ﺧﯩﺘﺎﻱ ﺭﺍﻙ ﻛﯧﺴﻪﻟﻠﯩﺮﯨﻨﻰ ﺳﯘﻳﯩﺌﯩﺴﺘﯧﻤﺎﻝ ﻗﯩﻠﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺭﺍﻙ ﻛﯧﺴﯩﻠﯩﻨﻰ ﺩﺍﯞﺍﻻﺷﺘﺎ ﺋﯜﻣﯩﺪ ﭼﯩﺮﯨﻐﻰ ﺩﻩﭖ ﺑﯩﻠﯩﻨﯩﯟﺍﺗﻘﺎﻥ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﺋﯘﺳﯘﻟﻰ ﺗﺎﻻﺵ - ﺗﺎﺭﺗﯩﺸﻼﺭﻏﺎ ﺳﻪﯞﻩﭖ ﺑﻮﻟﻤﺎﻗﺘﺎ. ﺩﯗﻧﻴﺎﺩﺍ ﭘﻪﻗﻪﺗﻼ ﺧﯩﺘﺎﻳﺪﺍ ﻳﻮﻟﻐﺎ ﻗﻮﻳﯘﻟﻐﺎﻥ ﺑﯘ ﺧﯩﻞ ﺩﺍﯞﺍﻻﺷﻨﯩﯔ ﺗﯩﺒﺎﺑﻪﺗﭽﯩﻠﯩﻚ ﻣﺎﺗﯧﺮﯨﻴﺎﻟﻠﯩﺮﯨﺪﺍ ﺗﯧﺨﻰ ﺧﺎﺗﯩﺮﻟﻪﻧﻤﯩﮕﻪﻧﻠﯩﻜﯩﻨﻰ ﺋﯧﻴﺘﻘﺎﻥ ﺭﺍﻙ ﯞﻩ ﮔﯧﻦ ﻣﯘﺗﻪﺧﻪﺳﺴﯩﺴﻠﯩﺮﻯ ﺧﯩﺘﺎﻳﺪﺍ " ﺋﯜﻣﯩﺪ ﺗﯩﺠﺎﺭﯨﺘﻰ" ﻗﯩﻠﯩﻨﯩﯟﺍﺗﯩﺪﯗ، ﺩﯦﻤﻪﻛﺘﻪ.

ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ، ﭖ53 ﮔﯧﻨﻨﯩﯔ ﺗﻮﺷﯘﻏﯘﭼﻰ ﺑﯩﺮ ﯞﯨﺮﯗﺱ ﺋﺎﺭﻗﯩﻠﯩﻖ ﺭﺍﻙ ﻫﯜﺟﻪﻳﺮﯨﺴﯩﮕﻪ ﺋﻮﺭﻧﯩﺘﯩﻠﯩﺸﻰ ﯞﻩ ﺭﺍﻙ ﻫﯜﺟﻪﻳﺮﯨﻠﯩﺮﯨﻨﯩﯔ ﻛﻮﻧﺘﺮﻭﻟﻠﯘﻕ ﺑﯩﺮ ﺷﻪﻛﯩﻠﺪﻩ ﺋﯚﻟﺘﯜﺭﯛﻟﯜﺷﻰ ﺩﯦﮕﻪﻧﻠﯩﻜﺘﯘﺭ. ﻧﯘﺭﻏﯘﻥ ﺭﺍﻙ ﺗﯜﺭﻟﯩﺮﯨﺪﻩ ﺋﻪﯓ ﻣﯘﻫﯩﻢ ﮔﯧﻨﻼﺭﺩﯨﻦ ﺑﯩﺮﻯ ﺑﻮﻟﻐﺎﻥ ﭖ53 ﮔﯧﻨﻨﯩﯔ ﻫﯜﺟﻪﻳﺮﯨﻠﻪﺭﻧﻰ ﻛﻮﻧﺘﺮﻭﻝ ﺋﺎﺳﺘﯩﺪﺍ ﺗﯘﺗﯘﺵ ﯞﻩ ﺋﯘﻻﺭﻧﻰ ﻛﻮﻧﺘﺮﻭﻟﻠﯘﻕ ﺑﯩﺮ ﺷﻪﻛﯩﻠﺪﻩ ﺋﯚﻟﺘﯜﺭﯛﺵ ﺋﯩﻘﺘﯩﺪﺍﺭﻯ ﺑﺎﺭ. ﺋﻪﻣﻤﺎ، ﭖ53 ﮔﯧﻨﯩﺪﯨﻜﻰ ﺑﻪﺯﻯ ﺋﯚﺯﮔﯩﺮﯨﺸﻠﻪﺭ ﻫﯜﺟﻪﻳﺮﯨﻨﯩﯔ ﻛﻮﻧﺘﺮﻭﻟﺪﯨﻦ ﭼﯩﻘﯩﭗ ﺭﺍﻛﻘﺎ ﺋﺎﻳﻠﯩﻨﯩﺸﯩﻐﺎ ﻳﻪﻧﻰ ﻫﯜﺟﻪﻳﺮﯨﻨﯩﯔ ﻛﻮﻧﺘﺮﻭﻟﺴﯩﺰ ﻫﺎﻟﺪﺍ ﺟﯩﻘﻼﭖ ﻛﯧﺘﯩﺸﯩﮕﯩﻤﯘ ﺳﻪﯞﻩﭖ ﺑﻮﻟﯩﺪﯗ. ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺷﺘﺎ ﭖ53 ﮔﯧﻨﻰ ﺑﯩﻠﻪﻥ ﺭﺍﻙ ﻫﯜﺟﻪﻳﺮﯨﻠﯩﺮﯨﻨﻰ ﻳﻮﻕ ﻗﯩﻠﯩﺶ ﻣﻪﻗﺴﻪﺕ ﻗﯩﻠﯩﻨﯩﺪﯗ. ﺋﻪﻣﻤﺎ ﺭﺍﻙ ﯞﻩ ﮔﯧﻦ ﻣﯘﺗﻪﺧﻪﺳﺴﯩﺴﻠﯩﺮﻯ ﺑﯘ ﺧﯩﻞ ﺩﺍﯞﺍﻻﺷﻘﺎ ﺷﯜﺑﻬﻪ ﺑﯩﻠﻪﻥ ﻗﺎﺭﯨﻤﺎﻗﺘﺎ. ﺗﯜﺭﻛﯩﻴﯩﺪﯨﻦ ﻧﯘﺭﻏﯘﻥ ﻛﯧﺴﻪﻟﻠﻪﺭﻧﯩﯔ ﺑﻪﺯﻯ ﺋﻮﺭﯗﻥ ﯞﻩ ﻛﯩﺸﯩﻠﻪﺭ ﺋﺎﺭﻗﯩﻠﯩﻖ ﺧﯩﺘﺎﻳﻐﺎ ﺋﻪﯞﻩﺗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﻣﯘﺗﻪﺧﻪﺳﺴﯩﺴﻠﻪﺭ، ﺑﯘ ﺧﯩﻞ ﺩﺍﯞﺍﻻﺵ ﺋﯘﺳﯘﻟﻰ ﺋﯜﭼﯜﻥ ﻗﯩﻠﯩﻨﻐﺎﻥ ﻛﯩﻠﯩﻨﯩﻜﯩﻠﯩﻖ ﺗﻪﺗﻘﯩﻘﺎﺗﻼﺭﻧﯩﯔ ﺗﯧﺨﻰ ﻳﯧﺘﻪﺭﻟﯩﻚ ﺋﻪﻣﻪﺳﻠﯩﻜﯩﻨﻰ ﺗﻪﻛﯩﺘﻠﯩﺪﻯ.

ﺑﯘ ﻫﻪﻗﺘﻪ ﻥ ﺕ ﯞ ﺗﯧﻠﯧﯟﯨﺰﯨﻴﯩﺴﯩﻨﯩﯔ ﺗﻮﺭ ﺑﯧﺘﯩﺪﻩ ﭼﯩﻘﻘﺎﻥ ﺧﻪﯞﻩﺭﺩﻩ ﺗﯜﺭﻛﯩﻴﻪ ﻫﺎﺟﻪﺗﺘﻪﭘﻪ ﺋﯘﻧﯩﯟﯦﺮﺳﯩﺘﯧﺘﻰ ﺭﺍﻙ ﻣﯘﺗﻪﺧﻪﺳﺴﯩﺴﻰ، ﭘﺮﻭﻑ. ﺩﺭ. ﺋﯩﺒﺮﺍﻫﯩﻢ ﮔﯜﻟﻠﯜﻧﯩﯔ ﺳﯚﺯﯨﮕﻪ ﺋﻮﺭﯗﻥ ﺑﯧﺮﯨﻠﮕﻪﻥ ﺑﻮﻟﯘﭖ، ﺧﻪﯞﻩﺭﺩﻩ ﻣﯘﻧﺪﺍﻕ ﺩﯦﻴﯩﻠﮕﻪﻥ : ﻫﺎﺟﻪﺗﺘﻪﭘﻪ ﺋﯘﻧﯩﯟﯦﺮﺳﯩﺘﯧﺘﯩﺪﯨﻦ ﭘﺮﻭﻓﯧﺴﺴﻮﺭ ﺩﻭﻛﺘﻮﺭ ﺋﯩﺒﺮﺍﻫﯩﻢ ﮔﯜﻟﻠﯜ ﺧﯩﺘﺎﻳﺪﺍ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺭﺍﻙ ﻛﯧﺴﻪﻟﻠﻪﺭﮔﻪ ﺋﯜﻣﯩﺪ ﺩﻩﭖ ﺗﻪﺷﯟﯨﻖ ﻗﯩﻠﯩﻨﯩﯟﺍﺗﻘﺎﻥ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﻫﻪﻗﻘﯩﺪﻩ ﻫﻪﺭ ﺗﯜﺭﻟﯜﻙ ﺋﯚﺳﻤﯩﻨﻰ ﺋﺎﻳﺮﯨﻢ ﺑﯩﺮ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﺋﯘﺳﯘﻟﻰ ﺑﺎﺭ. ﺋﻪﻣﻤﺎ ﺧﯩﺘﺎﻱ ﭖ53 ﮔﯧﻨﻰ ﺋﺎﺭﻗﯩﻠﯩﻖ ﭘﯜﺗﯜﻥ ﺭﺍﻙ ﻛﯧﺴﻪﻟﻠﯩﺮﯨﻨﻰ ﺩﺍﯞﺍﻻﻳﺪﯨﻐﺎﻧﻠﯩﻘﯩﻨﻰ ﺩﻩﯞﺍﺗﯩﺪﯗ. ﺭﺍﻙ ﻛﯧﺴﯩﻠﯩﻨﻰ ﺑﯩﺮﻻ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﻳﻤﻪﻥ، ﺩﯦﻴﯩﺶ ﺑﻪﻛﻤﯘ ﺋﻪﺧﻤﯩﻘﺎﻧﯩﻠﯩﻖ. ﻫﺎﺯﯨﺮ ﺧﯩﺘﺎﻳﺪﺍ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻧﺪﻩﻙ ﺋﻮﺧﺸﺎﺵ ﺑﯩﺮ ﮔﯧﻨﻨﻰ ﭘﯜﺗﯜﻥ ﺭﺍﻙ ﻛﯧﺴﻪﻟﻠﯩﺮﯨﻨﻰ ﺩﺍﯞﺍﻻﺷﺘﺎ ﺋﯩﺸﻠﯩﺘﯩﺶ، ﺑﯘ ﺋﯩﺸﻨﯩﯔ ﻗﺎﻧﭽﯩﻠﯩﻚ ﺑﯩﻤﻪﻧﻪ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻤﺎﻗﺘﺎ، ﺩﯦﺪﻯ. ﻣﻪﻣﻠﯩﻜﻪﺗﻠﯩﻚ ﺭﺍﻙ ﻛﯧﺴﯩﻠﻰ ﻣﻪﺳﻠﯩﻬﻪﺕ ﻛﻮﻣﯩﺘﯧﺘﯩﻨﯩﯖﻤﯘ ﺑﺎﺷﻠﯩﻘﻰ ﺑﻮﻟﻐﺎﻥ ﺋﯩﺒﺮﺍﻫﯩﻢ ﮔﯜﻟﻠﯜ ﺋﻪﭘﻪﻧﺪﻯ 20 ﻳﯩﻠﺪﯨﻦ ﺑﯧﺮﻯ ﺩﺍﯞﺍﻡ ﻗﯩﻠﯩﭗ ﻛﯧﻠﯩﯟﺍﺗﻘﺎﻥ ﺑﯘ ﺩﺍﯞﺍﻻﺷﻨﯩﯔ ﺑﻪﺯﻯ ﺭﺍﻙ ﻛﯧﺴﻪﻟﻠﯩﺮﯨﺪﻩ ﻛﯜﭼﻜﻪ ﺋﯩﮕﻪ ﺋﯩﻜﻪﻧﻠﯩﻜﯩﻨﻰ ، ﺋﻪﻣﻤﺎ ﺑﯘ ﻫﻪﻗﺘﯩﻜﻰ ﺗﻪﺗﻘﯩﻘﺎﺗﻼﺭﻧﯩﯔ ﺗﯧﺨﻰ ﭘﯜﺗﯜﻧﻠﻪﻱ ﺋﺎﻳﺎﻗﻼﺷﻤﯩﻐﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺧﯩﺘﺎﻳﺪﯨﻜﻰ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺷﻨﯩﯔ ﻧﯧﻤﻪ ﺋﯩﻜﻪﻧﻠﯩﻜﻰ ﻧﺎﻣﻪﻟﯘﻡ

ﺧﻪﯞﻩﺭﺩﻩ ﻳﯧﺰﯨﻠﯩﺸﯩﭽﻪ ﻳﻪﻧﻪ ﻛﯧﻴﯩﻨﻜﻰ ﻛﯜﻧﻠﻪﺭﺩﻩ ﺩﺍﯕﻠﯩﻖ ﻛﯩﺸﯩﻠﻪﺭﻧﯩﯖﻤﯘ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﺋﯜﭼﯜﻥ ﺧﯩﺘﺎﻳﻐﺎ ﺑﺎﺭﻏﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ ﺋﯩﺒﺮﺍﻫﯩﻢ ﮔﯜﻟﻠﯜ ﺋﻪﭘﻪﻧﺪﻯ:" ﭼﺎﺭﯨﺴﯩﺰﻟﯩﻚ ﺋﺎﺩﻩﻣﮕﻪ ﻫﻪﻣﻤﻪ ﺋﯩﺸﻨﻰ ﻗﯩﻠﺪﯗﺭﯨﺪﯗ. ﺋﻪﻣﻤﺎ ﺑﯘ ﺑﯩﺮ ﺋﯜﻣﯩﺪ ﺗﯩﺠﺎﺭﯨﺘﯩﺪﯗﺭ. ﺋﺎﺩﻩﻣﻠﻪﺭ ﺧﯩﺘﺎﻳﺪﺍ ﻳﺎﺳﺎﻟﻐﺎﻥ ﺋﺎﭘﺘﻮﻣﻮﺑﯩﻠﻼﺭﻏﺎ ﺋﯩﺸﻪﻧﻤﻪﻳﺪﯗ، ﺧﯩﺘﺎﻳﺪﺍ ﻳﺎﺳﺎﻟﻐﺎﻥ ﺑﯩﺮ ﺋﻮﻳﯘﻧﭽﯘﻗﻨﯩﯔ ﺩﻩﺭﻫﺎﻝ ﺑﯘﺯﯗﻟﯩﺪﯨﻐﺎﻧﻠﯩﻘﯩﻨﻰ ﺑﯩﻠﯩﺪﯗﻳﯘ، ﺧﯩﺘﺎﻳﺪﯨﻜﻰ ﺑﯘ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﻫﻪﻗﻘﯩﺪﻩ ﺋﯩﺰﺩﯨﻨﯩﭗ ﻛﯚﺭﻣﻪﻳﻼ ﺧﯩﺘﺎﻳﻐﺎ ﺑﺎﺭﯨﺪﯗ. ﺧﯩﺘﺎﻳﺪﯨﻜﻰ ﺑﯘ ﺩﺍﯞﺍﻻﺷﻨﯩﯔ ﻧﯧﻤﻪ ﺑﻮﻟﻐﺎﻧﻠﯩﻘﻰ ﺋﯧﻨﯩﻖ ﺋﻪﻣﻪﺱ. ﺗﯧﺨﻰ ﺗﯩﺒﺎﺑﻪﺕ ﻣﻪﻧﺒﻪﻟﯩﺮﯨﺪﻩ ﻗﻪﻳﺖ ﻗﯩﻠﯩﻨﻐﺎﻥ ﻫﯧﭽﻨﻪﺭﺳﻪ ﻳﻮﻕ. ﻳﻪﻧﻰ ﺑﯘ ﻳﻪﺭﺩﻩ ﻗﯩﻠﯩﻨﯩﯟﺍﺗﻘﺎﻥ ﺋﯜﻣﯩﺪﻧﻰ ﺳﯘﻳﯩﺌﯩﺴﺘﯧﻤﺎﻝ ﻗﯩﻠﯩﺸﺘﯩﻦ ﺑﺎﺷﻘﺎ ﺑﯩﺮ ﻧﻪﺭﺳﻪ ﺋﻪﻣﻪﺱ،" ﺩﯦﮕﻪﻥ.

ﺑﯘ ﺋﯩﺸﻨﯩﯔ ﺗﯩﺠﺎﺭﯨﺘﯩﻨﻰ ﻗﯩﻠﯩﯟﺍﺗﻘﺎﻧﻼﺭ ﺑﺎﺭ

ﺋﯩﺒﺮﺍﻫﯩﻢ ﮔﯜﻟﻠﯜ ﺳﯚﺯﯨﺪﻩ ﻳﻪﻧﻪ ﺋﯚﺯﻟﯩﺮﻯ ﺭﺍﻙ ﻛﯧﺴﯩﻠﻰ ﻣﯘﺗﻪﺧﻪﺳﺴﯩﺴﻰ ﺗﯘﺭﯗﻗﻠﯘﻕ ﺑﯘ ﻛﯧﺴﻪﻟﮕﻪ ﮔﯩﺮﯨﭙﺘﺎﺭ ﺑﻮﻟﻐﺎﻧﻠﯩﻘﺘﯩﻦ ﺋﯚﻟﯜﺵ ﺋﺎﻟﺪﯨﺪﺍ ﺗﯘﺭﻏﺎﻥ ﺩﻭﺧﺘﯘﺭﻻﺭﻧﯩﯔ ﺑﺎﺭﻟﯩﻘﯩﻨﻰ ﺋﯧﻴﺘﯩﭗ:" ﺋﻪﮔﻪﺭ ﺭﺍﺳﺘﯩﻨﻼ ﻣﯘﺷﯘﻧﺪﺍﻕ ﺋﯩﺶ ﺑﻮﻟﺴﺎ ﺋﯘﻻﺭ ﻧﯧﻤﯩﺸﻘﺎ ﺧﯩﺘﺎﻳﻐﺎ ﺑﺎﺭﻣﺎﻳﺪﯗ؟ ﺑﯘﻧﻰ ﺋﻮﻳﻼﺵ ﻛﯧﺮﻩﻙ. ﺋﯜﻧﯜﻣﻠﯜﻙ ﺑﯩﺮ ﺩﺍﯞﺍﻻﺵ ﺋﯘﺳﯘﻟﻰ ﺑﻮﻟﻐﺎﻥ ﺑﻮﻟﺴﺎ ﺧﯩﺘﺎﻳﻐﺎ ﺋﺎﻟﺪﻯ ﺑﯩﻠﻪﻥ ﺋﯘﻻﺭ ﺑﺎﺭﺳﺎ ﺑﻮﻻﺗﺘﻰ "ﺩﯦﺪﻯ. ﺋﯘ ﻳﻪﻧﻪ، "ﺧﯩﺘﺎﻳﻐﺎ ﺑﺎﺭﻏﺎﻥ ﻧﯘﺭﻏﯘﻥ ﻛﯧﺴﻪﻟﻠﻪﺭﻧﯩﯔ ﺑﺎﺭﻟﯩﻘﯩﻨﻰ، ﺋﻪﻣﻤﺎ ﻫﯧﭽﺒﯩﺮ ﻣﺎﻧﺎ ﻣﻪﻥ ﺗﻪﻟﺘﯚﻛﯜﺱ ﺳﺎﻗﯩﻴﯩﭗ ﻛﻪﺗﺘﯩﻢ، ﺋﯚﺳﻤﻪ ﻳﻮﻕ ﺑﻮﻟﯘﭖ ﻛﻪﺗﺘﻰ،" ﺩﯦﮕﻪﻥ ﺋﺎﺩﻩﻡ ﻛﯚﺭﻣﯩﮕﻪﻧﻠﯩﻜﯩﻨﻰ ﺩﯦﺪﻯ.

ﺋﯘﻧﯩﯔ ﺩﯦﻴﯩﺸﯩﭽﻪ ﻛﯧﺴﻪﻟﻠﻪﺭﻧﻰ ﺧﯩﺘﺎﻳﻐﺎ ﺑﯧﺮﯨﺸﻘﺎ ﻣﺎﻗﯘﻝ ﻛﻪﻟﺘﯜﺭﯛﺵ ﺋﺎﺭﻗﯩﻠﯩﻖ ﺑﯘ ﺋﯩﺸﻨﯩﯔ ﺗﯩﺠﺎﺭﯨﺘﯩﻨﻰ ﻗﯩﻠﯩﯟﺍﺗﻘﺎﻥ ﻛﯩﺸﯩﻠﻪﺭ ﺑﺎﺭ ﺋﯩﻜﻪﻥ. ﻗﯩﺰﯨﻘﺎﺭﻟﯩﻘﻰ، ﺧﯩﺘﺎﻳﺪﯨﻜﻰ ﺩﻭﺧﺘﯘﺭﺧﺎﻧﯩﻼﺭﻏﺎ ﺑﯧﺮﯨﺸﻘﺎ ﺩﻩﯞﻩﺕ ﻗﯩﻠﯩﺪﯨﻐﺎﻥ ﺑﯘ ﻛﯩﺸﯩﻠﻪﺭ ﺩﻭﺧﺘﯘﺭﻟﯘﻕ ﺑﯩﻠﻪﻥ ﻗﯩﻠﭽﯩﻠﯩﻜﻤﯘ ﺋﺎﻻﻗﯩﺴﻰ ﻳﻮﻕ ﻛﯩﺸﯩﻠﻪﺭ ﺋﯩﻜﻪﻥ.

ﻥ ﺕ ﯞ ﺗﯧﻠﯧﯟﯨﺰﯨﻴﯩﺴﯩﻨﯩﯔ ﺗﻮﺭ ﺑﯧﺘﯩﺪﯨﻦ ﺋﻮﺭﯗﻥ ﺋﺎﻟﻐﺎﻥ ﺧﻪﯞﻩﺭﮔﻪ ﻳﻪﻧﻪ ﺭﺍﻙ ﻛﯧﺴﯩﻠﻰ ﺩﻭﺧﺘﯘﺭﻯ ﺑﻮﻟﻐﺎﻥ ﭘﺮﻭﻓﯧﺴﺴﻮﺭ ﺩﻭﻛﺘﻮﺭ ﻫﺎﻟﯘﻙ ﺋﻮﻧﺎﺗﻨﯩﯖﻤﯘ ﺳﯚﺯﯨﻤﯘ ﻛﯩﺮﮔﯜﺯﯛﻟﮕﻪﻥ ﺑﻮﻟﯘﭖ، ﺋﯘ ﻛﯩﺸﯩﻠﻪﺭﻧﯩﯔ ﻛﯧﺴﻪﻟﺪﯨﻦ ﻗﯘﺗﯘﻟﯘﺵ ﺋﯜﻣﯩﺪﯨﻨﯩﯔ ﺳﯘﻳﯩﺌﯩﺴﺘﯧﻤﺎﻝ ﻗﯩﻠﯩﻨﯩﯟﺍﺗﻘﺎﻧﻠﯩﻘﯩﻨﻰ ﺋﯧﻴﺘﯩﭗ ﻣﯘﻧﺪﺍﻕ ﺩﯦﮕﻪﻥ : "ﺧﯩﺘﺎﻳﺪﯨﻜﻰ ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﺩﯦﮕﻪﻥ ﺑﯩﺮ ﺋﻮﻳﺪﯗﺭﻣﺎ. ﻣﻪﺗﺒﯘﺋﺎﺗﻼﺭﺩﺍ ﭼﯩﻘﯩﯟﺍﺗﻘﺎﻥ ﺧﺎﺗﺎ ﺧﻪﯞﻩﺭﻟﻪﺭ ﺗﯜﭘﻪﻳﻠﯩﺪﯨﻦ ﻛﯧﺴﻪﻟﻠﻪﺭ ﻗﯘﺭﯗﻕ ﻳﻪﺭﮔﻪ ﺋﯜﻣﯩﺘﻠﯩﻨﯩﯟﺍﺗﯩﺪﯗ. ﺷﯘﯕﺎ ﺳﺎﻗﯩﻴﯩﻤﯩﺰ ﺩﻩﭖ ﺧﯩﺘﺎﻳﻐﺎ ﺑﯧﺮﯨﭗ، 50 - 60 ﻣﯩﯔ ﺩﻭﻟﻼﺭ ﭘﯘﻝ ﺗﯚﻟﻪﯞﺍﺗﯩﺪﯗ. ﺑﯘ ﻛﯩﺸﯩﻠﻪﺭ ﺋﺎﻟﺪﯨﻨﯩﯟﺍﺗﯩﺪﯗ، ﺋﯘﻻﺭﻏﺎ ﺋﯘﯞﺍﻝ ﺋﻪﻣﻪﺳﻤﯘ؟

ﺑﯘ ﺋﯩﺸﺘﺎ، ﺧﯩﺘﺎﻳﻨﯩﯔ ﻧﯩﻴﯩﺘﻰ ﻳﺎﻣﺎﻥ

ﺗﯜﺭﻛﯩﻴﯩﺪﻩ ﭼﯩﻘﯩﺪﯨﻐﺎﻥ ﻣﯩﻠﻠﻪﺕ ﮔﯧﺰﯨﺘﯩﻨﯩﯔ -22 ﭼﯧﺴﻼﺩﯨﻜﻰ ﺳﺎﻧﯩﺪﺍ ﭼﯩﻘﻘﺎﻥ ﺧﻪﯞﻩﺭﺩﯨﻤﯘ ﺑﯘ ﻣﻪﺳﯩﻠﯩﮕﻪ ﺋﻮﺭﯗﻥ ﺑﯧﺮﯨﻠﮕﻪﻥ ﺑﻮﻟﯘﭖ، ﺑﯘﻧﯩﯖﻐﺎ "ﺗﯜﺭﻙ ﻛﯧﺴﻪﻟﻠﻪﺭﮔﻪ ﺋﺎﮔﺎﻫﻼﻧﺪﯗﺭﯗﺵ: ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﺋﯜﭼﯜﻥ ﺧﯩﺘﺎﻳﻐﺎ ﺑﺎﺭﻣﺎﯕﻼﺭ،" ﺩﻩﭖ ﺗﯧﻤﺎ ﻗﻮﻳﯘﻟﻐﺎﻥ.

ﺧﻪﯞﻩﺭﺩﻩ ﺭﺍﻙ ﻛﯧﺴﯩﻠﯩﻨﻰ ﺩﺍﯞﺍﻻﺷﺘﺎ ﺗﯜﺭﻛﯩﻴﯩﻨﯩﯔ ﻳﺎﯞﺭﻭﭘﺎﺩﯨﻨﻤﯘ ﻳﯘﻗﯩﺮﻯ ﺳﻪﯞﯨﻴﯩﺪﻩ ﺋﯩﻜﻪﻧﻠﯩﻜﻰ، ﺭﺍﻙ ﻛﯧﺴﯩﻠﯩﻨﻰ ﺩﺍﯞﺍﻟﯩﺘﯩﺶ ﺋﯜﭼﯜﻥ ﭼﻪﺗﺌﻪﻟﮕﻪ ﭼﯩﻘﯩﺸﻘﺎ ﻛﯧﺮﻩﻙ ﻳﻮﻗﻠﯘﻗﻰ ﻳﯧﺰﯨﻠﻐﺎﻥ ﺑﻮﻟﯘﭖ، ﺑﯘ ﻫﻪﻗﺘﻪ ﺗﯩﺒﺒﯩﻲ ﺋﯚﺳﻤﻪ ﻛﯧﺴﻪﻟﻠﯩﻜﻠﯩﺮﻯ ﺟﻪﻣﺌﯩﻴﯩﺘﻰ ﺑﺎﺷﻠﯩﻘﻰ ﭘﺮﻭﻓﯧﺴﺴﻮﺭ ﺩﻭﻛﺘﻮﺭ ﺋﯩﺪﺭﯨﺲ ﻳﯜﺟﻪﻝ ﻣﯘﻧﺪﺍﻕ ﺩﯦﮕﻪﻥ: "ﮔﯧﻦ ﺋﺎﺭﻗﯩﻠﯩﻖ ﺩﺍﯞﺍﻻﺵ ﺋﯜﭼﯜﻥ ﺧﯩﺘﺎﻳﻐﺎ ﺑﺎﺭﻣﺎﯕﻼﺭ. ﺑﯘ ﺩﯙﻟﻪﺗﺘﯩﻜﯩﺴﻰ ﺗﺎﻣﺎﻣﻪﻥ ﺑﯩﺮ ﺗﯩﺠﺎﺭﯨﻲ ﺋﯩﺶ، ﺋﻪﺧﻼﻗﯩﻲ ﺋﻪﻣﻪﺱ. ﺧﯩﺘﺎﻱ ﺑﯘ ﺟﻪﻫﻪﺗﺘﻪ ﻳﺎﻣﺎﻥ ﻧﯩﻴﻪﺗﻠﯩﻚ. ﻧﯘﺭﻏﯘﻥ ﺩﯙﻟﻪﺗﺘﻪ ﺑﯘﻧﻰ ﺑﺎﺯﺍﺭﻏﺎ ﺳﯧﻠﯩﺸﻘﺎ ﺗﯩﺮﯨﺸﺘﻰ. ﺑﯘ ﺗﻮﺯﺍﻗﻘﺎ ﭼﯜﺷﯜﭖ ﻛﻪﺗﻜﻪﻥ ﺩﯙﻟﻪﺗﻠﻪﺭﻧﯩﯔ ﺑﯩﺮﻯ ﺑﻮﻟﺴﺎ ﺗﯜﺭﻛﯩﻴﻪ. ﻧﯘﺭﻏﯘﻥ ﻛﯧﺴﻪﻟﻠﯩﺮﯨﻤﯩﺰ ﺧﯩﺘﺎﻳﻐﺎ ﺑﺎﺭﺩﻯ. ﺑﯘ ﺧﯩﻞ ﺩﺍﯞﺍﻻﺵ ﺋﯘﺳﯘﻟﻰ ﺋﯜﭼﯜﻥ ﺑﯘﺭﯗﻥ ﻳﺎﯞﺭﻭﭘﺎﺩﺍ ﺋﯧﻠﯩﭗ ﺑﯧﺮﯨﻠﻐﺎﻥ ﺗﻪﺟﺮﯨﺒﯩﻠﻪﺭﻧﯩﯔ ﻫﻪﻣﻤﯩﺴﻰ ﻣﻪﻏﻠﯘﭖ ﺑﻮﻟﻐﺎﻥ، ﺋﯘﻧﯩﯔ ﺋﯜﺳﺘﯩﮕﻪ ﺑﯘ ﺧﯩﻞ ﺩﺍﯞﺍﻻﺵ ﺋﯘﺳﯘﻟﻰ ﻫﻪﻗﻘﯩﺪﻩ ﺗﯧﺨﻰ ﻫﯧﭽﻘﺎﻧﺪﺍﻕ ﺟﯘﺭﻧﺎﻟﺪﺍ ﺑﯩﺮ ﻧﻪﺭﺳﻪ ﺋﯧﻼﻥ ﻗﯩﻠﯩﻨﻐﯩﻨﻰ ﻳﻮﻕ، ﺑﯩﺮﻩﺭ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﯩﺪﯨﻤﯘ ﺑﯩﺮﻩﺭ ﺋﯩﻠﻤﯩﻲ ﻣﺎﻗﺎﻟﻪ ﻳﯧﺰﯨﻠﯩﭗ ﺑﺎﻗﻘﺎﻥ ﺋﻪﻣﻪﺱ."

ﺧﯩﺘﺎﻱ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺑﯘ ﺧﯩﻞ ﺳﯘﻳﯩﺌﯩﺴﺘﯧﻤﺎﻝ ﻗﯩﻠﯩﺶ ﺋﻪﻫﯟﺍﻟﻰ ﻫﻪﻗﻘﯩﺪﻩ ﺗﯜﺭﻛﯩﻴﯩﺪﻩ ﻣﯘﻻﻫﯩﺰﯨﻠﻪﺭ ﺩﺍﯞﺍﻣﻠﯩﻖ ﺋﯧﻠﯩﭗ ﺑﯧﺮﯨﻠﻤﺎﻗﺘﺎ. ﺗﻮﻧﯘﻟﻐﺎﻥ ﺩﺍﯕﻠﯩﻖ ﺭﺍﻙ ﻛﯧﺴﯩﻠﻰ ﻣﯘﺗﻪﺧﻪﺳﺴﯩﺴﻠﯩﺮﻯ ﻫﻪﺭ ﻛﯜﻧﻰ ﻣﻪﺗﺒﯘﺋﺎﺕ ﯞﻩ ﺗﯧﻠﯩﯟﯨﺰﯨﻴﻪﻟﻪﺭﺩﻩ ﻣﻪﻟﯘﻣﺎﺗﻼﺭﻧﻰ ﺑﯧﺮﯨﭗ، ﻛﯩﺸﯩﻠﻪﺭﻧﻰ ﺑﯘ ﺋﯩﺸﻨﻰ ﺗﯩﺠﺎﺭﻩﺗﻜﻪ ﺋﺎﻳﻼﻧﺪﯗﺭﯗﯞﺍﻟﻐﺎﻥ ﺋﺎﻟﺪﺍﻣﭽﯩﻼﺭﻧﯩﯔ ﺋﺎﻟﺪﺍﻡ ﺧﺎﻟﺘﯩﺴﯩﻐﺎ ﭼﯜﺷﯜﭖ ﺧﯩﺘﺎﻳﻐﺎ ﺑﺎﺭﻣﺎﺳﻠﯩﻘﻘﺎ ﺋﺎﮔﺎﻫﻼﻧﺪﯗﺭﻣﺎﻗﺘﺎ. (ﺋﻪﺭﻛﯩﻦ ﺗﺎﺭﯨﻢ)