ﺋﺎﻣﯧﺮﯨﻜﯩﺪﯨﻜﻰ ﺋﯘﻳﻐﯘﺭﻻﺭ ﻳﯧﯖﻰ ﻳﯩﻠﻨﻰ ﺗﻪﺑﺮﯨﻜﻠﯩﺪﻯ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﻣﯧﺮﯨﻜﯩﺪﯨﻜﻰ ﺋﯘﻳﻐﯘﺭﻻﺭ ﺗﯜﻧﯜﮔﯜﻥ ﻳﻪﻧﻰ 31 ‏- ﺩﯦﻜﺎﺑﯩﺮ ﻛﯜﻧﻰ ﻛﻪﭼﺘﻪ، ﺋﺎﻣﯧﺮﯨﻜﯩﻨﯩﯔ ﯞﯨﺮﺟﯩﻨﯩﻴﻪ ﺋﯩﺸﺘﺎﺗﯩﻨﯩﯔ ﺋﺎﻟﯧﻜﺴﺎﻧﺪﯨﺮﯨﻴﻪ ﺷﻪﻫﯩﺮﯨﺪﻩ ﻳﯧﯖﻰ ﻳﯩﻠﻨﻰ ﺗﻪﺑﺮﯨﻜﻠﻪﭖ ﭘﺎﺋﺎﻟﯩﻴﻪﺕ ﺋﯚﺗﻜﯜﺯﺩﻯ. ﭘﺎﺋﺎﻟﯩﻴﻪﺗﻜﻪ، ﺋﺎﻣﯧﺮﯨﻜﯩﻨﯩﯔ ﻫﻪﺭﻗﺎﻳﺴﻰ ﺷﯩﺘﺎﺗﻠﯩﺮﯨﺪﯨﻦ ﺑﻮﻟﯘﭖ، 200 ﺩﯨﻦ ﺋﺎﺭﺗﯘﻕ ﻛﯩﺸﻰ ﻗﺎﺗﻨﺎﺷﺘﻰ. ﭘﺎﺋﺎﻟﯩﻴﻪﺗﻨﻰ ﺋﺎﻣﯧﺮﯨﻜﺎ ﺋﯘﻳﻐﯘﺭ ﺟﻪﻣﺌﯩﻴﯩﺘﻰ ﺋﯘﻳﯘﺷﺘﯘﺭﺩﻯ.

ﻫﻪﺭ ﻗﯧﺘﯩﻤﻠﯩﻖ ﻳﯧﯖﻰ ﻳﯩﻠﻨﻰ ﻛﯜﺗﯜﯞﯦﻠﯩﺶ ﭘﺎﺋﺎﻟﯩﻴﯩﺘﻰ ﭼﻪﺗﺌﻪﻟﺪﯨﻜﻰ ﺋﯘﻳﻐﯘﺭﻻﺭ ﺋﯜﭼﯜﻥ ﺋﯚﺯ ‏- ﺋﺎﺭﺍ ﺋﯘﭼﺮﯨﺸﯩﺶ ﯞﻩ ﻫﺎﻝ ﺳﻮﺭﯗﺷﯘﺵ ﭘﯘﺭﺳﯩﺘﻰ ﺑﻮﻟﯘﭖ ﻗﺎﻟﻤﺎﻱ، ﺑﯩﺮ ﻳﯩﻠﻠﯩﻖ ﺳﯩﻴﺎﺳﯩﻲ ﯞﻩ ﻣﯩﻠﻠﯩﻲ ﭘﺎﺋﺎﻟﯩﻴﻪﺗﻠﯩﺮﯨﺪﯨﻦ ﺧﯘﻻﺳﻪ ﭼﯩﻘﯩﺮﯨﺶ، ﻳﯧﯖﻰ ﺑﯩﺮ ﻳﯩﻠﻠﯩﻖ ﺧﯩﺰﻣﻪﺗﻠﻪﺭ ﺋﯜﭼﯜﻥ ﻛﯜﭺ ﯞﻩ ﺋﯩﻠﻬﺎﻡ ﺋﯧﻠﯩﺶ ﭘﯘﺭﺳﯩﺘﯩﺪﯗﺭ. ﺑﯘ ﻗﯧﺘﯩﻤﻘﻰ ﭘﺎﺋﺎﻟﯩﻴﻪﺗﺘﻪ ﺳﯚﺯ ﻗﯩﻠﻐﺎﻥ، ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﻳﻮﻟﺒﺎﺷﭽﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ، ﺋﺎﻟﺪﻯ ﺑﯩﻠﻪﻥ ﯞﻩﺗﻪﻥ ﺋﯩﭽﯩﺪﻩ، ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺑﯜﮔﯜﻧﻜﻰ ﺗﻪﺭﻩﻗﻘﯩﻴﺎﺗﯩﻐﺎ ﺋﯘﻝ ﺳﺎﻟﻐﺎﻥ ﺷﯧﻬﯩﺘﻠﻪﺭﻧﻰ ﺋﻪﺳﻠﻪﭖ ﺋﯚﺗﺘﻰ، ﺷﯧﻬﯩﺪ ﯞﻩ ﻣﻪﻫﺒﯘﺱ ﺋﺎﺋﯩﻠﯩﻠﯩﺮﯨﮕﻪ ﻫﯚﺭﻣﻪﺕ ﺑﯩﻠﺪﯛﺭﺩﻯ. ﺋﺎﺭﻗﯩﺪﯨﻦ، ﺋﯚﺗﻜﻪﻥ ﺑﯩﺮ ﻳﯩﻞ ﺋﯩﭽﯩﺪﻩ، ﻣﯩﻠﻠﯩﻲ ﻫﻪﺭﯨﻜﻪﺗﺘﻪ ﺋﯩﺸﻠﻪﻧﮕﻪﻥ ﺧﯩﺰﻣﻪﺗﻠﻪﺭﻧﯩﯔ ﻣﯘﻫﯩﻢ ﻧﯘﻗﺘﯩﻠﯩﺮﯨﻨﻰ ﺗﯩﻠﻐﺎ ﺋﺎﻟﺪﻯ.

ﭘﺎﺋﺎﻟﯩﻴﻪﺗﺘﻪ، ﭘﺎﺋﺎﻟﯩﻴﻪﺗﻜﻪ ﻗﺎﺗﻨﺎﺷﻘﺎﻥ ﺑﺎﻟﯩﻼﺭ، ﻳﺎﺷﻼﺭ ﯞﻩ ﺋﺎﻧﯩﻼﺭ ﺋﯚﺯﻟﯩﺮﻯ ﺗﻪﻳﻴﺎﺭﻟﯩﻐﺎﻥ ﺳﻪﻧﺌﻪﺕ ﻧﻮﻣﯘﺭﻟﯩﺮﯨﻨﻰ ﻛﯚﺭﺳﻪﺗﺘﻰ. ﻳﺎﺷﻼﺭ ﺗﻪﻳﻴﺎﺭﻟﯩﻐﺎﻥ ﺳﻪﻧﺌﻪﺕ ﻧﻮﻣﯘﺭﯨﺪﺍ، ﺷﻪﺭﻗﻰ ﺗﯜﺭﻛﯩﺴﺘﺎﻥ ﻣﯘﺳﺘﻪﻗﯩﻠﻠﯩﻖ ﻛﯜﺭﯨﺸﻰ ﻳﻮﻟﯩﺪﺍ، ﻗﻮﻟﻐﺎ ﺋﯧﻠﯩﻨﻐﺎﻥ ﺑﯩﺮ ﻣﻪﻫﺒﯘﺳﻨﯩﯔ، ﺟﺎﺯﺍ ﻣﻪﻳﺪﺍﻧﯩﺪﯨﻜﻰ ﺟﻪﺳﯘﺭ ﯞﻩ ﻣﻪﺭﺩﺍﻧﻪ ﻗﯩﻴﺎﭘﯩﺘﻰ ﺳﻪﻫﻨﯩﻠﻪﺷﺘﯜﺭﯛﻟﯜﭖ، ﺗﺎﻣﺎﺷﯩﺒﯩﻨﻼﺭﻧﯩﯔ ﻗﯩﺰﻏﯩﻦ ﺋﺎﻟﻘﯩﺸﯩﻐﺎ ﺋﯧﺮﯨﺸﺘﻰ.

ﺑﯘ ﻧﻮﻣﯘﺭﺩﺍ ﺭﻭﻝ ﺋﺎﻟﻐﺎﻥ ﻳﺎﺵ ﺷﻪﭘﻘﻪﺕ ﺷﺎﯞﻛﻪﺕ، ﺧﯩﺘﺎﻱ ﺗﯜﺭﻣﯩﺴﯩﺪﻩ ﺩﺍﺩﯨﺴﯩﻨﯩﯔ 10 ﻳﯩﻞ، ﭼﻮﯓ ﺩﺍﺩﯨﺴﯩﻨﯩﯔ 20 ﻳﯩﻞ ﻳﺎﺗﻘﺎﻧﻠﯩﻘﯩﻨﻰ، ﺋﯘﻻﺭﻧﯩﯔ ﺋﯧﻐﯩﺰﯨﺪﯨﻦ ﺷﻪﺭﻗﻰ ﺗﯜﺭﻛﯩﺴﺘﺎﻥ ﺋﯩﻨﻘﯩﻼﺏ ﺗﺎﺭﯨﺨﻰ ﯞﻩ ﺗﯜﺭﻣﻪ ﻫﯧﻜﺎﻳﯩﻠﯩﺮﯨﻨﻰ ﺋﺎﯕﻼﭖ ﭼﻮﯓ ﺑﻮﻟﻐﺎﻧﻠﯩﻘﯩﻨﻰ، ﺷﯘﯕﺎ ﺋﯚﺯﯨﻨﯩﯔ ﻣﻪﻫﺒﯘﺳﻼﺭﻧﯩﯔ ﺭﻭﻫﯩﻲ ﺩﯗﻧﻴﺎﺳﯩﻨﻰ ﭼﯜﺷﯩﻨﯩﺪﯨﻐﺎﻧﻠﯩﻘﯩﻨﻰ، ﻏﺎﻳﯩﺴﯩﻨﯩﯖﻤﯘ ﯞﻩﺗﻪﻥ - ﻣﯩﻠﻠﻪﺕ ﺧﯩﺰﻣﯩﺘﯩﮕﻪ ﻳﺎﺭﺍﻣﻠﯩﻖ ﺋﯩﻨﺴﺎﻥ ﺑﻮﻟﯘﭖ ﻳﯧﺘﯩﺸﯩﭗ ﭼﯩﻘﯩﺶ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﻳﯧﯖﻰ ﻳﯩﻞ ﻛﯧﭽﯩﻠﯩﻜﯩﮕﻪ ﻗﺎﺗﻨﺎﺷﻘﺎﻥ ﺋﺎﺑﺪﯗﻟﻼ ﺋﻪﭘﻪﻧﺪﻯ، ﻳﯧﯖﻰ ﻳﯩﻞ ﻛﯧﭽﯩﻠﯩﻜﻰ ﺗﻪﺳﯩﺮﺍﺗﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﺋﯚﺗﺘﻰ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻳﯧﯖﻰ ﻳﯩﻞ ﻛﯧﭽﯩﻠﯩﻜﯩﺪﯨﻜﻰ ﺳﯚﺯﯨﺪﻩ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ، 2008 ‏- ﻳﯩﻠﻰ، ﺗﯧﺨﯩﻤﯘ ﺟﺎﭘﺎﻟﯩﻖ ﺧﯩﺰﻣﻪﺕ ﺋﯧﻠﯩﭗ ﺑﺎﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﯛﭖ ﺋﯚﺗﺘﻰ. (ﺷﯚﻫﺮﻩﺕ ﻫﻮﺷﯘﺭ)