HSK ﺋﯩﻤﺘﯩﻬﺎﻧﻰ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﻫﺎﻳﺎﺗﯩﻨﻰ ﻗﯩﻴﯩﻨﻼﺷﺘﯘﺭﻣﺎﻗﺘﺎ(1)

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

"ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﻰ" ﻧﯩﯔ ﺑﯩﺮ ﺗﯧﻤﯩﻐﺎ ﺋﯧﺴﯩﻠﻐﺎﻥ ﺗﻪﺷﯟﯨﻘﺎﺕ ﺗﺎﺧﺘﯩﺴﻰ. ﺋﯜﺳﺘﯩﺪﯨﻜﻰ ﻗﯘﺭﺩﺍ "ﺩﯙﻟﻪﺕ ﺑﺎﻳﺮﯨﻘﯩﻨﻰ ﺳﯚﻳﯜﭖ، ﺩﯙﻟﻪﺕ ﺷﯧﺌﯩﺮﯨﻨﻰ ﺋﻮﻗﯘﭖ، ﭘﯘﺗﯘﻧﻐﯘﺋﺎﺩﺍ ﺳﯚﺯﻟﯩﺸﻪﻳﻠﻰ" ﺩﯦﮕﻪﻥ ﺳﯚﺯﻟﻪﺭ، ﺋﺎﺳﺘﯩﺪﯨﻜﻰ ﻗﯘﺭﺩﺍ "ﺋﯜﺭﯛﻣﭽﻰ ﺷﻪﻫﻪﺭﻟﯩﻚ ﺗﯩﻞ – ﻳﯧﺰﯨﻖ ﺧﯩﺰﻣﯩﺘﻰ ﻛﻮﻣﯩﺘﯧﺘﻰ ﻧﺎﺯﺍﺭﻩﺗﭽﯩﻠﯩﻜﯩﺪﻩ ﻳﺎﺳﺎﻟﺪﻯ" ﺩﯦﮕﻪﻥ ﺳﯚﺯﻟﻪﺭ ﻳﯧﺰﯨﻠﻐﺎﻥ.

ﻳﯧﻘﯩﻨﺪﺍ ﺧﯩﺘﺎﻱ ﺋﺎﮔﯧﻨﺘﻠﯩﻘﯩﻨﯩﯔ ﺋﯜﺭﯛﻣﭽﯩﺪﯨﻦ ﺑﻪﺭﮔﻪﻥ ﺧﻪﯞﯨﺮﯨﺪﯨﻦ ﻣﻪﻟﯘﻡ ﺑﻮﻟﯩﺸﯩﭽﻪ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ HSK ﻳﻪﻧﻰ ﺧﯩﺘﺎﻱ ﺗﯩﻞ ﺳﻪﯞﯨﻴﯩﺴﻰ ﺋﯩﻤﺘﯩﻬﺎﻥ ﺑﯧﺮﯨﺶ ﭘﻮﻧﻜﯩﺘﻠﯩﺮﻯ ﺑﺎﺭﻏﺎﻧﺴﯧﺮﻯ ﻛﯚﭘﯩﻴﯩﭗ، ﻣﻪﺯﻛﯘﺭ ﺭﺍﻳﻮﻥ ﺧﯩﺘﺎﻱ ﺑﻮﻳﯩﭽﻪ ﺋﯩﻤﺘﯩﻬﺎﻥ ﺑﻪﺭﮔﯜﭼﯩﻠﻪﺭ ﺳﺎﻧﻰ ﺋﻪﯓ ﻛﯚﭖ ﺑﻮﻟﻐﺎﻥ ﺭﺍﻳﻮﻧﻐﺎ ﺋﺎﻳﻼﻧﻐﺎﻥ.

ﺧﻪﯞﻩﺭﺩﻩ ﺋﯧﻴﺘﯩﻠﯩﺸﯩﭽﻪ، HSK ﺋﯩﻤﺘﯩﻬﺎﻧﻨﻰ 1996 - ﻳﯩﻠﻰ ﺗﯘﻧﺠﻰ ﻗﯧﺘﯩﻢ ﺋﯘﻳﻐﯘﺭ ﺋﯧﻠﯩﺪﻩ ﺋﯧﻠﯩﭗ ﺑﯧﺮﯨﻠﻐﺎﻥ ﺑﻮﻟﯘﭖ، ﻳﯧﻘﯩﻨﻘﻰ 10 ﻳﯩﻠﺪﯨﻦ ﺑﯘﻳﺎﻥ ﻣﻪﺯﻛﯘﺭ ﺭﺍﻳﻮﻧﺪﯨﻜﻰ ﺋﯩﻤﺘﯩﻬﺎﻥ ﺑﻪﺭﮔﯜﭼﯩﻠﻪﺭ ﺳﺎﻧﻰ ﻫﻪﺳﺴﯩﻠﻪﭖ ﺋﯚﺭﻟﻪﺷﻜﻪ ﺑﺎﺷﻠﯩﻐﺎﻥ. ﻣﻪﺳﯩﻠﻪﻥ 1996 ‏- ﻳﯩﻠﻰ ﻣﻪﺯﻛﯘﺭ ﺭﺍﻳﻮﻧﺪﯨﻜﻰ HSK ﺋﯩﻤﺘﯩﻬﺎﻥ ﺑﻪﺭﮔﯜﭼﯩﻠﻪﺭ ﺳﺎﻧﻰ 1556 ﺑﻮﻟﯘﭖ، 2005 ‏- ﻳﯩﻠﯩﻐﺎ ﺑﺎﺭﻏﺎﻧﺪﺍ، ﺑﯘ ﺳﺎﻥ ﻛﯚﭘﯩﻴﯩﭗ 130 ﻣﯩﯖﻐﺎ ﻳﻪﺗﻜﻪﻥ. ﻫﺎﺯﯨﺮ ﺩﯗﻧﻴﺎﺩﺍ HSK ﺋﯩﻤﺘﯩﻬﺎﻧﯩﻐﺎ ﻗﺎﺗﻨﺎﺷﻘﯘﭼﯩﻼﺭﻧﯩﯔ ﺳﺎﻧﻰ ﺑﯩﺮ ﻣﯩﻠﻴﻮﻥ 200 ﻣﯩﯖﺪﯨﻦ ﺋﺎﺷﻘﺎﻥ ﺑﻮﻟﯘﭖ، ﺑﯘ ﺳﺎﻧﻨﯩﯔ ﻳﯧﺮﯨﻤﯩﺪﯨﻦ ﻛﯚﭖ ﻗﯩﺴﻤﯩﻨﻰ ﻳﻪﻧﻰ 620 ﻣﯩﯖﯩﻨﻰ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺧﯩﺘﺎﻱ ﺑﻮﻟﻤﯩﻐﺎﻥ ﻣﯩﻠﻠﻪﺗﻠﻪﺭ ﺋﯩﮕﯩﻠﯩﮕﻪﻥ.

ﺧﯩﺘﺎﻱ ﺋﺎﮔﯧﻨﺘﻠﯩﻘﯩﻨﯩﯔ ﺋﯜﺭﯛﻣﭽﯩﺪﯨﻦ ﺑﻪﺭﮔﻪﻥ ﺑﯘ ﺧﻪﯞﯨﺮﯨﺪﻩ ﻳﻪﻧﻪ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﻩ HSK ﺋﯩﻤﺘﯩﻬﺎﻧﻰ ﺋﺎﻟﻰ ﻣﻪﻛﺘﻪﭘﻜﻪ ﻛﯩﺮﯨﺶ ﺋﯩﻤﺘﯩﻬﺎﻧﯩﻐﺎ ﺋﻮﺧﺸﺎﺵ ﻣﯘﻫﯩﻢ ﺋﻮﺭﯗﻧﺪﺍ ﺗﯘﺭﯨﺪﯨﻐﺎﻧﻠﯩﻘﻰ ﺋﻪﺳﻜﻪﺭﺗﯩﻠﯩﭗ، "ﻫﺎﺯﯨﺮ ﺷﯩﻨﺠﺎﯕﺪﯨﻜﻰ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭ ﺧﯩﺘﺎﻱ ﺗﯩﻠﯩﻨﯩﯔ ﻧﻪﻗﻪﺩﻩﺭ ﻣﯘﻫﯩﻢ ﺋﯩﻜﻪﻧﻠﯩﻜﯩﻨﻰ ﺗﻮﻟﯘﻕ ﺗﻮﻧﯘﭖ ﻳﻪﺗﺘﻰ. ﺷﯘﯕﺎ ﻫﺎﺯﯨﺮ ﺋﯚﺯ ﭘﻪﺭﺯﻩﺗﻠﯩﺮﯨﻨﻰ ﺋﯩﭽﻜﯩﺮﻯ ﺋﯚﻟﻜﯩﻠﻪﺭﮔﻪ ﺋﻪﯞﻩﺗﯩﭗ ﺋﻮﻗﯘﺗﯩﺪﯨﻐﺎﻥ ﺋﺎﺗﺎ‏ ‏- ﺋﺎﻧﯩﻼﺭ ﺑﺎﺭﻏﺎﻧﺴﯧﺮﻯ ﻛﯚﭘﯜﻳﯩﯟﺍﺗﯩﺪﯗ. ﺑﯘ ﻳﯩﻞ 6 ‏- ﺋﺎﻳﺪﺍ ﺋﯚﺗﻜﯜﺯﯛﻟﮕﻪﻥ ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﺪﯨﻦ ﺋﯧﻠﯩﻨﻐﺎﻥ ﺋﯩﻤﺘﯩﻬﺎﻧﺪﺍ، ﮔﻪﺭﭼﻪ ﻗﻮﺑﯘﻝ ﻗﯩﻠﯩﺶ ﺳﺎﻧﻰ 4 ﻣﯩﯖﻐﺎ ﻳﯧﻘﯩﻦ ﺑﻮﻟﺴﯩﻤﯘ، ﺋﯩﻤﺘﯩﺨﺎﻥ ﺑﻪﺭﮔﯜﭼﯩﻠﻪﺭﻧﯩﯔ ﺳﺎﻧﻰ 31 ﻣﯩﯖﻐﺎ ﻳﻪﺗﻜﻪﻥ" ﺩﯦﻴﯩﻠﮕﻪﻥ.

HSK ﺋﯩﻨﺘﯩﻬﺎﻣﯩﻐﺎ ﻗﺎﺗﻨﯩﺸﯩﺪﯨﻐﺎﻥ ﺋﯘﻳﻐﯘﺭﻻﺭﻧﯩﯔ ﻛﯚﭘﯩﻴﯩﺸﻰ ﻣﻪﺟﺒﯘﺭﻟﯩﻨﯩﺸﺘﯩﻦ

ﻳﺎﭘﻮﻧﯩﻴﯩﺪﻩ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻐﺎ ﺋﯧﺮﯨﺸﻜﻪﻥ ﻫﺎﺯﯨﺮ ﺋﺎﻣﯧﺮﯨﻜﯩﺪﺍ ﺗﯘﺭﯗﺷﻠﯘﻕ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﻖ ﭘﻮﻻﺕ ﺋﻪﭘﻪﻧﺪﻯ ﺋﻪﻳﻨﻰ ﭼﺎﻏﺪﺍ ﺋﯚﺯﯨﻨﯩﯖﻤﯘ HSK ﺋﯩﻤﺘﯩﻬﺎﻧﯩﻐﺎ ﻗﺎﺗﻨﺎﺷﻘﺎﻧﻠﯩﻘﯩﻨﻰ ﺳﯚﺯﻟﻪﭖ ﻛﯧﻠﯩﭗ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ HSK ﺋﯩﻤﺘﯩﻬﺎﻧﯩﻐﺎ ﻗﺎﺗﻨﺎﺷﻘﯘﭼﯩﻼﺭ ﺳﺎﻧﯩﻨﯩﯔ ﺑﯘ ﺩﻩﺭﯨﺠﯩﺪﻩ ﻛﯚﭘﯩﻴﯩﯟﺍﺗﻘﺎﻧﻠﯩﻘﯩﻨﻰ ﭘﯜﺗﯜﻧﻠﻪﻱ ﺑﯩﺮ ﺧﯩﻞ ﻣﻪﺟﺒﯘﺭﻻﺵ ﺳﯩﻴﺎﺳﯩﺘﯩﺪﯨﻦ ﻛﯧﻠﯩﭗ ﭼﯩﻘﻘﺎﻥ ﺩﻩﭖ ﻛﯚﺭﺳﻪﺗﺘﻰ.

ﺭﺍﺩﯨﺌﻮﻣﯩﺰﻧﯩﯔ ﻫﻪﻗﺴﯩﺰ ﻟﯩﻨﯩﻴﯩﺴﯩﮕﻪ ﻛﯧﻠﯩﯟﺍﺗﻘﺎﻥ ﺗﯧﻠﯧﻔﻮﻧﻼﺭﺩﯨﻦ ﻣﻪﻟﯘﻡ ﺑﻮﻟﯩﺸﯩﭽﻪ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻫﻪﺭﻗﺎﻧﺪﺍﻕ ﺋﺎﻟﯩﻲ ﻣﻪﻛﺘﻪﭘﻠﻪﺭﺩﻩ، ﻣﯩﻠﻠﯩﻲ ﺋﻮﻗﯘﺗﻘﯘﭼﯩﻼﺭ ﻣﯩﻠﻠﻰ ﺋﻮﻗﯘﻏﯘﭼﯩﻼﺭﻏﺎ ﺋﯚﺯ ﺗﯩﻠﯩﺪﺍ ﺋﻪﻣﻪﺱ، ﺑﻪﻟﻜﻰ ﺧﯩﺘﺎﻳﺘﯩﻠﯩﺪﻩ ﺩﻩﺭﺱ ﺋﯚﺗﯩﺪﯨﻜﻪﻥ. ﺷﯘﯕﺎ ﻣﯩﻠﻠﯩﻲ ﺋﻮﻗﯘﺗﻘﯘﭼﯩﻼﺭ ﻣﻪﻳﻠﻰ ﺋﯘ ﻛﻪﺳﯩﭗ ﺟﻪﻫﻪﺗﺘﻪ ﻗﺎﻧﭽﻪ ﭘﯘﺧﺘﺎ ﻳﺎﻛﻰ ﺑﯩﻠﯩﻤﻠﯩﻚ ﺑﻮﻟﺴﯘﻥ، ﺋﻪﮔﻪﺭ ﺧﯩﺘﺎﻱ ﺗﯩﻞ ﺋﯚﺗﻜﯜﻟﯩﺪﯨﻦ ﺋﯚﺗﻪﻟﻤﻪﻳﺪﯨﻜﻪﻥ، ﭼﻮﻗﯘﻡ ﺋﻮﻗﯘﺗﻘﯘﭼﯩﻠﯩﻖ ﺧﯩﺰﻣﯩﺘﯩﺪﯨﻦ ﺋﯧﻠﯩﭗ ﺗﺎﺷﻠﯩﻨﯩﺪﯨﻜﻪﻥ.

HSK ﺗﯩﻦ ﺋﯚﺗﻪﻟﻤﯩﮕﻪﻧﻠﻪﺭﻧﯩﯔ ﺋﯧﭽﯩﻨﯩﺸﻠﯩﻖ ﺋﺎﻗﯩﯟﯨﺘﻰ

ﺑﯩﺮ ﻗﯩﺴﯩﻢ ﺋﻮﺭﺗﺎ ﻳﺎﺷﻠﯩﻖ ﺧﯩﺘﺎﻱ ﺗﯩﻞ ﺋﯚﺗﻜﯩﻠﯩﺪﯨﻦ ﺋﯚﺗﻪﻟﻤﯩﮕﻪﻥ ﺋﯘﻳﻐﯘﺭ ﺋﻮﻗﯘﺗﻘﯘﭼﯩﻼﺭ ﺑﯘ ﺧﯩﻞ ﺑﯧﺴﯩﻤﻐﺎ ﺑﻪﺭﺩﺍﺷﻠﯩﻖ ﺑﯧﺮﻩﻟﻤﯩﮕﻪﻥ. ﻣﻪﺳﯩﻠﻪﻥ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﺪﯨﻜﻰ ﺋﯩﺴﻤﯩﻨﻰ ﻣﻪﻟﯘﻡ ﻗﯩﻠﯩﺸﻨﻰ ﺧﺎﻟﯩﻤﯩﻐﺎﻥ ﺑﯩﺮ ﺧﯩﺰﻣﻪﺗﭽﯩﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻣﻪﺯﻛﯘﺭ ﻣﻪﻛﺘﻪﭘﻨﯩﯔ ﺗﺎﺭﯨﺦ ﻓﺎﻛﯘﻟﺘﯧﺘﯩﺪﯨﻜﻰ ﺑﯩﺮ ﺋﻮﻗﯘﺗﻘﯘﭼﻰ ﺧﯩﺘﺎﻱ ﺗﯩﻞ ﺋﯚﺗﻜﯜﻟﯩﺪﯨﻦ ﺋﯚﺗﻪﻟﻤﯩﮕﻪﻧﻠﯩﻜﺘﯩﻦ ﺧﯩﺰﻣﻪﺗﺘﯩﻦ ﺋﯧﻠﯩﭗ ﺗﺎﺷﻼﻧﻐﺎﻧﺪﯨﻦ ﻛﯧﻴﯩﻦ، ﺋﺎﭼﭽﯩﻐﯩﺪﺍ ﺗﯘﻳﯘﻗﺴﯩﺰ ﻳﯜﺭﻩﻙ ﻛﯧﺴﯩﻠﻰ ﻗﻮﺯﻏﺎﭖ، ﻣﯧﯖﯩﺴﯩﮕﻪ ﻗﺎﻥ ﭼﯜﺷﯜﭖ ﻫﺎﻳﺎﺗﯩﺪﯨﻦ ﺋﺎﻳﺮﯨﻠﻐﺎﻥ.

ﺋﯘﺯﯗﻥ ﻳﯩﻞ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﺘﺎ ﺋﻮﻗﯘﺗﻘﯘﭼﯩﻠﯩﻖ ﻗﯩﻠﻐﺎﻥ ﻫﺎﺯﯨﺮ ﺋﺎﻣﯧﺮﯨﻜﯩﺪﺍ ﺗﯘﺭﯗﺷﻠﯘﻕ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﭘﻮﻻﺕ ﺋﻪﭘﻪﻧﺪﻯ ﻣﻪﺯﻛﯘﺭ ﻣﻪﻛﺘﻪﭘﺘﯩﻜﻰ ﺋﻮﻗﯘﺗﻘﯘﭼﯩﻼﺭﻧﯩﯔ ﻫﻪﻗﯩﻘﻪﺗﻪﻥ ﻧﺎﻫﺎﻳﯩﺘﻰ ﺋﯧﻐﯩﺮ ﺑﯧﺴﯩﻢ ﺋﺎﺳﺘﯩﺪﺍ ﻳﺎﺷﺎﯞﺍﺗﻘﺎﻧﻠﯩﻘﯩﻨﻰ ﻫﻪﺗﺘﺎ ﭼﻪﺗﺌﻪﻟﻠﻪﺭﺩﻩ ﺩﻭﻛﺘﻮﺭﻟﯘﻕ ﺋﯘﻧﯟﺍﻥ ﺋﯧﻠﯩﭗ ﻗﺎﻳﺘﻘﺎﻥ ﺋﯩﻘﺘﯩﺪﺍﺭﻟﯩﻖ ﺋﻮﻗﯘﺗﻘﯘﭼﯩﻼﺭﻣﯘ ﺧﯩﺘﺎﻱ ﺗﯩﻞ ﺋﯚﺗﻜﯩﻠﯩﺪﯨﻦ ﺋﯚﺗﻪﻟﻤﯩﮕﻪﻧﻠﯩﻜﺘﯩﻦ ﺧﯩﺰﻣﻪﺗﺘﯩﻦ ﺗﻮﺧﺘﯩﺘﯩﭗ ﻗﻮﻳﯘﻟﯩﯟﺍﺗﻘﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺋﯘﻳﻐﯘﺭ ﺯﯨﻴﺎﻟﯩﺴﻰ ﭘﻮﻻﺕ ﺋﻪﭘﻪﻧﺪﻯ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﺍ HSK ﺋﯩﻤﺘﯩﻬﺎﻧﯩﻨﯩﯔ ﺋﯩﻨﺘﺎﻳﯩﻦ ﻣﯘﻫﯩﻢ ﺭﻭﻝ ﺋﻮﻳﻨﺎﻳﺪﯨﻐﺎﻧﻠﯩﻘﯩﻨﻰ ﻫﻪﺗﺘﺎ ﺋﯘﻧﯟﺍﻥ ﺑﺎﻫﺎﻻﺷﺘﯩﻤﯘ ﺯﻭﺭ ﺗﻪﺳﯩﺮ ﻛﯚﺭﺳﯩﺘﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ، ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﻨﯩﯔ ﺋﻪﺩﻩﺑﯩﻴﺎﺕ ﻓﺎﻛﯘﻟﺘﯧﺘﯩﺪﯨﻜﻰ ﺑﯩﺮ ﺋﻮﻗﯘﺗﻘﯘﭼﯩﻨﯩﯔ ﺳﻪﺭﮔﯜﺯﻩﺷﺘﯩﺴﯩﻨﻰ ﺳﯚﺯﻟﻪﭖ ﺑﻪﺭﺩﻯ.