ﻏﻪﺭﺏ ﺩﯙﻟﻪﺗﻠﯩﺮﻯ ﻧﯩﻤﯩﺸﻘﺎ ﺧﯩﺘﺎﻱ ﺑﯩﻠﻪﻥ ﻗﺎﭼﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻨﻰ ﺧﺎﻟﯩﻤﺎﻳﺪﯗ؟

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻨﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﻏﻪﺭﺏ ﺋﻪﻟﻠﯩﺮﻯ ﺑﯩﻠﻪﻥ ﻗﺎﭼﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻘﺎ ﺷﯘﻧﺪﺍﻗﻼ ﻏﻪﺭﺏ ﺋﻪﻟﻠﯩﺮﯨﻨﻰ ﺳﯩﻴﺎﺳﻰ ﻫﻪﻡ ﺋﯩﺪﯦﺌﻮﻟﻮﮔﯩﻴﯩﻠﯩﻚ ﺋﯩﺨﺘﯩﻼﭘﻼﺭﺩﯨﻦ ﯞﺍﺯ ﻛﯧﭽﯩﺸﻜﻪ ﺋﯜﻧﺪﻩﭖ ﻛﯧﻠﯩﯟﺍﺗﻘﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﻏﻪﺭﺏ ﺋﻪﻟﻠﯩﺮﻯ ﺧﯩﺘﺎﻱ ﺑﯩﻠﻪﻥ ﺑﯘﻧﺪﺍﻕ ﺑﯩﺮ ﻛﯧﻠﯩﺸﯩﻢ ﺋﯩﻤﺰﺍﻻﺷﺘﯩﻦ ﺋﯚﺯﯨﻨﻰ ﻗﺎﭼﯘﺭﯗﭖ ﻛﻪﻟﻤﻪﻛﺘﻪ.

ﺋﺎﻧﺎﻟﯩﺰﭼﯩﻼﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﺧﯩﺘﺎﻳﺪﺍ ﻣﯘﺳﺘﻪﻗﯩﻞ ﺋﻪﺩﻟﯩﻴﻪ ﺳﯧﺴﺘﯩﻤﯩﺴﻰ ﻗﯘﺭﯗﻟﻤﯩﻐﯩﭽﻪ ﻏﻪﺭﺏ ﺋﻪﻟﻠﯩﺮﯨﻨﯩﯔ ﺧﯩﺘﺎﻱ ﺑﯩﻠﻪﻥ ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺵ ﻣﯘﻣﻜﯩﻨﭽﯩﻠﯩﻜﻰ ﻗﯩﻴﯩﻦ. ﺋﯘﻧﺪﺍﻗﺘﺎ ﻏﻪﺭﺏ ﺋﻪﻟﻠﯩﺮﻯ ﻧﯩﻤﯩﺸﻘﺎ ﺧﯩﺘﺎﻱ ﺑﯩﻠﻪﻥ ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻨﻰ ﺧﺎﻟﯩﻤﺎﻳﺪﯗ ؟

ﺧﯩﺘﺎﻱ ﺑﯩﻠﻪﻥ ﻗﺎﭼﻘﯘﻧﻼﺭ ﻛﯧﻠﯩﺸﯩﻤﻰ ﺋﯩﻤﺰﺍﻟﯩﻐﺎﻥ ﻏﻪﺭﺑﻠﯩﻚ ﺩﯙﻟﻪﺗﻠﻪﺭ ﻧﺎﻫﺎﻳﯩﺘﻰ ﺋﺎﺯ

ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﻳﯩﻞ ﻣﺎﺭﺕ ﺋﯧﻴﯩﺪﺍ ﻓﺮﺍﻧﺴﯩﻴﻪ ﺑﯩﻠﻪﻥ ﻗﺎﭼﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻟﯩﻐﺎﻧﺪﯨﻦ ﻛﯧﻴﯩﻦ، ﻫﺎﺯﯨﺮﻏﯩﭽﻪ ﺧﯩﺘﺎﻱ ﺑﯩﻠﻪﻥ ﺑﯘ ﺧﯩﻞ ﻛﯧﻠﯩﺸﯩﻢ ﺋﯩﻤﺰﺍﻟﯩﻐﺎﻥ ﺩﯙﻟﻪﺗﻠﻪﺭ 29 ﻏﺎ ﻳﻪﺗﺘﻰ. ﻟﯧﻜﯩﻦ ﻓﺮﺍﻧﺴﯩﻴﻪ، ﭘﻮﺭﺗﯘﮔﺎﻟﯩﻴﻪ ﯞﻩ ﺋﯩﺴﭙﺎﻧﯩﻴﯩﺪﯨﻦ ﺑﺎﺷﻘﺎ ﻏﻪﺭﺑﺘﯩﻜﻰ ﻛﯚﭘﭽﯩﻠﯩﻚ ﺩﯙﻟﻪﺗﻠﻪﺭ ﺧﯩﺘﺎﻱ ﺑﯩﻠﻪﻥ ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﺘﯩﻦ ﺋﯚﺯﯨﻨﻰ ﻗﺎﭼﯘﺭﯗﭖ ﻛﻪﻟﻤﻪﻛﺘﻪ.

ﺧﯩﺘﺎﻳﻨﯩﯔ ﻫﯚﻛﯜﻣﻪﺕ ﺑﺎﺷﻘﯘﺭﯗﺷﯩﺪﯨﻜﻰ ﺋﯧﻨﮕﻠﯩﺰﭼﻪ ﭼﯩﻘﯩﺪﯨﻐﺎﻥ " ﺟﯘﯕﮕﻮ " ﮔﯧﺰﯨﺘﻰ، ﺧﯩﺘﺎﻳﻨﯩﯔ ﻏﻪﺭﺏ ﺩﯙﻟﻪﺗﻠﯩﺮﻯ ﺑﯩﻠﻪﻥ ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻘﺎ ﺗﯩﺮﯨﺸﯩﯟﺍﺗﻘﺎﻧﻠﯩﻘﯩﻨﻰ، ﺑﻮﻟﯘﭘﻤﯘ ﺧﯩﺘﺎﻱ ﺗﺎﺷﻘﯩﻲ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻜﻰ ﺋﻪﻣﻪﻟﺪﺍﺭﻯ ﺩﯗﺋﻪﻥ ﺟﻴﯧﻠﻮﯕﻨﯩﯔ " ﺑﯩﺰ ﺗﻪﺭﻩﻗﻘﻰ ﻗﯩﻠﻐﺎﻥ ﺩﯙﻟﻪﺗﻠﻪﺭ ﺑﯩﻠﻪﻥ ﺋﯩﻜﻜﻰ ﺗﻪﺭﻩﭘﻠﯩﻤﯩﻠﯩﻚ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻘﺎ ﺗﯩﺮﯨﺸﻤﺎﻗﺘﯩﻤﯩﺰ،" ﺩﯦﮕﻪﻧﻠﯩﻜﯩﻨﻰ ﺧﻪﯞﻩﺭ ﻗﯩﻠﺪﻯ.

"ﺟﯘﯕﮕﻮ" ﮔﯧﺰﯨﺘﯩﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﻏﻪﺭﺑﺘﯩﻜﻰ ﺋﯚﻟﯜﻡ ﺟﺎﺯﺍﺳﻰ ﭼﻪﻛﻠﻪﻧﮕﻪﻥ ﺩﯙﻟﻪﺗﻠﻪﺭﻧﻰ ﺧﺎﺗﯩﺮﺟﻪﻡ ﻗﯩﻠﯩﺶ ﻣﻪﻗﺴﯩﺘﯩﺪﻩ ﺑﯘ ﺩﯙﻟﻪﺗﻠﻪﺭ ﻗﺎﭼﻘﯘﻧﻼﺭﻧﻰ ﺧﯩﺘﺎﻳﻐﺎ ﻗﺎﻳﺘﯘﺭﯗﭖ ﺑﻪﺭﺳﻪ، ﺋﯘﻻﺭﻧﻰ ﺋﯚﻟﯜﻡ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﻤﺎﻳﺪﯨﻐﺎﻧﻠﯩﻘﯩﻐﺎ ﻛﺎﭘﺎﻟﻪﺕ ﺑﻪﺭﮔﻪﻥ.

ﺧﯩﺘﺎﻱ ﺳﻮﺕ ﻣﻪﻫﻜﯩﻤﯩﻠﯩﺮﻯ ﺑﺎﺷﻘﯩﻼﺭﻧﯩﯔ ﻛﯚﺯﯨﻨﻰ ﺑﻮﻳﺎﻳﺪﯨﻐﺎﻥ ﺑﯩﺮ ﺷﻪﻛﯩﻠﻤﯘ ؟

"ﺟﯘﯕﮕﻮ" ﮔﯧﺰﯨﺘﻰ، ﺧﯩﺘﺎﻳﻨﯩﯔ ﻏﻪﺭﺏ ﺩﯙﻟﻪﺗﻠﯩﺮﻯ ﺑﯩﻠﻪﻥ " ﺳﯩﻴﺎﺳﻰ ﺑﯩﺮ ﺗﻪﺭﻩﭘﻠﯩﻤﯩﻠﯩﻚ ﯞﻩ ﺋﯩﺪﯦﺌﻮﻟﻮﮔﯩﻴﯩﻠﯩﻚ ﺋﯩﺨﺘﯩﻼﭘﻼﺭﻧﻰ" ﺑﯩﺮ ﭼﻪﺗﻜﻪ ﻗﺎﻳﺮﯨﭗ ﻗﻮﻳﯘﭖ، ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻨﻰ ﺋﺎﺭﺯﯗﺳﻰ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﻛﯚﭘﭽﯩﻠﯩﻚ ﻏﻪﺭﺏ ﺩﯙﻟﻪﺗﻠﯩﺮﻯ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﺧﯩﺘﺎﻱ ﺳﯩﻴﺎﺳﻰ ﯞﻩ ﺋﻪﺩﻟﯩﻴﻪ ﺳﯩﺴﺘﯧﻤﯩﺴﯩﻨﯩﯔ ﺑﯩﺮ ﺗﻪﺭﻩﭘﻠﯩﻤﯩﻠﯩﻜﻰ ﺷﯘﻧﺪﺍﻗﻼ ﭼﻮﯓ ﺩﯨﻠﻮﻻﺭﻏﺎ ﻛﻮﻣﭙﺎﺭﺗﯩﻴﻪ ﻛﻮﻧﺘﺮﻭﻟﻠﯩﻘﯩﺪﯨﻜﻰ ﺳﯩﻴﺎﺳﻰ ﻗﺎﻧﯘﻥ ﻛﻮﻣﯩﺘﯧﺘﻰ ﺋﺎﻟﺪﯨﻨﺌﺎﻻ ﻣﻪﺧﭙﯩﻲ ﻫﯚﻛﯜﻡ ﭼﯩﻘﯩﺮﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﻣﻪﻛﺘﻪ.

ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺧﯩﺘﺎﻱ ﺳﻮﺕ ﻣﻪﻫﻜﯩﻤﯩﻠﯩﺮﻯ ﺑﺎﺷﻘﯩﻼﺭﻧﯩﯔ ﻛﯚﺯﯨﻨﻰ ﺑﻮﻳﺎﻳﺪﯨﻐﺎﻥ ﺷﻪﻛﯩﻠﺪﯨﻦ ﺋﯩﺒﺎﺭﻩﺕ ﺑﻮﻟﯘﭖ، ﺋﻪﻳﯩﭙﻠﻪﻧﮕﯜﭼﯩﻨﯩﯔ ﻫﻮﻗﯘﻗﻰ ﺗﯧﮕﯩﺸﻠﯩﻚ ﻛﺎﭘﺎﻟﻪﺗﻜﻪ ﺋﯩﮕﻪ ﺋﻪﻣﻪﺱ ﺑﻮﻟﯘﭘﻼ ﻗﺎﻟﻤﺎﻱ، ﺧﯩﺘﺎﻱ ﻳﻪﻧﻪ ﺋﯚﻟﯜﻡ ﺟﺎﺯﺍﺳﯩﻨﻰ ﻛﻪﯓ -ﻛﯚﻟﻪﻣﺪﻩ ﺋﯩﺠﺮﺍ ﻗﯩﻠﯩﯟﺍﺗﻘﺎﻥ ﺩﯙﻟﻪﺕ.

ﻓﺮﺍﻧﺴﯩﻴﻪ ﺑﯘ ﻳﯩﻞ 3- ﺋﺎﻳﺪﺍ ﺧﯩﺘﺎﻱ ﺑﯩﻠﻪﻥ ﻗﺎﭼﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻟﯩﻐﺎﻧﺪﺍ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﻓﺮﺍﻧﺴﯩﻴﻪ ﻫﯚﻛﯜﻣﯩﺘﯩﻨﻰ ﺗﻪﻧﻘﯩﺪ ﻗﯩﻠﻐﺎﻥ.

ﻛﻪﭼﯜﺭﯛﻡ ﺗﻪﺷﻜﯩﻼﺗﻰ، ﻏﻪﺭﺑﻨﯩﯔ ﺧﯩﺘﺎﻱ ﺑﯩﻠﻪﻥ ﻗﺎﭼﻘﯘﻧﻼﺭ ﻛﯧﻠﯩﺸﯩﻤﻰ ﺋﯩﻤﺰﺍﻟﯩﺸﯩﻐﺎ ﻗﺎﺭﺷﻰ

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﻨﯩﯔ ﺋﺎﺳﯩﻴﺎ - ﺗﯩﻨﭻ ﺋﻮﻛﻴﺎﻥ ﺭﺍﻳﻮﻧﻰ ﺋﯩﺸﻠﯩﺮﯨﻐﺎ ﺟﺎﯞﺍﭘﻜﺎﺭ ﻣﻪﺳﺌﯘﻟﻰ ﺕ. ﻛﯘﻣﺎﺭ، ﻣﻪﺯﻛﯘﺭ ﺗﻪﺷﻜﯩﻼﺗﻨﯩﯔ ﺧﯩﺘﺎﻱ ﺑﯩﻠﻪﻥ ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻘﺎ ﻗﺎﺭﺷﻰ ﭼﯩﻘﯩﺸﺘﯩﻜﻰ ﺳﻪﯞﻩﺑﻰ، ﺧﯩﺘﺎﻱ ﺋﯚﻟﯜﻡ ﺟﺎﺯﺍﺳﯩﻨﻰ ﻳﻮﻟﻐﺎ ﻗﻮﻳﯘﯞﺍﺗﻘﺎﻥ ﺩﯙﻟﻪﺕ ﺑﻮﻟﻐﺎﻧﻠﯩﻘﯩﺪﯗﺭ، ﺩﻩﭖ ﻛﯚﺭﺳﻪﺗﺘﻰ.

ﺋﯘ،" ﺧﯩﺘﺎﻱ ﺋﯚﻟﯜﻡ ﺟﺎﺯﺍﺳﻰ ﻳﻮﻟﻐﺎ ﻗﻮﻳﯘﻟﯘﯞﺍﺗﻘﺎﻥ ﺩﯙﻟﻪﺕ. ﺷﯘﯕﺎ ﺑﯩﺰ ﺗﯘﺗﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺋﯩﻤﺰﺍﻻﺷﻘﺎ ﻗﺎﺭﺷﻰ ﺗﯘﺭﯨﻤﯩﺰ. ﺑﯘﻧﯩﯖﺪﺍ ﺋﺎﺳﺎﺳﻠﯩﻘﻰ ﺋﯚﻟﯜﻡ ﺟﺎﺯﺍﺳﯩﻨﯩﯔ ﺭﻭﻟﻰ ﺑﺎﺭ،ﭼﯜﻧﻜﻰ ﺑﯩﺰ ﺋﯚﻟﯜﻡ ﺟﺎﺯﺍﺳﯩﻐﺎ ﻗﺎﺭﺷﻰ ﺗﯘﺭﯨﻤﯩﺰ،" ﺩﻩﻳﺪﯗ. "ﺟﯘﯕﮕﻮ ﮔﯧﺰﯨﺘﻰ"ﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﻫﺎﺯﯨﺮﻏﺎ ﻗﻪﺩﻩﺭ 800 ﺩﯨﻦ ﺋﺎﺭﺗﯘﻕ ﺋﯩﻘﺘﯩﺴﺎﺩﻯ ﺟﯩﻨﺎﻳﻪﺗﭽﯩﮕﻪ ﺳﺎﻗﭽﯩﻼﺭ ﺗﻪﺭﯨﭙﯩﺪﯨﻦ ﺗﯘﺗﯘﺵ ﺑﯘﻳﺮﯗﻗﻰ ﭼﯩﻘﯩﺮﯨﻠﻐﺎﻥ ﺑﻮﻟﯘﭖ، ﺑﯘ ﻛﯩﺸﯩﻠﻪﺭ ﺧﯩﺘﺎﻱ ﺑﯩﻠﻪﻥ ﻗﺎﭼﻘﯘﻧﻼﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ - ﺋﯚﺗﻜﯜﺯﯛﯞﯦﻠﯩﺶ ﻛﯧﻠﯩﺸﯩﻤﻰ ﺑﻮﻟﻤﯩﻐﺎﻥ ﺩﯙﻟﻪﺗﻠﻪﺭﺩﻩ ﻗﯧﭽﯩﭗ ﻳﯜﺭﯛﯞﺍﺗﯩﺪﯗ، ﺩﻩﭖ ﻗﺎﺭﺍﻟﻤﺎﻗﺘﺎ ﺋﯩﻜﻪﻥ.

ﺧﯩﺘﺎﻱ ﻫﯚﻛﯜﻣﯩﺘﻰ 7 ﻳﯩﻠﺪﯨﻦ ﺑﯧﺮﻯ ﻛﺎﻧﺎﺩﺍﺩﯨﻦ ﺷﻴﺎﻣﯧﻦ ﻳﯜﺋﻪﻧﺨﯘﺋﺎ ﺷﯩﺮﻛﯩﺘﯩﻨﯩﯔ ﺑﺎﺵ ﻣﯘﺩﯨﺮﻯ ﻟﻪﻱ ﭼﺎﯕﺸﯩﯖﻨﻰ ﻗﺎﻳﺘﯘﺭﯗﭖ ﺑﯧﺮﯨﺸﻨﻰ ﺗﻪﻟﻪﭖ ﻗﯩﻠﯩﯟﺍﺗﻘﺎﻥ ﺑﻮﻟﯘﭖ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻧﯩﯔ ﺋﯜﺳﺘﯩﺪﯨﻦ 30 ﻣﯩﻠﻴﺎﺭﺩ ﻳﯜﻩﻧﻠﯩﻚ ﻳﯜﺋﻪﻧﺨﯘﺋﺎ ﺋﻪﺗﻜﻪﺳﭽﯩﻠﯩﻚ ﺩﯦﻠﻮﺳﯩﻨﯩﯔ ﺟﺎﯞﺍﭘﻜﺎﺭﻯ، ﺩﻩﭖ ﺗﯘﺗﯘﺵ ﺑﯘﻳﺮﯗﻗﻰ ﭼﯩﻘﺎﺭﻏﺎﻥ. ﻟﯧﻜﯩﻦ ﻟﻪﻱ ﭼﺎﯕﺸﯩﯖﻨﯩﯔ ﺋﺎﺩﯞﯗﻛﺎﺗﻰ ﻟﻪﻱ ﭼﺎﯕﺸﯩﯖﻨﻰ ﺋﯚﻟﯜﻡ ﺟﺎﺯﺍﺳﻰ ﻳﻮﻟﻐﺎ ﻗﻮﻳﯘﻟﯘﯞﺍﺗﻘﺎﻥ ﺑﯩﺮ ﺩﯙﻟﻪﺗﻜﻪ ﻗﺎﻳﺘﯘﺭﯗﺵ ﻛﺎﻧﺎﺩﺍ ﻗﺎﻧﯘﻧﯩﻐﺎ ﺧﯩﻼﭖ، ﺩﻩﭖ ﺋﻪﺭﺯ ﻗﯩﻠﻤﺎﻗﺘﺎ.

ﺧﯩﺘﺎﻱ "ﺯﻭﺭ ﺩﻩﺭﯨﺠﯩﺪﻩ ﻳﻮﻝ ﻗﻮﻳﯘﯞﺍﺗﺎﻣﺪﯗ ؟ "

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﺪﯨﻜﻰ ﺕ. ﻛﯘﻣﺎﺭ ﻳﻪﻧﻪ ﺧﯩﺘﺎﻳﻨﯩﯔ ﺑﻪﺯﻯ ﺩﯙﻟﻪﺗﻠﻪﺭﮔﻪ ﻗﺎﭼﻘﯘﻧﻼﺭﻧﻰ ﻗﺎﻳﺘﯘﺭﯗﭖ ﺑﻪﺭﺳﻪ، ﺋﯚﻟﯜﻡ ﺟﺎﺯﺍﺳﻰ ﺑﻪﺭﻣﻪﻳﺪﯨﻐﺎﻧﻠﯩﻘﯩﻐﺎ ﻛﺎﭘﺎﻟﻪﺕ ﺑﻪﺭﮔﻪﻧﻠﯩﻜﻰ ﻫﻪﻗﻘﯩﺪﻩ ﺗﻮﺧﺘﺎﻟﺪﻯ. ﺋﯘ، ﺋﻪﮔﻪﺭ ﺧﯩﺘﺎﻱ ﻛﻮﻧﻜﯩﺮﯨﺖ ﺩﯦﻠﻮﻻﺭﺩﺍ ﻗﺎﭼﻘﯘﻧﻼﺭﻏﺎ ﺋﯚﻟﯜﻡ ﺟﺎﺯﺍﺳﻰ ﺑﻪﺭﻣﻪﻳﺪﯨﻐﺎﻧﻠﯩﻘﯩﻐﺎ ﯞﻩﺩﻩ ﻗﯩﻠﺴﺎ، ﺗﯘﺗﻘﯘﻧﻨﻰ ﺋﯚﺗﻜﯜﺯﯛﭖ ﺑﯧﺮﯨﺶ - ﺑﻪﺭﻣﻪﺳﻠﯩﻚ ﻣﻪﺳﯩﻠﯩﺴﻰ ﻫﻪﺭ ﺑﯩﺮ ﺩﯙﻟﻪﺗﻨﯩﯔ ﺋﯚﺯﯨﮕﻪ ﺑﺎﻏﻠﯩﻖ ﺑﻮﻟﺴﯩﻤﯘ، ﻟﯧﻜﯩﻦ ﺑﯘ ﺩﯙﻟﻪﺗﻠﻪﺭ ﺋﯚﻟﯜﻡ ﺟﺎﺯﺍﺳﻰ ﺑﯧﺮﯨﻠﯩﺪﯨﻐﺎﻥ ﻛﻮﻧﻜﯩﺮﯨﺖ ﺟﯩﻨﺎﻳﻰ ﺩﯦﻠﻮﻻﺭﺩﺍ ﻗﺎﭼﻘﯘﻧﻨﻰ ﺋﯚﺗﻜﯜﺯﯛﭖ ﺑﻪﺭﮔﻪﻥ ﺗﻪﻗﺪﯨﺮﺩﻩ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺑﯘﻧﯩﯖﻐﺎ ﻗﺎﺭﺷﻰ ﺗﯘﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻟﯧﻜﯩﻦ ﺧﯩﺘﺎﻱ ﻗﺎﻧﯘﻥ ﺳﺎﻫﻪﺳﯩﺪﯨﻜﻰ ﻣﯘﺗﻪﺧﻪﺳﺴﯩﺴﻠﻪﺭ ﺑﻮﻟﺴﺎ ﺧﯩﺘﺎﻳﻨﯩﯔ ﻗﺎﭼﻘﯘﻧﻼﺭﻏﺎ ﺋﯚﻟﯜﻡ ﺟﺎﺯﺍﺳﻰ ﺑﻪﺭﻣﻪﻳﺪﯨﻐﺎﻧﻠﯩﻘﯩﻐﺎ ﯞﻩﺩﻩ ﻗﯩﻠﻐﺎﻧﻠﯩﻘﯩﻨﻰ ﻛﯚﻛﻜﻪ ﻛﯚﺗﯜﺭﻣﻪﻛﺘﻪ. ﻧﻪﻧﻜﻪﻱ ﺋﯘﻧﯩﯟﯦﺮﺳﯩﺘﯧﺘﻰ ﻗﺎﻧﯘﻥ ﺗﻪﺗﻘﯩﻘﺎﺕ ﺋﻮﺭﻧﯩﻨﯩﯔ ﻣﯘﺩﯨﺮﻯ ﺟﺎﯓ ﻳﻮﯓ، ﻓﺮﺍﻧﺴﯩﻴﻪ ﺋﺎﺧﺒﺎﺭﺍﺕ ﺋﺎﮔﯧﻨﺘﻠﯩﻘﯩﻐﺎ ﺑﯧﻴﺠﯩﯔ ﻫﯚﻛﯜﻣﯩﺘﯩﻨﯩﯔ ﺧﯩﺘﺎﻳﻐﺎ ﺋﯚﺗﻜﯜﺯﯛﭖ ﺑﯧﺮﯨﻠﮕﻪﻥ ﻗﺎﭼﻘﯘﻧﻼﺭﻏﺎ ﺋﯚﻟﯜﻡ ﺟﺎﺯﺍﺳﻰ ﺑﻪﺭﻣﻪﺳﻠﯩﻜﻜﻪ ﯞﻩﺩﻩ ﺑﻪﺭﮔﻪﻧﻠﯩﻜﻰ " ﺯﻭﺭ ﺩﻩﺭﯨﺠﯩﺪﻩ ﻳﻮﻝ ﻗﻮﻳﻐﺎﻧﻠﯩﻘﺘﯘﺭ،" ﺩﻩﻳﺪﯗ.

ﻗﺎﭼﻘﯘﻧﻼﺭ ﺧﯩﺘﺎﻳﻐﺎ ﺋﯚﺗﻜﯜﺯﯛﭖ ﺑﯧﺮﯨﻠﺴﻪ، ﺋﺎﺩﯨﻞ ﺳﻮﺗﻠﯩﻨﺎﻣﺪﯗ ؟

ﺋﺎﻣﯧﺮﯨﻜﯩﺪﯨﻜﻰ ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﺋﯩﻘﺘﯩﺴﺎﺩﻯ ﺟﯩﻨﺎﻳﻪﺗﭽﯩﻠﻪﺭﻧﻰ ﺋﯚﺗﻜﯜﺯﯛﭖ ﺑﯧﺮﯨﺶ ﯞﻩ ﺋﯚﺗﻜﯜﺯﯛﯞﯦﻠﯩﺶ ﻣﻪﺳﯩﻠﯩﺴﻰ ﺩﻩﯞﺭﯨﻤﯩﺰﺩﻩ ﺩﯙﻟﻪﺗﻠﻪﺭ ﺋﻮﺗﺘﯘﺭﯨﺴﯩﺪﯨﻜﻰ ﻣﯘﻫﯩﻢ ﻫﻪﻣﻜﺎﺭﻟﯩﻖ ﺗﯜﺭﻯ ﺑﻮﻟﺴﯩﻤﯘ، ﻟﯧﻜﯩﻦ ﺋﯚﺗﻜﯜﺯﯛﯞﺍﻟﻐﯘﭼﻰ ﺩﯙﻟﻪﺗﺘﻪ ﻗﺎﻧﯘﻥ ﺗﯜﺯﯛﻣﻨﯩﯔ ﺳﺎﻏﻼﻡ ﻳﺎﻛﻰ ﺋﻪﻣﻪﺳﻠﯩﻜﻰ ﻳﻪﻧﯩﻼ ﺑﯘ ﻳﻪﺭﺩﯨﻜﻰ ﻫﻪﻝ ﻗﯩﻠﻐﯘﭺ ﻣﻪﺳﯩﻠﯩﺪﯗﺭ.

ﺧﯩﺘﺎﻳﻨﯩﯔ ﻗﺎﻧﯘﻥ ﺭﺍﻣﻜﯩﺴﻰ ﻗﯘﺭﯗﻟﯘﺵ ﺑﺎﺳﻘﯘﭼﯩﺪﺍ ﺗﯘﺭﯨﯟﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﯜﭼﻰ ﺋﺎﻧﺎﻟﯩﺰﭼﯩﻼﺭ،" ﺧﯩﺘﺎﻳﺪﯨﻜﻰ ﺳﻮﺗﭽﻰ، ﺗﻪﭘﺘﯩﺶ ﯞﻩ ﺳﺎﻗﭽﯩﻼﺭ ﭼﻮﻗﯘﻡ ﺑﯘ ﺭﺍﻣﻜﺎ ﺋﯩﭽﯩﺪﻩ ﻣﻪﺷﻐﯘﻻﺕ ﺋﯧﻠﯩﭗ ﺑﯧﺮﯨﺸﻨﻰ ﺋﯜﮔﯜﻧﯩﺸﻰ ﻛﯧﺮﻩﻙ،"ﺩﻩﭖ ﻗﺎﺭﯨﻤﺎﻗﺘﺎ. ﺋﯘﻻﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ،" ﻏﻪﺭﺑﻠﯩﻚ ﺋﻪﺭﺑﺎﭘﻼﺭ ﺩﺍﺋﯩﻢ ﺗﻪﻛﯩﺘﻠﻪﻳﺪﯨﻐﺎﻥ ﺑﯩﺮ ﻣﻪﺳﯩﻠﻪ، ﺋﻪﮔﻪﺭ ﺑﯩﺮ ﻗﺎﭼﻘﯘﻥ ﺧﯩﺘﺎﻳﻐﺎ ﻗﺎﻳﺘﯘﺭﯗﭖ ﺑﯧﺮﯨﻠﺴﻪ، ﻫﻪﺗﺘﺎ ﺑﯘ ﻗﺎﭼﻘﯘﻥ ﻧﺎﻫﺎﻳﯩﺘﻰ ﺋﻪﺳﻜﻰ ﺋﺎﺩﻩﻡ ﺑﻮﻟﻐﺎﻥ ﺗﻪﻗﺪﯨﺮﺩﯨﻤﯘ، ﺑﯘ ﻛﯩﺸﻰ ﻫﻪﻗﯩﻘﻰ ﻗﺎﻧﯘﻥ ﺑﯩﻠﻪﻥ ﺳﻮﺗﻠﯩﻨﺎﻣﺪﯗ ؟ ﻳﺎﻛﻰ ﺳﯩﻴﺎﺳﻰ ﺋﻮﺭﮔﺎﻧﻼﺭﻧﯩﯔ ﺗﻪﺳﯩﺮﯨﺪﯨﻜﻰ ﺳﻮﺗﭽﻰ ﯞﻩ ﺗﻪﭘﺘﯩﺸﻠﻪﺭ ﺑﯩﭙﻪﺭﯞﺍﻟﯩﻖ ﺑﯩﻠﻪﻥ ﭼﯩﻘﺎﺭﻏﺎﻥ ﻫﯚﻛﯜﻣﻨﯩﯔ ﻗﯘﺭﺑﺎﻧﻰ ﺑﻮﻟﯘﭖ ﻗﺎﻻﻣﺪﯗ ؟ ﺩﯦﮕﻪﻥ ﻣﻪﺳﯩﻠﯩﺪﯗﺭ. (ﺋﻪﺭﻛﯩﻦ)