" ﺧﯩﺘﺎﻱ ﻫﯚﻛﯜﻣﯩﺘﻰ ﺋﯩﻨﺴﺎﻧﯩﻴﻪﺕ ﺗﺎﺭﯨﺨﯩﺪﯨﻜﻰ ﺟﯩﻨﺎﻳﻰ ﻗﯩﻠﻤﯩﺸﻰ ﺋﻪﯓ ﺋﯧﻐﯩﺮ ﻫﻮﻗﯘﻗﺪﺍﺭﻻﺭ ﮔﯘﺭﯗﻫﯩﺪﯗﺭ"

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﭘﺮﻭﻓﯧﺴﺴﻮﺭ ﻳﯘﻩﻥ ﺧﯘﯕﺒﯩﯔ، ﺑﯘ ﻳﯩﻞ 26 ‏- ﻧﻮﻳﺎﺑﯩﺮ ﻛﯜﻧﻰ ﻳﺎﯞﺭﻭﭘﺎ ﭘﺎﺭﻻﻣﯧﻨﺘﯩﺪﺍ ﺋﯧﭽﯩﻠﻐﺎﻥ ﺧﯩﺘﺎﻳﺪﯨﻜﻰ ﺋﯩﻨﺴﺎﻥ ﻫﻪﻗﻠﯩﺮﻯ ﯞﻩﺯﯨﻴﯩﺘﻰ ﺗﻮﻏﺮﯨﻠﯩﻖ ﮔﯘﯞﺍﻫﻠﯩﻖ ﻳﯩﻐﯩﻨﯩﺪﺍ ﻳﺎﺯﻣﺎ ﺋﯩﺴﭙﺎﺕ ﺑﻪﺭﺩﻯ. ﺋﯘ ﺋﯩﺴﭙﺎﺗﻨﺎﻣﯩﺴﯩﺪﻩ، ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺋﯩﻨﺴﺎﻧﯩﻴﻪﺕ ﺗﺎﺭﯨﺨﯩﺪﯨﻜﻰ ﺟﯩﻨﺎﻳﻰ ﻗﯩﻠﻤﯩﺸﻰ ﺋﻪﯓ ﺋﯧﻐﯩﺮ ﺑﻮﻟﻐﺎﻥ ﻫﻮﻗﯘﻗﺪﺍﺭ ﮔﯘﺭﯗﻫﻰ ﺩﻩﭖ ﻛﯚﺭﺳﻪﺗﻜﻪﻥ. ﭘﺮﻭﻓﯧﺴﺴﻮﺭ ﻳﯘﻩﻥ ﺧﯘﯕﺒﯩﯔ ﺧﯩﺘﺎﻳﻼﺭ ﺋﺎﺭﯨﺴﯩﺪﺍ ﻣﻪﺷﻬﯘﺭ ﺑﯩﺮ ﻗﺎﻧﯘﻧﺸﯘﻧﺎﺱ ﺑﻮﻟﯘﭖ، ﺋﯘ ﺧﯩﺘﺎﻳﺪﯨﻜﻰ ﭼﯧﻐﯩﺪﺍ، ﻣﻪﺗﺒﯘﺋﺎﺕ ﺋﻪﺭﻛﯩﻨﻠﯩﻜﻰ ﭼﻪﻛﻠﯩﻤﯩﮕﻪ ﺋﯘﭼﺮﺍﭖ ﺧﯩﺘﺎﻳﺪﯨﻦ ﺋﺎﻳﺮﯨﻠﻐﺎﻥ. ﺋﯘ ﻫﺎﺯﯨﺮ ﺋﺎﯞﺳﺘﺮﺍﻟﯩﻴﯩﺪﻩ ﺯﯨﻴﺎﺭﻩﺗﺘﻪ. ﺋﯘ ﻳﺎﯞﺭﻭﭘﺎ ﺑﯩﺮﻟﯩﻜﻰ ﺋﯩﻨﺴﺎﻥ ﻫﻪﻗﻠﯩﺮﻯ ﻛﻮﻣﯩﺘﯧﺘﻰ ﺗﻪﺭﯨﭙﯩﺪﯨﻦ ﮔﯘﯞﺍﻫﻠﯩﻖ ﺑﯧﺮﯨﺶ ﻳﯩﻐﯩﻨﯩﻐﺎ ﺗﻪﻛﻠﯩﭗ ﻗﯩﻠﯩﻨﻐﺎﻥ. ﻳﯘﻩﻥ ﺧﯘﯕﺒﯩﯔ ﺳﻪﭘﻪﺭ ﺭﻩﺳﻤﯩﻴﻪﺗﻠﯩﺮﯨﺪﻩ ﻳﯧﺘﻪﺭﺳﯩﺰﻟﯩﻚ ﺑﻮﻟﯘﭖ، ﻳﯩﻐﯩﻦ ﻣﻪﻳﺪﺍﻧﯩﻐﺎ ﺑﺎﺭﺍﻟﻤﯩﻐﺎﻥ، ﭘﺎﺭﻻﻣﯧﻨﺘﻘﺎ ﻣﻪﻛﺘﯘﭖ ﺋﻪﯞﻩﺗﯩﭗ، ﺋﯩﺴﭙﺎﺗﺘﯩﻦ ﺋﯚﺗﻜﻪﻥ.

" ﺋﻪﺭﻛﯩﻦ ﺑﺎﺯﺍﺭ ﺋﻪﻣﻪﺱ، ﻫﻮﻗﯘﻗﺪﺍﺭﻻﺭ ﺑﺎﺯﯨﺮﻯ"

ﻧﯧﻤﻪ ﺋﯜﭼﯜﻥ 10 ﻣﯩﻨﯘﺗﻠﯘﻕ ﺳﯚﺯﻟﻪﺵ ﭘﯘﺭﺳﯩﺘﯩﮕﻪ ﻣﺎﻗﯘﻝ ﺑﻮﻟﺪﯗﻡ؟ ﻧﯧﻤﻪ ﺋﯜﭼﯜﻥ 10 ﻣﯩﻨﯘﺗﻠﯘﻕ ﺳﯚﺯ ﺋﯜﭼﯜﻥ ﺗﺎﻍ-ﺩﻩﺭﻳﺎﻻﺭﻧﻰ ﺋﺎﺗﻼﭖ ﻳﺎﯞﺭﻭﭘﺎﻏﺎ ﺑﺎﺭﻣﺎﻗﭽﻰ ﺑﻮﻟﺪﯗﻡ؟ ﻣﻪﻥ ﺋﺎﺩﺍﻟﻪﺕ ﺋﯩﺰﺩﻩﭖ ﻳﯜﺭﮔﻪﻥ ﺑﯩﺮ ﻗﺎﻧﯘﻥ ﺗﻪﺗﻘﯩﻘﺎﺗﭽﯩﺴﻰ ﺑﻮﻟﯘﺵ، ﺧﯩﺘﺎﻳﺪﯨﻜﻰ ﭘﺎﺟﯩﺌﻪﻟﻪﺭﻧﯩﯔ ﺑﯩﺮ ﺷﺎﻫﯩﺪﻯ ﺑﻮﻟﯘﺵ ﺳﯜﭘﯩﺘﯩﻢ ﺑﯩﻠﻪﻥ ﺋﯩﻨﺴﺎﻥ ﻫﻪﻗﻠﯩﺮﻯ ﯞﻩﺯﯨﻴﯩﺘﻰ ﻫﻪﻗﻘﯩﺪﻩ ﺋﯩﺴﭙﺎﺕ ﺑﯧﺮﯨﺸﻨﻰ ﺑﺎﺵ ﺗﺎﺭﺗﯩﻠﻤﺎﺱ ﻣﻪﺟﺒﯘﺭﯨﻴﯩﺘﯩﻢ ﺩﻩﭖ ﻗﺎﺭﯨﺪﯨﻢ.

ﺋﯩﺴﭙﺎﺗﻨﺎﻣﯩﺴﯩﺪﺍ، ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺑﺎﺷﺘﯩﻦ ﺋﺎﺧﯩﺮ "ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﻮﻗﯘﻗﺪﺍﺭﻻﺭ ﮔﯘﺭﯗﻫﻰ" ﺩﻩﭖ ﺋﺎﺗﯩﻐﺎﻥ ﻳﯘﻩﻥ ﺧﯘﯕﺒﯩﯔ، ﺧﯩﺘﺎﻳﻨﯩﯔ ﻫﺎﻛﯩﻤﯩﻴﻪﺕ ﺗﯜﺯﯛﻣﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﮕﻪﻥ: ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﻮﻗﯘﻗﺪﺍﺭﻻﺭ ﮔﯘﺭﯗﻫﻰ ﺩﯙﻟﻪﺕ ﺗﯧﺮﺭﻭﺭﻟﯘﻗﻰ ﯞﺍﺳﯩﺘﯩﺴﻰ ﺑﯩﻠﻪﻥ ﺑﯩﺮ ﭘﺎﺭﺗﯩﻴﯩﻠﯩﻚ ﺗﯜﺯﯛﻣﻨﻰ ﻳﻮﻟﻐﺎ ﻗﻮﻳﯘﯞﺍﺗﯩﺪﯗ، ﺋﯘﻻﺭ ﺧﯩﺘﺎﻱ ﺧﻪﻟﻘﯩﻨﯩﯔ ﺳﯩﻴﺎﺳﯩﻲ ﺗﺎﻟﻼﺵ ﻫﻮﻗﯘﻗﯩﻨﻰ ﺗﺎﺭﺗﯩﯟﯦﻠﯩﭗ، ﺋﯩﻠﻐﺎﺭ ﺩﯗﻧﻴﺎﻧﯩﯔ " ﺧﻮﺟﺎﻳﯩﻨﻠﯩﻖ ﻫﻮﻗﯘﻗﻰ ﺧﻪﻟﻘﺘﻪ ﺑﻮﻟﯘﺵ" ﭘﺮﯨﻨﺴﯩﭙﯩﻨﻰ ﺩﻩﭘﺴﻪﻧﺪﻩ ﻗﯩﻠﯩﯟﺍﺗﯩﺪﯗ.

ﺧﯩﺘﺎﻳﺪﯨﻜﻰ ﻧﯚﯞﻩﺗﺘﯩﻜﻰ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﯩﯔ، ﺧﻪﻟﻘﻨﯩﯔ ﻗﯧﻨﻰ، ﻛﯚﺯ ﻳﯧﺸﻰ ﯞﻩ ﺩﻩﺭﺕ ‏- ﺋﻪﻟﯩﻤﻰ ﺑﻪﺩﯨﻠﯩﮕﻪ ﺑﺎﺭﻟﯩﻘﻘﺎ ﻛﻪﻟﮕﻪﻧﻠﯩﻜﯩﻨﻰ، ﺷﯘﯕﺎ ﺑﯘﻧﺪﺍﻕ ﺑﯩﺮ ﺗﻪﺭﻩﻗﻘﯩﻴﺎﺗﻨﯩﯔ ﺧﯩﺘﺎﻳﺪﺍ ﺑﯘﻧﺪﯨﻦ ﻛﯧﻴﯩﻦ ﻳﯜﺯ ﺑﯧﺮﯨﺪﯨﻐﺎﻥ ﺋﺎﭘﻪﺕ ﺧﺎﺭﺍﻛﺘﯧﺮﻟﯩﻚ ﻛﺮﯨﺰﯨﺴﻼﺭﻏﺎ ﻫﺎﻣﯩﻠﻪ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ ﭘﺮﻭﻓﯧﺴﺴﻮﺭ، ﺧﯩﺘﺎﻳﻨﯩﯔ ﺋﯩﻘﺘﯩﺴﺎﺩﯨﻲ ﺳﯩﻴﺎﺳﯩﺘﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ ﺋﯚﺗﻜﻪﻥ.

ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﻮﻗﯘﻗﺪﺍﺭﻻﺭ ﮔﯘﺭﯗﻫﻰ ﺋﯩﺴﻼﻫﺎﺕ ﺋﺎﺭﻗﯩﻠﯩﻖ ﻳﻮﻟﻐﺎ ﻗﻮﻳﻐﺎﻥ ﺋﯩﻘﺘﯩﺴﺎﺩﯨﻲ ﺳﯩﺴﺘﯧﻤﺎ، ﺑﻪﺯﯨﻠﻪﺭ ﺋﯩﺸﯩﻨﯩﭗ ﻗﯧﻠﯩﯟﺍﺗﻘﯩﻨﯩﺪﯨﻜﯩﺪﻩﻙ، ﻫﻪﻗﯩﻘﯩﻲ ﺋﺎﺩﯨﻞ ﯞﻩ ﺋﻪﺭﻛﯩﻦ ﺑﺎﺯﺍﺭ ﺋﯩﮕﯩﻠﯩﻜﻰ ﺋﻪﻣﻪﺱ. ﺋﻪﺭﻛﯩﻦ ﺑﺎﺯﺍﺭ ﺋﯩﮕﯩﻠﯩﻜﻰ ﭘﯘﻗﺮﺍﻻﺭﻧﯩﯔ ﻗﺎﻧﯘﻥ ﺋﺎﻟﺪﯨﺪﯨﻜﻰ ﺑﺎﺭﺍﯞﻩﺭﻟﯩﻜﻰ ﻛﺎﭘﺎﻟﻪﺗﻜﻪ ﺋﯩﮕﻪ ﻗﯩﻠﯩﻨﻐﺎﻥ ﺳﯩﻴﺎﺳﯩﻲ ﺗﯜﺯﯛﻡ ﺋﺎﺳﺘﯩﺪﯨﻼ ﺋﯩﺸﻠﻪﺵ ﺋﯩﻤﻜﺎﻧﯩﻐﺎ ﺋﯩﮕﻪ ﺑﻮﻟﯩﺪﯗ. ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺋﻪﺯﺍﺳﯩﺪﯨﻦ ﺑﺎﺷﻘﯩﻼﺭﻧﯩﯔ ﻫﺎﻛﯩﻤﯩﻴﻪﺗﻜﻪ ﻗﺎﺗﻨﯩﺸﯩﺸﻰ ﭼﻪﻛﻠﻪﻧﮕﻪﻥ ﺑﯩﺮ ﺗﯜﺯﯛﻡ ﻫﻪﻣﻤﯩﮕﻪ ﺑﻪﺵ ﻗﻮﻟﺪﻩﻙ ﺋﺎﻳﺎﻧﻜﻰ ‏- ﺩﯨﻜﺘﺎﺗﻮﺭ ﺗﯜﺯﯛﻣﺪﯗﺭ؛ ﺩﯨﻜﺘﺎﺗﻮﺭ ﺗﯜﺯﯛﻣﻨﯩﯔ ﺧﻪﻟﻖ ﺋﯜﭼﯜﻥ ﺋﻪﻣﻪﺱ، ﻫﺎﻛﯩﻤﯩﻴﻪﺗﻨﻰ ﭼﺎﯕﮕﯩﻠﯩﻐﺎ ﺋﯧﻠﯩﯟﺍﻟﻐﺎﻥ ﺷﯘ ﺑﯩﺮ ﮔﯘﺭﯗﭘﭙﯩﻨﯩﯔ ﻣﻪﻧﭙﻪﺋﻪﺗﻰ ﺋﯜﭼﯜﻥ ﺧﯩﺰﻣﻪﺕ ﻗﯩﻠﯩﺪﯨﻐﺎﻧﻠﯩﻘﻰ ﻣﻪﺩﻩﻧﯩﻲ ﺩﯗﻧﻴﺎﻧﯩﯔ ﺋﻮﺭﺗﺎﻕ ﻗﺎﺭﯨﺸﯩﺪﯗﺭ. ﺷﯘﯕﺎ ﻧﯚﯞﻩﺗﺘﻪ، ﺧﯩﺘﺎﻳﺪﺍ ﺷﻪﻛﯩﻠﻠﻪﻧﮕﻪﻥ ﺋﺎﺗﺎﻟﻤﯩﺶ ﺋﻪﺭﻛﯩﻦ ﺑﺎﺯﺍﺭ، ﻣﺎﻫﯩﻴﻪﺗﺘﻪ، ﻫﻮﻗﯘﻗﺪﺍﺭﻻﺭ ﺋﻪﺭﻛﯩﻦ ﺑﺎﺯﯨﺮﯨﺪﯗﺭ. ﺑﯘ ﺑﺎﺯﺍﺭ ﺳﯩﺴﺘﯧﻤﯩﺴﻰ ﻫﻮﻗﯘﻗﻨﻰ ﭘﯘﻟﻐﺎ ﺋﺎﻳﻼﻧﺪﯗﺭﯨﺪﯨﻐﺎﻥ ﺳﯧﺴﺘﯩﻤﯩﺪﯗﺭ؛ ﺷﯘﯕﺎ ﺑﯘ ﺳﯧﺴﺘﯩﻤﯩﺪﯨﻦ ﻣﻪﻧﭙﻪﺋﻪﺗﻠﯩﻨﯩﯟﺍﺗﻘﺎﻧﻼﺭ ﻫﻮﻗﯘﻗﺪﺍﺭﻻﺭ ﮔﯘﺭﯗﻫﻰ ﯞﻩ ﺋﯘﻧﯩﯔ ﺗﻪﺭﻩﭘﺪﺍﺭﻟﯩﺮﯨﺪﯗﺭ.

ﺋﻪﯓ ﺋﯧﻐﯩﺮ ﺯﯨﻴﺎﻧﻜﻪﺷﻠﯩﻜﻜﻪ ﺋﯘﭼﺮﺍﯞﺍﺗﻘﺎﻧﻼﺭ ﺩﯦﻬﻘﺎﻧﻼﺭ

ﺋﯩﺴﭙﺎﺗﻨﺎﻣﯩﺪﻩ ﻳﻪﻧﻪ، ﻧﯚﯞﻩﺗﺘﯩﻜﻰ ﺋﯩﻘﺘﯩﺴﺎﺩﯨﻲ ﺳﯩﻴﺎﺳﻪﺗﺘﻪ ﺋﻪﯓ ﺋﯧﻐﯩﺮ ﺯﯨﻴﺎﻧﻜﻪﺷﻠﯩﻜﻜﻪ ﺋﯘﭼﺮﺍﯞﺍﺗﻘﺎﻧﻼﺭﻧﯩﯔ ﺩﯦﻬﻘﺎﻧﻼﺭ ﺋﯩﻜﻪﻧﻠﯩﻜﯩﻨﻰ، ﺧﯩﺘﺎﻳﺪﺍ ﺩﯦﻬﻘﺎﻧﻼﺭﻧﯩﯔ ﺋﻮﺗﺘﯘﺭﯨﭽﻪ ﻛﯜﻧﻠﯜﻙ ﻛﯩﺮﯨﻤﯩﻨﯩﯔ ﺑﯩﺮ ﻳﯧﺮﯨﻢ ﺩﻭﻟﻼﺭ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﻫﻪﻡ ﺧﻪﻟﻘﻨﯩﯔ ﺗﻪﺷﻜﯩﻼﺗﻼﺭﻏﺎ ﺋﻮﻳﯘﺷﯘﺵ، ﻧﺎﻣﺎﻳﯩﺶ ﺋﯚﺗﻜﯜﺯﯛﺵ ﻫﻮﻗﯘﻗﻰ ﭼﻪﻛﻠﻪﻧﮕﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ ﻳﯘﻩﻥ ﺧﯩﺘﺎﻳﺪﯨﻜﻰ ﺋﯩﺸﭽﯩﻼﺭﻧﯩﯔ ﺋﯩﺶ ﻫﻪﻗﻘﯩﻨﻰ ﺋﯚﺳﺘﯜﺭﯛﺷﺘﯩﻦ ﺋﯩﺒﺎﺭﻩﺕ ﺋﻪﻗﻪﻟﻠﯩﻲ ﺗﻪﻟﯩﭙﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯩﺪﯨﻐﺎﻥ ﺳﻮﺭﯗﻧﻨﯩﯖﻤﯘ ﻳﻮﻗﻠﯘﻗﯩﻨﻰ ﺋﻪﺳﻜﻪﺭﺗﻜﻪﻥ.

ﺋﯩﺴﭙﺎﺗﻨﺎﻣﯩﺪﻩ، ﺧﯩﺘﺎﻳﻨﯩﯔ ﻛﻮﻣﻤﯘﻧﯩﺰﯨﻤﻨﯩﯔ ﺋﺎﺧﯩﺮﻗﻰ ﻗﻮﺭﻏﺎﻧﻰ ﺑﻮﻟﯘﺵ ﺑﯩﻠﻪﻥ ﺑﯩﻠﻠﻪ، ﺩﯗﻧﻴﺎﺩﯨﻜﻰ ﺑﺎﺭﻟﯩﻖ ﺩﯨﻜﺘﺎﺗﻮﺭ ﯞﻩ ﺗﯧﺮﺭﻭﺭﭼﻰ ﮔﯘﺭﯗﻫﻼﺭﻧﯩﯔ ﺋﺎﺭﻗﺎ ﺗﯧﺮﯨﻜﻰ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﺎﻛﯩﻤﯩﻴﯩﺘﯩﻨﯩﯔ ﺋﻪﻳﻨﻰ ﻳﯩﻠﻼﺭﺩﺍ، ﻛﺎﻣﺒﻮﺩﮊﺍ ﻛﻮﻣﻤﯘﻧﯩﺴﺘﻠﯩﺮﯨﻨﯩﯔ ﻗﯩﺮﻏﯩﻨﭽﯩﻠﯩﻘﯩﻐﺎ، ﺳﯧﺮﺑﯩﻴﯩﻨﯩﯔ ﺋﯧﺘﻨﯩﻚ ﻗﯩﺮﻏﯩﻨﭽﯩﻠﯩﻘﯩﻐﺎ ﻳﺎﺭﺩﻩﻡ ﺑﻪﺭﮔﻪﻧﻠﯩﻜﯩﻨﻰ، ﺑﯘ ﺗﯜﺭ ﻗﯩﻠﻤﯩﺸﻠﯩﺮﯨﻨﯩﯔ ﺑﯜﮔﯜﻧﻤﯘ ﺩﺍﯞﺍﻣﻠﯩﺸﯩﯟﺍﺗﻘﺎﻧﻠﯩﻘﯩﻨﻰ ﺋﻪﺳﻠﯩﺘﯩﭗ ﺋﯚﺗﻜﻪﻥ. ﺑﯘﻧﯩﯔ ﺑﯩﻠﻪﻥ ﺑﯩﻠﻠﻪ، ﺑﯩﺮ ﻗﺎﻧﯘﻧﺸﯘﻧﺎﺱ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ، ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺋﯩﻨﺴﺎﻧﻼﺭﻧﻰ ﻗﯘﻝ ﻗﯩﻠﯩﺶ ﺟﯩﻨﺎﻳﯩﺘﻰ، ﺋﯩﻨﺴﺎﻧﻼﺭﻧﻰ ﺧﻮﺭﻻﺵ ﺟﯩﻨﺎﻳﯩﺘﻰ، ﻛﯩﺸﯩﻠﻪﺭﻧﻰ ﻛﻮﻟﻠﯧﻜﺘﯩﭗ ﻳﻮﻕ ﻗﯩﻠﯩﺶ ﺟﯩﻨﺎﻳﯩﺘﻰ ﯞﻩ ﻛﻪﯓ- ﻛﯚﻟﻪﻣﻠﯩﻚ ﻗﯩﺮﻏﯩﻨﭽﯩﻠﯩﻖ ﻗﯩﻠﯩﺶ ﺟﯩﻨﺎﻳﯩﺘﯩﺪﯨﻦ ﺋﯩﺒﺎﺭﻩﺕ 4 ﺗﯜﺭﻟﯜﻙ ﺟﯩﻨﺎﻳﻪﺕ ﺑﯩﻠﻪﻥ ﺋﻪﻳﯩﺒﻠﯩﮕﻪﻥ. "ﺧﯩﺘﺎﻱ ﻫﯚﻛﯜﻣﯩﺘﻰ ﻳﺎﻟﻐﯘﺯ ﺧﯩﺘﺎﻱ ﭘﯘﻗﺮﺍﻟﯩﺮﯨﻨﯩﯖﻼ ﺑﯧﺸﯩﺪﯨﻜﻰ ﺑﺎﻻ-ﻗﺎﺯﺍ ﺋﻪﻣﻪﺱ، ﺋﯩﻨﺴﺎﻧﯩﻴﻪﺗﻨﯩﯔ ﺋﻮﺭﺗﺎﻕ ﺩﯛﺷﻤﯩﻨﻰ" ﺩﻩﭖ ﻛﯚﺭﺳﻪﺗﻜﻪﻥ.

ﻗﯩﺰﯨﻞ ﻛﺎﻣﺒﻮﺩﮊﺍ ﺳﻮﺗﺘﺎ، ﻗﯩﺰﯨﻞ ﺧﯩﺘﺎﻱ ﻫﺎﻛﯩﻤﯩﻴﻪﺕ ﺑﯧﺸﯩﺪﺍ

ﻧﯚﯞﻩﺗﺘﻪ، ﻛﺎﻣﺒﻮﺩﮊﺍﺩﯨﻜﻰ ﻗﯩﺰﯨﻞ ﻛﯩﺨﻤﯩﺮﻻﺭﻧﯩﯔ ﻛﺎﺗﺘﯩﯟﺍﺷﻠﯩﺮﻯ ﺧﻪﻟﻘﺌﺎﺭﺍ ﺳﻮﺗﻘﺎ ﺗﺎﺭﺗﯩﻠﯩﯟﺍﺗﻘﺎﻥ ﺑﯜﮔﯜﻧﻜﻰ ﻛﯜﻧﺪﻩ، ﺋﻪﻧﻪ ﺋﻪﺷﯘ ﺟﯩﻨﺎﻳﻪﺗﭽﯩﻠﻪﺭﻧﯩﯔ ﺋﯘﺳﺘﺎﺯﻯ ﺑﻮﻟﻐﺎﻥ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ ﺩﯗﻧﻴﺎﺩﺍ ﺑﯩﺮ ﻣﯩﻠﻴﺎﺭﺗﺘﯩﻦ ﺋﻮﺷﯘﻕ ﻛﯩﺸﯩﻨﯩﯔ ﺋﯜﺳﺘﯩﺪﻩ ﻫﯚﻛﯜﻣﺮﺍﻧﻠﯩﻖ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺗﯩﻠﻐﺎ ﺋﺎﻟﻐﺎﻥ، ﻳﯘﻩﻥ ﺧﯘﯕﺒﯩﯔ ﺧﯧﺘﯩﻨﻰ ﻣﯘﻧﺪﺍﻕ ﺋﺎﺧﯩﺮﻻﺷﺘﯘﺭﻏﺎﻥ: ﻣﻪﻥ ﻳﯧﺮﯨﻢ ﺋﻪﺳﯩﺮﺩﯨﻦ ﺑﯧﺮﻯ، ﺑﺎﺷﺘﯩﻦ ﻛﻪﭼﯘﺭﮔﻪﻧﻠﯩﺮﯨﻤﮕﻪ ﺋﺎﺳﺎﺳﻼﻧﻐﺎﻥ ﻗﺎﺭﯨﺸﯩﻤﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﯗﻡ، ﻫﻪﻗﯩﻘﻪﺗﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﯗﻡ، ﺧﯩﺘﺎﻳﻐﺎ ﻗﺎﻧﺪﺍﻕ ﭼﺎﺭﻩ ﻗﻮﻟﻠﯩﻨﯩﺶ ﻫﻪﻗﻘﯩﺪﻩ ﻫﯧﭽﻨﯧﻤﻪ ﺩﯦﻤﻪﻳﻤﻪﻥ، ﭘﻪﻗﻪﺕ ﻳﺎﯞﺭﻭﭘﺎ ﭘﺎﺭﻻﻣﯧﻨﺘﯩﺪﯨﻜﯩﻠﻪﺭﻧﯩﯔ، ﻳﻪﻧﯩﻤﯘ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﭗ ﻫﻪﻗﯩﻘﻪﺗﻨﻰ ﻛﯚﺭﮔﻪﻧﺪﯨﻦ ﻛﯧﻴﯩﻦ، ﯞﯨﺠﺪﺍﻧﯩﻨﯩﯔ ﺑﯘﻳﺮﯗﻗﻰ ﺑﯩﻠﻪﻥ ﺋﯩﺶ ﺗﯘﺗﯩﺪﯨﻐﺎﻧﻠﯩﻘﯩﻐﺎ ﺋﯩﺸﯩﻨﯩﻤﻪﻥ."

ﻳﯘﻩﻥ ﺧﯘﯕﺒﯩﯔ ﺋﯩﺴﭙﺎﺕ ﺑﻪﺭﮔﻪﻥ ﻳﯩﻐﯩﻦ، ﺑﯧﻴﺠﯩﯖﺪﺍ ﺋﯧﭽﯩﻠﯩﺪﯨﻐﺎﻥ ﻳﺎﯞﺭﻭﭘﺎ ﯞﻩ ﺧﯩﺘﺎﻱ ﺋﺎﻟﯩﻲ ﺩﻩﺭﯨﺠﯩﻠﯩﻜﻠﻪﺭ ﺋﯘﭼﺮﯨﺸﯩﺶ ﻳﯩﻐﯩﻨﯩﺪﯨﻦ ﺋﯩﻜﻜﻰ ﻛﯜﻥ ﺑﯘﺭﯗﻥ ﺋﯧﭽﯩﻠﺪﻯ. (ﺷﯚﻫﺮﻩﺕ ﻫﻮﺷﯘﺭ)