ﻣﻴﺎ ﻓﯧﺮﻭﯞ ﺧﺎﻧﯩﻢ ﺟﻮﺭﺝ ﺑﯘﺷﻨﻰ ﺧﯩﺘﺎﻳﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﻰ ﻣﻪﺳﯩﻠﯩﺪﻩ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﺸﻘﺎ ﭼﺎﻗﯩﺮﺩﻯ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﻳﯩﻞ ﺋﺎﯞﻏﯘﺳﺘﺘﺎ ﺑﯧﻴﺠﯩﯖﺪﺍ ﺋﯚﺗﻜﯜﺯﯛﻟﯩﺪﯨﻐﺎﻥ 2008- ﻳﯩﻠﻠﯩﻖ ﺋﻮﻟﯩﻤﭙﯩﻚ ﻳﯩﻐﯩﻨﯩﻨﻰ ﺋﯚﺯ ﺩﯙﻟﻪﺕ ﻛﯜﭼﯩﻨﻰ ﻧﺎﻣﺎﻳﺎﻥ ﻗﯩﻠﯩﺪﯨﻐﺎﻥ ﺳﻪﻫﻨﻪ ﻗﯩﻠﯩﺸﻨﻰ ﻛﯚﯕﻠﯩﮕﻪ ﭘﯜﻛﯜﯞﺍﺗﻘﺎﻥ ﺑﻮﻟﺴﯩﻤﯘ، ﺧﯩﺘﺎﻳﻨﯩﯔ ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﯩﻨﻰ ﺑﻮﻏﯘﺷﻰ، ﻛﯩﺸﯩﻠﯩﻚ ﻫﻮﻗﯘﻗﻨﻰ ﺩﻩﭘﺴﻪﻧﺪﻩ ﻗﯩﻠﯩﺸﻰ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺭﻏﯩﺒﺎﺗﭽﯩﻠﯩﺮﯨﻨﻰ ﻗﻮﻟﻐﺎ ﺋﯧﻠﯩﺸﻰ ﺑﯘ ﻧﯚﯞﻩﺗﻠﯩﻚ ﺋﻮﻟﯩﻤﭙﯩﻚ ﻳﯧﺘﯩﭗ ﻛﯧﻠﯩﺶ ﺋﺎﻟﺪﯨﺪﺍ ﺧﯩﺘﺎﻳﻨﯩﯔ ﺩﯙﻟﻪﺕ ﺋﻪﻫﯟﺍﻟﯩﻨﻰ ﺩﯗﻧﻴﺎ ﺋﺎﺧﺒﺎﺭﺍﺕ ﺳﺎﻫﻪﺳﯩﻨﯩﯔ ﻣﻪﺭﻛﯩﺰﻯ ﻧﯘﻗﺘﯩﺴﯩﻐﺎ ﺋﺎﻳﻼﻧﺪﯗﺭﯗﭖ ﻗﻮﻳﻐﺎﻥ ﺑﻮﻟﺴﺎ، ﺧﯩﺘﺎﻳﻨﯩﯔ ﺩﺍﺭﻓﯘﺭ ﺭﺍﻳﻮﻧﯩﺪﺍ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻖ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺳﯘﺩﺍﻥ ﻫﯚﻛﯜﻣﯩﺘﯩﻨﻰ ﻫﻪﺭ ﺗﻪﺭﻩﭘﺘﯩﻦ ﻗﻮﻟﻠﯩﺸﻰ ﺑﯘ ﻧﯚﯞﻩﺗﻠﯩﻚ ﺋﻮﻟﯩﻤﭙﯩﻜﯩﻨﻰ ﻗﯩﺮﻏﯩﻨﭽﯩﻠﯩﻖ ﺋﻮﻟﯩﻤﭙﯩﻜﻰ ﺩﻩﭖ ﺋﺎﺗﺎﺷﻘﺎ ﺳﻪﯞﻩﺏ ﺑﻮﻟﻐﺎﻥ ﺋﯩﺪﻯ.

2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﻗﯩﺮﻏﯩﻨﭽﯩﻠﯩﻖ ﺋﻮﻟﯩﻤﭙﯩﻜﻰ ﺩﻩﭖ ﺋﺎﺗﺎﻟﺪﻯ

ﺧﯩﺘﺎﻱ ﺭﻩﻫﺒﻪﺭﻟﯩﺮﯨﻨﻰ ﺳﯘﺩﺍﻧﻐﺎ ﺗﯘﺗﻘﺎﻥ ﻗﯘﻻﻕ ﻳﻮﭘﯘﺭﯗﯞﯦﻠﯩﺶ ﺳﯩﻴﺎﺳﯩﺘﯩﻨﻰ ﺋﯚﺯﮔﻪﺭﺗﯩﺶ ﯞﻩ ﺋﯘﻻﺭﺩﺍ ﺩﺍﺭﻓﯘﺭﺩﺍ ﺑﯩﮕﯘﻧﺎﻫ ﺋﯚﻟﯜﭖ ﻛﯧﺘﯩﯟﺍﺗﻘﺎﻥ ﺋﺎﺩﻩﻣﻠﻪﺭﮔﻪ ﻧﯩﺴﺒﻪﺗﻪﻥ ﻣﻪﺳﺌﯘﻟﯩﻴﻪﺕ ﺗﯘﻳﻐﯘﺳﻰ ﭘﻪﻳﺪﺍ ﻗﯩﻠﯩﺶ ﺋﯜﭼﯜﻥ ﻫﻪﺭ ﺗﯜﺭﻟﯜﻙ ﭘﺎﺋﺎﻟﯩﻴﻪﺗﻠﻪﺭﻧﻰ ﺋﯧﻠﯩﭗ ﺑﯧﺮﯨﭗ ﻛﯧﻠﯩﯟﺍﺗﻘﺎﻥ ﻛﯩﻨﻮ ﭼﻮﻟﭙﯩﻨﻰ، ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﺴﻰ ﻣﯩﻴﺎ ﻓﯧﺮﺭﻭﯞ ﺧﺎﻧﯩﻢ ﺋﯚﺗﻜﻪﻥ ﻳﯩﻠﻰ ﺋﺎﭘﺮﯦﻠﺪﺍ ﯞﺍﻝ-ﺳﺘﺮﯦﺖ ﮊﯗﺭﻧﯩﻠﯩﺪﺍ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻳﻨﯩﯔ ﺩﺍﺭﻓﯘﺭﺩﺍ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻖ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺳﯘﺩﺍﻥ ﻫﯚﻛﯜﻣﯩﺘﯩﮕﻪ ﺳﯩﻴﺎﺳﯩﻲ، ﺩﯨﭙﻠﻮﻣﺎﺗﯩﻚ، ﺋﯩﻘﺘﯩﺴﺎﺩﻯ ﯞﻩ ﻫﻪﺭﺑﯩﻲ ﺟﻪﻫﻪﺗﺘﻪ ﻳﺎﺭﺩﻩﻡ ﺑﯧﺮﯨﭗ ﻛﯧﻠﯩﯟﺍﺗﻘﺎﻧﻠﯩﻘﻰ ﺳﻪﯞﻩﺑﻠﯩﻚ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﻗﯩﺮﻏﯩﻨﭽﯩﻠﯩﻖ ﺋﻮﻟﯩﻤﭙﯩﻜﻰ ﺩﻩﭖ ﺋﺎﺗﯩﻐﺎﻥ.

ﻓﯧﺮﻭﯞ ﺧﺎﻧﯩﻢ ﻳﻪﻧﻪ، ﺑﯘ ﺋﻮﻟﯩﻤﭙﯩﻜﻨﯩﯔ ﺑﻪﺩﯨﺌﯩﻲ ﻳﯧﺘﻪﻛﭽﯩﻠﯩﻚ ﯞﻩﺯﯨﭙﯩﺴﯩﻨﻰ ﺋﯜﺳﺘﯩﮕﻪ ﺋﺎﻟﻐﺎﻥ ﺭﯦﮋﯨﺴﺴﻮﺭ ﺳﺘﯧﯟﯨﻦ ﺳﭙﯩﯧﻠﺒﯧﺮﮒ ﺋﻪﭘﻪﻧﺪﯨﮕﻪ ﻣﻪﻛﺘﯘﭖ ﻳﻮﻟﻼﭖ، ﺋﯘﻧﯩﯔ 1936- ﻳﯩﻠﻰ ﻧﺎﺗﺴﯧﺴﺘﻼﺭ ﮔﯧﺮﻣﺎﻧﯩﻴﻪ ﻫﺎﻛﯩﻤﯩﻴﻪﺕ ﺩﻩﯞﺭﯨﺪﻩ ﺋﯚﺗﻜﯜﺯﯛﻟﮕﻪﻥ 1936- ﻳﯩﻠﻠﯩﻖ ﺑﯧﺮﻟﯩﻦ ﺋﻮﻟﯩﻤﭙﯩﻜﯩﻨﯩﯔ ﺑﻪﺩﯨﺌﯩﻲ ﻓﯩﻠﯩﻢ ﺭﯦﮋﯨﺴﺴﻮﺭﻯ ﻟﯧﻨﻰ ﺭﯨﻴﻔﯧﻨﺴﺘﺎﻫﻞ ﺑﯩﻠﻪﻥ ﺑﯩﺮ ﻧﺎﻣﺪﺍ ﺋﺎﺗﯩﻠﯩﭗ ﻗﯧﻠﯩﺶ ﺧﻪﺗﯩﺮﯨﺪﻩ ﺗﯘﺭﻏﺎﻧﻠﯩﻘﻰ ﻫﻪﻗﻘﯩﺪﻩ ﺋﺎﮔﺎﻫﻼﻧﺪﯗﺭﯗﺵ ﺑﻪﺭﮔﻪﻧﺪﯨﻦ ﻛﯩﻴﯩﻦ، ﺳﭙﯩﺌﻪﻟﺒﻪﺭﮒ ﺋﻪﭘﻪﻧﺪﯨﻤﯘ ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞﻏﺎ ﻣﻪﻛﺘﯘﭖ ﻳﻮﻟﻼﭖ، ﺋﯘﻧﻰ ﺩﺍﺭﻓﯘﺭ ﻣﻪﺳﯩﻠﯩﺪﻩ ﻫﻪﺭﯨﻜﻪﺕ ﻗﯩﻠﯩﺸﻘﺎ ﭼﺎﻗﯩﺮﻏﺎﻥ ﺋﯩﺪﻯ.

ﺳﺘﯧﯟﯨﻦ ﺳﭙﯩﯧﻠﺒﯧﺮﮒ:"ﯞﯨﺠﺪﺍﻧﯩﻢ، ﺑﯘ ﺋﯩﺸﻨﻰ ﻧﻮﺭﻣﺎﻝ ﺩﺍﯞﺍﻣﻼﺷﺘﯘﺭﯗﺷﯘﻣﻐﺎ ﻳﻮﻝ ﻗﻮﻳﻤﯩﺪﻯ"

ﺧﯩﺘﺎﻳﻨﯩﯔ ﺳﯘﺩﺍﻧﻐﺎ ﺑﻮﻟﻐﺎﻥ ﺳﯩﻴﺎﺳﯩﺘﯩﺪﻩ ﺟﯜﻣﻠﯩﺪﯨﻦ ﺩﺍﺭﻓﯘﺭﻧﯩﯔ ﻫﺎﺯﯨﺮﻗﻰ ﺋﻪﻫﯟﺍﻟﯩﺪﺍ ﻛﯚﺭﯛﻧﻪﺭﻟﯩﻚ ﻳﺎﺧﺸﯩﻠﯩﻨﯩﺶ ﺑﻮﻟﻤﯩﻐﺎﻧﺪﯨﻦ ﻛﯧﻴﯩﻦ، 13- ﻓﯧﯟﺭﺍﻝ ﻛﯜﻧﻰ، 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﯩﯔ ﺑﻪﺩﯨﺌﯩﻲ ﻣﻪﺳﻠﯩﻬﻪﺗﭽﯩﻠﯩﻚ ﯞﻩﺯﯨﭙﯩﺴﯩﻨﻰ ﺋﯜﺳﺘﯩﮕﻪ ﺋﺎﻟﻐﺎﻥ ﻫﻮﻟﻠﯩﯟﯗﺩﻧﯩﯔ ﻣﻪﺷﻬﯘﺭ ﻛﯩﻨﻮ ﺭﯦﮋﯨﺴﺴﻮﺭﻯ ﺳﺘﯧﯟﯨﻦ ﺳﭙﯩﯧﻠﺒﯧﺮﮒ ﻣﻪﺯﻛﯘﺭ ﯞﻩﺯﯨﭙﯩﺪﯨﻦ ﺋﯩﺴﺘﯧﭙﺎ ﺑﻪﺭﮔﻪﻧﻠﯩﻜﯩﻨﻰ ﺋﯧﻼﻥ ﻗﯩﻠﺪﻯ.

ﺋﯘ ﺑﺎﻳﺎﻧﺎﺗﻨﺎﻣﯩﺴﯩﺪﺍ، ﺋﯚﺯﯨﻨﯩﯔ ﻧﯧﻤﻪ ﺋﯜﭼﯜﻥ ﻣﻪﺯﻛﯘﺭ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﻐﺎﻧﻠﯩﻘﯩﻨﻰ ﻫﻪﻗﻘﯩﺪﻩ ﭼﯜﺷﻪﻧﭽﻪ ﺑﯧﺮﯨﭗ: "ﯞﯨﺠﺪﺍﻧﯩﻢ، ﺑﯘ ﺋﯩﺸﻨﻰ ﻧﻮﺭﻣﺎﻝ ﺩﺍﯞﺍﻣﻼﺷﺘﯘﺭﯗﺷﯘﻣﻐﺎ ﻳﻮﻝ ﻗﻮﻳﻤﯩﺪﻯ" ﺩﻩﭖ ﻳﺎﺯﻏﺎﻥ.

ﻓﯧﺮﻭﯞ ﺧﺎﻧﯩﻢ :"ﻣﯘﺳﺘﻪﺑﯩﺖ ﻫﺎﻛﯩﻤﯩﻴﻪﺕ ﭼﻮﻗﯘﻡ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ ﻫﻪﺭﯨﻜﻪﺕ ﻗﻮﻟﻠﯩﻨﯩﺸﻘﺎ ﻗﯩﺴﺘﯩﻠﯩﺸﻰ ﻛﯧﺮﻩﻙ"

19 - ﻓﯧﯟﺭﺍﻝ ﺳﻪﻳﺸﻪﻧﺒﻪ ﻛﯜﻧﻰ ﻣﻴﺎ ﻓﯧﺮﻭﯞ ﺧﺎﻧﯩﻢ ﯞﻩ ﺋﻮﻏﻠﻰ ﺭﻭﻧﺎﻥ ﻓﯧﺮﻭﯞﻻﺭ ﯞﺍﻝ-ﺳﺘﺮﯦﺖ ﮊﯗﺭﻧﯩﻠﯩﺪﺍ "ﺑﯩﺮ ﺋﻮﻟﯩﻤﭙﯩﻚ ﻏﻪﻟﯩﺒﯩﺴﻰ" ﻧﺎﻣﻠﯩﻖ ﺑﯩﺮ ﭘﺎﺭﭼﻪ ﻣﺎﻗﺎﻟﻪ ﺋﯧﻼﻥ ﻗﯩﻠﯩﭗ، ﺳﺘﯧﯟﯨﻦ ﺳﭙﯩﺌﻪﻟﺒﻪﺭﮒ ﺋﻪﭘﻪﻧﺪﯨﻨﯩﯔ ﺋﻮﻟﯩﻤﭙﯩﻚ ﺑﻪﺩﯨﺌﯩﻲ ﻣﻪﺳﻠﯩﻬﻪﺗﭽﯩﻠﯩﻚ ﯞﻩﺯﯨﭙﯩﺴﯩﺪﯨﻦ ﺋﯩﺴﺘﯩﭙﺎ ﺑﻪﺭﮔﻪﻧﻠﯩﻜﯩﻨﯩﯔ ﺑﯩﺮ ﺧﻪﻳﯩﺮﻟﯩﻚ ﺋﯩﺶ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﻓﯧﺮﻭﯞ ﺧﺎﻧﯩﻢ ﻣﺎﻗﺎﻟﯩﺴﯩﺪﻩ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﯩﯔ ﺧﯩﺘﺎﻱ ﺋﯜﭼﯜﻥ 1989- ﻳﯩﻠﯩﺪﯨﻜﻰ ﺗﻴﻪﻧﺌﻪﻧﻤﯧﻦ ﯞﻩﻗﻪﺳﯩﺪﯨﻦ ﻛﯧﻴﯩﻨﻜﻰ ﺋﯚﺯﯨﻨﻰ ﻛﯚﺭﺳﯩﺘﯩﺶ ﺳﻮﺭﯗﻧﻰ ﺋﯩﻜﻪﻧﻠﯩﻜﻰ ﺳﻪﯞﻩﺑﻠﯩﻚ ﺧﯩﺘﺎﻳﺪﺍ ﻫﺎﺯﯨﺮ ﻛﻮﭼﺎ-ﻛﻮﻳﻼﺭﻧﻰ ﺳﺎﺭﺍﯕﻼﺭﭼﻪ ﺗﺎﺯﯨﻼﺵ، ﻗﯘﺭﯗﻟﯘﺷﻼﺭﻧﻰ ﺋﯧﻠﯩﭗ ﺑﯧﺮﯨﺶ ﯞﻩ ﺑﯘﻟﻐﯩﻨﯩﺸﻘﺎ ﻗﺎﺭﺷﻰ ﭼﺎﺭﯨﻠﻪﺭﻧﯩﯔ ﻗﯩﻠﯩﻨﯩﯟﺍﺗﻘﺎﻧﻠﯩﻘﯩﺪﯨﻦ ﻫﻪﻳﺮﺍﻥ ﻗﯧﻠﯩﺸﻘﺎ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ ﯞﻩ: " ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﮕﻪ ﺳﯘﺋﺎﻝ ﻗﻮﻳﯘﻟﯘﺷﻤﯘ ﻫﻪﻳﺮﺍﻥ ﻗﺎﻻﺭﻟﯩﻖ ﺋﻪﻣﻪﺱ. ﺋﻪﻣﻪﻟﯩﻴﻪﺗﺘﻪ ﺑﯘ ﻗﺎﺗﻤﺎﻝ ﻣﯘﺳﺘﻪﺑﯩﺖ ﻫﺎﻛﯩﻤﯩﻴﻪﺕ ﭼﻮﻗﯘﻡ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ ﻫﻪﺭﯨﻜﻪﺕ ﻗﻮﻟﻠﯩﻨﯩﺸﻘﺎ ﻗﯩﺴﺘﯩﻠﯩﺸﻰ ﻛﯧﺮﻩﻙ" ﺩﻩﭖ ﺗﻪﻛﯩﺘﻠﯩﺪﻯ.

ﺋﯘ ﻳﻪﻧﻪ، ﺧﯩﺘﺎﻳﻨﯩﯔ "ﺑﯩﺮ ﺩﯗﻧﻴﺎ، ﺑﯩﺮ ﺋﺎﺭﺯﯗ" ﺷﻮﺋﺎﺭﻯ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ: " ﺑﯘ ﺯﺍﻣﺎﻧﯩﯟﻯ ﺧﯩﺘﺎﻳﻨﯩﯔ ﺋﺎﺭﺯﯗﺳﻰ ﺑﻮﻟﯘﭖ، ﺋﯘﻧﯩﯔ ﺋﯚﺯ ﺋﯩﻠﻰ ﺋﯩﭽﯩﺪﻩ ﻛﯩﺸﯩﻠﯩﻚ ﻫﻮﻗﯘﻗﯩﻨﻰ ﻗﺎﺗﺘﯩﻖ ﺋﯩﺴﻜﻪﻧﺠﯩﮕﻪ ﺋﯧﻠﯩﺸﻰ ﯞﻩ ﺗﺎﺷﻘﻰ ﺳﯩﻴﺎﺳﯩﺘﻰ ﺑﯘ ﻧﯚﯞﻩﺗﻠﯩﻚ ﺋﻮﻟﯩﻤﭙﯩﻜﻨﯩﯔ ﺑﺎﺵ ﺗﯧﻤﯩﺴﯩﻨﻰ ﺟﯩﺪﺩﯨﻲ ﺑﻪﻟﮕﯩﻠﻪﺵ ﺋﺎﻟﺪﯨﺪﺍ ﺗﯘﺭﻣﺎﻗﺘﺎ" ﺩﻩﭖ ﻳﺎﺯﺩﻯ.

ﻓﯧﺮﻭﯞ ﺧﺎﻧﯩﻢ :"ﺟﻮﺭﺝ ﺑﯘﺵ ﻗﯩﺮﻏﯩﻨﭽﯩﻠﯩﻖ ﺋﻮﻟﯩﻤﭙﯩﻜﯩﮕﻪ ﻗﺎﺗﻨﯩﺸﯩﭗ ﺋﯚﺯ ﺋﻮﺭﻧﯩﻨﻰ ﺧﯩﺘﺎﻱ ﭘﺮﯦﺰﯨﺪﯦﻨﺘﻰ ﺧﯘ ﺟﯩﻨﺘﺎﯞ ﺑﯩﻠﻪﻥ ﺑﯩﺮ ﻳﻪﺭﮔﻪ ﻗﻮﻳﻤﺎﺳﻠﯩﻘﻰ ﻛﯧﺮﻩﻙ"

ﻓﯧﺮﻭﯞ ﺧﺎﻧﯩﻢ ﻳﻪﻧﻪ، ﺋﻪﻧﮕﯩﻠﯩﻴﻪ ﺷﺎﻫﺰﺍﺩﯨﺴﻰ ﭼﺎﺭﻟﯩﺰﻧﯩﯔ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﻐﺎﻧﻠﯩﻘﯩﻨﻰ، ﺳﺘﯧﯟﯨﻦ ﺳﭙﯩﯧﻠﺒﯧﺮﮒ ﺋﻪﭘﻪﻧﺪﯨﻨﯩﯔ ﺋﯚﺯ ﯞﯨﺠﺪﺍﻧﻰ ﻣﻪﺳﺌﯘﻟﯩﻴﯩﺘﯩﮕﻪ ﻳﯜﺯ ﻛﯧﻠﯩﺪﯨﻐﺎﻥ ﺋﯩﺶ ﻗﯩﻠﻐﺎﻧﻠﯩﻘﯩﻨﻰ ﻛﯚﺭﺳﻪﺗﻜﻪﻥ ﺑﻮﻟﺴﺎ، ﺑﯘ ﻳﯩﻠﻠﯩﻖ ﺋﻮﻟﯩﻤﭙﯩﻜﻜﻪ ﻗﺎﺗﻨﯩﺸﯩﺶ ﺗﻪﻛﻠﯩﭙﯩﻨﻰ ﻗﻮﺑﯘﻝ ﻗﯩﻠﻐﺎﻥ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺷﻨﯩﯔ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﻨﻰ ﺩﻩﭘﺴﻪﻧﺪﻩ ﻗﯩﻠﯩﺸﻰ ﯞﻩ ﭼﻪﺗﺌﻪﻟﻠﻪﺭﺩﻩ ﺋﯩﻨﺴﺎﻧﯩﻴﻪﺗﻜﻪ ﻗﺎﺭﺷﻰ ﺟﯩﻨﺎﻳﻪﺗﻠﻪﺭﮔﻪ ﺷﯧﺮﯨﻚ ﺑﻮﻟﯘﺷﻰ ﻫﻪﻗﻘﯩﺪﯨﻜﻰ ﺳﯘﺋﺎﻟﻼﺭﺩﯨﻦ ﺋﻪﭘﭽﯩﻠﻠﯩﻚ ﺑﯩﻠﻪﻥ ﺋﯚﺯﯨﻨﻰ ﻗﺎﭼﯘﺭﻏﺎﻧﻠﯩﻘﯩﻨﻰ ﺋﻪﻳﯩﺒﻠﯩﺪﻯ ﯞﻩ : " ﺑﯩﺰﻧﯩﯔ ﺟﻮﺭﺝ ﺑﯘﺷﻨﯩﯔ ﻧﯧﻤﻪ ﺩﯦﻴﯩﺸﻰ ﺑﯩﻠﻪﻥ ﻛﺎﺭﯨﻤﯩﺰ ﻳﻮﻕ. ﺋﻪﻣﻤﺎ ﺋﯘ ﺑﯘ ﻳﯩﻞ ﺋﺎﻣﯧﺮﯨﻜﺎ ﺧﻪﻟﻘﯩﮕﻪ ﯞﻩﻛﯩﻠﻠﯩﻚ ﻗﯩﻠﯩﺪﯗ. ﺋﯘ ﻗﯩﺮﻏﯩﻨﭽﯩﻠﯩﻖ ﺋﻮﻟﯩﻤﭙﯩﻜﯩﮕﻪ ﻗﺎﺗﻨﯩﺸﯩﭗ ﺋﯚﺯ ﺋﻮﺭﻧﯩﻨﻰ ﺧﯩﺘﺎﻱ ﭘﺮﯦﺰﯨﺪﯦﻨﺘﻰ ﺧﯘ ﺟﯩﻨﺘﺎﯞ ﺑﯩﻠﻪﻥ ﺑﯩﺮ ﻳﻪﺭﮔﻪ ﻗﻮﻳﺴﯘﻧﻤﯘ؟" ﺩﻩﭖ ﺧﯩﺘﺎﺏ ﻗﯩﻠﺪﻯ.

ﺋﯘ ﻳﻪﻧﻪ، ﺑﯘﺵ ﺋﻪﭘﻪﻧﺪﯨﮕﻪ ﺋﻮﺧﺸﺎﺵ ﺑﯩﺮ ﻗﯩﺴﯩﻢ ﺗﻪﺳﯩﺮﻟﯩﻚ ﺳﯩﻴﺎﺳﯩﻲ ﺷﻪﺧﺴﻠﻪﺭﻧﻰ ﺧﯩﺘﺎﻳﻨﯩﯔ ﻧﺎﭼﺎﺭ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﮕﻪ ﻗﺎﺭﯨﺘﯩﻠﻐﺎﻥ ﻛﯜﭼﻠﯜﻙ ﺑﺎﻳﺎﻧﺎﺗﻼﺭﻧﻰ ﺋﯧﻼﻥ ﻗﯩﻠﯩﺸﻘﺎ ﭼﺎﻗﯩﺮﺩﻯ ﯞﻩ: " ﺋﻪﻣﻤﺎ ﺋﯘﻻﺭﻧﯩﯔ ﻳﯧﻘﯩﻨﺪﺍ ﺑﯘ ﺋﻮﻟﯩﻤﭙﯩﻜﻜﻪ ﻗﺎﺗﻨﯩﺸﯩﺸﻨﻰ ﺭﻩﺕ ﻗﯩﻠﻐﺎﻥ ﺋﻪﻧﮕﻠﯩﻴﻪ ﺷﺎﻫﺰﺍﺩﯨﺴﻰ ﺑﺎﺷﻠﯩﻐﺎﻥ ﻳﻮﻟﻐﺎ ﺋﻪﮔﯩﺸﯩﺪﯨﻐﺎﻧﻐﺎ ﯞﺍﻗﺘﻰ ﺑﺎﺭ" ﺩﻩﭖ ﻛﯚﺭﺳﻪﺗﺘﻰ.

ﺩﺍﺭﻓﯘﺭﺩﺍ 200 ﻣﯩﯖﺪﯨﻦ ﺋﺎﺭﺗﯘﻕ ﺋﺎﺩﻩﻡ ﺋﯚﻟﯜﭖ ﻛﻪﺗﻜﻪﻥ

ﺳﯘﺩﺍﻥ ﻫﯚﻛﯜﻣﯩﺘﯩﻨﯩﯔ 2003- ﻳﯩﻠﯩﺪﯨﻦ ﺑﯘﻳﺎﻥ ﺩﺍﺭﻓﯘﺭ ﺭﺍﻳﻮﻧﯩﺪﺍ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻗﯩﺮﻏﯩﻨﭽﯩﻠﯩﻖ ﯞﻩ ﺳﯩﺴﺘﯧﻤﯩﻠﯩﻖ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﻰ ﺟﻪﺭﻳﺎﻧﯩﺪﺍ ﺩﺍﺭﻓﯘﺭﺩﺍ 200 ﻣﯩﯖﺪﯨﻦ ﺋﺎﺭﺗﯘﻕ ﺋﺎﺩﻩﻡ ﺋﯚﻟﯜﭖ ﻛﻪﺗﻜﻪﻥ ﺑﻮﻟﺴﺎ، ﺋﯩﻜﻜﻰ ﻳﯧﺮﯨﻢ ﻣﯩﻠﻴﻮﻧﺪﻩﻙ ﺋﺎﺩﻩﻡ ﺋﯚﻱ-ﻣﺎﻛﺎﻧﻠﯩﺮﯨﺪﯨﻦ ﺋﺎﻳﺮﯨﻠﯩﭗ ﻣﯘﺳﺎﭘﯩﺮﻻﺭ ﻻﮔﯧﺮﯨﻐﺎ ﻗﺎﭘﺴﯩﻠﯩﭗ ﻗﺎﻟﻐﺎﻥ ﺑﻮﻟﻐﺎﭼﻘﺎ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺳﯘﺩﺍﻥ ﻫﯚﻛﯜﻣﯩﺘﻰ ﺑﯩﻠﻪﻥ ﺑﻮﻟﻐﺎﻥ ﻳﯧﻘﯩﻦ ﺋﯩﻘﺘﯩﺴﺎﺩﻯ ﯞﻩ ﻫﻪﺭﺑﯩﻲ ﻣﯘﻧﺎﺳﯩﯟﯨﺘﻰ ﺳﻪﯞﻩﺑﻠﯩﻚ ﺩﺍﺭﻓﯘﺭ ﻗﯩﺮﻏﯩﻨﭽﯩﻠﯩﻘﯩﺪﺍ ﺧﯩﺘﺎﻳﻨﯩﯔ ﻫﻪﺳﺴﯩﺴﻰ ﺑﺎﺭ ﺩﻩﻳﺪﯨﻐﺎﻥ ﺋﯘﻗﯘﻡ ﺩﯗﻧﻴﺎ ﺧﺎﺭﺍﻛﺘﯧﺮﻟﯩﻚ ﺋﻮﻣﯘﻣﯩﻲ ﺗﻮﻧﯘﺷﻘﺎ ﺋﺎﻳﻼﻧﺪﻯ. (ﺟﯜﻣﻪ)