ﺋﯜﺯﯛﻟﯜﭖ ﻗﺎﻟﻐﺎﻥ ﺧﯩﺘﺎﻱ ‏- ﺋﺎﻣﯧﺮﯨﻜﺎ ﻛﯩﺸﯩﻠﯩﻚ ﻫﻮﻗﯘﻕ ﺩﯨﺌﺎﻟﻮﮔﻰ ﻗﺎﻳﺘﯩﺪﯨﻦ ﺑﺎﺷﻼﻧﻤﺎﻗﭽﻰ

• ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻛﺎﻧﺪﯨﻠﯩﺰﺍ ﺭﺍﻳﯩﺲ. Source: State Department Site

ﺋﺎﻣﯧﺮﯨﻜﺎ ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﻰ، ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﯩﺪﯨﻜﻰ ﺑﯩﺮ ﺧﺎﺩﯨﻤﻨﯩﯔ ﺳﯚﺯﯨﻨﻰ ﻧﻪﻗﯩﻞ ﻛﻪﻟﺘﯜﺭﯛﭖ، ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻛﺎﻧﺪﯨﻠﯩﺰﺍ ﺭﺍﻳﯩﺲ ﺧﺎﻧﯩﻤﻨﯩﯔ، ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻳﺎﯓ ﺟﯧﭽﯩﻐﺎ ﺑﯩﺮ ﻗﺎﻧﭽﻪ ﻣﯘﻫﯩﻢ ﻣﻪﺳﯩﻠﻪ ﺋﯜﺳﺘﯩﺪﻩ ﺋﯚﺯﯨﻨﯩﯔ ﺗﻪﻟﻪﭘﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ، ﺋﻪﻣﻤﺎ ﻣﻪﺯﻛﯜﺭ ﺧﺎﺩﯨﻢ ﺭﺍﻳﯩﺲ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﻣﻪﺳﯩﻠﯩﻠﻪﺭﻧﯩﯔ ﻗﺎﻳﺴﻰ ﻣﻪﺳﯩﻠﯩﻠﻪﺭ ﺋﯩﻜﻪﻧﻠﯩﻜﻰ ﺗﻮﻏﺮﯨﺴﯩﺪﺍ ﺋﯧﻨﯩﻖ ﺋﯩﭙﺎﺩﻩ ﺑﯩﻠﺪﯛﺭﻣﯩﮕﻪﻥ.

ﺧﯩﺘﺎﻱ ﺑﯩﻠﻪﻥ ﺋﺎﻣﯧﺮﯨﻜﺎ ﺋﯩﻜﻜﻰ ﺩﯙﻟﻪﺕ 1990 ‏- ﻳﯩﻠﯩﺪﯨﻦ ﺑﯘﻳﺎﻥ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﻰ ﺋﯜﺳﺘﯩﺪﻩ ﻗﻪﺭﻩﻟﺴﯩﺰ ﺩﯨﺌﺎﻟﻮﮒ ﻗﯘﺭﯗﭖ ﻛﻪﻟﮕﻪﻥ. ﺑﯩﺮﺍﻕ ﭘﺮﯦﺰﯨﺪﯦﻨﺖ ﺟﻮﺭﺝ ﺑﯘﺵ 2002 ‏- ﻳﯩﻠﻰ ﺗﻪﺧﺘﻜﻪ ﭼﯩﻘﻘﺎﻧﺪﯨﻦ ﻛﯧﻴﯩﻦ، ﺋﺎﻣﯧﺮﯨﻜﺎ ﺧﯩﺘﺎﻳﻨﯩﯔ ﺑﻪﺭﮔﻪﻥ ﯞﻩﺩﯨﺴﯩﺪﻩ ﺗﯘﺭﻣﯩﻐﺎﻧﻠﯩﻘﯩﻨﻰ، ﻳﻪﻧﻰ ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﻛﯩﺸﯩﻠﯩﻚ ﻫﻮﻗﯘﻕ ﻛﻮﻣﯩﺘﯧﺘﻰ ﺗﻪﻛﺸﯜﺭﯛﺵ ﮔﯘﺭﯗﭘﭙﯩﺴﯩﻨﯩﯔ ﺧﯩﺘﺎﻳﺪﯨﻜﻰ ﯞﻩﺯﯨﻴﻪﺗﻨﻰ ﺗﻪﻛﺸﯜﺭﯛﺷﯩﮕﻪ ﻗﻮﺷﯘﻟﻤﯩﻐﺎﻧﻠﯩﻘﯩﻨﻰ ﺑﺎﻫﺎﻧﻪ ﻗﯩﻠﯩﭗ، ﺋﯩﻜﻜﻰ ﺗﻪﺭﻩﭘﻨﯩﯔ ﺑﯘ ﻣﻪﺳﯩﻠﻪ ﺋﯜﺳﺘﯩﺪﯨﻜﻰ ﺩﯨﺌﺎﻟﻮﮔﻰ ﺗﻮﺧﺘﺎﭖ ﻗﺎﻟﻐﺎﻥ ﺋﯩﺪﻯ.

ﺧﯩﺘﺎﻱ ﺗﻪﺭﻩﭖ 2004 ‏- ﻳﯩﻠﻰ ﺋﺎﻣﯧﺮﯨﻜﯩﻨﯩﯔ، ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﻛﯩﺸﯩﻠﯩﻚ ﻫﻮﻗﯘﻕ ﻛﻮﻣﯩﺘﯧﺘﯩﻨﯩﯔ ﺟﯘﯕﮕﻮﻧﻰ ﺋﻪﻳﯩﺒﻠﻪﻳﺪﯨﻐﺎﻥ ﺑﯩﺮ ﻗﺎﺭﺍﺭ ﻻﻳﯩﻬﯩﺴﯩﻨﻰ ﻗﻮﻟﻠﯩﻐﺎﻧﻠﯩﻘﯩﻨﻰ ﺑﺎﻫﺎﻧﻪ ﻗﯩﻠﯩﭗ، ﮔﻪﺭﭼﻪ ﻣﻪﺯﻛﯜﺭ ﻗﺎﺭﺍﺭ ﻻﻳﯩﻬﯩﺴﻰ ﺗﻪﺳﺘﯩﻘﻼﻧﻤﯩﻐﺎﻥ ﺑﻮﻟﺴﯩﻤﯘ، ﺋﯩﻜﻜﻰ ﺗﻪﺭﻩﭖ ﺋﻮﺗﺘﯘﺭﯨﺴﯩﺪﯨﻜﻰ ﺩﯨﺌﺎﻟﻮﮔﻨﻰ ﭘﯜﺗﯜﻧﻠﻪﻱ ﺗﻮﯕﻠﯩﺘﯩﯟﻩﺗﺘﻰ.

ﺋﻪﻣﻤﺎ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ، ﭘﺮﯦﺰﯨﺪﯦﻨﺖ ﺑﯘﺵ ﻫﯚﻛﯜﻣﯩﺘﯩﻨﯩﯔ ﺋﯩﺰﭼﯩﻞ ﺗﯜﺭﺩﻩ، ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﻘﺎ ﺧﯩﻼﭖ ﻗﯩﻠﻤﯩﺸﻠﯩﺮﯨﻐﺎ ﻛﯚﺯ ﻳﯘﻣﯘﺵ ﭘﻮﺯﯨﺘﺴﯩﻴﺴﯩﻨﻰ ﺑﯩﻠﺪﯛﺭﯛﭖ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ ﺷﯘﻧﯩﯖﺪﻩﻙ ﺋﺎﻣﯧﺮﯨﻜﯩﻨﯩﯔ ﺑﯘ ﺋﺎﺭﻗﯩﻠﯩﻖ، ﻛﻮﺭﯨﻴﻪ ﻣﻪﺳﯩﻠﯩﺴﻰ، ﺋﯩﺮﺍﻥ ﻣﻪﺳﯩﻠﯩﺴﻰ ﻫﻪﻣﺪﻩ ﺗﯧﺮﺭﻭﺭﻟﯘﻗﻘﺎ ﺯﻩﺭﺑﻪ ﺑﯧﺮﯨﺶ ﻫﻪﺭﯨﻜﯩﺘﻰ ﻗﺎﺗﺎﺭﻟﯩﻖ ﺗﻪﺭﻩﭘﻠﻪﺭﺩﻩ ﺑﯧﻴﺠﯩﯖﻨﯩﯔ ﻗﻮﻟﻠﯩﺸﯩﻐﺎ ﺋﯧﺮﯨﺸﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﻣﻪﻛﺘﻪ.

ﻏﻪﺭﺏ ﻣﻪﺗﺒﯘﺋﺎﺗﻠﯩﺮﯨﺪﺍ ﻛﺎﻧﺪﯨﻠﯩﺰﺍ ﺭﺍﻳﯩﺴﻨﯩﯔ، ﺑﯘ ﻗﯧﺘﯩﻢ ﺧﯩﺘﺎﻳﺪﺍ ﺋﯧﻠﯩﭗ ﺑﺎﺭﯨﺪﯨﻐﺎﻥ ﺯﯨﻴﺎﺭﯨﺘﯩﻨﯩﯔ ﺋﺎﺳﺎﺳﻠﯩﻖ ﻣﻪﻗﺴﯩﺪﻯ ﺷﯩﻤﺎﻟﯩﻲ ﻛﻮﺭﯨﻴﻪ ﻳﺎﺩﺭﻭ ﻗﻮﺭﺍﻟﻠﯩﺮﯨﻨﻰ ﺑﯩﺮ ﺗﻪﺭﻩﭖ ﻗﯩﻠﯩﺶ ﻣﻪﺳﯩﻠﯩﺴﺪﻩ ﺧﯩﺘﺎﻳﻨﯩﯔ ﺗﯜﺭﺗﻜﯩﻠﯩﻚ ﺭﻭﻝ ﺋﻮﻳﻨﺎﭖ، ﺷﯩﻤﺎﻟﯩﻲ ﻛﻮﺭﯨﻴﯩﮕﻪ ﺑﯧﺴﯩﻢ ﺋﯩﺸﻠﯩﺘﯩﺪﯨﻐﺎﻧﻠﯩﻘﻰ، ﺑﯘﻻﺭﺩﯨﻦ ﺳﯩﺮﺕ ﺋﺎﻣﯧﺮﯨﻜﺎ ﺧﯩﺘﺎﻱ ﺋﻮﺗﺘﯘﺭﯨﺴﯩﺪﺍ ﺋﯜﺯﯛﻟﯜﭖ ﻗﺎﻟﻐﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺩﯨﺌﺎﻟﻮﮔﯩﻨﻰ ﻗﺎﻳﺘﺎ ﺑﺎﺷﻼﺵ ﻣﻪﺳﯩﻠﯩﺴﻰ ﺋﯩﻜﻪﻧﻠﯩﻜﻰ ﺋﯧﻨﯩﻖ ﺗﻪﻛﯩﺘﻠﻪﻧﮕﻪﻥ. ﻟﯧﻜﯩﻦ ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﺪﺍ ﺋﯩﻜﻜﻰ ﺗﻪﺭﻩﭘﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺩﯨﺌﺎﻟﻮﮔﯩﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﺗﻮﻏﺮﯨﺴﯩﺪﺍ ﻫﯧﭽﻨﻪﺭﺳﻪ ﺩﯦﻴﯩﻠﻤﯩﮕﻪﻥ.

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﺪﺍ ﻧﯧﻤﻪ ﺋﯜﭼﯜﻥ، ﺧﯩﺘﺎﻱ ‏ﺑﯩﻠﻪﻥ ﺋﺎﻣﯧﺮﯨﻜﯩﻨﯩﯔ ﺋﯜﺯﯛﻟﯜﭖ ﻗﺎﻟﻐﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺩﯨﺌﺎﻟﻮﮔﯩﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﻫﻪﻗﻘﯩﺪﯨﻜﻰ ﻣﻪﺯﻣﯘﻧﻼﺭ ﺗﯩﻠﻐﺎ ﺋﯧﻠﯩﻨﻤﺎﻳﺪﯗ، ﺑﯘ ﻫﻪﻗﺘﻪ ﺋﯚﺯ ﻗﺎﺭﺍﺷﻠﯩﺮﯨﻨﻰ ﺑﺎﻳﺎﻥ ﻗﯩﻠﻐﺎﻥ ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﯩﻨﯩﯔ ﺋﺎﻛﺘﯩﭗ ﭘﺎﺋﺎﻟﯩﻴﻪﺗﭽﯩﻠﯩﺮﯨﺪﯨﻦ ﺋﯩﻠﺸﺎﺕ ﺋﻪﭘﻪﻧﺪﻯ ﻣﯘﻧﺪﺍﻕ ﺩﻩﻳﺪﯗ.

ﻳﻪﻧﻪ ﺑﯩﺮ ﻗﯩﺴﯩﻢ ﻛﯚﺯﻩﺗﻜﯜﭼﯩﻠﻪﺭ، ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ، ﺋﺎﻣﯧﺮﯨﻜﺎ ﺑﯩﻠﻪﻥ ﺩﯨﺌﺎﻟﻮﮔﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺷﻰ ﺧﯩﺘﺎﻳﻐﺎ ﻳﻪﻧﯩﻼ ﺑﯧﺴﯩﻢ ﺋﯧﻠﯩﭗ ﻛﯧﻠﯩﺪﯨﻐﺎﻧﻠﯩﻘﯩﻨﻰ، ﭼﯜﻧﻜﻰ ﺧﯩﺘﺎﻳﺪﺍ ﻛﯩﺸﯩﻠﯩﻚ ﻫﻮﻗﯘﻕ ﻳﺎﺧﺸﯩﻠﯩﻨﯩﺸﻘﺎ ﻗﺎﺭﺍﭖ ﻣﺎﯕﻤﺎﻱ، ﺋﻪﻛﺴﯩﭽﻪ ﻛﯜﻧﺪﯨﻦ - ﻛﯜﻧﮕﻪ ﻧﺎﭼﺎﺭﻟﯩﺸﯩﭗ ﻛﯧﺘﯩﯟﺍﺗﻘﺎﻧﻠﯩﻘﻰ، ﺑﻮﻟﯘﭘﻤﯘ ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﯩﻨﻰ ﺋﯚﺗﻜﯜﺯﯛﺵ ﺳﺎﻻﻫﯩﻴﯩﺘﯩﮕﻪ ﺋﯩﮕﻪ ﺑﻮﻟﯘﺷﺘﯩﻦ ﺑﯘﺭﯗﻥ ﺧﻪﻟﻘﺌﺎﺭﺍﻏﺎ ﺑﻪﺭﮔﻪﻥ ﯞﻩﺩﯨﺴﯩﺪﻩ ﺗﯘﺭﻣﯩﻐﺎﻧﻠﯩﻘﻰ ﻧﯚﯞﻩﺗﺘﻪ ﺋﻪﯓ ﻛﯚﭖ ﺗﯩﻠﻐﺎ ﺋﯧﻠﯩﻨﯩﯟﺍﺗﻘﺎﻥ ﺑﯩﺮ ﻣﻪﺳﯩﻠﯩﮕﻪ ﺋﺎﻳﻼﻧﻐﯩﻨﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﻤﺎﻗﺘﺎ. (ﺋﻪﻗﯩﺪﻩ)