ﺧﯩﺘﺎﻱ 2008 - ﻳﯩﻠﻠﯩﻖ ﺋﻮﻟﯩﻤﭙﯩﻜﺘﯩﻦ ﺋﺎﻳﺮﯨﻠﯩﭗ ﻗﺎﻻﻣﺪﯗ؟

• ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺗﯩﺒﻪﺗﺘﯩﻜﻰ ﻫﻪﺭﯨﻜﻪﺕ ﺑﯧﺴﯩﻘﻘﺎﻥ ﺑﻮﻟﺴﯩﻤﯘ، ﺩﯗﻧﻴﺎﻧﯩﯔ ﻫﻪﺭ ﻳﯧﺮﯨﺪﯨﻜﯩﮕﻪ ﺋﻮﺧﺸﺎﺵ، ﮔﯧﺮﻣﺎﻧﯩﻴﯩﺪﻩ ﺗﯩﺒﻪﺗﻠﯩﻜﻠﻪﺭ ﯞﻩ ﺗﯩﺒﻪﺕ ﻫﻪﺭﯨﻜﯩﺘﯩﻨﻰ ﻫﯩﻤﺎﻳﻪ ﻗﯩﻠﻐﯘﭼﯩﻼﺭﻧﯩﯔ ﺧﯩﺘﺎﻳﻐﺎ ﻗﺎﺭﺷﻰ ﻫﻪﺭﯨﻜﻪﺗﻠﯩﺮﻯ ﺑﺎﺭﻏﺎﻧﺴﯧﺮﻯ ﻳﯘﻗﯩﺮﻯ ﺩﻭﻟﻘﯘﻧﻐﺎ ﻛﯚﺗﯜﺭﯛﻟﻤﻪﻛﺘﻪ. ﺧﯩﺘﺎﻳﻨﯩﯔ ﺗﯩﺒﻪﺗﺘﯩﻜﻰ ﻧﺎﻣﺎﻳﯩﺸﻨﻰ ﻗﺎﻧﻠﯩﻖ ﺑﺎﺳﺘﯘﺭﻏﺎﻧﻠﯩﻘﯩﻐﺎ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﯛﺵ ﻳﯜﺯﯨﺴﯩﺪﯨﻦ ﻣﻪﻳﺪﺍﻧﻐﺎ ﻛﯧﻠﯩﯟﺍﺗﻘﺎﻥ ﺑﯘ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﻯ ﮔﯧﺮﻣﺎﻧﯩﻴﻪ ﭘﺎﻳﺘﻪﺧﺘﻰ ﺑﯧﺮﻟﯩﻨﻨﻰ ﻣﻪﺭﻛﻪﺯ ﻗﯩﻠﻐﺎﻥ ﻫﺎﻟﺪﺍ ﭘﯜﺗﯜﻥ ﮔﯧﺮﻣﺎﻧﯩﻴﯩﮕﻪ ﻳﯧﻴﯩﻠﻤﺎﻗﺘﺎ.

"ﺋﯘﻳﻐﯘﺭﻻﺭﻏﺎ ﺋﻪﺭﻛﯩﻨﻠﯩﻚ، ﺧﯩﺘﺎﻳﻼﺭ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﯨﻦ ﭼﯩﻘﯩﭗ ﻛﻪﺗﺴﯘﻥ!"

ﺑﯜﮔﯜﻥ ﮔﯧﺮﻣﺎﻧﯩﻴﯩﺪﯨﻜﻰ ﺑﺎﺭﻟﯩﻖ ﮔﯧﺰﯨﺖ - ﺟﯘﺭﻧﺎﻟﻼﺭ ﯞﻩ ﺗﯧﻠﯧﯟﯨﺰﯨﻴﻪ ﻗﺎﻧﺎﻟﻠﯩﺮﯨﻨﯩﯔ ﻧﻪﺯﯨﺮﻯ ﺗﯩﺒﻪﺗﺘﯩﻜﻰ ﻗﺎﻧﻠﯩﻖ ﻗﯩﺮﻏﯩﻨﭽﯩﻠﯩﻖ، ﺗﯩﺒﻪﺕ ﺳﻪﺭﮔﻪﺭﺩﺍﻥ ﻫﯚﻛﯜﻣﯩﺘﯩﻨﯩﯔ ﺋﯩﻨﻜﺎﺳﻰ، ﺗﯩﺒﻪﺗﻨﯩﯔ ﺗﺎﺭﯨﺨﻰ ﻫﻪﻡ ﺧﯩﺘﺎﻳﻨﯩﯔ 50 ﻳﯩﻠﺪﯨﻦ ﺑﯘﻳﺎﻥ ﺗﯩﺒﻪﺗﺘﻪ ﺋﯧﻠﯩﭗ ﺑﺎﺭﻏﺎﻥ ﺯﻭﺭﺍﯞﺍﻧﻠﯩﻖ ﻫﻪﺭﯨﻜﯩﺘﯩﮕﻪ ﻣﻪﺭﻛﻪﺯﻟﻪﺷﻜﻪﻥ. ﮔﻮﻳﺎ ﭘﯜﺗﻜﯜﻝ ﺋﺎﺧﺒﺎﺭﺍﺕ ﺳﺎﻫﻪﺳﻰ ﺧﯩﺘﺎﻳﻨﯩﯔ ﺋﻪﭘﺘﻰ - ﺑﻪﺷﯩﺮﯨﺴﯩﻨﻰ ﺋﯧﭽﯩﺸﻘﺎ ﺋﻮﺭﺗﺎﻕ ﺑﻪﻝ ﺑﺎﻏﻠﯩﻐﺎﻧﺪﻩﻙ، ﺧﯩﺘﺎﻳﺪﯨﻜﻰ ﺯﯗﻟﯘﻣﻼﺭﻧﻰ، ﺋﯩﻨﺴﺎﻥ ﻫﻪﻗﻠﯩﺮﻯ ﺩﻩﭘﺴﻪﻧﺪﯨﭽﯩﻠﯩﻜﯩﻨﻰ ﻛﻪﯓ ﭘﺎﺵ ﻗﯩﻠﻤﺎﻗﺘﺎ. ﻫﻪﺭ ﻛﯜﻧﻰ، ﻫﻪﺭ ﺳﺎﺋﻪﺕ، ﻫﻪﺭ ﻗﺎﻧﺎﻟﺪﺍ ﺧﯩﺘﺎﻳﺪﯨﻜﻰ ﺋﯩﻨﺴﺎﻧﯩﻴﻪﺗﺴﯩﺰﻟﯩﻚ ﻫﻪﻡ ﺗﯩﺒﻪﺕ ﻫﻪﻗﻘﯩﺪﯨﻜﻰ ﺧﻪﯞﻩﺭﻟﻪﺭ ﺋﯜﺯﯛﻟﺪﯛﺭﻣﻪﻱ ﺑﯧﺮﯨﻠﻤﻪﻛﺘﻪ. ﮔﯧﺰﯨﺘﻼﺭﻧﯩﯔ ﻫﻪﺭ ﺑﯩﺮ ﺳﺎﻧﯩﺪﺍ ﺗﯩﺒﻪﺗﻜﻪ ﺋﺎﺋﯩﺖ ﻧﻪﭼﭽﻪ ﭘﺎﺭﭼﯩﺪﯨﻦ ﺧﻪﯞﻩﺭ ﯞﻩ ﻣﺎﻗﺎﻟﯩﻼﺭ ﺋﯧﻼﻥ ﻗﯩﻠﯩﻨﻤﺎﻗﺘﺎ. ﺩ ﺋﯘ ﻕ ﻧﯩﯔ ﺗﻪﺷﻪﺑﺒﯘﺳﻰ ﺑﯩﻠﻪﻥ ﺗﯩﺒﻪﺕ ﻫﻪﺭﯨﻜﯩﺘﯩﻨﻰ ﻫﯩﻤﺎﻳﻪ ﻗﯩﻠﯩﺶ ﻳﯜﺯﯨﺴﯩﺪﯨﻦ ﻣﻪﻳﺪﺍﻧﻐﺎ ﭼﯩﻘﻘﺎﻥ ﺋﯘﻳﻐﯘﺭﻻﺭﻧﯩﯔ ﭘﺎﺋﺎﻟﯩﻴﻪﺗﻠﯩﺮﯨﻤﯘ ﻛﯩﺸﯩﻠﻪﺭﻧﯩﯔ ﻛﯚﺯﻟﯩﺮﯨﮕﻪ ﺭﻭﺷﻪﻥ ﭼﯧﻠﯩﻘﻤﺎﻗﺘﺎ.

3 - ﺋﺎﻳﻨﯩﯔ 18 - ﻛﯜﻧﻰ ﺋﯘﻳﻐﯘﺭﻻﺭ ﯞﻩ ﺗﯩﺒﻪﺗﻠﯩﻜﻠﻪﺭﻧﯩﯔ ﮔﯧﺮﻣﺎﻧﯩﻴﯩﻨﯩﯔ ﻣﻴﯘﻧﺨﯧﻦ ﺷﻪﻫﺮﯨﺪﻩ ﺋﯧﻠﯩﭗ ﺑﺎﺭﻏﺎﻥ ﺋﯩﻜﻜﻰ ﻗﯧﺘﯩﻤﻠﯩﻖ ﺑﯩﺮﻟﻪﺷﻤﻪ ﻧﺎﻣﺎﻳﯩﺶ ﺧﻪﯞﯨﺮﻯ ﺷﯘ ﻛﯜﻧﻰ ﺗﯧﻠﯧﯟﯨﺰﯨﻴﻪ ﻗﺎﻧﺎﻟﻠﯩﺮﯨﺪﺍ ﻛﯚﺭﺳﯩﺘﯩﻠﯩﭙﻼ ﻗﺎﻟﻤﺎﻱ، 3 - ﺋﺎﻳﻨﯩﯔ 19 - ﻛﯜﻧﯩﺪﯨﻜﻰ ﮔﯧﺰﯨﺘﻠﻪﺭﺩﯨﻨﻤﯘ ﻛﻪﯓ ﻳﻪﺭ ﺋﺎﻟﺪﻯ. ﺋﺎﻱ - ﻳﯘﻟﺘﯘﺯﻟﯘﻕ ﻛﯚﻙ ﺑﺎﻳﺮﺍﻕ ﺗﯩﺒﻪﺕ ﺑﺎﻳﺮﯨﻘﻰ ﺑﯩﻠﻪﻥ ﺑﯩﺮﮔﻪ ﻣﯩﻠﻴﻮﻧﻠﯩﻐﺎﻥ ﺗﺎﻣﺎﺷﯩﺒﯩﻨﻼﺭﻧﯩﯔ ﻧﻪﺯﯨﺮﯨﮕﻪ ﺋﯘﻻﺷﺘﻰ. ﺋﯘﻳﻐﯘﺭﻻﺭﻧﯩﯔ "ﺋﯘﻳﻐﯘﺭﻻﺭﻏﺎ ﺋﻪﺭﻛﯩﻨﻠﯩﻚ، ﺧﯩﺘﺎﻳﻼﺭ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﯨﻦ ﭼﯩﻘﯩﭗ ﻛﻪﺗﺴﯘﻥ!" ﺩﯦﮕﻪﻧﺪﻩﻙ ﺷﯘﺋﺎﺭﻟﯩﺮﻯ ﻛﯩﺸﯩﻠﻪﺭﻧﯩﯔ ﻗﯘﻻﻕ ﭘﻪﺭﺩﯨﻠﯩﺮﯨﻨﻰ ﭼﻪﻛﺘﻰ.

ﮔﯧﺮﻣﺎﻧﯩﻴﯩﺪﻩ ﺋﻮﻟﯩﻤﭙﯩﻜﻨﻰ ﺑﺎﻳﻘﯘﺕ ﻗﯩﻠﯩﺶ ﺗﻪﺭﻩﭘﺪﺍﺭﻟﯩﺮﯨﻨﯩﯔ ﻧﯩﺴﺒﯩﺘﻰ %80 ﺗﯩﻦ ﺋﯧﺸﯩﭗ ﻛﻪﺗﺘﻰ

ﺩﯨﻘﻘﻪﺗﻨﻰ ﺗﺎﺭﺗﯩﺪﯨﻐﯩﻨﻰ، 3 - ﺋﺎﻳﻨﯩﯔ 18 - ﻛﯜﻧﻰ، ﮔﯧﺮﻣﺎﻧﯩﻴﯩﺪﯨﻜﻰ 1 - ﺩﻩﺭﯨﺠﯩﻠﯩﻚ ﺗﯧﻠﯧﯟﯨﺰﯨﻴﻪ ﻗﺎﻧﯩﻠﻰ ﺑﻮﻟﻐﺎﻥ ﺋﺎ ﺭ ﺩ ﻧﯩﯔ "ﺧﯩﺘﺎﻱ 2008 - ﻳﯩﻠﻠﯩﻖ ﺋﻮﻟﯩﻤﭙﯩﻜﺘﯩﻦ ﺋﺎﻳﺮﯨﻠﯩﭗ ﻗﺎﻻﻣﺪﯗ؟" ﻧﺎﻣﻠﯩﻖ ﺗﻪﭘﺴﯩﻠﻰ ﺧﻪﯞﯨﺮﯨﺪﯨﻦ ﺋﯩﺒﺎﺭﻩﺕ. ﻣﻪﺯﻛﯘﺭ ﻗﺎﻧﺎﻝ، ﺗﯧﺨﻰ ﺋﯩﻜﻜﻰ ﻫﻪﭘﺘﻪ ﺋﯩﻠﮕﯩﺮﯨﻼ "ﺳﺎﻳﺎﻫﻪﺕ ﻣﻪﻥ`ﺋﻰ ﻗﯩﻠﯩﻨﻐﺎﻥ ﺩﯙﻟﻪﺕ" ﻧﺎﻣﻠﯩﻖ ﺋﯩﻜﻜﻰ ﻗﯩﺴﯩﻤﻠﯩﻖ ﻫﯚﺟﺠﻪﺗﻠﯩﻚ ﻓﯩﻠﯩﻤﻨﻰ ﻛﯚﺭﺳﯩﺘﯩﭗ، ﺗﯩﺒﻪﺗﻠﯩﻜﻠﻪﺭﻧﯩﯔ ﺋﯧﭽﯩﻨﯩﺸﻠﯩﻖ ﺗﻪﻗﺪﯨﺮﯨﺪﯨﻦ ﺋﻪﺗﺮﺍﭘﻠﯩﻖ ﻣﻪﻟﯘﻣﺎﺗﻼﺭ ﺑﻪﺭﮔﻪﻥ ﺋﯩﺪﻯ. ﺗﯩﺒﻪﺗﻨﻰ "ﺩﯙﻟﻪﺕ" ﺩﻩﭖ ﺋﺎﺗﯩﻐﺎﻥ ﺑﯘ ﻓﯩﻠﯩﻢ ﺋﯧﻼﻥ ﻗﯩﻠﯩﻨﻐﺎﻧﺪﺍ، ﻟﯩﺨﺎﺳﺎﺩﯨﻜﻰ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﻯ ﺗﯧﺨﻰ ﺑﺎﺷﻼﻧﻤﯩﻐﺎﻥ. "ﺧﯩﺘﺎﻱ 2008 - ﻳﯩﻠﻠﯩﻖ ﺋﻮﻟﯩﻤﭙﯩﻜﺘﯩﻦ ﺋﺎﻳﺮﯨﻠﯩﭗ ﻗﺎﻻﻣﺪﯗ؟" ﻧﺎﻣﻠﯩﻖ ﻫﯚﺟﺠﻪﺗﻠﯩﻚ ﻓﯩﻠﯩﻤﺪﻩ ﺑﻮﻟﺴﺎ، ﺗﯩﺒﻪﺗﺘﯩﻜﻰ ﮔﯧﺮﻣﺎﻥ ﻣﯘﺧﺒﯩﺮﻟﯩﺮﯨﻨﯩﯔ ﭘﺎﺟﯩﺌﻪﻟﻪﺭ ﺑﯩﻠﻪﻥ ﺗﻮﻟﻐﺎﻥ ﻧﻪﻕ ﻣﻪﻳﺪﺍﻧﺪﯨﻦ ﻳﻮﻟﻠﯩﻐﺎﻥ ﺧﻪﯞﻩﺭﻟﯩﺮﻯ ﻛﯚﺭﺳﯩﺘﯩﻠﯩﭗ، ﺑﯘﻧﯩﯖﻐﺎ ﻗﻮﺷﯘﻣﭽﻪ ﻫﺎﻟﺪﺍ 1989 - ﻳﯩﻠﻰ ﻟﯩﺨﺎﺳﺎﺩﯨﻜﻰ ﻗﯩﺮﻏﯩﻨﭽﯩﻠﯩﻖ ﺳﯧﻠﯩﺸﺘﯘﺭﻣﺎ ﻗﯩﻠﯩﻨﻐﺎﻥ ﻫﻪﻣﺪﻩ ﺗﯩﺒﻪﺗﻨﯩﯔ ﻫﺎﺯﯨﺮﻗﻰ ﺋﻮﻣﯘﻣﻰ ﯞﻩﺯﯨﻴﯩﺘﻰ ﯞﻩ ﺧﯩﺘﺎﻱ ﻗﯩﺰﯨﻞ ﺋﺎﺭﻣﯩﻴﯩﺴﯩﻨﯩﯔ ﺗﯩﺒﻪﺗﻨﻰ ﺋﯩﺴﺘﯩﻼ ﻗﯩﻠﻐﺎﻥ ﭼﺎﻏﺪﯨﻜﻰ ﻛﯚﺭﯛﻧﯜﺷﻠﯩﺮﻯ، ﺗﯩﺒﻪﺕ ﻣﻪﺩﻩﻧﯩﻴﯩﺘﯩﻨﯩﯔ ﯞﻩﻳﺮﺍﻧﭽﯩﻠﯩﻘﻘﺎ ﺋﯘﭼﺮﺍﺵ ﺋﻪﻫﯟﺍﻟﻠﯩﺮﻯ ﺗﻪﭘﺴﯩﻠﻰ ﺗﻮﻧﯘﺷﺘﯘﺭﯗﻟﻐﺎﻥ.

"ﺧﯩﺘﺎﻱ 2008 - ﻳﯩﻠﻠﯩﻖ ﺋﻮﻟﯩﻤﭙﯩﻜﺘﯩﻦ ﺋﺎﻳﺮﯨﻠﯩﭗ ﻗﺎﻻﻣﺪﯗ؟" ﻧﺎﻣﻠﯩﻖ ﻫﯚﺟﺠﻪﺗﻠﯩﻚ ﻓﯩﻠﯩﻤﺪﻩ ﺋﺎﻟﻐﺎ ﺳﯜﺭﯛﻟﮕﻪﻥ ﺋﯩﺪﯨﻴﻪ، ﺧﯩﺘﺎﻳﻨﯩﯔ 2008 - ﻳﯩﻠﻠﯩﻖ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﻰ ﺋﯚﺗﻜﯜﺯﯛﺵ ﺳﺎﻻﻫﯩﻴﯩﺘﯩﺪﯨﻦ ﻛﯜﻧﺴﯧﺮﻯ ﻣﻪﻫﺮﯗﻡ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺋﯩﺴﭙﺎﺗﻼﺷﺘﯩﻦ ﺋﯩﺒﺎﺭﻩﺕ ﺑﻮﻟﯘﭖ، ﺩﻩﻟﯩﻞ ﺋﻮﺭﻧﯩﺪﺍ ﺧﯩﺘﺎﻳﺪﯨﻜﻰ ﺯﯗﻟﯘﻣﻨﯩﯔ ﺑﺎﺭﻟﯩﻖ ﺗﯜﺭﻟﯩﺮﯨﺪﯨﻦ ﺋﯘﭼﯘﺭﻻﺭ ﻛﯚﺭﺳﯩﺘﯩﺸﻜﻪ ﺗﯩﺮﯨﺸﻘﺎﻥ.

ﺧﯩﺘﺎﻳﻨﯩﯔ ﻏﻪﺭﺑﯩﻲ ﺭﺍﻳﻮﻧﻠﯩﺮﯨﺪﯨﻜﻰ ﻣﯘﺳﺘﻪﻣﻠﯩﻜﻪ ﺋﺎﺳﺘﯩﺪﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭﻻﺭ ﯞﻩ ﺗﯩﺒﻪﺗﻠﯩﻜﻠﻪﺭﻧﯩﯔ ﺋﯧﻐﯩﺮ ﻫﻪﻗﺴﯩﺰﻟﯩﻘﻼﺭﺩﯨﻦ ﻗﯘﺗﯘﻻﻟﻤﺎﻳﯟﺍﺗﻘﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ. ﺷﯘﻧﯩﯔ ﺑﯩﻠﻪﻥ ﺑﯩﺮﮔﻪ، ﮔﯧﺮﻣﺎﻧﯩﻴﯩﻨﯩﯔ ﻫﻪﺭ ﻗﺎﻳﺴﻰ ﮔﯧﺰﯨﺖ - ﺟﯘﺭﻧﺎﻟﻠﯩﺮﻯ ﯞﻩ ﺗﯧﻠﯧﯟﯨﺰﯨﻴﻪ ﻗﺎﻧﺎﻟﻠﯩﺮﯨﺪﺍ ﻳﻮﻟﻐﺎ ﻗﻮﻳﯘﻟﯩﯟﺍﺗﻘﺎﻥ "2008 - ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﻰ ﺑﺎﻳﻘﯘﺕ ﻗﯩﻠﯩﺶ" ﻫﻪﻗﻘﯩﺪﯨﻜﻰ ﺭﺍﻱ ﺳﯩﻨﺎﺷﻨﯩﯔ ﺧﯩﺘﺎﻱ ﺋﯜﭼﯜﻥ ﭘﺎﻳﺪﯨﺴﯩﺰ ﻧﻪﺗﯩﺠﯩﻠﻪﺭﻧﻰ ﺋﻮﺗﺘﯘﺭﯨﻐﺎ ﭼﯩﻘﯩﺮﯨﯟﺍﺗﻘﺎﻧﻠﯩﻘﻰ ﻛﯚﺭﺳﯩﺘﯩﻠﮕﻪﻥ. ﻣﻪﻟﯘﻣﺎﺗﺘﺎ ﺑﯩﻠﺪﯛﺭﯛﻟﯩﺸﯩﭽﻪ، ﮔﯧﺮﻣﺎﻧﯩﻴﯩﻨﯩﯔ ﺑﻪﺯﻯ ﺋﻮﺭﯗﻧﻠﯩﺮﯨﺪﯨﻜﻰ ﺭﺍﻱ ﺳﯩﻨﺎﺷﺘﺎ 2008 - ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﻰ ﺑﺎﻳﻘﯘﺕ ﻗﯩﻠﯩﺶ ﺗﻪﺭﻩﭘﺪﺍﺭﻟﯩﺮﯨﻨﯩﯔ ﻧﯩﺴﺒﯩﺘﻰ %80 ﺗﯩﻦ ﺋﯧﺸﯩﭗ ﻛﻪﺗﻜﻪﻥ.

ﺑﯘ ﻓﯩﻠﯩﻤﮕﻪ ﭘﯩﻜﯩﺮ ﻗﺎﺗﻨﺎﺷﺘﯘﺭﻏﺎﻥ ﮔﯧﺮﻣﺎﻧﯩﻴﯩﺪﯨﻜﻰ ﺧﯩﺘﺎﻱ ﺋﯩﺸﻠﯩﺮﻯ ﻣﯘﺗﻪﺧﻪﺳﺴﯩﺴﻠﯩﺮﻯ، ﺧﯩﺘﺎﻳﺪﯨﻜﻰ ﺑﺎﺭﻟﯩﻖ ﺑﻪﺧﺘﺴﯩﺰﻟﯩﻜﻨﻰ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﻪ ﯞﻩ ﺋﯘﻧﯩﯔ ﻣﯘﺳﺘﻪﺑﯩﺖ ﻫﯚﻛﯜﻣﺮﺍﻧﻠﯩﻘﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﯟﺍﺗﻘﺎﻧﻠﯩﻘﯩﻨﻰ، ﺑﯘ ﻗﯧﺘﯩﻤﻘﻰ ﺧﯩﺘﺎﻳﺪﯨﻜﻰ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻐﺎ ﻗﺎﺭﺷﻰ ﺧﻪﻟﻘﺌﺎﺭﺍﻟﯩﻖ ﺑﯧﺴﯩﻤﻨﯩﯔ ﺋﯩﻠﮕﯩﺮﻯ ﻫﯧﭽﻘﺎﻧﺪﺍﻕ ﺑﯩﺮ ﺩﯙﻟﻪﺗﻨﯩﯔ ﺑﯧﺸﯩﻐﺎ ﻛﯧﻠﯩﭗ ﺑﺎﻗﻤﯩﻐﺎﻧﻠﯩﻘﯩﻨﻰ، ﻗﺎﺭﺷﯩﻠﯩﻘﻼﺭﻧﯩﯔ ﺑﯘﻧﺪﯨﻦ ﻛﯧﻴﯩﻦ ﻳﻪﻧﯩﻤﯘ ﻛﯜﭼﯩﻴﯩﺸﻰ ﻣﯘﻣﻜﯩﻨﻠﯩﻜﯩﻨﻰ ﺗﯩﻠﻐﺎ ﺋﺎﻟﻐﺎﻥ.

ﮔﯧﺮﻣﺎﻧﯩﻴﯩﺪﻩ ﺧﯩﺘﺎﻳﻐﺎ ﻗﺎﺭﺷﻰ ﺩﻭﻟﻘﯘﻥ

ﮔﯧﺮﻣﺎﻧﯩﻴﯩﺪﯨﻜﻰ ﺧﯩﺘﺎﻱ ﻛﻮﻧﺴﯘﻟﺨﺎﻧﯩﺴﯩﻐﺎ ﺑﯧﺴﯩﭗ ﻛﯩﺮﯨﺶ ﯞﻩﻗﻪﺳﯩﻨﯩﯔ ﺩﺍﯞﺭﯨﯖﻰ، ﻫﻪﺭ ﻗﺎﻳﺴﻰ ﺋﯚﻟﻜﯩﻠﻪﺭﺩﻩ ﺩﺍﯞﺍﻡ ﻗﯩﻠﯩﯟﺍﺗﻘﺎﻥ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻠﯩﺮﻯ، ﺗﯩﺒﻪﺗﻨﻰ ﻗﻮﻟﻼﺵ ﯞﻩ ﺧﯩﺘﺎﻳﻨﻰ ﺟﺎﺯﺍﻻﺵ ﺗﻮﻏﺮﯨﺴﯩﺪﺍ ﺑﺎﺷﻼﻧﻐﺎﻥ ﻣﻪﻣﻠﯩﻜﻪﺕ ﺧﺎﺭﺍﻛﺘﯧﺮﻟﯩﻚ ﺋﯩﻤﺰﺍ ﺗﻮﭘﻼﺵ ﭘﺎﺋﺎﻟﯩﻴﯩﺘﻰ، ﺋﻮﻟﯩﻤﭙﯩﻜﻨﻰ ﺑﺎﻳﻘﯘﺕ ﻗﯩﻠﯩﺶ ﻳﯜﺯﯨﺴﯩﺪﯨﻦ ﻳﻮﻟﻐﺎ ﻗﻮﻳﯘﻟﻐﺎﻥ ﺭﺍﻱ ﺳﯩﻨﺎﺵ، ﮔﯧﺮﻣﺎﻧﯩﻴﯩﻨﯩﯔ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﯨﻨﯩﯔ ﺑﯧﻴﺠﯩﯖﻨﻰ ﺋﻪﻳﯩﺒﻠﻪﭖ، ﺋﻮﻟﯩﻤﭙﯩﻜﻨﻰ ﺑﺎﻳﻘﯘﺕ ﻗﯩﻠﯩﺶ ﭘﯩﻜﯩﺮﻟﯩﺮﯨﻨﻰ ﺩﺍﯞﺍﻡ ﻗﯩﻠﯩﺸﻰ ﻫﻪﻡ ﺩﺍﻻﻱ ﻻﻣﺎﻧﯩﯔ ﮔﯧﺮﻣﺎﻧﯩﻴﯩﺪﯨﻜﻰ ﻣﯘﺭﯨﺘﻠﯩﺮﯨﻨﯩﯔ ﻫﻪﺭ ﺗﯜﺭﻟﯜﻙ ﺟﺎﻧﻠﯩﻖ ﭘﺎﺋﺎﻟﯩﻴﻪﺗﻠﯩﺮﻯ، ﺑﯜﮔﯜﻥ ﭘﯜﺗﯜﻥ ﮔﯧﺮﻣﺎﻧﯩﻴﻪ ﺧﯘﺩﺩﻯ ﺗﯩﺒﻪﺕ ﻣﻪﺳﯩﻠﯩﺴﯩﮕﻪ ﺑﺎﺭﻟﯩﻘﯩﻨﻰ ﺋﺎﺗﯩﻐﺎﻧﺪﻩﻙ ﺑﯩﺮ ﯞﻩﺯﯨﻴﻪﺗﻨﻰ ﻧﺎﻣﺎﻳﻪﻥ ﻗﯩﻠﻤﺎﻗﺘﺎ. ﺗﯧﺨﯩﻤﯘ ﺟﻪﻟﯩﭗ ﻗﯩﻼﺭﻟﯩﻘﻰ، ﻣﻪﺗﺒﯘﺋﺎﺗﻼﺭﺩﺍ "ﺗﯩﺒﻪﺕ" ﺩﯦﮕﻪﻥ ﺋﺎﺗﺎﻟﻐﯘ ﻳﻪﺭ ﺋﺎﻟﻐﺎﻥ ﺟﺎﻳﺪﺍ، "ﺋﯘﻳﻐﯘﺭ" ﺩﯦﮕﻪﻥ ﻧﺎﻡ ﺋﯚﺯﯨﻨﻰ ﻛﯚﺭﺳﻪﺗﻤﻪﻛﺘﻪ. (ﺋﻪﻛﺮﻩﻡ)