ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﻰ ﻳﯩﻐﯩﻨﻰ ﻫﻪﻗﻘﯩﺪﯨﻜﻰ ﻳﯧﯖﻰ ﺋﯘﭼﯘﺭﻻﺭ

• ﻣﯘﺧﺒﯩﺮﯨﻤﯩﺰ ﯞﻩﻟﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﭘﺮﻩﺯﯨﺪﯦﻨﺖ ﺑﯘﺵ ﯞﻩ ﺧﯘ ﺟﯩﻨﺘﺎﯞ ﺳﯚﻫﺒﻪﺗﺘﯩﻦ ﻛﯧﻴﯩﻦ ﺳﯜﺭﻩﺗﻜﻪ ﭼﯘﺷﻤﻪﻛﺘﻪ. 6 - ﺳﯧﻨﺘﻪﺑﯩﺮ، ﺳﯩﺪﻧﯧﻲ. AFP PHOTO

ﻫﺎﺯﯨﺮ ﺋﺎﯞﺳﺘﺮﺍﻟﯩﻴﯩﻨﯩﯔ ﺳﯧﺪﻧﻲ ﺷﻪﻫﯩﺮﯨﺪﻩ ﺩﺍﯞﺍﻣﻠﯩﺸﯩﯟﺍﺗﻘﺎﻥ ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﻰ ﺩﯙﻟﻪﺗﻠﯩﺮﻯ ﺑﺎﺷﻠﯩﻘﻠﯩﺮﯨﻨﯩﯔ ﺋﺎﻟﯩﻲ ﺩﻩﺭﯨﺠﯩﻠﯩﻚ ﺋﯘﭼﺮﯨﺸﯩﺸﻰ ﺗﻮﻏﺮﯨﺴﯩﺪﺍ ﻫﻪﺭ ﻗﺎﻳﺴﻰ ﺋﯘﭼﯘﺭ ﯞﺍﺳﺘﯩﻠﯩﺮﻯ ﺋﯧﻼﻥ ﻗﯩﻠﻐﺎﻥ ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﺑﯘ ﺗﻪﺷﻜﯩﻼﺗﻘﺎ ﺋﻪﺯﺍ ﺩﯙﻟﻪﺕ ﺑﺎﺷﻠﯩﻘﻠﯩﺮﻯ ﻳﯩﻐﯩﻨﺪﺍ ﺋﺎﺳﺎﺳﻪﻥ ﻳﻪﺭ ﺷﺎﺭﯨﺪﺍ ﻫﺎﯞﺍ ﻛﯧﻠﯩﻤﺎﺗﻰ ﺋﯚﺯﮔﯩﺮﯨﺶ ﻣﻪﺳﯩﻠﯩﺴﻰ، ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺗﯘﺭﯗﺵ ﻣﻪﺳﯩﻠﯩﺴﻰ، ﺳﻮﺩﺍﻥ ﻣﻪﺳﯩﻠﯩﺴﻰ ، ﺑﯩﺨﻪﺗﻪﺭﻟﯩﻚ، ﭘﯘﻝ ﺋﻮﺑﻮﺭﻭﺗﻰ ﯞﻩ ﻳﻪﻧﻪ ﺑﯩﺮ ﺟﯘﯕﮕﻮ ﺳﯩﻴﺎﺳﯩﺘﻰ ﻣﻪﺳﯩﻠﯩﺴﻰ ﻗﺎﺗﺎﺭﻟﯩﻖ ﺗﯧﻤﯩﻼﺭﺩﺍ ﺳﯚﻫﺒﻪﺗﻠﻪﺭ ﺋﯚﺗﻜﯜﺯﯛﻟﮕﻪﻥ.

ﻳﺎﭘﻮﻧﯩﻴﻪ ﺑﯩﻠﻪﻥ ﺧﯩﺘﺎﻳﻨﯩﯔ ﺩﯙﻟﻪﺕ ﺑﺎﺷﻠﯩﻘﻠﯩﺮﻯ ﺗﯧﺨﯩﭽﻪ ﻛﯚﺭﯛﺷﻤﯩﮕﻪﻥ

ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﯩﻐﺎ ﺋﻪﺯﺍ ﺩﯙﻟﻪﺕ ﺑﺎﺷﻠﯩﻘﻠﯩﺮﯨﻨﯩﯔ ﺋﺎﻟﯩﻲ ﺩﻩﺭﯨﺠﯩﻠﯩﻚ ﺋﯘﭼﺮﯨﺸﯩﺸﻰ ﺑﺎﺷﻼﻧﻐﺎﻧﺪﯨﻦ ﻛﯧﻴﯩﻦ، ﺏ ﺏ ﺱ ﻗﺎﺗﺎﺭﻟﯩﻖ ﺋﯘﭼﯘﺭ ﯞﺍﺳﺘﯩﻠﯩﺮﻯ ﺋﺎﯞﺳﺘﺮﺍﻟﯩﻴﻪ ﺑﺎﺵ ﻣﯩﻨﺴﯩﺘﯩﺮﻯ ﺟﻮﻥ ﺧﻮﯞﻟﯩﺪ ، ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ، ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞﻻﺭ ﺑﯩﻠﻪﻥ ﺋﯜﭺ ﺗﻪﺭﻩﭖ ﺑﯩﺮﻟﯩﻜﺘﻪ ﺳﯚﻫﺒﻪﺗﻠﻪﺷﻜﻪﻧﻠﯩﻜﻰ؛ ﺟﻮﺭﺝ ﺑﯘﺵ ﺑﯩﻠﻪﻥ ﺧﯘ ﺟﻨﯩﺘﺎﯞﻧﯩﯔ ﺋﯘﭼﺮﺍﺷﻘﺎﻧﻠﯩﻘﻰ؛ ﺋﺎﯞﺳﺘﺮﺍﻟﯩﻴﯩﻨﯩﯔ ﺭﯗﺳﯩﻴﻪ ﺑﯩﻠﻪﻥ ﺋﺎﺗﻮﻡ ﺋﯧﻨﯧﺮﮔﯩﻴﻪ ﻛﯧﻠﯩﺸﯩﻤﻰ ﺋﯩﻤﺰﺍﻟﯩﻐﺎﻧﻠﯩﻘﻰ؛ ﺋﺎﯞﺳﺘﺮﺍﻟﯩﻴﻪ ﺑﯩﻠﻪﻥ ﺧﯩﺘﺎﻱ ﺋﻮﺗﺘﯘﺭﯨﺴﯩﺪﺍ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺩﯨﺌﺎﻟﻮﮒ ﺗﯜﺯﯛﻣﻰ ﺑﻪﺭﭘﺎ ﻗﯩﻠﯩﺶ- ﺋﯘﭼﯘﺭ ﺋﺎﻟﻤﺎﺷﺘﯘﺭﯗﺵ ﻫﻪﻗﻘﯩﺪﻩ ﺳﯚﻫﺒﻪﺕ ﺋﯚﺗﻜﯜﺯﯛﻟﮕﻪﻧﻠﯩﻜﻰ؛ ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﯩﻨﯩﯔ ﻳﯩﻐﯩﻨﯩﻐﺎ ﺗﻪﻳﯟﻩﻥ ﭘﺮﯦﺰﯨﺪﯦﻨﺘﻰ ﭼﯧﻦ ﺷﯘﻳﺒﻴﻪﻧﻨﯩﯔ ﯞﻩﻛﯩﻠﻰ ﻗﺎﺗﻨﺎﺷﻘﺎﻧﻠﯩﻘﻰ ﻗﺎﺗﺎﺭﻟﯩﻖ ﺗﯧﻤﯩﻼﺭ ﺑﯘﻳﯩﭽﻪ ﻫﻪﺭﺧﯩﻞ ﻣﻪﺧﺴﯘﺱ ﺧﻪﯞﻩﺭﻟﻪﺭﻧﻰ ﺋﯧﻼﻥ ﻗﯩﻠﺪﻯ.

ﺧﻪﯞﻩﺭﻟﻪﺭﺩﻩ 'ﻳﺎﭘﻮﻧﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﺷﯩﻨﺰﻭ ﺋﺎﺑﯥ ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞ ﺑﯩﻠﻪﻥ ﻛﯚﺭﯛﺷﯜﺷﻨﻰ ﻗﻮﻟﻐﺎ ﻛﻪﻟﺘﯜﺭﯛﯞﺍﺗﯩﺪﯗ' ﺩﻩﭖ ﺑﺎﻳﺎﻥ ﻗﯩﻠﯩﻨﻐﺎﻧﻠﯩﻘﯩﺪﯨﻦ ﻗﺎﺭﯨﻐﺎﻧﺪﺍ، ﻳﺎﭘﻮﻧﯩﻴﻪ ﺑﯩﻠﻪﻥ ﺧﯩﺘﺎﻳﻨﯩﯔ ﺩﯙﻟﻪﺕ ﺑﺎﺷﻠﯩﻘﻠﯩﺮﻯ ﺗﯧﺨﯩﭽﻪ ﻛﯚﺭﯛﺷﻤﯩﮕﻪﻥ.

ﻳﯩﻐﯩﻦ ﺳﯩﺮﺗﯩﺪﯨﻜﻰ ﻧﺎﻣﺎﻳﯩﺶ

ﻳﯩﻐﯩﻦ ﺳﯩﺮﺗﯩﺪﺍ ﺋﺎﯞﺳﺘﺮﺍﻟﯩﻴﻪ ﭘﯘﻗﺮﺍﻟﯩﺮﻯ ﯞﻩ ﺑﺎﺷﻘﺎ ﺩﯙﻟﻪﺗﻠﻪﺭﺩﯨﻦ ﻛﻪﻟﮕﻪﻥ ﻛﯩﺸﯩﻠﻪﺭ ﻧﺎﻣﺎﻳﯩﺶ ﺋﯚﺗﻜﯜﺯﮔﻪﻥ. ﻣﯘﺧﺒﯩﺮﯨﻤﯩﺰﻧﯩﯔ ﺋﺎﯞﺳﺘﺮﺍﻟﯩﻴﯩﻨﯩﯔ ﺳﯧﺪﻧﻲ ﺷﻪﻫﯩﺮﯨﺪﯨﻦ ﺧﻪﯞﻩﺭ ﻗﯩﻠﯩﺸﯩﭽﻪ، 9 ‏- ﺋﺎﻳﻨﯩﯔ 6 ‏- ﻛﯜﻧﻰ ﺳﯧﺪﻧﯩﻲ ﺷﻪﻫﯩﺮﯨﺪﻩ ﻧﺎﻣﺎﻳﯩﺶ ﻳﯜﺯ ﺑﻪﺭﮔﻪﻥ. ﻧﺎﻣﺎﻳﯩﺸﺘﺎ ﺋﯧﻨﮕﯩﻠﯩﺰﭼﻪ، ﺧﯩﺘﺎﻳﭽﻪ ﻳﯧﺰﯨﻠﻐﺎﻥ ﺩﯗﻧﻴﺎﺩﺍ ﻛﯩﺸﯩﻠﯩﻚ ﻫﻮﻗﯘﻕ ﺑﯩﻠﻪﻥ ﻗﺎﻧﻠﯩﻖ ﺑﺎﺳﺘﯘﺭﯗﺵ ﺑﯩﺮ ﺋﻮﺭﯗﻧﺪﺍ ﺗﯘﺭﺍﻟﻤﺎﻳﺪﯗ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﭼﻮﻗﯘﻡ ﺩﯗﻧﻴﺎﻏﺎ ﺑﻪﺭﮔﻪﻥ ﯞﻩﺩﯨﺴﯩﮕﻪ ﺧﯩﻼﭖ ﺋﯩﺶ ﻗﯩﻠﻤﺎﺳﻠﯩﻘﻰ ﻛﯧﺮﻩﻙ ﺩﯦﮕﻪﻧﺪﻩﻙ ﭘﯩﻼﻛﺎﺗﻼﺭﻧﻰ ﻛﯚﺗﯜﺭﮔﻪﻥ ﻧﺎﻣﺎﻳﯩﺸﭽﯩﻼﺭ ﻛﯚﭖ. ﻧﺎﻣﺎﻳﯩﺸﺘﺎ ﺋﺎﻟﺪﻯ ﺑﯩﻠﻪﻥ ﺋﯘﻳﻐﯘﺭﻻﺭﻧﯩﯔ ﺋﺎﯞﺍﺯﻯ ﺋﺎﯕﻼﻧﻐﺎﻥ.

ﺋﯚﺯﯨﻨﯩﯔ ﺋﺎﯞﺍﺯﯨﻨﻰ ﺩﯗﻧﻴﺎﻏﺎ ﺋﯧﻨﮕﻠﯩﺰ ﺗﯩﻠﯩﺪﺍ ﺩﯗﻧﻴﺎﻏﺎ ﺋﺎﯕﻠﯩﺘﯩﯟﺍﺗﻘﺎﻥ ﺑﯘ ﺋﯘﻳﻐﯘﺭﻧﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، ﺧﯩﺘﺎﻳﺪﺍ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺋﯜﭼﯜﻥ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ 'ﺑﯩﺮ ﺩﯗﻧﻴﺎ، ﺑﯩﺮ ﺋﺎﺭﺯﯗ' ﺩﯦﮕﻪﻥ ﺷﯘﺋﺎﺭ، ﭘﯜﺗﯜﻥ ﺩﯗﻧﻴﺎﻧﯩﯔ 'ﺑﯩﺮ ﺩﯗﻧﻴﺎ، ﺑﯩﺮ ﺋﺎﺭﺯﯗ، ﺑﯩﺮﺧﯩﻞ ﻛﯩﺸﯩﻠﯩﻚ ﻫﻮﻗﯘﻕ' ﺩﯦﮕﻪﻥ ﺋﻮﺭﺗﺎﻕ ﺷﯘﺋﺎﺭﻯ ﺑﯩﻠﻪﻥ ﺋﻮﺧﺸﺎﺵ ﺑﻮﻟﯘﺷﻰ ﻛﯧﺮﻩﻙ. ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯩﻨﺴﺎﻧﯩﻴﻪﺗﻜﻪ ﻗﺎﺭﺷﻰ ﺟﯩﻨﺎﻳﻪﺕ ﺳﺎﺩﯨﺮ ﻗﯩﻠﯩﺸﻨﻰ ﺗﻮﺧﺘﯩﺘﯩﺸﻰ ﻛﯧﺮﻩﻙ.

ﻳﯩﻐﯩﻨﺪﯨﻜﻰ ﻧﯘﺗﯘﻗﻼﺭ

ﻳﯩﻐﯩﻦ ﺋﯩﭽﯩﺪﻩ، ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ ﯞﻩ ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞ ﻻﺭ ﻣﯘﻫﯩﻢ ﺳﯚﺯ ﻗﯩﻠﻐﺎﻥ. ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞ ﻳﯩﻐﯩﻦ ﺋﻪﻫﻠﯩﮕﻪ ﺑﻪﺯﻯ ﻣﻪﺳﯩﻠﯩﻠﻪﺭﻧﻰ ﭼﯜﺷﻪﻧﺪﯛﺭﯛﺵ ﺋﯜﭼﯜﻥ ﺗﯩﺮﯨﺸﻘﺎﻥ.

ﻣﯘﺧﺒﯩﺮﯨﻤﯩﺰﻧﯩﯔ ﺋﺎﯞﺳﺘﺮﺍﻟﯩﻴﯩﻨﯩﯔ ﺳﯧﺪﻧﻲ ﺷﻪﻫﯩﺮﯨﺪﯨﻦ ﺧﻪﯞﻩﺭ ﻗﯩﻠﯩﺸﯩﭽﻪ، ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﯩﻐﺎ ﺋﻪﺯﺍ 20 ﻧﻪﭼﭽﻪ ﺩﯙﻟﻪﺗﻨﯩﯔ ﺩﯙﻟﻪﺕ ﺑﺎﺷﻠﯩﻘﻠﯩﺮﻯ ﻳﯩﻐﯩﻨﺪﺍ ، ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞﻧﯩﯔ 9 ‏- ﺋﺎﻳﻨﯩﯔ 6 ‏- ﻛﯜﻧﻰ 'ﺧﻪﻟﻘﺌﺎﺭﺍﺩﺍ ﺑﯩﺮ ﻣﯘﻧﭽﻪ ﺩﯙﻟﻪﺗﻠﻪﺭ ﺟﯘﯕﮕﻮﻧﯩﯔ ﻳﯧﻤﻪﻙ-ﺋﯩﭽﻤﻪﻙ ﻣﻪﻫﺴﯘﻻﺗﻠﯩﺮﯨﻨﯩﯔ ﺑﯩﺨﻪﺗﻪﺭﻟﯩﻜﯩﺪﯨﻦ ﮔﯘﻣﺎﻧﻼﻧﻐﺎﻥ. ﻫﯚﻛﯜﻣﯩﺘﯩﻤﯩﺰ ﺑﯘ ﻣﻪﺳﯩﻠﯩﮕﻪ ﺋﯩﻨﺘﺎﻳﯩﻦ ﺋﻪﻫﻤﯩﻴﻪﺕ ﺑﻪﺭﻣﻪﻛﺘﻪ. ﻛﯚﺭﺳﯩﺘﯩﻠﮕﻪﻥ ﻣﻪﺳﯩﻠﻪ ﭘﺎﻛﯩﺘﻘﺎ ﺋﯘﻳﻐﯘﻥ ﺑﻮﻟﺴﯩﻼ، ﺑﯩﺰ ﭼﯘﻗﯘﻡ ﺋﯘﻧﻰ ﻗﺎﻧﯘﻥ ﺑﯘﻳﯩﭽﻪ ﺳﯜﺭﯛﺷﺘﻪ ﻗﯩﻠﯩﻤﯩﺰ' ﺩﯦﮕﻪﻧﻠﯩﻜﯩﺪﯨﻦ ﻗﺎﺭﯨﻐﺎﻧﺪﺍ، ﺩﯗﻧﻴﺎ ﺋﯩﻨﻜﺎﺱ ﻗﯩﻠﻐﺎﻥ ﻣﻪﺳﯩﻠﯩﻠﻪﺭﻧﻰ ﺧﯩﺘﺎﻱ ﻫﯚﻛﯜﻣﯩﺘﻰ ﺗﯧﺨﯩﭽﻪ ﺋﯧﺘﯩﺮﺍﭖ ﻗﯩﻠﻤﯩﻐﺎﻧﻠﯩﻘﻰ، ﺋﻪﻣﻤﺎ ﻣﻪﺳﯩﻠﯩﮕﻪ ﺟﺎﯞﺍﺑﻜﺎﺭ ﺑﻮﻟﯩﺪﯨﻐﺎﻥ ﺑﺎﺷﻘﺎ ﻛﯩﺸﯩﻠﻪﺭﻧﻰ ﺳﯜﺭﯛﺷﺘﯜﺭﯛﭖ ﺗﯧﭙﯩﭗ ﺟﺎﺯﺍﻻﻳﺪﯨﻐﺎﻧﻠﯩﻘﻰ ﻣﻪﻟﯘﻡ.

ﺟﻮﺭﺝ ﺑﯘﺵ ﺗﯩﻨﭻ ﺋﻮﻛﻴﺎﻧﻨﯩﯔ ﺋﻪﺗﺮﺍﭘﯩﺪﯨﻜﻰ ﺩﯙﻟﻪﺗﻠﻪﺭﻧﻰ ﺩﯗﻧﻴﺎﻧﻰ ﺋﯚﺯﮔﻪﺭﺗﯩﺶ ﺋﯜﭼﯜﻥ ﻣﯘﻫﯩﻢ ﺭﻭﻝ ﺋﻮﻳﻨﺎﺷﻘﺎ ﭼﺎﻗﯩﺮﺩﻯ

ﺋﺎﻣﯧﺮﯨﻜﺎ ﺋﺎﯞﺍﺯﯨﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺳﻮﺩﯨﺪﺍ ﻫﻪﺭ ﻗﺎﻳﺴﻰ ﺩﯙﻟﻪﺗﻠﻪﺭﻧﯩﯔ ﭘﺎﻳﺪﺍ ﻳﺎﻛﻰ ﺯﯨﻴﯩﻨﯩﻐﺎ ﺗﺎﻗﯩﻠﯩﺪﯨﻐﺎﻥ ﻣﻪﺳﯩﻠﻪ ﻛﯚﭖ، ‏-‏ ﺩﻩﻳﺪﯗ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺵ ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﻰ ﺩﯙﻟﻪﺗﻠﯩﺮﻯ ﺑﺎﺷﻠﯩﻘﻠﯩﺮﯨﻨﯩﯔ ﺋﺎﻟﯩﻲ ﺩﻩﺭﯨﺠﯩﻠﯩﻚ ﺋﯘﭼﺮﯨﺸﯩﺶ ﻳﯩﻐﯩﻨﯩﺪﺍ ﺳﯚﺯﻟﯩﮕﻪﻥ ﻧﯘﺗﻘﯩﺪﺍ، ‏-‏ ﭘﯜﺗﯜﻥ ﺩﯗﻧﻴﺎ ﺳﻮﺩﯨﺴﯩﻨﯩﯔ %50 ﺩﯨﻦ ﻛﯚﭘﺮﻩﻛﻰ ﺗﯩﻨﭻ ﺋﻮﻛﻴﺎﻧﻨﯩﯔ ﺋﻪﺗﺮﺍﭘﯩﺪﯨﻜﻰ ﺩﯙﻟﻪﺗﻠﻪﺭ ﺋﺎﺭﻗﯩﻠﯩﻖ ﺑﻮﻟﯩﺪﯗ. ﺷﯘﯕﻼﺷﻘﺎ ، ﻣﻪﻥ ﺗﯩﻨﭻ ﺋﻮﻛﻴﺎﻧﻨﯩﯔ ﺋﻪﺗﺮﺍﭘﯩﺪﯨﻜﻰ ﺩﯙﻟﻪﺗﻠﻪﺭﻧﻰ ﺩﯗﻧﻴﺎﻧﻰ ﺋﯚﺯﮔﻪﺭﺗﯩﺶ ﺋﯜﭼﯜﻥ ﭼﯘﻗﯘﻡ ﻣﯘﻫﯩﻢ ﺭﻭﻝ ﺋﻮﻳﻨﺎﺷﻘﺎ ﭼﺎﻗﯩﺮﯨﻤﻪﻥ.

ﺟﻮﺭﺝ ﺑﯘﺵ ﻧﯘﺗﻘﯩﺪﺍ ﻳﻪﻧﻪ ، " ﺋﺎﻣﯧﺮﯨﻜﯩﻨﯩﯔ ﺋﻪﺭﻛﯩﻦ ﺳﻮﺩﺍ ﻛﯚﺯ ﻗﺎﺭﯨﺸﻰ ﻛﯚﭖ ﺗﻪﻧﻘﯩﺪﻛﻪ ﺋﯘﭼﺮﯨﺪﻯ، ﺗﻪﻧﻘﯩﺪﻟﯩﮕﯜﭼﯩﻠﻪﺭ ﺳﺎﻧﺎﺋﯩﺘﻰ ﺗﻪﺭﻩﻗﻘﻰ ﺗﺎﭘﻘﺎﻥ ﺩﯙﻟﻪﺗﻠﻪﺭﺩﯨﻜﻰ ﺋﯩﺸﺴﯩﺰﻟﯩﻘﻨﻰ ﺋﻪﺭﻛﯩﻦ ﺳﻮﺩﺍ ﭘﻪﻳﺪﺍ ﻗﯩﻠﺪﻯ، ﻧﺎﻣﺮﺍﺕ ﺩﯙﻟﻪﺗﻠﻪﺭﺩﯨﻜﻰ ﺋﻪﯓ ﻧﺎﻣﺮﺍﺕ ﺋﺎﺩﻩﻣﻠﻪﺭ ﺗﻮﭘﯩﻨﯩﯔ ﻣﻪﻧﭙﻪﺋﻪﺗﯩﮕﻪ ﺯﯨﻴﺎﻥ ﺳﺎﻟﺪﻯ، ﺩﻩﯞﺍﺗﯩﺪﯗ. ﻫﻪﻣﻤﯩﻤﯩﺰﮔﻪ ﺋﺎﻳﺎﻧﻜﻰ، ﺋﻪﺭﻛﯩﻦ ﺳﻮﺩﯨﻨﯩﯔ ﻗﻪﺗﺌﯩﻲ ﻗﻮﻟﻠﯩﻐﯘﭼﯩﻠﯩﺮﻯ ﺳﻮﺩﺍ-ﺗﯩﺠﺎﺭﻩﺗﭽﯩﻠﻪﺭ، ﺑﯘ ﻣﻪﺳﯩﻠﯩﻨﻰ ﺋﯘﻻﺭ ﻛﯚﭘﭽﯩﻠﯩﻜﻜﻪ ﻛﯚﭘﺮﻩﻙ ﭼﯜﺷﻪﻧﺪﯛﺭﯛﺷﻰ ﻛﯧﺮﻩﻙ. ﺑﻪﺯﻯ ﻛﯩﺸﯩﻠﻪﺭ ﻳﻪﻧﻪ ، ﺋﺎﻣﯧﺮﯨﻜﯩﻨﻰ ﺋﯚﺯﯨﻨﯩﯔ ﭘﯩﻼﻧﯩﻨﻰ ﺑﺎﺷﻘﺎ ﺩﯙﻟﻪﺗﻠﻪﺭﮔﻪ ﺗﯧﯖﯩﯟﺍﺗﯩﺪﯗ، ﺩﻩﭖ ﺗﻪﻧﻘﯩﺪﻟﻪﻳﺪﯗ. ﮔﻪﺭﭼﻪ ﻫﺎﺯﯨﺮ ﺩﯗﻧﻴﺎﺩﺍ ﻫﺎﯞﺍ ﻛﯧﻠﯩﻤﺎﺗﻰ ﺋﯚﺯﮔﯩﺮﯨﺶ ﻣﻪﺳﯩﻠﯩﺴﻰ ﻧﺎﻫﺎﻳﯩﺘﻰ ﺟﯩﺪﺩﯨﻲ ﻣﻪﺳﯩﻠﻪ ﺑﻮﻟﯘﭖ ﺗﯘﺭﯗﯞﺍﺗﺴﯩﻤﯘ، ﺋﻪﻣﻤﺎ ﺋﺎﻣﯧﺮﯨﻜﺎ ﺗﯧﺨﯩﭽﻪ ﻫﯧﭽﻘﺎﻳﺴﻰ ﺑﯩﺮ ﺩﯙﻟﻪﺗﻨﻰ 'ﻛﻴﻮﺗﻮ ﺷﻪﺭﺗﻨﺎﻣﯩﺴﻰ' ﻧﯩﯔ ﺋﯚﻟﭽﯩﻤﯩﮕﻪ ﻳﯧﺘﯩﺸﻜﻪ ﻗﯩﺴﺘﯩﻐﯩﻨﻰ ﻳﻮﻕ " ﺩﯦﺪﻯ.

‏ ﺟﻮﺭﺝ ﺑﯘﺵ ﻧﯘﺗﻘﯩﺪﺍ ﻳﻪﻧﻪ ، ﺑﯘﻧﯩﯖﺪﯨﻦ ﻛﯧﻴﯩﻦ ﺋﺎﺳﯩﻴﺎ-ﺗﯩﻨﭻ ﺋﻮﻛﻴﺎﻥ ﺭﺍﻳﻮﻧﯩﺪﺍ ﺋﯧﻠﯩﭗ ﺑﯧﺮﯨﻠﯩﺪﯨﻐﺎﻥ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﺗﯘﺭﯗﺷﻨﻰ، ﺗﯧﺨﻰ ﻛﯩﺸﯩﻠﻪﺭﮔﻪ ﺑﯩﻠﯩﻨﻤﯩﮕﻪﻥ ﻳﯧﯖﻰ ﺋﯩﺶ، ﺩﻩﭖ ﺗﻪﺳﯟﯨﺮﻟﯩﮕﻪﻥ. ﺋﻪﺭﻛﯩﻨﻠﯩﻚ ﺋﺎﺳﯩﻴﺎ -ﺗﯩﻨﭻ ﺋﻮﻛﻴﺎﻥ ﺭﺍﻳﻮﻧﯩﻨﻰ ﺋﺎﻟﻠﯩﻘﺎﭼﺎﻥ ﺋﯚﺯﮔﻪﺭﺗﯩﺸﻜﻪ ﺑﺎﺷﻠﯩﺪﻯ، ‏- ﺩﻩﻳﺪﯗ ﺟﻮﺭﺝ ﺑﯘﺵ ﻧﯘﺗﻘﯩﺪﺍ ،‏-‏ ‏ﻫﯩﻨﺪﻭﻧﯧﺰﯨﻴﻪ، ﻣﺎﻻﻳﺴﯩﻴﺎ، ﻓﯩﻠﯩﭙﯩﻨﻠﻪﺭﮔﻪ ﻗﺎﺭﺍﭖ ﺑﯧﻘﯩﯖﻼﺭ، ﮔﻪﺭﭼﻪ ﺑﯘ ﺩﯙﻟﻪﺗﻠﻪﺭﺩﻩ ﻳﻪﻧﻪ ﻛﯚﭖ ﺧﯩﺰﻣﻪﺕ ﺋﯩﺸﻠﻪﺷﻜﻪ ﺗﻮﻏﺮﺍ ﻛﻪﻟﺴﯩﻤﯘ. (ﯞﻩﻟﻰ)