ﺧﯩﺘﺎﻱ ﺗﯜﺭﻛﯩﻴﯩﺪﻩ ﻣﺎﻝ ﺋﯩﺸﻠﻪﭖ ﭼﯩﻘﯩﺮﯨﺶ ﺑﺎﺯﯨﺴﻰ ﻗﯘﺭﻣﺎﻗﭽﻰ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

"ﻫﯚﺭﯨﻴﻪﺕ" ﮔﯧﺰﯨﺘﯩﻨﯩﯔ 8-ﺋﺎﻳﻨﯩﯔ 5-ﻛﯜﻧﯩﺪﯨﻜﻰ ﺳﺎﻧﯩﺪﺍ "ﺧﯩﺘﺎﻱ ﺗﯜﺭﻛﯩﻴﯩﺪﻩ ﺋﯩﺸﻠﻪﭖ ﭼﯩﻘﯩﺮﯨﺶ ﺑﺎﺯﯨﺴﻰ ﻗﯘﺭﻣﺎﻗﭽﻰ" ﺗﯧﻤﯩﺴﯩﺪﺍ ﺑﯩﺮ ﺧﻪﯞﻩﺭ ﺋﯧﻼﻥ ﻗﯩﻠﯩﻨﺪﻯ. ﺧﻪﯞﻩﺭﺩﻩ ﺗﯜﺭﻛﯩﻴﯩﻨﯩﯔ ﺧﯩﺘﺎﻱ ﺑﯩﻠﻪﻥ ﺑﻮﻟﻐﺎﻥ ﺋﯩﻘﺘﯩﺴﺎﺩﯨﻲ ﻣﯘﻧﺎﺳﯩﯟﯨﺘﯩﺪﻩ ﺋﯩﺴﺘﺮﺍﺗﯧﮕﯩﻴﻪ ﺟﻪﻫﻪﺗﺘﯩﻦ ﺗﯜﭘﺘﯩﻦ ﺋﯚﺯﮔﯩﺮﯨﺶ ﺋﯧﻠﯩﭗ ﺑﺎﺭﻏﺎﻧﻠﯩﻘﻰ، ﺗﯜﺭﻙ ﻛﺎﺭﺧﺎﻧﯩﭽﯩﻠﯩﺮﻯ ﺧﯩﺘﺎﻱ ﻣﺎﻟﻠﯩﺮﯨﻨﯩﯔ ﺳﯜﭘﻪﺗﺴﯩﺰ ﺋﯩﻜﻪﻧﻠﯩﻜﯩﻨﻰ ﺗﻪﻧﻘﯩﺪ ﻗﯩﻠﯩﭗ ﻛﻪﻟﮕﻪﻥ ﺑﻮﻟﺴﯩﻤﯘ، ﺑﯘ ﻣﺎﻟﻼﺭﻧﯩﯔ ﺑﯘﻧﺪﯨﻦ ﻛﯧﻴﯩﻦ ﺗﯜﺭﻛﯩﻴﯩﺪﻩ ﺋﯩﺸﻠﻪﭖ ﭼﯩﻘﯩﺮﯨﻠﯩﺪﯨﻐﺎﻧﻠﯩﻘﻰ ﻳﯧﺰﯨﻠﻐﺎﻥ.

ﻛﯜﺭﺷﺎﺕ ﺗﯜﺯﻣﻪﻥ ﺧﯩﺘﺎﻳﻐﺎ ﺑﺎﺭﻣﺎﻗﭽﻰ

ﺧﻪﯞﻩﺭﺩﻩ ﻳﯧﺰﯨﻠﯩﺸﯩﭽﻪ، ﺧﯩﺘﺎﻱ ﺗﯜﺭﻛﯩﻴﯩﻨﯩﯔ ﺋﯩﺴﺘﺎﻧﺒﯘﻝ، ﺋﻪﻧﻘﻪﺭﻩ، ﺋﯩﺰﻣﯩﺮ ﯞﻩ ﻣﻪﺭﺳﯩﻦ ﻗﺎﺗﺎﺭﻟﯩﻖ 4 ﭼﻮﯓ ﺷﻪﻫﺮﯨﺪﻩ ﻣﻪﺑﻠﻪﻍ ﺳﯧﻠﯩﺶ ﺑﺎﺯﯨﺴﻰ ﻗﯘﺭﯗﺷﻘﺎ ﻗﺎﺭﺍﺭ ﻗﯩﻠﻐﺎﻥ ﺑﻮﻟﯘﭖ، ﺗﯜﺭﻛﯩﻴﻪ ﺗﺎﺷﻘﻰ ﺳﻮﺩﺍ ﺋﯩﺪﺍﺭﯨﺴﻰ ﻣﻪﺳﺌﯘﻟﻠﯩﺮﯨﻨﯩﯔ ﺩﯦﻴﯩﺸﯩﭽﻪ ﺑﯘ ﻗﺎﺭﺍﺭ ﺧﯩﺘﺎﻳﺪﺍ ﺭﻩﺳﻤﻰ ﺋﯧﻼﻥ ﻗﯩﻠﯩﻨﻐﺎﻥ ﺋﯩﻜﻪﻥ. ﺧﯩﺘﺎﻳﻼﺭ ﺑﯘ ﻣﻪﻗﺴﻪﺕ ﺑﯩﻠﻪﻥ ﺋﯚﺗﻜﻪﻥ ﻳﺎﺯ ﺋﯩﻜﻜﻰ ﻗﯧﺘﯩﻢ ﺗﯜﺭﻛﯩﻴﯩﮕﻪ ﺯﯨﻴﺎﺭﻩﺕ ﺋﯧﻠﯩﭗ ﺑﺎﺭﻏﺎﻥ.

ﺗﯜﺭﻛﯩﻴﯩﻨﯩﯔ ﺗﺎﺷﻘﻰ ﺗﯩﺠﺎﺭﻩﺗﻜﻪ ﻣﻪﺳﺌﯘﻝ ﺩﯙﻟﻪﺕ ﻣﯩﻨﯩﺴﺘﯩﺮﻯ ﻛﯜﺭﺷﺎﺕ ﺗﯜﺯﻣﻪﻥ ﺑﯘ ﺟﯜﻣﻪ ﻛﯜﻧﻰ ﻳﻪﻧﻰ 9-ﺋﺎﻳﻨﯩﯔ 8 - ﻛﯜﻧﻰ ﺧﯩﺘﺎﻳﺪﺍ ﺋﯧﭽﯩﻠﯩﺪﯨﻐﺎﻥ ﺧﻪﻟﻘﺌﺎﺭﺍ ﻣﻪﺑﻠﻪﻍ ﺳﯧﻠﯩﺶ ﯞﻩ ﺗﯩﺠﺎﺭﻩﺕ ﻳﻪﺭﻣﻪﻧﻜﯩﺴﯩﮕﻪ ﻗﺎﺗﻨﯩﺸﯩﺶ ﺋﯜﭼﯜﻥ ﺧﯩﺘﺎﻳﻐﺎ ﺑﺎﺭﯨﺪﯨﻐﺎﻥ ﺑﻮﻟﯘﭖ، ﺋﯘ ﺑﯘ ﻗﯧﺘﯩﻤﻘﻰ ﺯﯨﻴﺎﺭﯨﺘﻰ ﺟﻪﺭﻳﺎﻧﯩﺪﺍ ﺧﯩﺘﺎﻱ ﻣﯩﻨﯩﺴﺘﯩﺮﻟﯩﺮﻯ ﺑﯩﻠﻪﻥ ﺗﯜﺭﻛﯩﻴﯩﻨﯩﯔ 4 ﺷﻪﻫﯩﺮﯨﺪﻩ ﻗﯘﺭﯗﻟﻤﺎﻗﭽﻰ ﺑﻮﻟﻐﺎﻥ ﺧﯩﺘﺎﻱ ﻣﺎﻟﻠﯩﺮﯨﻨﻰ ﺋﯩﺸﻠﻪﭖ ﭼﯩﻘﯩﺮﯨﺶ ﺑﺎﺯﯨﻠﯩﺮﻯ ﻫﻪﻗﻘﯩﺪﻩ ﺋﻪﺗﺮﺍﭘﻠﯩﻖ ﻣﯘﺯﺍﻛﯩﺮﻩ ﺋﯧﻠﯩﭗ ﺑﺎﺭﯨﺪﯨﻜﻪﻥ.

ﺑﯘ ﺑﺎﺯﯨﻨﻰ ﺋﯧﭽﯩﺶ ﺋﻪﻣﻪﻟﯩﻴﻪﺗﻜﻪ ﺋﯘﻳﻐﯘﻧﻤﯘ ؟

ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ ﺧﯩﺘﺎﻱ ﻣﺎﻟﻠﯩﺮﯨﻨﯩﯔ ﻛﯩﺸﯩﻠﻪﺭﻧﯩﯔ ﺳﺎﻻﻣﻪﺗﻠﯩﻜﯩﮕﻪ ﺯﯨﻴﺎﻥ ﺑﯧﺮﯨﯟﺍﺗﻘﺎﻧﻠﯩﻘﻰ ﻫﻪﻗﻘﯩﺪﯨﻜﻰ ﺧﻪﯞﻩﺭﻟﻪﺭﻧﯩﯔ ﺩﯗﻧﻴﺎﺩﺍ ﻳﯧﻴﯩﻠﯩﺸﻰ ﺗﯜﺭﻛﯩﻴﯩﺪﻩ ﺧﯩﺘﺎﻱ ﻣﺎﻟﻠﯩﺮﯨﻨﯩﯔ ﺋﯧﺘﯩﺒﺎﺭﯨﻐﺎ ﻗﺎﺗﺘﯩﻖ ﺗﻪﺳﯩﺮ ﻳﻪﺗﻜﯜﺯﮔﻪﻥ ﺋﯩﺪﻯ. ﺗﯜﺭﻛﯩﻴﯩﺪﻩ ﺧﯩﺘﺎﻱ ﻣﺎﻟﻠﯩﺮﻯ ﺩﯦﮕﻪﻥ ﯞﺍﻗﺘﯩﯖﯩﺰﺩﺍ ﻛﯩﺸﯩﻠﻪﺭﻧﯩﯔ ﻛﺎﻟﻠﯩﺴﯩﻐﺎ ﺩﻩﺭﻫﺎﻝ ﺳﯜﭘﻪﺗﺴﯩﺰ، ﺋﻪﺭﺯﺍﻥ، ﺳﺎﻻﻣﻪﺗﻠﯩﻜﻜﻪ ﺯﯨﻴﺎﻧﻠﯩﻖ ﻣﻪﻫﺴﯘﻻﺗﻼﺭ ﻛﻪﻟﻤﻪﻛﺘﻪ. ﺋﯘﻧﯩﯔ ﺋﯜﺳﺘﯩﮕﻪ ﺗﯜﺭﻛﯩﻴﯩﮕﻪ ﺧﯩﺘﺎﻱ ﻣﺎﻟﻠﯩﺮﯨﻨﯩﯔ ﻛﯚﭘﻠﻪﭖ ﻛﯩﺮﯨﺸﻰ، ﺗﯜﺭﻛﯩﻴﯩﻨﯩﯔ ﺑﻮﻟﺴﺎ ﺧﯩﺘﺎﻳﻐﺎ ﻣﺎﻝ ﺳﺎﺗﺎﻟﻤﺎﺳﻠﯩﻘﻰ ﺗﯜﺭﻛﯩﻴﯩﻨﯩﯔ ﺋﯩﻘﺘﯩﺴﺎﺩﯨﻐﺎ ﻗﺎﺗﺘﯩﻖ ﺯﯨﻴﺎﻥ ﺳﺎﻟﻤﺎﻗﺘﺎ.

ﺗﯜﺭﻛﯩﻴﻪ ﺗﺎﺷﻘﻰ ﺳﻮﺩﺍ ﺋﯩﺪﺍﺭﯨﺴﯩﻨﯩﯔ ﺗﻮﺭ ﺑﯧﺘﯩﺪﯨﻜﻰ ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، 2006- ﻳﯩﻠﻰ ﺗﯜﺭﻛﯩﻴﻪ ﺧﯩﺘﺎﻳﺪﯨﻦ 9 ﻣﯩﻠﻴﺎﺭﺩ 600 ﻣﯩﻠﻴﻮﻥ ﺩﻭﻟﻼﺭﻟﯩﻖ ﻣﺎﻝ ﺋﯩﻤﭙﻮﺭﺕ ﻗﯩﻠﻐﺎﻥ ﺑﻮﻟﯘﭖ، ﺋﻪﻣﻤﺎ ﺗﯜﺭﻛﯩﻴﻪ ﺑﻮﻟﺴﺎ ﺧﯩﺘﺎﻳﻐﺎ ﭘﻪﻗﻪﺗﻼ 693 ﻣﯩﻠﻴﻮﻥ ﺩﻭﻟﻼﺭﻟﯩﻖ ﻣﺎﻝ ﺳﺎﺗﺎﻟﯩﻐﺎﻥ. ﺗﯜﺭﻛﯩﻴﻪ ﺧﯩﺘﺎﻱ ﺑﯩﻠﻪﻥ ﺑﻮﻟﻐﺎﻥ ﺗﯩﺠﺎﺭﻩﺕ ﻣﯘﻧﺎﺳﯩﯟﻩﺗﻠﯩﺮﯨﺪﻩ ﺩﺍﯞﺍﻣﻠﯩﻖ ﻫﺎﻟﺪﺍ ﺯﯨﻴﺎﻥ ﺗﺎﺭﺗﯩﭗ ﻛﻪﻟﻤﻪﻛﺘﻪ. ﺑﯘﻧﺪﺍﻕ ﺑﯩﺮ ﯞﻩﺯﯨﻴﻪﺗﺘﻪ ﺧﯩﺘﺎﻳﻨﯩﯔ ﺗﯜﺭﻛﯩﻴﯩﻨﯩﯔ 4 ﭼﻮﯓ ﺷﻪﻫﯩﺮﯨﺪﻩ ﺧﯩﺘﺎﻱ ﻣﺎﻟﻠﯩﺮﯨﻨﻰ ﺋﯩﺸﻠﻪﭖ ﭼﯩﻘﯩﺮﯨﺪﯨﻐﺎﻥ ﺑﺎﺯﺍ ﻗﯘﺭﯗﺵ ﭘﯩﻼﻧﻰ ﺋﻪﻣﻪﻟﯩﻴﻪﺗﻜﻪ ﺋﯘﻳﻐﯘﻧﻤﯘ؟

ﺧﯩﺘﺎﻳﻼﺭ ﺋﯩﻜﻜﻰ ﺩﯙﻟﻪﺕ ﺋﻮﺗﺘﯘﺭﺳﯩﺪﯨﻜﻰ ﺗﯩﺠﺎﺭﻩﺕ ﺗﻪﯕﭙﯘﯕﺴﯩﺰﻟﯩﻘﯩﻨﻰ ﺗﯜﮔﯩﺘﯩﺶ ﺋﯜﭼﯜﻥ ﺋﻮﻥ ﻧﻪﭼﭽﻪ ﻳﯩﻠﺪﯨﻦ ﺑﯘﻳﺎﻥ ﺗﯜﺭﻛﯩﻴﻪ ﻫﯚﻛﯜﻣﯩﺘﯩﮕﻪ ﻫﻪﺭﺧﯩﻞ ﯞﻩﺩﯨﻠﻪﺭﻧﻰ ﺑﯧﺮﯨﭗ ﻛﻪﻟﮕﻪﻥ ﺑﻮﻟﺴﯩﻤﯘ، ﺑﯘ ﺋﻪﻣﻪﻟﮕﻪ ﺋﺎﺷﻤﺎﻱ ﻛﻪﻟﻤﻪﻛﺘﻪ. ﺋﯘﻧﺪﺍﻗﺘﺎ ﺑﯘ ﺑﺎﺯﯨﻨﻰ ﻗﯘﺭﯗﺵ ﻗﺎﺭﺍﺭﻯ ﺋﯩﻜﻜﻰ ﺩﯙﻟﻪﺕ ﺋﻮﺗﺘﯘﺭﯨﺴﯩﺪﯨﻜﻰ ﺗﯩﺠﺎﺭﻩﺕ ﺗﻪﯕﭙﯘﯕﺴﯩﺰﻟﯩﻘﯩﻨﻰ ﺋﺎﺯﺍﻳﺘﯩﺶ ﺋﯜﭼﯜﻥ ﭘﺎﻳﺪﯨﻠﯩﻘﻤﯘ؟ ﺑﻪﺯﻯ ﻣﯘﺗﻪﺧﻪﺳﺴﯩﺴﻠﻪﺭ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﯜﺭﻛﯩﻴﯩﻨﯩﯔ ﺋﯘﻳﻐﯘﺭ ﻣﻪﺳﯩﻠﯩﺴﯩﮕﻪ ﺑﻮﻟﻐﺎﻥ ﻫﯧﺴﺪﺍﺷﻠﯩﻘﯩﻨﻰ ﺗﻮﺳﯘﺵ ﺋﯜﭼﯜﻥ ﺑﯘ ﺧﯩﻞ ﯞﻩﺩﯨﻠﻪﺭﻧﻰ ﺑﯧﺮﯨﺶ ﺋﺎﺭﻗﯩﻠﯩﻖ ﯞﺍﻗﯩﺖ ﺋﯚﺗﻜﯜﺯﯛﯞﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﻣﻪﻛﺘﻪ. ( ﺋﻪﺭﻛﯩﻦ ﺗﺎﺭﯨﻢ)