ﺋﯘﭼﺘﯘﺭﭘﺎﻧﺪﯨﻜﻰ ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺧﻪﻟﻘﻠﻪﺭ ﻗﯩﻴﯩﻨﭽﯩﻠﯩﻘﻘﺎ ﺋﯘﭼﺮﯨﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﺋﺎﺭﺯﯗﻧﯩﯔ ﺑﯘ ﮬﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

15 - ﻓﯩﯟﺭﺍﻝ ﻛﯜﻧﻰ ﺋﻪﺗﯩﮕﻪﻥ ﺳﺎﺋﻪﺕ ﺑﻪﺵ ﻳﯧﺮﯨﻤﻼﺭﺩﺍ ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ ﻗﺎﺗﺘﯩﻖ ﻳﻪﺭ ﺗﻪﯞﺭﯨﮕﻪﻥ ﺋﯩﺪﻯ. ﻳﻪﺭ ﺗﻪﯞﺭﻩﺷﺘﻪ ﮬﯧﭽﻘﺎﻧﺪﺍﻕ ﺋﺎﺩﻩﻡ ﺯﯨﻴﺎﻥ- ﺯﻩﺧﻤﻪﺗﻜﻪ ﺋﯘﭼﺮﯨﻤﯩﻐﺎﻥ. ﺑﯩﺮﺍﻕ ﻳﯧﯖﻰ ﺋﺎﯞﺍﺕ ، ﺋﯩﻤﺎﻣﻠﯩﺮﯨﻢ ﯞﻩ ﻳﺎﻣﺎﻧﺴﯘ ﻳﯧﺰﯨﺴﯩﺪﯨﻜﻰ ﻧﯘﺭﻏﯘﻥ ﺋﺎﮬﺎﻟﯩﻠﻪﺭ ﺋﻮﺧﺸﺎﺵ ﺑﻮﻟﻤﯩﻐﺎﻥ ﺩﻩﺭﯨﺠﯩﺪﻩ ﺋﺎﭘﻪﺗﻨﯩﯔ ﺗﻪﺳﯩﺮﯨﮕﻪ ﺋﯘﭼﺮﯨﻐﺎﻥ ﺑﻮﻟﯘﭖ، ﺑﻪﺯﻯ ﺋﺎﺋﯩﻠﯩﻠﯩﻜﻠﻪﺭﻧﯩﯔ ﺋﯚﻳﻰ ﺋﯚﺭﯛﻟﯜﭖ ﭼﯜﺷﻜﻪﻥ. ﺑﻪﺯﯨﻠﯩﺮﯨﻨﯩﯔ ﺋﯚﻳﯩﮕﻪ ﺑﻮﻟﺴﺎ ﭼﺎﻙ ﻛﻪﺗﻜﻪﻥ.

ﻳﻪﺭ ﺗﻪﯞﺭﻩﺵ ﺋﺎﭘﯩﺘﻰ ﻳﯜﺯ ﺑﻪﺭﮔﻪﻧﺪﯨﻦ ﻛﯩﻴﯩﻦ، ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﻯ ﺑﻪﺱ- ﺑﻪﺳﺘﻪ ﺧﻪﯞﻩﺭ ﺑﯧﺮﯨﭗ، ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺭﺍﻳﯘﻧﻼﺭﺩﯨﻜﻰ ﺧﻪﻟﻘﻠﻪﺭﻧﯩﯔ ﺗﯘﺭﻣﯘﺷﻰ ﯞﻩ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﻪﮬﯟﺍﻟﻠﯩﺮﯨﻨﻰ ﺗﻮﻧﯘﺷﺘﯘﺭﻏﺎﻥ.

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﺪﺍ

ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺧﻪﻟﻖ ﺑﺎﺭﻻ ﻳﻪﺭﺩﻩ ﮬﯚﻛﯜﻣﻪﺕ ﻛﺎﺩﯨﺮﻟﯩﺮﻯ ﺋﯘﻻﺭ ﺑﯩﻠﻪﻥ ﺑﯩﻠﻠﻪ.

"ﺷﯩﻨﺨﯘﺋﺎ ﺗﻮﺭ ﺑﯧﺘﻰ" ﭼﺎﺭﺷﻪﻧﺒﻪ ﻛﯜﻧﻰ ﺑﻪﺭﮔﻪﻥ ﺧﻪﯞﯨﺮﯨﺪﻩ، "ﻣﯘﺧﺒﯩﺮﯨﻤﯩﺰ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﺍ ﺧﻪﻟﻘﻠﻪﺭﻧﯩﯔ ﺗﯘﺭﻣﯘﺷﻠﯩﺮﯨﻨﯩﯔ ﺋﯩﻠﮕﯩﺮﯨﻜﯩﺪﻩﻛﻼ ﻧﻮﺭﻣﺎﻝ ﺩﺍﯞﺍﻡ ﺋﯩﺘﯩﯟﺍﺗﻘﺎﻧﻠﯩﻘﯩﻨﻰ ﻛﯚﺭﺩﻯ. ﭼﺎﺭﯞﯨﭽﯩﻼﺭ ﻳﻪﻧﯩﻼ ﺋﺎﭘﺘﺎﭘﺘﺎ ﻗﻮﻳﻠﯩﺮﯨﻨﻰ ﺑﻮﺩﺍﯞﯦﺘﯩﭙﺘﯘ. ﻳﺎﺷﺎﻧﻐﺎﻧﻼﺭ ﺑﻮﻟﺴﺎ ﻳﻮﻝ ﺑﻮﻳﻠﯩﺮﯨﺪﺍ ﭘﺎﺭﺍﯕﻠﯩﺸﯩﯟﯦﺘﯩﭙﺘﯘ. ﺋﯘﻻﺭﻧﯩﯔ ﺗﯘﺭﻣﯘﺷﻰ ﻧﻮﺭﻣﺎﻝ ﻛﯧﺘﯩﯟﯦﺘﯩﭙﺘﯘ"، ﺩﯦﻴﯩﻠﮕﻪﻥ.

ﺧﻪﯞﻩﺭﺩﻩ ﻳﻪﻧﻪ، ﺋﯘﭼﺘﯘﺭﭘﺎﻥ ﻧﺎﮬﯩﻴﯩﻠﯩﻚ ﮬﻪﺭ ﻗﺎﻳﺴﻰ ﺗﺎﺭﻣﺎﻗﻼﺭ ﯞﻩ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﯨﻜﻰ ﺧﯩﺰﻣﻪﺗﭽﻰ ﺧﺎﺩﯨﻤﻼﺭﻧﯩﯔ ﻧﻪﻕ ﻣﻪﻳﺪﺍﻧﺪﯨﻜﻰ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻐﺎ ﻗﺎﺗﻨﯩﺸﯩﯟﺍﺗﻘﺎﻧﻠﯩﻘﯩﻨﻰ، ﻳﻪﺭ ﺗﻪﯞﺭﻩﺷﺘﻪ ﺋﯚﺭﯛﻟﯜﭖ ﭼﯜﺷﻜﻪﻥ ﯞﻩ ﻳﺎﻛﻰ ﭼﺎﻙ ﻛﻪﺗﻜﻪﻥ ﺋﯚﻳﻠﻪﺭﺩﯨﻜﻰ ﺋﺎﮬﺎﻟﯩﻠﻪﺭﻧﯩﯔ ﺧﯘﻟﯘﻡ- ﺧﻮﺷﻨﯩﻼﺭﻧﯩﯔ ﺋﯚﻳﻠﯩﺮﯨﮕﻪ ﯞﻩ ﻗﯩﺸﻠﯩﻖ ﭼﯧﺪﯨﺮﻻﺭﻏﺎ ﻳﯚﺗﻜﻪﻟﮕﻪﻧﻠﯩﻜﯩﻨﻰ ﺑﯩﻠﺪﯛﺭﯛﭖ، ﺋﺎﭘﻪﺕ ﺭﺍﻳﻮﻧﯩﺪﺍ ﺑﯩﺮﻣﯘ ﻛﯩﺸﻰ ﺳﯩﺮﺗﺘﺎ ﻗﺎﻟﯩﺪﯨﻐﺎﻥ ﯞﻩ ﻳﺎﻛﻰ ﺧﻪﺗﻪﺭﻟﯩﻚ ﭼﺎﻙ ﻛﻪﺗﻜﻪﻥ ﺋﯚﻳﻠﻪﺭﺩﻩ ﺗﯜﻧﻪﻳﺪﯨﻐﺎﻥ ﺋﻪﮬﯟﺍﻟﻼﺭ ﻛﯚﺭﯛﻟﻤﯩﮕﻪﻧﻠﯩﻜﯩﻨﻰ ﻣﻪﻟﯘﻡ ﻗﯩﻠﺪﻯ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ: ﺋﺎﭘﻪﺗﻜﻪ ﺋﯘﭼﺮﯨﻐﺎﻧﻼﺭ ﺗﻪﻝ ﺗﯚﻛﯜﺱ ﺋﻮﺭﯗﻧﻼﺷﺘﯘﺭﯗﻟﺪﻯ

ﺑﯩﺰ ﺧﻪﻟﻘﻨﯩﯔ ﺋﺎﭘﻪﺗﻜﻪ ﺋﯘﭼﺮﺍﺵ ﺋﻪﮬﯟﺍﻟﻰ ﯞﻩ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﻯ ﮬﻪﻗﻘﯩﺪﻩ ﺗﯧﺨﯩﻤﯘ ﺋﯩﻠﮕﯩﺮﻟﯩﮕﻪﻥ ﮬﺎﻟﺪﺍ ﻣﻪﻟﯘﻣﺎﺕ ﺋﯩﮕﯩﻠﻪﺵ ﺋﯜﭼﯜﻥ، ﺋﯘﭼﺘﯘﺭﭘﺎﻥ ﻧﺎﮬﯩﻴﯩﻠﯩﻚ ﭘﺎﺭﺗﻜﻮﻡ ﺋﯩﺸﺨﺎﻧﯩﺴﯩﻐﺎ ﺗﯧﻠﯧﻔﻮﻥ ﻗﯩﻠﻐﯩﻨﯩﻤﯩﺰﺩﺍ، ﺑﯩﺮ ﻣﻪﺳﺌﯘﻝ ﺧﺎﺩﯨﻢ ﻧﯚﯞﻩﺗﺘﻪ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻨﯩﯔ ﺟﯩﺪﺩﻯ ﺩﺍﯞﺍﻡ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﯘﻧﯩﯔ ﺋﯧﻴﺘﯩﺸﯩﭽﻪ، ﻧﯚﯞﻩﺗﺘﻪ ﺋﯘﭼﺘﯘﺭﭘﺎﻥ ﻧﺎﮬﯩﻴﯩﻠﯩﻚ ﭘﺎﺭﺗﻜﻮﻡ ﯞﻩ ﮬﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺑﺎﺭﻟﯩﻖ ﺧﻪﻟﻘﻠﻪﺭﻧﻰ ﺗﻪﻝ ﺗﯚﻛﯜﺱ ﺋﻮﺭﯗﻧﻼﺷﺘﯘﺭﯗﭖ ﺑﻮﻟﻐﺎﻥ. ﺋﯘ ﺳﯚﺯﯨﺪﻩ، ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺧﻪﻟﻖ ﺑﺎﺭﻻ ﻳﻪﺭﺩﻩ ﮬﯚﻛﯜﻣﻪﺕ ﻛﺎﺩﯨﺮﻟﯩﺮﯨﻨﯩﯔ، ﺋﯘﻻﺭ ﺑﯩﻠﻪﻥ ﺑﯩﻠﻠﻪ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘ ﻳﻪﻧﻪ، ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺧﻪﻟﻘﻨﯩﯔ ﺋﯩﺴﺴﯩﻨﯩﺶ، ﻳﯩﻤﻪﻙ- ﺋﯩﭽﻤﻪﻙ ﯞﻩ ﺗﯘﺭﺍﻟﻐﯘ ﺟﺎﻱ ﻣﻪﺳﯩﻠﯩﺴﯩﻨﯩﯔ ﭘﯜﺗﯜﻧﻠﻪﻱ ﮬﻪﻝ ﺑﻮﻟﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ.

ﺋﯘﻧﯩﯔ ﺑﯩﻠﺪﯛﺭﯛﺷﯩﭽﻪ، ﺋﺎﻗﺴﯘ ﯞﯨﻼﻳﻪﺗﻠﯩﻚ ﺧﻪﻟﻖ ﺋﯩﺸﻠﯩﺮﻯ ﺋﯩﺪﺍﺭﯨﺴﻰ ﺋﻪﯞﻩﺗﻜﻪﻥ ﭼﯧﺪﯨﺮ، ﺋﯘﻥ، ﮔﯜﺭﯛﭺ ، ﻛﯚﻣﯜﺭﮔﻪ ﺋﻮﺧﺸﺎﺵ ﻳﺎﺭﺩﻩﻡ ﺑﻮﻳﯘﻣﻠﯩﺮﻯ ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺧﻪﻟﻘﻘﻪ ﻳﻪﺗﻜﯜﺯﯛﻟﮕﻪﻥ. ﺑﯩﺮﺍﻕ، ﺋﯘ ﻗﺎﻧﭽﯩﻠﯩﻚ ﻳﺎﺭﺩﻩﻡ ﺑﻮﻳﯘﻣﻠﯩﺮﯨﻨﯩﯔ ﺗﺎﺭﻗﯩﺘﯩﻠﻐﺎﻧﻠﯩﻘﻰ ﮬﻪﻗﻘﯩﺪﻩ ﺗﯧﺨﻰ ﺋﯧﻨﯩﻖ ﻣﻪﻟﯘﻣﺎﺗﻨﯩﯔ ﻳﻮﻗﻠﯩﻘﯩﻨﻰ ﺋﯩﻴﺘﺘﻰ.

ﺋﯚﺯﯨﻤﯩﺰﻧﯩﯔ ﻛﯩﮕﯩﺰﻟﯩﺮﯨﻤﯩﺰﻧﻰ ﺋﺎﭼﯩﻘﯩﭗ، ﺳﯚﮔﻪﺗﻨﯩﯔ ﺑﺎﺩﯨﺮﻟﯩﺮﻯ ﺑﯩﻠﻪﻥ ﭼﯧﺪﯨﺮ ﻳﺎﺳﺎﭖ، ﺩﻩﻛﻜﻪ – ﺩﯛﻛﻜﯩﺪﻩ، ﻳﯜﺭﯨﻜﯩﻤﯩﺰ ﭘﻮﭖ-ﭘﻮﻙ ﮬﺎﻟﺪﺍ ﺋﯘﺧﻠﯩﻤﺎﻱ ﺋﯚﺗﯜﯞﺍﺗﯩﻤﯩﺰ.

ﻳﺎﺭﺩﻩﻡ ﺗﯧﺨﻰ ﻛﻪﻟﻤﯩﺪﻯ

ﺋﯘﻧﺪﺍﻗﺘﺎ، ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﯨﻜﻰ ﺋﺎﭘﻪﺗﻜﻪ ﺋﯘﭼﺮﯨﻐﺎﻥ ﺧﻪﻟﻘﻠﻪﺭ ﮬﻪﻗﯩﻘﻪﺗﻪﻥ ﻛﯧﺮﻩﻛﻠﯩﻚ ﻳﺎﺭﺩﻩﻣﻠﻪﺭﮔﻪ ﺋﯧﺮﯨﺸﯩﭗ، ﺗﯘﺭﻣﯘﺷﻠﯩﺮﯨﻨﻰ ﺋﻮﺭﯗﻧﻼﺷﺘﯘﺭﯨﯟﺍﻟﺪﯨﻤﯘ؟

ﺑﯩﺰ ﺑﯘ ﮬﻪﻗﺘﻪ ﻣﻪﻟﯘﻣﺎﺕ ﺋﯩﮕﯩﻠﻪﺵ ﺋﯜﭼﯜﻥ ﻳﻪﺭ ﺗﻪﯞﺭﻩﺵ ﺋﺎﭘﯩﺘﯩﻨﯩﯔ ﺋﻪﯓ ﺋﯧﻐﯩﺮ ﺯﻩﺭﺑﯩﺴﯩﮕﻪ ﺋﯘﭼﺮﯨﻐﺎﻥ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﺪﯨﻜﻰ ﻛﯩﺸﯩﻠﻪﺭﮔﻪ ﺗﯧﻠﯩﻔﻮﻥ ﻗﯩﻠﺪﯗﻕ. ﺯﯨﻴﺎﺭﯨﺘﯩﻤﯩﺰﻧﻰ ﻗﯘﺑﯘﻝ ﻗﯩﻠﻐﺎﻥ ﺑﯩﺮ ﻛﯩﺸﻰ، ﻳﻪﺭ ﺗﻪﯞﺭﻩﺵ ﺋﺎﭘﯩﺘﻰ ﻳﯜﺯ ﺑﻪﺭﮔﯩﻠﻰ ﺋﯩﻜﻜﻰ ﻛﯜﻥ ﺑﻮﻟﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘﻻﺭﻧﯩﯔ ﻛﻪﻧﺘﯩﮕﻪ ﮬﯧﭽﻘﺎﻧﺪﺍﻕ ﻳﺎﺭﺩﻩﻣﻨﯩﯔ ﻳﯩﺘﯩﭗ ﻛﻪﻟﻤﯩﮕﻪﻧﻠﯩﻜﯩﻨﻰ، ﻛﻪﻧﺖ ﺭﻩﮬﺒﯩﺮﯨﻨﯩﯔ ﻛﯧﻠﯩﭗ ﭼﺎﻙ ﻛﻪﺗﻜﻪﻥ ﺋﯚﻳﻠﻪﺭﻧﻰ ﺗﯩﺰﯨﻤﻼﭖ ﻛﻪﺗﻜﻪﻧﺪﯨﻦ ﺑﺎﺷﻘﺎ ﺩﯦﮭﻘﺎﻧﻼﺭﻧﯩﯔ ﮬﺎﻟﻰ ﺑﯩﻠﻪﻥ ﻛﺎﺭﻯ ﺑﻮﻟﻤﯩﻐﺎﻧﻠﯩﻘﻰ ﯞﻩ ﺩﯦﮭﻘﺎﻧﻼﺭﻧﯩﯔ ﻧﺎﮬﺎﻳﯩﺘﻰ ﻧﺎﺭﺍﺯﻯ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺋﯘ ﻳﻪﻧﻪ، ﺋﯚﺯﯨﻨﯩﯔ ﺋﯩﻜﻜﻰ ﺋﯧﻐﯩﺰ ﺋﯚﻳﻰ ﯞﻩ ﻗﻮﺗﺎﻧﻠﯩﺮﯨﻨﯩﯔ ﺳﻪﻳﺸﻪﻧﺒﻪ ﻛﯜﻧﯩﺪﯨﻜﻰ ﻳﻪﺭ ﺗﻪﯞﺭﻩﺷﺘﻪ ﺋﺎﻣﺎﻥ- ﺋﯩﺴﻪﻥ ﻗﺎﻟﻐﺎﻥ ﺑﯩﻠﻪﻥ، ﺋﯘﻧﯩﯖﺪﯨﻦ ﻛﯧﻴﯩﻨﻜﻰ ﻳﺎﻗﻘﺎﻥ ﻗﺎﺭ ﯞﻩ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺵ ﺳﻪﯞﻩﺑﯩﺪﯨﻦ ﺑﯜﮔﯜﻥ ﺋﯚﺭﯛﻟﯜﭖ ﭼﯜﺷﻜﻪﻧﻠﯩﻜﯩﻨﻰ، ﻗﺎﺭﻧﯩﯔ 20 ﺳﺎﻧﺘﯧﻤﯧﺘﺮ ﺋﻪﺗﺮﺍﭘﯩﺪﺍ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺳﻪﻳﺸﻪﻧﺒﻪ ﻛﯜﻧﻰ ﺋﻪﺗﯩﮕﻪﻥ ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ ﻳﯜﺯ ﺑﻪﺭﮔﻪﻥ 6.2 ﺑﺎﻝ ﻳﻪﺭ ﺗﻪﯞﺭﻩﺷﻨﯩﯔ ﺗﻪﺳﯩﺮﯨﮕﻪ ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﻨﯩﯔ ﺑﺎﺷﻘﺎ ﻳﯧﺰﯨﻠﯩﺮﯨﻤﯘ ﺋﻮﺧﺸﺎﺵ ﺑﻮﻟﻤﯩﻐﺎﻥ ﺩﻩﺭﯨﺠﯩﺪﻩ ﺋﯘﭼﺮﯨﻐﺎﻥ.

ﺋﯚﺯﯨﻤﯩﺰ ﻛﯧﮕﯩﺰﺩﻩ ﭼﯧﺪﯨﺮ ﻗﯘﺭﯗﭖ ﺗﯜﻧﻪﯞﺍﺗﯩﻤﯩﺰ

ﺋﯚﺯﻟﯩﺮﯨﻤﯩﺰﮔﻪ ﭼﻪﻙ ﻛﻪﺗﺘﻰ. ﺷﯘﻧﺪﺍﻗﺘﯩﻤﯘ ﮬﺎﯞﺍ ﺳﻮﻏﯘﻕ ﺑﻮﻟﻐﺎﭼﻘﺎ ﺷﯘ ﺋﯚﻳﻠﻪﺭﺩﻩ ﻳﯧﺘﯩﺸﻘﺎ ﻣﻪﺟﺒﯘﺭ ﺑﻮﻟﺪﯗﻕ.

ﺋﯩﻤﺎﻣﻠﯩﺮﯨﻢ ﻳﯧﺰﯨﺴﯩﺪﯨﻜﻰ ﺑﯩﺮ ﺩﯦﮭﻘﺎﻥ ﺋﺎﻳﺎﻝ، ﺋﯚﺯﻟﯩﺮﯨﻨﯩﯔ ﺋﯚﻳﻠﯩﺮﯨﮕﯩﻤﯘ ﭼﺎﻙ ﻛﻪﺗﻜﻪﻧﻠﯩﻜﯩﻨﻰ، ﺑﯩﺮﺍﻕ ﺳﯩﺮﺕ ﺳﻮﻏﯘﻕ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ، ﭼﺎﻙ ﻛﻪﺗﻜﻪﻥ ﺧﻪﺗﻪﺭﻟﯩﻚ ﺋﯚﻳﻠﻪﺭﺩﻩ ﺗﯜﻧﻪﺷﻜﻪ ﻣﻪﺟﺒﯘﺭ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﯛﭖ، ﺋﯚﺯﻟﯩﺮﯨﻨﯩﯔ ﻛﯧﮕﯩﺰﻟﻪﺭ ﺑﯩﻠﻪﻥ ﭼﯧﺪﯨﺮ ﻗﯘﺭﯗﭖ، ﺳﯩﺮﺗﺘﺎ ﺋﯘﺧﻠﯩﻤﺎﻱ ﺋﯚﺗﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﯘﭼﺘﯘﺭﭘﺎﻥ ﻳﺎﻣﺎﻧﺴﯘ ﻳﯧﺰﯨﺴﯩﺪﯨﻜﻰ ﺑﯩﺮ ﻗﯩﺴﯩﻢ ﺋﺎﮬﺎﻟﯩﻠﻪﺭﺩﯨﻦ ﺋﯩﮕﯩﻠﯩﺸﯩﻤﯩﺰﭼﻪ، ﺋﯘﻻﺭﻧﯩﯔ ﻳﯧﺰﯨﺴﯩﺪﺍ ﺑﯩﺮ ﻧﻪﭼﭽﻪ ﻳﯩﻠﺪﯨﻦ ﺑﻮﻳﺎﻥ ﻳﻪﺭ ﺗﻪﯞﺭﻩﺷﻜﻪ ﺑﻪﺭﺩﺍﺷﻠﯩﻖ ﺑﯧﺮﻩﻟﻪﻳﺪﯨﻐﺎﻥ ﺑﻪﺵ - ﺋﺎﻟﺘﻪ ﻳﯜﺯ ﻳﯜﺭﯛﺷﺘﻪﻙ ﺋﯚﻱ ﺳﯧﻠﯩﻨﻐﺎﭼﻘﺎ ﯞﻩ ﻗﯘﺭﺑﯩﺘﻰ ﻳﻪﺗﻜﻪﻧﻠﻪﺭ ﻟﯩﻤﻠﯩﻖ ﺋﯚﻳﻠﻪﺭﻧﻰ ﺳﯧﻠﯩﯟﺍﺗﻘﺎﭼﻘﺎ، ﺋﯘﻻﺭﻧﯩﯔ ﻳﯧﺰﯨﺴﯩﺪﺍ ﺋﯚﻳﻠﯩﺮﻯ ﭼﯜﺷﯜﭖ ﻛﯧﺘﯩﺪﯨﻐﺎﻥ ﯞﻩ ﭼﺎﻙ ﻛﯧﺘﯩﺪﯨﻐﺎﻥ ﺋﻪﮬﯟﺍﻟﻼﺭ ﺑﯩﺮﺍﺯ ﺋﺎﺯ ﻛﯚﺭﯛﻟﮕﻪﻥ.

ﺧﯩﺘﺎﻱ ﺋﯩﺸﻠﻪﭘﭽﯩﻘﯩﺮﯨﺶ ﻗﯘﺭﯗﻟﯘﺵ ﺋﺎﺭﻣﯩﻴﯩﺴﻰ ﺋﯚﻳﻠﯩﺮﻯ ﺋﯘﭼﺮﯨﻐﺎﻥ ﺯﯨﻴﺎﻥ ﺋﺎﺯ ﺑﻮﻟﻐﺎﻥ

ﺳﻪﻳﺸﻪﻧﺒﻪ ﻛﯜﻧﻰ ﺯﯨﻴﺎﺭﯨﺘﯩﻤﯩﺰﻧﻰ ﻗﯘﺑﯘﻝ ﻗﯩﻠﻐﺎﻥ ﺋﺎﻗﺴﯘ ﯞﯨﻼﻳﻪﺗﻠﯩﻚ ﻳﻪﺭ ﺗﻪﯞﺭﻩﺵ ﺋﯩﺪﺍﺭﯨﺴﯩﻨﯩﯔ ﻟﻰ ﻓﺎﻣﯩﻠﯩﻠﯩﻚ ﺑﯩﺮ ﺧﺎﺩﯨﻤﻤﯘ، ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﻰ ﻳﻪﺭ ﺗﻪﯞﺭﻩﺵ ﺑﻪﻟﺒﯩﻐﯩﺪﺍ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ، 1970 - ﻳﯩﻠﻼﺭﺩﯨﻦ ﺑﺎﺷﻼﭖ، ﺑﯘ ﺭﺍﻳﻮﻧﺪﺍ ﻳﻪﺭ ﺗﻪﯞﺭﻩﺷﻜﻪ ﺑﻪﺭﺩﺍﺷﻠﯩﻖ ﺑﯧﺮﻩﻟﻪﻳﺪﯨﻐﺎﻥ ﺋﯚﻳﻠﻪﺭﻧﯩﯔ ﺳﯧﻠﯩﻨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ. ﺋﯘ ﻳﻪﻧﻪ، ﺑﯘ ﻗﯧﺘﯩﻤﻘﻰ ﻳﻪﺭ ﺗﻪﯞﺭﻩﺵ ﺋﺎﭘﯩﺘﯩﮕﻪ ﻗﺎﺗﺘﯩﻖ ﺋﯘﭼﺮﯨﻐﺎﻥ ﺭﺍﻳﻮﻧﺪﯨﻜﻰ ﺧﯩﺘﺎﻱ ﺋﯩﺸﻠﻪﭘﭽﯩﻘﯩﺮﯨﺶ ﻗﯘﺭﯗﻟﯘﺵ ﺋﺎﺭﻣﯩﻴﯩﺴﻰ ﺩﯦﮭﻘﺎﻧﭽﯩﻠﯩﻖ 1 - ﺩﯨﯟﯨﺰﯨﻴﯩﺴﻰ 4 - ﭘﻮﻟﻜﯩﻨﯩﯔ ﺑﯘ ﺧﯩﺰﻣﻪﺗﻠﻪﺭﻧﻰ ﻳﺎﺧﺸﻰ ﺋﯩﺸﻠﯩﮕﻪﻧﻠﯩﻜﻰ ﺋﯜﭼﯜﻥ، ﺋﯘﻻﺭﺩﺍ ﺋﯚﻳﻠﻪﺭﻧﯩﯔ ﺋﯚﺭﯛﻟﯜﺵ ، ﭼﺎﻙ ﻛﯧﺘﯩﺶ ﺋﻪﮬﯟﺍﻟﻠﯩﺮﯨﻨﯩﯔ ﺋﺎﺯ ﻛﯚﺭﯛﻟﮕﻪﻧﻠﯩﻜﻰ، ﺋﯚﻳﻠﯩﺮﻯ ﺋﯚﺭﯛﻟﮕﻪﻧﻠﻪﺭﻧﯩﯔ ﮬﻪﻣﻤﯩﺴﯩﻨﯩﯔ ﭼﻪﺕ- ﭼﯧﮕﺮﺍ ﻳﯧﺰﯨﻼﺭﺩﯨﻜﻰ ﻧﺎﻣﺮﺍﺕ ﺋﯘﻳﻐﯘﺭ ﺩﯦﮭﻘﺎﻥ- ﭼﺎﺭﯞﯨﭽﯩﻠﯩﺮﻯ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﻜﻪﻥ ﺋﯩﺪﻯ.

ﺧﯩﺘﺎﻱ ﮬﯚﻛﯜﻣﯩﺘﯩﻨﯩﯔ ﺯﯗﯞﺍﻧﻰ ﺑﻮﻟﻐﺎﻥ ﺷﯩﻨﺨﯘﺋﺎ ﺋﺎﮔﯧﻨﺘﻠﯩﻘﯩﻨﯩﯔ ﺋﻪﯓ ﻳﯧﯖﻰ ﻣﻪﻟﯘﻣﺎﺗﻠﯩﺮﯨﺪﺍ ﺋﯧﻴﺘﯩﻠﯩﺸﯩﭽﻪ، ﭼﺎﺭﺷﻪﻧﺒﻪ ﻛﯜﻧﻰ ﭼﯜﺷﺘﯩﻦ ﻛﯧﻴﯩﻨﮕﯩﭽﻪ ﺋﯘﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ 89 ﺋﺎﺋﯩﻠﯩﻠﯩﻜﻨﯩﯔ ﺋﯚﻳﻰ ﺋﯚﺭﯛﻟﯜﭖ، 900 ﮔﻪ ﻳﯧﻘﯩﻦ ﺋﺎﺋﯩﻠﯩﻠﯩﻜﻨﯩﯔ ﺋﯚﻳﻰ ﻗﯩﺴﻤﻪﻥ ﯞﻩﻳﺮﺍﻥ ﺑﻮﻟﻐﺎﻥ. ﻳﻪﺭﻟﯩﻚ ﺩﺍﺋﯩﺮﯨﻠﻪﺭ ﺋﺎﭘﻪﺕ ﺭﺍﻳﻮﻧﻠﯩﺮﯨﺪﯨﻜﻰ ﺯﯨﻴﺎﻧﻐﺎ ﺋﯘﭼﺮﺍﺵ ﺋﻪﮬﯟﺍﻟﻠﯩﺮﯨﻨﻰ ﺩﺍﯞﺍﻣﻠﯩﻖ ﺗﻪﻛﺸﯜﺭﻣﻪﻛﺘﻪ ﺋﯩﻜﻪﻥ. (ﺋﺎﺭﺯﯗ)