ﯞﺍﯓ ﻟﯧﭽﯜﻩﻥ: ﺷﯩﻨﺠﺎﯕﺪﺍ ﻣﻪﺳﯩﻠﻪ ﺗﯜﮔﯩﻤﻪﻳﺪﯗ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﯞﺍﯓ ﻟﯧﭽﯘﻩﻥ، 5 - ﻓﯧﯟﺭﺍﻝ ﻫﺎﺭﭘﯩﺴﯩﺪﺍ، ﺷﻪﺭﻗﻰ ﺗﯜﺭﻛﯩﺴﺘﺎﻥ ﺑﯚﻟﮕﯜﻧﭽﯩﻠﯩﺮﻯ ﺗﻮﻏﺮﯨﺴﯩﺪﺍ ﺩﻭﻛﻼﺕ ﺑﻪﺭﮔﻪﻥ. Source: www.xj.chinanews.com.cn

ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻠﯘﻕ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﯞﺍﯓ ﻟﯧﭽﯜﻩﻥ، ﺑﯘ ﻳﯩﻞ 18 ‏ - ﻓﯧﯟﺭﺍﻝ ﻛﯜﻧﻰ ﺧﻮﯕﻜﻮﯕﺪﯨﻜﻰ ﺳﯘﻣﺮﯗﻍ ﺗﯧﻠﯧﯟﯨﺰﯨﻴﻪ ﺋﯩﺴﺘﺎﻧﺴﯩﻨﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻥ، ﺋﯘ ﺯﯨﻴﺎﺭﯨﺘﯩﺪﻩ 1990 ‏ - ﻳﯩﻠﻼﺭﺩﯨﻦ ﺑﯘﻳﺎﻧﻘﻰ ﺷﻪﺭﻗﻰ ﺗﯜﺭﻛﯩﺴﺘﺎﻥ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﻪﺗﻠﯩﺮﻯ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺑﻪﺭﮔﻪﻥ. ﺋﯘ ﻣﻪﻟﯘﻣﺎﺗﯩﺪﺍ، ﺷﯘﻧﭽﻪ ﻗﺎﺗﺘﯩﻖ ﺑﺎﺳﺘﯘﺭﯗﺵ ﺋﯧﻠﯩﭗ ﺑﯧﺮﯨﭙﻤﯘ "ﺷﯩﻨﺠﺎﯓ" ﻣﻪﺳﯩﻠﯩﺴﯩﻨﻰ ﺗﯜﮔﯩﺘﻪﻟﻤﯩﮕﻪﻧﻠﯩﻜﯩﻨﻰ ﺋﯧﺘﯩﺮﺍﭖ ﻗﯩﻠﻐﺎﻥ.

ﯞﺍﯓ ﻟﯧﭽﯜﻩﻥ: 5 - ﻓﯧﯟﺭﺍﻝ ﯞﻩﻗﻪﺳﻰ "ﭼﻪﺗﺌﻪﻟﺪﯨﻜﻰ ﺑﯚﻟﮕﯜﻧﭽﻰ ﻛﯜﭼﻠﻪﺭﻧﯩﯔ ﻗﯘﺗﺮﯨﺘﯩﺸﻰ ﺑﯩﻠﻪﻥ ﻛﯧﻠﯩﭗ ﭼﯩﻘﻘﺎﻥ ﻫﻪﺭﯨﻜﻪﺕ"

ﯞﺍﯓ ﻟﯧﭽﯜﻩﻥ، ﺷﻪﺭﻗﻰ ﺗﯜﺭﻛﯩﺴﺘﺎﻥ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﯩﺘﯩﻨﯩﯔ 1990 ‏ - ﻳﯩﻠﺪﯨﻦ ﺑﺎﺷﻼﭖ ﺋﻪﯞﺝ ﺋﺎﻟﻐﺎﻧﻠﯩﻘﯩﻨﻰ ﺑﻮﻟﯘﭘﻤﯘ، 1995 ‏ - ﯞﻩ 1997 ‏ - ﻳﯩﻠﻠﯩﺮﻯ ﺋﺎﺭﯨﺴﯩﺪﺍ ﭘﻪﻟﻠﯩﮕﻪ ﭼﯩﻘﻘﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ. ﺋﯘ ﺋﺎﻓﻐﺎﻧﯩﺴﺘﺎﻧﻨﯩﯔ ﺳﻮﯞﯨﺖ ﺋﯩﺘﺘﯩﭙﺎﻗﻰ ﺋﯜﺳﺘﯩﺪﯨﻦ ﻏﻪﻟﯩﺒﻪ ﻗﯩﻠﯩﺸﻰ ﯞﻩ ﺳﻮﯞﯦﺖ ﺋﯩﺘﺘﯩﭙﺎﻗﯩﻨﯩﯔ ﭘﺎﺭﭼﯩﻠﯩﻨﯩﺸﯩﻨﻰ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﻪﺗﻠﯩﺮﯨﻨﯩﯔ ﻛﯜﭼﻠﯩﻨﯩﺸﯩﮕﻪ ﻗﯘﺗﺮﺍﺗﻘﯘﻟﯘﻕ ﺭﻭﻝ ﺋﻮﻳﻨﺎﭖ ﻗﺎﻟﺪﻯ ﺩﻩﭖ ﻛﯚﺭﺳﻪﺗﻜﻪﻥ. ﯞﺍﯓ ﻟﯧﭽﯜﻩﻥ 5 ‏ - ﻓﯧﯟﺭﺍﻝ ﯞﻩﻗﻪﺳﯩﻨﻰ "ﭼﻪﺗﺌﻪﻟﺪﯨﻜﻰ ﺑﯚﻟﮕﯜﻧﭽﻰ ﻛﯜﭼﻠﻪﺭﻧﯩﯔ ﻗﯘﺗﺮﯨﺘﯩﺸﻰ ﺑﯩﻠﻪﻥ ﻛﯧﻠﯩﭗ ﭼﯩﻘﻘﺎﻥ ﻫﻪﺭﯨﻜﻪﺕ" ﺩﻩﭖ ﺋﻪﻳﯩﺒﻠﻪﭖ ﻣﯘﻧﺪﺍﻕ ﺩﯦﮕﻪﻥ: " ﺋﯘ ﻛﯜﻧﻰ ﺋﯘﻻﺭ ﺋﺎﺷﻜﺎﺭﺍ ﻧﺎﻣﺎﻳﯩﺶ ﻗﯩﻠﺪﻯ، ﻫﯚﻛﯜﻣﻪﺗﻜﻪ ﺋﺎﺷﻜﺎﺭﺍ ﻗﺎﺭﺷﻰ ﺗﯘﺭﺩﻯ." ﯞﺍﯓ ﻟﯧﭽﯘﻩﻥ ﺑﯘ ﺳﯚﺯﻯ ﺋﺎﺭﻗﯩﻠﯩﻖ ﺧﯩﺘﺎﻳﺪﺍ ﻧﺎﻣﺎﻳﯩﺶ ﺋﯚﺗﻜﯜﺯﯛﺷﻨﯩﯔ ﻗﺎﻧﯘﻧﺴﯩﺰ ﻫﻪﺭﯨﻜﻪﺕ ﺩﻩﭖ ﻗﺎﺭﯨﻠﯩﺪﯨﻐﺎﻧﻠﯩﻘﯩﻨﻰ ﺋﺎﺷﻜﺎﺭﯨﻠﯩﻐﺎﻥ.

5 ‏ - ﻓﯧﯟﺭﺍﻝ ﻧﺎﻣﺎﻳﯩﺸﻨﯩﯔ ﺋﺎﻟﺪﯨﺪﯨﻜﻰ ﺋﯩﺠﺘﯩﻤﺎﺋﯩﻲ ﯞﻩﺯﯨﻴﻪﺕ ﻫﻪﻗﻘﯩﺪﻩ ﻫﯧﭻ ﺗﻮﺧﺘﺎﻟﻤﯩﻐﺎﻥ ﯞﺍﯓ ﻟﯧﭽﯜﻩﻥ ﻧﺎﻣﺎﻳﯩﺸﭽﯩﻼﺭﻧﯩﯔ ﻫﯚﻛﯜﻣﻪﺕ ﺋﯩﺪﺍﺭﻩ - ﺟﻪﻣﺌﯩﻴﻪﺕ ﺋﯩﺸﺨﺎﻧﯩﻠﯩﺮﯨﻨﻰ ﺋﯘﺭﯗﭖ - ﭼﺎﻗﻘﺎﻧﻠﯩﻘﻰ ﯞﻩ ﺧﯩﺘﺎﻱ ﭘﯘﻗﺮﺍﻟﯩﺮﯨﻨﻰ ﺋﯚﻟﺘﯜﺭﮔﻪﻧﻠﯩﻜﻰ، ﺑﯘ ﺳﻪﯞﻩﺑﺘﯩﻦ ﺑﯘﻻﺭﻧﯩﯔ ﺑﻪﺯﯨﻠﯩﺮﯨﮕﻪ ﺋﯚﻟﯜﻡ ﺟﺎﺯﺍﺳﻰ ﺑﻪﺭﮔﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ، ﻣﯘﺧﺒﯩﺮ ﭼﻪﺗﺌﻪﻝ ﺭﺍﺩﯨﺌﻮﻟﯩﺮﯨﺪﺍ ﺧﻪﯞﻩﺭ ﻗﯩﻠﯩﻨﻐﺎﻥ ‏5 ‏ - ﻓﯧﯟﺭﺍﻝ ﯞﻩﻗﻪﺳﻰ ﻫﻪﻗﻘﯩﺪﯨﻜﻰ ﺋﯧﭽﯩﻨﯩﺸﻠﯩﻖ ﯞﻩﻗﻪﻟﻪﺭﻧﻰ ﺗﯩﻠﻐﺎ ﺋﺎﻟﻐﺎﻧﺪﺍ، ﯞﺍﯓ ﻟﯧﭽﯘﻩﻥ ﺭﻩﺕ ﻗﯩﻠﯩﭗ ﻣﯘﻧﺪﺍﻕ ﺩﯦﮕﻪﻥ: "ﺋﯘ ﻛﯜﻧﻰ ﺳﺎﻗﭽﯩﻠﯩﺮﯨﻤﯩﺰ ﺟﯩﻨﺎﻳﻪﺗﭽﯩﻠﻪﺭﻧﻰ ﺳﻮﺕ ﻣﻪﻳﺪﺍﻧﯩﺪﯨﻦ ﺗﯜﺭﻣﯩﮕﻪ ﻗﺎﻳﺘﯘﺭﯗﭖ ﺋﻪﻛﯩﻠﯩﯟﺍﺗﻘﺎﻥ. ﺑﯚﻟﮕﯜﻧﭽﯩﻠﻪﺭ، ﺟﯩﻨﺎﻳﻪﺗﭽﯩﻠﻪﺭﻧﻰ ﺗﯜﺭﻣﻪ ﻣﺎﺷﯩﻨﯩﺴﯩﺪﯨﻦ ﺋﯧﻠﯩﭗ ﻗﯧﭽﯩﺶ ﺋﯜﭼﯜﻥ ﯞﯨﻠﺴﯩﭙﯩﺘﻠﻪﺭ ﺑﯩﻠﻪﻥ ﺗﻪﻳﻴﺎﺭﻟﯩﻨﯩﭗ ﺗﯘﺭﻏﺎﻥ ﺋﯩﻜﻪﻥ، ﺋﯘﻻﺭ ﺗﯜﺭﻣﻪ ﻣﺎﺷﯩﻨﯩﺴﯩﻐﺎ ﻳﻮﭘﯘﺭﯗﻟﯘﭖ ﻛﯧﻠﯩﺸﺘﻰ، ﻣﺎﺷﯩﻨﯩﻐﺎ 3 ﻣﯧﺘﯩﺮﭼﻪ ﻳﯧﻘﯩﻨﻼﭖ ﻗﺎﻟﻐﺎﻧﺪﺍ، ﺳﺎﻗﭽﯩﻤﯩﺰ ﺋﯘﻻﺭﺩﯨﻦ ﺑﯩﺮﯨﻨﻰ ﺋﯧﺘﯩﭗ ﺋﯚﻟﺘﯜﺭﺩﻯ."

ﺋﻪﺳﻠﯩﺪﻩ ﺑﯘ ﯞﻩﻗﻪﻧﻰ ﺷﺎﻫﯩﺪﻻﺭ، ﻣﻪﻫﺒﯘﺳﻼﺭ ﺑﯩﻠﻪﻥ ﯞﯨﺪﺍﻟﯩﺸﯩﺶ ﺋﯜﭼﯜﻥ ﺗﯜﺭﻣﻪ ﻣﺎﺷﯩﻨﯩﺴﻰ ﺗﻪﺭﻩﭘﻜﻪ ﻗﺎﺭﺍﭖ ﻣﺎﯕﻐﺎﻥ ﻛﯩﺸﯩﻠﻪﺭ ﺳﺎﻗﭽﯩﻼﺭ ﺗﻪﺭﯨﭙﯩﺪﯨﻦ ﺋﻮﻗﻘﺎ ﺗﯘﺗﯘﻟﺪﻯ ﺩﻩﭖ ﺑﺎﻳﺎﻥ ﻗﯩﻠﻐﺎﻥ ﺋﯩﺪﻯ.

ﯞﺍﯓ ﻟﯧﭽﯜﻩﻥ: " ﺷﻪﺭﻗﻰ ﺗﯜﺭﻛﯩﺴﺘﺎﻧﭽﯩﻼﺭﻧﯩﯔ ﺑﯩﺮﯨﻨﭽﻰ ﻧﻮﻣﯘﺭﻟﯘﻕ ﺩﯛﺷﻤﯩﻨﻰ ﻣﻪﻥ "

ﻣﯘﺧﺒﯩﺮ، ﺷﻪﺭﻗﻰ ﺗﯜﺭﻛﯩﺴﺘﺎﻧﭽﯩﻼﺭﻧﯩﯔ ﻗﻮﻟﯩﺪﺍ ﻗﺎﺭﺍ ﺗﯩﺰﯨﻤﻠﯩﻚ ﺑﺎﺭ ﺩﻩﭖ ﺋﺎﯕﻠﯩﺪﯗﻕ ﺩﻩﭖ ﺳﻮﺭﯨﻐﯩﻨﯩﺪﺍ، ﯞﺍﯓ ﻟﯧﭽﯜﻩﻥ " ﺷﯘﻧﺪﺍﻕ ﺑﯩﺮﯨﻨﭽﻰ ﻧﻮﻣﯘﺭﻟﯘﻕ ﺩﯛﺷﻤﯩﻨﻰ ﻣﻪﻥ " ﺩﻩﭖ ﺟﺎﯞﺍﺏ ﺑﻪﺭﮔﻪﻥ ﯞﻩ ﺩﯙﻟﻪﺕ ﺑﯩﺨﻪﺗﻪﺭﻟﯩﻚ ﺋﯩﺪﺍﺭﯨﺴﯩﻨﯩﯔ ﺗﻪﻣﯩﻨﻠﯩﺸﻰ ﺑﯩﻠﻪﻥ ﺑﯘ ﺗﯩﺰﯨﻤﻠﯩﻜﻨﻰ ﻛﯚﺭﮔﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ ﯞﻩ ﺑﯘ ﻫﻪﻗﺘﻪ ﻣﯘﻧﺪﺍﻕ ﺩﯦﮕﻪﻥ: " ﺋﻪﺳﻠﯩﺪﻩ ﺗﯩﺰﯨﻤﻠﯩﻜﻜﻪ ﻳﺎﺯﻣﯩﺴﯩﻤﯘ، ﻣﻪﻥ ﺋﯘﻻﺭﻧﯩﯔ ﻛﯚﺯﯨﮕﻪ ﻗﺎﺩﺍﻟﻐﺎﻥ ﻣﯩﻖ ﺋﯩﻜﻪﻧﻠﯩﻜﯩﻤﻨﻰ ﺑﯩﻠﻪﺗﺘﯩﻢ، ﺷﯘﯕﺎ ﺗﯩﺰﯨﻤﻠﯩﻜﻜﻪ ﭼﯜﺷﻜﯩﻨﯩﻤﮕﻪ ﻫﻪﻳﺮﺍﻥ ﻗﺎﻟﻤﯩﺪﯨﻢ. ﺋﻪﮔﻪﺭ ﺗﯩﺰﯨﻤﻠﯩﻜﺘﻪ ﺑﻮﻟﻤﯩﻐﺎﻥ ﺑﻮﻟﺴﺎﻡ ﻫﻪﻳﺮﺍﻥ ﻗﺎﻻﺗﺘﯩﻢ، ﭼﯜﻧﻜﻰ ﺳﻪﭘﻨﯩﯔ ﺋﺎﻟﺪﯨﺪﺍ ﻫﻪﺭﯨﻜﻪﺕ ﻗﯩﻠﯩﯟﺍﺗﻘﺎﻥ ﻣﻪﻥ."

"ﺑﯘ ﺳﯜﺭﻩﺕ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﺧﯩﺘﺎﻱ ﺳﺎﻟﺪﺍﺗﻠﯩﺮﯨﻨﯩﯔ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﯞﺍﺗﻘﺎﻥ ﻛﯚﺭﯛﻧﯜﺷﻰ، ﺧﯩﺘﺎﻱ ﻳﺎﺯﻏﯘﭼﯩﺴﻰ ﯞﺍﯓ ﻟﯩﺸﻮﯕﻨﯩﯔ "ﻣﯧﻨﯩﯔ ﻏﻪﺭﺑﻰ ﺩﯨﻴﺎﺭﯨﻢ، ﺳﯧﻨﯩﯔ ﺷﻪﺭﻗﻰ ﺗﯜﺭﻛﯩﺴﺘﺎﻧﯩﯔ" ﺩﯦﮕﻪﻥ ﻛﯩﺘﺎﺑﯩﺪﺍ ﺑﯧﺮﯨﻠﮕﻪﻥ ﺑﻮﻟﯘﭖ، ﻳﺎﺯﻏﯘﭼﻰ ﺳﯜﺭﻩﺗﻨﻰ ﺑﯩﺮ ﺋﯘﻳﻐﯘﺭﺩﯨﻦ ﺋﺎﻟﻐﺎﻥ ﺋﯩﻜﻪﻥ. ﺑﯘ ﺳﯜﺭﻩﺗﻨﯩﯔ ﻗﺎﻧﺪﺍﻕ ﺋﻪﻫﯟﺍﻝ ﺋﺎﺳﺘﯩﺪﺍ ﺗﺎﺭﺗﯩﻠﻐﺎﻧﻠﯩﻘﻰ، ﻛﯩﻤﻨﯩﯔ، ﻗﺎﻳﺴﻰ ﯞﺍﻗﯩﺘﺘﺎ، ﻧﯩﻤﻪ ﺋﺎﺭﻗﺎ ﻛﯚﺭﯛﻧﯜﺷﺘﻪ ﺗﺎﺭﺗﻘﺎﻧﻠﯩﻘﯩﻨﻰ ﺟﻪﺯﯨﻤﻠﻪﺵ ﻗﯩﻴﯩﻦ ﺑﻮﻟﯘﭖ، ﺑﯘﻧﻰ ﭘﻪﻗﻪﺕ، ﺑﯘﺭﯗﻥ ﺷﯩﻨﺠﺎﯕﺪﺍ ﻳﯜﺯ ﺑﻪﺭﮔﻪﻥ ﺑﯩﺮ ﻫﻪﻗﯩﻘﻰ ﺋﻪﻫﯟﺍﻝ ﺩﻩﭖ ﭼﯜﺷﻪﻧﺪﯛﺭﯛﺵ ﻣﯘﻣﻜﯩﻦ." 王力雄："我的西域，你的东土" http://woeser.middle-way.net/?action=show &id =264

ﯞﺍﯓ ﻟﯧﭽﯜﻩﻥ ﺑﯘ ﺳﯚﺯﻟﯩﺮﻯ ﺋﺎﺭﻗﯩﻠﯩﻖ، ﻣﻪﺭﻛﯩﺰﻯ ﻫﯚﻛﯜﻣﻪﺗﻜﻪ ﺋﯚﺯﯨﻨﯩﯔ ﺗﯚﻫﭙﯩﺴﯩﻨﻰ ﺩﻭﻛﻼﺕ ﻗﯩﻠﯩﯟﺍﺗﻘﺎﻥ ﺑﻮﻟﺴﺎ ﻛﯧﺮﻩﻙ، ﺋﻪﻣﻤﺎ ﺋﯚﺯ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﻨﯩﯔ ﺟﺎﯞﺍﺑﻜﺎﺭﻟﯩﻘﯩﺪﯨﻦ ﺋﻪﻧﺪﯨﺸﻪ ﻗﯩﻠﯩﺪﯨﻐﺎﻧﻠﯩﻘﯩﻨﯩﻤﯘ ﺗﯚﯞﻩﻧﺪﯨﻜﻰ ﺳﯚﺯﻟﯩﺮﻯ ﺋﺎﺭﻗﯩﻠﯩﻖ ﺋﯩﻘﺮﺍﺭ ﻗﯩﻠﻐﺎﻥ: " ﺗﯩﺰﯨﻤﻠﯩﻜﻜﻪ ﻛﯩﺮﮔﯩﻨﯩﻤﺪﯨﻦ ﻗﻮﺭﻗﻤﯩﺪﯨﻢ، ﺋﻪﻣﻤﺎ ﺷﯘﻧﺪﺍﻗﺘﯩﻤﯘ ﻫﯘﺷﻴﺎﺭﻟﯩﻘﯩﻤﻨﻰ ﺋﯚﺳﺘﯜﺭﺩﯛﻡ، ﻣﯘﺩﺍﭘﯩﺌﻪﻟﯩﻨﯩﺸﻨﻰ ﻛﯜﭼﻪﻳﺘﺘﯩﻢ، ﭼﯜﻧﻜﻰ ﺟﺎﻧﻨﻰ ﺋﻪﺭﺯﯨﻤﻪﺱ ﻳﻪﺭﻟﻪﺭﺩﻩ ﻗﯘﺭﺑﺎﻥ ﻗﯩﻠﯩﯟﯦﺘﯩﺸﻜﻪ ﺑﻮﻟﻤﺎﻳﺪﯗ‏ - ﺩﻩ."

ﯞﺍﯓ ﻟﯧﭽﯜﻩﻥ: " ﺑﺎﺭﻏﺎﻧﺴﯧﺮﻯ ﻗﺎﺗﺘﯩﻖ ﻗﻮﻝ ﺑﻮﻟﯘﯞﺍﺗﯩﻤﯩﺰ "

"ﺭﺍﺳﺖ ﮔﻪﭘﻨﻰ ﻗﯩﻠﺴﺎﻡ، - ﺩﻩﻳﺪﯗ ‏ ﯞﺍﯓ ﻟﯧﭽﯜﻩﻥ، ‏ - 1995 ‏ - ﻳﯩﻠﯩﻐﯩﭽﻪ، ﻣﻪﺳﯩﻠﯩﻨﻰ ﻗﺎﻧﺪﺍﻕ ﺑﯩﺮ ﺗﻪﺭﻩﭖ ﻗﯩﻠﯩﺶ ﻫﻪﻗﻘﯩﺪﻩ ﻣﯧﻨﯩﯖﻤﯘ ﻛﺎﻟﻼﻣﺪﺍ ﺳﺎﻥ ﻳﻮﻕ ﺋﯩﺪﻯ، ﻣﻪﺭﻛﻪﺯ 1996 ‏ - ﻳﯩﻠﻰ 7 ‏ - ﻧﻮﻣﯘﺭﻟﯘﻕ ﻫﯚﺟﺠﻪﺗﻨﻰ ﭼﯜﺷﯜﺭﮔﻪﻧﺪﯨﻦ ﻛﯧﻴﯩﻦ، ﺋﯩﺸﻨﯩﯔ ﻳﻮﻟﯩﻨﻰ ﺋﯜﮔﻪﻧﺪﯗﻕ. ﺑﯘﺭﯗﻥ ﻣﻪﺳﯩﻠﻪ ﻛﯚﺭﯛﻟﮕﻪﻧﺪﯨﻦ ﻛﯧﻴﯩﻦ ﻫﻪﻝ ﻗﯩﻠﯩﭗ ﻛﻪﻟﮕﻪﻥ ﺑﻮﻟﺴﺎﻕ، ﻛﯧﻴﯩﻦ ﻣﻪﺳﯩﻠﻪ ﻛﯚﺭﯛﻟﯜﺷﺘﯩﻦ ﺋﺎﯞﯞﺍﻝ ﺑﯩﺮ ﺗﻪﺭﻩﭖ ﻗﯩﻠﯩﺪﯨﻐﺎﻥ ﺑﻮﻟﺪﯗﻕ: ﺑﯘﺭﯗﻥ ﺩﯛﺷﻤﻪﻥ ﺑﺎﺵ ﻛﯚﺗﯜﺭﮔﻪﻧﺪﻩ ﻳﻮﻗﺎﺗﻘﺎﻥ ﺑﻮﻟﺴﺎﻕ، ﺋﻪﻣﺪﯨﻠﯩﻜﺘﻪ، ﺩﯛﺷﻤﻪﻥ ﺑﺎﺵ ﻛﯚﺗﯜﺭﯛﺷﺘﯩﻦ ﺋﺎﯞﯞﺍﻝ ﻗﯧﺰﯨﭗ ﺋﺎﭼﯩﻘﯩﭗ ﺯﻩﺭﺑﻪ ﺑﯧﺮﯨﭗ ﺋﯘﺟﯘﻗﺘﯘﺭﯨﯟﺍﺗﯩﻤﯩﺰ ."

ﯞﺍﯓ ﻟﯧﭽﯜﻩﻥ ﻳﯘﻗﯩﺮﯨﻘﻰ ﺳﯚﺯﻟﯩﺮﻯ ﺋﺎﺭﻗﯩﻠﯩﻖ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻗﺎﺗﺘﯩﻖ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﻨﯩﯔ ﺟﺎﯞﺍﺑﻜﺎﺭﻟﯩﻘﯩﻨﻰ ﻣﻪﺭﻛﻪﺯﮔﻪ ﻳﯜﻛﻠﻪﯞﺍﺗﺎﻣﺪﯗ ﯞﻩ ﻳﺎﻛﻰ ﺗﯚﻫﭙﯩﻨﻰ ﻣﻪﺭﻛﻪﺯﻧﯩﯔ ﻗﯩﻠﯩﺶ ﺋﺎﺭﻗﯩﻠﯩﻖ ﻳﯘﻗﯩﺮﯨﻐﺎ ﺧﻮﺷﺎﻣﻪﺕ ﻗﯩﻠﯩﯟﺍﺗﺎﻣﺪﯗ؟ ﯞﺍﯓ ﻟﯧﭽﯜﻩﻧﻨﯩﯔ ﺳﯘﻣﺮﯗﻍ ﺗﯧﻠﯧﯟﯨﺰﯨﻴﯩﺴﯩﺪﻩ ﻗﯩﻠﻐﺎﻥ ﺗﯧﺨﯩﻤﯘ ﻣﯘﻫﯩﻢ ﺑﯩﺮ ﺳﯚﺯﻯ ﻣﯘﻧﺪﺍﻕ: ﺑﺎﺭﻏﺎﻧﺴﯧﺮﻯ ﻗﺎﺗﺘﯩﻖ ﻗﻮﻝ ﺑﻮﻟﯘﯞﺍﺗﯩﻤﯩﺰ، ﺑﺎﺭﻏﺎﻧﺴﯧﺮﻯ ﺯﺍﻣﺎﻧﯩﯟﯨﻲ ﯞﺍﺳﺘﯩﻼﺭ ﺑﯩﻠﻪﻥ ﺑﺎﺳﺘﯘﺭﯗﯞﺍﺗﯩﻤﯩﺰ، ﺋﻪﻣﻤﺎ ﺷﯩﻨﺠﺎﯕﺪﺍ ﻣﻪﺳﯩﻠﻪ ﺗﯜﮔﯩﺪﯨﻤﯘ ﺩﻩﭖ ﺳﻮﺭﯨﺴﯩﯖﯩﺰ ، ﺑﯘﻧﯩﯖﻐﺎ ﺗﯜﮔﯩﺪﻯ ﺩﻩﭖ ﺟﺎﯞﺍﺏ ﺑﯧﺮﻩﻟﻤﻪﻳﻤﻪﻥ؛ ﺋﻪﮔﻪﺭ ﻗﺎﭼﺎﻥ ﺗﯜﮔﻪﻳﺪﯗ ﺩﻩﭖ ﺳﻮﺭﯨﺴﯩﯖﯩﺰ ﺑﯘﻧﯩﯖﻐﺎ ﺗﯧﺨﯩﻤﯘ ﺟﺎﯞﺍﺏ ﺑﯧﺮﻩﻟﻤﻪﻳﻤﻪﻥ."

ﯞﺍﯓ ﻟﯧﭽﯜﻩﻥ: " ﺷﯩﻨﺠﺎﯕﺪﺍ ﻣﻪﺳﯩﻠﻪ ﺗﯜﮔﯩﻤﻪﻳﺪﯗ "

ﺗﺎﺭﯨﺨﭽﻰ ﺋﯧﺮﭘﺎﻥ ﺗﻮﺧﺘﯩﻴﻮﭘﻨﯩﯔ ﻳﯧﯖﻰ ﻫﺎﻳﺎﺕ ﮔﯧﺰﯨﺘﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ ﺑﯩﺮ ﻣﺎﻗﺎﻟﯩﺴﯩﺪﻩ ﺩﯦﻴﯩﻠﯩﺸﯩﭽﻪ، ﺯﻭﺯﯗﯕﺘﺎﯓ، 1870 ‏ - ﻳﯩﻠﻼﺭﺩﯨﻜﻰ ﺑﺎﺳﺘﯘﺭﯗﺵ ﻫﻪﺭﯨﻜﻪﺗﻠﯩﺮﯨﺪﯨﻦ ﻛﯧﻴﯩﻦ، ﻣﻪﺭﻛﻪﺯﮔﻪ ﻳﻮﻟﻠﯩﻐﺎﻥ ﺧﯧﺘﯩﺪﻩ" ﻳﻪﺭﻟﯩﻚ ﺧﻪﻟﻘﻨﯩﯔ ﺋﯩﭽﯩﺪﻩ ﻗﻮﻟﯩﻐﺎ ﻗﻮﺭﺍﻝ ﺋﺎﻟﻐﯘﺩﻩﻙ ﺟﺎﺳﺎﺭﯨﺘﻰ ﺑﺎﺭ ﻛﯩﺸﯩﻨﻰ ﺗﯩﺮﯨﻚ ﻗﻮﻳﻤﯘﺩﯗﻡ، ﺑﯘ ﻣﯩﻠﻠﻪﺕ ﻗﺎﻳﺘﺎ ﺋﯩﺴﻴﺎﻥ ﻛﯚﺗﯜﺭﻣﻪﻳﺪﯗ " ﺩﻩﭖ ﺩﻭﻛﻼﺕ ﻳﻮﻟﻠﯩﻐﺎﻥ.

ﺋﺎﺑﺪﯗﺭﯦﻬﯩﻢ ﺋﻮﺗﻜﯜﺭﻧﯩﯔ ﺋﯩﺰ ﺭﻭﻣﺎﻧﯩﺪﺍ ﺩﯦﻴﯩﻠﯩﺸﯩﭽﻪ، ﻳﺎﯓ ﺯﯦﯖﺸﯩﻦ "ﺷﯩﻨﺠﺎﯓ ﻫﻪﺭ 3 ﻳﯩﻠﺪﺍ ﺑﯩﺮ ﺗﻮﭘﯩﻼﯓ، 10 ﻳﯩﻠﺪﺍ ﺑﯩﺮ ﻗﻮﺯﻏﯩﻼﯓ ﺑﻮﻟﯘﭖ ﺗﯘﺭﯨﺪﯨﻐﺎﻥ ﺟﺎﻱ ﺩﻩﭖ " ﺧﯘﻻﺳﻪ ﭼﯩﻘﺎﺭﻏﺎﻥ، 1950 ‏ - ﻳﯩﻠﻼﺭﻏﺎ ﻛﻪﻟﮕﻪﻧﺪﻩ ﯞﺍﯓ ﺟﯧﻦ: ﺷﯩﻨﺠﺎﯕﺪﺍ ﺋﻪﻛﺴﯩﻴﻪﺗﭽﯩﻠﻪﺭ ﻛﺎﻻ ﺗﯜﻛﯩﺪﯨﻨﻤﯘ ﻛﻮﭖ ﺋﯩﻜﻪﻧﻠﯩﻜﯩﺪﯨﻦ ﺷﯩﻜﺎﻳﻪﺕ ﻗﯩﻠﻐﺎﻥ، 1990 ‏ - ﻳﯩﻠﯩﻐﺎ ﻛﻪﻟﮕﻪﻧﺪﻩ ﯞﺍﯓ ﺋﯧﻨﻤﺎﯞ: ﺷﯩﻨﺠﺎﯕﻐﺎ ﺋﺎﺳﺎﺳﯩﻲ ﺧﻪﯞﭖ ﻣﻪﻣﻠﯩﻜﻪﺕ ﺋﯩﭽﻰ - ﺳﯩﺮﺗﯩﺪﯨﻜﻰ ﺑﯚﻟﮕﯜﻧﭽﯩﻠﻪﺭﺩﯨﻦ ﻛﯧﻠﯩﺪﯗ ﺩﻩﭖ ﺋﺎﮔﺎﻫﻼﻧﺪﯗﺭﻏﺎﻥ، ﺧﯩﺘﺎﻱ ﺋﻪﻣﻪﻟﺪﺍﺭﻟﯩﺮﯨﻨﯩﯔ ﻳﯘﻗﯩﺮﯨﻘﻰ ﻫﻪﺭ ﺑﯩﺮ ﺟﯜﻣﻠﯩﺴﻰ ﻫﻪﺭ ﺑﯩﺮ ﺩﻩﯞﺭﻧﯩﯔ ﯞﻩ ﺗﺎﺭﯨﺨﻨﯩﯔ ﺧﯘﻻﺳﯩﺴﻰ ﺑﻮﻟﯘﭖ، ﺑﯘ ﺧﯘﻻﺳﯩﻠﻪﺭ ﺯﻩﻧﺠﯩﺮﯨﮕﻪ ﯞﺍﯓ ﻟﯧﭽﯜﻩﻥ ﻳﯧﯖﻰ ﺑﯩﺮ ﻫﺎﻟﻘﺎ ﻗﺎﺗﺘﻰ: ﺋﯘ ﺑﻮﻟﺴﯩﻤﯘ ": ﺷﯩﻨﺠﺎﯕﺪﺍ ﻣﻪﺳﯩﻠﻪ ﺗﯜﮔﯩﻤﻪﻳﺪﯗ." (ﺷﯚﻫﺮﻩﺕ ﻫﻮﺷﯘﺭ)