HSK ﺋﯩﻤﺘﯩﻬﺎﻧﻰ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﻫﺎﻳﺎﺗﯩﻨﻰ ﻗﯩﻴﯩﻨﻼﺷﺘﯘﺭﻣﺎﻗﺘﺎ(2)

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

"ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﻰ" ﻧﯩﯔ ﺑﯩﺮ ﺗﯧﻤﯩﻐﺎ ﺋﯧﺴﯩﻠﻐﺎﻥ ﺗﻪﺷﯟﯨﻘﺎﺕ ﺗﺎﺧﺘﯩﺴﻰ. ﺋﯜﺳﺘﯩﺪﯨﻜﻰ ﻗﯘﺭﺩﺍ "ﺩﯙﻟﻪﺕ ﺑﺎﻳﺮﯨﻘﯩﻨﻰ ﺳﯚﻳﯜﭖ، ﺩﯙﻟﻪﺕ ﺷﯧﺌﯩﺮﯨﻨﻰ ﺋﻮﻗﯘﭖ، ﭘﯘﺗﯘﻧﻐﯘﺋﺎﺩﺍ ﺳﯚﺯﻟﯩﺸﻪﻳﻠﻰ" ﺩﯦﮕﻪﻥ ﺳﯚﺯﻟﻪﺭ، ﺋﺎﺳﺘﯩﺪﯨﻜﻰ ﻗﯘﺭﺩﺍ "ﺋﯜﺭﯛﻣﭽﻰ ﺷﻪﻫﻪﺭﻟﯩﻚ ﺗﯩﻞ – ﻳﯧﺰﯨﻖ ﺧﯩﺰﻣﯩﺘﻰ ﻛﻮﻣﯩﺘﯧﺘﻰ ﻧﺎﺯﺍﺭﻩﺗﭽﯩﻠﯩﻜﯩﺪﻩ ﻳﺎﺳﺎﻟﺪﻯ" ﺩﯦﮕﻪﻥ ﺳﯚﺯﻟﻪﺭ ﻳﯧﺰﯨﻠﻐﺎﻥ.

ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ، ﺋﯘﻳﻐﯘﺭ ﺋﯧﻠﯩﺪﻩ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ HSK ﻳﻪﻧﻰ ﺧﯩﺘﺎﻱ ﺗﯩﻞ ﺋﯚﻟﻜﯩﺴﯩﺪﯨﻦ ﺋﯚﺗﯜﺵ ﺋﯩﻤﺘﯩﻬﺎﻧﻰ ﺑﺎﺭﻏﺎﻧﺴﯧﺮﻯ ﻛﯜﭼﻪﻳﮕﻪﻥ ﺑﻮﻟﯘﭖ، ﻫﻪﺭﻗﺎﻧﺪﺍﻕ ﺳﺎﻫﻪﺩﻩ ﺋﯩﺸﻠﻪﯞﺍﺗﻘﺎﻥ ﺧﯩﺘﺎﻱ ﺑﻮﻟﻤﯩﻐﺎﻥ ﻣﯩﻠﻠﻪﺕ ﻣﻪﺯﻛﯘﺭ ﺋﯩﻤﺘﯩﻬﺎﻧﻐﺎ ﻗﺎﺗﻨﯩﺸﯩﺸﻘﺎ ﻣﻪﺟﺒﯘﺭ ﺑﻮﻟﯘﭖ ﻛﻪﻟﮕﻪﻥ.

ﺧﯩﺘﺎﻱ ﺋﺎﮔﯧﻨﺘﻠﯩﻘﻰ ﺗﻪﺭﯨﭙﯩﺪﯨﻦ ﺑﯧﺮﯨﻠﮕﻪﻥ ﺧﻪﯞﻩﺭﻟﻪﺭﺩﻩ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ HSK ﺋﯩﻤﺘﯩﻬﺎﻧﯩﻐﺎ ﻗﺎﺗﻨﺎﺷﻘﯘﭼﯩﻼﺭ ﺳﺎﻧﻰ ﭘﯜﺗﯜﻥ ﺩﯗﻧﻴﺎ ﺑﻮﻳﯩﭽﻪ ﻣﻪﺯﻛﯘﺭ ﺋﯩﻤﺘﯩﻬﺎﻧﻐﺎ ﻗﺎﺗﻨﺎﺷﻘﯘﭼﯩﻼﺭ ﺋﻮﻣﯘﻣﯩﻲ ﺳﺎﻧﯩﻨﯩﯔ ﻳﯧﺮﯨﻤﯩﺪﯨﻦ ﻛﯚﭖ ﻗﯩﺴﻤﯩﻨﻰ ﺋﯩﮕﯩﻠﯩﮕﻪﻥ.

ﻣﯘﻧﺎﺳﯩﯟﻩﺗﻠﯩﻚ ﺧﻪﯞﻩﺭﻟﻪﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﻩ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ HSK ﺋﯩﻤﺘﯩﻬﺎﻧﻰ ﺩﻩﺳﻠﻪﭘﻜﻰ ﯞﺍﻗﯩﺘﻼﺭﺩﯨﻜﯩﺪﯨﻦ ﻛﯚﭖ ﭘﻪﺭﻗﻠﯩﻖ ﺑﻮﻟﯘﭖ، ﺑﻮﻟﯘﭘﻤﯘ ﺷﻪﻛﯩﻞ ﯞﻩ ﻣﻪﺯﻣﯘﻥ ﺟﻪﻫﻪﺗﺘﻪ ﺯﻭﺭ ﺋﯚﺯﮔﯜﺭﯛﺷﻠﻪﺭ ﺑﻮﻟﻐﺎﻥ.

ﺑﯘ ﻫﻪﻗﺘﻪ ﺋﺎﻣﯧﺮﯨﻜﯩﺪﺍ ﺗﯘﺭﯗﺷﻠﯘﻕ ، ﺑﯘﻧﺪﯨﻦ ﺋﯩﻠﮕﯩﺮﻯ ﺋﯩﻠﮕﯩﺮﻯ ﻣﻪﺯﻛﯘﺭ ﺋﯩﻤﺘﯩﻬﺎﻧﻐﺎ ﻗﺎﺗﻨﺎﺷﻘﺎﻥ ﻫﻪﻣﺪﻩ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﺘﺎ ﺋﯘﺯﯗﻥ ﻳﯩﻞ ﺋﻮﻗﯘﺗﻘﯘﭼﯩﻠﯩﻖ ﺧﯩﺰﻣﯩﺘﻰ ﺑﯩﻠﻪﻥ ﺷﯘﻏﯘﻟﻼﻧﻐﺎﻥ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﭘﻮﻻﺕ ﺋﻪﭘﻪﻧﺪﻯ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻫﻪﺭﻗﺎﻳﺴﻰ ﺋﺎﻟﯩﻲ ﻣﻪﻛﺘﻪﭘﻠﻪﺭﺩﻩ ﺋﯘﻳﻐﯘﺭ ﺋﻮﻗﯘﻏﯘﭼﯩﻠﯩﺮﻯ ﺗﯩﻞ ﺋﻪﺩﻩﺑﯩﻴﺎﺗﺘﯩﻦ ﺑﺎﺷﻘﺎ ﻫﻪﺭﻗﺎﻧﺪﺍﻕ ﺑﯩﺮ ﺩﻩﺭﺳﻨﻰ ﺧﯩﺘﺎﻱ ﺗﯩﻠﯩﺪﺍ ﺋﺎﯕﻼﯞﺍﺗﻘﺎﻧﻠﯩﻘﯩﻨﻰ ﺷﯘﻧﺪﺍﻗﻼ ﺧﯩﺘﺎﻱ ﺗﯩﻠﯩﺪﺍ ﺑﯧﺮﯨﻠﯩﺪﯨﻐﺎﻥ ﺑﯘ ﺩﻩﺭﺳﻠﻪﺭﻧﻰ ﺋﯚﺗﯩﺪﯨﻐﺎﻧﻼﺭ ﺧﯩﺘﺎﻱ ﺋﻮﻗﯘﺗﻘﯘﭼﯩﻠﯩﺮﯨﺪﯨﻦ ﺑﺎﺷﻘﺎ ﺗﯩﻞ ﺋﯚﺗﻜﯩﻠﯩﺪﯨﻦ ﺋﯚﺗﻪﻟﯩﮕﻪﻥ ﺋﯘﻳﻐﯘﺭ ﺋﻮﻗﯘﺗﻘﯘﭼﯩﻠﯩﺮﻯ ﺋﯩﻜﻪﻧﻠﯩﮕﯩﻨﻰ ﻣﻪﻟﯘﻡ ﻗﯩﻠﯩﺶ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ ، ﺋﻮﻗﯘﻏﯘﭼﯩﻼﺭ ﺋﻮﻗﯘﺗﻘﯘﭼﻰ ﺗﺎﻟﻼﺵ ﺋﻪﺭﻛﯩﻨﻠﯩﻜﻰ ﺑﻮﻟﻐﺎﻧﻠﯩﻘﺘﯩﻦ، ﺋﯘﻻﺭ ﺧﯩﺘﺎﻱ ﺗﯩﻠﯩﺪﺍ ﺑﯧﺮﯨﻠﯩﺪﯨﻐﺎﻥ ﺩﻩﺭﺳﻨﻰ ﺋﺎﯕﻼﺷﺘﺎ، ﺋﯘﻳﻐﯘﺭ ﺋﻮﻗﯘﺗﻘﯘﭼﯩﻼﺭﻧﻰ ﺋﻪﻣﻪﺱ، ﺑﻪﻟﻜﻰ ﺧﯩﺘﺎﻱ ﺋﻮﻗﯘﺗﻘﯘﭼﯩﻠﯩﺮﯨﻨﻰ ﺗﺎﻟﻼﻳﺪﯨﻐﺎﻥ ﺋﻪﻫﯟﺍﻟﻼﺭﻧﯩﯔ ﻣﻪﯞﺟﯘﺕ ﺋﯩﻜﻪﻧﻠﯩﻜﯩﻨﻰ ﺋﯧﻴﺘﺘﻰ.

ﻣﯘﻧﺎﺳﯩﯟﻩﺗﻠﯩﻚ ﻣﻪﻟﯘﻣﺎﺗﻼﺭﺩﺍ ﻛﯚﺭﺳﯩﺘﯩﻠﯩﺸﯩﭽﻪ، ﻫﺎﺯﯨﺮ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭ ﺋﯧﻠﯩﺪﻩ HSK ﺋﯩﻤﺘﯩﻬﺎﻧﻰ ﻛﯜﭼﯩﻴﯩﺶ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ، ﺧﯩﺘﺎﻱ ﺑﻮﻟﻤﯩﻐﺎﻥ ﻣﯩﻠﻠﻪﺗﻠﻪﺭﻧﯩﯔ ﭘﻪﺭﺯﻩﻧﺘﻠﯩﺮﯨﻨﻰ ﺑﺎﺷﻼﻧﻐﯘﭺ ﻣﻪﻛﺘﻪﭘﻨﻰ ﭘﯜﺗﺘﯜﺭﻣﻪﻱ ﺗﯘﺭﯗﭘﻼ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﺋﻮﻗﯘﺷﻘﺎ ﺋﯜﻧﺪﯨﻤﻪﻛﺘﻪ. ﻛﯚﭘﻠﯩﮕﻪﻥ ﺋﯘﻳﻐﯘﺭ ﺋﺎﺗﺎ - ﺋﺎﻧﯩﻠﯩﺮﻯ ﺑﺎﻟﯩﻠﯩﺮﯨﻨﯩﯔ ﻛﻪﻟﮕﯜﺳﻰ ﺋﯩﺴﺘﯩﻘﺒﺎﻟﯩﻨﻰ ﺋﻮﻳﻼﭖ، ﺋﯘﻻﺭﻧﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﺋﻮﻗﯘﺗﯘﺷﻘﺎ ﻫﻪﺗﺘﺎ ﺑﺎﺷﻼﻧﻐﯘﭺ ﺑﯩﺮﯨﻨﭽﻰ ﺳﯩﻨﯩﭙﺘﯩﻦ ﺗﺎﺭﺗﯩﭗ ﺧﯩﺘﺎﻱ ﻣﻪﻛﺘﯩﭙﯩﺪﻩ ﺋﻮﻗﯘﺗﯘﺷﻘﺎ ﻣﻪﺟﺒﯘﺭ ﺑﻮﻟﻤﺎﻗﺘﺎ.