ﺋﯜﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ 23 ﻣﯩﯖﺪﯨﻦ ﺋﻮﺷﯘﻕ ﻛﯩﺸﻰ ﻳﻪﺭ ﺗﻪﯞﺭﻩﺵ ﺋﺎﭘﯩﺘﯩﻨﯩﯔ ﺯﯨﻴﯩﻨﯩﻐﺎ ﺋﯘﭼﺮﯨﺪﻯ

• ﻣﯘﺧﺒﯩﺮﯨﻤﯩﺰ ﭘﻪﺭﯨﺪﻩﻧﯩﯔ ﺑﯘ ﮬﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﺋﯘﻳﻐﯘﺭ ﺋﯧﻠﻰ ﺋﯜﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﻩ 2 -ﺋﺎﻳﻨﯩﯔ 15 - ﻛﯜﻧﻰ ﻳﻪﺭﻟﯩﻚ ﯞﺍﻗﯩﺖ ﺋﻪﺗﯩﮕﻪﻥ 7 ﺩﯨﻦ 38 ﻣﯩﻨﯘﺕ ﺋﯚﺗﻜﻪﻧﺪﻩ ﻳﯜﺯ ﺑﻪﺭﮔﻪﻥ 6.2 ﺑﺎﻝ ﺩﻩﺭﯨﺠﯩﺪﯨﻜﻰ ﻳﻪﺭ ﺗﻪﯞﺭﻩﺵ، ﻣﻪﺯﻛﯘﺭ ﻧﺎﮬﯩﻴﯩﺪﯨﻜﻰ 8 ﻳﯧﺰﺍ ﯞﻩ 1 ﻛﻪﻧﺘﻜﻪ ﺗﻪﺳﯩﺮ ﻛﯚﺭﺳﻪﺗﻜﻪﻥ ﺑﻮﻟﯘﭖ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺩﻩﺳﻠﻪﭖ ﭼﯩﻘﺎﺭﻏﺎﻥ ﺳﯩﺘﺎﺗﯩﺴﺘﯩﻜﯩﺴﯩﻐﺎ ﻗﺎﺭﯨﻐﺎﻧﺪﺍ، ﻳﻪﺭ ﺗﻪﯞﺭﻩﺵ ﺋﺎﭘﯩﺘﯩﻨﯩﯔ ﺗﻪﺳﯩﺮﯨﮕﻪ ﺋﯘﭼﺮﯨﻐﺎﻥ ﺧﻪﻟﻘﻨﯩﯔ ﺳﺎﻧﻰ ﮬﺎﺯﯨﺮ 23400 ﺩﯨﻦ ﺋﺎﺷﻘﺎﻥ. ﮔﻪﺭﭼﻪ ﺑﯘ ﻳﻪﺭﺩﻩ ﺋﺎﺩﻩﻣﻠﻪﺭﻧﯩﯔ ﺯﯨﻴﺎﻥ-ﺯﻩﺧﻤﻪﺗﻜﻪ ﺋﯘﭼﺮﺍﺵ ﺋﻪﮬﯟﺍﻟﻰ ﻛﯚﺭﯛﻟﻤﯩﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﻗﻮﺗﺎﻧﻼﺭﻧﯩﯔ ﺋﯚﺭﯛﻟﯜﭖ ﭼﯜﺷﯜﺷﻰ ﺳﻪﯞﻩﺑﯩﺪﯨﻦ 237 ﺗﯘﻳﺎﻕ ﻣﺎﻝ-ﯞﺍﺭﺍﻥ ﺋﯚﻟﮕﻪﻥ.

ﮬﯧﭽﻜﯩﻢ ﻛﯧﻠﯩﭗ ﺑﯩﺰﻧﯩﯔ ﺋﻪﮬﯟﺍﻟﯩﻤﯩﺰﻧﻰ ﺳﻮﺭﺍﭖ ﺑﺎﻗﻤﯩﺪﻯ. ﮬﺎﯞﺍ ﻧﺎﮬﺎﻳﯩﺘﻰ ﺳﻮﻏﺎﻕ، ﺗﺎﻻﺩﺍ ﺗﯘﺭﯨﯟﺍﺗﯩﻤﯩﺰ.

ﺋﯜﭼﺘﯘﺭﭘﺎﻥ ﻧﺎﮬﯩﻴﯩﻠﯩﻚ ﺧﻪﻟﻖ ﮬﯚﻛﯜﻣﯩﺘﻰ ﺋﯧﻼﻥ ﻗﯩﻠﻐﺎﻥ ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﻣﻪﺯﻛﯘﺭ ﻳﻪﺭ ﺗﻪﯞﺭﻩﺵ ﺗﻪﺳﯩﺮﯨﺪﻩ ﺑﯘ ﺭﺍﻳﻮﻧﺪﯨﻜﻰ 1125 ﺋﺎﺋﯩﻠﯩﻠﯩﻜﻨﯩﯔ 4259 ﺋﯧﻐﯩﺮ ﺋﯚﻳﻰ ﺋﯚﺭﯛﻟﯜﭖ ﭼﯜﺷﯜﭖ، 4725 ﺋﺎﺋﯩﻠﯩﻠﯩﻜﻨﯩﯔ 18630 ﺋﯧﻐﯩﺮ ﺋﯚﻳﻰ ﺋﻮﺧﺸﯩﻤﯩﻐﺎﻥ ﺩﻩﺭﯨﺠﯩﺪﻩ ﺯﯨﻴﺎﻧﻐﺎ ﺋﯘﭼﺮﺍﭖ، ﺧﻪﺗﻪﺭﻟﯩﻚ ﺋﻪﮬﯟﺍﻟﺪﺍ ﻗﺎﻟﻐﺎﻥ. ﺷﯘﻧﺪﺍﻗﻼ ﺋﺎﭘﻪﺕ ﺗﻪﺳﯩﺮﯨﺪﻩ ﺑﯘ ﻳﻪﺭﺩﯨﻜﻰ ﺋﺎﺳﺎﺳﻠﯩﻖ ﻗﺎﺗﻨﺎﺵ ﻳﻮﻟﻠﯩﺮﻯ ﻳﯧﺮﯨﻠﯩﺶ ﮬﻪﺗﺘﺎ ﭼﯚﻛﯜﭖ ﻛﯧﺘﯩﺶ ﺷﯘﻧﺪﺍﻗﻼ ﺑﻪﺯﻯ ﺳﯘ ﺋﯧﻠﯧﻜﺘﯩﺮ ﺋﻪﺳﻠﯩﮭﻪﻟﯩﺮﻯ ﺑﯘﺯﯗﻟﯘﺷﻘﺎ ﺋﻮﺧﺸﺎﺵ ﺯﯨﻴﺎﻧﻼﺭﻣﯘ ﻛﯧﻠﯩﭗ ﭼﯩﻘﻘﺎﻥ.

ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ ﺯﯗﯞﺍﻧﻰ ﺑﻮﻟﻐﺎﻥ ﺷﯩﻨﺨﯘﺋﺎ ﺧﻪﯞﻩﺭ ﺗﻮﺭﯨﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ، ﺧﯩﺘﺎﻱ ﻳﻪﺭ ﺗﻪﯞﺭﻩﺵ ﺋﯩﺪﺍﺭﯨﺴﻰ ﯞﻩ ﺧﻪﻟﻖ ﺋﯩﺸﻠﯩﺮﻯ ﻣﯩﻨﯩﺴﺘﯩﺮﻟﯩﻘﯩﻨﯩﯔ ﺭﻩﮬﺒﻪﺭﻟﯩﺮﻯ ﭼﺎﺭﺷﻪﻧﺒﻪ ﻛﯜﻧﻰ ﺋﯜﭼﺘﯘﺭﭘﺎﻧﻐﺎ ﻛﯧﻠﯩﭗ، ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻨﻰ ﻛﯚﺯﺩﯨﻦ ﻛﻪﭼﯜﺭﮔﻪﻥ ﮬﻪﻣﺪﻩ ﺑﺎﺵ ﻣﯩﻨﯩﺴﺘﯩﺮ ﯞﯦﻦ ﺟﻴﺎﺑﺎﯞﻧﯩﯔ ﺳﺎﻟﯩﻤﯩﻨﻰ ﻳﻪﺗﻜﯜﺯﮔﻪﻥ.

ﮬﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ: ﺋﯘﻻﺭﻧﯩﯔ ﺗﯘﺭﺍﻟﻐﯘ ﺟﺎﻳﻠﯩﺮﻯ ﮬﻪﻝ ﺑﻮﻟﺪﻯ

ﮬﻪﻝ ﺑﻮﻟﺪﻯ. ﺑﯘ ﮬﻪﻝ ﺑﻮﻟﻤﯩﺴﺎ ﻗﻪﺗﺌﯩﻲ ﺑﻮﻟﻤﺎﻳﺪﯗ-ﺩﻩ. ﺑﯩﺰﻧﯩﯔ ﺑﯘ ﻳﻪﺭﺩﻩ ﺋﯩﻜﻜﻰ ﻛﯜﻧﺪﯨﻦ ﺑﯧﺮﻯ ﮬﺎﯞﺍ ﻳﺎﺧﺸﻰ ﺑﻮﻟﻤﯩﺪﻯ. ﺑﻪﻙ ﺳﻮﻏﯘﻕ ﮬﻪﻣﺪﻩ ﺗﻮﺧﺘﯩﻤﺎﻱ ﻗﺎﺭ ﻳﯧﻐﯩﭗ ﻛﯧﺘﯩﯟﺍﺗﯩﺪﯗ.

ﺧﻪﯞﻩﺭﺩﻩ ﻳﻪﻧﻪ، ﺧﯩﺘﺎﻳﻨﯩﯔ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﯩﺸﻠﻪﭘﭽﯩﻘﯩﺮﯨﺶ ﻗﯘﺭﯗﻟﯘﺵ ﺋﺎﺭﻣﯩﻴﯩﺴﻰ ﯞﻩ ﺋﺎﻗﺴﯘ ﯞﯨﻼﻳﻪﺗﻠﯩﻚ ﮬﻪﺭﺑﯩﻲ ﻗﯩﺴﯩﻤﻠﯩﺮﯨﻨﯩﯔ ﺋﺎﭘﻪﺕ ﺭﺍﻳﻮﻧﯩﻐﺎ 100 ﻣﯩﯔ ﻳﯘﺋﻪﻥ ﭘﯘﻝ ﯞﻩ 50 ﻣﯩﯔ ﻳﯘﺋﻪﻥ ﻗﯩﻤﻤﯩﺘﯩﺪﯨﻜﻰ ﻗﯘﺗﻘﯘﺯﯗﺵ ﺑﻮﻳﯘﻣﻠﯩﺮﯨﻨﻰ ﺋﯩﺌﺎﻧﻪ ﻗﯩﻠﻐﺎﻧﻠﯩﻘﻰ ﻳﯧﺰﯨﻠﻐﺎﻥ.

ﺑﯩﺰ ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﻳﻪﺭ ﺗﻪﯞﺭﻩﺷﻨﯩﯔ ﺗﻪﺳﯩﺮﯨﮕﻪ ﺑﯩﺮ ﻗﻪﺩﻩﺭ ﺋﯧﻐﯩﺮ ﺋﯘﭼﺮﯨﻐﺎﻥ ﻳﯧﯖﻰ ﺋﺎﯞﺍﺕ ﻳﯧﺰﯨﻠﯩﻖ ﮬﯚﻛﯜﻣﻪﺕ ﺑﯩﻠﻪﻥ ﺋﺎﻻﻗﯩﻼﺷﺘﯘﻕ. ﺑﯘ ﻳﻪﺭﺩﯨﻜﻰ ﻧﯚﯞﻩﺗﭽﻰ ﺧﺎﺩﯨﻢ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻨﯩﯔ ﺋﻮﯕﯘﺷﻠﯘﻕ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻧﻠﯩﻘﯩﻨﻰ ﮬﻪﻣﺪﻩ ﺋﯚﻳﻰ ﺋﯚﺭﯛﻟﯜﭖ ﭼﯜﺷﻜﻪﻥ ﻛﯩﺸﯩﻠﻪﺭﻧﯩﯔ ﮬﻪﻣﻤﯩﺴﯩﮕﻪ ﯞﺍﻗﯩﺘﻠﯩﻖ ﭼﯧﺪﯨﺮ ﺑﯧﺮﯨﻠﮕﻪﻧﻠﯩﻜﯩﻨﻰ ﺋﯧﻴﺘﺘﻰ:

-ﮬﻪﻣﻤﯩﺴﻰ ﭼﯧﺪﯨﺮ ﺋﯚﻳﻠﻪﺭﮔﻪ ﻛﯩﺮﺩﯨﻤﺎ؟ -ﮬﻪﺋﻪ، ﻛﯩﺮﺩﻯ. -ﺋﯘﻻﺭﻧﯩﯔ ﺗﯘﺭﺍﻟﻐﯘ ﺟﺎﻳﻠﯩﺮﻯ ﮬﻪﻝ ﺑﻮﻟﺪﯨﻤﯘ؟ -ﮬﻪﻝ ﺑﻮﻟﺪﻯ. ﺑﯘ ﮬﻪﻝ ﺑﻮﻟﻤﯩﺴﺎ ﻗﻪﺗﺌﯩﻲ ﺑﻮﻟﻤﺎﻳﺪﯗ-ﺩﻩ. ﺑﯩﺰﻧﯩﯔ ﺑﯘ ﻳﻪﺭﺩﻩ ﺋﯩﻜﻜﻰ ﻛﯜﻧﺪﯨﻦ ﺑﯧﺮﻯ ﮬﺎﯞﺍ ﻳﺎﺧﺸﻰ ﺑﻮﻟﻤﯩﺪﻯ. ﺑﻪﻙ ﺳﻮﻏﯘﻕ ﮬﻪﻣﺪﻩ ﺗﻮﺧﺘﯩﻤﺎﻱ ﻗﺎﺭ ﻳﯧﻐﯩﭗ ﻛﯧﺘﯩﯟﺍﺗﯩﺪﯗ.

ﺋﯘﻻﺭﻧﯩﯔ ﺗﯘﺭﺍﻟﻐﯘ ﺟﺎﻳﻠﯩﺮﻯ ﮬﻪﻝ ﺑﻮﻟﺪﯨﻤﯘ؟

ﺑﯩﺰ ﮬﯚﻛﯜﻣﻪﺕ ﺧﺎﺩﯨﻤﻠﯩﺮﻯ ﺋﯧﻴﺘﻘﺎﻧﺪﻩﻙ، ﺋﺎﭘﻪﺕ ﺭﺍﻳﻮﻧﯩﺪﯨﻜﻰ ﺯﯨﻴﺎﻧﻐﺎ ﺋﯘﭼﺮﯨﻐﺎﻥ ﺧﻪﻟﻘﻠﻪﺭﻧﯩﯔ ﮬﻪﻣﻤﯩﺴﻰ ﻳﺎﺭﺩﻩﻣﮕﻪ ﺋﯧﺮﯨﺸﻪﻟﯩﺪﯨﻤﯘ-ﻳﻮﻕ؟ ﺩﯦﮕﻪﻧﻨﻰ ﺋﯧﻨﯩﻘﻼﺵ ﺋﯜﭼﯜﻥ، ﺋﯜﭼﺘﯘﺭﭘﺎﻥ ﻧﺎﮬﯩﻴﯩﺴﯩﺪﯨﻜﻰ ﮬﻪﺭ ﻗﺎﻳﺴﻰ ﻳﯧﺰﺍ-ﻛﻪﻧﺘﻠﻪﺭﮔﻪ ﺗﯧﻠﯧﻔﻮﻥ ﺋﺎﭼﺘﯘﻕ.

ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﻨﯩﯔ ﻣﻪﻟﯘﻡ ﺑﯩﺮ ﻛﻪﻧﺘﯩﺪﯨﻜﻰ ﺋﯩﺴﻤﯩﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ ﺑﯩﺮ ﺋﯘﻳﻐﯘﺭ، ﮬﺎﺯﯨﺮ ﺋﯚﺯﯨﻨﯩﯔ ﺋﺎﺋﯩﻠﯩﺴﯩﺪﯨﻜﯩﻠﻪﺭ ﺑﯩﻠﻪﻥ ﺩﻩﺯ ﻛﻪﺗﻜﻪﻥ ﺋﯚﻳﺪﻩ ﺗﯘﺭﯨﯟﺍﺗﻘﺎﻧﻠﯩﻘﯩﻨﻰ، ﮔﻪﺭﭼﻪ ﺋﯘﻻﺭ ﻛﻪﻧﺘﺘﻪ ﺑﯩﺮ-ﺋﯩﻜﻜﻰ ﭼﯧﺪﯨﺮ ﺳﯧﻠﯩﻨﻐﺎﻧﻠﯩﻘﯩﻨﻰ ﺋﺎﯕﻠﯩﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘﻧﻰ ﻛﯚﺭﯛﭖ ﺑﺎﻗﻤﯩﻐﺎﻧﻠﯩﻘﯩﻨﻰ ﮬﻪﺗﺘﺎ ﺑﯘ ﻛﻪﻧﺘﺘﻪ ﺋﯚﻳﻰ ﭘﯜﺗﯜﻧﻠﻪﻱ ﺋﯚﺭﯛﻟﯜﭖ ﭼﯜﺷﯜﭖ، 3 ﻛﯜﻧﺪﯨﻦ ﺑﯧﺮﻯ ﺗﺎﻻﺩﺍ ﻗﺎﻟﻐﺎﻥ ﻛﯩﺸﯩﻠﻪﺭﻧﯩﯖﻤﯘ ﺑﺎﺭﻟﯩﻘﯩﻨﻰ ﺋﯧﻴﺘﺘﻰ.

20 ﻣﯩﯔ ﻛﯩﺸﯩﮕﻪ 300 ﭼﯧﺪﯨﺮ

ﮬﯚﻛﯜﻣﻪﺕ 300 ﭼﯧﺪﯨﺮ ﻳﻮﻟﻠﯩﻐﺎﻥ. ﺑﯩﺮﺍﻕ، ﺋﺎﭘﻪﺗﻜﻪ ﺋﯘﭼﺮﯨﻐﺎﻧﻼﺭ 20000 ﺩﯨﻦ ﺋﺎﺷﻘﺎﻧﻠﯩﻘﻰ ﺋﯜﭼﯜﻥ ﭼﯧﺪﯨﺮﻻﺭ ﻳﯧﺘﯩﺸﻤﻪﻳﯟﺍﺗﯩﺪﯗ.

ﺋﯜﭼﺘﯘﺭﭘﺎﻥ ﻧﺎﮬﯩﻴﯩﻠﯩﻚ ﺧﻪﻟﻖ ﮬﯚﻛﯜﻣﯩﺘﯩﺪﯨﻜﻰ ﺋﯩﺌﺎﻧﻪ ﺗﻮﭘﻼﺵ ﺋﯩﺸﻠﯩﺮﯨﻐﺎ ﻣﻪﺳﺌﯘﻝ ﺧﯘ ﻓﺎﻣﯩﻠﯩﻠﯩﻚ ﺑﯩﺮ ﺧﯩﺘﺎﻱ ﻛﺎﺩﯨﺮ، ﺋﯚﺯﯨﻨﯩﯔ ﻧﻪﻕ ﻣﻪﻳﺪﺍﻧﻨﻰ ﻛﯚﺭﯛﭖ ﻛﻪﻟﮕﻪﻧﻠﯩﻜﯩﻨﻰ، ﺷﯘﻧﺪﺍﻗﻼ ﺋﯘ ﻳﻪﺭﺩﯨﻜﻰ ﺋﻪﮬﯟﺍﻟﻨﯩﯔ ﺗﻮﻟﯩﻤﯘ ﺋﯧﭽﯩﻨﯩﺸﻠﯩﻖ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺑﯘ ﺧﺎﺩﯨﻤﻨﯩﯔ ﺋﯧﻴﺘﯩﺸﯩﭽﻪ، ﺋﺎﭘﺘﻮﻧﻮﻡ ﺭﺍﻳﻮﻥ ﺑﯘ ﺟﺎﻳﻐﺎ 300 ﺩﺍﻧﻪ ﭼﯧﺪﯨﺮ ﻳﻮﻟﻠﯩﻐﺎﻥ. ﺋﻪﻣﻤﺎ ﺑﯘ ﻳﻪﺭﺩﯨﻜﻰ ﺋﺎﭘﻪﺕ ﺯﯨﻴﯩﻨﯩﻐﺎ ﺋﯘﭼﺮﯨﻐﺎﻥ ﺧﻪﻟﻘﻠﻪﺭ 20 ﻣﯩﯖﺪﯨﻦ ﺋﺎﺷﻘﺎﻧﻠﯩﻘﻰ ﺋﯜﭼﯜﻥ، ﮬﺎﺯﯨﺮ ﻧﯘﺭﻏﯘﻥ ﻛﯩﺸﯩﻠﻪﺭﮔﻪ ﭼﯧﺪﯨﺮ ﺋﯚﻳﻠﻪﺭ ﻳﯧﺘﯩﺸﻤﻪﻳﯟﺍﺗﻘﺎﻥ ﺋﯩﻜﻪﻥ.

ﺑﯩﺰﻧﯩﯔ ﺋﯩﮕﯩﻠﯩﮕﻪﻥ ﺋﯘﭼﯘﺭﻟﯩﺮﯨﻤﯩﺰﻧﻰ ﻳﯩﻐﯩﻨﭽﺎﻗﻠﯩﻐﺎﻧﺪﺍ، ﻳﻪﺭ ﺗﻪﯞﺭﻩﺵ ﺗﻪﺳﯩﺮﯨﮕﻪ ﺋﯧﻐﯩﺮ ﺋﯘﭼﺮﯨﻐﺎﻥ ﻳﯧﯖﻰ ﺋﺎﯞﺍﺕ، ﺋﯩﻤﺎﻣﻠﯩﺮﯨﻢ ﯞﻩ ﻳﺎﻣﺎﻧﺴﯘ ﻳﯧﺰﯨﻠﯩﺮﯨﻨﯩﯔ ﺑﺎﺯﺍﺭﻏﺎ ﻳﯧﻘﯩﻦ ﺟﺎﻳﻠﯩﺮﯨﺪﯨﻜﻰ ﺑﯩﺮ ﻗﯩﺴﯩﻢ ﻛﯩﺸﯩﻠﻪﺭ ﮬﻪﻗﯩﻘﻪﺗﻪﻥ ﭼﯧﺪﯨﺮ ﺋﯚﻳﻠﻪﺭﮔﻪ ﻛﯩﺮﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ 5-، 6 - ﺋﻪﺗﺮﻩﺗﻜﻪ ﺋﻮﺧﺸﺎﺵ ﭼﻪﺕ-ﻳﺎﻗﺎ ﺟﺎﻳﻼﺭﻏﺎ ﻳﺎﺭﺩﻩﻡ ﺑﻮﻳﯘﻣﻠﯩﺮﻯ ﺗﯧﺨﻰ ﻳﯧﺘﯩﭗ ﺑﺎﺭﻣﯩﻐﺎﻥ.

ﺋﯘﻻﺭ ﭼﯧﺪﯨﺮ ﺋﯚﻳﻠﻪﺭﺩﻩ 6 - ﺋﺎﻳﻐﯩﭽﻪ ﺋﻮﻟﺘﯘﺭﯗﺷﻰ ﻣﯘﻣﻜﯩﻦ

ﺑﯩﺰ، ﺋﯩﻤﺎﻣﻠﯩﺮﯨﻢ ﻳﯧﺰﯨﺴﯩﺪﯨﻜﻰ ﺋﯚﻳﻰ ﭘﯜﺗﯜﻧﻠﻪﻱ ﺋﯚﺭﯛﻟﯜﭖ ﭼﯜﺷﯜﭖ، ﺋﺎﺋﯩﻠﯩﺴﯩﺪﯨﻜﻰ 5-6 ﻛﯩﺸﻰ ﺑﯩﺮ ﭼﯧﺪﯨﺮﺩﺍ ﻳﯧﺘﯩﺸﻘﺎ ﻣﻪﺟﺒﯘﺭ ﺑﻮﻟﻐﺎﻥ ﺑﯩﺮ ﺧﺎﻧﯩﻢ ﺑﯩﻠﻪﻥ ﺋﺎﻻﻗﯩﻠﯩﺸﯩﺶ ﭘﯘﺭﺳﯩﺘﯩﮕﻪ ﺋﯩﮕﻪ ﺑﻮﻟﺪﯗﻕ. ﺋﯘ ﺋﯚﺯﻟﯩﺮﯨﻨﯩﯔ ﺋﻪﮬﯟﺍﻟﯩﻨﻰ ﭼﯜﺷﻪﻧﺪﯛﺭﯛﭖ، ﻣﻪﺯﻛﯘﺭ ﻳﯧﺰﯨﺪﯨﻜﻰ ﺑﻪﺵ-ﺋﺎﻟﺘﻪ ﺋﺎﺋﯩﻠﯩﮕﻪ ﭼﯧﺪﯨﺮ ﺑﯩﺮﯨﻠﮕﻪﻧﻠﯩﻜﯩﻨﻰ، ﻗﺎﻟﻐﺎﻧﻼﺭﻧﯩﯔ ﻳﻪﻧﯩﻼ ﺗﯧﺸﯩﺪﺍ ﻳﯧﺘﯩﺸﻘﺎ ﻣﻪﺟﺒﯘﺭ ﺑﻮﻟﻐﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺑﯘ ﺧﺎﻧﯩﻤﻨﯩﯔ ﺋﯧﻴﺘﯩﺸﯩﭽﻪ ﻳﻪﻧﻪ، ﺋﯘﻻﺭ ﺑﯘ ﭼﯧﺪﯨﺮ ﺋﯚﻳﻠﻪﺭﺩﻩ 6 - ﺋﺎﻳﻐﯩﭽﻪ ﺋﻮﻟﺘﯘﺭﯗﺷﻰ ﻣﯘﻣﻜﯩﻦ ﺋﯩﻜﻪﻥ. ﻟﯧﻜﯩﻦ ﺋﯚﺭﯛﻟﯜﭖ ﭼﯜﺷﻜﻪﻥ ﺋﯚﻳﻠﻪﺭﻧﯩﯔ ﺋﻮﺭﻧﯩﻐﺎ ﺳﯧﻠﯩﻨﯩﺪﯨﻐﺎﻥ ﻳﯧﯖﻰ ﺋﯚﻳﻠﻪﺭﻧﯩﯔ ﭼﯩﻘﯩﻤﯩﻨﻰ ﮬﯚﻛﯜﻣﻪﺕ ﻛﯚﺗﯜﺭﻩﻣﺪﯗ ﻳﺎﻛﻰ ﺋﯚﺯﻟﯩﺮﻯ ﻳﯧﻨﯩﺪﯨﻦ ﭼﯩﻘﯩﺮﺍﻣﺪﯗ، ﺑﯘﻧﻰ ﺗﯧﺨﻰ ﺋﯧﻨﯩﻖ ﺑﯩﻠﻤﻪﻳﺪﯨﻜﻪﻥ.

ﺑﯘ ﺭﺍﻳﻮﻧﻼﺭﺩﺍ ﮬﺎﺯﯨﺮﻏﯩﭽﻪ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺷﻠﻪﺭ ﺩﺍﯞﺍﻣﻠﯩﻖ ﻳﯜﺯ ﺑﯧﺮﯨﯟﺍﺗﻘﺎﻥ ﺑﻮﻟﯘﭖ، ﻣﯘﻧﺎﺳﯩﯟﻩﺗﻠﯩﻚ ﻳﻪﺭ ﺗﻪﯞﺭﻩﺷﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺋﻮﺭﯗﻧﻠﯩﺮﻯ ﺋﻪﮔﻪﺷﻤﻪ ﻳﻪﺭ ﺗﻪﯞﺭﻩﺷﻨﯩﯔ 7 ﻛﯜﻧﺪﯨﻦ 10 ﻛﯜﻧﮕﯩﭽﻪ ﺩﺍﯞﺍﻡ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﻣﯚﻟﭽﻪﺭﻟﯩﻤﻪﻛﺘﻪ.

ﺋﯘﻳﻐﯘﺭ ﺋﯧﻠﻰ ﺋﺎﻗﺴﯘ ﯞﯨﻼﻳﯩﺘﯩﻨﯩﯔ ﺋﯜﭼﺘﯘﺭﭘﺎﻥ ﻧﺎﮬﯩﻴﯩﺴﻰ 180 ﻣﯩﯔ ﻧﻮﭘﯘﺳﻘﺎ ﺋﯩﮕﻪ ﺑﻮﻟﯘﭖ، ﺑﯘﻧﯩﯔ 97٪ ﺋﻰ ﺋﯘﻳﻐﯘﺭﻻﺭﺩﯗﺭ. ﻳﻪﺭ ﺗﻪﯞﺭﻩﺵ ﺗﻪﺳﯩﺮﯨﮕﻪ ﺋﯧﻐﯩﺮ ﺋﯘﭼﺮﯨﻐﺎﻥ 16 ﻣﯩﯖﻐﺎ ﻳﯧﻘﯩﻦ ﻧﻮﭘﯘﺳﻰ ﺑﺎﺭ ﻳﯧﯖﻰ ﺋﺎﯞﺍﺕ ﻳﯧﺰﯨﺴﯩﻨﯩﯖﻤﯘ 98٪ ﺋﻰ ﺋﯘﻳﻐﯘﺭﻻﺭ. (ﭘﻪﺭﯨﺪﻩ)