ﺩﯗﻧﻴﺎ ﺳﻪﮬﯩﻴﻪ ﺗﻪﺷﻜﯩﻼﺗﻰ ﺩﯗﻧﻴﺎ ﺧﻪﻟﻘﯩﻨﻰ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﻘﺎ ﭼﺎﻗﯩﺮﺩﻯ

• ﻣﯘﺧﺒﯩﺮﯨﻤﯩﺰ ﻣﯧﮭﺮﯨﺒﺎﻧﻨﯩﯔ ﺑﯘ ﮬﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﺩﯗﻧﻴﺎ ﺳﻪﮬﯩﻴﻪ ﺗﻪﺷﻜﯩﻼﺗﻰ ﻳﯧﻘﯩﻨﺪﺍ، ﮬﻪﺭﻗﺎﻳﺴﻰ ﺩﯙﻟﻪﺗﻠﻪﺭﺩﻩ، ﺑﻮﻟﯘﭘﻤﯘ ﻛﯩﺮﯨﻤﻰ ﺗﯚﯞﻩﻥ ﻳﺎﻛﻰ ﺋﻮﺭﺗﺎ ﮬﺎﻝ ﺑﻮﻟﻐﺎﻥ ﺩﯙﻟﻪﺗﻠﻪﺭﺩﻩ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﮔﻪ ﮔﯩﺮﯨﭙﺘﺎﺭ ﺑﻮﻟﻐﺎﻥ ﯞﻩ ﻣﻪﺯﻛﯘﺭ ﻛﯧﺴﻪﻟﻠﯩﻜﻠﻪﺭ ﺗﯜﭘﻪﻳﻠﯩﺪﯨﻦ ﺋﯚﻟﯜﭖ ﻛﯧﺘﯩﯟﺍﺗﻘﺎﻥ ﻛﯩﺸﯩﻠﻪﺭ ﺳﺎﻧﯩﻨﯩﯔ ﻛﯜﻧﺴﯧﺮﻯ ﻛﯚﭘﯩﻴﯩﯟﺍﺗﻘﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ، ﺩﯗﻧﻴﺎ ﺧﻪﻟﻘﯩﻨﻰ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﻘﺎ ﭼﺎﻗﯩﺮﺩﻯ.

ﺩﯗﻧﻴﺎ ﺳﻪﮬﯩﻴﻪ ﺗﻪﺷﻜﯩﻼﺗﻰ ﻳﻪﻧﻪ، ﻣﻪﺯﻛﯘﺭ ﺗﻪﺷﻜﯩﻼﺗﻨﯩﯔ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﻧﯩﯔ ﺋﺎﻟﺪﯨﻨﻰ ﺋﯧﻠﯩﺸﺘﺎ ﻣﻪﺧﺴﯘﺱ ﮬﻪﺭﯨﻜﻪﺕ ﭘﯩﻼﻧﯩﻨﻰ ﺗﯜﺯﯛﭖ ﭼﯩﻘﻘﺎﻧﻠﯩﻘﯩﻨﻰ ﺷﯘﻧﺪﺍﻗﻼ ﻣﻪﺯﻛﯘﺭ ﮬﻪﺭﯨﻜﻪﺕ ﭘﯩﻼﻧﯩﻨﻰ ﺋﯩﺠﺮﺍ ﻗﯩﻠﯩﺶ ﺋﺎﺭﻗﯩﻠﯩﻖ، ﻛﻪﻟﮕﯜﺳﻰ 10 ﻳﯩﻞ ﺋﯩﭽﯩﺪﻩ ﻧﯘﺭﻏﯘﻧﻠﯩﻐﺎﻥ ﻛﯩﺸﯩﻠﻪﺭﻧﻰ ﺋﯚﻟﯜﻣﺪﯨﻦ ﻗﯘﺗﻘﯘﺯﯗﭖ ﻗﯧﻠﯩﺸﻘﺎ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.

ﺩﯗﻧﻴﺎ ﺳﻪﮬﯩﻴﻪ ﺗﻪﺷﻜﯩﻼﺗﻰ ﺗﻪﺭﯨﭙﯩﺪﯨﻦ ﺋﯧﻼﻥ ﻗﯩﻠﯩﻨﻐﺎﻥ ﺑﯘ ﺩﻭﻛﻼﺗﺘﺎ "ﮬﺎﺯﯨﺮ ﺩﯗﻧﻴﺎﺩﺍ ﻣﯩﻠﻴﻮﻧﻠﯩﻐﺎﻥ ﻛﯩﺸﯩﻠﻪﺭ ﻳﯜﺭﻩﻙ ﻛﯧﺴﯩﻠﻰ، ﺳﻪﻛﺘﻪ ﻛﯧﺴﯩﻠﻰ، ﺩﯨﺌﺎﺑﯩﺖ ﻛﯧﺴﯩﻠﻰ ﯞﻩ ﺗﯜﺭﻟﯜﻙ ﺭﺍﻙ ﻛﯧﺴﻪﻟﻠﯩﻜﻠﯩﺮﻯ ﺗﯜﭘﻪﻳﻠﯩﺪﯨﻦ ﺋﺎﺯﺍﺑﻼﻧﻤﺎﻗﺘﺎ ﮬﻪﺗﺘﺎ ﮬﺎﻳﺎﺗﯩﺪﯨﻦ ﺋﺎﻳﺮﯨﻠﻤﺎﻗﺘﺎ" ﺩﻩﭖ ﺋﻪﺳﻜﻪﺭﺗﯩﻠﮕﻪﻥ ﺑﻮﻟﯘﭖ، ﻛﯚﭘﻠﯩﮕﻪﻥ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﻧﯩﯔ ﻳﻪﻧﯩﻼ ﺋﺎﻟﺪﯨﻨﻰ ﺋﺎﻟﻐﯩﻨﻰ ﺑﻮﻟﯩﺪﯨﻐﺎﻧﻠﯩﻘﻰ ﺷﯘﻧﺪﺍﻗﻼ ﺩﯗﻧﻴﺎﺩﺍ ﺗﺎﺭﻗﯩﻠﯩﯟﺍﺗﻘﺎﻥ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻳﯘﻗﯘﻣﻠﯘﻕ ﻛﯧﺴﻪﻟﻠﯩﻜﻠﻪﺭﻧﻰ ﺗﻮﺳﯘﭖ ﻗﯧﻠﯩﺶ ﺋﯩﻤﻜﺎﻧﯩﻴﯩﺘﯩﻤﯘ ﻳﻮﻕ ﺋﻪﻣﻪﺳﻠﯩﻜﻰ ﻛﯚﺭﺳﯩﺘﯩﻠﮕﻪﻥ.

ﺋﯚﻟﮕﻪﻧﻠﻪﺭ ﺳﺎﻧﻰ ﺋﻪﯓ ﻛﯚﭖ ﺑﻮﻟﻐﯩﻨﻰ ﺋﻮﺗﺘﯘﺭﺍ ﻳﺎﻛﻰ ﺗﯚﯞﻩﻥ ﻛﯩﺮﯨﻤﺪﯨﻜﻰ ﺩﯙﻟﻪﺗﻠﻪﺭ

ﺩﯗﻧﻴﺎ ﺳﻪﮬﯩﻴﻪ ﺗﻪﺷﻜﯩﻼﺗﻰ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭ ﯞﻩ ﺳﺎﻗﻠﯩﻘﻨﻰ ﺳﺎﻗﻼﺵ ﺑﯚﻟﯜﻡ ﺑﺎﺷﻠﯩﻘﻰ ﺭﻭﺑﯧﺮﺕ ﺑﻪﮔﻠﯩﺨﻮﻝ (Robert Beaglehole) ﺋﻪﭘﻪﻧﺪﻯ "ﻛﯚﭖ ﺳﺎﻧﺪﯨﻜﻰ ﻛﯩﺸﯩﻠﻪﺭ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﻧﻰ ﭘﻪﻗﻪﺕ ﺑﺎﻱ ﺩﯙﻟﻪﺗﻠﻪﺭﺩﯨﻜﻰ ﺑﺎﻳﻼﺭﺩﯨﻼ ﺑﻮﻟﯩﺪﯗ ﺩﻩﭖ ﻗﺎﺭﺍﻳﺪﯗ. ﻟﯧﻜﯩﻦ ﺋﻪﻣﻪﻟﯩﻲ ﭘﺎﻛﯩﺘﻼﺭﻏﺎ ﺋﺎﺳﺎﺳﻼﻧﻐﺎﻧﺪﺍ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭ ﺋﻪﯓ ﻛﯚﭖ ﻳﯜﺯ ﺑﯧﺮﯨﯟﺍﺗﻘﺎﻥ ﺩﯙﻟﻪﺗﻠﻪﺭ ﻛﯩﺮﯨﻤﻰ ﺗﯚﯞﻩﻥ ﻳﺎﻛﻰ ﺋﻮﺭﺗﺎﮬﺎﻝ ﺑﻮﻟﻐﺎﻥ ﺩﯙﻟﻪﺗﻠﻪﺭ ﺑﻮﻟﯘﭖ ﮬﯧﺴﺎﺑﻠﯩﻨﯩﺪﯗ، ﻳﻪﻧﻰ ﻣﻪﺯﻛﯘﺭ ﻛﯧﺴﻪﻟﻠﯩﻜﻠﻪﺭ ﺗﯜﭘﻪﻳﻠﯩﺪﯨﻦ ﺋﯚﻟﯜﭖ ﻛﯧﺘﯩﯟﺍﺗﻘﺎﻥ ﻛﯩﺸﯩﻠﻪﺭ ﺳﺎﻧﯩﻨﯩﯔ 80٪ ﺋﻰ ﻛﯩﺮﯨﻤﻰ ﺗﯚﯞﻩﻥ ﻳﺎﻛﻰ ﺋﻮﺭﺗﺎﮬﺎﻝ ﺑﻮﻟﻐﺎﻥ ﺩﯙﻟﻪﺗﻠﻪﺭﺩﻩ ﺑﻮﻟﯘﭖ، ﺋﺎﻳﺎﻟﻼﺭ ﻛﯚﭖ ﺳﺎﻧﻨﻰ ﺋﯩﮕﯩﻠﯩﮕﻪﻥ" ﺩﻩﭖ ﻛﯚﺭﺳﻪﺗﺘﻰ.

ﺧﯩﺘﺎﻳﺪﺍ، ﺋﻮﺗﺘﯘﺭﺍ ﻳﺎﺷﻠﯩﻘﻼﺭﻧﯩﯔ ﺋﯚﻟﯜﻣﯩﻨﯩﯔ ﺋﺎﺳﺎﺳﯩﻲ ﺳﻪﯞﻩﺑﻰ ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭ

ﻳﯧﯖﻰ ﺋﯩﻨﮕﻼﻧﻼﺭ ﻣﯧﺪﯨﺘﺴﯩﻨﺎ ﮊﻭﺭﻧﯩﻠﯩﺪﺍ ﺋﯧﻼﻥ ﻗﯩﻠﯩﻨﻐﺎﻥ ﺋﻪﯓ ﻳﯧﯖﻰ ﺩﻭﻛﻼﺗﺘﺎ، ﺧﯩﺘﺎﻳﺪﺍ ﮬﺎﺯﯨﺮ ﻳﯜﺭﻩﻙ ﻛﯧﺴﯩﻠﻰ، ﺳﻪﻛﺘﻪ ﻛﯧﺴﯩﻠﻰ، ﺩﯨﺌﺎﺑﯩﺖ ﻛﯧﺴﯩﻠﻰ ﯞﻩ ﺗﯜﺭﻟﯜﻙ ﺭﺍﻙ ﻛﯧﺴﻪﻟﻠﯩﻜﻠﯩﺮﻯ ﺋﻮﺗﺘﯘﺭﺍ ﻳﺎﺷﻠﯩﻘﻼﺭﻧﯩﯔ ﺋﯚﻟﯜﻣﯩﻨﯩﯔ ﺋﺎﺳﺎﺳﻰ ﺳﻪﯞﻩﺑﻰ ﺑﻮﻟﯘﯞﺍﺗﻘﺎﻧﻠﯩﻘﻰ ﻣﻪﻟﯘﻡ ﻗﯩﻠﯩﻨﻐﺎﻥ ﮬﻪﻣﺪﻩ ﺑﯘﻧﺪﺍﻕ ﺑﻮﻟﯘﺷﻰ ﻳﯘﻗﯩﺮﻯ ﻗﺎﻥ ﺑﯧﺴﯩﻢ، ﺗﺎﻣﺎﻛﺎ ﭼﯧﻜﯩﺶ ﯞﻩ ﻳﯧﻤﻪﻙ - ﺋﯩﭽﻤﻪﻙ ﻗﺎﺗﺎﺭﻟﯩﻘﻼﺭ ﺑﯩﻠﻪﻥ ﺯﯨﭻ ﻣﯘﻧﺎﺳﯩﯟﻩﺗﻠﯩﻚ ﺋﯩﻜﻪﻥ.

ﺩﯗﻧﻴﺎ ﺳﻪﮬﯩﻴﻪ ﺗﻪﺷﻜﯩﻼﺗﻰ ﺋﯧﻼﻥ ﻗﯩﻠﻐﺎﻥ ﺩﻭﻛﻼﺗﺘﺎ ﻛﯚﺭﺳﯩﺘﯩﻠﯩﺸﯩﭽﻪ : 1991 - ﻳﯩﻠﯩﺪﯨﻦ 2002 - ﻳﯩﻠﯩﻐﺎ ﻗﻪﺩﻩﺭ، ﺧﯩﺘﺎﻳﺪﯨﻜﻰ ﻳﯘﻗﯩﺮﻯ ﻗﺎﻥ ﺑﯧﺴﯩﻤﻐﺎ ﮔﯩﺮﯨﭙﺘﺎﺭ ﺑﻮﻟﻐﺎﻧﻼﺭﻧﯩﯔ ﻧﯩﺴﺒﯩﺘﻰ 31٪ ﺋﯚﺭﻟﯩﮕﻪﻥ. ﺩﯨﺌﺎﺑﯩﺖ ﻛﯧﺴﯩﻠﻰ ﺑﻮﻟﺴﺎ 40٪ ﻛﯚﭘﻪﻳﮕﻪﻥ. ﺩﻭﻛﻼﺗﺘﺎ ﻳﻪﻧﻪ، ﻛﻪﻟﮕﯜﺳﻰ 25 ﻳﯩﻞ ﺋﯩﭽﯩﺪﻩ ﺧﯩﺘﺎﻳﺪﯨﻜﻰ ﻳﯜﺭﻩﻙ ﻗﺎﻥ ﺗﻮﻣﯘﺭ ﻛﯧﺴﯩﻠﻰ ﺗﯜﭘﻪﻳﻠﯩﺪﯨﻦ ﺋﯚﻟﯩﺪﯨﻐﺎﻧﻼﺭ ﺳﺎﻧﻰ 9 ﻣﯩﻠﻴﻮﻧﻐﺎ ﻳﯧﺘﯩﺪﯨﻜﻪﻥ ﮬﻪﻣﺪﻩ ﻛﯚﭖ ﺳﺎﻧﺪﯨﻜﯩﺴﻰ 35 ﻳﺎﺷﺘﯩﻦ 64 ﻳﺎﺷﻘﯩﭽﻪ ﺑﻮﻟﻐﺎﻥ ﺋﻮﺗﺘﯘﺭﺍ ﻳﺎﺷﻠﯩﻘﻼﺭ ﺑﻮﻟﯘﭖ ﮬﯧﺴﺎﺑﻠﯩﻨﯩﺪﯨﻜﻪﻥ.

ﻛﯚﻛﺮﻩﻙ ﺭﺍﻛﻰ ﺗﯜﭘﻪﻳﻠﯩﺪﯨﻦ ﺋﯚﻟﯜﭖ ﻛﯧﺘﯩﯟﺍﺗﻘﺎﻧﻼﺭ ﺷﯩﺪﺩﻩﺕ ﺑﯩﻠﻪﻥ ﻛﯚﭘﻪﻳﻤﻪﻛﺘﻪ

ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭﻧﯩﯔ ﺋﻪﯞﺝ ﺋﯧﻠﯩﺸﻰ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ، ﻛﯚﻛﺮﻩﻙ ﺭﺍﻛﯩﻤﯘ ﺋﺎﻳﺎﻟﻼﺭﻧﯩﯔ ﮬﺎﻳﺎﺗﯩﻐﺎ ﺯﻭﺭ ﺗﻪﮬﺪﯨﺖ ﺋﯧﻠﯩﭗ ﻛﻪﻟﻤﻪﻛﺘﻪ.

ﺋﻪﻧﮕﯩﻠﯩﻴﻪ ﺏ ﺏ ﺱ ﺭﺍﺩﯨﺌﻮ ﺗﯧﻠﯧﯟﯨﺰﯨﻴﻪ ﺷﯩﺮﻛﯩﺘﯩﻨﯩﯔ ﺧﻪﯞﻩﺭﻟﻪﺭ ﺗﻮﺭ ﺑﯧﺘﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ ﻣﻪﻟﯘﻣﺎﺗﺘﺎ ﻛﯚﺭﺳﯩﺘﯩﻠﯩﺸﯩﭽﻪ، 1991 - ﻳﯩﻠﯩﺪﯨﻦ 2000 - ﻳﯩﻠﯩﻐﺎ ﻗﻪﺩﻩﺭ ﺧﯩﺘﺎﻳﺪﯨﻜﻰ ﻛﯚﻛﺮﻩﻙ ﺭﺍﻛﻰ ﺗﯜﭘﻪﻳﻠﯩﺪﯨﻦ ﺋﯚﻟﯜﯞﺍﺗﻘﺎﻥ ﺋﺎﻳﺎﻟﻼﺭ ﺳﺎﻧﻰ ﺋﯩﻠﮕﯩﺮﯨﻜﯩﺪﯨﻦ 40٪ ﻛﯚﭘﻪﻳﮕﻪﻥ ﮬﻪﻣﺪﻩ ﻣﻪﺯﻛﯘﺭ ﻛﯧﺴﻪﻟﻠﯩﻚ ﺗﯜﭘﻪﻳﻠﯩﺪﯨﻦ ﺋﯚﻟﯜﯞﺍﺗﻘﺎﻥ ﺋﺎﻳﺎﻟﻼﺭﻧﯩﯔ ﻛﯚﭖ ﺳﺎﻧﺪﯨﻜﯩﺴﻰ ﻳﯧﺰﺍ ﺋﺎﻳﺎﻟﻠﯩﺮﻯ ﺑﻮﻟﯘﭖ ﮬﯧﺴﺎﺑﻠﯩﻨﯩﺪﯨﻜﻪﻥ.

ﺧﯩﺘﺎﻱ ﺭﺍﻙ ﻛﯧﺴﯩﻠﻰ ﺟﻪﻣﺌﯩﻴﯩﺘﯩﻨﯩﯔ ﺑﺎﺷﻠﯩﻘﻰ ﺷﯜ ﮔﯘﺋﺎﯕﯟﯨﻲ ﺧﯩﺘﺎﻳﺪﺍ ﮬﺎﺯﯨﺮ ﮬﻪﺭ ﺋﻮﻥ ﻣﯩﯔ ﺋﺎﻳﺎﻝ ﺋﺎﺭﯨﺴﯩﺪﺍ ﺗﻪﺧﻤﯩﻨﻪﻥ 45 ﺋﺎﺩﻩﻣﻨﯩﯔ ﻛﯚﻛﺮﻩﻙ ﺭﺍﻛﻰ ﻛﯧﺴﻪﻟﻠﯩﻜﯩﮕﻪ ﮔﯩﺮﯨﭙﺘﺎﺭ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﮬﻪﻣﺪﻩ ﻛﯚﻛﺮﻩﻙ ﺭﺍﻛﯩﻐﺎ ﮔﯩﺮﯨﭙﺘﺎﺭ ﺑﻮﻟﻐﯘﭼﯩﻼﺭﻧﯩﯔ 85٪ ﺋﻰ 35 ﻳﺎﺷﺘﯩﻦ ﻳﯘﻗﯩﺮﻯ ﺋﺎﻳﺎﻟﻼﺭ ﺋﯩﻜﻪﻧﻠﯩﻜﯩﻨﻰ ﻣﻪﻟﯘﻡ ﻗﯩﻠﻐﺎﻥ.

ﺋﯘﻳﻐﯘﺭ ﺋﺎﻳﺎﻟﻠﯩﺮﯨﺪﺍ ﺑﯩﺨﻪﺳﺘﯩﻠﯩﻚ ﺋﯧﻐﯩﺮ

ﺋﯘﻳﻐﯘﺭ ﺋﯧﻠﯩﺪﯨﻜﻰ ﻛﯚﭘﻠﯩﮕﻪﻥ ﺩﻭﺧﺘﯘﺭﺧﺎﻧﯩﻼﺭﻧﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ، ﻣﻪﺯﻛﯘﺭ ﺭﺍﻳﻮﻧﺪﺍ، ﺋﺎﺳﺘﺎ ﺧﺎﺭﺍﻛﺘﯧﺮﻟﯩﻚ ﻛﯧﺴﻪﻟﻠﯩﻜﻠﻪﺭ ﺑﺎﺭﻏﺎﻧﺴﯧﺮﻯ ﻛﯚﭘﯩﻴﯩﺸﻜﻪ ﺑﺎﺷﻠﯩﻐﺎﻥ. ﺑﻮﻟﯘﭘﻤﯘ ﺋﺎﻳﺎﻟﻼﺭ ﺋﺎﺭﯨﺴﯩﺪﺍ ﻛﯚﻛﺮﻩﻙ ﺭﺍﻙ ﻛﯧﺴﻪﻟﻠﯩﻜﯩﮕﻪ ﮔﯩﺮﯨﭙﺘﺎﺭ ﺑﻮﻟﯘﯞﺍﺗﻘﺎﻧﻼﺭ ﻧﯩﺴﺒﻪﺕ ﺟﻪﮬﻪﺗﺘﻪ ﺋﯩﻠﮕﯩﺮﯨﻜﯩﺪﯨﻦ ﺧﯧﻠﯩﻼ ﻳﯘﻗﯩﺮﯨﻠﯩﻐﺎﻥ.

ﻣﻪﺳﯩﻠﻪﻥ، ﺋﯜﺭﯛﻣﭽﯩﺪﯨﻜﻰ ﻣﯧﺪﯨﺘﺴﯩﻨﺎ ﺋﯘﻧﯩﯟﯦﺮﺳﯩﺘﯧﺘﻰ 1 - ﺗﺎﺭﻣﺎﻕ ﺩﻭﺧﺘﯘﺭﺧﺎﻧﺎ ﻳﺎﺗﺎﻗﺨﺎﻧﯩﺴﯩﺪﯨﻜﻰ ﻛﻪﭼﻠﯩﻚ ﻧﯚﯞﻩﺗﭽﻰ ﺩﻭﺧﺘﯘﺭ ﻣﻪﺯﻛﯘﺭ ﺩﻭﺧﺘﯘﺭﺧﺎﻧﯩﻐﺎ ﮬﻪﺭ 3 - 4 ﻛﯜﻧﺪﻩ ﺑﯩﺮ ﻛﯚﻛﺮﻩﻙ ﺭﺍﻙ ﻛﯧﺴﯩﻠﯩﮕﻪ ﮔﯩﺮﯨﭙﺘﺎﺭ ﺑﻮﻟﻐﯘﭼﯩﻨﯩﯔ ﻛﯧﻠﯩﭗ ﺗﯘﺭﯨﺪﯨﻐﺎﻧﻠﯩﻘﯩﻨﻰ ﮬﻪﻣﺪﻩ ﻣﻪﺯﻛﯘﺭ ﺩﻭﺧﺘﯘﺭﺧﺎﻧﯩﺪﯨﻜﻰ ﺩﻭﺧﺘﯘﺭﻻﺭﻧﯩﯔ ﺑﯩﻤﺎﺭﻻﺭ ﺋﯜﭼﯜﻥ ﺑﻪﻛﻼ ﺋﯧﭽﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻛﯚﻛﺮﻩﻙ ﺭﺍﻙ ﻛﯧﺴﻪﻟﻠﯩﻜﻰ ﺋﻪﯓ ﻛﯚﭖ ﺑﻮﻟﻐﺎﻥ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﺋﯚﺳﻤﻪ ﻛﯧﺴﻪﻟﻠﯩﻜﻠﻪﺭ ﺩﻭﺧﺘﯘﺭﺧﺎﻧﯩﺴﯩﺪﯨﻜﻰ ﺑﯩﺮ ﺩﻭﺧﺘﯘﺭﻧﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﮬﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﻳﺎﻟﻼﺭﻧﯩﯔ ﮬﻪﻣﻤﯩﺴﯩﺪﻩ ﺩﯦﮕﯩﺪﻩﻙ ﻛﯚﻛﺮﻩﻙ ﺑﯧﺰﻯ ﺋﯚﺳﯜﺵ ﺋﺎﻻﻣﯩﺘﻰ ﺑﺎﺭ ﺋﯩﻜﻪﻥ، ﻟﯧﻜﯩﻦ ﺋﯘﻳﻐﯘﺭ ﺋﺎﻳﺎﻟﻠﯩﺮﻯ ﺩﺍﯞﺍﻣﻠﯩﻖ ﮬﺎﻟﺪﺍ ﺋﺎﺧﯩﺮﻗﻰ ﺑﺎﺳﻘﯘﭼﻐﺎ ﻳﻪﺗﻜﻪﻧﺪﻩ ﺋﺎﻧﺪﯨﻦ ﺗﻪﻛﺸﯜﺭﺗﻜﯩﻠﻰ ﻛﯧﻠﯩﺪﯨﻜﻪﻥ. (ﻣﯧﮭﺮﯨﺒﺎﻥ)