ﺧﯩﺘﺎﻱ ﺋﺎﻣﯧﺮﯨﻜﺎ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺋﯚﺯ ﭘﯘﻟﯩﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﯩﻨﻰ ﻛﻮﻧﺘﺮﻭﻝ ﻗﯩﻠﯩﯟﺍﺗﻘﺎﻥ ﺩﯙﻟﻪﺗﻠﻪﺭ ﺗﯩﺰﯨﻤﻠﯩﻜﯩﺪﯨﻦ ﭼﯜﺷﯜﭖ ﻗﺎﻟﺪﻯ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﺪﺍ ﺧﻪﯞﻩﺭ ﻗﯩﻠﯩﻨﯩﺸﯩﭽﻪ ﺋﺎﻣﯧﺮﯨﻜﺎ- ﺧﯩﺘﺎﻱ ﺋﺎﺭﯨﺴﯩﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ ﺳﻮﺩﺍ ﺋﺎﻻﻗﯩﺴﯩﺪﺍ 2007- ﻳﯩﻠﻰ ﺋﺎﻣﯧﺮﯨﻜﺎ ﺗﻪﺭﻩﭘﺘﻪ ﻛﯚﺭﯛﻧﮕﻪﻥ ﻗﯩﺰﯨﻞ ﺭﻩﻗﻪﻣﻨﯩﯔ ﻳﻪﻧﻪ ﺋﯚﺳﯜﺷﯩﮕﻪ ﺋﻪﮔﯩﺸﯩﭗ، ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺧﯩﺘﺎﻳﻨﯩﯔ ﺳﻮﺩﺍ ﺟﻪﻫﻪﺗﺘﻪ ﻣﯘﻏﻪﻣﺒﻪﺭ ﭘﻮﺯﯨﺘﺴﯩﻴﯩﺴﯩﮕﻪ ﻗﺎﺭﺷﻰ ﺟﺎﺯﺍ ﻗﻮﻟﻠﯩﻨﯩﺶ ﻫﻪﻗﻘﯩﺪﻩ ﺋﺎﻣﯧﺮﯨﻜﺎ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﮕﻪ ﺑﯧﺴﯩﻢ ﺋﯩﺸﻠﯩﺘﯩﭗ ﻛﯧﻠﯩﯟﺍﺗﻘﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﺎﻣﯧﺮﯨﻜﺎ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﻰ ﭼﺎﺭﺷﻪﻧﺒﻪ ﻛﯜﻧﻰ ﺩﯙﻟﻪﺕ ﻣﻪﺟﻠﯩﺴﯩﮕﻪ ﻳﻮﻟﻠﯩﻐﺎﻥ ﺩﻭﻛﻼﺗﯩﺪﺍ ﺧﯩﺘﺎﻳﻨﻰ ﺋﯚﺯ ﭘﯘﻟﯩﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﯩﻨﻰ ﻗﺎﺗﺘﯩﻖ ﻛﻮﻧﺘﺮﻭﻝ ﻗﯩﻠﯩﯟﺍﺗﻘﺎﻥ ﺩﯙﻟﻪﺕ ﺗﯩﺰﯨﻤﻠﯩﻜﯩﮕﻪ ﻛﯩﺮﮔﯜﺯﯛﺷﻨﻰ ﺭﻩﺕ ﻗﯩﻠﺪﻯ. ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺑﯘ ﻗﺎﺭﺍﺭﻯ ﺑﻪﺯﻯ ﺋﺎﯞﺍﻡ ﭘﺎﻻﺗﺎ ﺋﻪﺯﺍﻟﯩﺮﻯ ﯞﻩ ﺑﯩﺮﻗﯩﺴﻤﻰ ﺋﺎﻣﯧﺮﯨﻜﯩﻠﯩﻖ ﺯﺍﯞﯗﺕ ﺋﯩﮕﯩﻠﯩﺮﯨﻨﯩﯔ ﻧﺎﺭﺍﺯﯨﻠﯩﻘﯩﻨﻰ ﻗﻮﺯﻏﯩﺪﻯ.

2000 - ﻳﯩﻠﯩﺪﯨﻦ ﺑﯘﻳﺎﻥ ﺋﺎﻣﯧﺮﯨﻜﯩﺪﺍ 3 ﻣﯩﻠﻴﻮﻥ ﺋﺎﺩﻩﻡ ﺧﯩﺰﻣﯩﺘﯩﺪﯨﻦ ﺋﺎﻳﺮﯨﻠﻐﺎﻥ

ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﺋﺎﻣﯧﺮﯨﻜﺎ-ﺧﯩﺘﺎﻱ ﺳﻮﺩﺍ ﻣﯘﻧﺎﺳﯩﯟﻩﺗﻠﯩﺮﻯ ﺟﻪﺭﻳﺎﻧﯩﺪﺍ ﺑﯘ ﻳﯩﻞ ﻛﯚﺭﯛﻧﮕﻪﻥ ﻗﯩﺰﯨﻞ ﺭﻩﻗﻪﻡ 250 ﻣﯩﻠﻴﺎﺭﺩ ﺩﻭﻟﻼﺭ ﺑﻮﻟﯘﭖ، ﺷﯘ ﺧﯩﻠﺪﯨﻜﻰ ﺳﻮﺩﺍ ﺗﻪﯕﭙﯘﯕﺴﯩﺰﻟﯩﻘﯩﻨﯩﯔ ﺋﯜﺯﻟﯜﻛﺴﯩﺰ ﺩﺍﯞﺍﻣﻠﯩﺸﯩﺸﻰ ﺳﻪﯞﻩﺑﯩﺪﯨﻦ 2000- ﻳﯩﻠﯩﺪﯨﻦ ﺑﯘﻳﺎﻥ ﺋﺎﻣﯧﺮﯨﻜﯩﺪﺍ 3 ﻣﯩﻠﻴﻮﻥ ﺋﺎﺩﻩﻡ ﺧﯩﺰﻣﯩﺘﯩﺪﯨﻦ ﺋﺎﻳﺮﯨﻠﻐﺎﻥ.

ﺋﺎﻣﯧﺮﯨﻜﺎ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺩﻭﻛﻼﺗﯩﺪﺍ ﺋﻮﺗﺘﯘﺭﻏﺎ ﻗﻮﻳﯘﻟﯩﺸﯩﭽﻪ، ﮔﻪﺭﭼﻪ ﺧﯩﺘﺎﻳﻨﯩﯔ ﺋﯚﺯ ﭘﯘﻟﯩﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﯩﻨﻰ ﺗﻪﯕﺸﻪﺵ ﻗﻪﺩﯨﻤﻰ ﺑﯩﺮ ﻗﻪﺩﻩﺭ ﺋﺎﺳﺘﺎ ﺑﻮﻟﯩﯟﺍﺗﻘﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﭘﯘﻟﻨﻰ ﻛﻮﻧﺘﺮﻭﻝ ﻗﯩﻠﯩﺸﻘﺎ ﺋﺎﺭﯨﻠﯩﺸﯩﺸﻰ ﻳﻪﻧﯩﻼ ﻗﺎﻧﯘﻥ ﺑﻪﻟﮕﯩﻠﻪﭖ ﺟﺎﺯﺍ ﻗﻮﻟﻠﯩﻨﯩﺶ ﺩﻩﺭﯨﺠﯩﺴﯩﮕﻪ ﺗﻮﺷﻤﺎﻳﺪﯨﻜﻪﻥ.

ﺩﻭﻛﻼﺗﺘﺎ ﻳﻪﻧﻪ، ﮔﻪﺭﭼﻪ ﺧﯩﺘﺎﻱ ﻫﯚﻛﯜﻣﯩﺘﻰ ﭘﯘﻟﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﻰ ﺟﻪﻫﻪﺗﺘﻪ ﻣﻪﻟﯘﻡ ﺋﯩﻠﮕﯩﺮﯨﻠﻪﺷﻠﻪﺭﻧﻰ ﻫﺎﺳﯩﻞ ﻗﯩﻠﻐﺎﻥ، ﻫﻪﻣﺪﻩ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻜﻪ ﺋﯩﺰﭼﯩﻞ ﺷﯘﻧﺪﺍﻕ ﻗﯩﻠﯩﺶ ﺟﻪﻫﻪﺗﺘﻪ ﯞﻩﺩﻩ ﺑﯧﺮﯨﭗ ﻛﻪﻟﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﭘﯘﻟﯩﻨﯩﯔ ﺩﻭﻟﻼﺭﻏﺎ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﯩﻨﻰ ﻳﻪﻧﯩﻼ ﺗﯚﯞﻩﻥ ﺗﯘﺗﯘﭖ ﻛﻪﻟﮕﻪﻧﻠﯩﻜﻰ ﻛﯚﺭﺳﯩﺘﯩﻠﯩﭗ، ﺧﯩﺘﺎﻱ ﻫﯚﻛﯜﻣﯩﺘﯩﺪﯨﻦ ﺋﯚﺯ ﭘﯘﻟﯩﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﯩﻨﻰ ﺋﯚﺳﺘﯜﺭﯛﺵ ﺷﯘﻧﯩﯔ ﺑﯩﻠﻪﻥ ﺑﯩﺮﻟﯩﻜﺘﻪ ﺧﯩﺘﺎﻱ ﯞﻩ ﺩﯗﻧﻴﺎ ﺳﻮﺩﺍ ﺳﺎﻫﻪﺳﻰ ﺩﯗﭺ ﻛﯧﻠﯩﯟﺍﺗﻘﺎﻥ ﺧﻪﺗﻪﺭﻧﻰ ﺋﺎﺯﺍﻳﺘﯩﺶ ﺗﻪﻟﻪﭖ ﻗﯩﻠﯩﻨﻐﺎﻥ.

ﭘﺎﻻﺗﺎ ﺋﻪﺯﺍﺳﻰ: "ﺧﯩﺘﺎﻱ ﺋﺎﻟﺪﺍﻣﭽﯩﻠﯩﻖ ﻗﯩﻠﯩﯟﺍﺗﯩﺪﯗ"

ﺋﺎﻣﯧﺮﯨﻜﺎ ﺋﺎﯞﺍﺯﻯ ﺭﺍﺩﯨﺌﻮﺳﯩﺪﺍ ﺑﯘ ﻫﻪﻗﺘﻪ ﺑﯧﺮﯨﻠﮕﻪﻥ ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﯩﻠﯩﺴﯩﻨﯩﯔ ﺑﯩﺮ ﻗﯩﺴﯩﻢ ﺋﻪﺯﺍﻟﯩﺮﻯ ﺑﻮﻟﯘﭘﻤﯘ ﺧﯩﺘﺎﻳﻐﺎ ﻗﺎﺭﯨﺘﺎ ﺋﯩﻘﺘﯩﺴﺎﺩﻯ ﺟﺎﺯﺍ ﻗﻮﻟﻠﯩﻨﯩﺶ ﭘﯩﻜﯩﺮﯨﻨﻰ ﻗﻮﻟﻼﻳﺪﯨﻐﺎﻥ ﭘﺎﻻﺗﺎ ﺋﻪﺯﺍﻟﯩﺮﻯ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺑﯘ ﺩﻭﻛﻼﺗﺘﯩﻦ ﺋﯩﻨﺘﺎﻳﯩﻦ ﺋﯜﻣﯩﺪﺳﯩﺰﻟﻪﻧﮕﻪﻥ ﯞﻩ ﺩﻭﻛﻼﺗﻨﻰ ﺋﻪﻳﯩﺒﻠﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻧﻴﯘﻳﻮﺭﻛﻠﯘﻕ ﭘﺎﻻﺗﺎ ﺋﻪﺯﺍﺳﻰ ﭼﺎﺭﻟﯩﺰ ﺷﯘﻣﯧﺮ ﺑﯩﺮ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻳﻨﯩﯔ ﺋﯚﺯ ﭘﯘﻟﯩﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﻰ ﻛﻮﻧﺘﺮﻭﻝ ﻗﯩﻠﯩﯟﺍﺗﻘﺎﻧﻠﯩﻘﻰ ﺋﯩﻨﺘﺎﻳﯩﻦ ﺑﯩﺮ ﺋﯧﻨﯩﻖ ﻣﻪﺳﯩﻠﻪ ﺑﻮﻟﯘﭖ، ﺋﺎﻣﯧﺮﯨﻜﺎ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺧﯩﺘﺎﻳﻨﻰ ﺷﯘ ﺧﯩﻠﺪﯨﻜﻰ ﺗﯩﺰﯨﻤﻠﯩﻜﻜﻪ ﻛﯩﺮﮔﯜﺯﯛﺷﻨﻰ ﺭﻩﺕ ﻗﯩﻠﯩﺸﻰ ﺩﯙﻟﻪﺕ ﻣﻪﺟﯩﻠﯩﺴﯩﻨﻰ ﺧﯩﺘﺎﻳﻐﺎ ﻗﺎﺭﯨﺘﺎ ﺟﺎﺯﺍ ﻗﻮﻟﻠﯩﻨﯩﺸﺘﺎ ﺋﺎﻣﺎﻟﺴﯩﺰ ﻗﻮﻳﻐﺎﻧﻠﯩﻘﯩﻨﻰ ﺋﻮﺗﺘﯘﺭﻏﺎ ﻗﻮﻳﻐﺎﻥ ﯞﻩ "ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﻰ ﺩﯙﻟﻪﺕ ﻣﻪﺟﻠﯩﺴﯩﮕﻪ ﻫﯧﭽﻘﺎﻧﺪﺍﻕ ﺗﺎﻟﻼﺵ ﻳﻮﻟﻰ ﺑﻪﺭﻣﯩﺪﻯ. ﺑﯘ ﻳﻪﺭﺩﻩ ﭘﻪﻗﻪﺕ ﺋﯚﺯ ﺋﺎﻟﺪﯨﻤﯩﺰﻏﺎ ﻫﻪﺭﯨﻜﻪﺕ ﻗﻮﻟﻠﯩﻨﯩﺸﺘﯩﻦ ﺋﯚﺯﮔﻪ ﭼﺎﺭﻩ ﻗﺎﻟﻤﯩﺪﻯ" ﺩﯦﮕﻪﻥ.

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﺪﺍ ﻛﯚﺭﺳﯩﺘﯩﻠﯩﺸﯩﭽﻪ، ﭘﺎﻻﺗﺎ ﺋﻪﺯﺍﺳﻰ ﺩﻩﺑﺒﯩﺌﻪ ﺳﺘﺎﺑﻪﻧﻮﯞ " ﺧﯩﺘﺎﻱ ﺋﺎﻟﺪﺍﻣﭽﯩﻠﯩﻖ ﻗﯩﻠﯩﯟﺍﺗﯩﺪﯗ. ﺑﯩﺰﻧﯩﯔ ﺷﯩﺮﻛﻪﺗﻠﯩﺮﯨﻤﯩﺰ ﯞﻩ ﺋﻮﺗﺘﯘﺭﺍ ﻗﺎﺗﻼﻣﺪﺍ ﻳﺎﺷﺎﻳﺪﯨﻐﺎﻥ ﭘﯘﻗﺮﺍﻟﯩﺮﯨﻤﯩﺰ ﺋﯚﺯﻟﯜﻛﺴﯩﺰ ﺯﯨﻴﺎﻥ ﺗﺎﺭﺗﯩﯟﺍﺗﯩﺪﯗ" ﺩﯦﮕﻪﻥ.

ﺳﻮﺩﺍ ﺳﺎﻫﻪﺳﯩﺪﻩ ﺧﯩﺘﺎﻳﻐﺎ ﺟﺎﺯﺍ ﻗﻮﻟﻠﯩﻨﯩﺪﯨﻐﺎﻥ ﻗﺎﻧﯘﻥ ﻛﯧﻠﻪﺭ ﻳﯩﻠﻰ ﻣﺎﻗﯘﻟﻠﯩﻨﯩﺸﻰ ﻣﯘﻣﻜﯩﻦ

ﺋﺎﻣﯧﺮﯨﻜﺎ ﺋﺎﯞﺍﺯﻯ ﺭﺍﺩﯨﺌﻮﺳﯩﺪﺍ ﻓﺮﺍﻧﺴﯩﻴﻪ ﺋﺎﮔﯧﻨﺘﻠﯩﻘﯩﺪﺍ ﺑﯧﺮﯨﻠﮕﻪﻥ ﺧﻪﯞﻩﺭﻟﻪﺭﺩﯨﻦ ﻧﻪﻗﯩﻞ ﺋﯧﻠﯩﭗ ﻛﯚﺭﺳﯩﺘﯩﺸﯩﭽﻪ، ﺋﺎﻣﯧﺮﯨﻜﺎ ﺩﯙﻟﻪﺗﻠﯩﻚ ﻛﺎﺭﺧﺎﻧﯩﭽﯩﻼﺭ ﺟﻪﻣﺌﯩﻴﯩﺘﯩﻨﯩﯔ ﺑﺎﺷﻠﯩﻘﻰ ﺑﯘ ﻫﻪﻗﺘﻪ ﺋﯧﻼﻥ ﻗﯩﻠﻐﺎﻥ ﺑﺎﻳﺎﻧﺎﺗﯩﺪﺍ، ﺋﺎﻣﯧﺮﯨﻜﺎ ﻣﺎﻟﯩﻴﻪ ﻣﯩﻨﯩﺴﺘﯩﺮﻯ ﭘﺎﺋﯘﻟﺴﻮﻧﻨﯩﯔ ﺧﯩﺘﺎﻱ ﺑﯩﻠﻪﻥ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺋﯩﻘﺘﯩﺴﺎﺩﻯ ﺩﯨﺌﺎﻟﻮﮔﻰ ﺩﺍﯞﺍﻣﯩﺪﺍ ﺧﯩﺘﺎﻳﻨﻰ ﺋﯚﺯ ﭘﯘﻟﯩﻨﯩﯔ ﻗﯩﻤﻤﯩﺘﯩﻨﻰ ﺋﯚﺳﺘﯜﺭﯛﺷﻜﻪ ﻗﯩﺴﺘﯩﺸﯩﻨﻰ ﻗﻮﻟﻠﯩﻐﺎﻥ ﺑﻮﻟﺴﯩﻤﯘ، ﻧﺎﯞﺍﺩﺍ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻘﻰ ﺧﯩﺘﺎﻳﻨﻰ ﭘﯘﻟﯩﻨﯩﯔ ﺋﺎﻟﻤﺎﺷﺘﯘﺭﯗﺵ ﻗﯩﻤﻤﯩﺘﯩﻨﻰ ﻛﻮﻧﺘﺮﻭﻝ ﻗﯩﻠﯩﭗ ﻛﯧﻠﯩﯟﺍﺗﻘﺎﻥ ﺩﯙﻟﻪﺕ ﺗﯩﺰﯨﻤﻐﺎ ﻛﯩﺮﮔﯜﺯﮔﻪﻥ ﺑﻮﻟﺴﺎ ﺋﯩﺸﻼﺭﻧﯩﯔ ﺗﯧﺨﯩﻤﯘ ﺋﻮﯕﯘﺷﻠﯘﻕ ﺑﻮﻟﯘﭖ ﻛﯧﺘﯩﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﻏﺎ ﻗﻮﻳﻐﺎﻥ.

ﺩﯙﻟﻪﺗﻠﯩﻚ ﻛﺎﺭﺧﺎﻧﯩﭽﯩﻼﺭ ﺟﻪﻣﺌﯩﻴﯩﺘﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ ﻓﺮﺍﻧﻚ ﯞﺍﺭﮔﻮﻧﻨﯩﯔ ﺑﯩﻠﺪﯛﺭﮔﻪﻧﻠﯩﺮﯨﮕﻪ ﻗﺎﺭﯨﻐﺎﻧﺪﺍ، ﺋﯘ ﻣﺎﻟﯩﻴﻪ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺧﯩﺘﺎﻳﻐﺎ ﻗﺎﺭﯨﺘﺎ ﻫﻪﺭﯨﻜﻪﺕ ﻗﻮﻟﻠﯩﻨﯩﺸﺘﺎ ﻣﻪﻏﻠﯘﭖ ﺑﻮﻟﯘﺷﻰ، ﺩﯙﻟﻪﺕ ﻣﻪﺟﻠﯩﺴﻨﻰ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﻰ ﺧﯩﺘﺎﻳﻨﯩﯔ ﭘﯘﻝ ﺳﯩﻴﺎﺳﯩﺘﯩﺪﯨﻜﻰ ﻧﺎﻫﻪﻗﻠﯩﻘﻨﻰ ﺟﺎﺯﺍﻟﯩﺸﯩﻐﺎ ﻳﻮﻝ ﺋﺎﭼﯩﺪﯨﻐﺎﻥ ﺑﯩﺮ ﻗﺎﻧﯘﻥ ﻻﻳﯩﻬﯩﺴﻰ ﺗﻮﻧﯘﺷﺘﯘﺭﯗﺷﻘﺎ ﻳﻪﻧﻪ ﻗﯩﺴﺘﺎﻳﺪﯨﻜﻪﻥ.

ﺋﯘ ﻣﯘﻧﺪﺍﻕ ﺩﯦﮕﻪﻥ: "ﺑﯘ ﻛﯧﻠﻪﺭ ﻳﯩﻠﯩﺪﺍ ﺋﯚﺗﻜﯜﺯﯨﻠﯩﺪﯨﻐﺎﻥ ﺳﺎﻳﻼﻡ ﻣﯘﺷﯘ ﺧﯩﻠﺪﯨﻜﻰ ﺑﯩﺮ ﻗﺎﻧﯘﻥ ﻻﻳﯩﻬﯩﺴﯩﻨﯩﯔ ﺗﻮﻧﯘﺷﺘﯘﺭﯗﺷﺘﯩﻜﻰ ﺋﯧﻬﺘﯩﻤﺎﻟﻠﯩﻘﻨﻰ ﻛﯜﭼﻪﻳﺘﯩﺪﯗ."

ﺗﺎﺷﻘﻰ ﭘﯧﺮﯦﯟﻭﺗﺘﯩﻜﻰ ﻗﯩﺰﯨﻞ ﺭﻩﻗﻪﻡ ﺋﺎﻣﯧﺮﯨﻜﺎﻧﻰ ﺑﯩﺌﺎﺭﺍﻡ ﻗﯩﻠﯩﭗ ﻛﻪﻟﻤﻪﻛﺘﻪ

ﺋﯚﺗﻜﻪﻥ ﻳﯩﻠﻠﯩﻖ ﺋﺎﻣﯧﺮﯨﻜﺎ ﺧﯩﺘﺎﻱ ﺳﻮﺩﺍ ﺋﺎﻻﻗﯩﺴﯩﺪﺍ ﺋﺎﻣﯧﺮﯨﻜﺎ ﺗﻪﺭﻩﭘﺘﻪ 233 ﻣﯩﻠﻴﺎﺭﺩ ﺩﻭﻟﻼﺭ ﻗﯩﺰﯨﻞ ﺭﻩﻗﻪﻡ ﻛﯚﺭﯛﻧﮕﻪﻥ. ﻣﻪﻟﯘﻡ ﺑﻮﻟﯘﺷﯩﭽﻪ، ﺑﯘ ﻳﯩﻠﻠﯩﻖ ﻗﯩﺰﯨﻞ ﺭﻩﻗﻪﻡ 250 ﻣﯩﻠﻴﺎﺭﺩ ﺩﻭﻟﻼﺭﻏﺎ ﻳﯧﺘﯩﭗ ﺑﯘﻟﺘﯘﺭﻗﯩﺪﯨﻦ ﺋﯧﺸﯩﭗ ﻛﻪﺗﻜﻪﻥ. ﺧﯩﺘﺎﻱ ﺳﻮﺩﯨﺴﯩﺪﺍ ﻛﯚﺭﯛﻧﮕﻪﻥ ﻗﯩﺰﯨﻞ ﺭﻩﻗﻪﻣﻨﯩﯔ ﺋﯚﺭﻟﻪﭖ ﺑﯧﺮﯨﺸﻰ ﺋﺎﻣﯧﺮﯨﻜﺎ ﺗﻪﺭﻩﭘﻨﻰ ﺋﻪﻧﺪﯨﺸﯩﮕﻪ ﺳﺎﻟﻐﺎﻥ ﺑﻮﻟﯘﭖ ﺑﯘ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﯩﻠﯩﺴﯩﻨﯩﯔ ﺧﯩﺘﺎﻳﻨﻰ ﺟﺎﺯﺍﻻﺵ ﺗﻮﻏﺮﯨﺴﯩﺪﺍ ﻧﯘﺭﻏﯘﻥ ﻗﺎﺭﺍ ﻻﻳﯩﻬﯩﺴﯩﻨﻰ ﺗﻮﻧﯘﺷﺘﯘﺭﯗﺷﯩﻐﺎ ﺳﻪﯞﻩﺏ ﺑﻮﻟﻐﺎﻥ ﺋﯩﺪﻯ.

ﻣﺎﻟﯩﻴﻪ ﻣﯩﻨﯩﺴﺘﯩﺮﻯ ﭘﺎﺋﯘﻟﺴﻮﻥ ﺋﯚﺗﻜﻪﻥ ﻫﻪﭘﺘﻪ ﺧﯩﺘﺎﻳﻐﺎ ﺑﺎﺷﻼﭖ ﺑﺎﺭﻏﺎﻥ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﻯ ﺧﯩﺘﺎﻱ ﭘﯘﻟﯩﻨﯩﯔ ﻗﯩﻤﻤﯩﺘﯩﻨﻰ ﺗﻪﯕﺸﻪﺵ ﻫﻪﻗﻘﯩﺪﻩ ﺧﯩﺘﺎﻱ ﺑﯩﻠﻪﻥ 3- ﻗﯧﺘﯩﻢ ﺳﯚﻫﺒﻪﺕ ﺋﯧﻠﯩﭗ ﺑﺎﺭﺩﻯ.

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﺪﺍ ﻛﯚﺭﺳﯩﺘﯩﺸﯩﭽﻪ، ﺳﯚﻫﺒﻪﺗﻠﻪﺭﺩﻩ ﺋﺎﻣﯧﺮﯨﻜﺎ ﺗﻪﺭﻩﭖ ﻳﻮﻕ ﺩﯨﻴﻪﺭﻟﯩﻚ ﻧﻪﺗﯩﺠﯩﮕﻪ ﺋﯧﺮﯨﺸﻜﻪﻥ ﺑﻮﻟﯘﭖ، ﺋﻪﻣﻤﺎ ﺧﯩﺘﺎﻱ ﻫﯚﻛﯜﻣﯩﺘﻰ ﺋﻪﮔﻪﺭ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﻳﻪﻧﻪ ﺩﺍﯞﺍﻣﻠﯩﻖ ﺧﯩﺘﺎﻳﻨﻰ ﺳﻮﺩﺍ ﺟﻪﻫﻪﺗﺘﻪ ﺟﺎﺯﺍﻻﻳﺪﯨﻐﺎﻥ ﻗﺎﺭﺍﺭﻻﺭ ﻣﺎﻗﯘﻟﻼﻧﺴﺎ ﺋﺎﻣﯧﺮﯨﻜﺎ ﺷﯩﺮﻛﻪﺗﻠﯩﺮﯨﺪﯨﻦ ﺋﯚﭺ ﺋﺎﻟﯩﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﻏﺎ ﻗﻮﻳﯘﭖ ﺗﻪﻫﺪﯨﺖ ﺳﺎﻟﻐﺎﻥ ﺋﯩﺪﻯ.

ﺧﯩﺘﺎﻱ ﺗﻪﺭﻩﭘﻨﯩﯔ ﻛﯚﺭﺳﯩﺘﯩﺸﯩﭽﻪ، ﺧﯩﺘﺎﻱ ﭘﯘﻟﯩﻨﯩﯔ ﻗﯩﻤﻤﯩﺘﯩﻨﻰ ﺋﺎﺳﺘﺎ ﻗﻪﺩﻩﻡ ﺋﯚﺳﺘﯜﺭﯛﺵ ﺧﯩﺘﺎﻱ ﺋﯩﻘﺘﯩﺴﺎﺩﯨﻨﯩﯔ ﺋﺎﺳﺘﯩﻦ -ﺋﯜﺳﺘﯜﻥ ﺑﻮﻟﯘﭖ ﻛﯧﺘﯩﺸﻨﯩﯔ ﺋﺎﻟﺪﯨﻨﻰ ﺋﺎﻻﻻﻳﺪﯨﻐﺎﻥ ﺑﯩﺮﺩﯨﻦ ﺑﯩﺮ ﺗﻮﻏﺮﺍ ﻳﻮﻟﻰ ﺋﯩﻜﻪﻥ.(ﺟﯜﻣﻪ)