ﺩﯗﻧﻴﺎ ﺑﺎﻧﻜﯩﺴﻰ ﺧﯩﺘﺎﻳﻨﻰ ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﻛﯜﭼﯩﻨﻰ ﻛﯧﯖﻪﻳﺘﯩﺸﻜﻪ ﺋﯜﻧﺪﯨﻤﻪﻛﺘﻪ

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﺩﯗﻧﻴﺎ ﺑﺎﻧﻜﯩﺴﻰ ﻳﯧﻘﯩﻨﺪﺍ ﻣﻪﺧﺴﯘﺱ ﺩﻭﻛﻼﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﻛﯜﭼﯩﻨﻰ ﻛﯧﯖﻪﻳﺘﯩﺶ ﺋﺎﺭﻗﯩﻠﯩﻖ، ﺋﯩﻘﺘﯩﺴﺎﺩﻧﯩﯔ ﺗﻪﺭﻩﻗﻘﻰ ﻗﯩﻠﯩﺸﻰ ﺟﻪﺭﻳﺎﻧﯩﺪﺍ ﻳﯜﺯ ﺑﯧﺮﯨﯟﺍﺗﻘﺎﻥ ﺗﻪﯕﭙﯘﯕﺴﯩﺰﻟﯩﻘﻨﯩﯔ ﺋﺎﻟﺪﯨﻨﻰ ﺋﯧﻠﯩﺸﻘﺎ ﺋﯜﻧﺪﯨﺪﻯ. ﺩﻭﻛﻼﺗﺘﺎ: ‏"ﻫﺎﺯﯨﺮ ﺧﯩﺘﺎﻱ ﺋﯜﭼﯜﻥ ﺋﻪﯓ ﻣﯘﻫﯩﻢ ﺑﻮﻟﻐﺎﻥ ﻣﻪﺳﯩﻠﻪ، ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﻛﯜﭼﯩﻨﻰ ﻛﯧﯖﻪﻳﺘﯩﺶ ﺋﯩﻜﻪﻥ. ﺑﯘﻧﺪﺍﻕ ﻗﯩﻠﯩﺶ ﺧﯩﺘﺎﻱ ﺋﯩﻘﺘﯩﺴﺎﺩﯨﻨﯩﯔ ﺳﺎﻏﻼﻡ ﺗﻪﺭﻩﻗﻘﯩﻲ ﻗﯩﻠﯩﺸﯩﺪﺍ ﻧﺎﻫﺎﻳﯩﺘﻰ ﻣﯘﻫﯩﻢ ﺭﻭﻝ ﺋﻮﻳﻨﺎﻳﺪﯗ ﻳﻪﻧﻰ ﻣﻪﺑﻠﻪﻍ ﺳﯧﻠﯩﺸﻨﻰ ﭼﻪﻛﻠﻪﺷﺘﯩﻨﻤﯘ ﺑﻪﻛﺮﻩﻙ ﻣﯘﻫﯩﻢ ﺋﻮﺭﯗﻧﺪﺍ ﺗﯘﺭﯨﺪﯗ" ﺩﻩﭖ ﻛﯚﺭﺳﯩﺘﯩﻠﮕﻪﻥ.

ﺧﯩﺘﺎﻱ ﺋﯩﺠﺘﯩﻤﺎﺋﯩﻲ ﻛﺎﭘﺎﻟﻪﺗﻜﻪ ﻛﯚﭘﻠﻪﭖ ﻣﻪﺑﻠﻪﻍ ﺳﯧﻠﯩﺸﻰ ﻛﯧﺮﻩﻙ

ﺩﯗﻧﻴﺎ ﺑﺎﻧﻜﯩﺴﻰ ﺋﯧﻼﻥ ﻗﯩﻠﻐﺎﻥ ﺑﯘ ﺩﻭﻛﻼﺗﺘﺎ ﻳﻪﻧﻪ "ﺧﯩﺘﺎﻱ ﻫﯚﻛﯜﻣﯩﺘﻰ ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻛﯜﭼﯩﻨﻰ ﻛﯧﯖﻪﻳﺘﯩﺸﺘﻪ، ﺋﺎﻟﺪﻯ ﺑﯩﻠﻪﻥ ﻣﺎﺋﺎﺭﯨﭗ، ﺳﻪﻫﯩﻴﻪ ﯞﻩ ﺋﯩﺠﺘﯩﻤﺎﺋﯩﻲ ﻛﺎﭘﺎﻟﻪﺕ ﺋﯩﺸﻠﯩﺮﯨﻐﺎ ﺋﺎﺟﺮﯨﺘﯩﺪﯨﻐﺎﻥ ﭼﯩﻘﯩﻤﻨﻰ ﺋﺎﺷﯘﺭﯗﺷﻰ ﻛﯧﺮﻩﻙ. ﻣﯘﺷﯘﻧﺪﺍﻕ ﻗﯩﻠﻐﺎﻧﺪﯨﻼ ﻫﺎﺯﯨﺮ ﺧﯩﺘﺎﻳﺪﺍ ﻣﻪﯞﺟﯘﺕ ﺑﻮﻟﯘﭖ ﺗﯘﺭﯗﯞﺍﺗﻘﺎﻥ ﺳﻮﺩﯨﺪﯨﻜﻰ ﭘﻪﺭﻗﻨﯩﯔ ﻫﻪﺩﯨﺪﯨﻦ ﺯﯨﻴﺎﺩﻩ ﭼﻮﯕﯩﻴﯩﭗ ﻛﯧﺘﯩﺸﯩﻨﯩﯔ ﺋﺎﻟﺪﯨﻨﻰ ﺋﺎﻟﻐﯩﻠﻰ ﺑﻮﻟﯩﺪﯗ، ﺷﯘﻧﺪﺍﻗﻼ ﺗﺎﺷﻘﻰ ﻣﻪﺑﻠﻪﻏﻨﯩﯔ ﺗﯧﺰ ﺋﯧﺸﯩﺸﻰ ﻧﻪﺗﯩﺠﯩﺴﯩﺪﻩ ﻛﯧﻠﯩﭗ ﭼﯩﻘﻘﺎﻥ ﺧﯩﺘﺎﻱ ﭘﯘﻟﻰ ﻗﯩﻤﻤﯩﺘﻰ ﻣﻪﺳﯩﻠﯩﺴﯩﻨﻰ ﺗﻮﻏﺮﺍ ﺑﯩﺮ ﺗﻪﺭﻩﭖ ﻗﯩﻠﻐﯩﻠﻰ ﺑﻮﻟﯩﺪﯗ" ﺩﻩﭖ ﺗﻪﻛﯩﺘﻠﻪﻧﮕﻪﻥ ﺑﻮﻟﯘﭖ، "ﻫﺎﺯﯨﺮ ﺧﯩﺘﺎﻳﺪﯨﻜﻰ ﺋﺎﻣﺎﻧﻪﺕ ﭘﯘﻝ ﻧﯩﺴﺒﯩﺘﯩﻨﯩﯔ 40% ﻛﻪ ﻳﻪﺗﻜﻪﻧﻠﯩﻜﻰ ﺧﯩﺘﺎﻱ ﺋﯩﭽﻜﻰ ﺋﯧﻬﺘﯩﻴﺎﺟﯩﻨﯩﯔ ﻛﯚﺗﯜﺭﯨﻠﻪﻟﻤﻪﻳﯟﺍﺗﻘﺎﻧﻠﯩﻘﯩﻐﺎ ﺳﻪﯞﻩﺑﭽﻰ ﺑﻮﻟﻐﺎﻥ. ﺷﯘﯕﺎ ﺧﯩﺘﺎﻱ ﻫﯚﻛﯜﻣﯩﺘﻰ ﭼﻮﻗﯘﻡ ﺋﯩﺠﺘﯩﻤﺎﺋﯩﻲ ﻛﺎﭘﺎﻟﻪﺗﻜﻪ ﻛﯚﭘﻠﻪﭖ ﻣﻪﺑﻠﻪﻍ ﺳﯧﻠﯩﭗ، ﺗﯧﺨﯩﻤﯘ ﻛﯚﭘﻠﯩﮕﻪﻥ ﻛﯩﺸﯩﻠﻪﺭﻧﻰ ﺋﯩﺴﺘﯧﻤﺎﻝ ﻗﯩﻠﯩﺸﻘﺎ ﭼﺎﻗﯩﺮﯨﺸﻰ ﻛﯧﺮﻩﻙ" ﺩﻩﭖ ﻛﯚﺭﺳﯩﺘﯩﻠﮕﻪﻥ.

ﺋﺎﻣﯧﺮﯨﻜﯩﻨﯩﯔ ﯞﺍﺷﯩﻨﮕﺘﻮﻥ ﺷﻪﻫﯩﺮﯨﺪﻩ ﺗﯘﺭﯗﺷﻠﯘﻕ ﺋﯩﻘﺘﯩﺴﺎﺩﺷﯘﻧﺎﺱ ﺩﻭﻛﺘﻮﺭ ﺩﯨﯔ ﻟﻰ ﺋﻪﭘﻪﻧﺪﻯ "ﺧﯩﺘﺎﻳﻨﯩﯔ ﺋﯩﺠﺘﯩﻤﺎﺋﯩﻲ ﻛﺎﭘﺎﻟﻪﺕ ﻣﻪﺳﯩﻠﯩﺴﯩﺪﻩ ﻧﺎﻫﺎﻳﯩﺘﻰ ﺗﯚﯞﻩﻥ ﺳﻪﯞﯨﻴﯩﺪﻩ ﺑﻮﻟﯘﯞﺍﺗﻘﺎﻧﻠﯩﻘﻰ ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺸﻨﯩﯔ ﭼﻪﻛﻠﯩﻤﯩﻠﻪﺭﮔﻪ ﺩﯗﭺ ﻛﯧﻠﯩﺸﯩﻨﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ. ﺷﯘﯕﺎ ﻣﻪﻧﭽﻪ ﺩﯗﻧﻴﺎ ﺑﺎﻧﻜﯩﺴﻰ ﺋﯧﻼﻥ ﻗﯩﻠﻐﺎﻥ ﺑﯘ ﺩﻭﻛﻼﺗﺘﺎ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﭘﯩﻜﯩﺮﻟﻪﺭ ﻧﺎﻫﺎﻳﯩﺘﻰ ﻳﻮﻟﻠﯘﻕ" ﺩﻩﭖ ﺑﯩﻠﺪﯛﺭﺩﻯ:

"ﺩﯗﻧﻴﺎ ﺑﺎﻧﻜﯩﺴﯩﻨﯩﯔ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺑﯘ ﭘﯩﻜﯩﺮﻟﯩﺮﻯ ﻫﻪﻗﯩﻘﻪﺗﻪﻥ ﻧﺎﻫﺎﻳﯩﺘﻰ ﻳﻮﻟﻠﯘﻕ. ﺋﯩﺴﺘﯧﻤﺎﻝ ﻗﯩﻠﯩﺶ، ﺑﻮﻟﯘﭘﻤﯘ ﭘﯘﻗﺮﺍﻻﺭﻧﯩﯔ ﺋﯩﺴﺘﯧﻤﺎﻝ ﻗﯩﻠﯩﺸﻰ ﺑﯩﺮ ﺩﯙﻟﻪﺗﻨﯩﯔ ﺋﯩﻘﺘﯩﺴﺎﺩﯨﺪﺍ ﻧﺎﻫﺎﻳﯩﺘﻰ ﺯﻭﺭ ﺭﻭﻝ ﺋﻮﻳﻨﺎﻳﺪﯗ. ﻣﻪﺳﯩﻠﻪﻥ، ﻫﺎﺯﯨﺮ ﺧﯩﺘﺎﻳﺪﺍ، ﺋﺎﺩﻩﺗﺘﯩﻜﻰ ﭘﯘﻗﺮﺍﻻﺭ ﺋﯜﭼﯜﻥ ﻣﻪﻳﻠﻰ ﻣﺎﺋﺎﺭﯨﭗ ﺟﻪﻫﻪﺗﺘﯩﻜﻰ ﭼﯩﻘﯩﻢ ﺑﻮﻟﺴﯘﻥ ﻳﺎﻛﻰ ﺩﺍﯞﺍﻟﯩﻨﯩﺶ ﺟﻪﻫﻪﺗﺘﯩﻜﻰ ﭼﯩﻘﯩﻢ ﺑﻮﻟﺴﯘﻥ ﻧﺎﻫﺎﻳﯩﺘﻰ ﺋﯧﻐﯩﺮ ﻛﻪﻟﻤﻪﻛﺘﻪ. ﺷﯘﯕﺎ ﺋﯘﻻﺭ ﺋﯩﻼﺟﻰ ﺑﺎﺭ ﺋﺎﺯﺭﺍﻗﻼ ﭘﯘﻟﻰ ﺑﻮﻟﺴﺎ ﺑﺎﻧﻜﯩﻐﺎ ﺋﺎﻣﺎﻧﻪﺗﻜﻪ ﻗﻮﻳﯘﺷﻨﯩﻼ ﺋﻮﻳﻼﻳﺪﯗ. ﺋﻪﮔﻪﺭ ﻫﯚﻛﯜﻣﻪﺕ ﺋﯩﺠﺘﯩﻤﺎﺋﯩﻲ ﻛﺎﭘﺎﻟﻪﺕ ﺋﯜﭼﯜﻥ، ﺋﯘﻻﺭﻏﺎ ﺋﺎﺯ-ﺗﻮﻻ ﻳﺎﺭﺩﻩﻡ ﭘﯘﻟﻰ ﺑﯧﺮﻩﻟﯩﮕﻪﻥ ﺑﻮﻟﺴﺎ، ﭘﯘﻗﺮﺍﻻﺭﻧﯩﯔ ﻛﯚﭘﻠﻪﭖ ﺋﯩﺴﺘﯧﻤﺎﻝ ﻗﯩﻠﯩﺸﯩﻐﺎ ﺑﻪﻛﻤﯘ ﭘﺎﻳﺪﯨﻠﯩﻖ ﺑﻮﻻﺗﺘﻰ".

ﺧﯩﺘﺎﻱ ﺋﯩﻘﺘﯩﺴﺎﺩﯨﻨﯩﯔ ﺗﻪﺭﻩﻗﻘﻰ ﻗﯩﻠﯩﺸﻰ ﺋﯧﻜﺴﭙﻮﺭﺗﻘﺎ ﺗﺎﻳﯩﻨﯩﭗ ﻗﺎﻟﻐﺎﻥ

ﺋﯩﻘﺘﯩﺴﺎﺩﺷﯘﻧﺎﺱ ﺩﯨﯔ ﻟﻰ ﺋﻪﭘﻪﻧﺪﻯ ﺳﯚﻫﺒﻪﺕ ﺟﻪﺭﻳﺎﻧﯩﺪﺍ ﻳﻪﻧﻪ "ﻫﺎﺯﯨﺮ ﺧﯩﺘﺎﻱ ﺋﯩﻘﺘﯩﺴﺎﺩﯨﻨﯩﯔ ﺗﻪﺭﻩﻗﻘﻰ ﻗﯩﻠﯩﺸﻰ ﭘﻪﻗﻪﺕ ﺋﯧﺨﭙﻮﺭﺕ ﻗﯩﻠﯩﺶ ﯞﻩ ﻣﻪﺑﻠﻪﻍ ﺳﯧﻠﯩﺶ ﺑﯩﻠﻪﻧﻼ ﭼﻪﻛﻠﯩﻨﯩﭗ ﻗﺎﻟﻐﺎﻥ. ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﺳﻪﯞﯨﻴﯩﺴﻰ ﺑﻪﻛﻤﯘ ﺗﯚﯞﻩﻥ ﺑﻮﻟﻤﺎﻗﺘﺎ. ﺋﺎﺩﻩﺗﺘﻪ ﻛﯩﭽﯩﻚ ﺩﯙﻟﻪﺗﻠﻪﺭﻧﯩﯔ ﺋﯧﻜﺴﭙﻮﺭﺗﻘﺎ ﺗﺎﻳﯩﻨﯩﺸﻰ ﻧﻮﺭﻣﺎﻝ ﺑﻮﻟﻐﯩﻨﻰ ﺑﯩﻠﻪﻥ، ﺧﯩﺘﺎﻳﺪﻩﻙ ﺑﯘﻧﺪﺍﻕ ﺑﯩﺮ ﭼﻮﯓ ﺩﯙﻟﻪﺗﻨﯩﯔ ﺋﯧﻜﺴﭙﻮﺭﺗﻘﺎ ﺗﺎﻳﯩﻨﯩﭗ ﻗﯧﻠﯩﺸﻰ ﺑﻪﻛﻤﯘ ﻧﻮﺭﻣﺎﻟﺴﯩﺰ ﺑﯩﺮ ﺋﻪﻫﯟﺍﻝ ﻫﻪﻣﺪﻩ ﺑﯘ ﺧﯩﻞ ﺋﯧﻜﯩﺴﭙﻮﺭﺕ ﻗﯩﻠﯩﺶ ﯞﻩ ﻣﻪﺑﻠﻪﻍ ﺳﯧﻠﯩﺶ ﺋﺎﺭﻗﯩﻠﯩﻖ ﺗﻪﺭﻩﻗﻘﻰ ﻗﯩﻠﯩﺶ ﻫﻪﺭﮔﯩﺰﻣﯘ ﺋﯘﺯﯗﻥ ﺩﺍﯞﺍﻣﻠﯩﺸﺎﻟﻤﺎﻳﺪﯗ" ﺩﻩﭖ ﺑﯩﻠﺪﯛﺭﮔﻪﻥ.

ﺩﻭﻛﺘﻮﺭ ﺩﯨﯔ ﻟﻰ ﺋﻪﭘﻪﻧﺪﻯ ﺳﯚﺯﯨﺪﻩ ﻳﻪﻧﻪ ﺋﺎﻣﯧﺮﯨﻜﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﻧﯩﺴﺒﯩﺘﻰ ﺑﯩﻠﻪﻥ ﺧﯩﺘﺎﻳﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﻧﯩﺴﺒﯩﺘﯩﻨﻰ ﺳﯧﻠﯩﺸﺘﯘﺭﯗﭖ ﻣﯘﻧﺪﺍﻕ ﺩﯦﺪﻯ:

"ﺧﯩﺘﺎﻳﺪﻩﻙ ﺑﯘﻧﺪﺍﻕ ﺑﯩﺮ ﭼﻮﯓ ﺩﯙﻟﻪﺗﻨﯩﯔ ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﺋﯩﺴﺘﯧﻤﺎﻝ ﻗﯩﻠﯩﺶ ﻧﯩﺴﺒﯩﺘﻰ ﺩﯙﻟﻪﺕ ﺋﯩﻘﺘﯩﺴﺎﺩﯨﺪﺍ ﻣﻪﻟﯘﻡ ﭘﯩﺮﺳﻪﻧﺘﻨﻰ ﺋﯩﮕﯩﻠﯩﺸﻰ ﻛﯧﺮﻩﻙ ﺋﯩﺪﻯ. ﻣﻪﺳﯩﻠﻪﻥ، ﺋﺎﻣﯧﺮﯨﻜﯩﻨﯩﯔ ﻫﻪﺭ ﻳﯩﻠﻰ ﺗﻪﺑﯩﺌﯩﻲ ﺋﯩﺴﺘﯧﻤﺎﻝ ﻗﯩﻠﯩﺶ ﻧﯩﺴﺒﯩﺘﻰ ﺩﯙﻟﻪﺕ ﺋﯩﺸﻠﻪﭘﭽﯩﻘﯩﺮﯨﺶ ﺋﻮﻣﯘﻣﯩﻲ ﻗﯩﻤﻤﯩﺘﯩﻨﯩﯔ 75% ﺋﻰ ﺋﻪﺗﺮﺍﭘﯩﺪﺍ ﺑﻮﻟﯩﺪﯗ، ﻟﯧﻜﯩﻦ ﺧﯩﺘﺎﻳﻨﯩﯔ ﺑﻮﻟﺴﺎ ﭘﻪﻗﻪﺕ 30% ﺋﻪﺗﺮﺍﭘﯩﺪﺍ ﺑﻮﻟﻤﺎﻗﺘﺎ. ﺧﯩﺘﺎﻳﻨﯩﯔ ﺑﯘ ﺧﯩﻞ ﺗﯚﯞﻩﻥ ﺩﻩﺭﯨﺠﯩﻠﯩﻚ ﺋﯩﺴﺘﯧﻤﺎﻝ ﻗﯩﻠﯩﺶ ﻧﯩﺴﺒﯩﺘﻰ ﺩﯙﻟﻪﺕ ﺋﯩﻘﺘﯩﺴﺎﺩﯨﻨﯩﯔ ﻧﻮﺭﻣﺎﻝ ﺗﻪﺭﻩﻗﻘﻰ ﻗﯩﻠﯩﺸﯩﻐﺎ ﺯﻭﺭ ﺗﻪﺳﯩﺮ ﻛﯚﺭﺳﯩﺘﯩﺪﯗ". (ﻣﯧﻬﺮﯨﺒﺎﻥ)