ﺧﯩﺘﺎﻳﻨﯩﯔ ﮔﯧﺮﻣﺎﻧﯩﻴﻪ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺷﻜﻪ ﺋﺎﻟﺪﯨﺮﯨﺸﯩﺪﯨﻜﻰ ﺳﻪﯞﻩﺑﻠﻪﺭ

• ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

22 - ﻳﺎﻧﯟﺍﺭ ﻛﯜﻧﻰ ﮔﯧﺮﻣﺎﻧﯩﻴﻪ ﺑﯩﻠﻪﻥ ﺧﯩﺘﺎﻳﻨﯩﯔ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﺮﻯ ﺑﯧﺮﻟﯩﻨﺪﺍ ﺳﯚﻫﺒﻪﺕ ﺋﯚﺗﻜﯜﺯﯛﭖ، ﺗﯚﺕ ﺋﺎﻳﺪﯨﻦ ﺋﺎﺭﺗﯘﻕ ﺩﺍﯞﺍﻡ ﻗﯩﻠﻐﺎﻥ ﺧﯩﺘﺎﻱ - ﮔﯧﺮﻣﺎﻧﯩﻴﻪ ﻣﯘﻧﺎﺳﯩﯟﻩﺗﻠﯩﺮﯨﺪﯨﻜﻰ ﺳﯜﺭﻛﯩﻠﯩﺸﻜﻪ ﺧﺎﺗﯩﻤﻪ ﺑﯧﺮﯨﻠﮕﻪﻧﻠﯩﻜﯩﻨﻰ ﺟﺎﻛﺎﺭﻟﯩﻐﺎﻧﺪﯨﻦ ﻛﯧﻴﯩﻦ، ﮔﯧﺮﻣﺎﻧﯩﻴﻪ ﯞﻩ ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﺪﺍ ﺋﯩﻜﻜﻰ ﺩﯙﻟﻪﺕ ﻣﯘﻧﺎﺳﯩﯟﯨﺘﯩﻨﯩﯔ ﺋﻪﺳﻠﯩﮕﻪ ﻛﯧﻠﯩﺸﯩﮕﻪ ﺳﻪﯞﻩﺏ ﺑﻮﻟﻐﺎﻥ ﺋﺎﻣﯩﻠﻼﺭ ﻫﻪﻗﻘﯩﺪﻩ ﺑﻪﺱ - ﻣﯘﻧﺎﺯﯨﺮﯨﻠﻪﺭ ﻗﺎﻧﺎﺕ ﻳﺎﻳﺪﻯ. ﻣﻪﻟﯘﻣﻜﻰ، ﺋﯩﻜﻜﻰ ﺩﯙﻟﻪﺕ ﺋﺎﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺗﻨﯩﯔ ﺑﯘﺯﯗﻟﯘﺷﯩﻐﺎ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﻰ ﺳﻪﯞﻩﺏ ﺑﻮﻟﻐﺎﻥ ﺋﯩﺪﻯ.

ﺑﯜﮔﯜﻥ ﺑﯘ ﻣﯘﻧﺎﺳﯩﯟﻩﺗﻨﯩﯔ ﺋﻪﺳﻠﯩﮕﻪ ﻛﯧﻠﯩﺸﯩﮕﻪ ﺋﯩﻘﺘﯩﺴﺎﺩﻯ ﻣﻪﻧﭙﻪﺋﻪﺗﯩﻨﯩﯔ ﺳﻪﯞﻩﺏ ﺑﻮﻟﻐﺎﻧﻠﯩﻘﻰ ﻫﻪﻣﻤﯩﮕﻪ ﺋﺎﻳﺎﻥ. ﺷﯘﻧﺪﺍﻕ ﺑﻮﻟﺴﯩﻤﯘ، ﺧﯩﺘﺎﻱ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﻯ ﺑﯩﻠﻪﻥ ﮔﯧﺮﻣﺎﻧﯩﻴﻪ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﻯ ﺑﯘ ﻣﻪﺳﯩﻠﯩﺪﻩ ﺑﯩﺮ ‏- ﺑﯩﺮﯨﮕﻪ ﺗﯜﭘﺘﯩﻦ ﺋﻮﺧﺸﯩﻤﺎﻳﺪﯨﻐﺎﻥ ﻗﺎﺭﺍﺷﻼﺭﻧﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﻤﺎﻗﺘﺎ.

ﺋﺎﻧﮕﯧﻼ ﻣﯧﺮﻛﯧﻞ ﺧﺎﻧﯩﻢ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ ﺧﯩﺘﺎﻱ ﺋﯜﺳﺘﯩﺪﯨﻦ ﻏﻪﻟﯩﺒﻪ ﻗﯩﻠﺪﻯ

ﺧﯩﺘﺎﻱ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﻯ ﮔﯧﺮﻣﺎﻧﯩﻴﻪ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﺳﺘﻪﺋﯩﻦ ﻣﻪﺋﯩﺮ ﺋﻪﭘﻪﻧﺪﯨﻨﯩﯔ "ﺑﯩﺮ ﺟﯘﯕﮕﻮ ﺳﯩﻴﺎﺳﯩﺘﻰ"ﮔﻪ ﻫﯚﺭﻣﻪﺕ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻧﻠﯩﻜﯩﻨﻰ، ﺋﯩﻜﻜﻰ ﺩﯙﻟﻪﺕ ﻣﯘﻧﺎﺳﯩﯟﯨﺘﯩﺪﯨﻜﻰ ﺳﻮﻏﯘﻗﭽﯩﻠﯩﻘﻘﺎ ﺧﺎﺗﯩﻤﻪ ﺑﻪﺭﮔﻪﻥ ﺋﺎﺳﺎﺳﯩﻲ ﺋﺎﻣﯩﻞ ﻗﯩﻠﯩﭗ ﻛﯚﺭﺳﻪﺗﻤﻪﻛﺘﻪ ﻫﻪﻣﺪﻩ 2007 - ﻳﯩﻠﻰ 9 - ﺋﺎﻳﺪﺍ ﺩﺍﻻﻱ ﻻﻣﺎﻧﻰ ﻣﯩﻨﯩﺴﺘﯩﺮﻻﺭ ﻣﻪﻫﻜﯩﻤﯩﺴﯩﺪﻩ ﻗﻮﺑﯘﻝ ﻗﯩﻠﯩﭗ، ﺧﯩﺘﺎﻳﻨﯩﯔ ﺗﯩﺒﻪﺕ ﺳﯩﻴﺎﺳﯩﺘﯩﻨﯩﯔ ﻳﺎﯞﺭﻭﭘﺎﺩﺍ ﻣﻪﻏﻠﯘﺑﯩﻴﻪﺗﻜﻪ ﺋﯘﭼﺮﯨﺸﯩﻐﺎ ﺳﻪﯞﻩﺑﭽﻰ ﺑﻮﻟﻐﺎﻥ ﺋﺎﻧﮕﯧﻼ ﻣﯧﺮﻛﯧﻞ ﻫﯚﻛﯜﻣﯩﺘﯩﻨﻰ ﮔﻮﻳﺎ ﺧﯩﺘﺎﻳﻐﺎ ﻧﺎﻣﺎﻗﯘﻝ ﺑﻮﻟﻐﺎﻧﺪﻩﻙ ﻫﺎﻟﻪﺗﺘﻪ ﺗﻪﺷﯟﯨﻖ ﻗﯩﻠﯩﺸﻘﺎ ﺗﯩﺮﯨﺸﻤﺎﻗﺘﺎ. ﺋﻪﻛﺴﯩﭽﻪ، ﮔﯧﺮﻣﺎﻧﯩﻴﯩﺪﯨﻜﻰ ﺳﯩﻴﺎﺳﯩﻲ ﺋﺎﻧﺎﻟﯩﺰﭼﯩﻼﺭﻧﯩﯔ ﻗﺎﺭﺍﺷﻠﯩﺮﻯ ﺑﺎﺷﻘﯩﭽﻪ ﺑﻮﻟﯘﭖ، ﺋﯘﻻﺭ ﮔﯧﺮﻣﺎﻧﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺋﺎﻧﮕﯧﻼ ﻣﯧﺮﻛﯧﻞ ﺧﺎﻧﯩﻤﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ ﺧﯩﺘﺎﻱ ﺋﯜﺳﺘﯩﺪﯨﻦ ﻏﻪﻟﯩﺒﻪ ﻗﯩﻠﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﻤﺎﻗﺘﺎ.

ﮔﯧﺮﻣﺎﻧﯩﻴﯩﺪﻩ ﻧﻪﺷﺮﺩﯨﻦ ﭼﯩﻘﯩﺪﯨﻐﺎﻥ "ﻣﺎﻧﺨﻪﺋﯩﻢ ﺳﻪﻫﻪﺭﻟﯩﻚ ﮔﯧﺰﯨﺘﻰ"، "ﻣﻪﺟﻤﯘﺋﻪ ﮔﯧﺰﯨﺘﻰ"، "ﻧﯜﺭﻧﺒﯧﺮﮒ ﮔﯧﺰﯨﺘﻰ" ﯞﻩ "ﺩﯗﻧﻴﺎ" ﮔﯧﺰﯨﺘﻠﯩﺮﯨﺪﻩ ﺑﯩﺮ ﻗﺎﻧﭽﻪ ﻛﯜﻧﺪﯨﻦ ﺑﯘﻳﺎﻥ ﺋﯧﻼﻥ ﻗﯩﻠﯩﻨﯩﯟﺍﺗﻘﺎﻥ ﻣﯘﻻﻫﯩﺰﯨﻠﻪﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻱ ﺗﻪﺭﻩﭘﻨﯩﯔ ﮔﯧﺮﻣﺎﻧﯩﻴﻪ - ﺧﯩﺘﺎﻱ ﻣﯘﻧﺎﺳﯩﯟﻩﺗﻠﯩﺮﯨﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﺋﯜﭼﯜﻥ ﮔﯧﺮﻣﺎﻧﯩﻴﯩﮕﻪ ﺯﻭﺭ ﺩﻩﺭﯨﺠﯩﺪﻩ ﻳﻮﻝ ﻗﻮﻳﯘﺷﻘﺎ ﻣﻪﺟﺒﯘﺭ ﺑﻮﻟﻐﺎﻧﻠﯩﻘﻰ ﺗﯩﻠﻐﺎ ﺋﯧﻠﯩﻨﻤﺎﻗﺘﺎ.

ﺩ ﺋﯘ ﻕ ﻧﯩﯔ ﺑﺎﺵ ﻛﺎﺗﯩﭙﻰ، ﻳﺎﯞﺭﯗﭘﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺑﯩﺮﻟﯩﻜﻰ ﺗﻪﺷﻜﯩﻼﺗﯩﻨﯩﯔ ﺭﻩﺋﯩﺴﻰ ﺩﻭﻟﻘﯘﻥ ﺋﻪﻳﺴﺎ ﺋﻪﭘﻪﻧﺪﻯ، ﺧﯩﺘﺎﻳﻨﯩﯔ ﺋﯩﻜﻜﻰ ﺩﯙﻟﻪﺕ ﻣﯘﻧﺎﺳﯩﯟﯨﺘﯩﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺷﻜﻪ ﺋﺎﻟﺪﯨﺮﯨﺸﯩﻐﺎ ﺗﯩﺒﻪﺕ ﯞﻩ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﯩﻨﯩﯔ ﺋﺎﺳﺎﺳﯩﻲ ﺳﻪﯞﻩﺏ ﺑﻮﻟﻐﺎﻧﻠﯩﻘﯩﻨﻰ ﺗﯩﻠﻐﺎ ﺋﺎﻟﺪﻯ.

ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﻰ ﮔﯧﺮﻣﺎﻧﯩﻴﻪ ﺗﺎﺷﻘﻰ ﺳﯩﻴﺎﺳﯩﺘﯩﻨﯩﯔ ﻳﺎﺩﺭﻭﺳﻰ

ﺩﯨﻘﻘﻪﺗﻨﻰ ﭼﯧﻜﯩﺪﯨﻐﯩﻨﻰ ﺷﯘﻛﻰ، 22 - ﻳﺎﻧﯟﺍﺭ ﺋﯩﻜﻜﻰ ﺩﯙﻟﻪﺕ ﻣﯘﻧﺎﺳﯩﯟﯨﺘﯩﻨﯩﯔ ﺋﻪﺳﻠﯩﮕﻪ ﻛﻪﻟﮕﻪﻧﻠﯩﻜﻰ ﺟﺎﻛﺎﺭﻟﯩﻨﯩﺶ ﺑﯩﻠﻪﻥ ﺗﻪﯕﻼ، ﺋﯩﻘﺘﯩﺪﺍﺭﺩﯨﻜﻰ ﻫﯚﻛﯜﻣﻪﺗﻨﯩﯔ ﺑﺎﻳﺎﻧﺎﺗﭽﯩﺴﻰ ﻛﻼﺋﯧﺪﯦﻦ ﺋﻪﭘﻪﻧﺪﻯ 23 - ﻳﺎﻧﯟﺍﺭ ﻛﯜﻧﻰ "ﻛﯚﻟﯩﻦ ﻳﯧﺘﻪﻛﭽﻰ ﮔﯧﺰﯨﺘﻰ"ﺩﻩ ﺩﻩﺭﻫﺎﻝ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، "ﺧﯩﺘﺎﻳﻼﺭﻧﯩﯔ ﺋﯩﭙﺎﺩﯨﺴﻰ، ﮔﯧﺮﻣﺎﻧﯩﻴﻪ ﺑﺎﺵ ﻣﯩﻨﯩﺴﺘﯩﺮﯨﻨﯩﯔ ﻫﻪﻗﻠﯩﻖ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ" ﺩﯦﮕﻪﻥ ﻫﻪﻣﺪﻩ "ﺑﯩﺰ ﺧﯩﺘﺎﻱ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﺘﻪ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﻨﻰ ﺋﯩﺰﭼﯩﻞ ﺗﻪﻛﯩﺘﻠﻪﻳﻤﯩﺰ، ﺑﯘ ﺑﯩﺰﻧﯩﯔ ﺗﺎﺷﻘﻰ ﺳﯩﻴﺎﺳﯩﺘﯩﻤﯩﺰﻧﯩﯔ ﻳﺎﺩﺭﻭﺳﻰ" ﺩﻩﭖ ﺧﯩﺘﺎﭖ ﻗﯩﻠﻐﺎﻥ.

ﮔﯧﺮﻣﺎﻧﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺋﺎﻧﮕﯧﻼ ﻣﯧﺮﻛﯧﻞ ﺧﺎﻧﯩﻢ ﺑﻮﻟﺴﺎ، ﺋﯚﺯﯨﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﻣﻪﻳﺪﺍﻧﯩﺪﺍ ﺗﻪﯞﺭﯨﻨﯩﺶ ﺑﻮﻟﻐﺎﻧﻠﯩﻘﻰ ﻳﺎﻛﻰ ﺧﯩﺘﺎﻳﺪﯨﻦ ﺋﻪﭘﯘ ﺳﻮﺭﺍﻳﺪﯨﻐﺎﻧﻠﯩﻘﯩﻐﺎ ﺋﺎﺋﯩﺖ ﻫﯧﭽﻘﺎﻧﺪﺍﻕ ﺑﯩﺮ ﺋﯩﭙﺎﺩﯨﻨﯩﯔ ﺑﯩﺸﺎﺭﯨﺘﯩﻨﻰ ﻛﯚﺭﺳﻪﺗﻤﯩﮕﻪﻥ. ﺋﯘﻧﯩﯔ ﺋﯜﺳﺘﯩﮕﻪ، ﮔﯧﺮﻣﺎﻧﯩﻴﯩﻨﯩﯔ ﺗﯧﺨﻰ ﺋﯩﻜﻜﻰ ﺋﺎﻱ ﺋﯩﻠﮕﯩﺮﯨﻼ ﺗﯜﺯﯛﻟﮕﻪﻥ"ﻳﯧﯖﻰ ﺋﺎﺳﯩﻴﺎ ﺋﯩﺴﺘﺮﺍﺗﯧﮕﯩﻴﯩﺴﻰ"ﺩﻩ ﺗﯩﻠﻐﺎ ﺋﯧﻠﯩﻨﻐﺎﻥ "ﺧﯩﺘﺎﻳﻐﺎ ﭘﻪﺭﻗﻠﯩﻖ ﻣﯘﺋﺎﻣﯩﻠﻪ ﻗﯩﻠﯩﺶ" ﺩﯦﮕﻪﻧﺪﻩﻙ ﻣﺎﺩﺩﯨﻼﺭﺩﺍ ﻫﯧﭽﻘﺎﻧﺪﺍﻕ ﺋﯚﺯﮔﯩﺮﯨﺶ ﺑﻮﻟﻤﯩﻐﺎﻥ. (ﺋﻪﻛﺮﻩﻡ)