ﻳﻪﺭﻟﯩﻚ ﺧﻪﻟﻖ ﻗﯘﺭﯗﻟﺘﺎﻳﻠﯩﺮﯨﺪﯨﻜﻰ ﺋﻪﻣﻪﻟﺪﺍﺭﻻﺭ ﺋﺎﺯﺍﻳﺘﯩﻠﺴﺎ ﻣﻪﺳﯩﻠﻪ ﻫﻪﻝ ﺑﻮﻻﻣﺪﯗ؟

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻨﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

" ﺟﯘﯕﮕﻮ ﻳﺎﺷﻼﺭ ﮔﯧﺰﯨﺘﻰ"ﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﭘﺎﺭﺗﻜﻮﻣﯩﻨﯩﯔ" ﺷﻪﻫﻪﺭ، ﻧﺎﻫﯩﻴﻪ ، ﺭﺍﻳﻮﻥ، ﻳﯧﺰﺍ ﯞﻩ ﺑﺎﺯﺍﺭ ﺩﻩﺭﯨﺠﯩﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ، ﺳﯩﻴﺎﺳﯩﻲ ﻛﯧﯖﻪﺵ ﯞﻩ ﻫﯚﻛﯜﻣﻪﺗﻠﻪﺭﮔﻪ ﭼﯜﺷﯜﺭﮔﻪﻥ ﻛﯧﻠﻪﺭ ﻧﯚﯞﻩﺗﻠﯩﻚ ﺳﺎﻳﻼﻡ ﺧﯩﺰﻣﯩﺘﯩﻨﻰ ﻳﺎﺧﺸﻰ ﺋﯩﺸﻠﻪﺵ ﺗﻮﻏﺮﯨﺴﯩﺪﯨﻜﻰ ﻫﯚﺟﺠﯩﺘﻰ" ﺩﻩ، ﻳﻪﺭﻟﯩﻚ ﺧﻪﻟﻖ ﻗﯘﺭﯗﻟﺘﺎﻳﻠﯩﺮﯨﻨﯩﯔ ﻛﯧﻠﻪﺭ ﻧﯚﯞﻩﺗﻠﯩﻚ ﺳﺎﻳﻠﯩﻤﯩﺪﺍ ﻗﯘﺭﯗﻟﺘﺎﻳﻐﺎ ﺋﻪﺯﺍ ﻫﯚﻛﯜﻣﻪﺕ ﺋﻪﻣﻪﻟﺪﺍﺭﻟﯩﺮﯨﻨﯩﯔ ﻧﯩﺴﺒﯩﺘﻰ ﺋﻮﻣﯘﻣﻰ ﻗﯘﺭﯗﻟﺘﺎﻱ ﺋﻪﺯﺍﻟﯩﺮﯨﻨﯩﯔ ﺳﺎﻧﻰ %25 ﺗﯩﻦ ﺋﯧﺸﯩﭗ ﻛﻪﺗﻤﻪﺳﻠﯩﻚ، ﺋﯩﺸﭽﯩﻼﺭ، ﺩﯦﻬﻘﺎﻧﻼﺭ، ﺯﯨﻴﺎﻟﯩﻴﻼﺭ ﯞﻩ ﺑﺎﺷﻘﺎ ﺳﺎﻫﻪﺩﯨﻜﻰ ﯞﻩﻛﯩﻠﻠﻪﺭﻧﯩﯔ ﻧﯩﺴﺒﯩﺘﻰ %75 ﻧﻰ ﺋﯩﮕﯩﻠﻪﺵ ﻛﯧﺮﻩﻛﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ. ﻳﻪﺭﻟﯩﻚ ﻗﯘﺭﯗﻟﺘﺎﻳﻼﺭﺩﺍ ﺋﻪﻣﻪﻟﺪﺍﺭﻻﺭﻧﯩﯔ ﺳﺎﻧﻰ ﺋﺎﺯﺍﻳﺘﯩﻠﺴﺎ، ﻧﯧﮕﯩﺰﻟﯩﻚ ﻣﻪﺳﯩﻠﯩﻠﻪﺭﻧﯩﯔ ﻗﯘﺭﯗﻟﺘﺎﻳﺪﺍ ﻣﯘﺯﺍﻛﯩﺮﻩ ﻗﯩﻠﯩﻨﯩﺸﯩﻐﺎ ﻳﺎﺭﺩﯨﻤﻰ ﺗﯧﮕﻪﻣﺪﯗ ﺩﯦﮕﻪﻥ ﻣﻪﺳﯩﻠﯩﺪﻩ ﺗﻪﺭﻩﭘﻠﻪﺭﻧﯩﯔ ﭘﯩﻜﯩﺮﻯ ﺑﯩﺮﺩﻩﻙ ﺋﻪﻣﻪﺱ.

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﭘﺎﺭﺗﻜﻮﻣﻨﯩﯔ ﻣﻪﺯﻛﯘﺭ ﻫﯚﺟﺠﯩﺘﻰ ﻳﻪﺭﻟﯩﻚ ﻗﯘﺭﯗﻟﺘﺎﻱ ﯞﻩﻛﯩﻠﻠﯩﺮﻯ ﯞﻩ ﺑﻪﺯﻯ ﺋﻪﻣﻪﻟﺪﺍﺭﻻﺭﻧﯩﯔ ﻧﻪﺯﯨﺮﯨﺪﻩ "ﻧﺎﻫﺎﻳﯩﺘﻰ ﺯﻭﺭ ﺋﯚﺯﮔﯩﺮﯨﺶ،" ﻛﻪ ﯞﻩﻛﯩﻠﻠﯩﻚ ﻗﯩﻠﯩﺪﯨﻐﺎﻥ، ﺧﯩﺘﺎﻳﺪﯨﻜﻰ ﺑﺎﺷﻘﺎ ﺋﯚﻟﻜﻪ - ﺋﺎﭘﺘﻮﻧﻮﻡ ﺭﺍﻳﻮﻧﻼﺭ ﺋﯜﻟﮕﻪ ﺋﯧﻠﯩﺸﻘﺎ ﺗﯧﮕﯩﺸﻠﯩﻚ ﻳﯧﯖﯩﻠﯩﻘﺘﯘﺭ. ﻟﯧﻜﯩﻦ ﻳﻪﻧﻪ ﺑﻪﺯﻯ ﺋﺎﻧﺎﻟﯩﺰﭼﯩﻼﺭ، ﻳﻪﺭﻟﯩﻚ ﺧﻪﻟﻖ ﻗﯘﺭﯗﻟﺘﺎﻳﻠﯩﺮﯨﺪﯨﻜﻰ ﻫﺎﺯﯨﺮﻗﻰ ﯞﻩﺯﯨﻴﻪﺗﻨﻰ "ﻗﺎﺗﻤﺎﻝ ﻫﺎﻟﻪﺕ " ﺩﻩﭖ ﺋﻪﻳﯩﺒﻠﻪﭖ، ﺑﯘ ﻫﯚﺟﺠﻪﺗﻨﯩﯔ ﺑﯘ "ﻗﺎﺗﻤﺎﻝ ﻫﺎﻟﻪﺕ " ﻧﻰ ﺋﯚﺯﮔﻪﺭﺗﯩﺸﻜﻪ ﻳﺎﺭﺩﯨﻤﻰ ﺗﯧﮕﯩﺸﯩﻨﻰ ﺋﯜﻣﯩﺪ ﻗﯩﻠﻤﺎﻗﺘﺎ. ﻟﯧﻜﯩﻦ ﻧﯚﯞﻩﺗﺘﻪ ﺋﺎﻣﯧﺮﯨﻜﯩﺪﺍ ﻳﺎﺷﺎﯞﺍﺗﻘﺎﻥ ﯞﻩ ﺧﯩﺘﺎﻱ ﻗﺎﻧﯘﻥ ﺳﯧﺴﺘﯩﻤﯩﺴﻰ ﻫﻪﻡ ﺧﯩﺘﺎﻱ ﺧﻪﻟﻖ ﻗﯘﺭﯗﻟﺘﯩﻴﻰ ﺗﯜﺯﯛﻣﯩﻨﻰ ﻳﺎﺧﺸﻰ ﺑﯩﻠﯩﺪﯨﻐﺎﻥ ﻗﺎﻧﯘﻥ ﻣﯘﺗﻪﺧﻪﺳﺴﯩﺴﻰ ﺳﺎﺑﺎﻫﻪﺕ ﺧﺎﻧﯩﻢ، ﺭﺍﺩﯨﺌﻮﻣﯩﺰﻏﺎ ﺑﻪﺭﮔﻪﻥ ﺑﯘ ﻫﻪﻗﺘﯩﻜﻰ ﺑﺎﻳﺎﻧﺎﺗﯩﺪﺍ "ﺗﻪﯞﯨﺴﯩﻴﻪ ﺧﺎﺭﺍﻛﺘﯧﺮﻟﯩﻚ ﺑﯘ ﻫﯚﺟﺠﻪﺕ، ﺩﺍﺋﯩﻢ ﺗﻪﻛﯩﺘﻠﯩﻨﯩﺪﯨﻐﺎﻥ ﻳﯧﯖﻰ ﻧﻪﺭﺳﻪ ﺋﻪﻣﻪﺱ " ﺩﻩﭖ ﻛﯚﺭﺳﻪﺗﺘﻰ.

" ﺧﻪﻟﻖ ﻗﯘﺭﯗﻟﺘﯩﻴﻰ ﻫﯚﻛﯜﻣﻪﺗﻨﯩﯔ ﺧﯩﺰﻣﻪﺕ ﺩﻭﻛﻼﺗﯩﻨﯩﻼ ﺋﺎﯕﻼﻳﺪﯨﻐﺎﻥ ﺋﻮﺭﮔﺎﻥ "

ﻳﻪﺭﻟﯩﻚ ﺩﺍﺋﯩﺮﯨﻠﻪﺭﻧﯩﯔ ﺑﯘ ﻫﯚﺟﺠﻪﺕ ﻫﻪﻗﻘﯩﺪﯨﻜﻰ ﺗﻮﻧﯘﺷﻰ ﭘﻪﺭﻗﻠﯩﻖ ﺑﻮﻟﯘﭖ، ﺋﯘﻻﺭ ﺑﯘ ﺋﯚﺯﮔﯩﺮﯨﺸﻨﯩﯔ ﻗﯘﺭﯗﻟﺘﺎﻳﺪﺍ ﺋﺎﯞﺍﻡ ﭘﯘﻗﺮﺍﻻﺭﻧﯩﯔ ﺩﻩﺭﺩﯨﻨﻰ ﺋﻪﻛﺲ ﺋﻪﺗﺘﯜﺭﯛﺷﻜﻪ ﻳﺎﺭﺩﯨﻤﻰ ﺗﯧﮕﯩﭙﻼ ﻗﺎﻟﻤﺎﻱ، ﺑﯘ ﻳﻪﻧﻪ ﭘﯘﻗﺮﺍﻻﺭﻧﯩﯔ ﺳﯩﻴﺎﺳﻪﺗﻜﻪ ﻗﺎﺗﻨﯩﺸﯩﺸﯩﻨﻰ ﺋﯩﻠﮕﯩﺮﻯ ﺳﯜﺭﯛﺵ ﺭﻭﻟﯩﻨﻰ ﺋﻮﻳﻨﺎﻳﺪﯗ، ﺩﻩﭖ ﻗﺎﺭﯨﻤﺎﻗﺘﺎ. ﺑﯘ ﻗﺎﺭﺍﺷﺘﯩﻜﻰ ﻛﯩﺸﯩﻠﻪﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﭘﺎﺭﺗﻜﻮﻣﻨﯩﯔ ﻫﯚﺟﺠﯩﺘﻰ ﺑﻮﻟﻤﯩﺪﻯ ﺩﯦﮕﻪﻧﺪﻩ ﺧﻪﻟﻖ ﻗﯘﺭﯗﻟﺘﯩﻴﯩﺪﯨﻜﻰ ﻣﻪﯞﺟﯜﺕ ﺋﻪﻫﯟﺍﻟﻨﻰ ﺗﯜﺯﯨﺘﯩﺸﻜﻪ ﻳﺎﺭﺍﻳﺪﯗ . ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺧﻪﻟﻖ ﻗﯘﺭﯗﻟﺘﯩﻴﯩﻨﯩﯔ ﺷﯩﺨﻪﻧﺰﯨﻠﯩﻚ ﺋﻪﺯﺍﺳﻰ ﺟﺎﯓ ﺷﺎﯞﺗﺎﯓ، "ﺟﯘﯕﮕﻮ ﻳﺎﺷﻼﺭ ﮔﯧﺰﯨﺘﻰ" ﮔﻪ ﺑﻪﺭﮔﻪﻥ ﺑﺎﻳﺎﻧﺎﺗﯩﺪﺍ ﺧﻪﻟﻖ ﻗﯘﺭﯗﻟﺘﯩﻴﯩﺪﯨﻜﻰ"ﺋﻪﻣﻪﻟﺪﺍﺭﻻﺭﻧﯩﯔ ﻧﯩﺴﺒﯩﺘﯩﻨﻰ ﺋﺎﺯﺍﻳﺘﯩﺸﻨﯩﯔ ﺋﻪﯓ ﻳﺎﺧﺸﻰ ﺗﻪﺭﯨﭙﻰ، ﺋﺎﺳﺎﺳﻰ ﻗﺎﺗﻼﻣﺪﯨﻜﻰ ﯞﻩﻛﯩﻠﻠﻪﺭﻧﯩﯔ ﭘﯘﻗﺮﺍﻻﺭﻧﯩﯔ ﻫﻪﻗﯩﻘﯩﻲ ﺩﻩﺭﺩﻯ ﯞﻩ ﺋﺎﺭﺯﯗﺳﯩﻨﻰ ﺋﯩﻨﻜﺎﺱ ﻗﯩﻼﻻﻳﺪﯨﻐﺎﻧﻠﯩﻘﯩﺪﯗﺭ" ﺩﻩﻳﺪﯗ.

ﻟﯧﻜﯩﻦ ﺳﺎﺑﺎﻫﻪﺕ ﺧﺎﻧﯩﻤﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺑﯘ ﻳﻪﺭﺩﯨﻜﻰ ﻧﯧﮕﯩﺰﻟﯩﻚ ﻣﻪﺳﯩﻠﻪ ﭘﯘﻗﺮﺍﻻﺭ ﺑﯩﻠﻪﻥ ﺋﻪﻣﻪﻟﺪﺍﺭﻻﺭﻧﯩﯔ ﺧﻪﻟﻖ ﻗﯘﺭﯗﻟﺘﯩﻴﯩﺪﯨﻜﻰ ﻧﯩﺴﺒﻪﺕ ﻣﻪﺳﯩﻠﯩﺴﻰ ﺋﻪﻣﻪﺱ، ﺑﻪﻟﻜﻰ ﺧﯩﺘﺎﻳﻨﯩﯔ ﺳﯩﻴﺎﺳﯩﻲ ﺳﯧﺴﺘﯩﻤﯩﺴﻰ ﯞﻩ ﺧﻪﻟﻖ ﻗﯘﺭﯗﻟﺘﯩﻴﻰ ﺗﯜﺯﯛﻣﯩﻨﯩﯔ ﯞﻩﻛﯩﻠﻠﯩﻚ ﺧﺎﺭﺍﻛﺘﯧﺮﯨﺪﯨﻜﻰ ﻣﻪﺳﯩﻠﻪ. ﺳﺎﺑﺎﻫﻪﺕ ﺧﺎﻧﯩﻢ، ﺑﯘ ﺧﻪﻟﻖ ﻗﯘﺭﯗﻟﺘﯩﻴﯩﻨﯩﯔ ﻛﻮﻣﭙﺎﺭﺗﯩﻴﻪ ﻣﺎﻧﺎﭘﻮﻟﯩﻴﯩﺴﯩﺪﯨﻜﻰ ﺋﻮﺭﮔﺎﻥ ﺑﻮﻟﯘﺵ ﺋﻪﻫﯟﺍﻟﯩﻨﻰ ﺋﯚﺯﮔﻪﺭﺗﻪﻟﻤﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺟﯘﯕﮕﻮ ﻳﺎﺷﻼﺭ ﮔﯧﺰﯨﺘﯩﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺷﯩﺨﻪﻧﺰﻩ ﺷﻪﻫﻪﺭﻟﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ ﯞﻩﻛﯩﻠﻠﯩﺮﯨﻨﯩﯔ %70.85ﻨﻰ ﺋﻪﻣﻪﻟﺪﺍﺭﻻﺭ ﺋﯩﮕﯩﻠﯩﮕﻪﻥ ﺑﻮﻟﯘﭖ، ﺑﯩﺮ ﻗﯘﺭﯗﻟﺘﺎﻱ ﺋﻪﺯﺍﺳﻰ ﺷﯩﺨﻪﻧﺰﻩ ﺷﻪﻫﻪﺭﻟﯩﻚ ﺧﻪﻟﻖ ﻗﯘﺭﯗﻟﺘﯩﻴﯩﻨﻰ"ﻳﺎﺧﺸﻰ ﺳﯚﺯ ﯞﻩ ﻳﺎﺧﺸﯩﭽﺎﻕ ﺋﺎﺩﻩﻣﻠﻪﺭ ﻛﯚﭖ، ﺭﺍﺳﺖ ﮔﻪﭖ ﺋﺎﺯ ﻗﯩﻠﯩﻨﯩﺪﯨﻐﺎﻥ، ﻫﯚﻛﯜﻣﻪﺗﻨﯩﯔ ﺧﯩﺰﻣﻪﺕ ﺩﻭﻛﻼﺗﯩﻨﯩﻼ ﺋﺎﯕﻼﻳﺪﯨﻐﺎﻥ ﺋﻮﺭﮔﺎﻥ " ﺩﻩﭖ ﺗﻪﺭﯨﭙﻠﯩﮕﻪﻥ.

" ﻗﯘﺭﯗﻟﺘﺎﻳﺪﺍ ﻣﯘﺯﺍﻛﯩﺮﻩ ﻗﯩﻠﯩﻨﯩﺪﯨﻐﺎﻥ ﻣﻪﺳﯩﻠﯩﻠﻪﺭﻧﻰ ﭘﺎﺭﺗﻜﻮﻡ ﺑﯧﻜﯩﺘﯩﺪﯗ "

ﺟﯧﻦ ﻣﯩﯖﺨﯘﻩﻱ ﺋﯩﺴﯩﻤﻠﯩﻚ ﺧﯩﺘﺎﻱ ﺋﻮﺑﺰﻭﺭﭼﻰ ﺗﻪﯕﺮﯨﺘﺎﻍ ﺗﻮﺭﯨﻐﺎ ﻳﺎﺯﻏﺎﻥ ﺑﯘ ﻫﻪﻗﺘﯩﻜﻰ ﺋﻮﺑﺰﻭﺭﯨﺪﺍ، ﺧﻪﻟﻖ ﻗﯘﺭﯗﻟﺘﯩﻴﯩﺪﯨﻜﻰ ﺋﻪﻣﻪﻟﺪﺍﺭ ﯞﻩﻛﯩﻠﻠﻪﺭﻧﻰ ﺗﻪﻧﻘﯩﺪ ﻗﯩﻠﯩﭗ، "ﺋﻪﻣﻪﻟﺪﺍﺭﻻﺭﻧﯩﯔ ﭘﯩﻜﯩﺮﻯ ﭘﯘﻗﺮﺍﻻﺭﻏﺎ ﻫﻪﻗﯩﻘﯩﻲ ﺗﯜﺭﺩﻩ ﯞﻩﻛﯩﻠﻠﯩﻚ ﻗﯩﻼﻟﻤﺎﻳﺪﯗ. ﭼﯜﻧﻜﻰ ﺋﯘﻻﺭ ﺟﻪﻣﺌﯩﻴﻪﺗﻨﻰ ﺋﯩﺪﺍﺭﻩ ﻗﯩﻠﻐﯘﭼﻰ. ﭘﯘﻗﺮﺍﻻﺭﻧﯩﯔ ﻧﻪﺯﯨﺮﯨﺪﻩ ﺋﯘﻻﺭ ﺋﺎﻻﻫﯩﺪﻩ ﻣﻪﻧﭙﻪﺋﻪﺗﺪﺍﺭ ﻛﯩﺸﯩﻠﻪﺭﺩﯗﺭ. ﺋﯘﻻﺭﻧﯩﯔ ﻣﻪﻧﭙﻪﺋﻪﺗﻰ ﺑﻪﺯﯨﺪﻩ ﭘﯘﻗﺮﺍﻻﺭ ﻣﻪﻧﭙﻪﺋﻪﺗﯩﮕﻪ ﺯﯨﺖ " ﺩﻩﭖ ﺗﻪﻛﯩﺘﻠﯩﮕﻪﻥ. ﺋﯘ ﻳﻪﻧﻪ، "ﺋﻪﮔﻪﺭ ﺋﻪﻣﻪﻟﺪﺍﺭﻻﺭ ﺧﻪﻟﻖ ﻗﯘﺭﯗﻟﺘﯩﻴﻰ ﯞﻩ ﺳﯩﻴﺎﺳﯩﻲ ﻛﯧﯖﻪﺷﻜﻪ ﺋﻪﺯﺍ ﺑﻮﻟﯘﯞﺍﻟﺴﺎ، ﺑﯘ ﺋﯚﺯ ‏- ﺋﯚﺯﯨﻨﻰ ﻧﺎﺯﺍﺭﻩﺕ ﻗﯩﻠﯩﺶ، ﺩﯦﮕﻪﻧﻠﯩﻜﺘﯘﺭ. ﺋﯚﺯ ‏- ﺋﯚﺯﯨﻨﻰ ﻧﺎﺯﺍﺭﻩﺕ ﻗﯩﻠﯩﺪﯨﻐﺎﻥ ﺑﯘ ﺗﯜﺭﺩﯨﻜﻰ ﻧﺎﺯﺍﺭﻩﺗﭽﯩﻠﯩﻚ ﺋﺎﺟﯩﺰ ﯞﻩ ﺋﻪﻫﻤﯩﻴﻪﺗﺴﯩﺰ " ﺩﻩﻳﺪﯗ.

ﺳﺎﺑﺎﻫﻪﺕ ﺧﺎﻧﯩﻢ، ﻳﻪﺭﻟﯩﻚ ﺧﻪﻟﻖ ﻗﯘﺭﯗﻟﺘﺎﻳﻠﯩﺮﯨﺪﺍ ﺋﺎﯞﺍﻡ ﭘﯘﻗﺮﺍﻻﺭﻧﯩﯔ ﻧﯩﺴﺒﯩﺘﻰ ﻛﯚﭘﻪﻳﺴﯩﻤﯘ، ﻟﯧﻜﯩﻦ ﯞﻩﻛﯩﻠﻠﻪﺭﻧﯩﯔ ﭘﯘﻗﺮﺍﻻﺭ ﺩﯗﭺ ﻛﯧﻠﯩﯟﺍﺗﻘﺎﻥ ﺟﯩﺪﺩﯨﻲ ﯞﻩ ﺳﻪﺯﮔﯜﺭ ﻣﻪﺳﯩﻠﯩﻠﻪﺭﻧﻰ ﺋﻮﺗﺘﯘﺭﯨﻐﺎ ﻗﻮﻳﺎﻟﻤﺎﻳﺪﯨﻐﺎﻧﻠﯩﻘﯩﻨﻰ، ﭼﯜﻧﻜﻰ ﻗﯘﺭﯗﻟﺘﺎﻳﺪﺍ ﻣﯘﺯﺍﻛﯩﺮﻩ ﻗﯩﻠﯩﻨﯩﺪﯨﻐﺎﻥ ﻣﻪﺳﯩﻠﯩﻠﻪﺭﻧﻰ ﭘﺎﺭﺗﻜﻮﻡ ﺑﯧﻜﯩﺘﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﻮﺑﺰﻭﺭﭼﻰ ﺟﯧﻦ ﻣﯩﯖﺨﯘﺋﻪﻱ، ﺗﻪﯕﺮﯨﺘﺎﻍ ﺗﻮﺭﯨﺪﯨﻜﻰ ﺋﻮﺑﺰﻭﺭﯨﺪﺍ ﺧﻪﻟﻖ ﻗﯘﺭﯗﻟﺘﯩﻴﯩﺪﯨﻜﻰ ﺋﻪﻣﻪﻟﺪﺍﺭ ﯞﻩﻛﯩﻠﻠﻪﺭﻧﯩﯔ ﺋﯚﺯ ﻣﻪﺳﺌﯘﻟﯩﻴﯩﺘﯩﻨﻰ ﺋﺎﺩﺍ ﻗﯩﻠﻤﺎﻳﺪﯨﻐﺎﻧﻠﯩﻘﯩﻨﻰ، ﻗﯘﺭﯗﻟﺘﺎﻱ ﺧﯩﺰﻣﯩﺘﻰ ﺑﯩﻠﻪﻥ ﻛﺎﺭﻯ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﭗ، ﻳﻪﺭﻟﯩﻚ ﻗﯘﺭﯗﻟﺘﺎﻳﻼﺭﻧﯩﯔ ﺋﻪﻣﻪﻟﺪﺍﺭ ﯞﻩﻛﯩﻠﻠﯩﺮﯨﻨﻰ" ﻗﯘﺭﯗﻟﺘﺎﻳﺪﺍ ﺳﯚﺯ ﻗﯩﻠﻤﺎﻳﺪﯨﻐﺎﻥ، ﻧﺎﺯﺍﺭﻩﺗﭽﯩﻠﯩﻜﻜﻪ ﻗﺎﺗﻨﺎﺷﻤﺎﻳﺪﯨﻐﺎﻥ، ﺗﻪﻛﻠﯩﭗ ﻻﻳﯩﻬﯩﺴﻰ ﯞﻩ ﭘﯩﻜﯩﺮ ﺑﻪﺭﻣﻪﻳﺪﯨﻐﺎﻥ، ﻳﯩﻐﯩﻨﻐﺎ ﻗﺎﺗﻨﺎﺷﻤﺎﻳﺪﯨﻐﺎﻥ، ﭘﯘﻗﺮﺍﻻﺭ ﺑﯩﻠﻪﻥ ﺋﺎﻻﻗﻪ ﻗﯩﻠﻤﺎﻳﺪﯨﻐﺎﻥ ﯞﻩﻛﯩﻠﻠﻪﺭ" ﺗﻪﺭﯨﭙﻠﯩﮕﻪﻥ. ﻟﯧﻜﯩﻦ ﺋﯘ ﺋﺎﺧﯩﺮﯨﺪﺍ ﻳﻪﻧﻪ، ﻗﯘﺭﯗﻟﺘﺎﻳﺪﯨﻜﻰ ﺋﻪﻣﻪﻟﺪﺍﺭ ﯞﻩﻛﯩﻠﻠﻪﺭﻧﯩﯔ ﻧﯩﺴﺒﯩﺘﯩﻨﻰ%25 ﺩﯨﻦ ﺋﺎﺷﯘﺭﯗﯞﻩﺗﻤﻪﺳﻠﯩﻚ ﻫﻪﻗﻘﯩﺪﯨﻜﻰ ﻫﯚﺟﺠﻪﺕ، "ﺷﯜﺑﻬﯩﺴﯩﺰﻛﻰ ، ﻗﯘﺭﯗﻟﺘﺎﻳﺪﯨﻜﻰ ﻗﺎﺗﻤﺎﻝ ﻫﺎﻟﻪﺗﻨﻰ ﺋﯚﺯﮔﻪﺭﺗﯩﺸﺘﻪ ﺋﻪﻫﻤﯩﻴﻪﺗﻜﻪ ﺋﯩﮕﻪ،" ﺩﻩﭖ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ ﻳﺎﺯﺩﻯ. (ﺋﻪﺭﻛﯩﻦ)