ﻏﻪﺭﺏ ﻣﻪﺗﺒﯘﺋﺎﺗﻠﯩﺮﻯ ﯞﻩ ﻣﯘﺗﻪﺧﻪﺳﺴﯩﺴﻠﻪﺭ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﯩﺴﻨﯩﯔ 17 ‏- ﻧﯚﯞﻩﺗﻠﯩﻚ ﻗﯘﺭﯗﻟﺘﯩﻴﯩﻐﺎ ﻗﺎﻧﺪﺍﻕ ﺑﺎﻫﺎ ﺑﻪﺭﺩﻯ؟

• ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﭘﺮﯦﺰﯨﺪﯦﻨﺘﻰ ﺧﯘ ﺟﯩﻨﺘﺎﯞ، 17 - ﻗﯘﺭﯗﻟﺘﺎﻳﺪﺍ ﺳﯚﺯ ﺑﻪﺭﻣﻪﻛﺘﻪ. AFP Photo

ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﻰ ﻣﻪﺭﻛﯩﺰﻯ ﻫﯚﻛﯜﻣﯩﺘﯩﻨﯩﯔ ﺑﺎﺵ ﺳﯧﻜﺮﯨﺘﺎﺭﻯ ﺧﯘ ﺟﯩﻨﺘﺎﯞ ، ﻣﻪﺯﻛﯜﺭ ﻫﯚﻛﯜﻣﻪﺗﻨﯩﯔ 17 ‏- ﻧﯚﯞﻩﺗﻠﯩﻚ ﻗﯘﺭﯗﻟﺘﯩﻴﯩﻨﯩﯔ ﻳﯩﻐﯩﻨﯩﺪﺍ ﺳﯚﺯﻟﯩﮕﻪﻥ ﺩﻭﻛﻼﺗﯩﺪﺍ، ﭼﯩﺮﯨﻜﻠﯩﻜﻨﯩﯔ ﻛﻮﻣﭙﺎﺭﺗﯩﻴﯩﻨﯩﯔ ﻫﺎﻳﺎﺕ - ﻣﺎﻣﺎﺗﻠﯩﻘﻰ ﺑﯩﻠﻪﻥ ﺑﯩﯟﺍﺳﺘﻪ ﻣﯘﻧﺎﺳﯩﯟﻩﺗﻠﯩﻚ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ. 15 ‏- ﺋﯚﻛﺘﻪﺑﯩﺮ ﻛﯜﻧﻰ ﺋﯧﭽﯩﻠﻐﺎﻥ ﻗﯘﺭﯗﻟﺘﺎﻳﻨﯩﯔ ﺋﯧﭽﯩﻠﯩﺶ ﻣﯘﺭﺍﺳﯩﻤﯩﺪﺍ ، ﺧﯘ ﺟﯩﻨﺘﺎﯞ 2 ﻳﯧﺮﯨﻢ ﺳﺎﺋﻪﺕ ﺩﻭﻛﻼﺕ ﺳﯚﺯﻟﻪﭖ، ﺧﯩﺘﺎﻳﻨﯩﯔ ﺋﯩﻘﺘﯩﺴﺎﺩﯨﻲ، ﭼﯩﺮﯨﻜﻠﯩﻜﻜﻪ ﻗﺎﺭﺷﻰ ﺗﯘﺭﯗﺵ، ﺋﯩﻜﻜﻰ ﻗﯩﺮﻏﺎﻕ ﻣﯘﻧﺎﺳﯩﯟﯨﺘﻰ ﯞﻩ ﺧﯩﺘﺎﻳﻨﯩﯔ ﺗﺎﺷﻘﻰ ﺩﯨﭙﻠﻮﻣﺎﺗﯩﻴﻪ ﻣﯘﻧﺎﺳﯩﯟﯨﺘﻰ ﻗﺎﺗﺎﺭﻟﯩﻖ ﺗﻪﺭﻩﭘﻠﻪﺭ ﺋﯜﺳﺘﯩﺪﻩ ﺋﺎﻻﻫﯩﺪﻩ ﺗﻮﺧﺘﺎﻟﺪﻯ.

ﺧﯘ ﺟﯩﻨﺘﺎﯞ ﺳﯚﺯﯨﺪﻩ ، ﺑﯘ ﻗﯧﺘﯩﻤﻘﻰ ﻗﯘﺭﯗﻟﺘﺎﻳﻨﯩﯔ ﺋﺎﺳﺎﺳﯩﻲ ﻣﻪﻗﺴﯩﺘﻰ، ﺟﯘﯕﮕﻮﭼﻪ ﺳﻮﺗﺴﯩﻴﺎﻟﯩﺰﻡ ﻗﯘﺭﯗﺵ ﺑﺎﻳﺮﯨﻘﯩﻨﻰ ﺋﯩﮕﯩﺰ ﻛﯚﺗﯩﺮﯨﭗ، ﺩﯨﯔ ﺷﺎﯞﭘﯩﯔ ﻧﻪﺯﯨﺮﯨﻴﯩﺴﻰ ﺑﯩﻠﻪﻥ 3"ﻛﻪ ﯞﻩﻛﯩﻠﻠﯩﻚ ﻗﯩﻠﯩﺶ" ﺋﯩﺪﯨﻴﯩﺴﯩﻨﻰ ﺑﺎﺷﻼﻣﭽﻰ ﺭﻭﻝ ﻗﯩﻠﯩﭗ، ﭘﻪﻥ - ﺗﯧﺨﻨﯩﻜﺎ ﺗﻪﺭﻩﻗﻘﯩﻴﺎﺗﯩﻨﻰ ﺋﯩﺸﻘﺎ ﺋﺎﺷﯘﺭﯗﺵ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﺪﻯ.

ﺧﯘ ﺟﯩﻨﺘﺎﯞ ﺗﻪﻛﯩﺘﻠﯩﮕﻪﻥ ﭘﻪﻥ - ﺗﯧﺨﻨﯩﻜﺎ ﺗﻪﺭﻩﻗﻘﯩﻴﺎﺗﯩﻨﻰ ﺋﯩﺸﻘﺎ ﺋﺎﺷﯘﺭﯗﺵ ﻧﻪﺯﯨﺮﯨﻴﯩﺴﻰ، ﻣﺎﯞ ﺯﯦﺪﯗﯓ ، ﺩﯨﯔ ﺷﺎﯞﭘﯩﯔ ، ﺟﺎﯓ ﺯﯦﻤﯩﻨﻼﺭ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﻧﻪﺯﯨﺮﯨﻴﻪ ﺑﯩﻠﻪﻥ ﺗﻪﯓ ﺋﻮﺭﯗﻧﺪﺍ ﺑﻮﻟﯘﭖ، ﺑﯘ ﺧﯘ ﺟﯩﻨﺘﺎﯞﻧﯩﯔ 4 ‏- ﺋﻪﯞﻻﺕ ﺧﯩﺘﺎﻱ ﺭﻩﻫﺒﯩﺮﻯ ﺳﯧﭙﯩﺪﯨﻦ ﺋﻮﺭﯗﻥ ﺋﺎﻟﻐﺎﻥ ﺷﻪﺧﺲ ﺋﯩﻜﻪﻧﻠﯩﻜﯩﻨﯩﯔ ﻧﺎﻣﺎﻳﻪﻧﺪﯨﺴﻰ ﻫﯧﺴﺎﺑﻠﯩﻨﯩﺪﯗ.

ﺑﯩﺮﺍﻕ 17 ‏- ﻗﯘﺭﯗﻟﺘﺎﻳﻨﯩﯔ ﺋﯧﭽﯩﻠﯩﺶ ﻣﯘﺭﺍﺳﯩﻤﯩﺪﺍ، ﺧﯘ ﺟﯩﻨﺘﺎﯞﻏﺎ ﺋﻪﮔﯩﺸﯩﭗ ﻳﯩﻐﯩﻦ ﺯﺍﻟﯩﻐﺎ ﻛﯩﺮﯨﭗ ﻛﻪﻟﮕﻪﻥ، ﺧﯩﺘﺎﻱ ﺳﯩﻴﺎﺳﯩﻲ ﺑﻴﯘﺭﻭﺳﯩﻨﯩﯔ ﻛﻮﻣﯩﺴﺴﺎﺭﻯ ﯞﯗ ﺑﺎﯕﮕﻮ ﺑﻮﻟﻤﺎﺳﺘﯩﻦ، ﺑﻪﻟﻜﻰ ﺳﺎﺑﯩﻖ ﺧﯩﺘﺎﻱ ﻣﻪﺭﻛﯩﺰﻯ ﻫﻪﺭﺑﯩﻲ ﺋﯩﺸﻼﺭ ﻛﻮﻣﯩﺘﯧﺘﯩﻨﯩﯔ ﺭﻩﺋﯩﺴﻰ ﺟﺎﯓ ﺯﯦﻤﯩﻦ ﺋﯩﺪﻯ.

ﻣﻪﺗﺒﯘﺋﺎﺗﻼﺭﻧﯩﯔ 17 ‏- ﻧﯚﯞﻩﺗﻠﯩﻚ ﻗﯘﺭﯗﻟﺘﺎﻳﻐﺎ ﺑﻪﺭﮔﻪﻥ ﺑﺎﻫﺎﺳﻰ

ﻗﯘﺭﯗﻟﺘﺎﻱ ﺑﺎﻳﺎﻧﺎﺗﭽﯩﺴﻰ ﺑﯘ ﻗﯧﺘﯩﻤﻘﻰ ﻗﯘﺭﯗﻟﺘﺎﻱ ﻫﻪﻗﻘﯩﺪﻩ ﻣﯘﺧﺒﯩﺮﻻﺭﻏﺎ ﻣﻪﺯﻛﯜﺭ ﻗﯘﺭﯗﻟﺘﺎﻳﺪﺍ ﭘﺎﺭﺗﯩﻴﻪ ﻧﯩﺰﺍﻣﻨﺎﻣﯩﺴﯩﻐﺎ ﺋﯚﺯﮔﻪﺭﺗﯩﺶ ﻛﯩﺮﮔﯜﺯﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﯛﺵ ﺑﯩﻠﻪﻥ ﺑﯩﺮﮔﻪ، ﺟﯘﯕﮕﻮﭼﻪ ﺳﻮﺗﺴﯩﻴﺎﻟﯩﺰﻣﻨﯩﯔ ﻧﯩﺸﺎﻧﯩﻨﻰ ﺋﺎﻻﻫﯩﺪﻩ ﺗﻪﻛﯩﺘﻠﯩﮕﻪﻥ.

ﺧﯩﺘﺎﻱ ﺋﯩﺸﻠﯩﺮﻯ ﻣﯘﺗﻪﺧﻪﺳﺴﯩﺴﻠﯩﺮﯨﻨﯩﯔ ﻗﺎﺭﯨﺸﯩﭽﻪ، 17 ‏- ﻧﯚﯞﻩﺗﻠﯩﻚ ﻗﯘﺭﯗﻟﺘﺎﻱ ﺧﯘ ﺟﯩﻨﺘﺎﯞ ﯞﻩ ﯞﯦﻦ ﺟﻴﺎﺑﺎﯞﻻﺭﻧﯩﯔ ﯞﺍﺭﯨﺴﻠﯩﺮﯨﻨﻰ ﺑﯧﻜﯩﺘﯩﺶ ﺑﻮﻟﻤﺎﺳﺘﯩﻦ، ﻗﯘﺭﯗﻟﺘﺎﻱ ﺑﯩﺮ ﭘﺎﺭﺗﯩﻴﻪ ﺗﯜﺯﯛﻣﯩﻨﻰ ﻣﯘﺳﺘﻪﻫﻜﻪﻣﻠﻪﺵ، ﭘﺎﺭﺗﯩﻴﻪ ﻧﯩﺰﺍﻣﻨﺎﻣﯩﺴﯩﻐﺎ ﺋﯚﺯﮔﻪﺭﺗﯩﺶ ﻛﯩﺮﮔﯜﺯﯛﺵ ﺷﯘﻧﯩﯖﺪﻩﻙ ﻣﯘﻫﯩﻤﻰ ﻳﻪﻧﻪ ﺧﯘ ﺟﯩﻨﺘﺎﯞﻧﻰ ﻣﻪﺭﻛﻪﺯ ﻗﯩﻠﻐﺎﻥ ﺭﻩﻫﺒﻪﺭﻟﯩﻚ ﮔﯘﺭﯗﭘﭙﯩﺴﯩﻨﯩﯔ 5 ﻳﯩﻠﺪﯨﻦ ﺑﯘﻳﺎﻧﻘﻰ ﭘﻪﻥ - ﺗﯧﺨﻨﯩﻜﺎ ﺗﻪﺭﻩﻗﻘﯩﻴﺎﺕ ﻧﻪﺗﯩﺠﯩﺴﯩﻨﻰ ﺗﺎﺭﯨﺦ ﺩﻩﭘﺘﯩﺮﯨﮕﻪ ﺗﯘﺭﻏﯘﺯﯗﺷﺘﯩﻦ ﺋﯩﺒﺎﺭﻩﺕ ﺋﯩﻜﻪﻥ.

ﻗﯘﺭﯗﻟﺘﺎﻱ ﺭﻩﺋﯩﺴﻠﯩﺮﻯ 15 ‏- ﺋﯚﻛﺘﻪﺑﯩﺮ ﻛﯜﻧﻰ ﭼﯜﺷﺘﯩﻦ ﻛﯧﻴﯩﻦ ﺑﯩﺮﯨﻨﭽﻰ ﻗﯧﺘﯩﻤﻠﯩﻖ ﻳﯩﻐﯩﻨﻨﻰ ﺭﻩﺳﻤﯩﻲ ﺋﯧﭽﯩﭗ، ﻗﯘﺭﯗﻟﺘﺎﻱ ﺩﺍﺋﯩﻤﯩﻲ ﻛﻮﻣﯩﺘﯧﺘﻰ ﺋﻪﺯﺍﻟﯩﺮﯨﻨﯩﯔ ﺋﯩﺴﯩﻤﻠﯩﻜﯩﻨﻰ ﺋﯧﻼﻥ ﻗﯩﻠﺪﻯ، ﻫﻪﻣﺪﻩ ﻗﯘﺭﯗﻟﺘﺎﻳﻨﯩﯔ ﻣﯘﺋﺎﯞﯨﻦ ﻛﺎﺗﯩﺒﻠﯩﺮﯨﻨﻰ ﺑﯧﻜﯩﺘﺘﻰ.

ﺧﯘ ﺟﯩﻨﺘﺎﯞ ﺋﯚﺯ ﯞﺍﺭﯨﺴﯩﻨﻰ ﺗﯩﻜﻠﻪﺷﻜﻪ ﺋﻪﻫﻤﯩﻴﻪﺕ ﺑﻪﺭﻣﻪﻛﺘﻪ

ﺋﺎﻣﯧﺮﯨﻜﺎ ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﻨﯩﯔ ﻣﺎﻗﺎﻟﯩﺴﯩﺪﻩ ﺋﯧﻴﺘﯩﻠﯩﺸﯩﭽﻪ، ﺑﯩﺮ ﻫﻪﭘﺘﻪ ﻣﯚﻫﻠﻪﺕ ﺑﯩﻠﻪﻥ ﺋﯧﭽﯩﻠﯩﺪﯨﻐﺎﻥ ﺑﯘ ﻗﯧﺘﯩﻤﻘﻰ ﻗﯘﺭﯗﻟﺘﺎﻳﺪﺍ، ﺧﯘ ﺟﯩﻨﺘﺎﯞ ﺧﯩﺘﺎﻳﻨﻰ ﺋﯩﺪﺍﺭﻩ ﻗﯩﻠﻐﺎﻥ 5 ﻳﯩﻠﺪﯨﻦ ﺑﯘﻳﺎﻧﻘﻰ ﯞﻩﺯﯨﻴﻪﺗﻨﻰ ﺗﺎﺭﺍﺯﯨﻐﺎ ﻗﻮﻳﯘﺵ، ﺑﻮﻟﯘﭘﻤﯘ ﺋﯚﺯ ﺋﯩﺘﺘﯩﭙﺎﻗﺪﺍﺷﻠﯩﺮﯨﻨﻰ ﻫﻮﻗﯘﻗﻘﺎ ﺗﻪﻳﯩﻨﻠﻪﺵ ﻛﯜﭼﯩﻨﻰ ﺗﺎﺭﺍﺯﯨﻼﺵ ﯞﻩ ﺋﯩﺘﺘﯩﭙﺎﻗﺪﺍﺷﻼﺭ ﺋﯩﭽﯩﺪﯨﻦ ﺑﯩﺮ ﻧﻪﭘﻪﺭ ﯞﺍﺭﯨﺴﻨﻰ ﻣﯘﻫﯩﻢ ﺋﻮﺭﯗﻧﻐﺎ ﺋﻮﻟﺘﯘﺭﻏﯘﺯﯗﺵ، ﻗﯘﺭﯗﻟﺘﺎﻳﺪﺍ ﯞﯗﺟﯘﺗﻘﺎ ﻛﻪﻟﺘﯜﺭﯨﺪﯨﻐﺎﻥ ﻣﯘﻫﯩﻢ ﺑﯩﺮ ﻣﻪﻗﺴﻪﺕ ﻫﯧﺴﺎﺑﻠﯩﻨﯩﺪﯨﻜﻪﻥ.

ﺋﺎﻣﯧﺮﯨﻜﺎ ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﻨﯩﯔ ﺑﯩﻠﺪﯛﺭﯛﺷﯩﭽﻪ ، ﻟﻴﺎﯞﻧﯩﯔ ﺋﯚﻟﻜﯩﺴﯩﻨﯩﯔ ﺑﺎﺵ ﺳﯧﻜﺮﯨﺘﺎﺭﻯ ﻟﻰ ﻛﯧﭽﺎﯓ، ﺧﯘ ﺟﯩﻨﺘﺎﯞﻧﯩﯔ ﻳﯜﺭﯨﻜﯩﺪﯨﻜﻰ ﯞﺍﺭﯨﺲ ﺑﻮﻟﯘﭖ، ﻟﻰ ﻛﯧﭽﺎﯕﻨﻰ ﯞﺍﺭﯨﺲ ﻗﯩﻠﯩﭗ ﺗﻪﻳﯩﻨﻠﻪﺵ ﺋﯜﭼﯜﻥ، ﺧﯘ ﺟﯩﻨﺘﺎﯞﻧﯩﯔ ﺋﺎﻟﺪﻯ ﺑﯩﻠﻪﻥ ﺭﻩﻫﺒﻪﺭﻟﯩﻚ ﮔﯘﺭﯗﭘﭙﯩﺴﯩﺪﯨﻜﯩﻠﻪﺭﻧﻰ ﮔﻪﭘﻜﻪ ﻛﯩﺮﮔﯜﺯﯛﺷﻰ، ﻟﻰ ﻛﯧﭽﺎﯕﻨﯩﯔ ﺳﺎﻻﻫﯩﻴﯩﺘﯩﻨﯩﯔ ﺧﯩﺘﺎﻱ ﻣﻪﺭﻛﯩﺰﻯ ﻛﻮﻣﯩﺘﯧﺘﻰ ﺳﯩﻴﺎﺳﯩﻲ ﺑﻴﯘﺭﻭﺳﯩﻨﯩﯔ ﺩﺍﺋﯩﻤﯩﻲ ﻫﻪﻳﺌﯩﺘﻰ ﺑﻮﻟﯘﺷﻘﺎ ﻻﻳﯩﻖ ﺋﯩﻜﻪﻧﻠﯩﻜﻰ ﺋﯩﺴﭙﺎﺗﻠﯩﺸﻰ ﺗﻮﻟﯩﻤﯘ ﻣﯘﻫﯩﻢ ﺋﯩﻜﻪﻥ.

ﺋﻪﻛﺴﯩﭽﻪ ، ﻟﻰ ﻛﯧﭽﺎﯕﻨﯩﯔ ﺭﯨﻘﺎﺑﻪﺗﭽﯩﺴﻰ ﺷﺎﯕﺨﻪﻱ ﺷﻪﻫﯩﺮﯨﻨﯩﯔ ﺑﺎﺵ ﺳﯧﻜﺮﯨﺘﺎﺭﻯ ﺷﻰ ﺟﯩﯖﭙﯩﯔ ﺑﻮﻟﯘﭖ ، ﺋﻮﺧﺸﺎﺷﻼ ﺋﯘﻧﯩﯔ ﺧﯩﺘﺎﻳﻨﯩﯔ ﺋﺎﻟﯩﻲ ﺩﻩﺭﯨﺠﯩﻠﯩﻚ ﺭﻩﻫﺒﻪﺭﻟﯩﻚ ﮔﯘﺭﯗﻫﯩﻐﺎ ﻛﯩﺮﯨﺸﻰ ﺋﯘﻧﯩﯔ ﻗﻮﻟﻠﯩﻐﯘﭼﯩﻠﯩﺮﯨﻨﯩﯔ ﻛﯜﭺ ﭼﯩﻘﯩﺮﯨﺸﯩﻐﺎ ﺑﺎﻏﻠﯩﻖ ﺑﯩﺮ ﻣﻪﺳﯩﻠﻪ.

ﺷﻰ ﺟﯩﯖﭙﯩﯖﻨﯩﯔ ﻫﻮﻗﯘﻗﻘﺎ ﺗﻪﻳﯩﻨﻠﯩﻨﯩﺶ ﺋﯧﻬﺘﯩﻤﺎﻟﻠﯩﻘﻰ ﺑﯩﺮ ﻗﻪﺩﻩﺭ ﻳﯘﻗﯩﺮﻯ

ﻳﺎﯞﺭﯗﭘﺎﺩﯨﻜﻰ ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﺑﯩﻠﺪﯛﺭﯛﺷﯩﭽﻪ، ﻟﻰ ﻛﯧﭽﺎﯓ ﺧﯘ ﺟﯩﻨﺘﺎﯞ ﺗﻪﺭﯨﭙﯩﺪﯨﻦ ﺑﯩﯟﺍﺳﺘﻪ ﻳﯘﻗﯩﺮﻯ ﻗﺎﺗﻼﻣﻐﺎ ﻛﯚﺗﯜﺭﯛﻟﮕﻪﻥ ﻣﯘﻫﯩﻢ ﻛﺎﺩﯨﺮﻻﺭﻧﯩﯔ ﺑﯩﺮﻯ، ﺋﻪﻣﻤﺎ ﺷﻰ ﺟﯩﯖﭙﯩﯖﻨﯩﯔ ﺧﯘ ﺟﯩﻨﺘﺎﯞﻧﯩﯔ ﺋﯩﺰ ﺑﺎﺳﺎﺭﻯ ﺑﻮﻟﯘﺵ ﺋﯧﻬﺘﯩﻤﺎﻟﻠﯩﻘﻰ ﻛﯚﭘﺮﻩﻙ، ﭼﯜﻧﻜﻰ ﺋﯘ ﺧﯘ ﺟﯩﻨﺘﺎﯞ ﯞﻩ ﺟﺎﯓ ﺯﯦﻤﯩﻦ ﻫﻪﺭ ﺋﯩﻜﻜﯩﺴﯩﻨﯩﯔ ﻫﯩﻤﺎﻳﯩﺴﯩﮕﻪ ﺋﯧﺮﯨﺸﻪﻟﻪﻳﺪﯨﻐﺎﻥ ﻣﯘﻫﯩﻢ ﭘﯧﺮﺳﯘﻧﺎﮊ .

ﺑﯩﺮﺍﻕ ، ﻛﺎﻧﺎﺩﺍﻟﯩﻖ ﺧﯩﺘﺎﻱ ﻣﯘﺗﻪﺧﻪﺳﺴﯩﺲ ﺟﺎﯓ ﯞﯦﺒﺮﻩﻧﻨﯩﯔ ﻗﺎﺭﯨﺸﯩﭽﻪ، ﺧﯘ ﺟﯩﻨﺘﺎﯞﻧﯩﯔ 5 ﻳﯩﻠﺪﯨﻦ ﺑﯘﻳﺎﻥ ، ﺋﯚﺯﯨﻨﯩﯔ ﻛﺎﺩﯨﺮﻟﯩﺮﯨﻨﻰ ﻳﯧﺘﯩﺸﺘﯜﺭﯛﺷﻜﻪ ﺋﺎﻻﻫﯩﺪﻩ ﺋﻪﻫﻤﯩﻴﻪﺕ ﺑﯧﺮﯨﭗ ﻛﻪﻟﮕﻪﻧﻠﯩﻜﻰ ﺋﯧﻨﯩﻖ ، ﺑﯩﺮﺍﻕ ﺋﯘﻧﯩﯔ ﯞﻩﺯﯨﭙﻪ ﺗﺎﭘﺸﯘﺭﯗﺵ ﻣﯘﺩﺩﯨﺘﻰ 2012 ‏- ﻳﯩﻠﻐﯩﭽﻪ ﺑﻮﻟﻐﺎﭼﻘﺎ، ﻧﯚﯞﻩﺗﺘﻪ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﻰ ﻣﻪﺭﻛﯩﺰﻯ ﻛﻮﻣﯩﺘﯧﺘﯩﻨﯩﯔ ﻧﯚﯞﻩﺗﺘﯩﻜﻰ ﺟﯩﺪﺩﯨﻲ ﯞﻩﺯﯨﭙﯩﺴﻰ ﻫﻮﻗﯘﻕ ﺗﻪﯕﭙﯘﯕﻠﯘﻗﯩﻨﻰ ﺗﻪﯕﺸﻪﺵ ﻣﻪﺳﯩﻠﯩﺴﻰ ﺋﻪﻣﻪﺱ ﺋﯩﻜﻪﻥ، ﺧﯘ ﺟﯩﻨﺘﺎﯞ ﯞﻩﺯﯨﭙﯩﺴﯩﻨﻰ ﺗﺎﭘﺸﯘﺭﻏﺎﻧﻐﺎ ﻗﻪﺩﻩﺭ ﺋﯚﺯﯨﻨﻰ ﻫﯩﻤﺎﻳﻪ ﻗﯩﻠﯩﺪﯨﻐﺎﻥ ﻛﺎﺩﯨﺮﻻﺭﻧﻰ ﺭﻩﻫﺒﻪﺭﻟﯩﻚ ﮔﯘﺭﯗﭘﭙﯩﺴﯩﻐﺎ ﺋﻮﺭﯗﻧﻼﺷﺘﯘﺭﯗﺵ ﺧﯩﺰﻣﯩﺘﯩﻨﻰ ﺑﯧﺠﯩﺮﯨﭗ ﺑﻮﻟﯩﺪﯨﻜﻪﻥ.

ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﯩﻨﯩﯔ ﺩﯦﻤﻮﻛﺮﺍﺗﯩﻴﻪ ﻳﻮﻟﯩﻐﺎ ﻗﺎﺭﺍﭖ ﻣﯧﯖﯩﺸﯩﺪﯨﻦ ﺋﯜﻣﯩﺪ ﻛﯜﺗﻤﻪﺳﻠﯩﻚ ﻛﯧﺮﻩﻙ

17 ‏- ﻧﯚﯞﻩﺗﻠﯩﻚ ﻗﯘﺭﯗﻟﺘﺎﻳﻨﯩﯔ ﺑﺎﻳﺎﻧﺎﺗﭽﯩﺴﻰ ﻟﻰ ﺩﯗﯕﺸﯧﯔ ﻣﯘﺧﺒﯩﺮﻻﺭﻧﻰ ﻛﯜﺗﯩﯟﯦﻠﯩﺶ ﻳﯩﻐﯩﻨﯩﺪﺍ ﻗﯩﻠﻐﺎﻥ ﺳﯚﺯﯨﺪﻩ، ﺧﯩﺘﺎﻳﻨﯩﯔ ﺩﯦﻤﻮﻛﺮﺍﺗﯩﻴﻪ ﺋﯩﺴﻼﻫﺎﺗﻰ ﺋﯧﻠﯩﭗ ﺑﯧﺮﯨﺸﯩﺪﯨﻦ ﭼﻮﯓ ﺋﯜﻣﯩﺪ ﻛﯜﺗﻤﻪﺳﻠﯩﻚ ﻛﯧﺮﻩﻛﻠﯩﻜﻰ ﺋﻮﺗﺘﯘﺭﯨﻐﺎ ﭼﯩﻘﻘﺎﻥ ﺑﻮﻟﯘﭖ، ﻗﯘﺭﯗﻟﺘﺎﻳﺪﺍ " ﺟﯘﯕﮕﻮﭼﻪ ﺳﻮﺗﺴﯩﻴﺎﻟﯩﺰﻡ ﻳﻮﻟﯩﺪﺍ ﻣﯧﯖﯩﺶ، ﺑﯩﺮ ﭘﺎﺭﺗﯩﻴﻪ ﺗﯜﺯﯛﻣﯩﺪﻩ ﭼﯩﯔ ﺗﯘﺭﯗﺵ، ﻫﻪﺭﮔﯩﺰﻣﯘ ﻏﻪﺭﺏ ﺳﯩﻴﺎﺳﯩﺘﯩﻨﻰ ﺋﯚﺯﯨﮕﻪ ﺗﻪﺩﺑﯩﻘﻼﺵ ﻳﻮﻟﯩﻨﻰ ﺗﯘﺗﻤﺎﺳﻠﯩﻖ " ﻗﺎ ﺋﻮﺧﺸﺎﺵ ﻣﻪﺳﯩﻠﯩﻠﻪﺭ ﺋﺎﻻﻫﯩﺪﻩ ﺗﻪﻛﯩﺘﻠﻪﻧﮕﻪﻥ. (ﺋﻪﻗﯩﺪﻩ)