ﺋﻪﻧﯟﻩﺭﺟﺎﻥ ﻣﯘﻫﻪﻣﻤﻪﺩ ﺧﯘﺟﯩﻨﺘﺎﯞﻧﻰ ﻗﺎﺭﺷﻰ ﺋﺎﻟﻐﯩﻠﻰ ﭼﯩﻘﻘﺎﻧﻠﯩﻘﯩﻨﻰ ﺋﯩﻨﻜﺎﺭ ﻗﯩﻠﺪﻯ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

19 ‏- ﻧﻮﻳﺎﺑﯩﺮ ﻛﯜﻧﻰ، ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﯩﻨﯩﯔ ﺗﻮﺭ ﺑﯧﺘﯩﺪﻩ، ﺋﺎﻣﯧﺮﯨﻜﯩﺪﺍ ﺋﻮﻗﯘﯞﺍﺗﻘﺎﻥ ﺋﯘﻳﻐﯘﺭ ﺩﻭﻛﺘﯘﺭ ﺋﻪﻧﯟﻩﺭﺟﺎﻥ ﻣﯘﻫﻪﻣﻤﻪﺗﻨﯩﯔ، ﺑﯘ ﻳﯩﻞ 4 - ﺋﺎﻳﺪﺍ، ﺧﯘﺟﯩﻨﺘﺎﯞﻧﻰ ﻛﯜﺗﯜﯞﯦﻠﯩﺶ ﺋﯜﭼﯜﻥ ﺑﻪﺵ ﻳﯘﻟﺘﯘﺯﻟﯘﻕ ﻗﯩﺰﯨﻞ ﺑﺎﻳﺮﺍﻗﻨﻰ ﻛﯚﺗﯜﺭﯛﭖ ﺋﺎﻳﺮﻭﺩﺭﻭﻣﻐﺎ ﭼﯩﻘﻘﺎﻧﻠﯩﻘﻰ ﻫﻪﻗﻘﯩﺪﻩ ﺧﻪﯞﻩﺭ ﺑﯧﺮﯨﻠﺪﻯ. ﺧﻪﯞﻩﺭ ﯞﻩﺗﻪﻥ ﺋﯩﭽﯩﺪﯨﻜﻰ ﭼﻮﻏﻼﻥ ﺗﻮﺭ ﺑﯧﺘﯩﺪﯨﻦ ﺋﯧﻠﯩﻨﻐﺎﻥ. ﻣﻪﺯﻛﯘﺭ ﺧﻪﯞﻩﺭ ﯞﻩﺗﻪﻥ ﺳﯩﺮﺗﯩﺪﯨﻜﻰ ﺑﻮﻟﯘﭘﻤﯘ ﺋﺎﻣﯧﺮﯨﻜﯩﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ ﺋﺎﺭﯨﺴﯩﺪﺍ ﻛﯜﭼﻠﯜﻙ ﻏﯘﻟﻐﯘﻻ ﭘﻪﻳﺪﺍ ﻗﯩﻠﺪﻯ.

ﺋﻪﻧﯟﻩﺭﺟﺎﻥ: " ﻣﻪﻥ ﺧﯘﺟﯩﻨﺘﺎﯞﻧﻰ ﻛﯚﺭﯛﭖ ﺑﺎﻗﻤﯩﺪﯨﻢ"

ﺑﯩﺰ ﺑﯘ ﻫﻪﻗﺘﻪ ﺋﻪﻧﯟﻩﺭﺟﺎﻥ ﻣﯘﻫﻪﻣﻤﻪﺗﻨﯩﯔ ﺋﯚﺯﻯ ﺑﯩﻠﻪﻥ ﻛﯚﺭﯛﺷﺘﯘﻕ، ﺋﻪﻧﯟﻩﺭﺟﺎﻥ ﺋﯚﺯﯨﻨﯩﯔ ﺑﯜﮔﯜﻧﮕﻪ ﻗﻪﺩﻩﺭ ﻫﯧﭽﻘﺎﻧﺪﺍﻕ ﺑﯩﺮ ﺳﯩﻴﺎﺳﯩﻲ ﭘﺎﺋﺎﻟﯩﻴﻪﺗﻜﻪ ﺋﯩﺸﺘﯩﺮﺍﻙ ﻗﯩﻠﻤﯩﻐﺎﻧﻠﯩﻘﯩﻨﻰ، ﺋﯚﺯﯨﻨﻰ ﺑﯩﺮ ﺋﯩﻠﯩﻢ ﺋﺎﺩﯨﻤﻰ ﺩﻩﭖ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ، ﺧﻪﻟﻘﻰ ﺋﯜﭼﯜﻥ ﺋﯩﻠﯩﻢ ﻳﻮﻟﻰ ﺋﺎﺭﻗﯩﻠﯩﻖ ﺧﯩﺰﻣﻪﺕ ﻗﯩﻠﯩﺶ ﻣﻪﻗﺴﯩﺘﻰ ﺑﺎﺭﻟﯩﻘﯩﻨﻰ، ﺧﯩﺘﺎﻳﻐﺎ ﻗﺎﺭﺷﻰ ﺗﯘﺭﯨﺪﯨﻐﺎﻥ ﻫﻪﻡ ﻗﻮﻟﻼﻳﺪﯨﻐﺎﻥ ﭘﺎﺋﺎﻟﯩﻴﻪﺗﻠﻪﺭﮔﻪ ﻗﺎﺗﻨﺎﺷﻤﯩﻐﺎﻧﻠﯩﻘﯩﻨﻰ ﺷﯘﻧﯩﯖﺪﻩﻙ ﺑﯘﻧﺪﺍﻕ ﺋﯩﺸﻼﺭ ﺋﯜﭼﯜﻥ ﻫﻪﻡ ﻗﯩﺰﯨﻘﯩﺸﻰ ﻳﻮﻗﻠﯘﻗﻰ، ﻫﻪﻡ ﯞﺍﻗﺘﻰ ﻳﻮﻗﻠﯘﻗﯩﻨﻰ ﺋﯩﭙﺎﺩﯨﻠﯩﺪﻯ.

ﺳﻮﺋﺎﻝ: ﺳﯩﺰ ﺭﺍﺳﺘﯩﻨﻼ، ﺧﯘﺟﯩﻨﺘﺎﯞﻧﻰ ﻛﯜﺗﯩﯟﯦﻠﯩﺶ ﺋﯜﭼﯜﻥ ﺋﺎﻳﺮﯗﺩﯗﺭﯗﻣﻐﺎ ﭼﯩﻘﺘﯩﯖﯩﺰﻣﯘ؟

ﺟﺎﯞﺍﭖ: ﻳﺎﻕ. ﻣﻪﻥ ﺧﯘﺟﯩﻨﺘﺎﯞﻧﻰ ﻛﯚﺭﯛﭖ ﺑﺎﻗﻤﯩﺪﯨﻢ.

ﺳﻮﺋﺎﻝ: ﺧﻪﯞﻩﺭﺩﻩ ﺳﯩﺰﻧﻰ ﻛﻮﻟﻮﻣﺒﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺋﻮﻗﯘﻏﯘﭼﯩﺴﻰ ﺩﻩﭘﺘﯘ، ﺑﯘ ﺭﺍﺳﺘﻤﯘ؟

ﺟﺎﯞﺍﭖ: ﻳﺎﻕ. ﻣﻪﻥ ﻛﻮﻟﻮﻣﺒﯩﻴﻪ ﺋﯘﻧﯟﯦﺭﺳﯩﺘﯧﺘﯩﻐﯩﻤﯘ ﺑﯧﺮﯨﭗ ﺑﺎﻗﻤﯩﺪﯨﻢ.

ﺳﻮﺋﺎﻝ: ﺧﻪﯞﻩﺭﺩﻩ ﺩﯦﻴﯩﻠﮕﻪﻥ ﺋﻪﻧﯟﻩﺭﺟﺎﻥ ﺳﯩﺰﻣﯘ ﺋﻪﻣﻪﺳﻤﯘ؟

ﺟﺎﯞﺍﭖ: ﻣﻪﻥ ﺷﯘ، ﺑﯩﺮﺍﻕ ﻣﯘﺧﺒﯩﺮ ﺑﯩﻠﮕﯩﻨﯩﻨﯩﻤﯘ، ﺑﯩﻠﻤﯩﮕﯩﻨﯩﻨﯩﻤﯘ ﻳﯧﺰﯨﭙﺘﯘ.

" ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﻯ ﺋﯘﻳﻐﯘﺭ ﺟﻪﻣﺌﯩﻴﯩﺘﯩﻨﯩﯔ ﻛﯚﺯﻯ، ﻗﯘﻟﯩﻘﻰ ﯞﻩ ﺗﯩﻠﻰ"

ﺋﯘﻳﻐﯘﺭ ﺧﻪﻟﻘﻰ ﺟﻪﻣﺌﯩﻴﻪﺗﻨﻰ ﭼﯜﺷﯩﻨﯩﺸﺘﻪ، ﺋﯚﺯ ﻣﻪﺳﯩﻠﯩﻠﯩﺮﯨﻨﻰ ﺑﯩﺮ ﺗﻪﺭﻩﭖ ﻗﯩﻠﯩﺸﺘﺎ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﻨﯩﯔ ﺳﯚﺯ -ﻫﻪﺭﯨﻜﻪﺗﻠﯩﺮﯨﻨﻰ ﺋﯚﺯﯨﮕﻪ ﺋﻪﻳﻨﻪﻙ ﺳﯜﭘﯩﺘﯩﺪﻩ ﭘﺎﻳﺪﯨﻠﯩﻨﯩﺪﯗ؛ ﺋﯘﻧﺪﺍﻗﺘﺎ، ﺧﯩﺘﺎﻱ ﺋﺎﺧﺒﺎﺭﺍﺗﯩﻨﯩﯔ، ﺋﻪﻧﯟﻩﺭﺟﺎﻥ ﻫﻪﻗﻘﯩﺪﻩ، ﻳﺎﻟﻐﺎﻥ ﺋﯘﭼﯘﺭ ﺑﯧﺮﯨﺸﻰ ﻧﯧﻤﯩﺪﯨﻦ ﺩﯦﺮﻩﻙ ﺑﯧﺮﯨﺪﯗ؟ ﺑﯘ ﻫﻪﻗﺘﻪ ﺑﯩﺰ،ﻛﺎﻧﺎﺩﺍﺩﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ، ﺷﯘﻧﺪﺍﻗﻼ ﺋﺎﺧﺒﺎﺭﺍﺕ ﺳﺎﻫﻪﺳﯩﺪﻩ، 10 ﻳﯩﻠﺪﯨﻦ ﺋﺎﺭﺗﯘﻕ ﺧﯩﺰﻣﻪﺕ ﻗﯩﻠﻐﺎﻥ ﮔﯜﻟﺸﻪﻥ ﺋﺎﺑﺪﯗﻗﺎﺩﯨﺮ ﺧﺎﻧﯩﻤﻨﯩﯔ ﭘﯩﻜﺮﯨﻨﻰ ﺋﺎﻟﺪﯗﻕ.

ﮔﯜﻟﺸﻪﻥ ﺧﺎﻧﯩﻢ، ﺧﯩﺘﺎﻳﻨﯩﯔ ﺳﺎﺧﺘﺎ ﺗﻪﺷﯟﯨﻘﺎﺗﯩﻨﯩﯔ، ﺋﯘﻳﻐﯘﺭ ﺭﺍﻳﻮﻧﯩﻨﻰ ﻛﻮﻧﺘﺮﻭﻝ ﻗﯩﻠﯩﺸﺘﯩﻜﻰ ﯞﺍﺯ ﻛﯧﭽﯩﻠﻤﻪﻱ ﻛﯧﻠﯩﯟﺍﺗﻘﺎﻥ ﺑﯩﺮ ﭼﺎﺭﻩ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﯛﭖ ﻣﯘﻧﺪﺍﻕ ﺩﯦﺪﻯ: "ﺋﺎﻟﺪﻯ ﺑﯩﻠﻪﻥ، ﺑﯘ ﺧﻪﯞﻩﺭﻧﯩﯔ ﻳﺎﻟﻐﺎﻥ ﺑﻮﻟﯘﭖ ﭼﯩﻘﻘﯩﻨﯩﺪﯨﻦ ﺳﯚﻳﯜﻧﺪﯛﻡ. ﺋﻪﮔﻪﺭ ﺋﺎﻣﯧﺮﯨﻜﯩﺪﺍ ﺋﻮﻗﯘﯞﺍﺗﻘﺎﻥ ﺑﯩﺮ ﺩﻭﻛﺘﯘﺭ، ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﯞﺍﺗﻘﺎﻥ ﺑﯩﺮ ﺩﯙﻟﻪﺗﻨﯩﯔ ﺑﺎﺷﻠﯩﻘﯩﻨﯩﯔ ﺋﺎﻟﺪﯨﻐﺎ ﻛﯘﺗﯜﯞﺍﻟﻐﯩﻠﻰ ﭼﯩﻘﻘﺎﻥ ﺑﻮﻟﺴﺎ، ﺑﯘ ﻧﺎﻫﺎﻳﯩﺘﻰ ﺋﯧﭽﯩﻨﯩﺸﻠﯩﻖ ﺑﯩﺮ ﺋﯩﺶ ﺑﻮﻻﺗﺘﻰ. ﺗﻪﺧﻤﯩﻦ ﻗﯩﻠﻐﯩﻨﯩﻤﺪﻩﻙ، ﺑﯘ ﺳﺎﺧﺘﺎ ﺧﻪﯞﻩﺭ ﺑﻮﻟﯘﭖ ﭼﯩﻘﺘﻰ. ﺑﯘ ﻳﯧﯖﻰ ﺋﻪﻫﯟﺍﻝ ﺋﻪﻣﻪﺱ. ﺋﯘﻳﻐﯘﺭ ﻣﯩﻠﻠﯩﺘﯩﻨﯩﯔ ﺯﯦﻬﻨﯩﻨﻰ ﻗﺎﻳﻤﯘﻗﺘﯘﺭﯗﺵ ﺋﯜﭼﯜﻥ ﻳﯩﻠﻼﺭﺩﯨﻦ ﺑﯧﺮﻯ ﻗﻮﻟﻠﯩﻨﯩﭗ ﻛﯧﻠﯩﯟﺍﺗﻘﺎﻥ ﺑﯩﺮ ﺋﯘﺳﯘﻝ."

ﮔﯜﻟﺸﻪﻥ ﺧﺎﻧﯩﻤﻨﯩﯔ ﻗﺎﺭﯨﺸﯩﭽﻪ، ﺋﯩﻠﯩﻢ ﺋﻪﻫﻠﯩﻨﯩﯔ ﺋﻪﯓ ﺋﻪﻗﻪﻟﻠﯩﻲ ﺋﻪﺧﻼﻕ ﺋﯚﻟﭽﯩﻤﻰ، ﺋﺎﻟﺪﻯ ﺑﯩﻠﻪﻥ ﻫﻪﻗﯩﻘﻪﺗﻜﻪ ﻫﯚﺭﻣﻪﺕ ﻗﯩﻠﯩﺶ؛ ﻫﻪﻗﯩﻘﻪﺕ ﺑﯩﻠﻪﻥ ﻣﻪﻧﭙﻪﺋﻪﺕ ﺋﺎﺭﯨﺴﯩﺪﺍ ﺋﯩﻜﻜﯩﺪﯨﻦ ﺑﯩﺮﯨﻨﻰ ﺗﺎﺷﻼﺷﻘﺎ ﺗﻮﻏﺮﺍ ﻛﻪﻟﮕﻪﻧﺪﻩ ﻫﻪﻗﯩﻘﻪﺕ ﺗﻪﺭﻩﭘﺘﻪ ﺗﯘﺭﯗﺵ؛ ﮔﯜﻟﺸﻪﻥ ﺧﺎﻧﯩﻤﻨﯩﯔ ﺑﯩﻠﺪﯛﺭﯨﺸﯩﭽﻪ ﻳﻪﻧﻪ، ﺋﯩﻠﯩﻢ ﺋﻪﻫﻠﻰ ﺩﯦﻤﻪﻙ ﻏﯧﻤﻰ ﯞﻩ ﻏﺎﻳﯩﺴﻰ ﺋﺎﺋﯩﻠﯩﺴﯩﺪﯨﻦ ﻫﺎﻟﻘﯩﻐﺎﻥ ﺋﯩﻨﺴﺎﻥ ﺩﯦﻤﻪﻛﺘﯘﺭ ؛ ﺋﺎﻟﺪﻯ ﺑﯩﻠﻪﻥ ﺋﯚﺯ ﻣﯩﻠﻠﯩﺘﻰ، ﺋﺎﻧﺪﯨﻦ ﺋﯩﻨﺴﺎﻧﯩﻴﻪﺕ ﺋﯜﭼﯜﻥ ﺑﺎﺵ ﻗﺎﺗﯘﺭﯗﺵ ﻫﻪﻗﯩﻘﯩﻲ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﻨﯩﯔ ﻫﺎﻳﺎﺕ ﻣﯩﺰﺍﻧﯩﺪﯗﺭ. ﺋﻪﻣﻤﺎ ﮔﯜﻟﺸﻪﻥ ﺧﺎﻧﯩﻤﻨﯩﯔ ﺑﯩﻠﺪﯛﺭﯛﺷﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﻨﯩﯔ ﻫﺎﻳﺎﺕ ﻣﯩﺰﺍﻧﯩﻨﻰ ﺑﯘﺯﯗﺵ ﺋﯜﭼﯜﻥ ﺋﯜﭼﯜﻥ ﻫﻪﺭﯨﻜﻪﺕ ﻗﯩﻠﯩﭗ ﻛﻪﻟﻤﻪﻛﺘﻪ، ﺧﯩﺘﺎﻱ ﺋﺎﺧﺒﺎﺭﺍﺗﯩﻨﯩﯔ ﺋﻪﻧﯩﯟﻩﺭﺟﺎﻧﻨﯩﯔ ﺧﯘ ﺟﯩﻨﺘﺎﯞﻧﻰ ﻛﯘﺗﯜﯞﺍﻟﻐﯩﻠﻰ ﭼﯩﻘﺘﻰ، ﺩﻩﭖ ﺳﺎﺧﺘﺎ ﺧﻪﯞﻩﺭ ﺑﯧﺮﯨﺸﻰ ﻣﺎﻧﺎ ﻣﯘﺷﯘ ﺳﯜﻳﯩﻘﻪﺳﺘﺘﯩﻦ ﺑﺎﺷﻘﺎ ﻧﻪﺭﺳﻪ ﺋﻪﻣﻪﺱ.

ﺳﻮﺋﺎﻝ: ﻣﯘﺧﺒﯩﺮﻟﯩﻖ ﻫﺎﻳﺎﺗﯩﯖﯩﺰﺩﺍ ﻳﻮﻟﯘﻗﻘﺎﻥ ﻣﯘﺷﯘ ﺧﯩﻞ ﺋﻪﻫﯟﺍﻟﻼﺭ ﺑﺎﺭﻣﯘ؟

ﺟﺎﯞﺍﭖ: 5 ‏- ﻓﯧﯟﺭﺍﻝ ﻏﯘﻟﺠﺎ ﯞﻩﻗﻪﺳﯩﺪﻩ، ﺑﯩﺮ ﺗﯜﺭﻛﯜﻡ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﻨﯩﯔ ﻣﯩﻠﻠﯩﻲ ﻣﻪﻧﭙﻪﻩﺗﯩﻤﯩﺰﮔﻪ، ﺩﯨﻨﯩﻲ ﺋﯧﺘﯩﻘﺎﺗﻠﯩﺮﯨﻤﯩﺰﻏﺎ ﻗﺎﺭﺷﻰ ﺳﯚﺯﻟﯩﺮﻯ ﺭﺍﺩﯨﺌﻮ ﺗﯧﻠﯧﯟﯨﺰﻭﺭﻻﺭﺩﺍ ﺑﯧﺮﯨﻠﺪﻯ؛ ﺑﯘ ﺳﯚﺯﻟﻪﺭ ﻣﯘﺧﺒﯩﺮ ﯞﻩ ﺩﯨﻜﺘﻮﺭﻻﺭﻧﯩﯔ ﺋﯧﻐﯩﺰﯨﺪﯨﻦ ﺑﯧﺮﯨﻠﺪﻯ، ﻛﯧﻴﯩﻦ، ﺑﯘ ﺳﯚﺯﻟﻪﺭﻧﯩﯔ ﺋﻪﺳﻠﻰ ﺯﯨﻴﺎﻟﯩﻠﯩﺮﯨﻤﯩﺰﻧﯩﯔ ﺋﯧﻐﯩﺰﯨﺪﯨﻦ ﭼﯩﻘﻘﺎﻥ ﮔﻪﭘﻠﻪﺭ ﺋﻪﻣﻪﺱ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯗﻕ. ﺋﻪﻣﻪﻟﯩﻴﻪﺗﺘﻪ،ﺑﯘ ﺯﯨﻴﺎﻟﯩﻠﯩﺮﯨﻤﯩﺰﻧﯩﯔ ﺋﯩﺰﺯﻩﺕ-ﻫﯚﺭﻣﯩﺘﯩﮕﻪ ﻗﯩﻠﯩﻨﻐﺎﻥ ﺋﯧﻐﯩﺮ ﺑﯩﺮ ﻫﯘﺟﯘﻣﺪﯗﺭ.

"ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﺍﯞﺍﺗﻘﺎﻧﻼﺭ ﺳﺎﺧﺘﺎ ﺧﻪﯞﻩﺭ ﻳﯧﺰﯨﺸﻘﺎ ﻣﻪﺟﺒﯘﺭﻟﯩﻨﯩﯟﺍﺗﻘﺎﻥ ﺋﯘﻳﻐﯘﺭ ﺋﺎﺧﺒﺎﺭﺍﺗﭽﯩﻠﯩﺮﯨﺪﯗﺭ "

ﮔﯜﻟﺸﻪﻥ ﺧﺎﻧﯩﻤﻨﯩﯔ ﺑﯩﻠﺪﯛﺭﯛﺷﯩﭽﻪ، ﺧﯩﺘﺎﻳﻨﯩﯔ ﺳﺎﺧﺘﺎ ﺋﺎﺧﺒﺎﺭﺍﺕ ﺗﻪﺷﯟﯨﻘﺎﺗﯩﻨﯩﯔ ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﺍﯞﺍﺗﻘﺎﻧﻼﺭ ﻳﺎﻟﻐﯘﺯ ﺗﻪﺷﯟﯨﻖ ﻗﯩﻠﯩﻨﻐﯘﭼﯩﻼﺭ ﺋﻪﻣﻪﺱ، ﺑﻪﻟﻜﻰ ﻫﻪﻡ ﺗﻪﺷﯟﯨﻖ ﻗﯩﻠﻐﯘﭼﯩﻼﺭ، ﻳﻪﻧﻰ ﯞﯨﺠﺪﺍﻧﯩﻐﺎ ﺧﯩﻼﭖ ﻫﺎﻟﺪﺍ، ﺳﺎﺧﺘﺎ ﺧﻪﯞﻩﺭ ﻳﯧﺰﯨﺸﻘﺎ ﻣﻪﺟﺒﯘﺭﻟﯩﻨﯩﯟﺍﺗﻘﺎﻥ ﺋﯘﻳﻐﯘﺭ ﺋﺎﺧﺒﺎﺭﺍﺗﭽﯩﻠﯩﺮﯨﺪﯗﺭ.

ﺳﻮﺋﺎﻝ: ﺋﯘﻳﻐﯘﺭ ﺋﺎﺧﺒﺎﺭﺍﺗﭽﯩﻠﯩﺮﯨﻨﯩﻤﯘ ﺳﺎﺧﺘﺎ ﺗﻪﺷﯟﯨﻘﺎﺗﻨﯩﯔ ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﺍﯞﺍﺗﻘﺎﻥ ﺗﻪﺭﻩﭖ ﺩﻩﭖ ﭼﯜﺷﯜﻧﯜﺷﻜﻪ ﺑﻮﻻﻣﺪﯗ؟

ﺟﺎﯞﺍﭖ: ﺋﻪﻟﯟﻩﺗﺘﻪ، ﻣﻪﻥ ﺋﻪﺳﻠﯩﺪﻩ ﺋﯘﻧﯩﯟﯦﺮﺳﯩﺘﯧﺘﻨﯩﯔ ﺋﻪﺩﻩﺑﯩﻴﺎﺕ ﻓﺎﻛﯘﻟﺘﯧﺘﯩﻐﺎ ﻗﻮﺑﯘﻝ ﻗﯩﻠﯩﻨﻐﺎﻥ؛ ﺭﺍﺳﺖ ﮔﻪﭘﻨﻰ ﻗﯩﻠﻐﯩﻨﻰ ﺑﻮﻟﯩﺪﯨﻐﺎﻥ ﻛﻪﺳﭗ ﺩﻩﭖ ﻗﺎﺭﺍﭖ، ﺋﺎﺧﺒﺎﺭﺍﺗﭽﯩﻠﯩﻘﻘﺎ ﺋﯚﺯﮔﻪﺭﺗﯩﯟﺍﻟﻐﺎﻥ؛ ﺧﯩﺰﻣﻪﺗﻜﻪ ﭼﯩﻘﻘﺎﻧﺪﯨﻦ ﻛﯧﻴﯩﻦ، ﺧﯩﻴﺎﻟﯩﻤﺪﯨﻜﯩﺪﯨﻦ ﺗﺎﻣﺎﻣﻪﻥ ﭘﻪﺭﻗﻠﯩﻖ ﺑﯩﺮ ﻣﯘﻫﯩﺘﻘﺎ ﺩﯗﭺ ﻛﻪﻟﺪﯨﻢ. ﻳﺎﻟﻐﺎﻥ ﺳﯚﺯﻟﻪﺷﻜﻪ، ﻫﻪﻗﺴﯩﺰﻟﯩﻘﻨﯩﯔ ﺗﻪﺷﯟﯨﻘﺎﺗﭽﯩﺴﻰ ﺑﻮﻟﯘﺷﻘﺎ ﻣﻪﺟﺒﯘﺭﻻﻧﺪﯨﻢ. ﻣﯘﺧﺒﯩﺮﻟﯩﻖ ﻗﯩﻠﻐﺎﻥ 14 ﻳﯩﻠﻠﯩﻖ ﻫﺎﻳﺎﺗﯩﻤﻨﻰ ﻫﺎﻳﺎﺗﯩﻤﺪﯨﻜﻰ ﺋﻪﯓ ﺋﯧﭽﯩﻨﯩﺸﻠﯩﻖ ﺑﺎﺳﻘﯘﭺ ﺩﻩﭖ ﻗﺎﺭﺍﻳﻤﻪﻥ.

ﮔﯜﻟﺸﻪﻥ ﺧﺎﻧﯩﻤﻨﯩﯔ ﻳﯘﻗﯩﺮﯨﺪﺍ ﺩﯦﮕﻪﻧﻠﯩﺮﯨﮕﻪ، ﮔﯜﻟﺸﻪﻥ ﺧﺎﻧﯩﻤﻨﯩﯔ ﺗﻪﺭﺟﯩﻤﯩﻬﺎﻟﯩﻨﯩﯔ ﺋﯚﺯﯨﻼ ﺋﯩﺴﭙﺎﺕ ﺑﻮﻻﻻﻳﺪﯗ. ﮔﯜﻟﺸﻪﻥ ﺧﺎﻧﯩﻢ، ﻏﯘﻟﺠﺎ ﺧﻪﻟﻖ ﺭﺍﺩﯨﺌﻮ ﺋﯩﺴﺘﺎﻧﺴﯩﺴﯩﺪﺍ ﻣﯘﺧﺒﯩﺮ ﯞﻩ ﺗﻪﻫﺮﯨﺮ ﺑﻮﻟﯘﭖ ﺧﯩﺰﻣﻪﺕ ﺋﯩﺸﻠﯩﮕﻪﻥ، ﻫﻪﻗﻨﻰ ﺳﯚﺯﻟﻪﺵ ﺋﻪﺭﻛﯩﻨﻠﯩﻜﻰ ﺑﻮﻏﯘﻟﻐﺎﻧﺪﯨﻦ ﻛﯧﻴﯩﻦ، ﺧﯩﺰﻣﯩﺘﯩﺪﯨﻦ ﯞﺍﺯ ﻛﻪﭼﻜﻪﻥ ﯞﻩ ﻫﯩﺠﺮﻩﺕ ﻳﻮﻟﯩﻨﻰ ﺗﺎﻟﻠﯩﻐﺎﻥ. (ﺷﯚﻫﺮﻩﺕ ﻫﻮﺷﯘﺭ)