ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻡ ﺩﯦﮕﻪﻥ ﺗﯜﺯﯛﻣﻨﯩﯔ ﺋﯚﺯﻯ ﺧﯩﺘﺎﻳﭽﻪ ﺋﻪﻣﻪﺱ

• ﻣﯘﺧﺒﯩﺮﯨﻤﯩﺰ ﯞﻩﻟﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞ ﻫﺎﺯﯨﺮ ﻳﯜﺭﮔﯜﺯﯛﻟﯜﯞﺍﺗﻘﺎﻥ 'ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻡ' ﺩﯦﮕﻪﻥ ﺗﯜﺯﯛﻣﻨﻰ ﻣﺎﯞﺯﯦﺪﯗﯓ، ﺩﯦﯔ ﺷﺎﯞﭘﯩﯔ، ﺟﺎﯓ ﺯﯦﻤﯩﻦ ﻗﺎﺗﺎﺭﻟﯩﻖ ﺋﯜﭺ ﺋﻪﯞﻻﺩ ﺭﻩﻫﺒﻪﺭ ﻣﺎﺭﻛﯩﺴﯩﺰﻡ -ﻟﯧﻨﯩﻨﯩﺰﻣﻨﻰ ﺗﻪﺭﻩﻗﻘﻰ ﻗﯩﻠﺪﯗﺭﯗﭖ ﺋﯩﺠﺎﺩ ﻗﯩﻠﻐﺎﻥ ﺗﯜﺯﯛﻡ ﺩﻩﯞﺍﺗﯩﺪﯗ. ﺋﻪﻣﻤﺎ ﻧﻪﺯﯨﺮﯨﻴﻪ ﺗﻪﺗﻘﯩﻘﺎﺗﭽﯩﻠﯩﺮﯨﻨﯩﯔ ﺋﯧﻴﺘﯩﺸﯩﭽﻪ، 'ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻡ ' ﺩﯦﮕﻪﻥ ﺗﯜﺯﯛﻣﻨﯩﯔ ﻳﺎﺩﺭﻭﺳﻰ ﭘﯜﺗﯜﻧﻠﻪﻱ ﭼﻪﺗﺘﯩﻦ ﺋﯩﻤﭙﻮﺭﺕ ﻗﯩﻠﯩﻨﻐﺎﻥ، ﺋﯘﻧﯩﯔ ﻫﯧﭽﻨﯧﻤﯩﺴﻰ ﺧﯩﺘﺎﻳﺪﺍ ﺋﯩﺠﺎﺩ ﻗﯩﻠﯩﻨﻤﯩﻐﺎﻥ.

ﯞﯦﻲ ﺯﯨﻴﯘ ﺋﻪﭘﻪﻧﺪﻯ 'ﻛﯚﺯﯨﺘﯩﺶ ﮊﯗﺭﻧﯩﻠﻰ' ﻧﯩﯔ 1 ‏- ﺋﺎﻳﻨﯩﯔ 26 ‏- ﻛﯜﻧﯩﺪﯨﻜﻰ ﺳﺎﻧﯩﺪﺍ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﻣﯘﻻﻫﯩﺰﯨﺴﯩﺪﻩ ﺑﺎﻳﺎﻥ ﻗﯩﻠﯩﺸﯩﭽﻪ، ﺩﯗﻧﻴﺎﺩﺍ ﺳﻮﺗﺴﯩﻴﺎﻟﯩﺰﻡ ﻻﮔﯧﺮﻯ ﮔﯘﻣﺮﺍﻥ ﺑﻮﻟﻐﺎﻧﺪﯨﻦ ﻛﯧﻴﯩﻦ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﮔﯘﻣﺮﺍﻧﻠﯩﻘﺘﯩﻦ ﺋﯚﺯﯨﻨﻰ ﻗﺎﭼﯘﺭﯗﺵ ﺋﯜﭼﯜﻥ 'ﺳﻮﺗﺴﯩﻴﺎﻟﯩﺰﻡ' ﺩﯦﮕﻪﻧﻨﯩﯔ ﺋﺎﻟﺪﯨﻐﺎ 'ﺧﯩﺘﺎﻳﭽﻪ' ﺩﯦﮕﻪﻧﻨﻰ ﻗﻮﺷﯘﭖ، ﮔﯘﻣﺮﺍﻥ ﺑﻮﻟﻐﺎﻥ ﺳﻮﺗﺴﯩﻴﺎﻟﯩﺰﻣﺪﯨﻦ ﭼﯧﮕﺮﺍ ﺋﺎﻳﺮﯨﺪﻯ. ﺋﻪﻣﻪﻟﯩﻴﻪﺗﺘﻪ ﺧﯩﺘﺎﻳﺪﺍ ﻫﺎﺯﯨﺮ ﺩﺍﯞﺍﻣﻼﺷﺘﯘﺭﯗﻟﯩﯟﺍﺗﻘﺎﻥ 'ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻡ' ﺩﯦﮕﻪﻥ ﺗﯜﺯﯛﻣﻨﯩﯔ ﻣﻪﺯﻣﯘﻧﻠﯩﺮﻯ، ﻣﻪﺳﯩﻠﻪﻥ: ﭘﺮﻭﻟﯧﺘﺎﺭﯨﻴﺎﺕ ﺩﯨﻜﺘﺎﺗﻮﺭﯨﺴﻰ، ﺩﯦﻤﻮﻛﺮﺍﺗﯩﻴﻪ- ﻣﻪﺭﻛﻪﺯﻟﻪﺷﺘﯜﺭﯛﺵ ﺗﯜﺯﯛﻣﻰ، ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ ﺗﯜﺯﯛﻣﻰ، ﺳﯩﻴﺎﺳﯩﻲ ﻛﯧﯖﻪﺵ ﺗﯜﺯﯛﻣﻰ ﺩﯦﮕﻪﻧﻠﻪﺭﻧﯩﯔ ﻫﻪﻣﻤﯩﺴﻰ 'ﺧﯩﺘﺎﻳﭽﻪ' ﺋﻪﻣﻪﺱ.

'ﭘﺮﻭﻟﯧﺘﺎﺭﯨﻴﺎﺕ ﺩﯨﻜﺘﺎﺗﻮﺭﯨﺴﻰ' ﺩﯦﮕﻪﻥ ﺭﯨﻢ ﺋﯩﻤﭙﯧﺮﯨﻴﯩﺴﯩﻨﯩﯔ ﺋﯘﺭﯗﺵ ﻳﯩﻠﻠﯩﺮﯨﺪﯨﻜﻰ ﯞﺍﻗﯩﺘﻠﯩﻖ ﺳﯩﻴﺎﺳﯩﺘﯩﺪﯨﻦ ﻛﯚﭼﯜﺭﯛﻟﮕﻪﻥ

ﯞﯦﻲ ﺯﯨﻴﯘ ﺋﻪﭘﻪﻧﺪﯨﻨﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، 'ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻡ' ﺗﯜﺯﯛﻣﻨﯩﯔ ﻳﺎﺩﺭﻭﺳﻰ ﺑﻮﻟﻐﺎﻥ 'ﭘﺮﻭﻟﯧﺘﺎﺭﯨﻴﺎﺕ ﺩﯨﻜﺘﺎﺗﻮﺭﯨﺴﻰ' ﻧﻪﺯﯨﺮﯨﻴﯩﺴﻰ ﻗﻪﺩﯨﻤﻘﻰ ﺭﯨﻢ ﺋﯩﻤﭙﯧﺮﯨﻴﯩﺴﻰ ﺩﻩﯞﺭﯨﺪﻩ، ﺋﯘﺭﯗﺵ ﻳﯩﻠﻠﯩﺮﯨﺪﺍ ﺩﯙﻟﻪﺕ ﺑﺎﺷﻠﯩﻘﯩﻨﯩﯔ ﺋﺎﺳﺎﺳﯩﻲ ﻗﺎﻧﯘﻧﻨﯩﯔ ﭼﻪﻛﻠﯩﻤﯩﺴﯩﮕﻪ ﺋﯘﭼﺮﯨﻤﯩﻐﺎﻥ ﻫﺎﻟﺪﺍ، ﻫﻪﺭﺑﯩﻲ ﻫﺎﻟﻪﺕ ﺋﯧﻼﻥ ﻗﯩﻠﯩﭗ ﻫﺎﻛﯩﻤﻤﯘﺗﻠﻪﻗﻠﯩﻖ ﻗﯩﻠﯩﺸﯩﻐﺎ ﺭﯗﺧﺴﻪﺕ ﻗﯩﻠﻐﺎﻥ ﯞﺍﻗﯩﺘﻠﯩﻖ ﺳﯩﻴﺎﺳﯩﺘﯩﺪﯨﻦ ﻛﻪﻟﮕﻪﻥ. ﻣﺎﺭﻛﯩﺲ ﺑﯘ ﺋﯩﺪﯨﻴﯩﻨﻰ ﻓﺮﺍﻧﺴﯩﻴﻪ ﺋﯩﻨﻘﯩﻼﺑﻰ ﺩﻩﯞﺭﯨﺪﻩ ﻗﻮﻟﻠﯩﻨﯩﭗ ﺗﻪﺟﺮﯨﺒﻪ ﻗﯩﻠﯩﻨﻐﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﻐﺎﻥ ﺋﯩﺪﻯ. ﻛﯧﻴﯩﻦ، ﻟﯧﻨﯩﻦ ﺋﯘﻧﻰ ﻗﺎﻳﺘﯩﺪﯨﻦ ﻗﻮﻟﻼﻧﻐﺎﻥ.

ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﻫﺎﺯﯨﺮ ﺑﯘﻧﺪﺍﻕ 'ﺩﯨﻜﺘﺎﺗﯘﺭﻟﯘﻕ' ﺷﻪﻛﯩﻠﻨﻰ ﺳﯩﻴﺎﺳﯩﻲ ﺑﻴﯘﺭﻭﺩﯨﻜﻰ ﺑﯩﺮ ﻧﻪﭼﭽﻪ ﺋﺎﺩﻩﻣﻨﯩﯔ ﺋﯩﻤﺘﯩﻴﺎﺯﯨﻐﺎ ﺋﺎﻳﻼﻧﺪﯗﺭﯗﯞﺍﻟﺪﻯ. ﺋﯘﻻﺭ ﭼﻮﯓ ﺋﺎﻛﺴﻰ ﺳﻮﯞﯦﺖ ﺋﯩﺘﺘﯩﭙﺎﻗﯩﺪﯨﻦ ﻗﻮﺑﯘﻝ ﻗﯩﻠﯩﻨﻐﺎﻥ ﺑﯘ ﺋﻪﺟﻨﻪﺑﯩﻴﭽﻪ ﺷﻪﻛﯩﻠﻨﻰ ﻗﻮﻟﻠﯩﻨﯩﭗ ﻛﯧﻠﯩﯟﺍﺗﯩﺪﯗ، ﺑﻪﺯﯨﺪﻩ ﺋﯘﻧﻰ 'ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺶ' ﺩﯦﮕﻪﻥ ﻧﺎﻡ ﺑﯩﻠﻪﻥ ﺋﺎﺗﺎﻳﺪﯗ. ﺋﯘﻻﺭ ﺑﯘ ﺷﻪﻛﯩﻠﻨﻰ ﺧﻪﻟﻘﻨﻰ ﺑﻮﻱ ﺳﯘﻧﺪﯗﺭﯗﺵ ﺋﯜﭼﯜﻥ ﺋﯚﺯﻟﯩﺮﻯ ﺧﺎﻟﯩﻐﺎﻥ ﯞﺍﻗﯩﺘﺘﺎ ﻗﻮﻟﻠﯩﻨﯩﺪﯗ.

'ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ ﺗﯜﺯﯛﻣﻰ' ﺳﻮﯞﯦﺖ ﺋﯩﺘﺘﯩﭙﺎﻗﯩﺪﯨﻦ ﻛﯚﭼﯜﺭﯛﻟﮕﻪﻥ

ﯞﯦﻲ ﺯﯨﻴﯘ ﺋﻪﭘﻪﻧﺪﯨﻨﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻣﺪﯨﻜﻰ 'ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ ﺗﯜﺯﯛﻣﻰ'، 'ﻛﻮﻟﻠﯧﻜﺘﯩﭗ ﺭﻩﻫﺒﻪﺭﻟﯩﻚ ﺗﯜﺯﯛﻣﻰ'، 'ﺩﯦﻤﻮﻛﺮﺍﺗﯩﻴﯩﻨﻰ ﻣﻪﺭﻛﻪﺯﻟﻪﺷﺘﯜﺭﯛﺵ ﺗﯜﺯﯛﻣﻰ' ﺩﯦﮕﻪﻧﻠﻪﺭﻧﯩﯔ ﻫﻪﻣﻤﯩﺴﻰ ﺳﻮﯞﯦﺖ ﺋﯩﺘﺘﯩﭙﺎﻗﯩﺪﯨﻦ ﺑﯩﯟﺍﺳﺘﻪ ﻛﯚﭼﯜﺭﯛﭖ ﻛﯧﻠﯩﻨﮕﻪﻥ.

'ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ ﺗﯜﺯﯛﻣﻰ' ﺳﻮﯞﯦﺖ ﺋﯩﺘﺘﯩﭙﺎﻗﯩﻨﯩﯔ 'ﯞﻩﻛﯩﻠﻠﻪﺭ ﻳﯩﻐﯩﻨﻰ' ﻳﻪﻧﻰ ﺭﯗﺳﭽﻪ 'ﺳﻮﯞﯦﺖ' ﺩﻩﭖ ﺋﺎﺗﯩﻠﯩﺪﯨﻐﺎﻥ ﺗﯜﺯﯛﻣﻨﯩﯔ ﺋﯚﺯﻯ. ﻟﯧﻨﯩﻦ ﺋﯘﻧﯩﯖﻐﺎ ﺗﻪﺑﯩﺮ ﺑﯧﺮﯨﭗ ' ﺑﯘ ﺗﯜﺯﯛﻣﺪﻩ ﻛﻮﻟﻠﯧﻜﺘﯩﭗ ﺭﻩﻫﺒﻪﺭﻟﯩﻚ ﯞﻩ ﺩﯦﻤﻮﻛﺮﺍﺗﯩﻴﯩﻨﻰ ﻣﻪﺭﻛﻪﺯﻟﻪﺷﺘﯜﺭﯛﺵ ﻳﻮﻟﻐﺎ ﻗﻮﻳﯘﻟﯩﺪﯗ، ﺑﯘ ‏-‏ﺋﯩﻨﻘﯩﻼﺑﻨﯩﯔ ﺭﻩﻫﺒﻪﺭﻟﯩﻚ ﻫﻮﻗﯘﻗﯩﻨﻰ 10 ﻧﻪﭼﭽﻪ ﻧﻪﭘﻪﺭ ﺋﻪﻗﯩﻠﻠﯩﻖ ﺋﺎﺩﻩﻣﻨﯩﯔ ﻗﻮﻟﯩﻐﺎ ﺗﯘﺗﻘﯘﺯﯗﺵ ﺩﯦﮕﻪﻧﻠﯩﻚ' ﺩﯦﮕﻪﻥ. ﺑﯘﻧﺪﺍﻕ ﺗﯜﺯﯛﻡ ﺷﺎﺭﺍﺋﯩﺘﯩﺪﺍ ﻫﻪﻗﯩﻘﯩﻲ ﻣﻪﻧﯩﺪﯨﻜﻰ 'ﺳﺎﻳﻼﻡ' ﻣﻪﯞﺟﯘﺕ ﺋﻪﻣﻪﺱ، ﺋﯘ ﭘﻪﻗﻪﺕ ﺑﯩﺮ ﺧﯩﻞ ﺷﻪﻛﯩﻞ.

'ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﻳﯧﺘﻪﻛﭽﯩﻠﯩﻜﯩﻨﻰ ﻛﯚﭖ ﭘﺎﺭﺗﯩﻴﻪ ﻫﻪﻣﻜﺎﺭﻟﯩﻘﻰ ﺗﯜﺯﯛﻣﻰ' ﻧﻰ ﮔﻮﻣﯩﻨﺪﺍﯕﺪﯨﻦ ﻗﻮﺑﯘﻝ ﻗﯩﻠﻐﺎﻥ

ﯞﯦﻲ ﺯﯨﻴﯘ ﺋﻪﭘﻪﻧﺪﯨﻨﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، ﺋﯚﺗﻜﻪﻥ ﺋﻪﺳﺮﻧﯩﯔ 40 ‏- ﻳﯩﻠﻠﯩﺮﯨﺪﺍ، ﮔﻮﻣﯩﻨﺪﺍﯓ ﺑﯩﻠﻪﻥ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺋﻮﺗﺘﯘﺭﯨﺴﯩﺪﺍ ﻫﻮﻗﯘﻕ ﺗﺎﻟﯩﺸﯩﭗ ﺋﯘﺭﯗﺵ ﻗﻮﺯﻏﯩﻠﯩﯟﺍﺗﻘﺎﻧﺪﺍ، ﮔﻮﻣﯩﻨﺪﺍﯓ ﻫﯚﻛﯜﻣﯩﺘﻰ 1946 ‏- ﻳﯩﻠﻰ 1‏- ﺋﺎﻳﺪﺍ ﭼﯘﯕﭽﯩﯖﺪﺍ ﻛﯚﭖ ﭘﺎﺭﺗﯩﻴﻪ ﺳﯩﻴﺎﺳﯩﻲ ﺟﻪﻫﻪﺗﺘﻪ ﻛﯧﯖﯩﺸﯩﺪﯨﻐﺎﻥ ﺑﯩﺮ ﻳﯩﻐﯩﻦ ﺋﺎﭼﻘﺎﻥ ﺋﯩﺪﻯ. ﺋﯘﻧﯩﯖﻐﺎ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ 7 ﭘﺎﺭﺗﯩﻴﯩﻨﯩﯔ ﯞﻩﻛﯩﻠﻠﯩﺮﻯ، ﻫﻪﺗﺘﺎ ﭘﺎﺭﺗﯩﻴﯩﺴﯩﺰ ﺯﺍﺗﻼﺭ ﯞﻩﻛﯩﻠﻠﯩﺮﯨﻤﯘ ﺗﻪﻛﻠﯩﭗ ﻗﯩﻠﯩﻨﻐﺎﻥ ﺋﯩﺪﻯ. ﺑﯘ ﺷﻪﻛﯩﻠﮕﻪ ﺋﺎﻣﯧﺮﯨﻜﺎ ﺩﯦﻤﻮﻛﺮﺍﺗﯩﻴﯩﺴﯩﻨﯩﯔ ﻣﻪﺯﻣﯘﻧﻠﯩﺮﻯ ﻗﻮﺑﯘﻝ ﻗﯩﻠﯩﻨﻐﺎﻥ ﺋﯩﺪﻯ.

ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ 1949 ‏- ﻳﯩﻠﻰ 9 ‏- ﺋﺎﻳﻨﯩﯔ 21 ‏- ﻛﯜﻧﻰ، ﻫﺎﻛﯩﻤﯩﻴﻪﺕ ﻗﯘﺭﯗﺵ ﺋﺎﻟﺪﯨﺪﺍ ﻣﯘﺷﯘ ﺷﻪﻛﯩﻠﺪﯨﻦ ﭘﺎﻳﺪﯨﻠﯩﻨﯩﭗ 'ﺑﯩﺮﯨﻨﭽﻰ ﻗﯧﺘﯩﻤﻠﯩﻖ ﻣﻪﻣﻠﯩﻜﻪﺗﻠﯩﻚ ﺳﯩﻴﺎﺳﯩﻲ ﻛﯧﯖﯩﺸﻰ' ﺩﯦﮕﻪﻥ ﻳﯩﻐﯩﻨﻨﻰ ﭼﺎﻗﯩﺮﺩﻯ. ﺑﯘ ﺷﻪﻛﯩﻞ ﺷﯘﻧﯩﯖﺪﯨﻦ ﺑﺎﺷﻼﭖ ﺩﺍﯞﺍﻣﻠﯩﺸﯩﯟﺍﺗﯩﺪﯗ. ﺋﻪﻣﻪﻟﯩﻴﻪﺗﺘﻪ ﺑﯘﻧﺪﺍﻕ ﻳﯩﻐﯩﻨﻨﯩﯔ ﺷﻪﻛﻠﻰ ﺋﯚﺯﮔﻪﺭﮔﻪﻥ، ﺋﯘﻧﯩﯖﺪﺍ ﺋﺎﺳﺎﺳﻪﻥ 'ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺭﻩﻫﺒﻪﺭﻟﯩﻜﻰ'، 'ﺋﯩﺪﯨﻴﯩﻨﻰ ﺑﯩﺮﻟﯩﻜﻜﻪ ﻛﻪﻟﺘﯜﺭﯛﺵ' ﺩﯦﮕﻪﻥ ﺳﯚﺯﻟﻪﺭ ﺗﻪﻛﺮﺍﺭﻟﯩﻨﯩﭗ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﻳﯧﺰﯨﭗ ﭼﯩﻘﻘﺎﻥ ﻗﺎﺭﺍﺭﻏﺎ ﭼﺎﯞﺍﻙ ﭼﯧﻠﯩﻨﯩﺪﯗ، ﺧﺎﻻﺱ. ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﺑﯘ ﺷﻪﻛﻠﯩﻨﻰ ﻫﺎﺯﯨﺮ ﭼﯩﺮﺍﻳﻠﯩﻖ ﺋﯩﺒﺎﺭﯨﻠﻪﺭ ﺑﯩﻠﻪﻥ ﭘﻪﺩﻩﺯﻟﻪﭖ 'ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﻳﯧﺘﻪﻛﭽﯩﻠﯩﻜﯩﺪﯨﻜﻰ ﻛﯚﭖ ﭘﺎﺭﺗﯩﻴﻪ ﻫﻪﻣﻜﺎﺭﻟﯩﻘﻰ' ﺩﻩﭖ ﺋﺎﺗﯩﯟﺍﻟﺪﻯ. ﺋﻪﻣﻤﺎ ﺧﯩﺘﺎﻱ ﺧﻪﻟﻘﻰ ﺑﯘﻧﺪﺍﻕ ﻳﯩﻐﯩﻨﻨﻰ 'ﺗﻪﯕﺘﻪﻙ' ﺩﻩﭖ ﺋﺎﺗﺎﻳﺪﯗ.

ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻣﺪﺍ ﻫﻮﻗﯘﻗﺪﺍﺭﻻﺭﻏﯩﻼ ﻣﻪﻧﭙﻪﺋﻪﺕ ﻳﻪﺗﻜﯜﺯﯛﺩﯨﻐﺎﻥ ﻛﺎﭘﯩﺘﺎﻟﯩﺰﻡ ﻳﻮﻟﻐﺎ ﻗﻮﻳﯘﻟﯘﯞﺍﺗﯩﺪﯗ

ﯞﯦﻲ ﺯﯨﻴﯘ ﺋﻪﭘﻪﻧﺪﯨﻨﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، ﺧﯩﺘﺎﻱ ﺭﻩﻫﺒﻪﺭﻟﯩﺮﻯ 'ﺧﯩﺘﺎﻳﭽﻪ ﺳﻮﺗﺴﯩﻴﺎﻟﯩﺰﻡ' ﺗﯜﺯﯛﻣﯩﻨﻰ ﻳﻮﻟﻐﺎ ﻗﻮﻳﯘﺷﺘﺎ ﺩﯦﯔ ﺷﺎﯞﭘﯩﯖﻨﯩﯔ 1986 ‏- ﻳﯩﻠﯩﺪﯨﻜﻰ 'ﺋﺎﻣﯧﺮﯨﻜﯩﺪﺍ ﺋﯜﭺ ﭼﻮﯓ ﻫﻮﻗﯘﻕ ﺋﺎﻳﺮﯨﯟﯦﺘﯩﻠﮕﻪﻥ، ﺋﯘ ﺩﯙﻟﻪﺗﺘﻪ ﺋﯜﭺ ﻫﯚﻛﯜﻣﻪﺕ ﺑﺎﺭ. ﺋﯘﻻﺭ ﺋﯩﭽﻜﻰ ﻗﯩﺴﯩﻤﺪﺍ ﺗﻮﻻ ﺗﺎﻻﺵ - ﺗﺎﺭﺗﯩﺶ ﻗﯩﻠﯩﭗ ﺋﯩﺶ ﺋﺎﻗﻘﯘﺯﺍﻟﻤﺎﻳﺪﯗ. ﺑﯩﺰ ﺑﯘﻧﺪﺍﻕ ﺑﯘﺭﮊﯗﺋﺎﭼﻪ ﺩﯦﻤﻮﻛﺮﺍﺗﯩﻴﯩﻨﻰ ﻗﻮﺑﯘﻝ ﻗﯩﻠﻤﺎﻳﻤﯩﺰ' ﺩﯦﮕﻪﻥ ﻳﻮﻟﻴﻮﺭﯗﻗﯩﻐﺎ ﺋﺎﺳﺎﺳﻪﻥ ﺋﯩﺶ ﻛﯚﺭﯛﭖ، ' ﺳﻮﺗﺴﯩﻴﺎﻟﯩﺴﺘﯩﻚ ﺑﺎﺯﺍﺭ ﺋﯩﮕﯩﻠﯩﻜﻰ' ﺩﯦﮕﻪﻥ ﻧﺎﻡ ﺋﺎﺳﺘﯩﺪﺍ، 'ﻫﻮﻗﯘﻗﺪﺍﺭﻻﺭﻏﯩﻼ ﻣﻪﻧﭙﻪﺋﻪﺕ ﻳﻪﺗﻜﯜﺯﯛﺩﯨﻐﺎﻥ ﻛﺎﭘﯩﺘﺎﻟﯩﺰﻡ' ﻧﻰ ﻳﻮﻟﻐﺎ ﻗﻮﻳﯘﯞﺍﺗﯩﺪﯗ. ﺋﺎﯓ-ﻓﻮﺭﻣﺎ ﺟﻪﻫﻪﺗﺘﻪ ﺑﻮﻟﺴﺎ 'ﺑﺎﺭﻟﯩﻖ ﺋﯩﺠﺘﯩﻤﺎﺋﯩﻲ ﺗﯜﺯﯛﻣﻠﻪﺭﻧﻰ ﺯﻭﺭﺍﯞﺍﻧﻠﯩﻖ ﻛﯜﭺ ﺑﯩﻠﻪﻥ ﺋﺎﻏﺪﯗﺭﯗﭖ ﺗﺎﺷﻼﺵ'، 'ﺋﺎﺭﻣﯩﻴﻪ ﺩﯙﻟﻪﺗﻨﯩﯔ ﺋﻪﻣﻪﺱ، ﺋﯘﻧﯩﯖﻐﺎ ﭘﺎﺭﺗﯩﻴﻪ ﻗﻮﻣﺎﻧﺪﺍﻧﻠﯩﻖ ﻗﯩﻠﯩﺪﯗ' ﺩﯦﮕﻪﻥ ﻟﯧﻨﯩﻨﭽﻪ ﺳﻮﺗﺴﯩﻴﺎﻟﯩﺰﻡ ﻧﻪﺯﯨﺮﯨﻴﯩﺴﯩﻨﻰ ﻗﻮﻟﻠﯩﻨﯩﯟﺍﺗﯩﺪﯗ. (ﯞﻩﻟﻰ)