" ﯞﺍﻝ - ﻣﺎﺭﺕ ﺳﯩﺰﮔﻪ ﺧﯩﺘﺎﻳﺪﯨﻦ ﺋﯧﻠﯩﭗ ﻛﻪﻟﮕﻪﻥ ﺭﻭﺩﮊﯨﺴﺘﯩﯟﺍ"

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺭﻭﺩﮊﯨﺴﺘﯩﯟﺍ ﺑﺎﻳﺮﯨﻤﯩﻨﯩﯔ ﻳﯧﻘﯩﻨﻠﯩﺸﯩﺸﯩﻐﺎ ﺋﻪﮔﯩﺸﯩﭗ ﺋﺎﻣﯧﺮﯨﻜﯩﺪﺍ ﺑﯘ ﺑﺎﻳﺮﺍﻡ ﺋﯘﭼﯘﻥ ﺳﻮﺩﺍ ‏- ﺳﯧﺘﯩﻖ ﺋﯩﺸﻠﯩﺮﻯ ﺋﻪﯞﺟﯩﮕﻪ ﭼﯩﻘﯩﺸﻘﺎ ﺑﺎﺷﻠﯩﻐﺎﻥ ﺑﻮﻟﯘﭖ، ﺷﯘﻧﯩﯖﻐﺎ ﻣﺎﺱ ﻫﺎﻟﺪﺍ ﺋﺎﻣﯧﺮﯨﻜﯩﺪﯨﻜﻰ ﺳﻮﺩﺍ ﺑﺎﺯﺍﺭﻟﯩﺮﻯ ﻣﺎﻝ ﺑﺎﻫﺎﺳﯩﻨﻰ ﺗﯚﯞﻩﻥ ﭼﯜﺷﯜﺭﯛﭖ ﺑﺎﻳﺮﺍﻡ ﻣﻪﺯﮔﯩﻠﯩﺪﯨﻜﻰ ﺳﻮﺩﺍ ﭘﻪﻳﺘﯩﻨﻰ ﻛﯜﺗﯜﯞﯦﻠﯩﺸﻘﺎ ﺗﯩﺮﯨﺸﻤﺎﻗﺘﺎ. ﻫﺎﻟﺒﯘﻛﻰ، ﺑﻪﺯﻯ ﺳﻮﺩﺍ ﺑﺎﺯﺍﺭﻟﯩﺮﯨﺪﯨﻜﻰ ﺋﻪﺭﺯﺍﻥ ﺑﺎﻫﺎﻟﯩﻖ ﺭﻭﺩﮊﯨﺴﺘﯩﯟﺍ ﺑﯧﺰﻩﻙ ﺑﯘﻳﯘﻣﻠﯩﺮﻯ ﻗﻪﻳﻪﺭﺩﯨﻦ ﻛﻪﻟﮕﻪﻥ ﯞﻩ ﻗﺎﻧﺪﺍﻕ ﻣﯘﻫﯩﺘﺘﺎ ﺋﯩﺸﻠﻪﻧﮕﻪﻥ؟ ﺩﯦﮕﻪﻥ ﺳﻮﺋﺎﻟﻼﺭﻏﺎ ﺟﺎﯞﺍﺏ ﺋﯩﺰﺩﻩﺵ ﯞﻩ ﺋﺎﻣﯧﺮﯨﻜﯩﺪﯨﻜﻰ ﺧﯧﺮﯨﺪﺍﺭﻻﺭﻧﻰ ﺑﯘ ﺟﻪﻫﻪﺗﺘﻪ ﻣﯘﺋﻪﻳﻴﻪﻥ ﭼﯜﺷﻪﻧﭽﯩﮕﻪ ﺋﯩﮕﻪ ﻗﯩﻠﯩﺶ ﺋﯘﭼﯘﻥ ﻧﻴﯘ ﻳﻮﺭﻛﻘﺎ ﺟﺎﻳﻼﺷﻘﺎﻥ ﻫﯚﻛﯜﻣﻪﺗﺴﯩﺰ ﺗﻪﺷﻜﯩﻼﺕ ﺩﯙﻟﻪﺗﻠﯩﻚ ﺋﻪﻣﮕﻪﻙ ﻛﻮﻣﯩﺘﯧﺘﻰ " ﯞﺍﻝ ﻣﺎﺭﺕ ﺳﯩﺰﮔﻪ ﺧﯩﺘﺎﻳﺪﯨﻦ ﺋﯧﻠﯩﭗ ﻛﻪﻟﮕﻪﻥ ﺭﻭﺩﮊﯨﺴﺘﯩﯟﺍ" ﺩﯦﮕﻪﻥ ﺗﯧﻤﺎ ﺋﺎﺳﺘﯩﺪﺍ ﺑﯩﺮ ﺩﻭﻛﻼﺕ ﺗﻪﻳﻴﺎﺭﻻﭖ ﺋﯧﻼﻥ ﻗﯩﻠﺪﻯ.

ﺩﻭﻛﻼﺕ ﺟﻪﻣﺌﯩﻲ 60 ﺑﻪﺗﻠﯩﻚ ﺑﻮﻟﯘﭖ، ﺩﻭﻛﻼﺗﺘﺎ ﺧﯩﺘﺎﻳﻨﯩﯔ ﮔﯘﺍﯕﺠﯘ ﺷﻪﻫﯩﺮﯨﮕﻪ ﺟﺎﻳﻼﺷﻘﺎﻥ 8 ﻣﯩﯔ ﺋﯩﺸﭽﯩﻐﺎ ﺋﯩﮕﻪ ﺧﯜﻩﻧﻴﺎ ﺳﻮﯞﻏﺎﺕ ﺑﯘﻳﯘﻣﻠﯩﺮﻯ ﺷﯩﺮﻛﯩﺘﻰ ﺋﯩﮕﯩﺪﺍﺭﭼﯩﻠﯩﻘﯩﺪﯨﻜﻰ ﺯﺍﯞﯗﺗﻨﯩﯔ ﺋﻪﻣﻪﻟﯩﻲ ﺋﻪﻫﯟﺍﻟﻰ ﺯﺍﯞﯗﺗﺘﯩﻦ ﺋﻮﻏﺮﯨﻠﯩﻘﭽﻪ ﺗﺎﺭﺗﯩﻠﻐﺎﻥ ﺳﯜﺭﻩﺗﻠﻪﺭ ﺑﯩﻠﻪﻥ ﺗﻮﻧﯘﺷﺘﯘﺭﯗﻟﻐﺎﻥ.

ﺋﯚﺳﻤﯜﺭﻟﻪﺭ ﺋﺎﺯ ﻣﺎﺋﺎﺵ ﺑﯩﻠﻪﻥ ﻛﯜﻧﯩﮕﻪ 12 - 15 ﺳﺎﺋﻪﺕ ﺋﯩﺸﻠﻪﻳﺪﯗ

ﺩﻭﻛﻼﺗﺘﺎ ﻛﯚﺭﺳﯩﺘﯩﺸﯩﭽﻪ، ﻣﻪﺯﻛﯘﺭ ﺯﺍﯞﯗﺗﺘﺎ ﺋﯩﺸﻠﻪﻧﮕﻪﻥ ﺋﻪﺭﺯﺍﻥ ﺑﺎﻫﺎﻟﯩﻖ ﺭﻭﺩﮊﯨﺴﺘﯩﯟﺍ ﺳﻮﯞﻏﺎﺕ ﺑﯘﻳﯘﻣﻠﯩﺮﯨﻨﯩﯔ ﻛﯚﭘﯩﻨﭽﯩﺴﻰ ﺋﺎﻣﯧﺮﯨﻜﯩﺪﯨﻜﻰ ﺋﻪﯓ ﭼﻮﯓ ﭘﺎﺭﭼﻪ ﺳﯧﺘﯩﺶ ﮔﯘﺭﯗﻫﻰ ﯞﺍﻝ ﻣﺎﺭﺕ ﮔﯘﺭﯗﻫﻰ ﺗﻪﺭﯨﭙﯩﺪﯨﻦ ﺋﺎﻣﯧﺮﯨﻜﯩﻐﺎ ﺋﯩﻤﭙﻮﺭﺕ ﻗﯩﻠﯩﻨﻐﺎﻥ. ﺋﻪﯓ ﺋﻪﺟﻪﻟﻠﯩﻚ ﻳﯧﺮﻯ، ﺑﯘ ﺳﻮﯞﻏﺎﺕ ﺑﯘﻳﯘﻣﻠﯩﺮﻯ ﺋﯚﺳﻤﯜﺭ ﺋﯩﺸﭽﯩﻼﺭﻧﻰ ﻣﺎﺋﺎﺷﻨﻰ ﺗﯚﯞﻩﻥ ﺑﯧﺮﯨﭗ ﻛﯜﻧﯩﮕﻪ 12 - 15 ﺳﺎﺋﻪﺕ ﻫﻪﭘﺘﯩﺴﯩﮕﻪ 7 ﻛﯜﻥ ﺋﯩﺸﻘﺎ ﺳﯧﻠﯩﺶ ﺋﺎﺭﻗﯩﻠﯩﻖ ﺋﯩﺸﻠﻪﻧﮕﻪﻥ.

ﺩﻭﻛﻼﺗﺘﺎ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﺋﻪﯓ ﺋﺎﺯ ﺩﯦﮕﻪﻧﺪﯨﻤﯘ 4 ﻣﯩﯔ ﻧﻪﭘﻪﺭ ﺋﯩﺸﭽﻰ ﻫﻪﭘﺘﯩﺴﯩﮕﻪ 105 ﺳﺎﺋﻪﺗﺘﯩﻦ 95 ﺳﺎﺋﻪﺗﻜﯩﭽﻪ، ﺋﻮﺗﺘﯘﺭﺍ ﻫﯧﺴﺎﺏ ﺑﯩﻠﻪﻥ ﻫﻪﭘﺘﯩﺴﯩﮕﻪ 55 ﺳﺎﺋﻪﺕ ﻗﻮﺷﯘﭖ ﺋﻮﺷﯘﻕ ﺋﯩﺸﻠﯩﮕﻪﻥ ﺑﻮﻟﯘﭖ، ﺑﯘ ﺧﯩﺘﺎﻳﻨﯩﯔ ﺋﯚﺯﯨﻨﯩﯔ ﺋﻪﻣﮕﻪﻙ ﻗﺎﻧﯘﻧﯩﺪﯨﻜﻰ ﭼﻪﻛﺘﯩﻦ 50 ﻧﻪﭼﭽﻪ ﭘﯩﺮﺳﻪﻧﺖ ﺋﯧﺸﯩﭗ ﻛﯧﺘﯩﺪﯨﻜﻪﻥ. ﺋﯘ ﻳﻪﻧﻪ، ﺯﺍﯞﯗﺗﺘﺎ ﺑﺎﻟﯩﻼﺭﻧﯩﯔ ﺋﻪﻣﮕﻪﻛﻜﻪ ﺳﯧﻠﯩﻨﻐﺎﻧﻠﯩﻘﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ: "ﺑﯘ ﺯﺍﯞﯗﺗﺘﺎ ﺋﯚﺳﻤﯜﺭﻟﻪﺭﻧﯩﯔ ﺋﯩﺸﻘﺎ ﺳﯧﻠﯩﻨﻐﺎﻧﻠﯩﻘﻰ ﺑﯩﺰﻧﻰ ﺑﻪﻙ ﭼﯚﭼﯜﺗﺘﻰ،" ﺩﻩﻳﺪﯗ.

ﺩﻭﻛﻼﺕ ﻣﻪﺯﻛﯘﺭ ﺯﺍﯞﯗﺗﺘﯩﻦ ﺋﻮﻏﺮﯨﻠﯩﻘﭽﻪ ﺗﺎﺭﺗﯩﭗ ﻛﯧﻠﯩﻨﮕﻪﻥ ﻓﻮﺗﻮ ﺳﯜﺭﻩﺗﻠﻪﺭ، ﺋﯚﺯ ﺋﯩﺨﺘﯩﻴﺎﺭﻯ ﺑﯩﻠﻪﻥ ﻗﻮﺷﯘﭖ ﺋﯩﺸﻠﻪﺷﻨﻰ ﺋﯩﻠﺘﯩﻤﺎﺱ ﻗﯩﻠﯩﺶ ﺟﻪﺩﯞﯨﻠﻰ ﻗﺎﺗﺎﺭﻟﯩﻖ ﻧﯘﺭﻏﯘﻥ ﻗﻮﻝ ﻣﺎﺗﯧﺮﯨﻴﺎﻟﻼﺭﻧﻰ ﺋﺎﺳﺎﺱ ﻗﯩﻠﯩﭗ ﺋﯩﻨﺘﺎﻳﯩﻦ ﻗﺎﻳﯩﻞ ﻗﯩﻼﺭﻟﯩﻖ ﺗﻪﻳﻴﺎﺭﻻﻧﻐﺎﻥ.

ﭼﺎﺭﻟﻰ ﻛﺎﺭﻧﯩﮕﺎﻥ :" ﺑﯘ ﺯﺍﯞﯗﺗﺘﯩﻜﻰ ﺋﯩﻨﺴﺎﻥ ﻫﻮﻗﯘﻗﯩﻨﯩﯔ ﺩﻩﭘﺴﻪﻧﺪﻩ ﻗﯩﻠﯩﻨﯩﺸﯩﻐﺎ ﭼﯩﺪﺍﭖ ﺗﯘﺭﻏﯩﻠﻰ ﺑﻮﻟﻤﺎﻳﺪﯗ "

ﻣﻪﺯﻛﯘﺭ ﺩﻭﻛﻼﺗﻨﻰ ﺗﻪﻳﻴﺎﺭﻻﺷﻘﺎ ﺳﻪﯞﻩﺏ ﺑﻮﻟﻐﺎﻥ ﺋﺎﻣﯩﻠﻼﺭ ﻫﻪﻗﻘﯩﺪﻩ ﺗﻮﺧﺘﺎﻟﻐﺎﻥ ﺋﻪﻣﮕﻪﻙ ﻛﻮﻣﯩﺘﯧﺘﯩﻨﯩﯔ ﺩﯨﺮﯦﻜﺘﻮﺭﻯ ﭼﺎﺭﻟﻰ ﻛﺎﺭﻧﯩﮕﺎﻥ ﺋﻪﭘﻪﻧﺪﻯ، ﻣﻪﻗﺴﯩﺪﯨﻨﯩﯔ ﺋﺎﻣﯧﺮﯨﻜﺎ ﯞﻩ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﮕﻪ ﻗﺎﺭﯨﺘﺎ ﺑﯧﺴﯩﻢ ﺋﯩﺸﻠﯩﺘﯩﺶ ﺋﯜﭼﯜﻥ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ ﯞﻩ ﺧﯩﺘﺎﻳﺪﯨﻜﻰ ﺑﯘ ﺯﺍﯞﯗﺕ ﺭﻭﺩﮊﯨﺴﺘﯩﯟﺍ ﺑﯧﺰﻩﻙ ﺑﯘﻳﯘﻣﻠﯩﺮﯨﻨﻰ ﺋﯩﺸﻠﻪﭘﭽﯩﻘﯩﺮﯨﺪﯨﻐﺎﻥ ﭼﻮﯓ ﺯﺍﯞﯗﺕ ﺑﻮﻟﯘﭖ، ﺑﯘ ﺯﺍﯞﯗﺗﺘﯩﻜﻰ ﺋﯩﻨﺴﺎﻥ ﻫﻮﻗﯘﻗﯩﻨﯩﯔ ﺩﻩﭘﺴﻪﻧﺪﻩ ﻗﯩﻠﯩﻨﯩﺸﯩﻐﺎ ﭼﯩﺪﺍﭖ ﺗﯘﺭﻏﯩﻠﻰ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﯘ ﻣﯘﻧﺪﺍﻕ ﺩﯦﺪﻯ: " ﺑﯘ ﺯﺍﯞﯗﺕ ﭼﻮﯓ ﺯﺍﯞﯗﺕ ﺑﻮﻟﻐﺎﻧﺪﯨﻦ ﻛﯧﻴﯩﻦ ﺋﻪﻣﮕﻪﻙ ﻗﺎﻧﯘﻧﯩﻐﺎ ﻫﯚﺭﻣﻪﺕ ﻗﯩﻠﯩﺸﻰ ﻛﯧﺮﻩﻙ ﺋﯩﺪﻯ. ﺋﻪﻣﻪﻟﯩﻴﻪﺗﺘﻪ ﺑﯘ ﺯﺍﯞﯗﺗﺘﺎ ﺧﯩﺘﺎﻳﺪﯨﻜﻰ ﺋﻪﻣﮕﻪﻙ ﻗﺎﻧﯘﻧﯩﻐﺎ ﺋﺎﻻﻗﯩﺪﺍﺭ ﻣﺎﺩﺩﯨﻼﺭﻧﯩﯔ ﻫﻪﻣﻤﯩﺴﻰ ﺩﻩﭘﺴﻪﻧﺪﻩ ﻗﯩﻠﯩﻨﯩﯟﺍﺗﯩﺪﯗ. ﺷﯘﯕﺎ ﯞﺍﻝ - ﻣﺎﺭﺕ ﺑﯘ ﻳﻪﺭﺩﻩ ﻧﯧﻤﻪ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﭼﻮﻗﯘﻡ ﺑﯩﻠﯩﺸﻰ ﻛﯧﺮﻩﻙ."

ﺋﯘﻧﯩﯔ ﺋﯧﻴﺘﯩﺸﯩﭽﻪ، ﺯﺍﯞﯗﺗﺘﺎ ﻳﯜﺯ ﺑﻪﺭﮔﻪﻥ ﻗﺎﻧﯘﻧﺴﯩﺰ ﻗﯩﻠﻤﯩﺸﻼﺭﻧﯩﯔ ﻫﻪﻣﻤﯩﺴﻰ ﻳﻮﺷﯘﺭﯗﻥ ﺋﻪﻣﻪﺱ، ﺑﻪﻟﻜﻰ ﺋﻮﭼﯘﻕ-ﺋﺎﺷﻜﺎﺭﺍ ﺋﯧﻠﯩﭗ ﺑﯧﺮﯨﻠﻐﺎﻥ ﺑﻮﻟﯘﭖ، ﻫﻪﺗﺘﺎ ﺋﯩﺸﭽﯩﻼﺭ ﻗﻮﺷﯘﻣﭽﻪ ﺋﯩﺸﻠﻪﺵ ﺋﯩﻠﺘﯩﻤﺎﺳﯩﻐﺎ ﻗﻮﻝ ﻗﻮﻳﯘﺷﻘﺎ ﻣﻪﺟﺒﯘﺭﻻﻧﻐﺎﻥ ﺋﯩﻜﻪﻥ.

ﺧﯩﺘﺎﻱ ﺳﻮﺩﺍ ﻣﯘﻧﺎﺳﯩﯟﻩﺗﻠﯩﺮﯨﮕﻪ ﯞﻩ ﺋﻪﻣﮕﻪﻙ ﻗﺎﻧﯘﻧﯩﻐﺎ ﺋﺎﻻﻗﯩﺪﺍﺭ ﺑﯩﺮ ﻗﺎﻧﯘﻥ ﺑﻪﻟﮕﯩﻠﻪﺵ ﻛﯧﺮﻩﻙ

ﺧﯩﺘﺎﻳﺪﯨﻦ ﺋﺎﻣﯧﺮﯨﻜﯩﻐﺎ ﺋﯩﻤﭙﻮﺭﺕ ﻗﯩﻠﯩﻨﯩﯟﺍﺗﻘﺎﻥ ﻣﻪﻫﺴﯘﻻﺗﻼﺭﻧﯩﯔ ﺑﯩﺨﻪﺗﻪﺭﻟﯩﻚ ﻣﻪﺳﯩﻠﯩﺴﻰ، ﺳﯜﭘﻪﺕ ﻣﻪﺳﯩﻠﯩﺴﻰ ﯞﻩ ﺋﺎﻣﯧﺮﯨﻜﺎ ‏- ﺧﯩﺘﺎﻱ ﺳﻮﺩﺍ ﺋﺎﻻﻗﯩﺴﯩﺪﺍ ﺋﺎﻣﯧﺮﯨﻜﺎ ﺗﻪﺭﻩﭘﺘﻪ ﻛﯚﺭﯛﻟﮕﻪﻥ ﻧﻪﭼﭽﻪ ﻣﯩﻠﻴﺎﺭﺩ ﺩﻭﻟﻼﺭ ﻗﯩﺰﯨﻞ ﺭﻩﻗﻪﻡ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﻰ ﺋﯩﻨﺘﺎﻳﯩﻦ ﺟﯩﺪﺩﯨﻴﻠﻪﺷﺘﯜﺭﯛﯞﺍﺗﻘﺎﻥ ﺗﻪﺭﻩﭘﻠﻪﺭﻧﯩﯔ ﺑﯩﺮﻯ ﺑﻮﻟﺴﯩﻤﯘ، ﺋﻪﻣﻤﺎ ﺑﯘ ﻧﯚﯞﻩﺕ ﺋﺎﺷﻜﺎﺭﯨﻼﻧﻐﺎﻥ ﺭﻭﺩﮊﯨﺴﺘﯩﯟﺍ ﺩﻩﺭﯨﺨﻰ ﺑﯧﺰﻩﻛﻠﯩﺮﯨﻨﯩﯔ ﺧﯩﺘﺎﻱ ﯞﻩ ﺧﻪﻟﻘﺌﺎﺭﺍ ﺋﻪﻣﮕﻪﻙ ﻗﺎﻧﯘﻧﻠﯩﺮﯨﻐﺎ ﺧﯩﻼﭖ ﻫﺎﻟﺪﺍ ﺋﯩﺸﻠﻪﻧﮕﻪﻧﻠﯩﻜﻰ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﺧﺎﺩﯨﻤﻠﯩﺮﻯ ﺋﺎﺭﯨﺴﯩﺪﺍ ﺧﯩﺘﺎﻱ ﺳﻮﺩﺍ ﻣﯘﻧﺎﺳﯩﯟﻩﺗﻠﯩﺮﯨﮕﻪ ﯞﻩ ﺋﻪﻣﮕﻪﻙ ﻗﺎﻧﯘﻧﯩﻐﺎ ﺋﺎﻻﻗﯩﺪﺍﺭ ﺑﯩﺮ ﻗﺎﻧﯘﻥ ﺑﻪﻟﮕﯩﻠﻪﺵ ﺋﯩﺪﯨﻴﯩﺴﯩﻨﻰ ﻛﯜﭼﻪﻳﻤﻪﻛﺘﻪ.

ﻣﯘﺷﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ 12 ‏- ﺩﯦﻜﺎﺑﯩﺮ ﭼﺎﺭﺷﻪﻧﺒﻪ ﻛﯜﻧﻰ، ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﯩﺪﺍ ﺩﯦﻤﻮﻛﺮﺍﺕ ﭘﺎﻻﺗﺎ ﺋﻪﺯﺍﺳﻰ ﺑﺎﻳﺮﻭﻥ ﺩﻭﺭﮔﺎﻥ ﺋﻪﭘﻪﻧﺪﻯ ﻣﯘﺧﺒﯩﺮﻻﺭﻧﻰ ﻛﯜﺗﯩﯟﯦﻠﯩﺶ ﻳﯩﻐﯩﻦ ﺋﯧﭽﯩﭗ، ﻳﯘﻗﯩﺮﯨﺪﺍ ﺗﯩﻠﻐﺎ ﺋﯧﻠﯩﻨﻐﺎﻥ ﺩﻭﻛﻼﺗﻨﻰ ﺗﻮﻧﯘﺷﺘﯘﺭﺩﻯ ﯞﻩ ﺑﯩﺮ ﻗﯩﺴﯩﻢ ﺋﺎﯞﺍﻡ ﭘﺎﻻﺗﺎ ﺋﻪﺯﺍﻟﯩﺮﻯ ﺑﯩﻠﻪﻥ ﺑﯩﺮﻟﯩﻜﺘﻪ ﺋﯩﺸﭽﯩﻼﺭ ﺋﯧﻜﺴﭙﯩﻼﺗﺎﺗﺴﯩﻴﻪ ﻗﯩﻠﯩﻨﯩﺪﯨﻐﺎﻥ ﺯﺍﯞﯗﺗﻼﺭ ﻫﻪﻗﻘﯩﺪﻩ ﺑﯩﺮ ﻗﺎﻧﯘﻥ ﻻﻳﯩﻬﯩﺴﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻧﻠﯩﻘﯩﻨﻰ ﻫﻪﻣﺪﻩ ﻣﻪﺯﻛﯘﺭ ﻗﺎﻧﯘﻥ ﻻﻳﯩﻬﯩﺴﻰ ﻣﺎﻗﯘﻟﻼﻧﺴﺎ، ﺋﺎﻣﯧﺮﯨﻜﺎ ﻓﯧﺪﯦﺮﺍﻝ ﺳﻮﺩﺍ ﻛﻮﻣﯩﺘﯧﺘﯩﻐﺎ ﺋﻪﻣﮕﻪﻙ ﻗﺎﻧﯘﻧﯩﻨﻰ ﺩﻩﭘﺴﻪﻧﺪﻩ ﻗﯩﻠﯩﺪﯨﻐﺎﻥ ﺋﯩﺸﻼﺭﻧﻰ ﺗﻪﻛﺸﯜﺭﯛﺵ ﯞﻩ ﺗﻪﻛﺸﯜﺭﯛﺵ ﺋﯩﺸﻠﯩﺮﯨﻨﻰ ﻣﻪﺑﻠﻪﻍ ﺑﯩﻠﻪﻥ ﺗﻪﻣﯩﻨﻠﻪﺵ ﻫﻮﻗﯘﻗﻰ ﺑﯧﺮﯨﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

" ﺋﯩﺸﭽﯩﻼﺭﻧﻰ ﺋﯧﻜﺴﭙﯩﻼﺗﺎﺗﺴﯩﻴﻪ ﻗﯩﻠﯩﺪﯨﻐﺎﻥ ﺯﺍﯞﯗﺗﻼﺭﺩﺍ ﺋﯩﺸﻠﻪﻧﮕﻪﻥ ﻣﻪﻫﺴﯘﻻﺗﻼﺭﻧﯩﯔ ﺋﺎﻣﯧﺮﯨﻜﯩﻐﺎ ﻛﯩﺮﯨﺸﯩﮕﻪ ﻳﻮﻝ ﻗﻮﻳﯘﺵ ﺋﺎﺩﺍﻟﻪﺗﺴﯩﺰﻟﯩﻚ "

ﻣﯘﺧﺒﯩﺮﻻﺭﻧﻰ ﻛﯜﺗﯩﯟﯦﻠﯩﺶ ﻳﯩﻐﯩﻨﺪﺍ ﺩﻭﺭﮔﺎﻥ ﺋﻪﭘﻪﻧﺪﻯ " ﯞﺍﻝ ﻣﺎﺭﺕ ﺳﯩﺰﮔﻪ ﺧﯩﺘﺎﻳﺪﯨﻦ ﺋﯧﻠﯩﭗ ﻛﻪﻟﮕﻪﻥ ﺭﻭﺩﮊﯨﺴﺘﯩﯟﺍ" ﻧﺎﻣﻠﯩﻖ ﺩﻭﻛﻼﺗﻨﻰ ﺗﻮﻧﯘﺷﺘﯘﺭﯗﭖ، ﺋﯩﺸﭽﯩﻼﺭﻧﯩﯔ ﺧﯩﺘﺎﻱ ﺋﻪﻣﮕﻪﻙ ﻗﺎﻧﯘﻧﯩﺪﺍ ﺑﻪﻟﮕﯩﻠﻪﻧﮕﻪﻥ ﺋﻪﯓ ﺗﯚﯞﻩﻥ ﺋﯩﺶ ﻫﻪﻗﻘﯩﻨﯩﯔ ﻳﯧﺮﯨﻤﯩﭽﯩﻠﯩﻚ ﻫﻪﻕ ﺋﺎﻟﯩﺪﯨﻐﺎﻧﻠﯩﻘﯩﻨﻰ، ﻫﻪﺗﺘﺎ ﺋﯚﺳﻤﯜﺭﻟﻪﺭﻧﯩﯖﻤﯘ ﺳﺎﺋﻪﺗﻠﻪﭖ ﻧﺎﭼﺎﺭ ﺋﻪﻣﮕﻪﻙ ﻣﯘﻫﯩﺘﯩﺪﺍ ﺋﯩﺸﻘﺎ ﺳﯧﻠﯩﻨﻐﺎﻧﻠﯩﻘﯩﻨﻰ، ﺷﯘﻧﺪﺍﻕ ﻣﯘﻫﯩﺘﺘﺎ ﺋﯩﺸﻠﻪﻧﮕﻪﻥ ﻣﺎﻟﻼﺭﻧﯩﯔ ﺋﻪﺭﺯﺍﻥ ﺑﺎﻫﺎﺩﺍ ﺋﺎﻣﯧﺮﯨﻜﺎ ﺑﺎﺯﺍﺭﻟﯩﺮﯨﻐﺎ ﺳﯧﻠﯩﻨﯩﺸﻰ ﺋﺎﻣﯧﺮﯨﻜﺎ ﺳﻮﺩﺍ ﺳﺎﻫﻪﺳﯩﻨﻰ ﺯﯨﻴﺎﻧﻐﺎ ﺋﯘﭼﺮﯨﺘﯩﭙﻼ ﻗﺎﻟﻤﺎﺳﺘﯩﻦ، ﺑﻪﻟﻜﻰ ﺑﯩﺮ ﺋﺎﺩﺍﻟﻪﺕ ﻣﻪﺳﯩﻠﯩﺴﻰ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ ﻣﯘﻧﺪﺍﻕ ﺩﯦﺪﻯ؛ " ﺑﯩﺰ ﺑﯩﺮ ﺩﯙﻟﻪﺕ ﺑﻮﻟﯘﺵ ﺳﯜﭘﯩﺘﯩﻤﯩﺰ ﺑﯩﻠﻪﻥ ﺑﯘﻧﯩﯖﻐﺎ ﻗﺎﺭﯨﺘﺎ ﭼﻮﻗﯘﻡ ﻫﻪﺭﯨﻜﻪﺕ ﻗﻮﻟﻠﯩﻨﯩﺸﯩﻤﯩﺰ ﻛﯧﺮﻩﻙ. ﭼﯜﻧﻜﻰ، ﺑﯩﺮﯨﻨﭽﯩﺪﯨﻦ ﺋﯩﺸﭽﯩﻼﺭ ﺋﯧﻜﺴﭙﯩﻼﺗﺎﺗﺴﯩﻴﻪ ﻗﯩﻠﯩﻨﯩﺪﯨﻐﺎﻥ ﺯﺍﯞﯗﺗﻼﺭﺩﺍ ﺋﯩﺸﻠﻪﻧﮕﻪﻥ ﻣﻪﻫﺴﯘﻻﺗﻼﺭﻧﯩﯔ ﺋﺎﻣﯧﺮﯨﻜﯩﻐﺎ ﻛﯩﺮﯨﺸﯩﮕﻪ ﻳﻮﻝ ﻗﻮﻳﯘﺵ ﺑﯘ ﺑﯩﺮ ﺋﺎﺩﺍﻟﻪﺗﺴﯩﺰﻟﯩﻚ. ﺋﯩﻜﻜﯩﻨﭽﯩﺪﯨﻦ ﺑﯘﻧﻰ ﻫﻪﺭﮔﯩﺰﻣﯘ ﺑﯩﺮ ﺋﺎﺩﯨﻞ ﺭﯨﻘﺎﺑﻪﺕ ﺩﻩﭖ ﺋﯧﻴﺘﻘﯩﻠﻰ ﺑﻮﻟﻤﺎﻳﺪﯗ."

ﺋﯘﻧﯩﯔ ﺑﯩﻠﺪﯛﺭﯛﺷﯩﭽﻪ ﻳﻪﻧﻪ، ﺧﯩﺘﺎﻱ ﯞﻩ ﺑﺎﺷﻘﺎ ﺋﺎﻣﯧﺮﯨﻜﯩﻐﺎ ﺳﺎﻧﺎﺋﻪﺕ ﻣﻪﻫﺴﯘﻻﺗﻠﯩﺮﻯ ﺋﯧﻜﺴﭙﻮﺭﺕ ﻗﯩﻠﯩﺪﯨﻐﺎﻥ ﺩﯙﻟﻪﺗﻠﻪﺭ ﯞﻩ ﺷﯘ ﺩﯙﻟﻪﺗﻠﻪﺭ ﺑﯩﻠﻪﻥ ﻣﯘﻧﺎﺳﯩﯟﻩﺕ ﺋﯧﻠﯩﭗ ﺑﺎﺭﯨﺪﯨﻐﺎﻥ ﺷﯩﺮﻛﻪﺗﻠﻪﺭﻧﯩﯔ ﺋﺎﻣﯧﺮﯨﻜﺎ ﺋﻪﻣﮕﻪﻙ ﻗﺎﻧﯘﻧﻰ ﯞﻩ ﺋﯜﭼﯩﻨﭽﻰ ﺗﻪﺭﻩﭘﻨﯩﯔ ﺋﻪﻣﮕﻪﻙ ﻗﺎﻧﯘﻧﯩﻐﺎ ﻫﯚﺭﻣﻪﺕ ﻗﯩﻠﯩﺸﯩﻨﻰ ﺋﯩﻠﮕﯩﺮﻯ ﺳﯜﺭﯛﺵ ﯞﻩ ﺋﻪﻣﮕﻪﻛﭽﯩﻠﻪﺭﻧﯩﯔ ﺋﯩﺰﭼﯩﻞ ﺋﯧﻜﺴﭙﯩﻼﺗﺎﺗﺴﯩﻴﻪ ﻗﯩﻠﯩﻨﯩﺸﯩﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺋﯜﭼﯜﻥ، ﻣﯘﺷﯘ ﻫﻪﻗﺘﻪ ﺑﯩﺮ ﻗﺎﻧﯘﻥ ﻻﻳﯩﻬﯩﺴﻰ ﻣﺎﻗﯘﻟﻠﯩﻨﯩﺶ ﺯﯙﺭﯛﺭ ﺑﻮﻟﯘﭖ، ﺑﻪﻟﻜﯩﻢ 2008 - ﻳﯩﻠﻰ ﺷﯘﻧﺪﺍﻕ ﺑﯩﺮ ﻗﺎﻧﯘﻥ ﻣﻪﻳﺪﺍﻧﻐﺎ ﻛﯧﻠﯩﺸﻰ ﻣﯘﻣﻜﯩﻦ ﺋﯩﻜﻪﻥ. (ﺟﯜﻣﻪ)