧﯩﺘﺎﻳﭽﻪ ﺳﺎﻧﯩﺪﺍ ﺋﺎﻻﻫﯩﺪﻩ ﺗﯩﻠﻐﺎ ﺋﯧﻠﯩﻨﻐﺎﻥ 3 ﺧﯩﻞ ﻛﯜﭼﻠﻪﺭﮔﻪ ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺶ ﺗﻪﺷﻪﺑﺒﯘﺳﻰ، ﺋﯧﻨﮕﯩﻠﯩﺰﭼﻪ ﺳﺎﻧﯩﺪﺍ ﭼﯩﻘﯩﺮﯨﯟﯦﺘﯩﻠﮕﻪﻥ. ﻣﺎﻧﺎ ﺑﯘ ﺋﻪﻫﯟﺍﻝ ﺟﺎﻻﻟﯩﺪﯨﻦ ﺋﻪﭘﻪﻧﺪﯨﻨﯩﯔ ﻳﯘﻗﯩﺮﯨﻘﻰ ﻗﺎﺭﺍﺷﻠﯩﺮﯨﻨﯩﯔ ﺗﻮﻏﺮﯨﻠﯩﻘﯩﻨﻰ ﺋﯩﺴﭙﺎﺗﻠﯩﻤﺎﻗﺘﺎ. (ﺷﯚﻫﺮﻩﺕ ﻫﻮﺷﯘﺭ)