ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﺑﺎﻳﺎﻧﺎﺗﭽﯩﺴﻰ: "ﺭﺍﺑﯩﻴﻪ ﺋﯘﻳﻐﯘﺭﻻﺭﻧﯩﯔ ﯞﻩﻛﯩﻠﻰ ﺋﻪﻣﻪﺱ، ﺗﯧﺮﺭﻭﺭﭼﯩﻼﺭﻧﯩﯔ ﯞﻩﻛﯩﻠﻰ"

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ ﺑﯩﻠﻪﻥ ﺑﯩﺮﮔﻪ. RFA Photo

ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﺑﺎﻳﺎﻧﺎﺗﭽﯩﺴﻰ ﭼﯩﻦ ﮔﺎﯓ ﺗﯜﻧﯜﮔﯜﻥ ﻳﻪﻧﻰ 11 ‏- ﻣﺎﺭﺕ ﻛﯜﻧﻰ، ﻣﯘﺧﺒﯩﺮﻻﺭﻧﯩﯔ ﺳﻮﺋﺎﻟﯩﻐﺎ ﺟﺎﯞﺍﺏ ﺑﯧﺮﯨﭗ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺳﯚﺯﯨﮕﻪ ﺋﯩﻨﻜﺎﺱ ﻗﺎﻳﺘﯘﺭﺩﻯ. ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺗﯜﻧﯜﮔﯜﻥ، ﺋﺎﻳﺮﻭﭘﯩﻼﻥ ﯞﻩﻗﻪﺳﻰ ﺗﻮﻏﺮﯨﺴﯩﺪﯨﻜﻰ ﺧﻪﯞﻩﺭ ﻫﻪﻗﻘﯩﺪﻩ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻳﻨﯩﯔ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﻰ ﺗﯧﺮﺭﻭﺭﻏﺎ ﺑﺎﻏﻼﭖ ﺗﻪﺷﯟﯨﻖ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﻪﻳﯩﺒﻠﯩﮕﻪﻥ ﺋﯩﺪﻯ.

ﭼﯩﻦ ﮔﺎﯓ ﺳﯚﺯﯨﺪﻩ " ﺭﺍﺑﯩﻴﻪﮔﻪ ﺋﻮﺧﺸﺎﺵ ﻛﯩﺸﯩﻠﻪﺭ، ﺑﯩﺰﻧﯩﯔ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﻫﻪﺭﯨﻜﯩﺘﯩﻤﯩﺰﻧﻰ ﺋﯘﻳﻐﯘﺭ ﺧﻪﻟﻘﯩﻐﻪ ﻗﺎﺭﺷﻰ ﻫﻪﺭﯨﻜﻪﺕ ﻗﯩﻠﯩﭗ ﻛﯚﺭﺳﯩﺘﯩﯟﺍﺗﯩﺪﯗ، ﺑﯘ ﺧﻪﺗﻪﺭﻟﯩﻚ ﺑﯩﺮ ﺋﯩﺶ " ﺩﯦﮕﻪﻥ ﺋﯘ ﻳﻪﻧﻪ، " ﺑﯘﻻﺭﻧﯩﯔ ﻗﻪﺳﺘﻰ ﺑﺎﺷﻘﺎ، ﺋﯘﻻﺭ ﺋﯘﻳﻐﯘﺭﻻﺭ ﺑﯩﻠﻪﻥ ﺧﯩﺘﺎﻳﻼﺭ ﺋﺎﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺗﻨﻰ ﺑﯘﺯﯗﭖ ﻣﯩﻠﻠﯩﻲ ﺗﻮﻗﯘﻧﯘﺵ ﭘﻪﻳﺪﺍ ﻗﯩﻠﻤﺎﻗﭽﻰ" ﺩﯦﮕﻪﻥ. ﺋﯘ ﻳﻪﻧﻪ " ﺋﯘﻳﻐﯘﺭ ﺧﻪﻟﻘﯩﻨﯩﯔ ﻛﯚﭖ ﻗﯩﺴﻤﻰ، ﺩﯙﻟﯩﺘﯩﻤﯩﺰﻧﯩﯔ ﺑﺎﺭﻟﯩﻖ ﭘﯘﻗﺮﺍﻟﯩﺮﯨﻐﺎ ﺋﻮﺧﺸﺎﺷﻼ ﺗﯧﻨﭽﻠﯩﻘﯩﻨﻰ ﺳﯚﻳﯩﺪﯗ، ﺩﯨﻨﯩﻲ ﺭﺍﺩﯨﻜﺎﻟﻠﯩﻘﻘﺎ ﯞﻩ ﺑﯚﻟﮕﯜﻧﭽﯩﻠﯩﻜﻜﻪ ﻗﺎﺭﺷﻰ ﺗﯘﺭﯨﺪﯗ، ﺭﺍﺑﯩﻴﻪﮔﻪ ﺋﻮﺧﺸﺎﺵ ﻛﯩﺸﯩﻠﻪﺭ ﺋﯘﻳﻐﯘﺭ ﺧﻪﻟﻘﯩﻐﻪ ﯞﻩﻛﯩﻠﻠﯩﻚ ﻗﯩﻼﻟﻤﺎﻳﺪﯗ، ﺋﯘﻻﺭ ﭘﻪﻗﻪﺕ ﺋﺎﺯ ﺳﺎﻧﺪﯨﻜﻰ ﺗﯧﺮﺭﻭﺭﭼﯩﻼﺭﻏﺎ ﯞﻩﻛﯩﻠﻠﯩﻚ ﻗﯩﻠﯩﺪﯗ " ﺩﯦﮕﻪﻥ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﺵ ﻛﺎﺗﯩﺒﻰ ﺩﻭﻟﻘﯘﻥ ﺋﻪﻳﺴﺎ، ﭼﯩﻦ ﮔﺎﯕﻨﯩﯔ ﺳﯚﺯﻟﯩﺮﯨﮕﻪ ﻫﻪﻳﺮﺍﻥ ﻗﺎﻟﻤﯩﻐﺎﻧﻠﯩﻘﯩﻨﻰ، ﭼﯜﻧﻜﻰ، ﺧﯩﺘﺎﻳﻨﯩﯔ ﻧﻪﺯﯨﺮﯨﺪﻩ ﺋﻪﺭﻛﯩﻨﻠﯩﻚ ﺋﯜﭼﯜﻥ ﻛﯜﺭﻩﺵ ﻗﯩﻠﯩﺸﻨﯩﯔ ﺗﯧﺮﺭﻭﺭﻟﯘﻕ ﺩﻩﭖ ﻗﺎﺭﯨﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺩﻭﻟﻘﯘﻥ ﺋﻪﻳﺴﺎ ﺳﯚﺯﯨﺪﻩ ﻳﻪﻧﻪ، ﭼﯩﻦ ﮔﺎﯕﻨﯩﯔ ﺭﺍﺑﯩﻴﻪ ﺧﺎﻧﯩﻤﻨﻰ ﺋﯘﻳﻐﯘﺭﻻﺭﻧﯩﯔ ﯞﻩﻛﯩﻠﻰ ﺑﻮﻻﻟﻤﺎﻳﺪﯗ ﺩﯦﮕﻪﻧﻠﯩﻜﯩﻨﯩﯔ ﺋﯚﺯﯨﻼ، ﺭﺍﺑﯩﻴﻪ ﺧﺎﻧﯩﻤﻨﯩﯔ ﯞﻩﻛﯩﻠﻠﯩﻚ ﺳﺎﻻﻫﯩﻴﯩﺘﯩﻨﯩﯔ ﻣﯘﻧﺎﺯﯨﺮﻩ ﺗﻪﻟﻪﭖ ﻗﯩﻠﻤﺎﻳﺪﯨﻐﺎﻧﻠﯩﻘﯩﻨﻰ ﺋﯩﺴﭙﺎﺗﻼﻳﺪﯗ ﺩﻩﭖ ﻛﯚﺭﺳﻪﺗﺘﻰ.

ﺩﻭﻟﻘﯘﻥ ﺋﻪﻳﺴﺎ، ﺷﻪﺭﻗﻰ ﺗﯜﺭﻛﯩﺴﺘﺎﻧﺪﺍ ﺗﯩﻨﭽﻠﯩﻘﻨﯩﯔ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﺗﯩﻜﻠﯩﻨﯩﺸﻰ ﺑﯩﻠﻪﻥ ﺑﯘﺯﯗﻟﻐﺎﻧﻠﯩﻘﯩﻨﻰ، ﺧﯩﺘﺎﻱ ﻫﺎﻛﯩﻤﯩﻴﯩﺘﯩﮕﻪ ﺧﺎﺗﯩﻤﻪ ﺑﯧﺮﯨﻠﮕﻪﻧﺪﯨﻼ، ﺋﯘﻳﻐﯘﺭ ﺯﯦﻤﯩﻨﯩﺪﺍ ﺗﯩﻨﭽﻠﯩﻘﻨﯩﯔ ﺋﻪﺳﻠﯩﮕﻪ ﻛﯧﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﭼﯩﻦ ﮔﺎﯕﻨﯩﯔ ﺳﯚﺯﻟﯩﺮﯨﻨﻰ ﺭﻩﺕ ﻗﯩﻠﺪﻯ. ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﯩﯔ ﺩﯨﻨﯩﻲ ﺭﺍﺩﯨﻜﺎﻟﻠﯩﻘﺘﯩﻦ ﻳﯩﺮﺍﻕ ﺋﯩﻜﻪﻧﻠﯩﻜﯩﻨﻰ، ﺷﯘﯕﺎ، 1933 ‏- ﻳﯩﻠﻰ ﯞﻩ 1944 ‏- ﻳﯩﻠﻰ ﻗﯘﺭﻏﺎﻥ ﺋﯩﻜﻜﻰ ﻗﯧﺘﯩﻤﻠﯩﻖ ﺩﯙﻟﯩﺘﯩﻨﯩﯔ ﺑﯩﺮﻯ ﺋﯩﺴﻼﻡ ﺟﯘﻣﻬﯘﺭﯨﻴﯩﺘﻰ، ﻳﻪﻧﻪ ﺑﯩﺮﯨﻨﯩﯔ ﺩﯦﻤﻮﻛﺮﺍﺗﯩﻚ ﺟﯘﻣﻬﯘﺭﯨﻴﻪﺕ ﺑﻮﻟﻐﺎﻧﻠﯩﻘﯩﻨﻰ، ﺋﻪﻧﻪ ﺷﯘ ﻳﯩﻠﻼﺭﺩﺍ، ﺋﯘﻳﻐﯘﺭ ﺟﻪﻣﺌﯩﻴﯩﺘﯩﺪﻩ ﺗﯧﻨﭽﻠﯩﻖ، ﺋﯩﺘﺘﯩﭙﺎﻗﻠﯩﻖ ﯞﻩ ﺑﯩﺨﻪﺗﻪﺭﻟﯩﻜﻨﯩﯔ ﺗﻮﻟﯘﻕ ﺳﺎﻗﻼﻧﻐﺎﻧﻠﯩﻘﯩﻨﻰ ﭘﺎﻛﯩﺖ ﻗﯩﻠﯩﭗ ﻛﯚﺭﺳﻪﺗﺘﻰ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻳﻪﻧﻪ، ﻣﯩﻠﻠﻪﺗﻠﻪﺭ ﺋﯩﺘﺘﯩﭙﺎﻗﻠﯩﻘﻰ ﻫﻪﻗﻘﯩﺪﯨﻤﯘ ﺗﻮﺧﺘﯘﻟﯘﭖ ﺋﯚﺗﺘﻰ. ﺋﯘ ﺑﯘ ﻫﻪﻗﺘﻪ، ﺋﯩﺸﻰ، ﺋﯧﺸﻰ ﯞﻩ ﺯﯦﻤﯩﻨﻰ ﺗﺎﺭﺗﯩﯟﯦﻠﯩﻨﻐﺎﻥ ﻣﯩﻠﻠﻪﺕ ﺑﯩﻠﻪﻥ ﺗﺎﺭﺗﯩﯟﺍﻟﻐﯘﭼﻰ ﻣﯩﻠﻠﻪﺗﻨﯩﯔ ﺋﺎﺭﯨﺴﯩﺪﺍ ﺋﯩﺘﺘﯩﭙﺎﻗﻠﯩﻖ ﺷﻪﻛﯩﻠﻠﻪﻧﺪﯛﺭﻣﻪﻛﭽﻰ ﺑﻮﻟﯘﺵ ﺧﺎﻡ-ﺧﯩﻴﺎﻟﺪﯨﻦ ﺑﺎﺷﻘﺎ ﻧﻪﺭﺳﻪ ﺋﻪﻣﻪﺱ ﺩﻩﭖ ﺑﯩﻠﺪﯛﺭﺩﻯ؛ ﺋﯘ ﺳﯚﺯﯨﻨﯩﯔ ﺋﺎﺧﯩﺮﯨﺪﺍ، ﺧﯩﺘﺎﻱ ﻣﯩﻠﻠﯩﺘﻰ ﺑﯩﻠﻪﻥ ﺋﯘﻳﻐﯘﺭ ﻣﯩﻠﻠﯩﺘﻰ ﺋﺎﺭﯨﺴﯩﺪﯨﻜﻰ ﺋﯩﺘﺘﯩﭙﺎﻗﻠﯩﻘﻨﯩﯔ ﺋﯩﻜﻜﻰ ﻣﯩﻠﻠﻪﺗﻨﯩﯔ ﺩﯙﻟﻪﺕ ﭼﯧﮕﺮﯨﺴﻰ ﺋﺎﻳﺮﯨﻠﻐﺎﻧﺪﯨﻼ ﺋﻪﻣﻪﻟﮕﻪ ﺋﺎﺷﯩﺪﯨﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ. (ﺷﯚﻫﺮﻩﺕ ﻫﻮﺷﯘﺭ)