ﺑﯩﺮ ﺗﯜﺭﻛﯜﻡ ﺧﯩﺘﺎﻱ ﺩﯦﻤﻮﻛﯩﺮﺍﺗﭽﯩﻠﯩﺮﯨﻨﯩﯔ ﺗﯩﺒﻪﺗﺘﯩﻜﻰ ﺗﻮﻗﯘﻧﯘﺷﻼﺭﻏﺎ ﻗﺎﺭﯨﺘﺎ ﺋﯩﻨﻜﺎﺳﻰ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﺑﯧﻲ ﻧﺎﻫﯩﻴﯩﺴﯩﺪﻩ، ﺋﯩﻜﻜﻰ ﺋﻮﺗﺘﯘﺭﺍ ﻣﻪﻛﺘﻪﭖ ﺋﻮﻗﯘﻏﯘﭼﯩﺴﻰ ﯞﻩ ﺑﯩﺮ ﺑﺎﺷﻼﻧﻐﯘﭺ ﻣﻪﻛﺘﻪﭖ ﺋﻮﻗﯘﻏﯘﭼﯩﺴﻰ ﺋﯚﻟﺘﯜﺭﯛﻟﮕﻪﻥ. ﺳﯜﺭﻩﺗﻨﻰ، ﺗﯩﺒﻪﺕ ﺩﯨﻨﯩﻲ ﺋﯩﺸﻼﺭ ﻓﻮﻧﺪﻯ ﺗﻪﻣﯩﻨﻠﯩﮕﻪﻥ.

ﭼﻪﺗﺌﻪﻟﻠﻪﺭﺩﯨﻜﻰ ﺧﯩﺘﺎﻱ ﺩﯦﻤﻮﻛﺮﺍﺗﯩﻚ ﺗﻪﺷﻜﯩﻼﺗﻠﯩﺮﯨﻨﯩﯔ ﻛﯚﭘﯩﻨﭽﯩﺴﻰ ﺗﯩﺒﻪﺗﺘﯩﻜﻰ ﺗﻮﻗﯘﻧﯘﺷﻼﺭﻏﺎ ﻗﺎﺭﯨﺘﺎ ﺳﯜﻛﯜﺗﺘﻪ ﺗﯘﺭﯗﺵ ﭘﻮﺯﯨﺘﺴﯩﻴﯩﺴﯩﻨﻰ ﺗﯘﺗﺘﻰ، ﭘﻪﻗﻪﺕ ﺋﺎﺯ ﺑﯩﺮ ﻗﯩﺴﯩﻤﻠﯩﺮﯨﻼ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ ﻣﻪﻳﺪﺍﻧﯩﻨﻰ ﺋﯩﭙﺎﺩﯨﻠﯩﺪﻯ. ﻣﺎﻧﺎ ﺑﯘﻻﺭﺩﯨﻦ ﺑﯩﺮﻯ، ﺑﯘ ﻳﯩﻞ 1 ‏ - ﺋﺎﻳﻨﯩﯔ 1 ‏ - ﻛﯜﻧﻰ ﻗﯘﺭﯗﻟﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﻐﺎﻥ ﺧﯩﺘﺎﻱ ﺋﯚﺗﻜﯜﻧﭽﻰ ﻫﯚﻛﯜﻣﯩﺘﯩﺪﯗﺭ. ﺋﯚﺗﻜﯜﻧﭽﻰ ﻫﯚﻛﯜﻣﻪﺕ ﺑﯘ ﻳﯩﻞ 15 ‏ - ﻣﺎﺭﺕ ﯞﻩ 17 ‏ - ﻣﺎﺭﺕ ﻛﯜﻧﻠﯩﺮﻯ ﺑﻮﻟﯘﭖ، ﺋﺎﺭﻗﺎ - ﺋﺎﺭﻗﯩﺪﯨﻦ ﺋﯩﻜﻜﻰ ﻗﯧﺘﯩﻢ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ ﺧﯩﺘﺎﻳﻨﻰ ﺋﻪﻳﯩﺒﻠﯩﺪﻯ، ﭘﯜﺗﯜﻥ ﺩﯗﻧﻴﺎﺩﯨﻜﻰ ﺩﯙﻟﻪﺗﻠﻪﺭﻧﯩﯔ ﭘﺎﺭﻻﻣﯧﻨﺖ ﺋﻪﺯﺍﻟﯩﺮﯨﻐﺎ ﻗﺎﺭﯨﺘﯩﭗ ﯞﻩ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻐﺎ ﻗﺎﺭﯨﺘﯩﭗ ﻣﯘﺭﺍﺟﯩﺌﻪﺕ ﺋﯧﻼﻥ ﻗﯩﻠﯩﭗ، ﺗﯩﺒﻪﺕ ﻫﻪﺭﯨﻜﯩﺘﯩﻨﻰ ﻗﻮﻟﻼﺷﻘﺎ ﭼﺎﻗﯩﺮﺩﻯ.

ﺧﯩﺘﺎﻱ ﺋﯚﺗﻜﯜﻧﭽﻰ ﻫﯚﻛﯜﻣﯩﺘﯩﻨﯩﯔ ﺑﺎﻳﺎﻧﺎﺗﻰ

ﺗﯩﺒﻪﺗﻠﯩﻜﻠﻪﺭﻧﯩﯔ ﻳﯧﺮﯨﻢ ﺋﻪﺳﯩﺮﺩﯨﻦ ﺑﯧﺮﻯ ﺋﯩﻨﺴﺎﻧﯩﻲ ﻫﻪﻕ - ﻫﻮﻗﯘﻗﻠﯩﺮﯨﺪﯨﻦ ﺗﺎﻣﺎﻣﻪﻥ ﻣﻪﻫﺮﯗﻡ ﻳﺎﺷﺎﭖ ﻛﯧﻠﯩﯟﺍﺗﻘﺎﻧﻠﯩﻘﻰ ﺑﯩﻠﺪﯛﺭﯛﻟﮕﻪﻥ ﺑﺎﻳﺎﻧﺎﺗﺘﺎ، 14 ‏ - ﻣﺎﺭﺕ ﻻﺳﺎ ﯞﻩﻗﻪﺳﻰ، ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ 1989 ‏ - ﻳﯩﻠﯩﺪﯨﻦ ﻛﯧﻴﯩﻨﻜﻰ ﺋﯩﻜﻜﯩﻨﭽﻰ ﻗﯧﺘﯩﻤﻠﯩﻖ ﻗﻪﺗﻠﯩﺌﺎﻣﻰ ﺩﻩﭖ ﺋﻪﻳﯩﺒﻠﻪﻧﮕﻪﻥ. ﺑﺎﻳﺎﻧﺎﺗﺘﺎ ﻳﻪﻧﻪ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ ﻫﺎﻛﯩﻤﯩﻴﻪﺕ ﺑﯧﺸﯩﻐﺎ ﻛﻪﻟﮕﻪﻧﺪﯨﻦ ﺑﯘﻳﺎﻥ، ﺗﯜﺭﻟﯜﻙ ﺋﯩﺴﻼﻫﺎﺕ ﯞﻩ ﺋﯚﺯﮔﻪﺭﺗﯩﺶ ﺩﻩﭖ ﺋﺎﺗﺎﻟﻐﺎﻥ ﺳﯩﻴﺎﺳﯩﻲ ﻫﻪﺭﯨﻜﻪﺗﻠﯩﺮﻯ ﺩﺍﯞﺍﻣﯩﺪﺍ، ﺧﯩﺘﺎﻱ ﺩﯙﻟﯩﺘﻰ ﺋﯩﭽﯩﺪﯨﻜﻰ ﻳﻪﺭ ﺋﯩﮕﯩﻠﯩﺮﯨﻨﻰ، ﺋﯩﻘﺘﯩﺴﺎﺩ ﺋﯩﮕﯩﻠﯩﺮﯨﻨﻰ ﯞﻩ ﺯﯨﻴﺎﻟﯩﻴﻼﺭﻧﻰ، ﺩﯨﻨﯩﻲ ﺯﺍﺗﻼﺭﻧﻰ ﻳﻪﻧﻰ ﺟﻪﻣﺌﯩﻴﻪﺗﻨﯩﯔ ﺋﻪﯓ ﺋﺎﻛﺘﯩﭗ ﻗﺎﺗﻼﻣﻠﯩﺮﯨﻨﻰ ﻗﯩﺮﻏﯩﻦ ﻗﯩﻠﯩﭗ ﻛﻪﻟﮕﻪﻧﻠﯩﻜﻰ ﺋﻪﺳﻜﻪﺭﺗﯩﻠﮕﻪﻥ. ﺑﻮﻟﯘﭘﻤﯘ، ﺷﯩﺰﺍﯓ ﺑﯚﻟﮕﯜﻧﭽﯩﻠﯩﺮﻯ ﻧﺎﻣﻰ ﺋﺎﺳﺘﯩﺪﺍ ﺗﯩﺒﻪﺗﻠﯩﻜﻠﻪﺭﻧﯩﯔ، ﺷﯩﻨﺠﺎﯓ ﺑﯚﻟﮕﯜﻧﭽﯩﻠﯩﺮﻯ ﻧﺎﻣﻰ ﺋﺎﺳﺘﯩﺪﺍ ﺋﯘﻳﻐﯘﺭﻻﺭﻧﯩﯔ ﻗﺎﺗﺘﯩﻖ ﺑﺎﺳﺘﯘﺭﯗﺷﻼﺭﻏﺎ ﺩﯗﭺ ﻛﻪﻟﮕﻪﻧﻠﯩﻜﻰ ﺋﺎﻻﻫﯩﺪﻩ ﺗﯩﻠﻐﺎ ﺋﯧﻠﯩﻨﻐﺎﻥ. ﺗﯩﺒﻪﺗﻠﯩﻜﻠﻪﺭﻧﯩﯔ ﺋﯩﺴﻴﺎﻧﻜﺎﺭ ﺭﻭﻫﯩﻐﺎ ﺋﺎﭘﯩﺮﯨﻦ ﺋﻮﻗﯘﻏﺎﻥ ﺑﺎﻳﺎﻧﺎﺕ، ﺧﯩﺘﺎﻱ ﺧﻪﻟﻘﯩﻨﻰ ﺗﯩﺒﻪﺕ ﺧﻪﻟﻘﯩﻨﯩﯔ ﻫﻪﻗﻘﺎﻧﯩﻲ ﻛﯜﺭﯨﺸﯩﻨﻰ ﻗﻮﻟﻼﺷﻘﺎ ﯞﻩ ﺋﯘﻧﯩﯔ ﺯﯗﻟﯘﻣﻐﺎ ﻗﺎﺭﺷﻰ ﺟﻪﯕﮕﯩﯟﺍﺭﻟﯩﻘﯩﺪﯨﻦ ﺋﯚﮔﯩﻨﯩﺸﻜﻪ ﭼﺎﻗﯩﺮﻏﺎﻥ.

ﺑﯘ، ﺋﯧﺘﯩﭗ ﺋﯚﻟﺘﯜﺭﯛﻟﮕﻪﻥ ﺗﯩﺒﻪﺗﻠﯩﻚ ﻳﺎﺵ ﺑﻮﻟﯘﭖ، ﺋﻮﻕ ﺋﯘﻧﯩﯔ ﻛﯚﻛﺴﯩﮕﻪ ﯞﻩ ﺋﻮﯓ ﺋﯧﯖﯩﻜﯩﻨﯩﯔ ﺋﺎﺳﺘﯩﻐﺎ ﺗﻪﻛﻜﻪﻥ. ﺳﯜﺭﻩﺗﻨﻰ، ﺗﯩﺒﻪﺕ ﺩﯨﻨﯩﻲ ﺋﯩﺸﻼﺭ ﻓﻮﻧﺪﻯ ﺗﻪﻣﯩﻨﻠﯩﮕﻪﻥ.

ﺋﯚﺗﻜﯜﻧﭽﻰ ﻫﯚﻛﯜﻣﻪﺕ ﺩﯗﻧﻴﺎﻏﺎ ﻗﯩﻠﻐﺎﻥ ﻣﯘﺭﺍﺟﯩﺘﯩﺪﻩ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﺎﻛﯩﻤﯩﻴﯩﺘﯩﻨﯩﯔ، ﺗﯩﺒﻪﺗﺘﻪ ﺩﯙﻟﻪﺕ ﺗﯧﺮﺭﻭﺭﻟﯘﻗﻰ ﻳﯜﺭﮔﯜﺯﯨﯟﺍﺗﻘﺎﻧﻠﯩﻘﯩﻨﻰ ﭘﺎﺵ ﻗﯩﻠﻐﺎﻥ ﯞﻩ ﺩﯗﻧﻴﺎ ﺩﯙﻟﻪﺗﻠﯩﺮﯨﻨﻰ ﺧﯩﺘﺎﻱ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﯨﺘﯩﺪﻩ، ﻣﻪﻧﭙﻪﺋﻪﺗﭙﻪﺭﻩﺳﺘﻠﯩﻜﺘﯩﻦ ﯞﺍﺯ ﻛﯧﭽﯩﭗ ﻫﻪﻗﻘﺎﻧﯩﻴﻪﺕ ﺗﻪﺭﯨﭙﯩﺪﻩ ﺗﯘﺭﯗﺷﻘﺎ ﯞﻩ ﺗﯩﺒﻪﺕ ﺧﻪﻟﻘﯩﻨﻰ ﻳﺎﻟﻐﯘﺯ ﻗﻮﻳﻤﺎﺳﻠﯩﻘﻘﺎ ﭼﺎﻗﯩﺮﻏﺎﻥ. ﺑﯩﺮ ﻗﯩﺴﯩﻢ ﺩﯙﻟﻪﺗﻠﻪﺭﻧﯩﯔ 14 ‏ - ﻣﺎﺭﺕ ﻻﺳﺎ ﺗﻮﻗﯘﻧﯘﺷﯩﻐﺎ ﺑﺎﻳﺎﻧﺎﺕ ﺑﻪﺭﮔﯩﻨﯩﺪﻩ، ﻫﻪﺭ ﺋﯩﻜﻜﻰ ﺗﻪﺭﻩﭘﻨﻰ ﺋﯚﺯﯨﻨﻰ ﺗﯘﺗﯩﯟﯦﻠﯩﺸﻘﺎ ﭼﺎﻗﯩﺮﯨﺸﯩﻨﻰ ﺗﻪﻧﻘﯩﺪ ﻗﯩﻠﻐﺎﻥ ﻣﯘﺭﺍﺟﯩﺌﻪﺕ، ﺋﻪﺳﻠﯩﺪﻩ ﺋﯚﺯﯨﻨﻰ ﺗﯘﺗﯩﯟﯦﻠﯩﺸﻰ ﻛﯧﺮﻩﻙ ﺑﻮﻟﻐﺎﻥ ﺗﻪﺭﻩﭘﻨﯩﯔ ﺋﯩﻜﻜﻰ ﺗﻪﺭﻩﭖ ﺋﻪﻣﻪﺱ، ﭘﻪﻗﻪﺕ ﺑﯩﺮ ﺗﻪﺭﻩﭖ ﻳﻪﻧﻰ ﺯﺍﻣﺎﻧﯩﯟﯨﻲ ﻫﻪﺭﺑﯩﻲ ﻗﻮﺭﺍﻝ ﺳﺎﻫﯩﺒﻰ ﺑﻮﻟﻐﺎﻥ ﺧﯩﺘﺎﻱ ﺗﻪﺭﻩﭖ ﺋﯩﻜﻪﻧﻠﯩﻜﯩﻨﻰ ﺋﻪﺳﻜﻪﺭﺗﻜﻪﻥ.

ﺩﯗﻧﻴﺎﺩﯨﻜﻰ ﺩﯙﻟﻪﺗﻠﻪﺭ ﺧﯩﺘﺎﻱ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﯨﺘﯩﺪﻩ ﻫﻪﻗﻘﺎﻧﯩﻴﻪﺕ ﺗﻪﺭﯨﭙﯩﺪﻩ ﺗﯘﺭﯗﺷﻰ ﻛﯧﺮﻩﻙ

ﺧﯩﺘﺎﻱ ﺋﯚﺗﻜﯜﻧﭽﻰ ﻫﯚﻛﯜﻣﯩﺘﻰ ﺑﯘ ﻳﯩﻞ 1 ‏ - ﺋﺎﻳﻨﯩﯔ 1 ‏ - ﻛﯜﻧﻰ ﻗﯘﺭﯗﻟﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﻐﺎﻥ ﺑﻮﻟﺴﯩﻤﯘ، ﻫﺎﺯﯨﺮﻏﺎ ﻗﻪﺩﻩﺭ ﻛﯚﭖ ﺳﺎﻧﺪﯨﻜﻰ ﺧﯩﺘﺎﻱ ﺩﯦﻤﻮﻛﯩﺮﺍﺗﭽﯩﻠﯩﺮﯨﻨﯩﯔ ﻗﻮﻟﻠﯩﺸﯩﻐﺎ ﺋﯧﺮﯨﺸﻪﻟﻤﯩﺪﻯ. ﺋﯚﺗﻜﯜﻧﭽﻰ ﻫﯚﻛﯜﻣﻪﺕ ﺑﺎﻳﺎﻧﺎﺗﭽﯩﺴﻰ ﻣﯘﺷﯘ ﺋﺎﻳﻨﯩﯔ ﺑﯧﺸﯩﺪﺍ، ﺷﯩﻨﺘﺎﯕﺮﯦﻦ ﺗﯧﻠﯧﯟﯨﺰﯨﻴﻪ ﻗﺎﻧﯩﻠﯩﻨﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﯩﭗ، ﻫﯚﻛﯜﻣﻪﺕ ﻫﻪﻗﻘﯩﺪﯨﻜﻰ ﺑﯩﺮ ﻗﺎﺗﺎﺭ ﮔﯘﻣﺎﻧﻠﯩﻖ ﺳﻮﺋﺎﻟﻼﺭﻏﺎ ﺟﺎﯞﺍﺏ ﺑﻪﺭﮔﻪﻥ ﯞﻩ ﻫﯚﻛﯜﻣﻪﺗﻨﯩﯔ ﻣﯘﺳﺘﻪﻫﻜﻪﻣﻠﯩﻨﯩﺸﻜﻪ ﻗﺎﺭﺍﭖ ﺋﯩﻠﮕﯩﺮﯨﻠﻪﯞﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ. ﺋﯚﺗﻜﯜﻧﭽﻰ ﻫﯚﻛﯜﻣﻪﺕ ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﺎﻛﯩﻤﯩﻴﯩﺘﯩﻨﻰ ﺋﺎﻏﺪﯗﺭﯗﺵ ﺋﯜﭼﯜﻥ ﺑﺎﺭﻟﯩﻖ ﯞﺍﺳﺘﯩﻼﺭﻧﻰ ﻗﻮﻟﻠﯩﻨﯩﺸﻨﻰ ﺗﻪﺷﻪﺑﺒﯘﺱ ﻗﯩﻠﯩﺪﯨﻐﺎﻥ، ﺧﯩﺘﺎﻱ ﻛﻮﻣﻤﯘﻧﯩﺴﺘﻠﯩﺮﻯ ﺑﯩﻠﻪﻥ ﻣﯘﺭﻩﺳﺴﻪ ﻗﯩﻠﯩﺸﻨﻰ ﭘﯜﺗﯜﻧﻠﻪﻱ ﺭﻩﺕ ﻗﯩﻠﯩﺪﯨﻐﺎﻥ، ﺳﺎﻧﻰ ﻛﯚﭖ ﺑﻮﻟﻤﯩﻐﺎﻥ ﺑﯩﺮ ﺗﯜﺭﻛﯜﻡ ﺧﯩﺘﺎﻱ ﺩﯦﻤﻮﻛﯩﺮﺍﺗﭽﯩﻠﯩﺮﯨﻨﯩﯔ ﯞﻩﻛﯩﻠﻠﯩﻚ ﺋﻮﺭﮔﯩﻨﯩﺪﯗﺭ. ﺑﯩﺰ ﺑﺎﻳﺎﻧﺎﺗﭽﻰ ﺗﺎﯓ ﺑﻮﭼﻴﺎﯞ ﺑﯩﻠﻪﻥ ﺗﯩﺒﻪﺕ ﺗﻮﻗﯘﻧﯘﺷﻰ ﻫﻪﻗﻘﯩﺪﯨﻜﻰ ﻗﺎﺭﺍﺷﻠﯩﺮﯨﻨﻰ ﺋﯩﻠﮕﯩﺮﯨﻠﯩﮕﻪﻥ ﻫﺎﻟﺪﺍ ﺋﯩﮕﯩﻠﻪﺷﻜﻪ ﺗﯩﺮﯨﺸﺘﯘﻕ.

ﯞﺍﺷﯩﻨﮕﺘﻮﻥ ﺧﯩﺘﺎﻱ ﺋﻪﻟﭽﯩﺨﺎﻧﯩﺴﻰ ﺋﺎﻟﺪﯨﺪﯨﻜﻰ ﺗﯩﺒﻪﺕ - ﺋﯘﻳﻐﯘﺭ ﻧﺎﻣﺎﻳﯩﺸﻰ. RFA Photo

ﺑﯩﺰ ﺋﯘﻧﯩﯖﺪﯨﻦ، ﺗﯩﺒﻪﺗﻠﯩﻚ ﻧﺎﻣﺎﻳﯩﺸﭽﯩﻼﺭﻧﯩﯔ ﻧﺎﻣﺎﻳﯩﺶ ﺟﻪﺭﻳﺎﻧﯩﺪﺍ ﺯﻭﺭﻟﯘﻕ ﯞﺍﺳﺘﯩﻠﯩﺮﯨﻨﻰ ﻗﻮﻟﻼﻧﻐﺎﻧﻠﯩﻘﯩﻐﺎ ﻗﺎﻧﺪﺍﻕ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ ﺳﻮﺭﯨﺪﯗﻕ. ﺋﯘ ﺩﯨﻜﺘﺎﺗﻮﺭ ﺑﯩﺮ ﻫﺎﻛﯩﻤﯩﻴﻪﺕ ﺗﯜﺯﯛﻣﻰ ﺋﺎﺳﺘﯩﺪﺍ ﺑﯘ ﺧﯩﻞ ﻗﺎﺭﺷﯩﻠﯩﻘﻨﻰ ﺗﻮﻏﺮﺍ ﭼﯜﺷﯩﻨﯩﺸﻜﻪ ﺑﻮﻟﯩﺪﯗ ﺩﻩﭖ ﺟﺎﯞﺍﺏ ﺑﻪﺭﺩﻯ. ﺋﯘ ﺗﻮﻏﺮﺍ ﭼﯜﺷﯩﻨﯩﺸﻨﯩﯔ ﺳﻪﯞﻩﺑﯩﻨﻰ ﻣﯘﻧﺪﺍﻕ ﺋﯩﺰﺍﻫﻠﯩﺪﻯ: " ﺗﻮﻗﯘﻧﯘﺷﺘﺎ ﺑﯩﺮ ﺗﻪﺭﻩﭖ ﺑﺎﺭﻟﯩﻖ ﻫﻪﺭﺑﯩﻲ ﻗﻮﺭﺍﻟﻼﺭﻏﺎ ﺳﺎﻫﯩﭗ، ﻳﻪﻧﻪ ﺑﯩﺮ ﺗﻪﺭﻩﭖ ﻗﯘﺭﯗﻕ ﻗﻮﻝ ﺑﻮﻟﻐﺎﻧﺪﯨﻦ ﻛﯧﻴﯩﻦ، ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﯨﮕﻪ ﺋﻪﺧﻼﻕ ﺋﯚﻟﭽﯩﻤﻰ ﻗﻮﻳﻐﯩﻠﻰ ﺑﻮﻟﻤﺎﻳﺪﯗ. ﺋﺎﺩﻩﺗﺘﻪ ﺑﺎﺭﻟﯩﻖ ﺟﻪﻣﺌﯩﻴﻪﺗﻠﻪﺭﺩﻩ ﺋﯩﺨﺘﯩﻼﭘﻼﺭ ﺑﻮﻟﯩﺪﯗ، ﺩﯦﻤﻮﻛﺮﺍﺗﯩﻴﻪ ﯞﻩ ﻗﺎﻧﯘﻥ ﺑﯘ ﺋﯩﺨﺘﯩﻼﭘﻼﺭﻧﯩﯔ ﺗﻮﻗﯘﻧﯘﺷﻘﺎ ﺋﺎﻳﻠﯩﻨﯩﺸﯩﻨﯩﯔ ﺋﺎﻟﺪﯨﻨﻰ ﺋﺎﻟﯩﺪﯗ. ﺑﯩﺰ ﺧﯩﺘﺎﻱ ﻧﺎﻣﺎﻳﯩﺶ ﻗﯩﻠﯩﺸﺘﯩﻦ ﺋﯩﺒﺎﺭﻩﺕ ﺋﻪﯓ ﺋﻪﻗﻪﻟﻠﯩﻲ ﻫﻮﻗﯘﻗﻘﺎ ﻳﻮﻝ ﻗﻮﻳﻤﯩﻐﺎﻧﻠﯩﻘﻰ ﺳﻪﯞﻩﺑﯩﺪﯨﻦ، ﻣﻪﺯﻛﯘﺭ ﯞﻩﻗﻪ ﻛﯧﻠﯩﭗ ﭼﯩﻘﻘﺎﻥ ﺩﻩﭖ ﻗﺎﺭﺍﻳﻤﯩﺰ."

"ﺗﻪﻳﯟﻩﻧﻨﯩﯔ ﺋﯩﻜﻜﯩﻨﭽﻰ ﺑﯩﺮ ﺗﯩﺒﻪﺕ ﺑﻮﻟﯘﭖ ﻗﯧﻠﯩﺶ ﺋﯧﻬﺘﯩﻤﺎﻟﻰ ﺑﺎﺭ"

ﺧﯩﺘﺎﻳﭽﻪ ﺏ ﺏ ﺱ ﺧﻪﯞﻩﺭ ﺗﻮﺭﻯ ﺧﯩﺘﺎﻳﻨﯩﯔ ﺗﯩﺒﻪﺗﺘﯩﻜﻰ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﮕﻪ ﻗﺎﺭﯨﺘﺎ ﻛﯩﺘﺎﺑﺨﺎﻧﻠﯩﺮﯨﻨﯩﯔ ﺋﯩﻨﻜﺎﺱ ﻗﺎﻳﺘﯘﺭﯗﺷﻰ ﺋﯜﭼﯜﻥ ﻣﻪﺧﺴﯘﺱ ﺳﻪﻫﯩﭙﻪ ﺋﺎﭼﻘﺎﻥ. ﺳﻪﻫﯩﭙﯩﮕﻪ ﺧﯩﺘﺎﻱ ﺋﯩﭽﻰ - ﺳﯩﺮﺗﯩﺪﯨﻦ ﺋﯩﻨﻜﺎﺳﻼﺭ ﻳﯧﺰﯨﻠﻐﺎﻥ. ﺋﯩﻨﻜﺎﺳﻼﺭﻧﯩﯔ ﻣﯘﺗﻠﻪﻕ ﻛﯚﭖ ﻗﯩﺴﻤﯩﺪﺍ، ﺧﯩﺘﺎﻳﻨﯩﯔ ﺑﺎﺳﺘﯘﺭﯗﺷﻰ ﺗﻮﻏﺮﺍ ﺩﻩﭖ ﺑﺎﻫﺎ ﺑﯧﺮﯨﻠﮕﻪﻥ. ﺋﻪﻣﻤﺎ ﺋﯩﻨﻜﺎﺱ ﻗﺎﻳﺘﯘﺭﻏﯘﭼﯩﻼﺭﻧﯩﯔ ﻗﺎﻳﺴﻰ ﺧﯩﻞ ﭘﯩﻜﯩﺮ ﺋﯧﻘﯩﻤﯩﺪﯨﻜﻰ ﻛﯩﺸﯩﻠﻪﺭ ﺋﯩﻜﻪﻧﻠﯩﻜﻰ ﻣﻪﻟﯘﻡ ﺋﻪﻣﻪﺱ، ﭘﻪﻗﻪﺕ ﺧﯩﺘﺎﻱ ﻣﯩﻠﻠﯩﺘﯩﺪﯨﻦ ﺋﯩﻜﻪﻧﻠﯩﻜﻰ ﻣﻪﻟﯘﻡ.

ﺑﯩﺮ ﻗﯩﺴﯩﻢ ﺧﯩﺘﺎﻱ ﺩﯦﻤﻮﻛﺮﺍﺗﭽﯩﻠﯩﺮﻯ ﻳﯘﻗﯩﺮﯨﻘﯩﺪﻩﻙ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﭘﻪﻳﺘﺘﻪ، ﺗﻪﻳﯟﻩﻥ ﺩﯦﻤﻮﻛﺮﺍﺗﯩﻚ ﺗﻪﺭﻩﻗﻘﯩﻴﺎﺕ ﭘﺎﺭﺗﯩﻴﯩﺴﯩﻨﯩﯔ ﭘﺮﯦﺰﯨﺪﯦﻨﺖ ﻧﺎﻣﺰﺍﺗﻰ ﺷﯥ ﺟﯩﻨﭽﺎﯓ ﺗﯩﺒﻪﺗﺘﯩﻜﻰ ﯞﻩﻗﻪ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺗﻪﻳﯟﻩﻥ ﺧﻪﻟﻘﯩﻨﯩﯔ ﯞﻩﻗﻪﺩﯨﻦ ﺩﻩﺭﺱ ﭼﯩﻘﯩﺮﯨﺸﻰ ﻛﯧﺮﻩﻛﻠﯩﻜﯩﻨﻰ، ﺋﯘﻧﺪﺍﻕ ﺑﻮﻟﻤﯩﻐﯩﻨﯩﺪﺍ، ﺗﻪﻳﯟﻩﻧﻨﯩﯔ ﺋﯩﻜﻜﯩﻨﭽﻰ ﺑﯩﺮ ﺗﯩﺒﻪﺕ ﺑﻮﻟﯘﭖ ﻗﯧﻠﯩﺶ ﺋﯧﻬﺘﯩﻤﺎﻟﯩﻨﻰ ﺋﻪﺳﻜﻪﺭﺗﺘﻰ ﯞﻩ ﺗﻪﻳﯟﻩﻥ ﻣﯘﺳﺘﻪﻗﯩﻠﻠﯩﻘﯩﻨﯩﯔ ﯞﺍﺯ ﻛﯧﭽﯩﻠﻤﻪﺳﻠﯩﻜﯩﮕﻪ ﺋﯩﺸﺎﺭﻩﺕ ﻗﯩﻠﺪﻯ. ﺗﻪﻳﯟﻩﻧﺪﯨﻜﻰ ﮔﻮﻣﯩﻨﺪﺍﯓ ﭘﺎﺭﺗﯩﻴﯩﺴﯩﻨﯩﯔ ﭘﺮﯦﺰﯨﺪﯦﻨﺖ ﻧﺎﻣﺰﺍﺗﻰ ﻣﺎ ﻳﯩﯖﺠﻴﯘ ﺗﯩﺒﻪﺗﺘﯩﻜﻰ ﯞﻩﻗﻪ ﺗﻮﻏﺮﯨﺴﯩﺪﺍ ﺧﯩﺘﺎﻳﻨﻰ ﺋﻪﻳﯩﺒﻠﯩﺪﻯ ﯞﻩ ﺋﯚﺯﻟﯩﺮﯨﻨﯩﯔ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ ﺑﯩﻠﻪﻥ ﻳﯧﻘﯩﻨﻠﯩﺸﯩﺶ ﭘﯩﻼﻧﯩﻨﻰ ﻗﺎﻳﺘﺎ ﻛﯚﺯﺩﯨﻦ ﻛﻪﭼﯜﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. (ﺷﯚﻫﺮﻩﺕ ﻫﻮﺷﯘﺭ)