ﺧﯩﺘﺎﻳﻨﯩﯔ ﺳﻮﺩﯨﺪﯨﻜﻰ ﺳﺎﻗﺘﯩﻠﯩﻘﻰ 8 ﺩﯙﻟﻪﺕ ﻳﯩﻐﯩﻨﯩﻨﯩﯔ ﻣﯘﻫﯩﻢ ﺗﻪﻧﻘﯩﺪ ﺗﯧﻤﯩﺴﻰ

• ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﮔﯧﺮﻣﺎﻧﯩﻴﯩﻨﯩﯔ ﻫﻪﺭ ﻗﺎﻳﺴﻰ ﺷﻪﻫﻪﺭﻟﯩﺮﯨﺪﻩ ﻣﯩﯖﻠﯩﻐﺎﻥ ﻧﺎﻣﺎﻳﯩﺸﭽﯩﻼﺭﻧﯩﯔ ﻧﺎﺭﺍﺯﯨﻠﯩﻘﯩﻐﺎ ﺋﯘﭼﺮﺍﯞﺍﺗﻘﺎﻥ 8 ﺩﯙﻟﻪﺕ ﺑﺎﺷﻠﯩﻘﻠﯩﺮﯨﻨﯩﯔ ﻳﯩﻐﯩﻨﯩﺪﺍ، ﮔﯧﺮﻣﺎﻧﯩﻴﻪ ﺗﻪﺭﻩﭖ ﺧﯩﺘﺎﻳﻨﯩﯔ ﮔﯧﺮﻣﺎﻧﯩﻴﻪ ﺗﺎﯞﺍﺭﻟﯩﺮﯨﻨﻰ ﻛﻮﭘﻰ ﻗﯩﻠﯩﭗ ﻳﺎﺳﺎﺵ ﻗﯩﻠﻤﯩﺸﯩﻨﯩﯔ ﺗﯧﺨﯩﻤﯘ ﻛﯚﭘﯩﻴﯩﯟﺍﺗﻘﺎﻧﻠﯩﻘﯩﻨﻰ ﻗﺎﺗﺘﯩﻖ ﺗﻪﻧﻘﯩﺪ ﻗﯩﻠﺪﻯ.

ﺧﯩﺘﺎﻳﻨﯩﯔ ﺗﯧﺨﻨﯩﻜﺎ ﺋﻮﻏﯘﺭﻻﺵ ﯞﻩ ﭼﻪﺗﺌﻪﻝ ﺗﺎﯞﺍﺭﻟﯩﺮﯨﻨﻰ ﺗﻪﻗﻠﯩﺪ ﻗﯩﻠﯩﺶ ﻗﯩﻠﻤﯩﺸﯩﻨﻰ ﭼﻪﻛﻠﻪﺵ ﻣﯘﺯﺍﻛﯩﺮﯨﮕﻪ ﻗﻮﻳﯘﻟﯩﺪﯨﻐﺎﻥ ﻣﯘﻫﯩﻢ ﻣﻪﺯﻣﯘﻧﻼﺭ

2005 ﯞﻩ 2006 - ﻳﯩﻠﻰ ﺧﯩﺘﺎﻱ ﺑﺎﺵ ﻣﯩﻨﯩﺴﺘﯩﺮﻯ ﯞﯦﻦ ﺟﻴﺎﺑﺎﺋﻮ ﮔﯧﺮﻣﺎﻧﯩﻴﯩﮕﻪ ﺯﯨﻴﺎﺭﻩﺗﻜﻪ ﻛﻪﻟﮕﻪﻧﺪﻩ، ﮔﯧﺮﻣﺎﻧﯩﻴﻪ ﺩﯙﻟﻪﺕ ﺭﻩﻫﺒﻪﺭﻟﯩﺮﻯ ﺧﻪﻟﻘﺌﺎﺭﺍ ﻣﻪﺗﺒﯘﺋﺎﺗﯩﻨﯩﯔ ﻛﯚﺯﯨﺪﯨﻼ ﯞﯦﻦ ﺟﻴﺎﺑﺎﯞﻧﻰ ﻗﺎﺭﯨﺘﯩﭗ ﻗﻮﻳﯘﭖ، ﺧﯩﺘﺎﻳﻨﯩﯔ ﺗﻪﻗﻠﯩﺪﭼﯩﻠﯩﻚ ﻗﯩﻠﻤﯩﺸﯩﻨﻰ ﺋﻪﻳﯩﺒﻠﯩﮕﻪﻥ ﺋﯩﺪﻯ. ﺑﯘ ﻗﯧﺘﯩﻤﻘﻰ 8 ﺩﯙﻟﻪﺕ ﺑﺎﺷﻠﯩﻘﻠﯩﺮﯨﻨﯩﯔ ﻳﯩﻐﯩﻨﯩﺪﺍ، ﮔﯧﺮﻣﺎﻧﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺋﺎﻧﺠﯩﻼ ﻣﯧﺮﻛﯩﻠﻨﯩﯔ ﻣﯘﻫﯩﻢ ﺳﯚﺯ ﺗﯧﻤﯩﻠﯩﺮﯨﻨﯩﯔ ﺑﯩﺮﻯ ﺧﯩﺘﺎﻳﻨﯩﯔ ﺗﻪﻗﻠﯩﺪﭼﯩﻠﯩﻜﯩﮕﻪ ﺋﯜﻧﯜﻣﻠﯜﻙ ﺋﯘﺳﯘﻟﺪﺍ ﭼﻪﻙ ﻗﻮﻳﯘﺵ ﺗﻮﻏﺮﯨﺴﯩﺪﺍ ﺑﻮﻟﻐﺎﻥ.

ﮔﯧﺮﻣﺎﻧﯩﻴﻪ ﺩﻭﻟﻘﯘﻧﻠﯩﺮﻯ ﺭﺍﺩﯨﺌﻮﺳﯩﻨﯩﯔ 6 - ﺋﺎﻳﻨﯩﯔ 3 - ﻛﯜﻧﯩﺪﯨﻜﻰ ﺧﻪﯞﯨﺮﯨﮕﻪ ﺋﺎﺳﺎﺳﻼﻧﻐﺎﻧﺪﺍ، ﺑﯘ ﻗﯧﺘﯩﻤﻘﻰ 8 ﺩﯙﻟﻪﺕ ﺭﻩﻫﺒﻪﺭﻟﯩﺮﻯ ﻳﯩﻐﯩﻨﯩﺪﺍ ﺧﯩﺘﺎﻳﻨﯩﯔ ﺗﯧﺨﻨﯩﻜﺎ ﺋﻮﻏﯘﺭﻻﺵ ﯞﻩ ﭼﻪﺗﺌﻪﻝ ﺗﺎﯞﺍﺭﻟﯩﺮﯨﻨﻰ ﺗﻪﻗﻠﯩﺪ ﻗﯩﻠﯩﺶ ﻗﯩﻠﻤﯩﺸﯩﻨﻰ ﭼﻪﻛﻠﻪﺵ ﻣﯘﺯﺍﻛﯩﺮﯨﮕﻪ ﻗﻮﻳﯘﻟﯩﺪﯨﻐﺎﻥ ﻣﯘﻫﯩﻢ ﻣﻪﺯﻣﯘﻧﻼﺭ ﻗﺎﺗﺎﺭﯨﺪﯨﻦ ﺋﻮﺭﯗﻥ ﺋﺎﻟﻐﺎﻥ.

ﮔﯧﺮﻣﺎﻧﯩﻴﻪ ﺗﺎﯞﺍﺭﻟﯩﺮﯨﻨﯩﯔ % 75 ﺋﯩﻨﯩﯔ ﺧﯩﺘﺎﻳﺪﺍ ﺗﻪﻗﻠﯩﺪ ﻗﯩﻠﯩﭗ ﻳﺎﺳﯩﻠﯩﭗ، ﺗﻪﺭﻩﻗﻘﻰ ﻗﯩﻠﯩﯟﺍﺗﻘﺎﻥ ﺋﻪﻟﻠﻪﺭ ﯞﻩ ﺋﯜﭼﯩﻨﭽﻰ ﺩﯗﻧﻴﺎ ﺋﻪﻟﻠﯩﺮﯨﮕﻪ ﺳﯧﺘﯩﻠﯩﯟﺍﺗﯩﺪﯗ

ﮔﯧﺮﻣﺎﻧﯩﻴﻪ ﺳﻮﺩﺍ - ﺳﺎﻧﺎﺋﻪﺗﭽﯩﻠﻪﺭ ﺑﯩﺮﻟﻪﺷﻤﯩﺴﯩﻨﯩﯔ ﻣﻪﻟﯘﻣﺎﺗﯩﻐﺎ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻱ ﺩﯗﻧﻴﺎﺩﯨﻜﻰ ﺗﻪﻗﻠﯩﺪﯨﻲ ﺗﺎﯞﺍﺭ ﺋﯩﺸﻠﻪﭘﭽﯩﻘﯩﺮﯨﺸﺘﺎ ﺭﯦﻜﻮﺭﺕ ﻳﺎﺭﺍﺗﻘﺎﻥ ﭼﯧﻤﭙﯩﻴﻮﻥ ﺩﯙﻟﻪﺗﻜﻪ ﺋﺎﻳﻼﻧﻐﺎﻥ. ﻫﻪﺭ ﻳﯩﻠﻰ ﺧﯩﺘﺎﻳﻨﯩﯔ ﺗﻪﻗﻠﯩﺪﭼﯩﻠﯩﻜﻰ ﺗﯜﭘﻪﻳﻠﻰ ﺗﺎﺭﺗﯩﺪﯨﻐﺎﻥ ﺯﯨﻴﺎﻥ 30 ﻣﯩﻠﻴﺎﺭﺩ ﻳﯧﯟﺭﻭﻏﺎ ﻳﻪﺗﻜﻪﻥ ﺑﻮﻟﯘﭖ، ﺑﯘ ﺳﺎﻥ ﻳﯩﻠﺪﯨﻦ ﻳﯩﻠﻐﺎ ﺋﯚﺭﻟﻪﭖ ﺑﺎﺭﻣﺎﻗﺘﺎ ﺋﯩﻜﻪﻥ.

ﮔﯧﺮﻣﺎﻧﯩﻴﯩﻨﯩﯔ ﺗﺎﻣﻮﮊﻧﺎ ﯞﻩ ﺳﺎﻗﭽﻰ ﺩﺍﺋﯩﺮﯨﻠﯩﺮﯨﻨﯩﯔ ﺋﺎﺷﻜﺎﺭﯨﻠﯩﻐﺎﻥ ﻣﻪﻟﯘﻣﺎﺗﻠﯩﺮﯨﻐﺎ ﻗﺎﺭﯨﻐﺎﻧﺪﺍ، ﺩﯗﻧﻴﺎﺩﯨﻜﻰ ﻣﯘﺳﺎﺩﯨﺮﻩ ﻗﯩﻠﯩﻨﻐﺎﻥ ﭘﯜﺗﻜﯜﻝ ﺗﻪﻗﻠﯩﺪﯨﻲ ﺗﺎﯞﺍﺭﻻﺭﻧﯩﯔ ﻳﯧﺮﯨﻤﻰ ﺧﯩﺘﺎﻳﺪﺍ ﺋﯩﺸﻠﻪﭘﭽﯩﻘﯩﺮﯨﻠﻐﺎﻥ ﺋﯩﻜﻪﻥ. ﮔﯧﺮﻣﺎﻧﯩﻴﻪ ﺳﻮﺩﺍ - ﺳﺎﻧﺎﺋﻪﺕ ﺑﯩﺮﻟﻪﺷﻤﯩﺴﻰ ﻳﻪﻧﻪ ﮔﯧﺮﻣﺎﻧﯩﻴﻪ ﺗﺎﯞﺍﺭﻟﯩﺮﯨﻨﯩﯔ % 75 ﺋﯩﻨﯩﯔ ﺧﯩﺘﺎﻳﺪﺍ ﺗﻪﻗﻠﯩﺪ ﻗﯩﻠﯩﭗ ﻳﺎﺳﯩﻠﯩﭗ، ﺗﻪﺭﻩﻗﻘﻰ ﻗﯩﻠﯩﯟﺍﺗﻘﺎﻥ ﺋﻪﻟﻠﻪﺭ ﯞﻩ ﺋﯜﭼﯩﻨﭽﻰ ﺩﯗﻧﻴﺎ ﺋﻪﻟﻠﯩﺮﯨﮕﻪ ﺳﯧﺘﯩﻠﯩﯟﺍﺗﻘﺎﻧﻠﯩﻘﯩﻨﻰ، ﻫﻪﺗﺘﺎ ﮔﯧﺮﻣﺎﻧﯩﻴﻪ ﻣﺎﺭﻛﯩﻠﯩﺮﯨﺪﺍ ﺑﺎﺯﺍﺭﻏﺎ ﺳﯧﻠﯩﻨﯩﯟﺍﺗﻘﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﻐﺎﻥ.

ﺩ ﯗ ﻕ ﺋﯩﭽﻜﻰ ﺋﯩﺸﻼﺭ ﻛﻮﻣﯩﺘﯧﺘﯩﻨﯩﯔ ﻣﯘﺩﯨﺮﻯ ﺋﺎﺑﺪﯗﺟﯧﻠﯩﻞ ﻗﺎﺭﯨﻬﺎﺟﯩﻢ ﺧﯩﺘﺎﻳﻨﯩﯔ ﺑﯘ ﺧﯩﻞ ﺗﯧﺨﻨﯩﻜﺎ ﺋﻮﻏﯘﺭﻟﯘﻗﯩﻨﯩﯔ ﻏﻪﺭﺏ ﺋﻪﻟﻠﯩﺮﯨﺪﻩ ﻛﯜﭼﻠﯜﻙ ﻧﺎﺭﺍﺯﯨﻠﯩﻖ ﭘﻪﻳﺪﺍ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ، ﻏﻪﺭﺏ ﺋﻪﻟﻠﯩﺮﯨﮕﻪ ﺯﻭﺭ ﺋﯩﻘﺘﯩﺴﺎﺩﻯ ﺯﯨﻴﺎﻥ ﻛﻪﻟﺘﯜﺭﯛﭘﻼ ﻗﺎﻟﻤﺎﺳﺘﯩﻦ، ﺋﯩﺸﺴﯩﺰﻟﯩﻖ ﻣﻪﺳﯩﻠﯩﺴﯩﻨﯩﯔ ﺋﯧﻐﯩﺮﻟﯩﺸﯩﺸﯩﻐﺎ ﺳﻪﯞﻩﺑﭽﻰ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺗﯩﻠﻐﺎ ﺋﯧﻠﯩﭗ ﺋﯚﺗﺘﻰ.

ﭼﻪﺗﺌﻪﻝ ﻣﯘﺗﻪﺧﻪﺳﺴﯩﺴﻠﯩﺮﯨﻨﯩﯔ ﻗﺎﺭﯨﺸﯩﭽﻪ، ﺧﯩﺘﺎﻳﻨﯩﯔ 70 - ﻳﯩﻠﻼﺭﻧﯩﯔ ﺋﺎﺧﯩﺮﻟﯩﺮﻯ ﭼﯩﻘﺎﺭﻏﺎﻥ ﺗﺎﯞﺍﺭ ﯞﻩ ﻧﻪﺷﯩﺮ ﺑﻮﻳﯘﻣﻠﯩﺮﯨﻨﯩﯔ ﭘﺎﺗﯧﻨﺖ ﻫﻮﻗﯘﻗﯩﻨﻰ ﻗﻮﻏﺪﺍﺵ ﻗﺎﻧﯘﻧﻰ ﺧﻪﻟﻘﺌﺎﺭﺍ ﺳﻮﺩﺍ ﺗﻪﺷﻜﯩﻼﺗﯩﻨﯩﯔ ﻣﯩﺰﺍﻧﯩﻐﺎ ﺗﺎﻣﺎﻣﻪﻥ ﺋﯘﻳﻐﯘﻥ ﺑﻮﻟﺴﯩﻤﯘ، ﺋﻪﻣﻤﺎ ﺑﯘ ﻗﺎﻧﯘﻥ ﺧﯩﺘﺎﻳﺪﺍ ﻫﯩﭻ ﺋﯩﺠﺮﺍ ﻗﯩﻠﯩﻨﻤﺎﻳﺪﯨﻜﻪﻥ. ﻗﺎﻧﯘﻧﺸﯘﻧﺎﺱ ﺭﻭﺑﯧﺮﺕ ﺋﻪﭘﻪﻧﺪﻯ ﺑﯘ ﻫﻪﻗﺘﻪ ﺗﻮﺧﺘﯩﻠﯩﭗ، "ﺧﯩﺘﺎﻳﻨﯩﯔ ﻗﺎﻧﯘﻥ ﺋﯩﺠﺮﺍ ﻗﯩﻠﯩﺸﻰ ﻧﻮﺭﻣﺎﻝ ﺋﻪﻣﻪﺱ. ﻳﻪﺭﻟﯩﻚ ﻫﯚﻛﯜﻣﻪﺗﻠﻪﺭ ﻗﺎﻧﯘﻥ ﺑﯩﻠﻪﻥ ﻫﯧﺴﺎﺑﻠﯩﺸﯩﭗ ﻛﻪﺗﻤﻪﻳﺪﯗ. ﺧﯩﺘﺎﻳﺪﺍ ﻫﻪﺭ ﻗﺎﻧﺪﺍﻕ ﺳﻮﺕ ﻣﻪﻫﻜﯩﻤﯩﺴﻰ ﻫﯚﻛﯜﻣﻪﺗﻜﻪ ﺑﯧﻘﯩﻨﯩﺪﯨﻐﺎﻥ ﺑﻮﻟﻐﺎﭺ، ﺗﻪﻗﻠﯩﺪﯨﻲ ﺗﺎﯞﺍﺭ ﺋﯩﺸﻠﻪﭘﭽﯩﻘﯩﺮﯨﺸﻨﻰ ﭼﻪﻛﻠﻪﻳﻤﻪﻥ، ﺩﯦﮕﻪﻧﻠﯩﻚ ﻗﯘﺭﯗﻕ ﮔﻪﭘﺘﯩﻦ ﺋﯩﺒﺎﺭﻩﺕ" ﺩﻩﭖ ﻛﯚﺭﺳﻪﺗﻜﻪﻥ.

ﺑﻪﺯﻯ ﺧﯩﺘﺎﻳﺸﯘﻧﺎﺳﻼﺭ، ﺧﯩﺘﺎﻳﻼﺭﻧﯩﯔ ﺑﯘ ﺧﯩﻞ ﺗﻪﻗﻠﯩﺪﭼﯩﻠﯩﻚ ﺧﺎﺭﺍﻛﺘﯧﺮﯨﻨﻰ ﺋﯘﻻﺭﻧﯩﯔ ﺋﻪﻧﺌﻪﻧﯩﺴﻰ ﻧﯘﻗﺘﯩﺴﯩﺪﯨﻦ ﺗﻪﻫﻠﯩﻞ ﻗﯩﻠﯩﭗ، ﻛﻮﯕﺰﯨﻨﯩﯔ "ﺷﺎﮔﯩﺮﺕ ﺋﯘﺳﺘﺎﺯﻧﻰ ﺩﻭﺭﯨﺸﻰ ﻛﯧﺮﻩﻙ" ﺩﯦﮕﻪﻥ ﺗﻪﻟﯩﻤﺎﺗﯩﻐﺎ ﺧﯩﺘﺎﻳﻼﺭﻧﯩﯔ ﺋﻪﻣﻪﻝ ﻗﯩﻠﯩﺪﯨﻐﺎﻧﻠﯩﻘﯩﻨﻰ، 7 - ﺋﻪﺳﯩﺮﺩﻩ ﻫﯩﻨﺪﯨﺴﺘﺎﻧﺪﯨﻦ ﻧﻮﻡ ﺋﻮﻏﯘﺭﻻﭖ ﻛﯧﻠﯩﭗ، ﺋﯘﻧﻰ ﺋﯚﺯﯨﻨﯩﯔ ﻗﯩﻠﯩﯟﺍﻟﻐﺎﻧﻠﯩﻘﯩﻨﻰ ﻣﯩﺴﺎﻝ ﺋﺎﻟﻐﺎﻥ. ﺑﯘ ﻳﻪﺭﺩﻩ ﺧﯩﺘﺎﻳﻨﯩﯔ ﺋﯩﺠﺎﺩ ﻗﯩﻠﯩﺸﻘﺎ ﺋﻪﻣﻪﺱ، ﺋﻮﻏﯘﺭﻻﺷﻘﺎ ﯞﻩ ﻛﻮﭘﻰ ﻗﯩﻠﯩﺸﻘﺎ ﻣﺎﻳﯩﻠﻠﯩﻘﻰ ﮔﻪﯞﺩﯨﻠﻪﻧﺪﯛﺭﯛﻟﮕﻪﻥ.

ﺧﯩﺘﺎﻳﻨﯩﯔ ﻏﻪﺭﺏ ﺗﺎﯞﺍﺭﻟﯩﺮﯨﻨﻰ ﻛﻮﭘﻰ ﻗﯩﻠﯩﭗ، ﺋﯚﺯﯨﻨﯩﯔ ﻣﯧﻠﯩﻐﺎ ﺋﺎﻳﻼﻧﺪﯗﺭﯗﭖ ﺋﯩﻘﺘﯩﺴﺎﺩ ﺗﻮﭘﻼﺵ ﻗﯩﻠﻤﯩﺸﻰ ﻫﯧﭻ ﺋﯚﺯﮔﻪﺭﮔﯩﻨﻰ ﻳﻮﻕ

ﺑﯘ ﻳﯩﻞ 4 - ﺋﺎﻳﺪﺍ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﺧﯩﺘﺎﻳﺪﺍ ﺋﺎﻣﯧﺮﯨﻜﯩﻨﯩﯔ ﻛﯩﻨﻮﺳﻰ، ﻛﯩﺘﺎﺑﻠﯩﺮﻯ ﯞﻩ ﻳﯘﻣﺸﺎﻕ ﺩﯦﺘﺎﻟﻠﯩﺮﯨﻨﯩﯔ ﻛﻪﯓ - ﻛﯘﺷﺎﺩﻩ ﻛﻮﭘﻰ ﻗﯩﻠﯩﻨﯩﭗ ﺳﯧﺘﯩﻠﯩﯟﺍﺗﻘﺎﻧﻠﯩﻘﻰ ﺳﻪﯞﻩﺑﻠﯩﻚ ﺧﯩﺘﺎﻳﻨﻰ ﺋﻪﻳﯩﺒﻠﯩﮕﻪﻥ ﺋﯩﺪﻯ. ﮔﯧﺮﻣﺎﻧﯩﻴﻪ ﻫﻪﺭ ﻗﯧﺘﯩﻢ ﺧﯩﺘﺎﻱ ﺑﯩﻠﻪﻥ ﺑﻮﻟﻐﺎﻥ ﺋﯘﭼﺮﯨﺸﯩﺸﻠﯩﺮﯨﺪﺍ ﺑﯘ ﻧﯘﻗﺘﯩﻐﺎ ﺟﯩﺪﺩﯨﻲ ﻣﯘﺋﺎﻣﯩﻠﻪ ﻗﯩﻠﯩﯟﺍﺗﯩﺪﯗ. ﻳﺎﯞﺭﯗﭘﺎ ﺑﯩﺮﻟﯩﻜﯩﻤﯘ ﺧﯩﺘﺎﻳﻐﺎ ﻗﺎﻳﺘﺎ - ﻗﺎﻳﺘﺎ ﺋﺎﮔﺎﻫﻼﻧﺪﯗﺭﯗﺵ ﺑﯧﺮﯨﯟﺍﺗﯩﺪﯗ. ﺋﻪﻣﻤﺎ ﺧﯩﺘﺎﻳﻨﯩﯔ ﻏﻪﺭﺏ ﺗﺎﯞﺍﺭﻟﯩﺮﯨﻨﻰ ﻛﻮﭘﻰ ﻗﯩﻠﯩﭗ، ﺋﯚﺯﯨﻨﯩﯔ ﻣﯧﻠﯩﻐﺎ ﺋﺎﻳﻼﻧﺪﯗﺭﯗﭖ ﺋﯩﻘﺘﯩﺴﺎﺩ ﺗﻮﭘﻼﺵ ﻗﯩﻠﻤﯩﺸﻰ ﻫﯧﭻ ﺋﯚﺯﮔﻪﺭﮔﯩﻨﻰ ﻳﻮﻕ. ﺧﯩﺘﺎﻱ ﻫﯚﻛﯜﻣﻪﺕ ﺭﻩﻫﺒﻪﺭﻟﯩﺮﻯ ﻫﻪﺭ ﻗﯧﺘﯩﻢ ﻏﻪﺭﺏ ﺭﻩﻫﺒﻪﺭﻟﯩﺮﻯ ﺑﯩﻠﻪﻥ ﻛﯚﺭﯛﺷﻜﻪﻧﺪﻩ، ﺧﯩﺘﺎﻳﺪﯨﻜﻰ ﺗﻪﻗﻠﯩﺪﭼﯩﻠﯩﻚ ﻗﯩﻠﻤﯩﺸﯩﻐﺎ ﭼﻪﻙ ﻗﻮﻳﯘﺩﯨﻐﺎﻧﻠﯩﻘﻰ ﺗﻮﻏﺮﯗﻟﯘﻕ ﯞﻩﺩﻩ ﺑﯧﺮﯨﭗ ﻛﻪﻟﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﻏﻪﺭﺏ ﺩﯗﻧﻴﺎﺳﻰ ﺧﯩﺘﺎﻳﺪﺍ ﺋﺎﺯﺭﺍﻕ ﺑﯩﺮ ﺋﯚﺯﮔﯩﺮﯨﺸﻨﯩﯔ ﯞﯗﺟﯘﺩﻗﺎ ﭼﯩﻘﻘﺎﻧﻠﯩﻘﯩﻨﻰ ﻛﯚﺯﮔﻪ ﭼﯧﻠﯩﻘﺘﯘﺭﺍﻟﻤﯩﻐﺎﻥ. ﺧﯩﺘﺎﻳﻨﯩﯔ ﯞﻩﺩﯨﻠﯩﺮﻯ ﺩﺍﯞﺍﻣﻠﯩﻖ ﯞﻩﺩﻩ ﭘﯧﺘﯩﭽﻪ ﻗﺎﻟﻐﺎﻥ.

ﺧﯩﺘﺎﻱ ﺋﯩﻘﺘﯩﺴﺎﺩﺷﯘﻧﺎﺳﻠﯩﺮﻯ ﺧﯩﺘﺎﻳﺪﯨﻜﻰ ﺑﯘ ﺧﯩﻞ ﺗﻪﻗﻠﯩﺪﭼﯩﻠﯩﻜﻨﻰ ﺗﻪﺭﻩﻗﻘﯩﻴﺎﺕ ﺑﺎﺳﻘﯘﭼﯩﺪﺍ ﺗﯘﺭﯨﯟﺍﺗﻘﺎﻥ ﺩﯙﻟﻪﺗﻠﻪﺭ ﻣﯘﻗﻪﺭﺭﻩﺭ ﺭﻩﯞﯨﺸﺘﻪ ﺑﺎﺳﯩﺪﯨﻐﺎﻥ ﻳﻮﻝ، ﺩﻩﭖ ﻗﺎﺭﺍﭖ، ﺗﺎﺭﯨﺨﺘﯩﻦ ﻣﯩﺴﺎﻟﻼﺭ ﺋﯧﻠﯩﺶ ﺑﯩﻠﻪﻥ ﺋﯚﺯﯨﻨﻰ ﺋﺎﻗﻼﺷﻘﺎ ﺋﯘﺭﯨﻨﯩﯟﺍﺗﻘﺎﻥ ﺑﻮﻟﺴﯩﻤﯘ، ﻏﻪﺭﺏ ﺳﻮﺩﺍ - ﺳﺎﻧﺎﺋﻪﺕ ﺋﻮﺭﮔﺎﻧﻠﯩﺮﻯ ﺋﯚﺯ ﺩﯙﻟﻪﺕ ﻫﯚﻛﯜﻣﻪﺗﻠﯩﺮﯨﮕﻪ ﯞﻩ ﺧﻪﻟﻘﺌﺎﺭﺍ ﺳﻮﺩﺍ ﺗﻪﺷﻜﯩﻼﺗﯩﻐﺎ ﺧﯩﺘﺎﻳﻨﻰ ﭼﻪﻛﻠﻪﺵ ﻫﻪﻗﻘﯩﺪﯨﻜﻰ ﺑﯧﺴﯩﻤﻠﯩﺮﯨﻨﻰ ﻛﯜﭼﻪﻳﺘﻤﻪﻛﺘﻪ. ﻳﺎﯞﺭﯗﭘﺎ ﺑﯩﺮﻟﯩﻜﯩﻨﯩﯔ ﺳﻮﺩﺍ ﻛﻮﻣﯩﺘﯧﺘﯩﻤﯘ ﺑﯘ ﻣﻪﺳﯩﻠﻪ ﻫﻪﻗﻘﯩﺪﻩ ﺟﯩﺪﺩﯨﻲ ﺑﺎﺵ ﻗﺎﺗﯘﺭﻣﺎﻗﺘﺎ. ( ﺋﻪﻛﺮﻩﻡ)