ﻣﻪﺷﻬﯘﺭ ﺩﺍﯞﺍ ﻗﺎﻳﺘﺎ ﺳﻪﻫﻨﯩﺪﻩ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻳﺎﺧﯘ ﺋﯩﻨﺘﯧﺮﻧﯧﺖ ﺷﯩﺮﻛﯩﺘﯩﻨﯩﯔ ﺧﯩﺘﺎﻱ ﮊﯗﺭﻧﺎﻟﯩﺴﺖ ﺷﻰ ﺗﺎﯞﻧﯩﯔ ﺗﯜﺭﻣﯩﮕﻪ ﺗﺎﺷﻠﯩﻨﯩﺸﯩﺪﯨﻜﻰ ﻣﻪﺳﺌﯘﻟﯩﻴﯩﺘﻰ ﺳﯜﺭﯛﺷﺘﻪ ﻗﯩﻠﯩﻨﯩﭗ ﺋﯧﭽﯩﻠﻐﺎﻥ ﯞﻩ 2006 ‏-ﻳﯩﻠﻰ ﻳﯩﻞ 2 ‏-ﺋﺎﻳﺪﺍ ﻳﺎﺧﯘ ﺷﯩﺮﻛﯩﺘﻰ ﮔﯘﻧﺎﻫﺴﯩﺰ ﺩﻩﭖ ﻳﻪﻛﯜﻧﻠﻪﻧﮕﻪﻥ ﺋﯩﻨﺴﺎﻥ ﻫﻪﻗﻠﯩﺮﻯ ﺩﺍﯞﺍﺳﻰ، ﺗﯜﻧﯜﮔﯜﻥ ، ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﻰ ﺗﺎﺷﻘﻰ ﺋﯩﺸﻼﺭ ﻛﻮﻣﯩﺘﯧﺘﻰ ﺗﻪﺭﯨﭙﯩﺪﯨﻦ ﻳﯧﯖﯩﺪﯨﻦ ﻛﯜﻥ ﺗﻪﺭﺗﯩﭙﻜﻪ ﻛﻪﻟﺪﻯ: ﻳﺎﺧﯘ ﺋﯩﻨﺘﯧﺮﻧﯧﺖ ﺷﯩﺮﻛﯩﺘﻰ، ﺑﯘ ﻳﯩﻞ 11 ‏-ﺋﺎﻳﻨﯩﯔ 6 ‏- ﻛﯜﻧﻰ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺗﻪﺭﯨﭙﯩﺪﯨﻦ ﺋﯧﭽﯩﻠﯩﺪﯨﻐﺎﻥ ﮔﯘﯞﺍﻫﻠﯩﻖ ﻳﯩﻐﯩﻨﯩﺪﺍ، ﻣﻪﺯﻛﯘﺭ ﺩﺍﯞﺍﺩﺍ ﮔﯘﻧﺎﻫﺴﯩﺰﻟﯩﻘﻰ ﻫﻪﻗﻘﯩﺪﻩ ﻗﺎﻳﺘﯩﺪﯨﻦ ﻣﻪﻟﯘﻣﺎﺕ ﺑﯧﺮﯨﺪﯗ.

ﻣﻪﺯﻛﯘﺭ ﺩﺍﯞﺍ ، ﺋﯩﻨﺴﺎﻥ ﻫﻪﻗﻠﯩﺮﻯ ﻛﯚﺯﻩﺗﻜﯜﭼﯩﻠﯩﺮﻯ ﺗﻪﺭﯨﭙﯩﺪﯨﻦ ﻳﯧﻘﯩﻨﻘﻰ ﻳﯩﻠﻼﺭﻧﯩﯔ ﻣﻪﺷﻬﯘﺭ ﺩﺍﯞﺍﺳﻰ ﺩﻩﭖ ﻗﺎﺭﺍﻟﻐﺎﻥ ﺋﯩﺪﻯ. ﺑﯘ ﺩﺍﯞﺍﻧﻰ ﻣﻪﺷﻬﯘﺭ ﻗﯩﻠﻐﺎﻥ ﻧﯘﻗﺘﺎ، ﺑﯩﺮ ﮊﯗﺭﻧﺎﻟﯩﺴﺘﻨﯩﯔ ﺗﯜﺭﻣﯩﮕﻪ ﺗﺎﺷﻠﯩﻨﯩﺸﻰ ﺋﻪﻣﻪﺱ ،ﺑﻪﻟﻜﻰ ﺩﺍﯞﺍﺩﺍ ﺯﯨﻴﺎﻧﻜﻪﺷﻠﯩﻜﻨﻰ ﺑﯩﯟﺍﺳﺘﻪ ﺳﺎﺩﯨﺮ ﻗﯩﻠﻐﯘﭼﻰ ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺷﯩﻜﺎﻳﻪﺕ ﻗﯩﻠﯩﻨﻤﺎﻱ ، ﺯﯨﻴﺎﻧﻜﻪﺷﻠﯩﻜﻜﻪ ﻗﻮﺷﯘﻣﭽﻪ ﺳﻪﯞﻩﺑﭽﻰ ﺑﻮﻟﻐﯘﭼﻰ ﻳﺎﺧﯘ ﺷﯩﺮﻛﯩﺘﯩﻨﯩﯔ ﺷﯩﻜﺎﻳﻪﺕ ﻗﯩﻠﯩﻨﯩﺸﻰ ﺋﯩﺪﻯ.

ﺷﻰ ﺗﺎﯞﻏﺎ ﺯﯨﻴﺎﻧﻜﻪﺷﻠﯩﻚ ﻗﯩﻠﻐﯘﭼﻰ ﻳﺎﺧﯘ ﺷﯩﺮﻛﯩﺘﻰ ﺋﻪﻣﻪﺱ ، ﺧﯩﺘﺎﻳﻨﯩﯔ ﺳﯩﻴﺎﺳﯩﻲ ﺳﯩﺴﺘﯧﻤﯩﺴﻰ

ﺷﻰ ﺗﺎﯞ، ﺧﯩﺘﺎﻳﺪﯨﻜﻰ" ﺯﺍﻣﺎﻧﯩﯟﯨﻲ ﺗﯩﺠﺎﺭﻩﺕ" ﻧﺎﻣﯩﺪﯨﻜﻰ ﺑﯩﺮ ﮔﯧﺰﯨﺘﻨﯩﯔ ﻣﯘﺧﺒﯩﺮﻯ ﺑﻮﻟﯘﭖ، ﺋﯘ 2004 ‏- ﻳﯩﻠﻰ ﭼﻪﺗﺌﻪﻟﺪﻩ ﻧﻪﺷﺮ ﻗﯩﻠﯩﻨﯩﯟﺍﺗﻘﺎﻥ ﺑﯩﺮ ﺋﺎﺧﺒﺎﺭﺍﺕ ﺗﻮﺭﯨﺪﺍ، ﺧﯩﺘﺎﻳﺪﺍ ﺳﯩﻴﺎﺳﯩﻲ ﺋﯩﺴﻼﻫﺎﺕ ﺋﯧﻠﯩﭗ ﺑﯧﺮﯨﺶ ﺯﯙﺭﯛﺭﻟﯜﻛﻰ ﺗﻪﺷﻪﺑﺒﯘﺱ ﻗﯩﻠﯩﻨﻐﺎﻥ ﺑﯩﺮ ﭘﺎﺭﭼﻪ ﻣﺎﻗﺎﻟﻪ ﺋﯧﻼﻥ ﻗﯩﻠﻐﺎﻥ ، ﺑﯘ ﻣﺎﻗﺎﻟﯩﺪﯨﻜﻰ ﭘﯩﻜﯩﺮﻟﻪﺭ ، ﺧﯩﺘﺎﻱ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ، ﺩﯙﻟﻪﺕ ﻣﻪﺧﭙﯩﻴﻪﺗﻠﯩﻜﯩﻨﻰ ﺋﺎﺷﻜﺎﺭﯨﻼﺵ ﺩﻩﭖ ﻗﺎﺭﯨﻠﯩﭗ، ﺋﺎﭘﺘﻮﺭ ﺷﯘ ﻳﯩﻠﻰ ﻗﻮﻟﻐﺎ ﺋﯧﻠﯩﻨﻐﺎﻥ ﯞﻩ 2005 ‏-ﻳﯩﻠﻰ 10 ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﻐﺎﻥ ﺋﯩﺪﻯ.

ﺷﯘﻧﯩﯖﺪﯨﻦ ﻛﯧﻴﯩﻦ، ﺟﺎﻳﻼﺭﺩﯨﻜﻰ ﺋﯩﻨﺴﺎﻥ ﻫﻪﻗﻠﯩﺮﻯ ﺗﻪﺷﻜﯩﻼﺗﻠﯩﺮﻯ ﺷﻰ ﺗﺎﯞﻏﺎ ﻧﺎﻫﻪﻕ ﺯﯨﻴﺎﻧﻜﻪﺷﻠﯩﻚ ﻗﯩﻠﻐﺎﻥ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺗﻪﻧﻘﯩﺪﻟﯩﮕﻪﻥ ؛ ﺑﯘﻧﯩﯔ ﺑﯩﻠﻪﻥ ﺑﯩﻠﻠﻪ ﻳﻪﻧﻪ ، ﻳﺎﺧﯘ ﺋﯩﻨﺘﯧﺮﻧﯧﺖ ﺷﯩﺮﻛﯩﺘﯩﻨﻰ ، ﺧﯩﺘﺎﻱ ﺩﯙﻟﻪﺕ ﺑﯩﺨﻪﺗﻪﺭﻟﯩﻚ ﺳﺎﻗﭽﯩﻠﯩﺮﯨﻐﺎ ، ﺷﻰ ﺗﺎﯞﻧﯩﯔ ﺋﯩﻨﺘﯧﺮﻧﯧﺘﺘﻪ ﺗﯩﺰﯨﻤﻼﻧﻐﺎﻥ ﺋﺎﻻﻗﯩﺪﺍﺭ ﺋﯘﭼﯘﺭﻟﯩﺮﯨﻨﻰ ﻳﻪﺗﻜﯜﺯﯛﭖ ﺑﯧﺮﯨﺶ ﺋﺎﺭﻗﯩﻠﯩﻖ ، ﻣﻪﺯﻛﯜﺭ ﺯﯨﻴﺎﻧﻜﻪﺷﻠﯩﻜﻨﯩﯔ ﺷﻪﻛﯩﻠﻠﯩﻨﯩﺸﯩﮕﻪ ﺳﻪﯞﻩﺑﭽﻰ ﺑﻮﻟﺪﻯ ﺩﻩﭖ ﺋﻪﻳﯩﺒﻠﯩﮕﻪﻥ ﺋﯩﺪﻯ.

ﺑﯘﻟﺘﯘﺭ 2 ‏- ﺋﺎﻳﺪﺍ، ﺋﺎﻣﯧﺮﯨﻜﺎ ﭘﺎﺭﻻﻣﯧﻨﺘﯩﺪﺍ ﺑﯘ ﻫﻪﻗﺘﻪ ﻣﻪﺧﺴﯘﺱ ﮔﯘﯞﺍﻫﻠﯩﻖ ﻳﯩﻐﯩﻨﻰ ﺋﯧﭽﯩﻠﻐﺎﻥ ، ﻳﯩﻐﯩﻨﺪﺍ، ﻳﺎﺧﯘ ﺋﯩﻨﺘﯧﺮﻧﯧﺖ ﺷﯩﺮﻛﯩﺘﻰ، ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺷﻰ ﺗﺎﯞ ﺗﻮﻏﺮﯨﻠﯩﻖ ﺋﯘﭼﯘﺭ ﺋﯩﮕﯩﻠﯩﮕﻪﻧﺪﻩ ، ﺋﯘﻻﺭﻧﯩﯔ ﻧﯧﻤﻪ ﻣﻪﻗﺴﻪﺗﺘﻪ ﺋﯧﻨﯩﻘﻠﯩﻐﯩﻨﯩﻨﻰ ﺑﯩﻠﺪﯗﺭﻣﯩﮕﻪﻧﻠﯩﻜﯩﻨﻰ، ﺑﯘ ﺳﻪﯞﻩﺑﺘﯩﻦ ﻳﺎﺧﯘﻧﯩﯖﻤﯘ ، ﺷﻰ ﺗﺎﯞﺷﺎ ﻣﯘﻧﺎﺳﯩﯟﻩﺗﻠﯩﻚ ﺋﯩﻨﺘﯧﺮﻧﯧﺖ ﺗﯩﺰﯨﻤﻠﯩﻚ ﺋﯘﭼﯘﺭﯨﻨﻰ ﺳﺎﻗﭽﯩﻼﺭﻏﺎ ﺑﻪﺭﮔﻪﻧﻠﯩﻜﯩﻨﻰ؛ ﺷﯘﯕﺎ ،ﺷﻰ ﺗﺎﯞﻏﺎ ﺯﯨﻴﺎﻧﻜﻪﺷﻠﯩﻚ ﻗﯩﻠﻐﯘﭼﻰ ﻳﺎﺧﯘ ﺷﯩﺮﻛﯩﺘﻰ ﺋﻪﻣﻪﺱ، ﺧﯩﺘﺎﻳﻨﯩﯔ ﺳﯩﻴﺎﺳﯩﻲ ﺳﯩﺴﺘﯧﻤﯩﺴﻰ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺋﯩﺪﻯ.

ﺩﯨﺌﺎﻟﻮﮒ ﯞﻩﺧﭙﻰ ﻫﻪﺭﻛﻪﺗﺘﻪ

ﺑﯘ ﻳﯩﻞ 7 ‏-ﺋﺎﻳﺪﺍ ، ﺋﺎﻣﯧﺮﯨﻜﯩﻨﯩﯔ ﻛﺎﻟﯩﻔﻮﺭﻧﯩﻴﻪ ﺷﺘﺎﺗﯩﺪﯨﻜﻰ ﺩﯨﺌﺎﻟﻮﮒ ﯞﻩﺧﭙﻰ ﻧﺎﻣﻠﯩﻖ ﺗﻪﺷﻜﯩﻼﺕ، ، ﺑﯧﻴﺠﯩﯔ ﺑﯩﺨﻪﺗﻪﺭﻟﯩﻚ ﺳﺎﻗﭽﯩﻠﯩﺮﯨﻨﯩﯔ، ﻳﺎﺧﯘ ﺷﯩﺮﻛﯩﺘﯩﮕﻪ ﻳﺎﺯﻏﺎﻥ ﺑﯩﺮ ﭘﺎﺭﭼﻪ ﺧﯧﺘﯩﻨﻰ ﻗﻮﻟﻐﺎ ﭼﯜﺷﯜﺭﮔﻪﻥ ﺑﻮﻟﯘﭖ، ﺋﯘ ﺧﻪﺗﺘﯩﻦ ﻣﻪﻟﯘﻡ ﺑﻮﻟﯘﺷﯩﭽﻪ، ، ﺑﯧﻴﺠﯩﯔ ﺳﺎﻗﭽﯩﻠﯩﺮﻯ، ﻳﺎﺧﯘ ﺷﯩﺮﻛﯩﺘﯩﮕﻪ ﺋﯧﻨﯩﻖ ﻗﯩﻠﯩﭗ ، ﺷﻰ ﺗﺎﯞﻧﯩﯔ، ﭼﻪﺗﺌﻪﻟﮕﻪ ﺩﯙﻟﻪﺕ ﻣﻪﺧﭙﯩﻴﻪﺗﻠﯩﻜﯩﻨﻰ ﻳﻪﺗﻜﯜﺯﮔﻪﻧﻠﯩﻜﯩﮕﻪ ﺋﺎﺋﯩﺖ ﭘﺎﻛﯩﺖ ﺗﻮﭘﻼﯞﺍﺗﻘﺎﻧﻠﯩﻘﯩﻨﻰ ﺋﯘﻗﺘﯘﺭﻏﺎﻥ.

ﺑﯘ ﻣﺎﺗﯧﺮﯨﻴﺎﻝ ﺋﻮﺗﺘﯘﺭﯨﻐﺎ ﭼﯩﻘﯩﺶ ﺑﯩﻠﻪﻥ، ﻳﺎﺧﯘ ﺷﯩﺮﻛﯩﺘﻰ ﺋﻪﻣﺪﻯ، ﺑﯘﻟﺘﯘﺭﻗﻰ ﺩﯙﻟﻪﺕ ﻣﻪﺟﻠﯩﺴﯩﺪﻩ ﺋﯚﺗﻜﯜﺯﯛﻟﮕﻪﻥ ﮔﯘﯞﺍﻫﻠﯩﻖ ﻳﯩﻐﯩﻨﯩﺪﺍ ﻳﺎﻟﻐﺎﻥ ﮔﯘﯞﺍﻫﻠﯩﻖ ﺑﻪﺭﮔﻪﻧﻠﯩﻚ ﺋﻪﻳﯩﭙﻠﯩﻤﯩﺴﯩﮕﻪ ﺩﯗﭺ ﻛﻪﻟﺪﻯ ، ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﻰ ﺗﺎﺷﻘﻰ ﺋﯩﺸﻼﺭ ﻛﻮﻣﯩﺘﯧﺘﯩﻨﯩﯔ ﺑﺎﺷﻠﯩﻘﻰ ﺗﻮﻡ ﻻﻧﺘﻮﺳﻨﯩﯔ ﺑﯩﻠﺪﯛﺭﯛﺷﯩﭽﻪ، ﻳﺎﺧﯘ ﺷﯩﺮﻛﯩﺘﯩﻨﯩﯔ ﻣﻪﺳﺌﯘﻟﻠﯩﺮﯨﺪﯨﻦ ﺟﻪﺭﺭﯨﻲ ﻳﺎﯓ ﺑﯩﻠﻪﻥ ، ﻣﯩﭽﻪﻳﻞ ﻛﺎﻟﻼﻫﺎﻧﻐﺎ ﺋﯘﻗﺘﯘﺭﯗﺵ ﺋﻪﯞﻩﺗﯩﻠﮕﻪﻥ ، ﺋﯘﻻﺭ 6 ‏- ﻧﻮﻳﺎﺑﯩﺮﺩﯨﻜﻰ ﮔﯘﯞﺍﻫﻠﯩﻖ ﻳﯩﻐﯩﻨﯩﺪﺍ، ﺷﻰ ﺗﺎﯞﻧﯩﯔ ﺯﯨﻴﺎﻧﻜﻪﺷﻠﯩﻜﻜﻪ ﺋﯘﭼﺮﯨﺸﯩﺪﯨﻜﻰ ﻣﻪﺳﺌﯘﻟﯩﻴﯩﺘﻰ ﻫﻪﻡ ﺑﯘﻟﺘﯘﺭﻗﻰ ﮔﯘﯞﺍﻫﻠﯩﻖ ﻳﯩﻐﯩﻨﯩﺪﺍ ﻳﺎﻟﻐﺎﻥ ﺳﯚﺯﻟﻪﭖ-ﺳﯚﺯﻟﯩﻤﯩﮕﻪﻧﻠﯩﻜﻰ ﻫﻪﻗﻘﯩﺪﻩ ﺗﻮﻟﯘﻕ ﻣﻪﻟﯘﻣﺎﺕ ﺑﯧﺮﯨﺪﯗ.

ﺋﯘﻳﻐﯘﺭ ﺗﺎﺭﯨﺨﭽﻰ ﺗﻮﺧﺘﻰ ﻣﯘﺯﺍﺕ ، ﻳﺎﺯﻏﯘﭼﻰ ﻧﯘﺭﻣﯘﻫﻪﻣﻤﻪﺩ ﻳﺎﺳﯩﻨﻼﺭﻣﯘ ﺗﯜﺭﻣﯩﺪﻩ

ﻫﯚﺭﻣﻪﺗﻠﯩﻚ ﺭﺍﺩﯨﺌﻮ ﺋﺎﯕﻠﯩﻐﯘﭼﯩﻼﺭ، ﺑﯜﮔﯜﻥ ﺧﯩﺘﺎﻱ ﮊﯗﺭﻧﺎﻟﯩﺴﺖ ﺷﻰ ﺗﺎﯞﻻ ﺋﻪﻣﻪﺱ، ﺋﯘﻳﻐﯘﺭ ﺗﺎﺭﯨﺨﭽﻰ ﺗﻮﺧﺘﻰ ﻣﯘﺯﺍﺕ ، ﺋﯘﻳﻐﯘﺭ ﻳﺎﺯﻏﯘﭼﻰ ﻧﯘﺭﻣﯘﻫﻪﻣﻤﻪﺩ ﻳﺎﺳﯩﻦ ﻗﺎﺗﺎﺭﻟﯩﻖ ﻣﯩﯖﻼﺭﭼﻪ ﻣﻪﻫﺒﯘﺱ، ﭘﻪﻗﻪﺕ ﭘﯩﻜﯩﺮ ﺑﺎﻳﺎﻥ ﻗﯩﻠﻐﯩﻨﻰ ﺋﯜﭼﯜﻧﻼ ﺗﯜﺭﻣﯩﻠﻪﺭﺩﻩ ﻳﯧﺘﯩﯟﺍﺗﯩﺪﯗ، ﺑﯘ ﺯﯨﻴﺎﻧﻜﻪﺷﻠﯩﻜﻨﻰ ﺳﺎﺩﯨﺮ ﻗﯩﻠﻐﯘﭼﻰ ﺧﯩﺘﺎﻱ ﻫﯚﻛﯜﻣﯩﺘﻰ ﺑﻮﻟﺴﺎ، ﺋﯩﻨﺎﻕ ﺟﻪﻣﺌﯩﻴﻪﺕ ﺑﻪﺭﭘﺎ ﻗﯩﻠﯩﺶ ﯞﻩﺩﯨﺴﯩﻨﻰ ﺑﯩﻠﺪﯛﺭﯛﭖ ﻗﯘﺭﯗﻟﺘﺎﻱ ﺋﯧﭽﯩﯟﺍﺗﯩﺪﯗ؛ ﺑﯩﺮ ﺷﻰ ﺗﺎﯞﻧﯩﯔ ﺯﯨﻴﺎﻧﻜﻪﺷﻠﯩﻜﻜﻪ ﺋﯘﭼﺮﯨﺸﯩﻐﺎ ﭼﯧﺘﯩﻠﯩﭗ ﻗﺎﻟﻐﺎﻥ ، ﻳﺎﺧﯘ ﺋﯩﻨﺘﯧﺮﻧﯧﺖ ﺷﯩﺮﻛﯩﺘﻰ ﺑﻮﻟﺴﺎ ، ﺑﯘ ﻗﯩﻠﻤﯩﺸﻰ ﺋﯜﭼﯜﻥ ﺋﯩﻜﻜﻰ ﻳﯩﻠﺪﯨﻦ ﺑﯧﺮﻯ، ﺑﯧﺸﻰ ﺩﻩﺭﺗﺘﯩﻦ ﻗﯘﺗﯘﻟﻤﺎﻳﯟﺍﺗﯩﺪﯗ.

ﻣﺎﻧﺎ ﺑﯘ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ 17 ‏- ﻗﯘﺭﯗﻟﺘﯩﻴﯩﺪﺍ، ﻗﻪﺗﺌﯩﻲ ﺋﻪﮔﻪﺷﻤﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﯛﭖ ﺋﯚﺗﻜﻪﻥ ﻏﻪﺭﺑﭽﻪ ﺳﯩﻴﺎﺳﯩﻲ ﺗﯜﺯﯛﻟﻤﻪ ﺑﯩﻠﻪﻥ ، ﺋﯘﻻﺭ ﻗﻪﺗﺌﯩﻲ ﺗﻪﯞﺭﻩﻧﻤﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺧﯩﺘﺎﻱ ﺳﻮﺗﺴﯩﻴﺎﻟﯩﺴﺘﯩﻚ ﺗﯜﺯﯛﻣﯩﻨﯩﯔ ﭘﻪﺭﻗﯩﻨﻰ ﺭﻭﺷﻪﻥ ﻛﯚﺭﺳﯩﺘﯩﭗ ﺑﯧﺮﻩﻟﻪﻳﺪﯨﻐﺎﻥ ﺑﯩﺮ ﭘﺎﻛﯩﺖ ﺑﻮﻟﺴﺎ ﻛﯧﺮﻩﻙ. (ﺷﯚﻫﺮﻩﺕ ﻫﻮﺷﯘﺭ)