ﺋﻮﻟﯩﻤﭙﯩﻚ ﺧﯩﺘﺎﻳﻨﻰ ﺋﯚﺯﮔﻪﺭﺗﻪﻣﺪﯗ ﻳﺎﻛﻰ ﺧﯩﺘﺎﻱ ﺋﻮﻟﯩﻤﭙﯩﻜﻨﯩﻤﯘ؟

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺩﺍﯕﻠﯩﻖ ﺋﺎﺭﺗﯩﺲ Spielberg ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﯩﯔ ﺳﻪﻧﺌﻪﺕ ﻣﻪﺳﻠﯩﻬﻪﺗﭽﯩﻠﯩﻜﯩﺪﯨﻦ ﯞﺍﺯ ﻛﻪﭼﻜﻪﻧﺪﯨﻦ ﻛﯧﻴﯩﻦ، ﺧﻪﻟﻘﺌﺎﺭﺍ ﻣﻪﺗﺒﯘﺋﺎﺗﻼﺭﺩﺍ، ﺳﯩﻴﺎﺳﻪﺗﻨﯩﯔ ﺋﻮﻟﯩﻤﭙﯩﻜﻘﺎ ﺋﺎﺭﯨﻠﯩﺸﯩﺸﯩﻨﯩﯔ ﺗﻮﻏﺮﺍ ﻳﺎﻛﻰ ﺧﺎﺗﺎﻟﯩﻘﻰ ﻣﻪﺳﯩﻠﯩﺴﻰ ﻳﻪﻧﻪ ﺑﯩﺮ ﻗﯩﺰﯨﻖ ﺗﯧﻤﯩﻐﺎ ﺋﺎﻳﻼﻧﺪﻯ. ﻛﯚﭖ ﺳﺎﻧﺪﯨﻜﻰ ﻛﯚﺯﻩﺗﻜﯜﭼﯩﻠﻪﺭﻧﯩﯔ ﻗﺎﺭﯨﺸﯩﭽﻪ، ﺳﯩﻴﺎﺳﻪﺗﻨﻰ ﺋﻮﻟﯩﻤﭙﯩﻜﻘﺎ ﺋﺎﺭﯨﻼﺷﺘﯘﺭﻣﺎﺳﻠﯩﻖ ﺩﯦﻤﻮﻛﺮﺍﺗﯩﻚ ﺩﯙﻟﻪﺗﻠﻪﺭﺩﯨﻼ ﻣﯘﻣﻜﯩﻨﭽﯩﻠﯩﻜﻜﻪ ﺋﯩﮕﻪ؛ ﺋﻪﻣﻤﺎ ﺳﯩﻴﺎﺳﻪﺕ ﻣﯩﺨﺎﻧﯩﺰﯨﻤﻰ ﺗﻮﻏﺮﺍ ﺋﯩﺸﻠﯩﻤﻪﻳﯟﺍﺗﻘﺎﻥ ﻣﯘﺳﺘﻪﺑﯩﺖ ﺩﯙﻟﻪﺗﻠﻪﺭﺩﻩ ﺑﻮﻟﺴﺎ، ﺑﯘ ﻣﯘﻣﻜﯩﻨﺴﯩﺰ. ﭼﯜﻧﻜﻰ ﺩﯨﻜﺘﺎﺗﻮﺭ ﻫﺎﻛﯩﻤﯩﻴﻪﺗﻠﻪﺭﺩﻩ ﺑﺎﺭﻟﯩﻖ ﺳﺎﻫﻪ ﺳﯩﻴﺎﺳﻪﺗﻨﯩﯔ ﻣﻮﻧﻮﭘﯘﻟﻠﯘﻗﻰ ﺋﺎﺳﺘﯩﺪﺍ.

ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻜﻘﺎ ﺳﺎﻫﯩﭙﺨﺎﻧﻠﯩﻖ ﻗﯩﻠﯩﺸﯩﺪﯨﻜﻰ ﻣﻪﻗﺴﯩﺘﻰ ﺋﺎﺷﻜﺎﺭﺍ ﻫﺎﻟﺪﺍ ﺳﯩﻴﺎﺳﯩﻲ

ﺋﻮﻟﯩﻤﭙﯩﻚ ﺗﺎﺭﯨﺨﻰ ﻛﯚﺯﯨﺘﯩﻠﺴﻪ، ﺳﯩﻴﺎﺳﻪﺗﻨﯩﯔ ﺋﻮﻟﯩﻤﭙﯩﻜﻘﺎ ﺋﺎﺭﯨﻠﯩﺸﯩﺸﻰ ﻳﯧﯖﻰ ﺋﻪﻫﯟﺍﻝ ﺋﻪﻣﻪﺱ. 1936 ‏- ﻳﯩﻠﻰ ﺑﯧﺮﻟﯩﻨﺪﺍ ﺋﯚﺗﻜﯜﺯﯛﻟﮕﻪﻥ ﺋﻮﻟﯩﻤﭙﯩﻚ ﮔﯧﺘﻠﯧﺮ ﻫﺎﻛﯩﻤﯩﻴﯩﺘﯩﻨﯩﯔ ﻛﯜﭼﻠﯩﻨﯩﺸﯩﮕﻪ ﺳﻪﯞﻩﺏ ﺑﻮﻟﻐﺎﻥ. 1968 ‏-ﻳﯩﻠﻰ ﻣﯧﻜﺴﯩﻜﯩﺪﺍ ﺋﯚﺗﻜﯜﺯﯛﻟﮕﻪﻥ ﺋﻮﻟﯩﻤﭙﯩﻚ، ﻣﯩﻜﺴﯩﻜﯩﺪﯨﻜﻰ ﺋﯚﻛﺘﯩﭽﯩﻠﻪﺭﻧﯩﯔ ﻗﺎﻧﻠﯩﻖ ﺑﺎﺳﺘﯘﺭﯗﻟﯘﺷﯩﻐﺎ ﺷﺎﻫﯩﺪ ﺑﻮﻟﻐﺎﻥ. 1980 ‏-ﻳﯩﻠﻰ ﻣﻮﺳﻜﯟﺍ ﺋﻮﻟﯩﻤﭙﯩﻜﻘﺎ ﺳﺎﻫﯩﭙﺨﺎﻧﻠﯩﻖ ﻗﯩﻠﻐﺎﻧﺪﺍ، ﺳﻮﯞﯦﺘﻨﯩﯔ ﺋﺎﻓﻐﺎﻧﯩﺴﺘﺎﻧﻨﻰ ﺋﯩﺸﻐﺎﻝ ﻗﯩﻠﻐﯩﻨﻰ ﺋﯜﭼﯜﻥ ﺋﺎﻣﯧﺮﯨﻜﺎ ﯞﻩ ﻏﻪﺭﺏ ﺑﺎﺷﭽﯩﻠﯩﻘﯩﺪﺍ 61 ﺩﯙﻟﻪﺕ ﺋﻮﻟﯩﻤﭙﯩﻜﻨﻰ ﺑﺎﻳﻘﯘﺕ ﻗﯩﻠﻐﺎﻥ. 1984 ‏-ﻳﯩﻠﻰ ﻟﻮﺱ ﺋﺎﻧﺠﯩﻠﯩﺴﺘﺎ ﺋﯚﺗﻜﯜﺯﯛﻟﮕﻪﻥ ﺋﻮﻟﯩﻤﭙﯩﻜﻨﻰ ﺳﻮﯞﯦﺖ ﺋﯩﺘﺘﯩﭙﺎﻗﻰ ﺑﺎﺷﭽﯩﻠﯩﻘﯩﺪﯨﻜﻰ 14 ﻛﻮﻣﻤﯘﻧﯩﺴﺘﯩﻚ ﺩﯙﻟﻪﺕ ﺑﺎﻳﻘﯘﺕ ﻗﯩﻠﻐﺎﻥ. ﺑﯜﮔﯜﻥ ﺳﯩﻴﺎﺳﻪﺗﻨﻰ ﺋﻮﻟﯩﻤﭙﯩﻜﻘﺎ ﺋﺎﺭﯨﻼﺷﺘﯘﺭﻣﺎﺳﻠﯩﻘﻨﻰ ﺗﻪﺷﻪﺑﺒﯘﺱ ﻗﯩﻠﻐﺎﻥ ﺧﯩﺘﺎﻳﻤﯘ، 1976 ‏-ﻳﯩﻠﯩﺪﯨﻜﻰ ﺋﻮﻟﯩﻤﭙﯩﻜﺘﺎ، ﻛﺎﻧﺎﺩﺍﻏﺎ ﺑﯧﺴﯩﻢ ﺋﯩﺸﻠﯩﺘﯩﺶ ﺋﺎﺭﻗﯩﻠﯩﻖ ﺗﻪﻳﯟﻩﻧﻠﯩﻚ ﺗﻪﻧﻬﻪﺭﯨﻜﻪﺗﭽﯩﻠﻪﺭﻧﯩﯔ ﺋﻮﻟﯩﻤﭙﯩﻜﻘﺎ ﻗﺎﺗﻨﯩﺸﯩﺸﯩﻨﻰ ﺗﻮﺳﯘﭖ ﻗﺎﻟﻐﺎﻥ. ﻣﺎﻧﺎ ﺑﯘ ﺋﻪﻫﯟﺍﻟﻼﺭﻧﻰ ﻛﯚﺯﺩﻩ ﺗﯘﺗﻘﺎﻥ ﮊﯗﺭﻧﺎﻟﯩﺴﺖ ﭘﯧﺘﯧﺮ ﻓﻮﺭﺩ ﻣﯘﻧﺪﺍﻕ ﺩﻩﻳﺪﯗ: "ﺧﯩﺘﺎﻳﻨﯩﯔ ﺳﯩﻴﺎﺳﻪﺗﻨﻰ ﺋﻮﻟﯩﻤﭙﯩﻜﻘﺎ ﺋﺎﺭﯨﻼﺷﺘﯘﺭﻣﺎﺳﻠﯩﻖ ﭼﺎﻗﯩﺮﯨﻘﻰ ﻛﯩﺸﯩﻨﻰ ﺋﻪﺟﻪﭘﻠﻪﻧﺪﯛﺭﯨﺪﯗ. ﭼﯜﻧﻜﻰ ﺑﯩﺮ ﭘﺎﺭﺗﯩﻴﯩﻠﯩﻚ ﻫﺎﻛﯩﻤﯩﻴﻪﺕ ﺗﯜﺯﯛﻣﯩﺪﯨﻜﻰ ﺧﯩﺘﺎﻳﺪﺍ، ﺟﻪﻣﺌﯩﻴﻪﺗﻨﯩﯔ ﭘﯜﺗﯜﻥ ﺳﺎﻫﻪﻟﯩﺮﻯ ﺳﯩﻴﺎﺳﯩﻴﻼﺷﺘﯘﺭﯗﻟﻐﺎﻥ."

ﭘﯧﺘﯧﺮ ﻓﻮﺭﺩ ﻳﻪﻧﻪ ﻣﯘﻧﺪﺍﻕ ﺩﻩﻳﺪﯗ: " ﺑﯩﺰﮔﻪ ﺋﻮﻟﯩﻤﭙﯩﻚ ﻛﯧﺮﻩﻙ ﺋﻪﻣﻪﺱ، ﺋﯩﻨﺴﺎﻥ ﻫﻪﻗﻠﯩﺮﻯ ﻛﯧﺮﻩﻙ" ﺩﻩﭖ ﺗﻪﺷﯟﯨﻘﺎﺕ ﯞﺍﺭﯨﻘﻰ ﺗﺎﺭﻗﺎﺗﻘﺎﻥ ﺧﯩﺘﺎﻱ ﭘﯘﻗﺮﺍﺳﻰ ﻳﺎﯓ ﭼﯘﻧﻠﯩﻦ، ﺩﯙﻟﻪﺕ ﺋﺎﻏﺪﯗﺭﯗﺵ ﺋﻪﻳﯩﺒﻨﺎﻣﯩﺴﻰ ﺑﯩﻠﻪﻥ ﻛﯧﻠﻪﺭ ﻫﻪﭘﺘﻪ ﺳﻮﺗﻘﺎ ﭼﯩﻘﯩﺪﯗ". ﭘﯧﺘﯧﺮ ﻓﻮﺭﺩﻧﯩﯔ ﻗﺎﺭﯨﺸﯩﭽﻪ، ﺋﻮﻟﯩﻤﭙﯩﻚ ﻫﺎﺭﭘﯩﺴﯩﺪﺍ ﻗﺎﻧﺎﺕ ﻳﺎﻳﺪﯗﺭﯗﻟﻐﺎﻥ ﺋﯚﻛﺘﯩﭽﻰ ﻛﯜﭼﻠﻪﺭﮔﻪ ﻗﺎﺭﺷﻰ ﻫﻪﺭﯨﻜﻪﺗﻨﯩﯔ ﺋﯚﺯﻯ ﺋﻮﻟﯩﻤﭙﯩﻜﻘﺎ ﺳﯩﻴﺎﺳﻪﺕ ﺋﺎﺭﯨﻼﺷﺘﯘﺭﻏﺎﻧﻠﯩﻖ. ﺧﻮﯕﻜﻮﯓ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﭘﺮﻭﻓﯧﺴﺴﻮﺭﻯ ﺩﺍﯞﯨﺪ ﺯﯨﮕﻨﯩﯔ ﻗﺎﺭﯨﺸﯩﭽﻪ، ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻜﻘﺎ ﺳﺎﻫﯩﭙﺨﺎﻧﻠﯩﻖ ﻗﯩﻠﯩﺸﯩﺪﯨﻜﻰ ﻣﻪﻗﺴﯩﺘﻰ ﺋﺎﺷﻜﺎﺭﺍ ﻫﺎﻟﺪﺍ ﺳﯩﻴﺎﺳﯩﻲ. ﺩﺍﯞﯨﺪ ﺯﯨﮓ ﺑﯘ ﻗﺎﺭﯨﺸﯩﻐﺎ ﭘﺎﻛﯩﺖ ﺳﯜﭘﯩﺘﯩﺪﻩ، 2006 ‏- ﻳﯩﻠﻰ ﺧﯩﺘﺎﻳﻨﯩﯔ ﺧﻪﻟﻖ ﮔﯧﺰﯨﺘﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ ﺑﯩﺮ ﭘﺎﺭﭼﻪ ﻣﺎﻗﺎﻟﯩﺪﯨﻦ ﻣﯘﻧﯘ ﭘﺎﺭﭼﯩﻨﻰ ﻛﯚﺭﺳﯩﺘﯩﺪﯗ. " ﺋﻮﻟﯩﻤﭙﯩﻚ ﻳﺎﻟﻐﯘﺯ ﺧﻪﻟﻘﺌﺎﺭﺍﻟﯩﻖ ﺗﻪﻧﻬﻪﺭﯨﻜﻪﺕ ﺋﻪﻣﻪﺱ، ﺋﯘ ﺑﯩﺮ ﺋﯘﻟﯘﻍ ﺳﯩﻴﺎﺳﯩﻲ ﯞﻩﺯﯨﭙﻪ. ﺋﻮﻟﯩﻤﭙﯩﻚ ﺧﯩﺘﺎﻱ ﺧﻪﻟﻘﯩﻐﻪ ﭘﺎﻳﺪﯨﻠﯩﻖ ﺑﻮﻟﯘﭖ ﻗﺎﻟﻤﺎﻱ ﻫﻪﻡ ﯞﻩﺗﻪﻧﭙﻪﺭﯞﻩﺭﻟﯩﻜﻨﻰ ﺋﺎﺷﯘﺭﯨﺪﯗ."

ﺧﯩﺘﺎﻱ ﺋﻮﻟﯩﻤﭙﯩﻜﻨﻰ ﻗﻮﺑﯘﻝ ﻗﯩﻠﻐﺎﻧﺪﺍ ﺳﯩﻴﺎﺳﯩﻲ ﺷﻪﺭﺗﻠﻪﺭﻧﻰ ﻗﻮﺑﯘﻝ ﻗﯩﻠﻐﺎﻥ

ﺑﻪﺯﻯ ﻛﯚﺯﻩﺗﻜﯜﭼﯩﻠﻪﺭﻧﯩﯔ ﻗﺎﺭﯨﺸﯩﭽﻪ، ﺳﯩﻴﺎﺳﻪﺕ ﻣﯩﺨﺎﻧﯩﺰﯨﻤﻰ ﻧﻮﺭﻣﺎﻝ ﺋﯩﺸﻠﻪﯞﺍﺗﻘﺎﻥ ﺩﯦﻤﻮﻛﺮﺍﺗﯩﻚ ﺋﻪﻟﻠﻪﺭﺩﻩ، ﺋﻮﻟﯩﻤﭙﯩﻜﻘﺎ ﺳﯩﻴﺎﺳﻪﺗﻨﯩﯔ ﺋﺎﺭﯨﻠﯩﺸﯩﺸﻰ ﺗﻮﻏﺮﺍ ﺋﻪﻣﻪﺱ، ﭼﯜﻧﻜﻰ ﺑﯘ ﺩﯙﻟﻪﺗﻠﻪﺭﺩﻩ ﺧﻪﻟﻘﻨﯩﯔ ﺋﯩﺮﺍﺩﯨﺴﻰ ﻫﺎﻛﯩﻤﯩﻴﻪﺗﺘﻪ ﺋﻪﻛﺲ ﺋﯧﺘﯩﻜﻠﯩﻚ، ﺋﻪﻣﻤﺎ ﺩﯨﻜﺘﺎﺗﻮﺭ ﻫﺎﻛﯩﻤﯩﻴﻪﺗﻠﻪﺭﺩﯨﻜﻰ ﺳﯩﻴﺎﺳﯩﻲ ﺋﯩﺮﺍﺩﻩ ﺧﻪﻟﻘﻘﻪ ﯞﻩﻛﯩﻠﻠﯩﻚ ﻗﯩﻠﻤﺎﻳﺪﯗ، ﺷﯘﯕﺎ ﺑﯘ ﺟﺎﻳﻼﺭﺩﯨﻜﻰ ﻫﻪﺭ ﻗﺎﻧﺪﺍﻕ ﭘﺎﺋﺎﻟﯩﻴﻪﺗﻜﻪ ﺧﻪﻟﻘﺌﺎﺭﺍ ﺗﻪﺷﻜﯩﻼﺗﻼﺭﻧﯩﯔ ﺋﺎﺭﯨﻠﯩﺸﯩﺸﻰ ﻧﻮﺭﻣﺎﻝ ﺋﻪﻫﯟﺍﻝ. ﺋﺎﺭﯨﻼﺷﻤﺎﺳﻠﯩﻖ ﺑﻮﻟﺴﺎ، ﺩﯨﻜﺘﺎﺗﻮﺭﻻﺭﻧﻰ ﺟﺎﺳﺎﺭﻩﺗﻠﻪﻧﺪﯛﺭﮔﻪﻧﻠﯩﻚ. ﺋﯘﻧﯩﯔ ﺋﯜﺳﺘﯩﮕﻪ ﺧﯩﺘﺎﻱ ﺋﯚﺯﻯ ﺋﻮﻟﯩﻤﭙﯩﻜﻨﻰ ﻗﻮﺑﯘﻝ ﻗﯩﻠﻐﺎﻥ ﭼﺎﻏﺪﺍ ﺳﯩﻴﺎﺳﯩﻲ ﺷﻪﺭﺗﻠﻪﺭﻧﻰ ﻗﻮﺑﯘﻝ ﻗﯩﻠﻐﺎﻥ، ﻳﻪﻧﻰ ﺋﯚﺯﻟﯩﺮﯨﻨﯩﯔ ﺋﯩﻨﺴﺎﻥ ﻫﻪﻗﻠﯩﺮﻯ ﺧﺎﺗﯩﺮﯨﺴﯩﻨﻰ ﻳﺎﺧﺸﯩﻼﻳﺪﯨﻐﺎﻧﻠﯩﻘﻰ ﻫﻪﻗﻘﯩﺪﻩ ﯞﻩﺩﻩ ﺑﻪﺭﮔﻪﻥ، ﺋﻪﻣﺪﯨﻠﯩﻜﺘﻪ، ﺑﯘ ﯞﻩﺩﯨﺴﯩﻨﻰ ﺋﻪﻣﻪﻟﮕﻪ ﺋﺎﺷﯘﺭﯗﺵ ﺗﻪﻟﻪﭖ ﻗﯩﻠﯩﻨﻐﺎﻧﺪﺍ ﺷﯩﻜﺎﻳﻪﺗﭽﻰ ﺑﻮﻟﯘﺵ ﺋﺎﺳﺎﺳﺴﯩﺰ.

ﺋﻮﻟﯩﻤﭙﯩﻚ ﺧﯩﺘﺎﻳﻨﻰ ﺋﯚﺯﮔﻪﺭﺗﻪﻣﺪﯗ ﻳﺎﻛﻰ ﺧﯩﺘﺎﻱ ﺋﻮﻟﯩﻤﭙﯩﻜﻨﻰ ﺋﯚﺯﮔﻪﺭﺗﻪﻣﺪﯗ ﺩﯦﮕﻪﻥ ﺳﻮﺋﺎﻝ ﻧﯚﯞﻩﺗﺘﯩﻜﻰ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻐﺎ ﺋﺎﻻﻗﯩﺪﺍﺭ ﻣﯘﻻﻫﯩﺰﯨﻠﻪﺭﺩﯨﻜﻰ ﻣﯘﻫﯩﻢ ﺑﯩﺮ ﺗﯧﻤﺎ. ﺧﻪﻟﻘﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﺑﺎﺷﻠﯩﻘﻰ ﺭﻭﮔﻲ ﺋﻪﭘﻪﻧﺪﻯ ﺗﯜﻧﯜﮔﯜﻧﻜﻰ ﺳﯚﺯﯨﺪﻩ، ﺋﻮﻟﯩﻤﭙﯩﻜﻨﯩﯔ ﺩﯗﻧﻴﺎﻧﯩﯔ ﺳﯩﻴﺎﺳﯩﻲ ﻣﻪﺳﯩﻠﯩﻠﯩﺮﯨﻨﻰ ﻫﻪﻝ ﻗﯩﻠﯩﺶ ﯞﻩﺯﯨﭙﯩﺴﻰ ﻳﻮﻗﻠﯘﻗﯩﻨﻰ ﺑﯩﻠﺪﯛﺭﮔﻪﻥ ﺑﻮﻟﺴﯩﻤﯘ، ﺧﯩﺘﺎﻳﺪﺍ ﺋﻮﻟﯩﻤﭙﯩﻚ ﺳﻪﯞﻩﺑﻠﯩﻚ ﺑﯩﺮ ﻗﺎﺗﺎﺭ ﺋﯩﺠﺎﺑﯩﻲ ﺋﯚﺯﮔﯩﺮﯨﺸﻠﻪﺭﻧﯩﯔ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﻜﻪﻥ. ﻳﻪﻧﻪ، ﺋﻮﻟﯩﻤﭙﯩﻜﻨﯩﯔ ﺧﯩﺘﺎﻳﻨﻰ ﺋﯚﺯﮔﻪﺭﺗﻪﻟﻪﻳﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺋﺎﻧﺎﻟﯩﺰﭼﯩﻼﺭﺩﯨﻦ ﺑﯩﺮﻯ، ﺑﯧﻴﺠﯩﯔ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﻣﯘﺋﺎﯞﯨﻦ ﺑﺎﺷﻠﯩﻘﻰ ﺟﻴﺎﯓ ﺷﻴﺎﯞﻳﯜﻧﯩﯔ ﺋﯚﺗﻜﻪﻥ ﻳﯩﻠﻘﻰ ﺳﯚﺯﯨﺪﯨﻦ ﺗﯚﯞﻩﻧﺪﯨﻜﯩﻠﻪﺭﻧﻰ ﻧﻪﻗﯩﻞ ﻛﻪﻟﺘﯜﺭﮔﻪﻥ: " ﺑﯩﺰ ﺗﻪﺭﻩﭖ-ﺗﻪﺭﻩﭘﺘﯩﻦ ﻛﻪﻟﮕﻪﻥ ﺗﻪﻟﻪﭘﻠﻪﺭﻧﻰ ﺋﺎﯕﻼﯞﺍﺗﯩﻤﯩﺰ، ﺑﯘ ﺗﻪﻟﻪﭘﻠﻪﺭ ﺟﺎﯞﺍﺑﺴﯩﺰ ﻗﺎﻟﻤﺎﻳﺪﯗ، ﺋﻪﻗﻠﯩﻲ ﺟﻪﻫﻪﺗﺘﯩﻦ ﺗﻪﻳﻴﺎﺭﻟﯩﻘﯩﻤﯩﺰ ﺑﺎﺭ."

ﺧﯩﺘﺎﻱ ﻫﯚﻛﯜﻣﯩﺘﻰ ﻣﯘﻗﯩﻤﻠﯩﻖ ﺷﯘﺋﺎﺭﻯ ﺑﯩﻠﻪﻥ ﺋﻮﻟﯩﻤﭙﯩﻜﻘﺎ ﺳﯩﻴﺎﺳﻪﺗﻨﻰ ﺋﺎﺭﯨﻼﺷﺘﯘﺭﯗﯞﺍﺗﯩﺪﯗ

ﺋﻮﻟﯩﻤﭙﯩﻚ ﺧﯩﺘﺎﻳﻨﻰ ﺋﻪﻣﻪﺱ، ﺧﯩﺘﺎﻱ ﺋﻮﻟﯩﻤﭙﯩﻜﻨﻰ ﺋﯚﺯﮔﻪﺭﺗﯩﺪﯗ ﺩﻩﭖ ﻗﺎﺭﯨﻐﯘﭼﯩﻼﺭﺩﯨﻦ ﺧﯩﺘﺎﻱ ﺗﻪﺗﻘﯩﻘﺎﺕ ﻣﯘﺗﻪﺧﻪﺳﺴﯩﺴﻰ Sidney Rittenberg ﻣﯘﻧﺪﺍﻕ ﺩﻩﻳﺪﯗ: " ﻧﯚﯞﻩﺗﺘﻪ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯚﺯﻟﯩﺮﯨﻨﯩﯔ ﺳﯩﻴﺎﺳﯩﻲ ﻣﻪﺳﯩﻠﯩﻠﯩﺮﯨﻨﻰ ﺋﻪﻗﻠﯩﻲ ﺟﻪﻫﻪﺗﺘﯩﻦ ﺗﻮﻧﯘﭖ ﻳﻪﺗﺘﻰ، ﺋﻪﻣﻤﺎ ﻳﯜﺭﯨﻜﻰ ﺗﯧﺨﻰ ﺗﻮﻧﯘﭖ ﻳﻪﺗﻤﯩﺪﻯ." ﺑﯘ ﻣﯘﺗﻪﺧﻪﺳﺴﯩﺴﻨﯩﯔ ﻗﺎﺭﯨﺸﯩﭽﻪ، ﻧﯚﯞﻩﺗﺘﻪ ﺧﯩﺘﺎﻱ ﻫﯚﻛﯜﻣﯩﺘﻰ ﺳﯩﻴﺎﺳﯩﺘﯩﺪﯨﻜﻰ ﺧﺎﺗﺎﻟﯩﻘﯩﻨﻰ ﺑﯩﻠﻪﻟﻤﻪﻳﯟﺍﺗﻘﺎﻥ ﮔﻪﭖ ﺋﻪﻣﻪﺱ، ﻣﻪﺳﯩﻠﻪ ﻧﻪﭘﺴﯩﺪﯨﻦ ﯞﺍﺯ ﻛﯧﭽﻪﻟﻤﻪﺳﻠﯩﻜﺘﻪ. ﺷﯘﯕﺎ ﺋﻮﻟﯩﻤﭙﯩﻜﻨﯩﯔ ﺧﯩﺘﺎﻳﻨﻰ ﺋﯚﺯﮔﻪﺭﺗﻪﻟﯩﺸﻰ ﻣﯘﻣﻜﯩﻨﺴﯩﺰ.

ﺋﯘﻳﻐﯘﺭ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﯩﯔ ﻗﺎﺭﯨﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﻧﯚﯞﻩﺗﺘﻪ، " ﺳﻮﺗﺴﯩﻴﺎﻟﯩﺴﺘﯩﻚ ﺋﺎﯕﻐﺎ ﺋﯩﮕﻪ ﺋﻪﻣﮕﻪﻛﭽﻰ ﻳﯧﺘﯩﺸﺘﯜﺭﯛﺵ ﺷﯘﺋﺎﺭﻯ ﺑﯩﻠﻪﻥ ﻣﻪﺩﻩﻧﯩﻲ-ﻣﺎﺋﺎﺭﯨﭗ ﺳﺎﻫﻪﺳﯩﮕﻪ، ﺑﻪﺷﺘﻪ ﻳﺎﺧﺸﻰ ﺋﯩﻤﺎﻡ ﻳﯧﺘﯩﺸﺘﯜﺭﯛﺵ ﭼﺎﻗﯩﺮﯨﻘﻰ ﺑﯩﻠﻪﻥ ﺩﯨﻨﯩﻲ ﺳﺎﻫﻪﮔﻪ، ﻣﯘﻗﯩﻤﻠﯩﻖ ﻫﻪﻣﻤﯩﻨﻰ ﺑﯧﺴﯩﭗ ﭼﯜﺷﯩﺪﯗ ﺷﯘﺋﺎﺭﻯ ﺑﯩﻠﻪﻥ ﺋﻮﻟﯩﻤﭙﯩﻜﻘﺎ ﺳﯩﻴﺎﺳﻪﺗﻨﻰ ﺋﺎﺭﯨﻼﺷﺘﯘﺭﯗﯞﺍﺗﯩﺪﯗ. ﺋﻮﻟﯩﻤﭙﯩﻜﻨﯩﯔ ﺧﯩﺘﺎﻳﻨﻰ ﺋﯚﺯﮔﻪﺭﺗﯩﺸﻰ ﺋﯧﻬﺘﯩﻤﺎﻟﺪﯨﻦ ﺋﯘﺯﺍﻕ، ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻜﻨﻰ ﺳﻪﯞﻩﺏ ﻗﯩﻠﯩﭗ ﺗﯘﺭﯗﭖ ﺧﻪﻟﻘﻨﻰ ﺑﺎﺳﺘﯘﺭﯗﺷﻨﻰ ﻛﯜﭼﻪﻳﺘﯩﯟﺍﺗﻘﺎﻧﻠﯩﻘﻰ ﺭﯦﺌﺎﻟﻠﯩﻖ، ﺷﯘﯕﺎ ﺧﯩﺘﺎﻱ ﺋﻮﻟﯩﻤﭙﯩﻜﻨﻰ ﺋﻪﺳﻠﻰ ﻏﺎﻳﯩﺴﯩﺪﯨﻦ ﺋﯘﺯﺍﻗﻼﺷﺘﯘﺭﯨﺪﯗ ﯞﻩ ﺋﻮﻟﯩﻤﭙﯩﻜﻨﯩﯔ ﺷﺎﻥ-ﺷﻪﺭﯨﭙﯩﻨﻰ ﭼﯜﺷﯜﺭﯨﺪﯗ. (ﺷﯚﻫﺮﻩﺕ ﻫﻮﺷﯘﺭ)