ﺋﯘﭼﺘﯘﺭﭘﺎﻧﺪﺍ ﻗﺎﺗﺘﯩﻖ ﻳﻪﺭ ﺗﻪﯞﺭﯨﺪﻯ

• ﻣﯘﺧﺒﯩﺮﯨﻤﯩﺰ ﺋﺎﺭﺯﯗﻧﯩﯔ ﺑﯘ ﮬﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ ﺳﻪﻳﺸﻪﻧﺒﻪ ﻛﯜﻧﻰ ﺋﻪﺗﯩﮕﻪﻥ ﺳﺎﺋﻪﺕ 5 ﻳﯧﺮﯨﻤﻼﺭ ﺋﻪﺗﺮﺍﭘﯩﺪﺍ 6.2 ﺑﺎﻝ ﻳﻪﺭ ﺗﻪﯞﺭﻩﺵ ﺋﺎﭘﯩﺘﻰ ﻳﯜﺯ ﺑﻪﺭﺩﻯ. ﺋﺎﭘﻪﺗﺘﻪ ﮬﺎﺯﯨﺮﻏﯩﭽﻪ ﺋﺎﺩﻩﻡ ﺋﯚﻟﯜﺵ ﯞﻩ ﻳﺎﺭﯨﻠﯩﻨﯩﺶ ﺋﻪﮬﯟﺍﻟﻠﯩﺮﯨﻨﯩﯔ ﻛﯚﺭﯛﻟﻤﯩﮕﻪﻧﻠﯩﻜﻰ ﺑﯩﻠﺪﯛﺭﯛﻟﻤﻪﻛﺘﻪ.

ﺧﯩﺘﺎﻱ ﮬﯚﻛﯜﻣﯩﺘﯩﻨﯩﯔ ﺯﯗﯞﺍﻧﻰ ﺑﻮﻟﻐﺎﻥ ﺷﯩﻨﺨﯘﺋﺎ ﺋﺎﮔﯧﻨﺘﻠﯩﻘﯩﻨﯩﯔ ﺑﯩﻠﺪﯛﺭﯛﺷﯩﭽﻪ، ﺑﯘ ﻗﯧﺘﯩﻤﻘﻰ ﻳﻪﺭ ﺗﻪﯞﺭﻩﺷﻨﯩﯔ ﻣﻪﺭﻛﯩﺰﻯ ﺋﯘﭼﺘﯘﺭﭘﺎﻧﻨﯩﯔ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﻐﺎ ﺗﻮﻏﺮﺍ ﻛﯧﻠﯩﺪﯨﻜﻪﻥ. ﻳﯧﺰﯨﻠﯩﻖ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﺧﯘﺍﯓ، ﺩﻩﺳﻠﻪﭘﻜﻰ ﺋﯧﻨﯩﻘﻼﺷﻼﺭﻏﺎ ﻗﺎﺭﯨﻐﺎﻧﺪﺍ، ﻳﯧﯖﻰ ﺋﺎﯞﺍﺕ ﻳﯧﺰﯨﺴﻰ ﺗﻪﯞﻩﻟﯩﻜﯩﺪﻩ 30 ﺋﺎﺋﯩﻠﯩﻜﻨﯩﯔ 50 ﺋﯧﻐﯩﺰﺩﻩﻙ ﺋﯚﻳﻰ ﺋﯚﺭﯛﻟﯜﭖ، ﻗﯩﺴﻤﻪﻥ ﺋﯚﻳﻠﻪﺭﻧﯩﯔ ﭼﺎﻙ ﻛﻪﺗﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ.

ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺷﻠﻪﺭ ﻳﻪﻧﻪ ﻳﯜﺯ ﺑﯧﺮﯨﺸﻰ ﻣﯘﻣﻜﯩﻦ

ﺑﯩﺰ ﺑﯘ ﻗﯧﺘﯩﻤﻘﻰ ﻳﻪﺭ ﺗﻪﯞﺭﻩﺵ ﮬﻪﻗﻘﯩﺪﻩ ﺗﻪﭘﺴﯩﻠﻰ ﻣﻪﻟﯘﻣﺎﺕ ﺋﯩﮕﯩﻠﻪﺵ ﺋﯜﭼﯜﻥ، ﺋﺎﻗﺴﯘ ﯞﯨﻼﻳﻪﺗﻠﯩﻚ ﻳﻪﺭ ﺗﻪﯞﺭﻩﺵ ﺋﯩﺪﺍﺭﯨﺴﻰ ﺑﯩﻠﻪﻥ ﺋﺎﻻﻗﯩﻼﺷﺘﯘﻕ. ﺯﯨﻴﺎﺭﯨﺘﯩﻤﯩﺰﻧﻰ ﻗﯘﺑﯘﻝ ﻗﯩﻠﻐﺎﻥ ﻟﻰ ﻓﺎﻣﯩﻠﯩﻠﯩﻚ ﺑﯩﺮ ﺧﺎﺩﯨﻢ، ﺳﻪﻳﺸﻪﻧﺒﻪ ﻛﯜﻧﻰ ﺋﻪﺗﯩﮕﻪﻥ ﻳﻪﺭﻟﯩﻚ ﯞﺍﻗﯩﺖ ﺳﺎﺋﻪﺕ ﺑﻪﺵ ﻳﯧﺮﯨﻤﺪﺍ 6.2 ﺑﺎﻝ ﻗﺎﺗﺘﯩﻖ ﻳﻪﺭ ﺗﻪﯞﺭﯨﮕﻪﻧﺪﯨﻦ ﺑﯘﻳﺎﻥ، ﮬﺎﺯﯨﺮﻏﯩﭽﻪ 90 ﻧﻪﭼﭽﻪ ﻗﯧﺘﯩﻢ ﺋﻪﮔﻪﺷﻤﻪ ﻳﻪﺭ ﺗﻪﯞﺭﯨﮕﻪﻧﻠﯩﻜﯩﻨﻰ ﺑﯩﻠﺪﯛﺭﯛﭖ، ﻣﯘﻧﺪﺍﻕ ﺩﯦﺪﻯ:

ﮬﺎﺯﯨﺮﻏﯩﭽﻪ 90 ﻧﻪﭼﭽﻪ ﻗﯧﺘﯩﻢ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺵ ﻳﯜﺯ ﺑﯧﺮﯨﭗ ﺑﻮﻟﺪﻯ..... ﺑﯩﺮﺍﻕ ﺑﻪﺵ ﺑﺎﻝ ﺋﻪﺗﺮﺍﭘﯩﺪﯨﻜﻰ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺷﻠﻪﺭ ﻳﻪﻧﻪ ﻳﯜﺯ ﺑﯧﺮﯨﺸﻰ ﻣﯘﻣﻜﯩﻦ.... ﮬﺎﺯﯨﺮ ﺩﻩﺳﻠﻪﭘﻜﻰ ﺋﯧﻨﯩﻘﻼﺷﻼﺭﺩﺍ ﺑﯩﯟﺍﺳﺘﻪ ﺋﯩﻘﺘﯩﺴﺎﺩﯨﻲ ﺯﯨﻴﺎﻧﻨﯩﯔ 30 ﻣﯩﻠﻴﻮﻥ ﺧﻪﻟﻖ ﭘﯘﻟﻰ ﺋﻪﺗﺮﺍﭘﯩﺪﺍ ﺋﯩﻜﻪﻧﻠﯩﻜﻰ ﻣﯚﻟﭽﻪﺭﻟﻪﻧﺪﻯ.

"ﮬﺎﺯﯨﺮﻏﯩﭽﻪ 90 ﻧﻪﭼﭽﻪ ﻗﯧﺘﯩﻢ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺵ ﻳﯜﺯ ﺑﯧﺮﯨﭗ ﺑﻮﻟﺪﻯ. ﺋﻪﯓ ﻛﯜﭼﻠﯜﻛﻰ ﺑﯜﮔﯜﻥ ﭼﯜﺷﺘﯩﻦ ﻛﯩﻴﯩﻦ ﻳﯜﺯ ﺑﻪﺭﮔﻪﻥ 5.1 ﺑﺎﻝ ﻳﻪﺭ ﺗﻪﯞﺭﻩﺵ. ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺷﻠﻪﺭ ﻳﻪﻧﻪ ﻳﯜﺯ ﺑﯧﺮﯨﺸﻰ ﻣﯘﻣﻜﯩﻦ. ﺑﯩﺰﻧﯩﯔ ﻗﯩﻴﺎﺱ ﻗﯩﻠﯩﺸﯩﻤﯩﺰﭼﻪ ﺋﻪﯓ ﻛﯜﭼﻠﯜﻙ ﺑﻮﻟﻐﺎﻧﺪﯨﻤﯘ ﺑﯜﮔﯜﻥ ﺋﻪﺗﯩﮕﻪﻥ ﻳﯜﺯ ﺑﻪﺭﮔﻪﻥ 6.1 ﺑﺎﻝ ﻳﻪﺭ ﺗﻪﯞﺭﻩﺷﺘﯩﻦ ﺋﯧﺸﯩﭗ ﻛﻪﺗﻤﻪﻳﺪﯗ. ﺑﯩﺮﺍﻕ ﺑﻪﺵ ﺑﺎﻝ ﺋﻪﺗﺮﺍﭘﯩﺪﯨﻜﻰ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺷﻠﻪﺭ ﻳﻪﻧﻪ ﻳﯜﺯ ﺑﯧﺮﯨﺸﻰ ﻣﯘﻣﻜﯩﻦ".

ﺋﺎﭘﻪﺗﺘﻪ ﺧﯧﻠﻰ ﺟﯩﻖ ﺯﯨﻴﺎﻥ ﻛﯚﺭﯛﻟﺪﻯ

ﻟﻰ ﻓﺎﻣﯩﻠﯩﻠﯩﻚ ﻣﻪﺯﻛﯘﺭ ﺧﺎﺩﯨﻢ، ﮬﺎﺯﯨﺮﻏﯩﭽﻪ ﻳﻪﺭ ﺗﻪﯞﺭﻩﺷﺘﻪ ﺋﯚﻟﯜﻡ- ﻳﯩﺘﯩﻢ ﮬﺎﺩﯨﺴﯩﻠﯩﺮﯨﻨﯩﯔ ﻛﯚﺭﯛﻟﻤﯩﮕﻪﻧﻠﯩﻜﯩﻨﻰ، ﻗﯘﺗﻘﯘﺯﯗﺵ ﺧﯩﺰﻣﻪﺗﻠﯩﺮﯨﻨﯩﯔ ﺟﯩﺪﺩﻯ ﺩﺍﯞﺍﻡ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘ ﻳﻪﻧﻪ ﻣﯘﻧﺪﺍﻕ ﺩﯦﺪﻯ:

"ﺋﺎﭘﻪﺗﺘﻪ ﺧﯧﻠﻰ ﺟﯩﻖ ﺯﯨﻴﺎﻥ ﻛﯚﺭﯛﻟﺪﻯ. ﺋﯚﺭﯛﻟﯜﭖ ﭼﯜﺷﻜﻪﻥ ﺋﯚﻳﻠﻪﺭ ﻧﻪﭼﭽﻪ ﺋﻮﻥ ﺋﯧﻐﯩﺰ ﺋﻪﺗﺮﺍﭘﯩﺪﺍ، ﺋﺎﻧﭽﻪ ﻛﯚﭖ ﺋﻪﻣﻪﺱ. ﺋﺎﺳﺎﺳﻠﯩﻘﻰ ﭼﻪﺕ ﻳﯧﺰﯨﻼﺭﺩﯨﻜﻰ ﺩﯦﮭﻘﺎﻥ - ﭼﺎﺭﯞﯨﭽﯩﻼﺭﻧﯩﯔ ﺋﯚﻳﻠﯩﺮﻯ ﺋﯚﺭﯛﻟﺪﻯ. ﺑﯘ ﺋﯚﻳﻠﻪﺭ ﻛﯧﺴﻪﻛﺘﯩﻦ ﺋﺎﺩﺩﯨﻴﻼ ﺳﯧﻠﯩﻨﻐﺎﭼﻘﺎ، ﺋﺎﺳﺎﻧﻼ ﺋﯚﺭﯛﻟﯜﭖ ﭼﯜﺷﻜﻪﻥ. ﺷﻪﮬﻪﺭﮔﻪ ﻳﯧﻘﯩﻦ ﺭﺍﻳﻮﻧﻼﺭﺩﯨﻜﻰ ﺋﯚﻳﻠﻪﺭ ﻳﻪﺭ ﺗﻪﯞﺭﻩﺷﻜﻪ ﺑﻪﺭﺩﺍﺷﻠﯩﻖ ﺑﯧﺮﻩﻟﻪﻳﺪﯨﻐﺎﻥ ﻗﯩﻠﯩﭗ ﺳﯧﻠﯩﻨﻐﺎﭼﻘﺎ، ﺋﺎﻧﭽﻪ ﭼﻮﯓ ﻣﻪﺳﯩﻠﯩﻠﻪﺭ ﻛﯚﺭﯛﻟﻤﯩﺪﻯ. ﺑﯩﺮﺍﻕ ﭼﻪﻙ ﻛﻪﺗﻜﻪﻥ ﺋﯚﻳﻠﻪﺭﻧﯩﯔ ﺳﺎﻧﻰ ﺧﯧﻠﻰ ﺑﺎﺭ، ﺑﯘﻧﻰ ﺩﺍﯞﺍﻣﻠﯩﻖ ﺗﻪﻛﺸﯜﺭﯨﯟﺍﺗﯩﺪﯗ. ﮬﺎﺯﯨﺮ ﺩﻩﺳﻠﻪﭘﻜﻰ ﺋﯧﻨﯩﻘﻼﺷﻼﺭﺩﺍ ﺑﯩﯟﺍﺳﺘﻪ ﺋﯩﻘﺘﯩﺴﺎﺩﯨﻲ ﺯﯨﻴﺎﻧﻨﯩﯔ 30 ﻣﯩﻠﻴﻮﻥ ﺧﻪﻟﻖ ﭘﯘﻟﻰ ﺋﻪﺗﺮﺍﭘﯩﺪﺍ ﺋﯩﻜﻪﻧﻠﯩﻜﻰ ﻣﯚﻟﭽﻪﺭﻟﻪﻧﺪﻯ".

ﺋﯘ، ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﯨﻦ ﺳﯩﺮﺕ، ﺋﺎﻗﺴﯘ ﺷﻪﮬﯩﺮﻯ ﯞﻩ ﻛﻪﻟﭙﯩﻦ، ﺋﺎﯞﺍﺕ، ﺋﻮﻧﺴﯘ، ﺑﺎﻱ ﻧﺎﮬﯩﻴﯩﻠﯩﺮﯨﺪﯨﻜﻰ ﻛﯩﺸﯩﻠﻪﺭﻧﯩﯖﻤﯘ ﻳﻪﺭ ﺗﻪﯞﺭﻩﺷﻨﻰ ﻛﯜﭼﻠﯜﻙ ﮬﯩﺲ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘ ﻳﻪﻧﻪ ﺗﻪﯞﺭﻩﺵ ﻣﻪﺭﻛﯩﺰﯨﮕﻪ ﺋﻪﯓ ﻳﯧﻘﯩﻦ ﺑﻮﻟﻐﺎﻥ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﻨﯩﯔ ﺋﺎﭘﻪﺗﻜﻪ ﮬﻪﻣﻤﯩﺪﯨﻦ ﻗﺎﺗﺘﯩﻖ ﺋﯘﭼﺮﯨﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ.

ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺑﯩﺰ، ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﯨﻜﻰ ﺋﻪﮬﯟﺍﻟﻼﺭﻧﻰ ﺋﯩﮕﯩﻠﻪﺵ ﺋﯜﭼﯜﻥ، ﻳﯧﺰﯨﻠﯩﻖ ﮬﯚﻛﯜﻣﻪﺕ ﺑﯩﻠﻪﻥ ﺋﺎﻻﻗﯩﻼﺷﺘﯘﻕ . ﺑﯩﺮﺍﻕ، ﻳﯧﺰﯨﻠﯩﻖ ﮬﯚﻛﯜﻣﻪﺗﻨﯩﯔ ﺋﺎﻻﻗﯩﺪﺍﺭ ﺋﻪﻣﻪﻟﺪﺍﺭﻯ، ﺑﯘ ﮬﻪﻗﺘﻪ ﻣﻪﻟﯘﻣﺎﺕ ﺑﯧﺮﯨﺸﻨﻰ ﺭﻩﺕ ﻗﯩﻠﺪﻯ.

ﺳﯩﺮﺗﺘﺎ ﻳﯧﺘﯩﺸﻘﺎ ﻣﻪﺟﺒﯘﺭ ﺑﻮﻟﯩﯟﺍﺗﯩﻤﯩﺰ

ﮬﯚﻛﯜﻣﻪﺕ ﺗﯧﺨﻰ ﺑﯘ ﻳﻪﺭﮔﻪ ﮬﺎﻝ ﺳﻮﺭﯨﻐﯩﻠﻰ ﻛﯧﻠﯩﭗ ﺑﻮﻻﻟﻤﯩﺪﻯ..... ﺑﯩﺮﻩﺭﺳﻰ ﺗﯧﺨﻰ ﻛﯧﻠﯩﭗ ﻧﯧﻤﻪ ﺑﻮﻟﺪﻯ ﺩﻩﭖ ﺑﻮﻻﻟﻤﯩﺪﻯ

ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﻨﯩﯔ ﻣﻪﻟﯘﻡ ﻛﻪﻧﺘﯩﺪﯨﻜﻰ ﺑﯩﺮ ﺩﯦﮭﻘﺎﻥ ﻛﯩﺸﻰ، ﻳﻪﺭ ﺗﻪﯞﺭﻩﺷﺘﻪ ﺋﯚﺯ ﻛﻪﻧﺘﯩﺪﻩ ﮬﯧﭽﻘﺎﻧﺪﺍﻕ ﺋﯚﻟﯜﻡ- ﻳﯧﺘﯩﻢ ﯞﻩﻗﻪﻟﯩﺮﯨﻨﯩﯔ ﻳﯜﺯ ﺑﻪﺭﻣﯩﮕﻪﻧﻠﯩﻜﯩﻨﻰ، ﺑﯩﺮﺍﻕ ﺋﯚﺯﻟﯩﺮﯨﻨﯩﯔ ﻧﯚﯞﻩﺗﺘﻪ ﺗﻪﺷﯟﯨﺶ ﺋﯩﭽﯩﺪﻩ ﺋﯚﻳﻠﯩﺮﯨﮕﻪ ﻛﯩﺮﻩﻟﻤﻪﻱ ﺳﯩﺮﺗﺘﺎ ﻳﯧﺘﯩﺸﻘﺎ ﻣﻪﺟﺒﯘﺭ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘ ﻳﻪﺭ ﺗﻪﺷﺮﻩﺷﻨﯩﯔ ﻛﯧﭽﻪ ﺳﺎﺋﻪﺕ ﺑﻪﺵ ﻳﯧﺮﯨﻤﺪﺍ ﻳﯜﺯ ﺑﻪﺭﮔﻪﻧﻠﯩﻜﯩﻨﻰ، ﻛﯧﭽﻪ ﺑﻮﻟﻐﺎﭼﻘﺎ ﻛﯩﺸﯩﻠﻪﺭﻧﯩﯔ ﺗﻪﺷﯟﯨﺸﻠﯩﻨﯩﭗ، ﺑﺎﻟﯩﻼﺭﻧﯩﯔ ﻗﻮﺭﻗﯘﭖ ﭼﯩﺮﻗﯩﺮﯨﺸﯩﭗ ﻛﻪﺗﻜﻪﻧﻠﯩﻜﯩﻨﻰ، ﻛﯧﭽﯩﻨﻰ ﺗﺎﻻﺩﺍ ﺗﯜﻧﻪﭖ ﺋﯚﺗﻜﯜﺯﮔﻪﻧﻠﯩﻜﯩﻨﻰ، ﻗﺎﺭ ﻳﺎﻏﻘﺎﻥ ﺑﻮﻟﻐﺎﭼﻘﺎ ﺳﻮﻏﯘﻗﺘﺎ ﻗﺎﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﯩﺘﺎﻱ ﻣﻪﺭﻛﯩﺰﻯ ﺗﯧﻠﯧﯟﯨﺰﯨﻴﻪ ﺋﯩﺴﺘﺎﻧﺴﯩﺴﯩﻨﯩﯔ ﺋﻪﯓ ﻳﯧﯖﻰ ﺧﻪﯞﯨﺮﯨﺪﻩ، ﺋﯘﻳﻐﯘﺭ ﺋﺎﭘﺘﻮﻧﯘﻡ ﺭﺍﻳﻮﻧﻠﯘﻕ ﺧﻪﻟﻖ ﺋﯩﺸﻠﯩﺮﻯ ﻧﺎﺯﺍﺭﯨﺘﯩﻨﯩﯔ ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺭﺍﻳﻮﻧﻐﺎ 100 ﺩﻩﻙ ﻗﯩﺸﻠﯩﻖ ﭼﯧﺪﯨﺮ ﺋﻪﯞﻩﺗﯩﭗ ﺑﻪﺭﮔﻪﻧﻠﯩﻜﯩﻨﻰ، ﺑﯩﺮﻣﯘ ﻛﯩﺸﯩﻨﯩﯔ ﺗﺎﻻﺩﺍ ﻗﺎﻟﻤﯩﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﺑﯩﺮﺍﻕ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﯨﻜﻰ ﺑﯘ ﻛﯩﺸﻰ، ﺋﯘﻻﺭﻧﯩﯔ ﻛﻪﻧﺘﯩﮕﻪ ﺗﯧﺨﻰ ﮬﯧﭽﻘﺎﻧﺪﺍﻕ ﻳﺎﺭﺩﻩﻣﻨﯩﯔ ﻳﯩﺘﯩﭗ ﻛﻪﻟﻤﯩﮕﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﯨﻜﻰ 40 ﻳﺎﺷﻼﺭ ﺋﻪﺗﺮﺍﭘﯩﺪﯨﻜﻰ ﻳﻪﻧﻪ ﺑﯩﺮ ﺩﯦﮭﻘﺎﻥ ﻛﯩﺸﻰ ﺑﻮﻟﺴﺎ، ﻧﯚﯞﻩﺗﺘﻪ ﺋﯘﻻﺭﻧﯩﯔ ﻛﻪﻧﺘﯩﺪﻩ ﻗﺎﺭ ﻳﯧﻐﯩﯟﺍﺗﻘﺎﻧﻠﯩﻘﯩﻨﻰ، ﻛﻪﻧﺘﻠﯩﻚ ﮬﯚﻛﯜﻣﻪﺕ ﻳﻪﻧﻪ ﻳﻪﺭ ﺗﻪﯞﺭﻩﺵ ﺋﯧﮭﺘﯩﻤﺎﻟﻠﯩﻘﻰ ﺑﺎﺭﻟﯩﻘﻰ ﮬﻪﻗﻘﯩﺪﻩ ﺋﯘﻗﺘﯘﺭﻏﺎﻧﻠﯩﻘﻰ ﺋﯜﭼﯜﻥ، ﻧﯘﺭﻏﯘﻥ ﻛﯩﺸﯩﻠﻪﺭﻧﯩﯔ ﺳﻮﻏﯘﻗﻘﺎ ﻗﺎﺭﯨﻤﺎﺳﺘﯩﻦ، ﻛﯧﭽﯩﻨﻰ ﺳﯩﺮﺗﺘﺎ ﺋﯚﺗﻜﯜﺯﯨﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻳﻪﺭﻟﯩﻚ ﮬﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﯞﻩ ﺋﺎﮬﺎﻟﯩﻠﻪﺭﺩﯨﻦ ﺋﯩﮕﯩﻠﯩﺸﯩﻤﯩﺰﮔﻪ ﻗﺎﺭﯨﻐﺎﻧﺪﺍ، ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﯨﻦ ﺳﯩﺮﺕ، ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﻨﯩﯔ ﺋﯩﻤﺎﻣﻠﯩﺮﯨﻢ ﻳﯧﺰﯨﺴﻰ ﯞﻩ ﻳﺎﻣﺎﻧﺴﯘ ﻳﯧﺰﯨﻠﯩﺮﯨﻤﯘ ﺋﺎﭘﻪﺗﻨﯩﯔ ﺗﻪﺳﯩﺮﯨﮕﻪ ﺑﯩﺮ ﻗﻪﺩﻩﺭ ﺋﯧﻐﯩﺮ ﺋﯘﭼﺮﯨﻐﺎﻥ. ﻳﺎﻣﺎﻧﺴﯘ ﻳﯧﺰﯨﺴﯩﺪﺍ 280 ﺩﻩﻙ ﺋﺎﺋﯩﻠﯩﻠﯩﻜﻨﯩﯔ ﺋﯚﻳﯩﮕﻪ ﭼﺎﻙ ﻛﻪﺗﻜﻪﻥ.

ﺋﯩﻜﻜﻰ ﻳﯩﻞ ﺋﺎﯞﯞﺍﻝ، ﺋﻮﺧﺸﺎﺷﻼ ﻓﯧﯟﺭﺍﻝ ﺋﯧﻴﯩﺪﺍ ﻗﻪﺷﻘﻪﺭﻧﯩﯔ ﻣﺎﺭﺍﻟﺒﯧﺸﻰ ﯞﻩ ﭘﻪﻳﺰﯨﯟﺍﺕ ﻧﺎﮬﯩﻴﯩﻠﯩﺮﯨﺪﻩ 6.8 ﺑﺎﻝ ﻳﻪﺭ ﺗﻪﯞﺭﻩﭖ، ﺋﺎﺯ ﺩﯦﮕﻪﻧﺪﻩ 260 ﺩﯨﻦ ﺋﺎﺭﺗﯘﻕ ﺋﺎﺩﻩﻣﻨﯩﯔ ﺋﯚﻟﯜﺷﯩﻨﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﺋﯩﺪﻯ. ﺑﯘ ﻗﯧﺘﯩﻢ ﻳﻪﺭ ﺗﻪﯞﺭﻩﺵ ﻳﯜﺯ ﺑﻪﺭﮔﻪﻥ ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ 180 ﻣﯩﯔ ﺋﺎﮬﺎﻟﻪ ﺑﺎﺭ ﺑﻮﻟﯘﭖ، ﺋﯘﻻﺭﻧﯩﯔ ﻛﯚﭘﯩﻨﭽﯩﺴﻰ ﺋﯘﻳﻐﯘﺭﻻﺭ. (ﺋﺎﺭﺯﯗ)