ﺧﯩﺘﺎﻱ ﺋﺎﻗﻘﯘﻧﻠﯩﺮﯨﻨﯩﯔ ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﻣﻪﻧﭙﻪﺋﻪﺕ ﻛﯜﺭﯨﺸﻰ

• ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﯩﻨﯩﯔ "ﻛﯩﺸﯩﻠﯩﻚ ﻫﻮﻗﯘﻕ ﺧﯩﺘﺎﭘﻨﺎﻣﯩﺴﻰ"ﺩﺍ، ﻫﻪﺭ ﻗﺎﻧﺪﺍﻕ ﭘﯘﻗﺮﺍﻧﯩﯔ ﺩﯙﻟﻪﺗﻨﯩﯔ ﺳﯩﻴﺎﺳﯩﻲ ﺑﯧﺴﯩﻤﯩﺪﯨﻦ ﺧﺎﻟﻰ ﻫﺎﻟﺪﺍ ﻛﯚﭼﯜﺵ ﯞﻩ ﺋﻮﻟﺘﯘﺭﺍﻗﻠﯩﺸﯩﺶ ﺋﻪﺭﻛﯩﻨﻠﯩﻜﯩﮕﻪ ﺩﻩﺧﻠﻰ - ﺗﻪﺭﯗﺯ ﻗﯩﻠﻤﺎﺳﻠﯩﻖ ﺗﻪﻛﯩﺘﻠﻪﻧﮕﻪﻥ. ﺋﻪﻣﻤﺎ ﺑﺎﺷﻘﺎ ﻳﻪﺭﮔﻪ ﻛﯚﭼﯜﭖ ﻛﯧﻠﯩﭗ ﺋﻮﻟﺘﯘﺭﺍﻗﻼﺷﻘﺎﻥ ﭘﯘﻗﺮﺍﻻﺭﻧﯩﯔ ﺋﻪﺳﻠﻰ ﻳﻪﺭﻟﯩﻚ ﺧﻪﻟﻘﻨﯩﯔ ﻣﻪﻧﭙﻪﺋﻪﺗﯩﻨﻰ ﺗﺎﻻﻥ - ﺗﺎﺭﺍﺝ ﻗﯩﻠﯩﺸﻰ ﻣﯘﺗﻠﻪﻕ ﭼﻪﻛﻠﻪﻧﮕﻪﻥ. ﭼﻪﺗﺌﻪﻟﻠﻪﺭﺩﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺋﻮﺭﮔﺎﻧﻠﯩﺮﯨﻨﯩﯔ ﯞﻩ ﺋﯘﻳﻐﯘﺭ ﺳﯩﻴﺎﺳﯩﻲ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﯩﯔ ﭘﯩﻜﺮﯨﮕﻪ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻱ ﺋﺎﻗﻘﯘﻧﻠﯩﺮﯨﻨﯩﯔ ﺋﯘﻳﻐﯘﺭ ﺩﯨﻴﺎﺭﯨﻐﺎ ﻛﯚﭘﻠﻪﭖ ﻛﯚﭼﯜﭖ ﻛﯧﻠﯩﺸﻰ، ﺋﯩﺴﺘﯩﺨﯩﻴﯩﻠﯩﻚ ﻛﯚﭼﯜﺷﺘﯩﻦ ﺑﺎﺷﻘﺎ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺳﻪﭘﻪﺭﯞﻩﺭﻟﯩﻜﻰ ﻫﻪﻡ ﺭﯨﻐﺒﻪﺗﻠﯩﺮﯨﮕﻪ ﺗﺎﻳﺎﻧﻐﺎﻥ ﺑﻮﻟﯘﭖ، ﺑﯘ ﻛﯚﭼﯜﭖ ﻛﻪﻟﮕﻪﻥ ﺋﺎﻗﻘﯘﻧﻼﺭﻧﯩﯔ ﻣﯘﺗﻠﻪﻕ ﻛﯚﭖ ﻗﯩﺴﻤﻰ ﺑﯘ ﺯﯦﻤﯩﻨﻨﯩﯔ ﻳﻪﺭﻟﯩﻚ ﺧﻪﻟﻘﻰ ﺑﻮﻟﻐﺎﻥ ﺋﯘﻳﻐﯘﺭﻻﺭﻧﯩﯔ ﻣﻪﻧﭙﻪﺋﻪﺗﯩﻨﻰ ﻗﯘﺭﺑﺎﻥ ﻗﯩﻠﯩﺶ ﺑﻪﺩﯨﻠﯩﮕﻪ ﻫﺎﻳﺎﺗﻠﯩﻖ ﺷﺎﺭﺍﺋﯩﺘﻰ ﯞﻩ ﺑﺎﻳﺎﺷﺎﺩﻟﯩﻘﻘﺎ ﺋﯧﺮﯨﺸﯩﯟﺍﺗﻘﺎﻧﻠﯩﻘﻰ ﺋﯜﭼﯜﻥ، ﺑﯘ ﺧﯩﻞ ﻛﯚﭼﯜﺵ ﺋﯩﺰﭼﯩﻞ ﻫﺎﻟﺪﺍ ﺋﯘﻳﻐﯘﺭﻻﺭ ﯞﻩ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻠﻪﺭﻧﯩﯔ ﻧﺎﺭﺍﺯﯨﻠﯩﻘﻠﯩﺮﯨﻨﻰ ﻗﻮﺯﻏﺎﭖ ﻛﻪﻟﻤﻪﻛﺘﻪ.

ﺩﺍﯞﺍﻣﻠﯩﺸﯩﯟﺍﺗﻘﺎﻥ ﺗﺎﻻﻥ - ﺗﺎﺭﺍﺝ

ﺧﯩﺘﺎﻱ ﺗﻮﺭ ﺑﻪﺗﻠﯩﺮﯨﺪﯨﻜﻰ ﺳﺘﺎﺗﯩﺴﺘﯩﻜﯩﻠﯩﻖ ﻣﻪﻟﯘﻣﺎﺗﻼﺭﻏﺎ ﺋﺎﺳﺎﺳﻼﻧﻐﺎﻧﺪﺍ، 1940 - ﻳﯩﻠﻠﯩﺮﻯ ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﺋﻮﻣﯘﻣﻰ ﻧﻮﭘﯘﺳﻰ 400ﻣﯩﯖﻐﺎ ﻳﻪﺗﻤﻪﻳﺪﯨﻐﺎﻥ ﺧﯩﺘﺎﻱ ﭘﯘﻗﺮﺍﻟﯩﺮﯨﻨﯩﯔ ﻫﺎﺯﯨﺮﻗﻰ ﻧﻮﭘﯘﺳﻰ، ﺑﯩﯖﺘﯜﻩﻧﻨﯩﯔ ﻧﻮﭘﯘﺳﯩﻨﻰ ﻫﯧﺴﺎﺑﻘﺎ ﺋﺎﻟﻤﯩﻐﺎﻧﺪﺍ 7 ﻣﯩﻠﻴﻮﻧﺪﯨﻦ ﺋﺎﺷﻘﺎﻥ. ﺋﯘﻳﻐﯘﺭ ﺩﯨﻴﺎﺭﯨﺪﺍ ﻳﺎﺷﺎﯞﺍﺗﻘﺎﻥ ﻫﻪﻡ ﺋﺎﻳﯩﻘﻰ ﺋﯜﺯﯛﻟﻤﻪﻱ ﻛﯧﻠﯩﯟﺍﺗﻘﺎﻥ ﺑﯘ ﺧﯩﺘﺎﻳﻼﺭﻧﯩﯔ ﺋﯘﻳﻐﯘﺭﻻﺭﻧﯩﯔ ﻫﻪﻕ - ﻫﻮﻗﯘﻗﻠﯩﺮﯨﻨﻰ ﺩﻩﭘﺴﻪﻧﺪﻩ ﻗﯩﻠﯩﭗ، ﺋﯚﺯ ﺋﯧﻬﺘﯩﻴﺎﺟﻠﯩﺮﯨﻨﻰ ﻗﺎﻧﺪﯗﺭﯗﯞﺍﺗﻘﺎﻧﻠﯩﻘﻰ ﻣﻪﺗﺒﯘﺋﺎﺗﻼﺭﺩﺍ ﻛﯚﭖ ﺗﻪﻛﯩﺘﻠﯩﻨﯩﯟﺍﺗﻘﺎﻥ ﺗﯧﻤﺎ ﺑﻮﻟﺴﯩﻤﯘ، ﺑﯘ ﺋﺎﻗﻘﯘﻧﻼﺭﻧﯩﯔ ﺋﯚﺯ ‏- ﺋﺎﺭﺍ ﻣﻪﻧﭙﻪﺋﻪﺕ ﺗﺎﻟﯩﺸﯩﺶ ﻛﯜﺭﻩﺷﻠﯩﺮﯨﮕﻪ ﺋﺎﺋﯩﺖ ﺧﻪﯞﻩﺭﻟﻪﺭ ﺋﺎﻧﭽﻪ ﻛﯚﭖ ﺋﺎﺷﻜﺎﺭﯨﻼﻧﻤﺎﻳﺪﯗ. ﺑﯚﺷﯜﻥ ﺗﻮﺭ ﺑﯧﺘﯩﻨﯩﯔ 3 - ﺋﺎﻳﻨﯩﯔ 4 - ﻛﯜﻧﯩﺪﯨﻜﻰ " ﻗﯘﺗﯘﺑﻰ ﻳﯧﺰﯨﻠﯩﺮﯨﺪﯨﻜﻰ ﻳﯧﺰﺍ ﺑﺎﺷﻠﯩﻘﻰ، ﭘﺎﺭﺗﯩﻴﻪ ﺋﻪﺯﺍﻟﯩﺮﯨﻨﯩﯔ ﻳﯧﺰﺍ ﺗﯘﭘﺮﺍﻗﻠﯩﺮﯨﻨﻰ ﻗﺎﻧﯘﻧﺴﯩﺰ ﺗﺎﻻﻥ - ﺗﺎﺭﺍﺝ ﻗﯩﻠﯩﺸﻰ" ﻧﺎﻣﻠﯩﻖ ﺧﻪﯞﯨﺮﯨﮕﻪ ﺋﺎﺳﺎﺳﻼﻧﻐﺎﻧﺪﺍ، ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﻳﯧﺰﯨﻼﺭﻧﯩﯔ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻟﯩﺮﻯ، ﻳﯧﺰﺍ - ﻛﻪﻧﺖ ﺑﺎﺷﻠﯩﻘﻠﯩﺮﻯ ﯞﻩ ﺳﻮﺩﺍ ﺷﯩﺮﻛﻪﺗﻠﯩﺮﯨﻨﯩﯔ ﻣﻪﺳﺌﯘﻟﻠﯩﺮﻯ ﺑﻮﻟﻐﺎﻥ ﺧﯩﺘﺎﻳﻼﺭﻧﯩﯔ ﺑﯩﺮ ﺑﯩﺮﯨﺪﯨﻦ ﻣﻪﻧﭙﻪﺋﻪﺕ ﺗﺎﻟﯩﺸﯩﭗ، ﺋﯚﺯ ‏-ﺋﺎﺭﺍ ﺟﻪﯕﮕﻰ - ﺟﯩﺪﻩﻝ ﻗﯩﻠﯩﺶ ﻫﺎﺩﯨﺴﯩﻠﯩﺮﻯ ﺋﻮﻣﯘﻣﻼﺷﻘﺎﻥ.

ﻳﯧﻘﯩﻨﺪﯨﻦ ﺑﯘﻳﺎﻥ، ﺑﯘ ﺭﯨﻘﺎﺑﻪﺗﺘﻪ ﻣﻪﻏﻠﯘﭖ ﺑﻮﻟﻐﺎﻥ، ﺗﻮﻏﺮﯨﺴﻰ، ﻛﯚﺯﻟﯩﮕﻪﻥ ﻣﻪﻗﺴﯩﺪﯨﮕﻪ ﻳﯧﺘﻪﻟﻤﯩﮕﻪﻥ ﺑﻪﺯﻯ ﺧﯩﺘﺎﻳﻼﺭ، ﺭﻩﻗﯩﺒﻠﯩﺮﻯ ﺋﯜﺳﺘﯩﺪﯨﻦ ﻫﯚﻛﯜﻣﻪﺗﻜﻪ ﺋﻪﺭﺯ ﺳﯘﻧﯘﺷﻘﺎ ﻫﻪﻡ ﺗﻮﺭ ﺑﻪﺗﻠﯩﺮﯨﺪﻩ ﺑﯘ ﺧﯩﻴﺎﻧﻪﺗﭽﯩﻠﯩﻚ، ﭼﯧﺮﯨﻜﻠﯩﻜﻠﻪﺭﻧﻰ ﭘﺎﺵ ﻗﯩﻠﯩﭗ، ﺋﯚﭺ ﺋﯧﻠﯩﺸﻘﺎ ﺑﺎﺷﻠﯩﻤﺎﻗﺘﺎ. ' ﺑﻮﺷﯜﻥ ﺗﻮﺭﻯ ' ﺩﺍ ﺋﯧﻼﻥ ﻗﯩﻠﯩﻨﻐﺎﻥ ﺑﯘ ﭘﺎﺵ ﻗﯩﻠﯩﺶ ﺩﻭﻛﻼﺗﯩﻨﻰ ﻣﺎ ﺷﯩﻨﻠﻮﯓ ﺋﯩﺴﯩﻤﻠﯩﻚ ﺑﯩﺮ ﺧﯩﺘﺎﻱ ﻳﺎﻛﻰ ﺗﯘﻧﮕﺎﻥ ﻳﺎﺯﻏﺎﻥ. ﺋﯘ ﻣﻪﺯﻛﯘﺭ ﺩﻭﻛﻼﺗﻨﯩﯔ ﺋﺎﺳﺘﯩﻐﺎ ﺋﯚﺯﯨﻨﯩﯔ ﺗﯧﻠﯧﻔﯘﻥ ﻧﻮﻣﯘﺭﯨﻨﻰ ﻗﺎﻟﺪﯗﺭﯗﭖ ﻗﻮﻳﻐﺎﻧﺪﯨﻦ ﺳﯩﺮﺕ، ﻗﯘﺗﯘﺑﻰ ﻧﺎﻫﯩﻴﯩﺴﯩﺪﯨﻜﻰ ﺑﯩﺮ ﻛﻪﻧﺖ ﺑﺎﺷﻠﯩﻘﯩﻨﯩﯔ ﻳﻪﺭ - ﻣﯜﻟﯜﻛﻠﻪﺭﻧﻰ ﻗﺎﻗﺘﻰ - ﺳﻮﻗﺘﻰ ﻗﯩﻠﯩﺶ ﺟﻪﺭﻳﺎﻧﯩﺪﺍ ﺋﯩﺸﻠﻪﺗﻜﻪﻥ ﻳﺎﻟﻐﺎﻥ ﻫﯚﺟﺠﻪﺗﻨﯩﯔ ﺋﻪﻳﻨﻰ ﻧﯘﺳﺨﯩﺴﯩﻨﻰ ﭼﺎﭘﻼﭖ ﻗﻮﻳﻐﺎﻥ.. ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﻗﯘﺗﯘﺑﻰ ﻧﺎﻫﯩﻴﯩﺴﯩﺪﯨﻜﻰ ﻳﯧﺰﺍ - ﻛﻪﻧﺘﻠﻪﺭﻧﯩﯔ ﺑﺎﺷﻠﯩﻘﻠﯩﺮﻯ ﺗﯘﺭﺍﻟﻐﯘ ﺋﯚﻱ ﺋﯜﭼﯜﻥ ﺋﺎﺟﺮﯨﺘﯩﻠﻐﺎﻥ ﻳﻪﺭﻟﻪﺭﻧﻰ، ﺗﯧﺮﯨﻠﻐﯘ ﻳﻪﺭﻟﻪﺭﻧﻰ ﯞﻩ ﺋﻮﺗﻼﻗﻼﺭﻧﻰ ﺋﯚﺯ ﺗﯘﻏﻘﺎﻧﻠﯩﺮﯨﻐﺎ، ﻳﯧﻘﯩﻨﻠﯩﺮﯨﻐﺎ ﺧﺎﻟﯩﻐﺎﻧﭽﻪ ﺑﯚﻟﯜﭖ ﺑﯧﺮﯨﺪﯨﻜﻪﻥ. ﺧﯩﺘﺎﻱ ﺳﻮﺩﯨﮕﻪﺭﻟﯩﺮﯨﮕﻪ ﺋﻪﺭﺯﺍﻥ ﺑﺎﻫﺎﻻﺭﺩﺍ ﺳﯧﺘﯩﭗ، ﺗﺎﭘﻘﺎﻥ ﭘﯘﻟﻨﻰ ﺧﯩﻴﺎﻧﻪﺕ ﻗﯩﻠﯩﺪﯨﻜﻪﻥ. ﺋﻪﮔﻪﺭ ﺋﯘ ﻫﻮﻗﯘﻗﯩﺪﯨﻦ ﺋﯧﻠﯩﻨﯩﭗ ﻛﻪﺗﺴﻪ، ﺋﯘﻧﯩﯔ ﺋﻮﺭﻧﯩﻐﺎ ﭼﯩﻘﻘﺎﻥ ﻳﻪﻧﻪ ﺑﯩﺮﺳﻰ، ﺋﻮﺧﺸﺎﺷﻼ ﺗﺎﻻﻥ - ﺗﺎﺭﺍﺝ ﻗﯩﻠﯩﺶ، ﺧﯩﻴﺎﻧﻪﺕ ﻗﯩﻠﯩﺸﻨﻰ ﺩﺍﯞﺍﻣﻼﺷﺘﯘﺭﯨﺪﯨﻜﻪﻥ.

ﺧﯩﺘﺎﻳﻼﺷﻘﺎﻥ ﻫﻮﻗﯘﻕ ﺳﺎﻫﻪﺳﻰ

ﺋﯘﻳﻐﯘﺭ ﺯﯨﻴﺎﻟﯩﺴﻰ ﺋﻪﺭﻛﯩﻨﺌﺎﻱ ﺧﺎﻧﯩﻤﻨﯩﯔ ﺋﯧﻴﺘﯩﺸﯩﭽﻪ، ﺑﯘ ﺧﻪﯞﻩﺭﺩﻩ ﺗﯩﻠﻐﺎ ﺋﯧﻠﯩﻨﻐﺎﻥ ﯞﻩﻗﻪﻟﻪﺭ ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﻫﯚﻛﯜﻣﻪﺕ ﺋﻮﺭﮔﺎﻧﻠﯩﺮﯨﺪﯨﻜﻰ ﺧﯩﺘﺎﻳﻼﺭﻧﯩﯔ ﺋﯘﭼﯩﻐﺎ ﭼﯩﻘﻘﺎﻥ ﭼﯧﺮﯨﻜﻠﯩﻚ ﯞﻩ ﺗﺎﻻﻥ - ﺗﺎﺭﺍﺟﻠﯩﺮﯨﻨﯩﯔ ﺩﻩﻟﯩﻠﻰ ﺋﻪﻣﻪﺱ، ﺑﻪﻟﻜﻰ ﺋﯘﻳﻐﯘﺭ ﺩﯨﻴﺎﺭﯨﻐﺎ ﻛﯧﻠﯩﭗ ﺋﯘﺯﯗﻥ ﺋﯚﺗﻤﻪﻳﻼ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﻮﺭﯗﻧﻼﺷﺘﯘﺭﯗﺷﻰ ﺑﯩﻠﻪﻥ ﻳﯧﺰﺍ ﯞﻩ ﻛﻪﻧﺘﻠﻪﺭﮔﻪ ﺑﺎﺷﻠﯩﻖ ﺑﻮﻟﯘﯞﺍﻟﻐﺎﻥ ﺧﯩﺘﺎﻱ ﺋﺎﻗﻘﯘﻧﻠﯩﺮﯨﻨﯩﯔ ﺋﯘﻳﻐﯘﺭ ﺯﯦﻤﯩﻨﯩﺪﺍ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﻮﻣﯘﻣﻼﺷﻘﺎﻥ ﺑﯘﻻﯕﭽﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﯩﯔ ﺋﺎﺷﻜﺎﺭﯨﻼﻧﻐﺎﻥ ﺋﺎﺩﺩﯨﻲ ﺑﯩﺮ ﻣﯩﺴﺎﻟﻰ ﺋﯩﻜﻪﻥ.

ﻣﻪﻟﯘﻣﺎﺗﻼﺭﻏﺎ ﺋﺎﺳﺎﺳﻼﻧﻐﺎﻧﺪﺍ، ﺑﯘﻧﺪﯨﻦ 10 ﻳﯩﻠﻼﺭ ﺋﯩﻠﮕﯩﺮﻯ، ﺋﯘﻳﻐﯘﺭ ﺩﯨﻴﺎﺭﯨﺪﺍ ﺗﯚﯞﻩﻥ ﺩﯦﮕﻪﻧﺪﻩ، ﭘﻪﻗﻪﺕ ﻧﺎﻫﯩﻴﯩﻠﯩﻚ ﭘﺎﺭﺗﻜﻮﻣﻨﯩﯔ ﺳﯧﻜﺮﯨﺘﺎﺭﻟﯩﺮﻯ ﺧﯩﺘﺎﻱ ﺑﻮﻟﻐﺎﻥ ﺑﻮﻟﺴﺎ، ﻫﺎﺯﯨﺮ ﻳﯧﺰﺍ ﯞﻩ ﻛﻪﻧﺘﻠﻪﺭﻧﯩﯔ ﺳﯧﻜﺮﯨﺘﺎﺭﻟﯩﺮﯨﻐﯩﭽﻪ ﺧﯩﺘﺎﻳﻠﯩﺸﯩﭗ ﻛﻪﺗﻜﻪﻥ. ﺑﯘﻧﺪﺍﻕ ﺑﻮﻟﯘﺷﻰ، ﺑﯩﺮ ﺗﻪﺭﻩﭘﺘﯩﻦ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻫﻪﺭ ﻗﺎﻧﺪﺍﻕ ﺋﯘﻳﻐﯘﺭﻧﯩﯔ ﺳﺎﺩﺍﻗﯩﺘﯩﮕﻪ ﺑﻮﻟﻐﺎﻥ ﺋﯩﺸﻪﻧﭽﯩﺴﯩﻨﯩﯔ ﻳﻮﻗﻠﯘﻗﯩﻨﻰ ﻛﯚﺭﺳﻪﺗﺴﻪ، ﻳﻪﻧﻪ ﺑﯩﺮ ﺗﻪﺭﻩﭘﺘﯩﻦ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺧﯩﺘﺎﻱ ﺋﺎﻗﻘﯘﻧﻠﯩﺮﯨﻨﻰ ﻫﻮﻗﯘﻕ ﯞﻩ ﻣﻪﻧﭙﻪﺋﻪﺕ ﺑﯩﻠﻪﻥ ﺗﻪﻣﯩﻨﻠﻪﭖ، ﺋﺎﻗﻘﯘﻧﻼﺭﻧﯩﯔ ﺋﯘﻳﻐﯘﺭ ﺩﯨﻴﺎﺭﯨﺪﺍ ﻛﯚﭘﻠﻪﭖ ﺋﻮﻟﺘﯘﺭﺍﻗﻠﯩﺸﯩﺸﯩﻨﻰ ﺋﻪﻣﻪﻟﮕﻪ ﺋﺎﺷﯘﺭﯗﺵ ﺋﺎﺭﻗﯩﻠﯩﻖ، ﺋﯚﺯﯨﻨﯩﯔ ﺋﯘﻳﻐﯘﺭ ﯞﻩﺗﯩﻨﯩﮕﻪ ﺑﻮﻟﻐﺎﻥ ﻣﯘﺳﺘﻪﻣﻠﯩﻜﯩﺴﯩﻨﯩﯔ ﺋﯚﻣﺮﯨﻨﻰ ﺋﯘﺯﺍﺭﺗﯩﺸﻨﻰ ﻣﻪﻗﺴﻪﺕ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﯩﭙﺎﺩﯨﻠﻪﻳﺪﯨﻜﻪﻥ.

ﺯﯗﻟﯘﻡ ﺑﺎﺭ ﻳﻪﺭﺩﻩ ﻗﺎﺭﺷﯩﻠﯩﻖ ﺗﯜﮔﯩﻤﻪﻳﺪﯗ

ﺋﯘﻳﻐﯘﺭﻻﺭﻧﯩﯔ ﻫﺎﺯﯨﺮﻏﺎ ﻗﻪﺩﻩﺭ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﻨﯩﯔ ﺳﻪﯞﻩﺑﯩﻨﻰ ﺋﺎﻧﺎﻟﯩﺰ ﻗﯩﻠﯩﺪﯨﻐﺎﻧﻼﺭ ﯞﻩ ﺋﯘﻧﯩﯔ ﺋﺎﻗﯩﯟﯨﺘﯩﮕﻪ ﻛﯚﯕﯜﻝ ﺑﯚﻟﯩﺪﯨﻐﺎﻧﻼﺭ ﺋﺎﺯ ﺋﻪﻣﻪﺱ.

ﺧﯩﺘﺎﻱ ﺋﺎﻗﻘﯘﻧﻠﯩﺮﯨﻨﯩﯔ ﺋﯘﻳﻐﯘﺭ ﺩﯨﻴﺎﺭﯨﺪﺍ ﻫﯚﻛﯜﻣﺮﺍﻥ ﺑﯩﺮ ﻣﯩﻠﻠﻪﺕ ﺳﯜﭘﯩﺘﯩﺪﻩ ﻣﻪﻏﺮﯗﺭ ﻳﺎﺷﺎﯞﺍﺗﻘﺎﻧﻠﯩﻘﻰ، ﺋﯘﻻﺭﻧﯩﯔ ﻫﻪﺭ ﻗﺎﻧﺪﺍﻕ ﺟﯩﻨﺎﻳﻪﺗﻠﯩﻚ ﻣﻪﻧﭙﻪﺋﻪﺗﻠﯩﺮﯨﻨﯩﯔ ﻗﺎﻧﯘﻥ ﺗﻪﺭﯨﭙﯩﺪﯨﻦ ﻗﻮﻏﺪﯨﻠﯩﯟﺍﺗﻘﺎﻧﻠﯩﻘﻰ، ﺋﻪﻛﺴﯩﭽﻪ ﺋﯘﻳﻐﯘﺭﻻﺭﻧﯩﯔ ﻣﻪﻳﻠﻰ ﺋﯩﻘﺘﯩﺴﺎﺩﻯ ﺳﺎﻫﻪﺩﻩ ﺑﻮﻟﺴﯘﻥ، ﻣﻪﺩﻩﻧﯩﻲ ﺳﺎﻫﻪﺩﻩ ﺑﻮﻟﺴﯘﻥ ﯞﻩ ﻣﻪﻳﻠﻰ ﺋﯩﺠﺘﯩﻤﺎﺋﯩﻲ، ﺩﯨﻨﯩﻲ ﻳﺎﻛﻰ ﺳﯩﻴﺎﺳﯩﻲ ﺳﺎﻫﻪﺩﻩ ﺑﻮﻟﺴﯘﻥ، ﻫﻪﻕ - ﻫﻮﻗﯘﻗﻠﯩﺮﯨﻨﯩﯔ ﻫﯧﭽﻘﺎﻧﺪﺍﻕ ﻛﺎﭘﺎﻟﻪﺗﻜﻪ ﺋﯩﮕﻪ ﺋﻪﻣﻪﺳﻠﯩﻜﻰ، ﺑﯘ ﺯﯗﻟﯘﻣﻨﯩﯔ ﻫﺎﻣﺎﻥ ﺑﯩﺮ ﻛﯜﻧﻰ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﺍ ﻛﯜﭼﻠﯜﻙ ﺋﯩﻨﻜﺎﺱ ﻗﻮﺯﻏﺎﭖ، ﺧﯩﺘﺎﻱ ﻫﯚﻛﯜﻣﺮﺍﻧﻠﯩﻘﯩﻐﺎ ﻗﺎﺭﺷﻰ ﺯﻭﺭ ﻛﯚﻟﻪﻣﻠﯩﻚ ﻗﻮﺯﻏﯘﻟﯘﺷﻨﻰ ﻣﻪﻳﺪﺍﻧﻐﺎ ﻛﻪﻟﺘﯜﺭﯨﺪﯨﻐﺎﻧﻠﯩﻘﻰ، ﺳﯩﻴﺎﺳﯩﻲ ﺋﺎﻧﺎﻟﯩﺰﭼﯩﻼﺭ ﺗﻪﺭﯨﭙﯩﺪﯨﻦ ﺗﻪﻛﯩﺘﻠﻪﻧﻤﻪﻛﺘﻪ. (ﺋﻪﻛﺮﻩﻡ)